Novas da lingua

Rexistros3931 a 3960 de 5399
  1. Inicio
  2. CDSG-CCG
  3. Novas da lingua
24/06/2011. DINAMIZACIóN

Os 20 anos dos ENDL en imaxes

A Coordinadora Galega de ENDL difunde no seu web os vídeos que se presentaron no transcurso do acto conmemorativo do XX aniversario dos equipos de normalización e dinamización lingüística (ENDL), que tivo lugar o pasado 4 de xuño no Auditorio do Museo do Pobo Galego.

Trátase de cinco presentacións nas que se fai un percorrido histórico polos principais fitos e actividades desenvolvidas polos ENDL nestes últimos vinte anos. Na mesma sección web pódese acceder ás intervencións de diferentes representantes do colectivo educativo que interviñeron neste acto, no que os ENDL renderon tamén un recoñecemento público ao labor normalizador de Agustín Fernández Paz.
22/06/2011. DINAMIZACIóN

O alumnado do IES A Paralaia implícase na galeguización da hostalaría moañesa

No marco da campaña “Galiméntate”, o Equipo de Dinamización Lingüística do IES A Paralaia e mais o Servizo de Normalización Lingüística do Concello de Moaña presentan a iniciativa Receitas para a lingua, que consiste na tradución ao galego de 32 receitas de 13 establecementos hostaleiros do municipio.

A primeira fase da campaña desenvolveuse durante o curso 2007-2008 e consistiu na tradución das cartas de diferentes bares e restaurantes do concello. Esta segunda fase tamén inclúe a distribución de mandís e bolsas de tela co logo da campaña entre os establecementos colaboradores.
22/06/2011. DINAMIZACIóN

Verán de 4 a 4 en Vigo

O Servizo de Normalización Lingüística do Concello de Vigo presenta o programa de actividades lúdico-didácticas Verán de 4 a 4, que se desenvolverá entre o 4 de xullo e o 4 de setembro de 2011.

O programa inclúe, entre outras actividades, ludotecas lingüísticas, obradoiros de monicreques, camiños da lingua e rodas de xogos.

No web do SNL poderá obter máis información sobre a localización e o desenvolvemento do programa.
21/06/2011. DINAMIZACIóN

Camiño das culturas e das linguas

A Secretaría Xeral de Política Lingüística da Xunta de Galicia, a Asociación “Estudio de Filología Aragonesa”, a Euroccat-Eurocongrès 2000 des Pays Occitans et Catalans, a Ofis ar Brezhoneg, a Christian-Albrechts_Universität Zu Kiel e mais o Euskarabidea/Instituto Navarro del Vascuence están a desenvolver o proxecto Camiño das culturas e das linguas, que ten como obxectivo promover a divulgación do patrimonio cultural e lingüístico vinculado ao Camiño de Santiago.

No marco deste proxecto de colaboración, desenvolveranse nos vindeiros meses diferentes actuacións, entre elas, a exposición itinerante “Europa nos camiños a Santiago” e o congreso “As Linguas e Culturas do Camiño de Santiago de Compostela: Presente e Futuro”.
21/06/2011. EMPREGO

Postos de coordinadores/as de área dos equipos de dinamización da lingua galega

A Consellería de Educación e Ordenación Universitaria da Xunta de Galicia publica, no DOG do 17 de xuño de 2011, a convocatoria do concurso público para a provisión de prazas de coordinadoras/es de área dos equipos de dinamización da lingua galega.

Poderán participar neste concurso as funcionarias e funcionarios de carreira dos corpos de mestres, de profesores de ensino secundario e de profesores das escolas oficiais de idiomas, sempre que estean en posesión do Celga 5 e teñan destino en centros dependentes desta consellería.

O prazo de presentación de instancias é de 15 días naturais, contados a partir do seguinte ao da publicación da convocatoria.
10/06/2011. DINAMIZACIóN

Un verán de lecer

O Servizo de Normalización Lingüística do Concello de Zas, en colaboración cos SNL dos concellos de Cabana de Bergantiños, Carballo, Malpica de Bergantiños e Ponteceso, presenta a segunda edición da guía Un verán de lecer. Propostas de creacións culturais.

Trátase dunha selección de produtos literarios, musicais e audiovisuais en lingua galega, clasificados por idades, que ten como obxectivo difundir a oferta de produtos culturais existentes en galego entre os potenciais consumidores.

10/06/2011. INVESTIGACIóN

Galegobook, bibliografía lingüística en liña

O Galegobook é un proxecto bibliográfico que ten como obxectivo compilar, clasificar e difundir a bibliografía sobre lingüística galega que está accesible en Internet.

Na actualidade, Galegobook ten incorporados 128 títulos clasificados tematicamente, aos que tamén pode accederse a partir dos índices de autores e títulos.

Trátase dun proxecto en continua construción, no que se pode colaborar comentando as entradas bibliográficas existentes ou achegando suxestións de novas incorporacións.
08/06/2011. DINAMIZACIóN

Encontro da mocidade falante de linguas minorizadas

Entre os vindeiros días 19 e 22 de xullo de 2011 terá lugar o “Encontro da mocidade falante de linguas minorizadas”, desenvolvido no marco do Plan do Euskera e do Plan de Mocidade do Concello de Gasteiz.

O encontro, que terá lugar na Facultade de Letras da Universidade do País Vasco, está dirixido a mozos e mozas falantes de linguas minorizadas tanto do Estado español como do resto de Europa.

A inscrición, o aloxamento e mais a manutención será de balde para os mozos/as participantes.

Se desexa máis información, prema aquí.
08/06/2011. DINAMIZACIóN

En liña un novo número do Cartafol Dixital

Xa pode consultar o novo número do Cartafol Dixital, boletín mensual editado polo Servizo de Normalización Lingüística da Universidade de Santiago de Compostela.

Entre os contidos deste número salientamos a entrevista a Rosario Álvarez, directora do Instituto da Lingua Galega; a presentación do vindeiro curso de verán “Témoslle lei: o galego no dereito” ou a crónica da xornada “Letras Galegas e Internet”, organizada pola SXPL da Xunta de Galicia o pasado 19 de maio.
07/06/2011. DINAMIZACIóN

Valentín Paz Andrade, autor homenaxeado no Día das Letras Galegas 2012

O Plenario da Real Academia Galega (RAG) acordou, na sesión ordinaria do pasado 4 de xuño de 2011, dedicar o Día das Letras Galegas 2012 a Valentín Paz Andrade.

Valentín Paz Andrade foi un polifacético autor, cuxa obra abrangue os eidos literario, xornalístico, histórico e económico; ademais dun recoñecido activista do movemento galeguista. Presidiu o Grupo Autonomista Galego (1930), foi candidato ás Cortes Constituíntes de 1931 e membro activo do Partido Galeguista.

Foi director do xornal Galicia e colaborou habitualmente nos xornais El Pueblo Gallego, Faro de Vigo e La Noche.
Foi ademais un prolífico ensaísta e poeta, con títulos como, por exemplo, Galicia como tarea (1959) ou Cartafol de homenaxe a Ramón Otero Pedrayo (1985).

Se desexa máis información, prema aquí.
07/06/2011. CURSOS E CONGRESOS

Seminarios de formación para os técnicos/as da Rede de Dinamización Lingüística

A Secretaría Xeral de Política Lingüística organiza dous seminarios formativos dirixidos aos técnicos/as que representan as entidades adheridas á Rede de Dinamización Lingüística.

O vindeiro 10 de xuño terá lugar o Seminario de Iniciación á Dinamización da Lingua Galega desde as Entidades Locais, dirixido aos técnicos que se están a iniciar no labor normalizador.

Posteriormente, os días 30 de xuño e 1 de xullo desenvolverase o I Seminario de Formación Permanente da Rede de Dinamización Lingüística, dirixido ao conxunto da representación técnica da Rede.

Se desexa máis información, prema aquí.

30/05/2011. INVESTIGACIóN

O ILG presenta a versión en liña do seu Arquivo de Galego Oral

O Instituto da Lingua Galega (ILG) pon ao dispor da cidadanía o seu Arquivo de Galego Oral (AGO), un banco de textos orais, froito de varias décadas de traballo, co que se quere configurar o atlas da oralidade do idioma galego.

O AGO contén arredor de 2000 horas de gravacións, con voces duns 7000 informantes representativos da totalidade do territorio de fala galega, tanto no que respecta á Galicia administrativa como do que se coñece como “galego exterior”.

Actualmente están accesibles en liña 43 etnotextos agrupados tematicamente, selección que se irá completando progresivamente.

30/05/2011. AXUDAS E PREMIOS

Axudas para o audiovisual de contido artístico e cultural

A Axencia Galega das Industrias Culturais publica a convocatoria de subvencións para a produción audiovisual en lingua galega con contido artístico e cultural.

O prazo de presentación de solicitudes é dun mes, contado a partir do día seguinte ao da publicación no DOG desta convocatoria.



27/05/2011. CURSOS E CONGRESOS

Curso de verán “Témoslle lei: o galego no Dereito”

No marco da campaña Témoslle lei, a Facultade de Dereito da Universidade de Santiago de Compostela organiza o curso de verán “Témoslle lei: o galego no Dereito”, que se desenvolverá os días 12, 13 e 14 de setembro de 2011 na sede desta facultade.

O curso está especialmente dirixido aos estudantes de Dereito e de Ciencias Políticas e da Administración; así como aos profesionais e estudosos do ámbito da política lingüística.

O prazo de matrícula remata o 2 de setembro.
27/05/2011. AXUDAS E PREMIOS

Resólvense os Premios Lois Peña Novo

A Fundación Lois Peña Novo deu a coñecer os gañadores da XVII edición dos Premios Lois Peña Novo, pensados para animar o proceso de normalización lingüística nas administracións públicas de Galicia e mais nas empresas que manteñen relación directa coa Administración.

Os galardoados/as desta edición foron Alba Nogueira, profesora de Dereito Administrativo da USC; Xosé Rodríguez Cruz, funcionario do Corpo Nacional de Policía na comisaría provincial de Ourense e mais o Concello de Ames.

Se desexa ampliar esta información, prema aquí.
25/05/2011. AXUDAS E PREMIOS

Convocatoria de lectorados de lingua, literatura e cultura galegas

A Consellería de Educación e Ordenación Universitaria publica a convocatoria de lectorados de lingua, literatura e cultura galegas en diferentes universidades de España e do estranxeiro.

En concreto, ofértanse prazas de lectorados nas universidades de Madrid, Barcelona, Granada, Deusto, Heildelberg, Padua, Roma La Sapienza, Algarve e Miño.

O prazo de presentación de solicitudes é dun mes, contado a partir do día seguinte ao da publicación da convocatoria.

20/05/2011. AXUDAS E PREMIOS

II Premio Lois Tobío de Investigación Xurídica en Lingua Galega

A Comisión de Normalización Lingüística da Facultade de Dereito e mais o Servizo de Normalización Lingüística da UDC convocan o II Premio Lois Tobío de Investigación Xurídica en Lingua Galega.

O premio está destinado ao estudantado da Facultade de Dereito da UDC durante o curso 2010-2011 así como en xeral aos licenciados/as en Dereito.

O premio concederase en dúas modalidades, 600 euros na modalidade de estudantes e 900 euros na modalidade de licenciados/as. Os traballos premiados publicaranse no Anuario da Facultade de Dereito.

O prazo de presentación dos traballos remata o 30 de setembro de 2011.
20/05/2011. AXUDAS E PREMIOS

O filólogo Ramón Lorenzo, Premio Trasalba 2011

A Fundación Otero Pedrayo decidiu por unanimidade conceder o Premio Trasalba 2011 ao catedrático de Lingua e Literatura Galega da USC e especialista en lingua medieval, Ramón Lorenzo Vázquez.

Ramón Lorenzo foi cofundador do Instituto da Lingua Galega en 1971, membro do histórico grupo “Brais Pinto”, fundador e director da revista Dorna, editor de obras de referencia da Idade Media como a “Crónica Troyana” e membro na actualidade da Real Academia Galega.

O acto de entrega do galardón terá lugar no transcurso da Festa Literaria que a Fundación Otero Pedrayo celebrará na Casa Grande de Cimadevila (Amoeiro) o derradeiro domingo de xuño.

Se desexa máis información, prema aquí.
16/05/2011. DINAMIZACIóN

Actividades para festexar as Letras Galegas no Verbum

O museo Verbum-Casa das Palabras presenta a súa programación de actividades para os días 17 e 18 de maio de 2011, nos que se conmemora respectivamente o Día das Letras Galegas e o Día Internacional dos Museos.

Para o 17 de maio está programada unha gravación de textos de Lois Pereiro (das 10:00 h ás 19:00 h) e un espectáculo teatral de obxectos con música en directo baseado en textos do poeta homenaxeado (ás 19:00 h).

O 18 de maio, ás 19:00 h, terá lugar a actividade teatral Museos e Memoria. Verbum Fahrenheit, unha peza que fala da relación entre a oralidade e a escrita, e da importancia de ambas para a supervivencia dun idioma.

13/05/2011. CURSOS E CONGRESOS

IV Curso de Verán de Lingua e Cultura Galega para Estranxeiros

O Servizo de Normalización Lingüística da Universidade da Coruña, en colaboración coa Secretaría Xeral de Política Lingüística, organiza o IV Curso de Verán de Lingua e Cultura Galegas para Estranxeiros.

O curso conta con dous niveis, elemental e intermedio, e as sesións desenvolveranse entre os días 4 e 29 de xullo de 2011 na Facultade de Filoloxía da UDC.

O prazo de inscrición remata o 30 de maio de 2011.

Se desexa máis información, prema aquí.
13/05/2011. DINAMIZACIóN

Letras Galegas en Compostela

O Departamento de Lingua Galega do Concello de Santiago presenta o programa para festexar o vindeiro Día das Letras Galegas.

As actividades desenvolveranse os días 16, 17 e 18 de maio e a programación inclúe, entre outros actos, representación teatrais, actuacións musicais, solta de libros (book croosing) e a posta en marcha do xogo colectivo “Atopando Compostela”.

Se desexa máis información, prema aquí.
12/05/2011. CURSOS E CONGRESOS

Xornada de traballo sobre Letras Galegas e Internet

Coincidindo coa celebración do Día das Letras Galegas o vindeiro 17 de maio, a Secretaría Xeral de Política Lingüística organiza a xornada Letras Galegas e Internet, que ten como obxectivo principal difundir os novos recursos lingüísticos que actualmente están dispoñibles en Internet.

A xornada desenvolverase o vindeiro 19 de maio de 2011, de 10:30 h a 13:30 h, no Centro Multimedia de Galicia (Rúa do Hórreo, 61. Santiago de Compostela).

Para ampliar a información, prema aquí.


11/05/2011. DINAMIZACIóN

Os meus favoritos, guía de sitios web en galego

Os servizos de normalización lingüística dos concellos de Carballo, Malpica de Bergantiños, Ponteceso e Zas presentan a guía Os meus favoritos, que compila 200 enderezos de sitios web en galego sobre diferentes temáticas (deporte, audiovisual, cultura, mocidade…).

O obxectivo desta iniciativa é celebrar o vindeiro 17 de maio, Día das Letras Galegas e Día de Internet, e ao mesmo tempo, fomentar o uso do galego no ámbito da tecnoloxía.
11/05/2011. CURSOS E CONGRESOS

VII Curso de Verán “Traballando en Lingua”

O Servizo de Normalización Lingüística da Universidade da Coruña, o Concello de Carballo e mais a CTNL organizan a sétima edición do Curso de Verán sobre Dinamización Lingüística "Traballando en Lingua", no que se reflexionará sobre a incidencia dos discursos lingüísticos na situación actual do galego.

As sesións desenvolveranse os días 20, 21 e 22 de xullo de 2011 no Pazo da Cultura de Carballo.

A matrícula abrirase a partir do 1 de xuño.

11/05/2011. DINAMIZACIóN

A EGAP súmase á conmemoración do Día das Letras Galegas

A Escola Galega de Administración Pública presenta o seu programa de actividades para homenaxear a Lois Pereiro, autor ao que se lle dedica este ano o Día das Letras Galegas.

O programa inclúe un acto literario, que terá lugar o 12 de maio, ás 19:00 h, na sede da EGAP e mais unha viaxe cultural polos escenarios nos que desenvolveu a súa vida Lois Pereiro, que se realizará o 17 de maio.

Se desexa máis información, prema aquí.
11/05/2011. DINAMIZACIóN

O galego medra contigo na cidade da Coruña

O Servizo de Normalización Lingüística do Concello da Coruña está a desenvolver unha nova edición da campaña “O galego medra contigo!”, dirixida este ano a nenos/as de entre 5 e 10 anos e mais ás súas familias.

Nesta edición o fío condutor das actividades é o mariñeiro Ith, nome que fai referencia ao fillo de Breogán, personaxe lendario relacionado coa fundación da cidade da Coruña.

A programación inclúe concertos musicais infantís, obradoiros lúdico-musicais e mais o Concerto das Letras.

Para ampliar a información, prema aquí.

11/05/2011. DINAMIZACIóN

Xeiras da Lingua en Redondela

A Concellaría de Normalización Lingüística do Concello de Redondela súmase á celebración das Letras Galegas, ao igual que outros moitos concellos do país, coa programación Xeiras da Lingua, que se está a desenvolver ao longo dos meses de abril e maio de 2011.

Nos vindeiros días terán lugar, entre outras actividades, dúas representacións teatrais, un concerto de Manu Clavijo e mais un relatorio de Marcos Calveiro sobre o poeta Lois Pereiro.
10/05/2011. INVESTIGACIóN

O Instituto da Lingua Galega celebra o seu 40 aniversario

O 14 de maio de 1971 nacía o Instituto da Lingua Galega no seo da Universidade de Santiago de Compostela. Co gallo do seu 40 aniversario, o ILG convida a todas as persoas interesadas e nomeadamente, aos axentes sociais que traballan a prol da normalización do galego, a participar no acto de celebración que terá lugar o vindeiro 20 de maio de 2011.

Ás 18.30 h o Reitor da USC descubrirá unha placa na fachada da sede do ILG dando conta de que no segundo andar da casa viviron Rosalía e Murguía nos anos 1863-1865. Posteriormente, ás 19:00 h, terá lugar no paraninfo da USC un acto académico, tamén presidido polo Reitor.

O ILG continuará a conmemorar esta efeméride ao longo do ano 2011 coa presentación de proxectos e estudos que se están a desenvolver nesta institución.
09/05/2011. EMPREGO

Bolsas de colaboración no Consello da Cultura Galega

O Consello da Cultura Galega convoca 6 bolsas de colaboración en proxectos de investigación que se están a desenvolver nesta institución.

Trátase en concreto dos seguintes proxectos: Área de Publicacións (2 bolsas), Área de Documentación (2 bolsas), Área Técnica (2 bolsas).

A duración das bolsas será ata o 31 de decembro de 2011. O prazo de presentación de solicitudes é dun mes, contado a partir do día seguinte ao da publicación no DOG desta convocatoria.
09/05/2011. DINAMIZACIóN

Agasallo sincronizado para o mundo

O colectivo GalegoLab promove o proxecto Agasallo sincronizado para o mundo, que ten como obxectivo conseguir que o vindeiro 17 de maio, Día das Letras Galegas, o galego se escoite de xeito sincronizado nos cinco continentes.

Trátase de que a partir dunha mesma partitura, todos/as os/as artistas que o desexen fagan a súa propia versión e a poñan á disposición do público en YouTube. Deste xeito, o vindeiro 17 de maio todos poderemos compartir cos nosos coñecidos a versión que máis nos guste, provocando unha distribución en rede que permita que o galego se escoite ese día nos cinco continentes.