Novas da lingua

Rexistros3511 a 3540 de 4427
  1. Inicio
  2. CDSG-CCG
  3. Novas da lingua
12/02/2013. AXUDAS E PREMIOS

IX Premio a artigos xornalísticos normalizadores

O Servizo de Normalización Lingüística do Concello de Carballo convoca a novena edición deste premio que ten como obxectivo principal promover a reflexión sobre a situación social da lingua galega e crear espazos nos xornais para analizar este tema. Outorgarase un único premio de 1000 euros, ademais da publicación do artigo gañador en todos os medios de comunicación que colaboran coa iniciativa.

O prazo de presentación dos artigos remata o 11 de abril de 2013. Se desexa consultar as bases, prema aquí.
08/02/2013. AXUDAS E PREMIOS

Subvencións ás entidades locais para a promoción do galego

A Secretaría Xeral de Política Lingüística convoca subvencións destinadas á creación, mantemento ou reforzamento de servizos de normalización lingüística nas entidades locais, así como ao desenvolvemento de proxectos de dinamización lingüística en municipios que carezan de servizo. Poderán acollerse a estas axudas os concellos ou agrupacións de concellos con poboación igual ou superior aos 3000 habitantes.

O prazo de presentación de solicitudes é dun mes, contado a partir do día seguinte ao da publicación desta convocatoria.
(corrección de erros)
07/02/2013. DINAMIZACIóN

Recursos para traballar o Entroido nas aulas

A Coordinadora Galega de ENDL pon á disposición de toda a comunidade educativa unha nova compilación de recursos didácticos deseñados para traballar o Entroido nas aulas.

Neste monográfico poderá atopar, entre outros recursos, unidades didácticas, xogos, manualidades, información bibliográfica, literatura ou audiovisual relacionado con esta celebración tradicional.
06/02/2013. INVESTIGACIóN

Preséntase un dicionario trilingüe de alimentación e restauración

Onte, 5 de febreiro de 2013, tivo lugar na sede da asociación Hostelería Compostela a presentación pública do Dicionario de alimentación e restauración galego-castelán-inglés, elaborado polo Servizo de Terminoloxía Científico-Técnica Galega (TERMIGAL).

A obra, deseñada para contribuír á normalización da terminoloxía gastronómica e promover o uso do galego entre os profesionais do sector, recolle arredor de 3000 conceptos, con 3600 denominacións en galego, 3700 equivalencias en castelán e 3500 en inglés, ademais de 320 nomes científicos.

Para ampliar esta información, preme aquí.
05/02/2013. DINAMIZACIóN

Redondela aposta polo cinema en galego

O Servizo de Normalización Lingüística do Concello de Redondela organiza Versión Orixinal, un ciclo de cinema que ten como finalidade difundir obras audiovisuais en galego e promover o uso do noso idioma no ámbito do lecer.

O ciclo desenvolverase entre os días 17 de febreiro e 9 de marzo de 2013. Nesta edición exhibiranse as obras Vilamor, dirixida por Ignacio Vilar; Engurras, dirixida por Ignacio Ferreras; e O Apóstolo, dirixida por Fernando Cortizo. Para obter máis información, preme aquí.
05/02/2013. DINAMIZACIóN

Nós tamén creamos!

A Consellería de Cultura, Educación e Ordenación Universitaria convoca a segunda edición do programa Nós tamén creamos!, dirixido a centros públicos de educación infantil e primaria co ánimo de estimular o uso da lingua e a creatividade dos máis pequenos/as.
05/02/2013. DINAMIZACIóN

Nace a Asociación de Medios en Galego

Dez cabeceiras galegas (Tempos Novos, Novas da Galiza, Galicia Confidencial, Que Pasa na Costa, Xornal Certo, Radiofusión, de Luns a Venres, Praza Pública, O Compás e Valminor.info) acaban de constituír a Asociación de Medios en Galego, co obxectivo de promover os medios de comunicación en galego, contribuír á profesionalización do sector e, en xeral, atender á defensa dos intereses dos asociados.
A iniciativa está a aberta a todos os medios editados en galego que desexen formar parte. A solicitude pode facerse enviando un correo electrónico a contacto@mediosengalego.org.

Para ampliar esta información, preme aquí.

05/02/2013. DINAMIZACIóN

Doces sobremesas de Entroido en Betanzos

O Servizo de Normalización Lingüística do Concello de Betanzos organiza o concurso Doces sobremesas de Entroido. Todas as persoas que desexen participar no certame poden enviar as súas receitas, que deben ser típicas destas datas de Entroido, escritas en lingua galega.

O prazo de entrega remata o 8 de febreiro de 2013. Ese mesmo día (ás 20:00 h, no Salón Azul do edificio Liceo) terá lugar a degustación dos pratos por parte do xurado. O gañador/a recibirá como premio unha cea para dúas persoas nun restaurante de Betanzos. Ao finalista entregaráselle un libro de cociña.
01/02/2013. AXUDAS E PREMIOS

Axudas para a edición en lingua galega de materiais didácticos

A Consellería de Cultura, Educación e Ordenación Universitaria publica a convocatoria de subvencións para a edición en lingua galega de recursos didácticos curriculares para niveis non universitarios.
As axudas están dirixidas ás empresas mercantís do sector editorial e o prazo para a presentación de solicitudes é dun mes, contado a partir do día seguinte ao da publicación desta convocatoria.
01/02/2013. AXUDAS E PREMIOS

Concurso de cartas de amor en Radio Fene

Co gallo da conmemoración do 2 de febreiro (Día da Candeloria no que casan os paxariños) e mais do 14 de febreiro (Día dos Namorados), a emisora municipal Radio Fene convoca unha nova edición do Certame de Cartas de Amor, que organiza desde hai quince anos.

As cartas, en prosa ou en verso, deben estar redactadas en lingua galega e non superar a extensión dun folio, ou 1650 caracteres. O premio consiste nunha cea e unha noite romántica no Hotel Hesperia Ferrol.

O prazo para participar remata o 12 de febreiro de 2013.
30/01/2013. DINAMIZACIóN

En galego enténdote, non cambies

O Concello de Xove, en colaboración coas entidades deportivas do municipio, está a desenvolver desde o pasado mes de outubro de 2012 a campaña de dinamización lingüística "En galego enténdote, non cambies", deseñada para fomentar o uso do galego no ámbito do deporte e promover o mantemento do idioma entre a poboación galegofalante.

No marco desta iniciativa desenvolvéronse dúas accións: un servizo de asesoramento lingüístico ás entidades deportivas e unha campaña gráfica que consistiu na colocación de cinco carteis publicitarios coa imaxe de deportistas de referencia do municipio e o lema “En galego enténdote, non cambies”.

Para obter máis información, preme aquí.
24/01/2013. OUTRAS

Táboas, para falar de deporte galego en galego

Nace Táboas, un novo medio dixital en lingua galega especializado en deporte galego. O equipo redactor comprométese a ofrecer as principais novidades deportivas tratando con equidade os temas relacionados coas diferentes disciplinas (fútbol, baloncesto, patinaxe, competicións de motor…).

Esta iniciativa, que supón un novo pulo para a introdución do galego no ámbito do deporte, súmase a outras como Zonapress, a primeira publicación sobre baloncesto en galego, que botou a andar o pasado mes de outubro de 2012.
22/01/2013. DINAMIZACIóN

O Entroido sabe mellor en galego

O Servizo de Normalización Lingüística do Concello de Oroso convoca unha nova edición do concurso de receitas de Entroido “En galego sabe mellor”. As receitas deben ser típicas do Entroido e estar redactadas en lingua galega.

O prazo de entrega remata o 5 de febreiro de 2013, ás 14:00 h. Con posterioridade, no día sinalado pola organización, os participantes deberán presentar tamén o prato cociñado. A persoa gañadora será premiada cunha cea para dúas persoas nun restaurante do concello e ao/á finalista entregaráselle un libro de cociña.

Para ampliar esta información, preme aquí.
22/01/2013. DINAMIZACIóN

Nova andaina do Correlingua

Bota a andar unha nova edición do Correlingua, iniciativa lúdico-didáctica que este ano 2013 levará por lema “Galego: a chave do mundo”.
O Correlingua comezará o vindeiro 2 de maio en Ourense e percorrerá durante dúas semanas diferentes comarcas do país, ata rematar o 16 de maio na Mariña.

Durante estes meses previos, os centros educativos desenvolverán diferentes actividades lúdico-educativas na aula para introducir a actividade e o alumnado poderá participar en diferentes concursos (vídeo, banda deseñada, elaboración de manifesto e cantalingua).
22/01/2013. CURSOS E CONGRESOS

Accesibles os audios das IX Xornadas sobre Lingua e Usos

Xa están accesibles, no web do Servizo de Normalización Lingüística da Universidade da Coruña, as gravacións dos relatorios das IX Xornadas sobre Lingua e Usos. Lingua e Tradución, que tiveron lugar os pasados días 28, 29 e 30 de novembro de 2012 na Coruña.

Neste mesmo sitio web podes consultar tamén as actas das edicións anteriores destas xornadas, que o SNL da UDC organiza anualmente para reflexionar sobre a situación do idioma galego nos diferentes ámbitos sociais.
21/01/2013. CURSOS E CONGRESOS

A debate a promoción da oralidade no ensino

A Coordinadora Galega de ENDL organiza o III Encontro de equipos e de docentes pola normalización, dirixido a coordinadores/as e membros de equipos de dinamización da lingua galega e demais docentes interesados na normalización lingüística no ensino.

A xornada, que nesta edición estará centrada na promoción da oralidade en galego no ámbito educativo, desenvolverase o 2 de febreiro de 2013 no IES As Fontiñas (Santiago de Compostela).


21/01/2013. AXUDAS E PREMIOS

Subvencións para proxectos de fomento do galego no ensino público

A Consellería de Cultura, Educación e Ordenación Universitaria convoca axudas para proxectos de fomento do galego nos centros de ensino non universitario de titularidade pública, para desenvolver no curso 2012-2013.

O prazo de presentación de solicitudes e documentación remata o 14 de febreiro de 2013.
Se desexas consultar o texto completo da convocatoria, preme aquí.
21/01/2013. DINAMIZACIóN

XIX Ponte… nas ondas! 2013. Ponte… a brincar!

A Asociación Cultural e Pedagóxica Ponte...nas ondas! organiza unha nova edición desta experiencia educativa de comunicación interescolar que nesta ocasión, baixo o lema “Ponte… a brincar!”, se centrará na transmisión do patrimonio lúdico galego-portugués.

Os organizadores convidan a comunidade educativa a participar na XIX Xornada Multimedia e mais no VII Certame de Recolla da Tradición Oral Galego-Portuguesa.

Para ampliar esta información, preme aquí.
18/01/2013. CURSOS E CONGRESOS

Rosalía de Castro no século XXI. Unha nova ollada

Con motivo da conmemoración do 150 aniversario da publicación de Cantares gallegos, obra fundacional do Rexurdimento das letras galegas, o Consello da Cultura Galega organiza o congreso Rosalía de Castro no século XXI. Unha nova ollada, estruturado en cinco xornadas que terán lugar entre os meses de febreiro e xuño de 2013.
17/01/2013. CURSOS E CONGRESOS

Congreso Internacional sobre Linguas Europeas en Perigo de Extinción

O Centro Interdisciplinar de Documentação Lingüística e Social organiza o Congreso Internacional sobre Linguas Europeas en Perigo de Extinción, que terá lugar os días 17 e 18 de outubro de 2013 en Minde (Portugal), co obxectivo de promover a reflexión sobre a diversidade lingüística en Europa.

O comité organizador convida a especialistas e estudosos/as dos ámbitos da documentación lingüística, a tecnoloxía lingüística e a diversidade lingüística a participar presentando comunicacións. O prazo para enviar as propostas remata o 31 de maio de 2013.

Se desexas ampliar esta información, preme aquí.
16/01/2013. OUTRAS

Probas para a obtención dos certificados de lingua galega

A Secretaría Xeral de Política Lingüística convoca as probas para a obtención dos Celga 1, 2, 3 e 4 que se desenvolverán neste ano 2013. Poderán presentarse a estas probas todas as persoas maiores de 16 anos ou que os cumpran antes de finais do ano 2013.

O prazo para a presentación de solicitudes remata o 3 de abril de 2013.

Para consultar o texto completo da convocatoria, preme aquí. (corrección de erros)
15/01/2013. DINAMIZACIóN

Calendario Roberto Vidal Bolaño, un home do aquí

A Coordinadora Galega de Equipos de Normalización e Dinamización Lingüística está a difundir no seu web o Calendario Roberto Vidal Bolaño 2013, editado polo EDLG do IES Lagoa de Antela de Xinzo de Limia.

Con esta iniciativa quérese render homenaxe á figura do dramaturgo, actor, guionista e director Roberto Vidal Bolaño, a quen a Real Academia Galega lle dedica este ano o Día das Letras Galegas.
15/01/2013. DINAMIZACIóN

As razóns dos novos/as galegos/as para aprender galego

O Servizo de Normalización Lingüística do Concello de Carballo presenta o vídeo Nov@s galeg@s que queren falar galego, realizado no marco do Obradoiro de integración lingüística e cultural que organizou este SNL en 2012.

O vídeo recolle as razóns e as motivacións que os participantes neste obradoiro teñen para aprender galego, o que o converte nun documento interesante para achegarse ás actitudes lingüísticas do colectivo de inmigrantes e emigrantes retornados residentes en Galicia.
11/01/2013. LEXISLACIóN

Edítase a primeira versión en galego da Constitución de 1812

Co gallo do centenario da súa promulgación, O Consello da Cultura Galega presenta a primeira edición en lingua galega da Constitución Política da Monarquía Española promulgada en Cádiz o 19 de marzo de 1812 e do Discurso preliminar lido nas Cortes ao presentar a Comisión de Constitución o seu proxecto.
09/01/2013. AXUDAS E PREMIOS

Axudas para a dinamización lingüística no ámbito educativo

A Consellería de Educación e Ordenación Universitaria presenta as bases para a realización de proxectos de innovación en dinamización lingüística, para desenvolver en centros de ensino dependentes desta consellería no curso académico 2012-2013.

De entre todos os proxectos presentados seleccionaranse cinco, considerados como excelentes, que serán premiados con cadansúa axuda de 2000 euros.

O prazo de presentación de solicitudes é dun mes, contado a partir do día seguinte ao da publicación da convocatoria.
09/01/2013. EMPREGO

Bolsas de prácticas laborais para titulados/as en Filoloxía Galega

A Deputación de Pontevedra convoca bolsas de prácticas laborais para titulados/as universitarios/as, menores de 31 anos e sen experiencia laboral previa, que desenvolverán as tarefas tanto nos servizos e centros dependentes da Deputación, como en diferentes concellos da provincia.
07/01/2013. CURSOS E CONGRESOS

Cursos de lingua galega para adultos e colectivos de Galicia

A Secretaría Xeral de Política Lingüística publica a convocatoria de cursos de lingua galega preparatorios para as probas dos niveis Celga 1, Celga 2, Celga 3 e Celga 4, destinados a adultos e colectivos de Galicia.

O prazo de presentación de solicitudes remata o 25 de xaneiro de 2013. Para consultar o texto completo da convocatoria, preme aquí.
04/01/2013. CURSOS E CONGRESOS

Simposio sobre Dialectoloxía Perceptiva

A rede de investigación Tecnoloxías e Análise dos Datos Lingüísticos organiza o simposio Metodoloxía para o estudo perceptivo da variación prosódica dialectal, que se desenvolverá durante os días 17 e 18 de xaneiro de 2013 na Facultade de Filoloxía da Universidade de Santiago de Compostela. As conferencias e seminarios tamén se poden seguir en liña a través de Adobe - Connect.

A matrícula é de balde e o prazo de inscrición remata o vindeiro 15 de xaneiro. Para obter máis información sobre os trámites de inscrición, preme aquí.

20/12/2012. DINAMIZACIóN

Gústanos o galego!

A Coordinadora de Traballadores/as de Normalización da Lingua presenta o vídeo Gústame… o galego!, xerado a partir da campaña que, co mesmo nome, se desenvolveu no marco do Culturgal 2012.
20/12/2012. INVESTIGACIóN

Nova Escola Galega opina sobre a lingua no ensino

Ante o debate social xerado polos últimos acontecementos no ámbito educativo, Nova Escola Galega presenta un novo número da súa publicación periódica NEG Opina, co ánimo de contribuír á reflexión sobre o papel que debe ocupar o galego no sector do ensino.

Neste novo número, que leva por título Lingua e ensino: regreso ao pasado?, reflexiónase sobre o papel das linguas previsto no anteproxecto da LOMCE, analízanse as últimas sentenzas do TSXG en relación ao Decreto do Plurilingüismo e valóranse os datos da aplicación deste Decreto nas aulas e mais o informe emitido polo Consello de Europa sobre a aplicación en Galicia da Carta europea das linguas minoritarias e rexionais.