Novas da lingua

Rexistros3961 a 3990 de 5280
  1. Inicio
  2. CDSG-CCG
  3. Novas da lingua
29/10/2010. CURSOS E CONGRESOS

III Xornadas sobre a normalización da lingua e a cultura no ámbito da educación

A Comisión de Normalización Lingüística da Facultade de Ciencias da Educación e mais o Servizo de Normalización Lingüística da Universidade da Coruña organizan a terceira edición destas xornadas, onde se reflexionará sobre a presenza do galego e a experiencia adquirida no terreo da súa promoción.

As sesións terán lugar os días 16, 17 e 18 de novembro na Facultade de Ciencias da Educación da UDC.

Se desexa coñecer o programa completo, prema aquí.
28/10/2010. CURSOS E CONGRESOS

Curso de blogs e iniciación a ferramentas multimedia

A Coordinadora de Traballadores/as de Normalización da Lingua convoca a terceira edición do Curso de blogs e iniciación a ferramentas multimedia para o traballo en normalización lingüística.

As sesións terán lugar os días 10, 11 e 24 de novembro de 2010 na Aulanet da Facultade de Ciencias da Educación da Universidade da Coruña.

O prazo de inscrición remata o vindeiro 30 de outubro.
28/10/2010. EMPREGO

Bolsa para traballar no Servizo de Publicacións do Parlamento de Galicia

O Parlamento de Galicia anuncia a convocatoria dunha bolsa, de doce meses de duración, para a formación práctica de persoal técnico de publicacións, que ten por obxecto desenvolver as tarefas prácticas que encomende o Servizo de Publicacións desta institución.

Poderán optar a esta bolsa os/as licenciados/as en Tradución e Interpretación, rama de galego, ou en Filoloxía Galega que acadasen a súa titulación no ano académico 2004-2005 ou posteriores.

O prazo de presentación de solicitudes é de vinte días naturais, contados a partir do seguinte ao da publicación do anuncio da convocatoria no DOG.

As bases poden consultarse no Boletín Oficial do Parlamento de Galicia.
22/10/2010. CURSOS E CONGRESOS

VII Xornadas de Lingua e Usos

O Servizo de Normalización Lingüística da Universidade da Coruña organiza, en colaboración coa Real Academia Galega, a sétima edición destas xornadas, que nesta ocasión analizarán os usos lingüísticos no ámbito da sanidade.

As sesións desenvolveranse os días 1, 2 e 3 de decembro no Salón de actos do Edificio Universitario do campus de Oza.

O prazo de inscrición remata o vindeiro 24 de novembro.

Se desexa consultar o programa ou obter máis información sobre os trámites da matrícula, prema aquí.
22/10/2010. DINAMIZACIóN

O Concello de Zas promove o uso do galego no ámbito asociativo

O Servizo de Normalización Lingüística do Concello de Zas presenta un programa de actividades para dinamizar os usos lingüísticos no tecido asociativo do municipio.

O programa desenvolverase no marco dun convenio que diferentes asociacións culturais e deportivas asinaron co Concello de Zas, a través do cal se comprometen a empregar o galego nas súas actividades cotiás, así como na documentación interna e externa da asociación.

Pola súa parte, o SNL municipal ofreceralles ás asociacións, que no se conxunto contan con máis de 2000 socios/as, asesoramento lingüístico, formación e mais unha compilación de recursos lingüísticos e modelos de documentos de utilidade para as directivas.

Se desexa máis información, prema aquí.
22/10/2010. INVESTIGACIóN

A Coruña na creación do libro galego

A Concellaría de Cultura do Concello da Coruña, coa colaboración da Real Academia Galega, organiza a exposición “A Coruña na creación do libro galego”, que quere homenaxear o bicentenario da publicación de Proezas de Galicia (1810), primeiro libro impreso en galego.

Os visitantes terán oportunidade de coñecer os 200 anos de estreita relación entre a cidade da Coruña e a edición do libro galego, así como de ver obxectos persoais expostos por primeira vez ao público, como o reloxo de Ánxel Casal ou a máquina de escribir de Leandro Carré.

A mostra estará aberta ao público na sala de exposicións do Concello da Coruña ata o vindeiro 21 de novembro de 2010.
22/10/2010. DINAMIZACIóN

Preséntase o programa Bocaberta 2010-2011

A Secretaría Xeral de Política Lingüística presenta o programa Bocaberta 2010-2011, un total de 747 iniciativas que teñen como obxectivo promover o uso do galego entre os rapaces e rapazas de 3 a 18 anos.

O programa, que se desenvolverá en colaboración con 14 entidades, inclúe actividades musicais, de banda deseñada, de maxia, de expresión en galego e mesmo unha xincana.

No web da SXPL pode consultar o calendario mensual de actividades, con información sobre as datas e concellos nos que terán lugar as diferentes iniciativas.
22/10/2010. AXUDAS E PREMIOS

Premios para a publicidade en lingua galega

O Consello Asesor da RTVE-G e da CRTVG entregaron o pasado 15 de outubro os XVII Premios de Publicidade en Galego, que teñen como obxectivo recoñecer o traballo realizado a prol da normalización lingüística por parte de empresas e entidades que se publicitan nos medios de comunicación.

Na categoría de radio, o anuncio gañador foi “ARTS, divino”, elaborado e presentado por Radio Nordés-Cadena SER. No ámbito da televisión, o galardón recibiuno a campaña “GADIS: maloserá”, da axencia BAP&CONDE. Na modalidade de internet, o anuncio premiado foi o da “XVI Mostra de Olería de Buño”, elaborado e presentado por Canle de Comunicación.

O Premio especial Muralla de Lugo, convocado por primeira vez nesta edición, outorgóuselle á campaña de MONBUS “achega a Muralla de Lugo a toda Europa”, elaborado pola axencia Gurgullas de Cor.

19/04/2010. AXUDAS E PREMIOS

III Concurso de blogs Reblogdela

A Asociación de Empresarios de Redondela e mais o Servizo de Normalización Lingüística municipal organizan a terceira edición do Concurso de blogs Reblogdela, que nesta ocasión ten como obxectivo promover o uso do galego no ámbito do deporte redondelán coa axuda das novas tecnoloxías.

Todos os blogs que se presenten ao certame deben estar redactados en lingua galega e ter como temática o deporte redondelán.

O prazo para entregar os traballos remata o 10 de decembro de 2010.

Se desexa coñecer as bases do concurso ou obter máis información sobre os trámites de inscrición, prema aquí.
15/10/2010. DINAMIZACIóN

O galego, o noso medio natural

A Área de Normalización Lingüística da Universidade de Vigo, en colaboración coa Coordinadora Galega de Equipos de Normalización e Dinamización Lingüística (CGENDL), presenta a campaña "O galego, o noso medio natural", deseñada para promover a reflexión sobre a importancia da conservación das especies e das linguas para o mantemento da biodiversidade do planeta.

Co ánimo de fomentar o ecolingüismo, os organizadores da iniciativa distribuirán na Universidade de Vigo e mais nos centros de educación non universitaria de Galicia diferentes materiais, como adhesivos, chapas, camisolas ou ecoguías, uns cadernos con textos literarios que falan da ecoloxía das linguas.

13/10/2010. DINAMIZACIóN

Xornada pola ciencia en galego

A Coordinadora Galega de Equipos de Normalización e Dinamización Lingüística (CGENDL) convida a todos os centros educativos galegos a organizar o vindeiro 4 de novembro unha actividade conxunta entre os departamentos das áreas científico-tecnolóxicas e os Equipos de
Dinamización da Lingua Galega dun mesmo ou varios centros escolares, co obxectivo
de transmitirlle á sociedade que todas as linguas son válidas para a expresión científica e reinvindicar o ensino da ciencia en galego.

A CGENDL habilitou un apartado especial na súa páxina web para acoller toda a información e materiais relativos a esta xornada.
13/10/2010. DINAMIZACIóN

O Concello da Coruña reedita o seu programa de cinema infantil en galego

O Servizo de Normalización Lingüística do Concello da Coruña presenta unha nova edición do ciclo de cinema en galego destinado aos máis pequenos/as do concello.

O ciclo 8 pelis para os/as peques terá lugar todos os sábados de outubro a decembro, ás 18:00 h, no Museo de Arte Contemporáneo. Gas Natural Fenosa (MACUF).

A entrada é de balde.
07/10/2010. CURSOS E CONGRESOS

Curso de xestión administrativa para SNL das administracións locais

A Coordinadora de Traballadores/as de Normalización da Lingua convoca dúas edicións do Curso de xestión administrativa para servizos de normalización lingüística (SNL) de administracións públicas locais, no que se ensinará o procedemento administrativo xeral que afecta ao traballo dos SNL.

A primeira edición do curso terá lugar os días 22 e 23 de outubro en Pontevedra e o prazo de solicitude para participar nela será do 11 ao 15 de outubro.

Os días 26 e 27 de novembro desenvolverase unha segunda edición en Santiago de Compostela. Neste caso, o prazo de inscrición será do 8 ao 12 de novembro.

07/10/2010. AXUDAS E PREMIOS

Resólvense as subvencións para a promoción, produción e edición do libro galego

A Consellería de Cultura e Turismo publica, no DOG do 7 de outubro de 2010, a resolución das axudas para a promoción, produción e edición do libro galego, tanto no que se refire á tradución para outras linguas de obras publicadas orixinariamente en galego como á tradución para o galego de obras publicadas orixinariamente noutras linguas.

Se desexa consultar o texto completo da resolución, prema aquí.
07/10/2010. DINAMIZACIóN

En liña o número 50 de Lingua Viva

Xa pode consultar na rede, en formato PDF, un novo número de Lingua Viva, boletín informativo do Servizo de Normalización Lingüística do Concello de Vigo.


O número 50, correspondente ao terceiro trimestre de 2010, inclúe, entre outros contidos,
a presentación de diferentes proxectos desenvolvidos polo SNL (como “Meu! Coñecéndonos, descubríndonos”, “Camiño da Lingua”, ciclos de cine en galego...), un apartado con recensións de novidades bibliográficas, un artigo sobre os problemas coa toponimia do litoral e unha sección destinada á resolución de dúbidas lingüísticas.
06/10/2010. OUTRAS

O galego estará no Liet International da man de Mafia Galega

O vindeiro 27 de novembro de 2010 terá lugar en Lorient unha nova edición do Liet International, un festival creado en 2002 co ánimo de promover os grupos e artistas que cantan en linguas minoritarias.

Nesta ocasión o galego estará representado polo grupo de
hip hop Mafia Galega, que interpretará o tema Billarda sempre.

En edicións anteriores a nosa representación correo a cargo de artistas como
Uxía (2004), Narf (2006) ou Boy Elliott & The Plastic Bags (2008).

06/10/2010. AXUDAS E PREMIOS

Resólvense as subvencións para a edición en galego de materiais didácticos

A Consellería de Educación e Ordenación Universitaria publica, no DOG do 6 de outubro de 2010, a resolución das axudas para a edición en galego de recursos didácticos curriculares para niveis non universitarios.

Se desexa consultar o texto completo da resolución, prema aquí.



06/10/2010. DINAMIZACIóN

Detrás da canción

No marco do programa de dinamización lingüística Bocaberta,
a Secretaría Xeral de Política Lingüística organiza a actividade “Detrás da canción”, na que os integrantes dos grupos galegos Projecto Mourente e The Homens ensinarán a mozos e mozas maiores de 12 anos en qué consiste o proceso creativo de creación e gravación dunha canción.

A actividade inclúe un curso de música caseira, a cargo de Carlos Valcárcel (Projecto Mourente) e mais un concerto acústico de banda The Homens, cuxo repertorio está composto integramente por temas en galego.

A inscrición pode facerse a través do propio web da iniciativa.
06/10/2010. DINAMIZACIóN

Certame de carteis para ilustrar a dinamización lingüística no deporte redondelán

O Servizo de Normalización Lingüística do Concello de Redondela organiza un certame de carteis que ten como obxectivo seleccionar a imaxe que servirá de soporte publicitario a unha campaña de dinamización lingüística no ámbito do deporte redondelán, que se presentará o vindeiro mes de novembro baixo o lema “Xoga e fálao, da mañá á noite”.

O prazo para entregar os traballos remata o 15 de outubro, ás 12:00 horas, e o/a gañador/a recibirá un premio de 300 euros.

Se desexa máis información, prema aquí.
04/10/2010. AXUDAS E PREMIOS

Concurso de vídeo para festexar o Samaín

O Servizo de Normalización Lingüística do Concello de Zas e mais os equipos de dinamización lingüística do IES Maximino Romero Lema e do CPI de Zas organizan un concurso de vídeo co ánimo de festexar o Samaín e promover a creatividade en galego entre o alumnado de secundaria e bacharelato dos centros participantes.

Os vídeos deberán tratar sobre o fomento da lingua galega na festividade do Samaín, estar en formato AVI e ter unha duración de 3 minutos.

O prazo para entregar os traballos remata o vindeiro 18 de novembro.

04/10/2010. DINAMIZACIóN

O Circo da Lingua en Soutomaior

A plataforma Queremos Galego organiza o Circo da Lingua, unha actividade lúdica que terá lugar o vindeiro sábado 16 de outubro en Soutomaior.

O programa da xornada inclúe, entre outras actividades, un roteiro musical, mostras de xogos tradicionais, espectáculos de rúa e mais concertos. A maiores, terá lugar tamén unha mesa redonda onde se debaterá sobre o futuro do galego e os retos pendentes para acadar a súa plena normalización.

Se desexa máis información, prema aquí.


01/10/2010. DINAMIZACIóN

Camiño de Santiago pola lingua

A Asociación Xuvenil Amencer, a plataforma Queremos Galego e mais o Servizo de Normalización Lingüística do Concello de Ourense organizan unha peregrinaxe a Compostela para reivindicar a plena normalización do galego en todos os ámbitos sociais.

Baixo o lema “Eu camiño pola lingua. E ti?”, os/as participantes camiñaran pola Vía da Prata durante catro xornadas (10, 17, 24 e 31 de outubro), plantarán unha árbore ao remate de cada etapa e leran un manifesto en catro partes.

As persoas interesadas teñen de prazo para inscribirse en cada etapa ate a mañá do venres anterior a cada unha.

Se desexa máis información, prema aquí.
30/09/2010. EMPREGO

Bolsas da ANL da Universidade de Vigo

A Universidade de Vigo convoca tres bolsas de iniciación á colaboración coa súa Área de Normalización Lingüística.
Os solicitantes deben cumprir como requisito ser estudantes de Filoloxía Galega ou de Tradución e Interpretación (Lingua A: Galego) da Universidade de Vigo no curso 2010/2011 e ter cursado polo menos a metade dos créditos da titulación.

O prazo de presentación de solicitudes remata o vindeiro 15 de outubro de 2010, ás 14:00 h.

Se desexa consultar o texto completo da convocatoria, prema aquí.
28/09/2010. CURSOS E CONGRESOS

A debate o prestixio social do galego

A Fundación Carlos Casares vén de crear o Foro Mugardos Lingua e Sociedade, que nesta primeira edición analizará como se constrúe o prestixio das linguas socialmente minoritarias e cales son as variables que condicionan este prestixio.

As sesións terán lugar os vindeiros 8 e 9 de outubro de 2010 no Pazo de Rilo, en Mugardos, e contarán coa participación de especialistas como Glyn Williams, Gabriel Rei-Doval, Xosé Luís Barreiro, Valentín García Gómez, Joan Argenter ou Fernando Ramallo.

A inscrición é de balde.

27/09/2010. INVESTIGACIóN

O Consello da Cultura Galega presenta un avance de resultados sobre as actitudes lingüísticas en Galicia

O Consello da Cultura Galega, a través do Observatorio da Lingua Galega, presentou, con motivo da celebración dos XII Encontros para a Normalización Lingüística, un avance dos resultados do estudo que está a desenvolver esta institución sobre as actitudes lingüísticas en Galicia.

No mesmo marco dos XII Encontros presentáronse tamén os datos básicos sobre a evolución do galego nas últimas décadas, estudo comparativo desenvolvido polo Observatorio da Lingua Galega a partir dos datos do Mapa Sociolingüístico de Galicia de 1992 (RAG) e mais das enquisas de condicións de vida das familias de 2003 e 2008 (IGE).
27/09/2010. CURSOS E CONGRESOS

Curso de presentacións eficientes para a normalización lingüística

A Coordinadora de Traballadores/as de Normalización da Lingua convoca dúas edicións do Curso de presentacións eficientes para a normalización lingüística, no que se ensinará a empregar as presentacións con modelos adecuados, modernos e eficientes para transmitir mellor as mensaxes destinadas á promoción do uso do idioma.

A primeira edición do curso terá lugar os días 5, 8, 9 e 15 de outubro e o prazo de solicitude para participar nela remata o vindeiro 29 de setembro.

Os días 2, 5, 6 e 12 de novembro desenvolverase unha segunda edición. Neste caso, o prazo de inscrición será do 11 ao 15 de outubro.


27/09/2010. DINAMIZACIóN

Do berce á rúa, medra coa lingua!

O Servizo de Normalización Lingüística do Concello de Narón presenta a campaña "Do berce á rúa, medra coa lingua!", que ten como obxectivo fomentar o uso do galego na transmisión familiar.

A iniciativa conta cun sitio web na rede onde os futuros pais e nais teñen ao seu dispor un pequeno léxico trilingüe, cantigas e xogos para fomentar a aprendizaxe en galego e mais unha selección de recursos en liña de carácter lúdico-educativo.

22/09/2010. CURSOS E CONGRESOS

Simposio “Contacto de linguas, hibrididade, cambio: contextos, procesos e consecuencias”


O Instituto da Lingua Galega (USC), o Departamento de Ciencias da Comunicación (USC) e mais o Consello da Cultura Galega organizan o simposio “Contacto de linguas, hibrididade, cambio: contextos, procesos e consecuencias”, no que se reflexionará sobre a relevancia do contacto interlingüístico na configuración e evolución das linguas.

As sesións terán lugar os días 2, 3, 4, 8 e 9 de novembro de 2010 na Facultade de Filoloxía da Universidade de Santiago de Compostela.

O prazo de inscrición remata o 23 de outubro.

21/09/2010. DINAMIZACIóN

A Secretaría Xeral de Política Lingüística crea a Rede de Dinamización Lingüística

A Secretaría Xeral de Política Lingüística presenta a Rede de Dinamización Lingüística, unha iniciativa que pretende fomentar a coordinación en materia de dinamización lingüística entre a Administración autonómica e as entidades locais.

Segundo se recolle na súa orde de creación, publicada no DOG do 21 de setembro de 2010, trátase dunha asociación voluntaria que pretende congregar as actuacións dinamizadoras das institucións con competencia na promoción do uso do galego no ámbito local, favorecendo a creación dun marco de intercambio de criterios e recursos de utilidade no ámbito da planificación lingüística.

Se desexa ampliar esta información, prema aquí.
21/09/2010. CURSOS E CONGRESOS

Cursos de linguaxe administrativa para o persoal de protección civil e emerxencias

A Academia Galega de Seguridade, en colaboración coa Secretaría Xeral de Política Lingüística, convoca cursos de linguaxe administrativa galega, dos niveis medio e superior, destinados ao persoal dos servizos do sistema integrado de protección civil e emerxencias.

O prazo de presentación de solicitudes é de 15 días naturais, contados a partir do seguinte ao da publicación da convocatoria.