Novas da lingua

Rexistros3751 a 3780 de 5363
  1. Inicio
  2. CDSG-CCG
  3. Novas da lingua
28/02/2012. DINAMIZACIóN

Preséntase o sitio web oficial de Valentín Paz Andrade

A Consellería de Cultura e Educación, o Consello da Cultura Galega, a Real Academia Galega e mais Alfonso Paz-Andrade, fillo de Valentín Paz Andrade, presentaron publicamente o sitio web oficial do autor homenaxeado este ano no Día das Letras Galegas.

O web, desenvolvido por Industrias Pesqueras (revista fundada en 1927 por Valentín Paz Andrade) achega información cumprida sobre a biografía, bibliografía e axenda de actos programados para homenaxear o autor, así como unha selección de fotografías e textos inéditos dixitalizados polo Consello da Cultura Galega.

Se desexa máis información, prema aquí.

28/02/2012. OUTRAS

Dioivo, un novo proxecto de xornalismo dixital en galego

Mañá, 29 de febreiro de 2012, bota a andar Dioivo, unha revista dixital en lingua galega que nace coa finalidade de “contar e contrariar”.

A iniciativa está impulsada pola Asociación Cultural Dioivo, que servirá de sustento económico do proxecto.

A modo de presentación, distribuirase tamén un primeiro número en papel, de tiraxe limitada, con ilustracións de Gonzalo Vilas, Suso Sanmartín e Roi Fernández. Ademais, están previstas diferentes presentacións públicas, unha delas o 9 de marzo no marco dos XIV Encontros para a Normalización Lingüística.
28/02/2012. DINAMIZACIóN

XIII certame musical “A mocidade coa lingua”

O IES Manuel Murguía de Arteixo organiza o XIII certame musical “A mocidade coa lingua”, unha iniciativa dirixida aos centros de ensino que ten como obxectivo promover o uso do galego no ámbito do lecer.

O certame consta de dúas fases, unha primeira fase interna de clasificación, que organizará cada centro participante, e unha segunda fase final intercentros, que terá lugar o 16 de maio de 2012 no Centro Cívico de Arteixo.

Os tres primeiros clasificados recibirán un premio de 300, 200 e 150 euros respectivamente.
27/02/2012. INVESTIGACIóN

Facer país co idioma. Sentido da normalización lingüística

O pasado sábado, 25 de febreiro de 2012, tivo lugar no Paraninfo da Universidade de Santiago de Compostela o acto de ingreso do profesor Henrique Monteagudo como académico numerario da Real Academia Galega.


O discurso que o profesor Monteagudo elaborou para o seu acto de incorporación á RAG leva por título “Facer país co idioma. Sentido da normalización lingüística”, no que argumentou con rigor que a normalización lingüística do galego non só non é incompatible coa liberdade lingüística dos falantes, senón que é condición imprescindible para o pleno exercicio desta. En xeral, a idea que estivo latente ao longo de todo o discurso foi a de que a actual crise do proceso (e tamén do concepto) de normalización lingüística está directamente relacionada coa crise do autogoberno, que é realmente o que hoxe está en cuestión.

Ademais da versión resumida lida no acto, texto que lle achegamos nesta nova,
poden consultar a versión íntegra do discurso nos fondos do CDSG, a través do servizo de préstamo.
27/02/2012. AXUDAS E PREMIOS

Premio Abertos ao Galego

A Mesa pola Normalización Lingüística convoca o Premio Abertos ao Galego, un galardón con periodicidade anual que se outorgará a empresas que destaquen polo uso normal do idioma galego.

Calquera empresa ou particular pode facerlle chegar á Mesa a súa proposta, incluíndo o nome e datos de contacto da empresa candidata, xunto cunha argumentación que incida nos seus usos lingüísticos. As persoas que remitan candidaturas a título particular entrarán no sorteo dun lote de produtos das empresas que forman parte do proxecto Abertos ao Galego.

O prazo de presentación de candidaturas remata o 2 de maio de 2012.
24/02/2012. OUTRAS

Hoxe, 24 de febreiro, celébrase o Día de Rosalía

Diferentes concellos, centros de ensino e institucións culturais do país celebraran hoxe, por iniciativa da Asociación de Escritores en Lingua Galega (AELG), o Día de Rosalía, escritora determinante na historia do noso idioma que restaurou, coa súa obra Cantares gallegos (1863), o uso escrito do galego despois de séculos de ocultación.

Ao abeiro desta iniciativa, moitos centros de ensino están a organizar actividades didácticas relacionadas coa escritora e diferentes concellos declararon oficialmente o 24 de febreiro como Día de Rosalía de Castro, incluíndo esta celebración nas súas programacións culturais.

A AELG anima á cidadanía en xeral a agasallar un libro en galego e un flor para festexar o 175 aniversario do nacemento da autora.

No web da AELG pode consultar as actividades e actos programados.

22/02/2012. INVESTIGACIóN

Henrique Monteagudo incorpórase á RAG reflexionando sobre o sentido da normalización lingüística

O vindeiro sábado, 25 de febreiro de 2012, ás 12:00 h, a Real Academia Galega celebrará unha sesión extraordinaria pública con motivo da recepción como académico de número de Henrique Monteagudo Romero.

Henrique Monteagudo, profesor de sociolingüística na Universidade de Santiago de Compostela e director do CDSG, lerá o discurso “Facer país co idioma. Sentido da normalización lingüística”.

O acto terá lugar no Paraninfo da USC (Facultade de Xeografía e Historia, praza da Universidade, 1).
21/02/2012. OUTRAS

21 de febreiro, Día Internacional da Lingua Materna

En novembro de 1999 a UNESCO declarou o 21 de febreiro

Día Internacional da Lingua Materna. Dende entón, cada ano conmemórase neste día a riqueza que supón a diversidade lingüística do planeta, con programas e actividades destinados a preservar esta diversidade e a promover o plurilingüismo.

Como é costume, a directora xeral da UNESCO, Irina Bokava, fixo pública a mensaxe institucional de 2012 con motivo desta celebración.
20/02/2012. CURSOS E CONGRESOS

Cursos de linguaxe administrativa para persoal da Administración autonómica

A Escola Galega de Administración Pública, en colaboración coa Secretaría Xeral de Política Lingüística, convoca cursos de linguaxe administrativa galega (niveis medio e superior) para o persoal da Administración pública da Comunidade Autónoma de Galicia, tanto na modalidade presencial como de teleformación.

A matrícula debe tramitarse a través do formulario de matrícula telemática accesible na páxina web da EGAP.

O prazo de presentación de solicitudes remata o 29 de febreiro de 2012.

Se desexa consultar o texto íntegro da convocatoria, prema aquí.

20/02/2012. OUTRAS

Preséntase a programación do Ano Celso Emilio Ferreiro

A Consellería de Cultura, Educación e Ordenación Universitaria, a Fundación Celso Emilio Ferreiro, a Real Academia Galega, o Consello da Cultura Galega, a Fundación Casa dos Poetas e o Centro PEN de Galicia presentaron publicamente, o pasado 17 de febreiro na Cidade da Cultura, a programación do Ano Celso Emilio Ferreiro.

Co gallo da conmemoración do centenario do nacemento do escritor e do 50 aniversario da publicación do seu poemario Longa noite de pedra, as principais institucións culturais do país desenvolverán un amplo abano de actividades, como exposicións multimedia, espectáculos musicais, ciclos literarios, recitais bilingües no exterior, etc.

No mesmo acto presentouse a páxina web oficial do poeta, con información sobre a súa biografía e produción literaria.

Se desexa máis información, prema aquí.
17/02/2012. DINAMIZACIóN

II Mostra de Documentais en Galego

O Ateneo Ferrolán organiza a II Mostra de Documentais en Galego, unha plataforma para o impulso e difusión dos documentais no noso idioma.

O evento terá lugar o 21 de marzo de 2012, ás 19:30 h.

Todas as persoas interesadas en participar poden enviar os seus documentais, en formato DVD, xunto cunha ficha cos datos do traballo. A organización fará unha selección entre todas as propostas recibidas.

17/02/2012. DINAMIZACIóN

Dinamizando o uso do galego a través da creatividade

O Servizo de Normalización Lingüística do Concello de Vigo, en colaboración co Verbum. Casa das Palabras, organiza dúas novas actividades, unha sesión de contacontos e mais un curso de sombras chinesas, para dinamizar o uso do galego no ámbito do lecer e da familia.

A sesión de contacontos, que leva por título “Pepiña Maruxiña quere voar”, terá lugar o 26 de febreiro ás 18:00 h, no Verbum. Está dirixida a público familiar e a entrada é de balde.

O curso de sombras chinesas terá lugar os días 3, 10, 17 e 24 de marzo, de 17:00 h a 18:00 h. Está dirixido a persoas maiores de 18 anos, que poden formalizar a súa inscrición a partir do 28 de febreiro.
16/02/2012. DINAMIZACIóN

O comercio pontevedrés proba en galego

O Servizo de Normalización Lingüística do Concello de Pontevedra presenta o programa de actividades que se desenvolverán durante o meses de febreiro, marzo e abril de 2012 ao abeiro da campaña Proba en galego.

Trátase dunha iniciativa deseñada para promover o uso do galego no ámbito do comercio e da pequena empresa, coa que se lle dá continuidade ao labor de dinamización lingüística que o Concello de Pontevedra desenvolve no ámbito socioeconómico desde 2006.

O programa actual inclúe obradoiros sobre estratexias de xestión lingüística no ámbito do comercio local e charlas sobre experiencias prácticas reais.

16/02/2012. LEXISLACIóN

A CGENDL aposta por un plurilingüismo inclusivo

A Coordinadora Galega de Equipos de Normalización e Dinamización Lingüística (CGENDL) presenta o folleto “Docentes por un plurilingüismo inclusivo”, no que se reflexiona sobre a actual lexislación vixente no sistema educativo e sobre a necesidade de novos enfoques para unha educación plurilingüe.

A CGENDL difunde tamén no seu web unha entrevista a José Manuel Vez, director do Observatorio Atrium Linguarum, que leva por título “Centros plurilingües: un modelo axeitado de educación lingüística para Galicia?”.
16/02/2012. DINAMIZACIóN

O IES As Barxas decláralle o seu amor á lingua

Co gallo da celebración, o pasado 14 de febreiro, do Día de San Valentín, o Audiovisual As Barxas e o Departamento de Normalización Lingüística do IES As Barxas (Moaña) elaboraron o vídeo Ámote.

Trátase dunha adaptación do texto de Víctor Freixanes “O que queda é o amor”, publicado no xornal La Voz de Galicia o 28 de novembro de 2010.

Se desexa máis información, prema aquí.


15/02/2012. CURSOS E CONGRESOS

Programa definitivo dos XIV Encontros para a Normalización Lingüística

Xa está accesible na rede o programa definitivo dos XIV Encontros para a Normalización Lingüística, que terán lugar os vindeiros días 8 e 9 de marzo de 2012 no Auditorio da Biblioteca de Galicia (Cidade da Cultura de Galicia).

Nesta edición os Encontros van prestar unha especial atención ás claves para conectar coa mocidade, así como ás estratexias para implicar a xente nova no proceso de normalización do idioma galego, sen esquecer a liña habitual de seguimento de iniciativas actuais e de reflexión sobre accións xa realizadas.
Amplíase o prazo de inscrición ata o 23 de febreiro.

14/02/2012. OUTRAS

GalApps, toda a lingua galega no teu peto

O idioma galego dispón xa da súa propia “suite” de aplicacións da lingua para móbiles, dispoñibles tanto para plataformas con sistema operativo Android como IOS (iPfone e iPad).

GalApps compila tres aplicacións lingüísticas: un dicionario, un conxugador verbal e un tradutor. As aplicacións, elaboradas por Sabela Barreiro, Xurxo Méndez e Juan Porta, poden descargarse de balde nas tendas virtuais de Apple e Adroid.
13/02/2012. CURSOS E CONGRESOS

Curso de formación de especialistas en recollida de toponimia

O Instituto de Estudos Miñoranos e mais os servizos de normalización lingüística dos concellos de Pontevedra, Ourense e Vigo organizan o Curso de formación de especialistas en recollida de toponimia, que terá lugar os días 2, 3, 9, 10, 16, 17, 23 e 24 de marzo en Vigo, Pontevedra e Gondomar.

Ao remate das sesións teóricas haberá posibilidade de realizar prácticas de recollida de campo remuneradas. Poderán optar a estas prazas aquelas persoas que asistisen a todas as sesións teóricas.

O prazo de inscrición estará aberto ata o 22 de febreiro. As persoas admitidas terán de prazo para formalizar a súa matrícula entre os días 27 e 29 de febreiro.

13/02/2012. DINAMIZACIóN

Nós tamén creamos!, programa para estimular o uso da lingua e a creatividade dos máis pequenos/as

A Secretaría Xeral de Política Lingüística e a Dirección Xeral de Educación, Formación Profesional e Innovación Educativa, en colaboración coa Compañía de Radio-Televisión de Galicia e con OQOeditora, presentan o programa Nós tamén creamos!, dirixido a centros públicos de educación infantil e primaria.

O obxectivo do programa é favorecer o uso e aprendizaxe do galego en novos ámbitos, nomeadamente no do lecer. Para isto, convócase un premio a curtas de animación elaboradas coa técnica stop motion.

Outorgaranse tres premios, segundo o ciclo educativo, e os centros premiados recibirán un lote de libros de OQOeditora e mais unha pantalla de plasma TFT de alta definición de 26″. As curtametraxes gañadoras serán difundidas en diferentes programas da TVG.
13/02/2012. DINAMIZACIóN

FainoTic, nova ferramenta para traballar en galego coas TIC

No marco dos II Encontros de equipos e docentes pola normalización, que tiveron lugar o pasado sábado, 11 de febreiro, en Santiago de Compostela, presentouse FainoTic, unha nova ferramenta de traballo colaborativo dirixida aos centros de ensino, especialmente aos equipos de dinamización da lingua galega.

O obxectivo é fomentar entre a comunidade educativa a edición colectiva de ferramentas lingüísticas, aproveitando as oportunidades que ofrecen as novas tecnoloxías.
13/02/2012. CURSOS E CONGRESOS

Accesibles na rede os audios das VIII Xornadas de Lingua e Usos

Xa están accesibles, no web do Servizo de Normalización Lingüística da Universidade da Coruña, as gravacións dos relatorios das VIII Xornadas de Lingua e Usos. Lingua e Ecoloxía, que tiveron lugar os pasados días 30 de novembro e 1 de decembro de 2011 na Coruña.

Neste mesmo sitio web pode consultar tamén as actas das edicións anteriores destas xornadas, que o SNL da UDC organiza anualmente para reflexionar sobre a situación do idioma galego nos diferentes ámbitos sociais.
09/02/2012. DINAMIZACIóN

Os SNL de trece concellos coordínanse para organizar conxuntamente o Club de Debate

Os concellos de Ames, Betanzos, Carballo, Carral, A Coruña, Ferrol, As Pontes, Pontevedra, Oleiros, Rois, Santiago de Compostela, Teo e Vigo asinan, por iniciativa dos seus servizos de normalización lingüística, un protocolo de colaboración para a organización conxunta do Club de Debate, actividade que xa levaban anos desenvolvendo de xeito autónomo os concellos de Pontevedra e da Coruña.

Trátase dun programa de dinamización lingüística no ámbito educativo, no sector da mocidade, dirixido a alumnado de 3º e 4º de ESO e 1º de bacharelato, destinado a fomentar a fluidez comunicativa en galego, o pensamento crítico e o respecto pola diversidade de opinións.

O torneo consta de diferentes fases comarcais, con bases de participación específicas (bases das zonas da Coruña, Compostela, Ferrolterra, Pontevedra e Vigo).

Os equipos gañadores nas fases comarcais participarán nunha fase final, que terá lugar o 28 de abril en Pontevedra.
09/02/2012. DINAMIZACIóN

A Asociación de Escritores/as en Lingua galega premia o labor normalizador nos concellos e nos centros de ensino

A Asociación de Escritores e Escritoras en Lingua Galega (AELG) acordou, na súa asemblea xeral do pasado 4 de febreiro, conceder o Premio AELG para institucións aos equipos de dinamización da lingua galega dos centros de ensino e mais aos servizos de normalización lingüística dos concellos, como recoñecemento ao seu labor a prol do idioma.

A entrega do galardón terá lugar o vindeiro 5 de maio, no transcurso da Cea das Letras.

Se desexa máis información, prema aquí.
07/02/2012. DINAMIZACIóN

En liña o Cartafol Dixital de xaneiro

Xa pode consultar o novo número do Cartafol Dixital, boletín mensual editado polo Servizo de Normalización Lingüística da Universidade de Santiago de Compostela.

Entre os contidos deste número salientamos a presentación dos datos de uso dos idiomas na docencia da USC, tanto no que respecta a este curso 2011-2012 como á súa evolución nos últimos anos; a información sobre a formación específica que a USC oferta aos estudantes estranxeiros que queren aprender galego ou a presentación do “Obradoiro de linguaxe e redacción xurídica en galego”, dirixido ao alumnado de dereito.
07/02/2012. AXUDAS E PREMIOS

VIII Premio a artigos xornalísticos normalizadores

O Servizo de Normalización Lingüística do Concello de Carballo convoca a oitava edición deste premio que ten como obxectivo principal promover a reflexión sobre a situación social da lingua galega e crear espazos nos xornais para analizar este tema.

Outorgarase un único premio de 1000 euros, ademais da publicación do artigo gañador en todos os medios de comunicación que colaboran coa iniciativa.

O prazo de presentación dos artigos remata o 9 de abril de 2012.
Se desexa consultar as bases, prema aquí.
07/02/2012. DINAMIZACIóN

Ben veñas, maio!

O Servizo de Normalización Lingüística do Concello de Pontevedra e mais a Coordinadora de Equipos de Normalización e Dinamización da Lingua Galega dos IES de Pontevedra organizan unha nova edición do programa Ben veñas, maio!, dirixido ao alumnado de ensino medio do concello.

A iniciativa, que inclúe diferentes certames (fotografía, banda deseñada, narración curta, poesía e música), está deseñada para fomentar o uso do galego nas actividades propias da mocidade, así como incentivar a reflexión sobre a situación actual do idioma.

Se desexa máis información, prema aquí.


06/02/2012. DINAMIZACIóN

Normalizar a empresa para homenaxear a Valentín Paz Andrade

Co gallo da celebración do Día das Letras Galegas, dedicado este ano a Valentín Paz Andrade, a Coordinadora Galega de ENDL presenta a campaña Empresa en galego, a través da que convida a todos os equipos de dinamización dos centros de ensino a desenvolver, de xeito coordinado, iniciativas de normalización lingüística no ámbito da empresa.

Para isto, a CGENDL pon ao dispor dos membros dos equipos diferentes propostas de accións concretas, acompañadas de exemplos de actividades de promoción do galego no ámbito socioeconómico desenvolvidas pola comunidade educativa.

03/02/2011. CURSOS E CONGRESOS

XIV Encontros para a Normalización Lingüística

Xa pode consultar en liña o programa provisional dos XIV Encontros para a Normalización Lingüística, que terán lugar os vindeiros días 8 e 9 de marzo de 2012 no Auditorio da Biblioteca de Galicia (Cidade da Cultura de Galicia).

Nesta edición os Encontros van prestar unha especial atención ás claves para conectar coa mocidade, así como ás estratexias para implicar a xente nova no proceso de normalización do idioma galego, sen esquecer a liña habitual de seguimento de iniciativas actuais e de reflexión sobre accións xa realizadas.

A inscrición realizarase exclusivamente a través do formulario habilitado no web do CCG. O prazo de inscrición remata o 16 de febreiro. O 17 de febreiro farase pública a listaxe de admitidos/as e partir dese momento abrirase un novo prazo para formalizar o pago da matrícula.

01/02/2012. DINAMIZACIóN

Nace Praza Pública, un novo xornal dixital en lingua galega

Hoxe, 1 de febreiro de 2012, bota a andar Praza Pública, un novo medio de comunicación en galego pensado para Internet. O xornal está impulsado pola Fundación Praza Pública, que ten como fin prioritario o “fomento da información e o debate públicos como forma de contribución ao exercicio cívico da cidadanía galega, ben como a promoción da cultura e da lingua galegas”.

Desde o punto de vista tecnolóxico, trátase dun xornal deseñado integramente para o estándar de HTML5, que aproveita todos os recursos dispoñíbeis na rede, empregando software libre.
01/02/2012. OUTRAS

MeteoSix Mobile, a información meteorolóxica en galego

MeteoGalicia presenta MeteoSix Mobile, unha aplicación para móbiles con sistema operativo Android que permite consultar en galego a predición meteorolóxica e oceanográfica para calquera punto de Galicia e arredores.

A aplicación pode descargarse de balde desde a tenda virtual de Android. Os usuarios máis avanzados que desexen desenvolver as súas propias aplicacións meteorolóxicas, tamén teñen accesible en liña a API do MeteoSix.