Novas da lingua

Rexistros3751 a 3780 de 5280
  1. Inicio
  2. CDSG-CCG
  3. Novas da lingua
17/11/2011. CURSOS E CONGRESOS

V Xornadas “Xustiza e lingua, reflexións para a normalización”

O Servizo de Asesoramento Lingüístico do Colexio de Avogados de Santiago de Compostela organiza, en colaboración coa Xunta de Galicia, a quinta edición da xornada Xustiza e lingua, reflexións para a normalización, que ten como obxectivo principal promover a reflexión sobre o proceso de normalización lingüística no ámbito da xustiza.

A xornada terá lugar o vindeiro 28 de novembro de 2011, ás 18:00 h, no salón de actos do colexio de avogados compostelán.

17/11/2011. AXUDAS E PREMIOS

Concurso de presentacións electrónicas de Nadal

A Secretaría Xeral de Política Lingüística organiza un
concurso de presentacións de Nadal en formato dixital, co ánimo de fomentar o uso da lingua galega nas comunicacións propias destas festas.

As presentacións (formato .odp, .ppt ou .pptx) deben ter unha extensión máxima de 10 diapositivas, incorporar texto en galego e estar tematicamente relacionadas coas felicitacións propias do Nadal.

Os autores/as das tres presentacións gañadoras recibirán un lote de produtos de lecer en galego.

O prazo para enviar as propostas remata o 9 de decembro de 2011.

Se desexa máis información, prema aquí.
24/11/2011. AXUDAS E PREMIOS

Resólvese o VIII Premio Luísa Villalta a Iniciativas Normalizadoras

O xurado do VIII Premio Luísa Villalta fixo pública a resolución na que se recollen os traballos premiados na oitava edición deste certame.

O traballo premiado na modalidade de “Deseño dunha campaña de promoción da lingua galega” foi “O galego constrúe. Constrúe o galego”, autoría de Luís Suárez López, alumno de Enxeñaría Naval e Oceánica na Escola Politécnica Superior de Ferrol. Na modalidade “Premio a unha idea para a promoción do galego” resultaron gañadores ex aequo os traballos “O poder das palabras” e “Proxéctate en galego”, autoría, respectivamente, de Alejandro Gradaílle Montero, estudante de Comunicación Audiovisual no campus da Coruña, e María Marta López Alonso, que presentou o traballo en nome das comisións de normalización lingüística dos centros universitarios do campus de Lugo.

Se desexa máis información, prema aquí.
17/11/2011. CURSOS E CONGRESOS

XIII Congreso Internacional sobre Lingua e Psicoloxía Social

A Rede Mercator e mais a Asociación Internacional de Lingua e Psicoloxía Social organizan o XIII Congreso Internacional sobre Lingua e Psicoloxía Social, que terá lugar entre os días 20 e 23 de xuño de 2012 na cidade de Ljouwert/Leeuwarden (Frisia, Países Baixos).

Os organizadores convidan a todas as persoas que estean a investigar en temas relacionados cos usos sociais das linguas a participar enviando as súas propostas de comunicación antes do 14 de febreiro de 2012.


09/11/2011. AXUDAS E PREMIOS

Entrega dos XXI Premios San Martiño de Normalización Lingüística

Mañá, xoves 10 de novembro, ás 20:00 h, terá lugar no Teatro Principal da Estrada o acto de entrega dos XXI Premios San Martiño de Normalización Lingüística, que concede a Asociación Cultural O Brado.

Os galardoados desta edición son a asociación Fillos e Amigos da Estrada, na modalidade de “A Estrada e Comarca de Terra de Montes”, o colectivo Cantigas e Agarimos, na modalidade “Galicia enteira”, e o profesor de filosofía Carlos Amable Baliñas na modalidade “Toda unha vida”.

Se desexa mais información, prema aquí.
09/11/2011. DINAMIZACIóN

Novo número do Cartafol Dixital

Xa pode consultar en liña o novo número do Cartafol Dixital, boletín mensual editado polo Servizo de Normalización Lingüística da Universidade de Santiago de Compostela.

Neste número inclúense, entre outros contidos, a presentación de dúas publicacións recentes da USC, como son o traballo lexicográfico Termos esenciais de dereito penal e mais a guía Criterios de linguaxe non sexista, ou o anuncio de vindeiras xornadas de formación, como a terceira edición de “Educación e linguas en Galicia”,

09/11/2011. AXUDAS E PREMIOS

Convócase o XII Premio Manuel Beiras

O Concello de Santiago e a Cámara de Comercio de Santiago de Compostela convocan a décimo segunda edición do Premio Manuel Beiras, que ten como finalidade outorgar un recoñecemento público ao esforzo e compromiso coa normalización lingüística no sector empresarial.

O galardón contempla dúas categorías, unha para as empresas que veñen realizado un uso continuado da lingua galega e outra para as que se incorporaron recentemente ao uso do galego.

As empresas interesadas teñen de prazo para presentar as súas candidaturas ata o 30 de novembro de 2011.
Se desexa máis información sobre as bases desta convocatoria, prema aquí.
03/11/2011. DINAMIZACIóN

A USC súmase á celebración do Día da Ciencia en Galego

A Universidade de Santiago de Compostela sumarase mañá,
4 de novembro de 2011, á celebración do Día da Ciencia en Galego, como tamén farán por segundo ano consecutivo os centros de primaria e secundaria.

Os actos terán lugar nas facultades de Bioloxía, ETSE, Física e Matemáticas (Campus de Santiago) e na Biblioteca Intercentros e facultades de Ciencias, EPS e Veterinaria (Campus de Lugo).

Se desexa consultar o programa completo de actividades, prema aquí.

03/11/2011. AXUDAS E PREMIOS

III edición do Concurso Ângelo Casal

Galicola, proxecto comercial destinado a acadar recursos económicos para a normalización da lingua galega, convoca a terceira edición do Concurso Ângelo Casal, deseñado para premiar aqueles proxectos normalizadores que resulten máis votados polos consumidores de Galicola.

As candidaturas deben enviarse a info@galicola.org antes do 31 de decembro de 2011. O 31 de xaneiro de 2012 farase pública a listaxe dos proxectos seleccionados e os consumidores de Galicola terán de prazo ata o 1 de maio para enviar as etiquetas do refresco cos seus votos. O proxecto gañador darase a coñecer o 17 de maio, Día das Letras Galegas.
Pode consultar as bases do concurso no propio web da Galicola.
28/10/2011. INVESTIGACIóN

Portal de ditados tópicos galegos

O Instituto da Lingua Galega da Universidade de Santiago presenta o Portal de ditados tópicos galegos, un proxecto elaborado en colaboración coa Fundación Camilo José Cela que reproduce as 1212 fichas de ditados tópicos (xentilicios, alcumes, refráns e cantigas referidas a algunha localidade ou aos seus poboadores/as) recollidas en Galicia para a redacción do Diccionario geográfico popular de España de Camilo José Cela.

O web incorpora un formulario de busca que permite recuperar a información polo lugar de recollida, polo lugar ao que fai referencia o ditado ou a través dun campo de texto libre que busca na totalidade da ficha.

O proxecto ten vocación de continuidade, polo que en futuras versións ofreceranse outras formas recollidas de diversas fontes.

28/10/2011. AXUDAS E PREMIOS

Resólvese o premio Xoán Manuel Pintos 2011

O Concello de Pontevedra e a Rede de Entidades Amigas da Lingua (REAL) anunciaron a resolución do Premio Xoán Manuel Pintos 2011, outorgado nesta edición á Coordinadora Galega de Equipos de Normalización e Dinamización Lingüística e mais á Aula Castelao de Filosofía. O xurado acordou tamén facer unha mención especial ás e aos profesionais que estiveron a traballar en todos os medios de comunicación en galego que pecharon no último ano.

O obxectivo deste premio é recoñecer o labor daquelas persoas ou entidades que axudan a impulsar a presenza da lingua na sociedade e ao mesmo tempo manter viva a figura do xurista e escritor Xoán Manuel Pintos.

A entrega dos galardóns terá lugar o 24 de
novembro, ás
21:00 h, no Pazo da praza da Pedreira (Pontevedra).
28/10/2011. AXUDAS E PREMIOS

Concurso de monólogos no Concello da Coruña

O Servizo de Normalización Lingüística do Concello da Coruña organiza un concurso de monólogos dirixido ao alumnado dos IES e dos CIFP públicos, así como dos centros concertados e privados do concello .

A iniciativa ten como obxectivos potenciar a creatividade e a expresión oral en lingua galega.

O prazo de inscrición remata o 18 de novembro de 2011.

O acto de presentación dos monólogos terá lugar o 21 de decembro, ás 18:00 h, no Teatro Rosalía de Castro e será presentado polo actor Carlos Blanco.

28/10/2011. AXUDAS E PREMIOS

Entréganse os Premios da Crítica Galicia 2011

A Fundación Premios da Crítica Galicia entregou o pasado 22 de outubro os premios anuais que levan o seu mesmo nome e que se veñen outorgando desde 1978 ás mellores producións culturais galegas do ano.

Nesta edición o xurado acordou premiar na modalidade de produción literaria, o poemario Estremas (Galaxia, 2010) de Ana Romaní; na modalidade de investigación, o traballo “A importancia da similitude interlingüística e o bilingüismo equilibrado cando dúas linguas compiten”, de Jorge Mira, Luís Seoane e Juan Nieto; na modalidade de artes escénicas, o espectáculo Citizen, de Chévere; na modalidade de música, a orquestra folk Son de Seu e como iniciativa cultural, o Proxecto Terra, do Colexio Oficial de Arquitectos de Galicia.
27/10/2011. CURSOS E CONGRESOS

Os medios en galego, importan?

A Comisión de Normalización Lingüística da Facultade de Ciencias da Comunicación da Universidade de Santiago de Compostela organiza as xornadas "Os medios en galego, importan?", nas que investigadores/as, profesionais e representantes dos medios de comunicación reflexionarán sobre a viabilidade dos medios en galego.

As sesións terán lugar os días 9, 10 e 11 de novembro de 2011 na sede da Facultade de CC. da Comunicación da USC.

O prazo de matrícula remata o 3 de novembro.

Se desexa consultar o programa concreto ou obter máis información sobre os trámites de matrícula, prema aquí.
27/10/2011. DINAMIZACIóN

Homenaxe na Estrada aos irmáns Marcial e Avelina Valladares

No marco da campaña “En galego, agora e sempre”, promovida pola Asociación de Funcionarios para a Normalización Lingüística (AFNL), o Concello da Estrada organiza un acto de homenaxe ao polifacético escritor estradense Marcial Valladares e á súa irmá Avelina Valladares, cantora do Ulla.

No transcurso do acto colocaranse dúas placas en galego no cemiterio de Berres indicando onde repousan os restos mortais dos homenaxeados. Intervirán Xosé Luna, biógrafo dos autores; Xosé Martínez, representante da AFNL; José López, alcalde da Estrada e familiares dos irmáns Valladares.

A homenaxe terá lugar na igrexa e cemiterio de Berres - A Estrada, o vindeiro 30 de outubro de 2011, ás 12:00 h.

26/10/2011. DINAMIZACIóN

Presentación pública do Certificado Abertos ao Galego

A Mesa pola Normalización Lingüística (MNL) presenta hoxe, 26 de outubro, ás 20:30 h, no restaurante O Dezaseis (rúa de San Pedro, 16. Santiago de Compostela) o seu proxecto Certificado Abertos ao Galego.

Este certificado concederáselles, en diferentes niveis, ás empresas e entidades de calquera índole que amosen o seu compromiso coa normalización do idioma galego. As entidades que conten con este distintivo figurarán nun catálogo web, poderán participar en actos anuais de promoción e accederán a descontos publicitarios nos medios de comunicación que colaboren co proxecto.

No acto de presentación intervirán Carlos Callón, presidente da MNL; Iria Taibo, coordinadora do proxecto; Xulio Peinó, de 1D2 Arquitectos; Laura Insausti, da tenda de roupa Ela Diz e Carlos Cota, da Libraría Aira das Letras.
25/10/2011. CURSOS E CONGRESOS

Seminario de introdución á xestión da calidade nos servizos de normalización lingüística

A Coordinadora de Traballadores/as de Normalización da Lingua (CTNL) organiza esta actividade formativa que lle permitirá ao público asistente achegarse aos principios básicos da xestión da calidade, coñecer as ferramentas básicas para avaliar o traballo dos SNL e aprender a desenvolver plans de mellora e cartas de servizos nos SNL.

As sesións terán lugar os días 9 e 11 de novembro de 2011 na Facultade de Filoloxía da Universidade de Santiago de Compostela.

O prazo de inscrición estará aberto do 26 de outubro ao 2 de novembro.

Se desexa máis información, prema aquí.
25/10/2011. DINAMIZACIóN

Constitúese oficialmente a Rede de Dinamización Lingüística

O vindeiro venres, 28 de outubro de 2011, ás 12:00 h, terá lugar en Santiago de Compostela o acto oficial de constitución da Rede de Dinamización Lingüística.

Esta entidade, promovida pola Secretaría Xeral de Política Lingüística, foi creada o pasado 21 de setembro de 2010, en virtude da publicación no DOG da Orde do 14 de setembro pola que se crea a Rede de Dinamización Lingüística, co obxectivo de coordinar e fomentar as iniciativas de dinamización lingüística que se desenvolven no ámbito local.

No web da SXPL pode obter máis información sobre os obxectivos e organización da Rede.
25/10/2011. DINAMIZACIóN

Tres exposicións para achegar a obra de Alfonso D. Rodríguez Castelao, Xosé Neira Vilas e Lois Pereiro ao alumnado galego

A Secretaría Xeral de Política Lingüística e a Dirección Xeral do Libro, Bibliotecas e Arquivos da Xunta de Galicia promoven as tres exposicións sobre Alfonso D. Rodríguez Castelao, Xosé Neira Vilas e Lois Pereiro que percorrerán diferentes centros educativos de Galicia co ánimo de difundir entre o alumnado a vida e obra destes tres autores galegos.

As tres mostras estiveron xa estes últimos meses accesibles para a cidadanía en xeral en todas as bibliotecas nodais de Galicia.

Se desexa máis información sobre o itinerario concreto que percorrerán no ámbito educativo, prema aquí.

25/10/2011. DINAMIZACIóN

Nace a Irmandade da Sanidade de Galicia

O vindeiro 29 de outubro de 2011 terá lugar no Teatro Principal da Estrada o acto de constitución da Irmandade da Sanidade Galega, que estará integrada por persoal da sanidade pública e privada e profesionais da docencia nas ciencias médicas.

A entidade terá como obxectivos o fomento do humanismo e a promoción do idioma galego no ámbito sanitario.

A lección inaugural correrá a cargo de Emilio González, psiquiatra especialista en antropoloxía médica. A seguir, Valentín García fará unha presentación biográfica de Manuel Reimóndez Portela, co ánimo de render unha homenaxe a este médico formado intelectualmente na tradición humanística da Escola Médica Galega.

Se desexa máis información, prema aquí.
21/10/2011. INVESTIGACIóN

O grupo europeo Meta-Net alerta do baixo nivel de desenvolvemento tecnolóxico do galego

Meta-Net, grupo de traballo de excelencia fundado pola Comisión Europea e que estuda o nivel de desenvolvemento tecnolóxico das diferentes linguas de Europa, acaba de presentar o informe O idioma galego na era dixital.

O estudo, que forma parte da serie Meta-Net de libros brancos, salienta o importante papel que os recursos tecnolóxicos teñen no uso social das linguas e alerta sobre o baixo nivel de desenvolvemento das tecnoloxías lingüísticas no que respecta ao galego, en comparación con outras linguas europeas.

Os autores conclúen que, malia que os datos permiten un “optimismo prudente”, cómpre investir máis recursos na creación de recursos tecnolóxicos para o galego e no desenvolvemento de novas infraestruturas de cooperación.

21/10/2011. CURSOS E CONGRESOS

III Xornadas “Educación e linguas en Galicia”

A Comisión de Normalización Lingüística da Facultade de Ciencias da Educación e mais o Servizo de Normalización Lingüística da USC organizan a terceira edición destas xornadas, que nesta ocasión teñen como eixo temático o imaxinario social sobre o galego e a existencia de prexuízos lingüísticos na sociedade galega e no ámbito do ensino en particular.

As sesións terán lugar os días 25 e 26 de novembro de 2011 no salón de actos da Facultade de CC. da Educación (Campus Sur). O prazo para formalizar a matrícula remata o 20 de novembro.

Se desexa máis información, prema aquí.
20/10/2011. DINAMIZACIóN

Exposición sobre a historia da lingua galega e dos dereitos lingüísticos

O pasado 14 de outubro tivo lugar na biblioteca pública Antonio Odriozola de Pontevedra a inauguración da exposición “Historia da lingua galega e dos dereitos lingüísticos”, unha mostra gráfica e audiovisual, autoría de Xan Leira, promovida polo SNL do Concello de Pontevedra no marco do programa 2011- Ano Xoán Manuel Pintos.

A exposición estará aberta ao público ata o 15 de novembro de 2011, de luns a venres, en horario de 9:00 h a 21:00 h, e os sábados, de 10:00 h a 14:00 h.
20/10/2011. OUTRAS

A Fundación Galicia Empresa, historia dun compromiso singular

A Fundación Galicia Empresa presenta a obra Historia dun compromiso singular, que recolle os dezaoito anos de actividade desta entidade que ten entre os seus obxectivos fundacionais a normalización do uso do galego no ámbito empresarial.

Na Fundación Galicia Empresa están representadas 55 empresas de diferentes sectores do tecido industrial galego (telecomunicacións, industria naval, construción…) que traballan desde 1993 para promover a investigación das características peculiares da empresa galega e mais o uso do idioma galego como marca de compromiso e símbolo de identidade.

20/10/2011. DINAMIZACIóN

Galegas e galegos de por vida

Nestas datas próximas ao Día de Defuntos, o Concello de Pontevedra e a Rede de Entidades Amigas da Lingua (REAL), coa colaboración do colectivo “Galegos de por vida”, convida a cidadanía a participar nun acto de sinatura pública de derradeiras vontades que terá lugar no Pazo da Pedreira (Pontevedra), o vindeiro venres 28 de outubro.

As persoas participantes asinarán ante notario un texto no que manifestan o seu compromiso en vida co idioma galego e a súa vontade de que, chegada a hora do seu pasamento, todo o relativo ao funeral e enterro sexa realizado exclusivamente en lingua galega.

O prazo de inscrición para participar no acto remata o 24 de outubro de 2011.

Pode ampliar esta información no web do ENDL do CEIP Campolongo.

19/10/2011. INVESTIGACIóN

Preséntase a obra “Lingua galega e variación dialectal”

O vindeiro venres, 21 de outubro, a editorial Laiovento presentará na Coruña a obra Lingua galega e variación dialectal, autoría de Xosé Manuel Sánchez Rei.

O acto terá lugar ás 20:00 h no salón de actos da Asociación Alexandre Bóveda e nel intervirán, ademais do propio autor, Francisco Pillado (director de Edicións Laiovento) e Xosé Ramón Freixeiro (catedrático de Filoloxía Galega na UDC).

O evento pecharase cunha actuación de Anxo Pintos (zanfona).
19/10/2011. AXUDAS E PREMIOS

I Concurso de Banda Deseñada Fiz


O Servizo de Normalización Lingüística do Concello de Pontevedra organiza o I Concurso de Banda Deseñada Fiz, co ánimo de achegar a xente nova á banda deseñada e ás súas posibilidades narrativas, fomentando o uso do galego durante este proceso creativo.

O certame está destinado ao alumnado dos centros educativos do Concello de Pontevedra que estean a cursar algún dos niveis comprendidos entre 3º curso de educación primaria e 2º curso de ensino secundario obrigatorio.

O tema dos traballos presentados será unha aventura de Fiz, o personaxe creado polo debuxante Kiko da Silva.

O prazo para enviar os orixinais remata o 20 de decembro de 2011.
19/10/2011. INVESTIGACIóN

A USC aposta pola linguaxe non sexista

O Servizo de Normalización Lingüística e mais a Oficina de Igualdade de Xénero da Universidade de Santiago de Compostela presentan a guía Criterios de linguaxe non sexista.

O manual, autoría de Manuel Bermúdez e Alba Cid, ten como obxectivo resolver problemas de ambigüidade na comunicación e fomentar a creación de textos comprometidos co non sexismo e asentados na cultura da igualdade.


18/10/2011. CURSOS E CONGRESOS

Simposio “Textos, palabras e voces: corpora e ferramentas para a investigación lingüística”

O Instituto da Lingua Galega (USC) e mais o Consello da Cultura Galega organizan o simposio “Textos, palabras e voces: corpora e ferramentas para a investigación lingüística”, centrado nesta ocasión nas innovacións tecnolóxicas en materia de investigación lingüística.

As sesións terán lugar na Facultade de Filoloxía da USC os días 26 e 27 de outubro, e 3, 4, 10 e 11 de novembro de 2011.

Se desexa coñecer o programa completo ou obter máis información sobre os trámites de inscrición, prema aquí.

18/10/2011. DINAMIZACIóN

Linguazas, compilación de recursos para a dinamización lingüística municipal


O SNL do Concello de Zas presenta o web Linguazas, unha compilación de recursos lingüísticos en liña para a promoción do galego no ámbito municipal.

O proxecto, que naceu como unha ferramenta interna para o cadro de persoal do Concello de Zas, está agora dispoñible (agás dúas seccións) para o público xeral.

Nas seccións abertas pódense atopar novas de actualidade sobre o concello, unha selección de dicionarios e vocabularios en liña, materiais con nocións básicas de gramática e ortografía, ferramentas lingüísticas en internet e ligazóns a outros sitios web de interese.

A maiores, o web conta con outras dúas seccións de uso restrinxido con materiais específicos para o persoal do concello e mais o tecido asociativo municipal.