Novas da lingua

Rexistros4471 a 4500 de 5153
  1. Inicio
  2. CDSG-CCG
  3. Novas da lingua
30/12/2008. OUTRAS

Nace a asociación Diverslinguae

O pasado 16 de decembro presentouse publicamente Diverslinguae, unha asociación de ámbito estatal que nace co ánimo de dar a coñecer a realidade plurilingüe do Estado español e defender os dereitos lingüísticos dos pobos que o integran.

A asociación está constituída pola Mesa pola Normalización Lingüística, a Fundación Aurten Bai, Euskara Kultur Elkargoa e o CIEMEN, entidades que xa teñen experiencia na colaboración conxunta por seren membros todas elas do Comité do Estado Español da Axencia Europea das Linguas Minorizadas.

Se desexa ampliar esta información, prema aquí.
30/12/2008. AXUDAS E PREMIOS

Resólvese o Premio Manuel Beiras 2008

A Cámara de Comercio, Industria e Navegación e o Concello de Santiago fixeron entrega, o pasado 12 de decembro, dos seus respectivos premios aos galardoados da novena edición do Premio Manuel Beiras.

Os premiados deste ano foron a empresa A Navalla Suíza, na categoría de nova incorporación ao uso do galego, e Tórculo Artes Gráficas, na categoría de empresas que veñen realizando un uso continuado do idioma galego.

O centro comercial Área Central recibiu tamén unha distinción especial polo seu compromiso co idioma.
15/12/2008. EMPREGO

Praza de técnico/a de normalización lingüística no Concello de Narón

O Concello de Narón anuncia a convocatoria para a contratación temporal, como persoal laboral, dun técnico/a de normalización lingüística que terá como principal obxectivo planificar e desenvolver as tarefas de asesoramento e dinamización lingüística que organice o Concello.

O proceso de selección é o de concurso-oposición. O prazo de presentación de solicitudes remata o 22 de decembro de 2008.
Para consultar o texto completo da convocatoria, prema aquí.
15/12/2008. AXUDAS E PREMIOS

II Concurso de cartas aos reis magos no Concello de Ames

O Servizo de Normalización Lingüística do Concello de Ames organiza o II Concurso de cartas aos reis magos. Todos os/as nenos/as de Ames que queiran participar neste concurso deben entregarlles as súas cartas, escritas en galego, aos carteiros reais que pasarán polos colexios ou depositalas antes do vindeiro 30 de decembro nas caixas de correo real distribuídas por diferentes lugares do concello.

Os reis magos contestarán todas as cartas recibidas e o 5 de xaneiro, durante a cabalgata real, eles mesmos farán a entrega dos premios.
15/12/2008. EMPREGO

Bolsas de colaboración no Centro Ramón Piñeiro

A Secretaría Xeral de Política Lingüística publica a convocatoria de dez bolsas de colaboración en diferentes proxectos de investigación que se están a desenvolver no Centro Ramón Piñeiro para a Investigación en Humanidades.

Trátase en concreto dos seguintes proxectos: Corpus de referencia do galego actual (2 bolsas), Bibliografía da literatura galega (1 bolsa), Dimensións da identidade colectiva en Galicia (1 bolsa), Síntese de voz en galego (2 bolsas), Tesouro fraseolóxico galego (1 bolsa), Cantigas de Santa María (1 bolsa), Base de datos do ALiR (1 bolsa) e Terminoloxía científico-técnica (1 bolsa).

O prazo de presentación de solicitudes é de 31 días naturais, contados a partir do día seguinte ao da publicación desta convocatoria.
15/12/2008. AXUDAS E PREMIOS

Premios Xarmenta 2008

A Asociación Berciana da Lingua “Xarmenta” deu a coñecer os galardoados da cuarta edición destes premios que teñen como finalidade recoñecer o labor daquelas institucións e personalidades que máis teñan contribuído á promoción do galego no Bierzo.

Os gañadores deste ano son Susana Seivane, a Escola de Gaitas de Vilafranca do Bierzo e mais o grupo berciano Aira da Pedra. O acto de entrega dos premios terá lugar o 15 de xaneiro de 2009, no Teatro Bérgidum de Ponferrada.

A Asociación Xarmenta aproveitou a ocasión para presentar o terceiro número da revista que leva o seu mesmo nome e coa que queren seguir contribuíndo á difusión da lingua galega no Bierzo.
12/12/2008. INVESTIGACIóN

O Consello de Europa avalía o cumprimento da Carta europea das linguas rexionais ou minoritarias no Estado español

O Consello de Europa acaba de facer público un segundo informe sobre o grao de cumprimento da Carta europea das linguas rexionais ou minoritarias por parte do Estado español, que aprobou este documento en 1992 e posteriormente ratificouno en 2001.

No que respecta á promoción e protección da lingua galega, o Comité de Expertos do Consello de Europa céntrase naquelas disposicións nas que detectara deficiencias no primeiro informe. No ámbito educativo, eloxia a creación das Galescolas e apoia o novo Decreto 124/2007, mais sinala deficiencias no seu cumprimento e insta ás autoridades a crear un modelo educativo totalmente en galego para o alumnado que o desexe. Así mesmo sinala o incumprimento xeral dos mínimos asumidos polo Estado español no ámbito da xustiza e detecta deficiencias noutros ámbitos como a Administración, os medios de comunicación, a vida económica e social e os intercambios transfronteirizos.

Se desexa consultar os informes anteriores, tanto do Goberno español como do Consello de Europa, prema aquí.
12/10/2008. DINAMIZACIóN

Segunda edición da campaña "Xeración E logo!"

A Secretaría Xeral de Política Lingüística presentou a segunda edición desta iniciativa que ten como obxectivo fomentar a transmisión xeracional da lingua galega. A principal actuación consistirá na distribución de diferentes materiais (música para o berce, un caderno da xestación, unha escolma de nomes galegos, recitativos e adhesivos para o coche) na rede hospitalaria e de atención primaria do Servizo Galego de Saúde e nos centros médicos privados.

Todos os materiais escritos poderán descargarse desde o sitio web da campaña, onde os pais e nais teñen tamén a posibilidade de participar na sección “Anenotario” contando as anécdotas dos seus cativos.

09/12/2008. AXUDAS E PREMIOS

Para ben ser, os parabéns en galego

O Servizo de
Normalización Lingüística do Concello do Barco de Valdeorras, coa colaboración da aula de Informática do Concello,
convoca un concurso de postais de Nadal en formato dixital, presentacións e/ou vídeos para impulsar o uso da lingua galega no ámbito das novas tecnoloxías.

Os traballos presentados deberán ser inéditos e estar redactados e/ou gravados en lingua galega. O prazo de presentación remata o 29 de decembro ás 14:00 h.

Se desexa consultar as bases do concurso, prema aquí.
02/12/2008. CURSOS E CONGRESOS

Cursos de lingua galega para adultos e colectivos de Galicia

A Secretaría Xeral de Política Lingüística publica a convocatoria de cursos de lingua galega preparatorios para as probas dos niveis Celga 1, Celga 2, Celga 3 e Celga 4, destinados a adultos e colectivos de Galicia.

Os cursos desenvolveranse en diferentes localidades galegas ao longo do ano 2009 e o prazo de presentación de solicitudes varía segundo a quenda elixida. Se desexa consultar o texto completo da convocatoria, prema aquí.
02/12/2008. AXUDAS E PREMIOS

Axudas para as empresas xornalísticas e de radiodifusión

A Secretaría Xeral de Comunicación publica, no DOG do 2 de decembro de 2008, dúas liñas de axudas destinadas ao fomento do galego nas empresas xornalísticas e de radiodifusión.

Por un lado, establécese unha liña de axudas dirixidas especificamente a empresas que realicen publicacións periódicas escritas integramente en galego e por outro, unha liña de subvencións destinada ás empresas xornalísticas e de radiodifusión no seu conxunto que se comprometan a incrementar de xeito progresivo os contidos en galego e sobre o galego.

En ambos os casos, o prazo de presentación de solicitudes é de un mes, contado a partir do día seguinte ao da publicación das convocatorias.
02/12/2008. INVESTIGACIóN

Accesibles na rede os relatorios presentados nas V Xornadas de Lingua e Usos

Xa están accesibles, no web do Servizo de Normalización Lingüística da Universidade da Coruña, as gravacións dos relatorios, conferencias e debates que tiveron lugar no marco das V Xornadas de Lingua e Usos. Lingua e Docencia Universitaria, celebradas os pasados 12, 13 e 14 de novembro de 2008.

Así mesmo, tamén poden consultarse as presentacións con que algúns relatores/as apoiaron o seu discurso.
02/12/2008. INVESTIGACIóN

Accesibles en liña os relatorios presentados nas V Xornadas de Lingua e Usos

Xa están accesibles, no web do Servizo de Normalización Lingüística da Universidade da Coruña, as gravacións dos relatorios, conferencias e debates que tiveron lugar no marco das V Xornadas de Lingua e Usos. Lingua e Docencia Universitaria, celebradas os pasados 12, 13 e 14 de novembro de 2008.

Así mesmo, tamén poden consultarse as presentacións con que algúns relatores/as apoiaron o seu discurso.
02/12/2008. DINAMIZACIóN

En liña o nº 45 do Cartafol Dixital

Xa pode consultar o novo número do Cartafol Dixital, boletín mensual editado polo Servizo de Normalización Lingüística da Universidade de Santiago de Compostela.

Entre os contidos deste número salientamos a recensión do Vocabulario de morfoloxía, anatomía e citoloxía veterinaria, a presentación das I Xornadas de Recursos Didácticos Galegos ou a análise sobre a introdución do fomento do galego como obxectivo estratéxico nos diferentes plans sectoriais e contratos-programa da USC.
28/11/2008. AXUDAS E PREMIOS

Resólvense as axudas para o fomento do galego no ámbito editorial e mais na educación infantil dos centros de ensino privados concertados

A Consellería de Cultura e Deporte publica, no DOG do 28 de novembro de 2008, a resolución da convocatoria de subvencións destinadas á promoción, produción e edición do libro galego.

Pola súa parte, a Consellería de Educación e Ordenación Universitaria publica tamén a relación de centros beneficiarios das axudas para a implantación de accións que potencien o ensino en lingua galega no segundo ciclo de educación infantil no ámbito do ensino privado concertado.

28/11/2008. INVESTIGACIóN

Novo recurso terminolóxico no ámbito da veterinaria

O Servizo de Normalización Lingüística da USC presenta o Vocabulario de morfoloxía, anatomía e citoloxía veterinaria: (galego-español-inglés), coordinado por Xusto Rodríguez Río e no que participaron tanto profesionais do ámbito da veterinaria como lingüistas expertos en terminoloxía.

A obra conta con 2 715 entradas, para as que se presenta ademais da denominación galega, o seu equivalente en inglés, castelán e, nalgúns casos, mesmo latín.
21/11/2008. DINAMIZACIóN

Por unha administración mellor, mellor en galego

A Confederación Intersindical Galega (CIG) presenta a campaña Por unha administración mellor, mellor en galego, destinada principalmente a concienciar os traballadores/as da Administración pública da necesidade de cumprir a normativa lingüística vixente e garantir os dereitos lingüísticos da cidadanía.

O desenvolvemento desta iniciativa, que é a segunda fase doutra campaña previa que a CIG botou a andar no mes de maio, inclúe a edición de carteis e o envío de misivas a toda a afiliación da Administración e aos directivos das diferentes áreas das institucións públicas, nas que se recollen os dereitos e as obrigas lingüísticas no ámbito público.

Se desexa máis información, prema aquí.
21/11/2008. EMPREGO

Praza de técnico/a de normalización lingüística no Concello de Redondela

O Concello de Redondela anuncia a convocatoria para a contratación temporal, na modalidade de interinidade, dun técnico/a de normalización lingüística, que terá como principal obxectivo planificar e desenvolver as tarefas de asesoramento e dinamización lingüística que organice o Concello.

O proceso de selección é o de concurso-oposición. O prazo de presentación de solicitudes remata o 29 de novembro de 2008.

Se desexa consultar o texto completo da convocatoria, prema aquí.
20/11/2008. OUTRAS

Preséntase o prototipo do tradutor automático inglés-galego-inglés

A empresa Imaxín Software presenta o primeiro prototipo de tradutor inglés-galego-inglés, desenvolvido coa colaboración das universidades de Vigo e Santiago de Compostela e co financiamento da Consellería de Innovación e Industria.

O paquete está accesible en liña para o seu uso e perfeccionamento.


20/11/2008. DINAMIZACIóN

Xornada de servizos e produtos para a dinamización lingüística

No marco do Cultur.gal, a Coordinadora de Traballadores para a Normalización da Lingua organiza unha xornada de encontro entre os traballadores/as de normalización lingüística e as empresas que desenvolven servizos e produtos útiles para o seu traballo.

Na xornada, que terá lugar o vindeiro día 5 de decembro, a partir das 17:00 h, cada entidade fará unha breve presentación duns 10 minutos daquelas propostas máis axeitadas para poder ser contratadas por un SNL ou ENDL e entregaralles aos/ás técnicos/as e coordinadores/as participantes un dossier con información sobre as súas propostas.

Se desexa máis información, prema aquí.
18/11/2008. AXUDAS E PREMIOS

XI Premio Manuel Beiras

A Cámara de Comercio, Industria e Navegación e o Concello de Santiago convocan a novena edición do Premio Manuel Beiras, que ten como finalidade outorgar un recoñecemento público ao esforzo e compromiso coa normalización lingüística no sector empresarial.

O galardón contempla dúas categorías, unha para as empresas que leven feito un uso continuado da lingua galega e outra para as que se incorporaron recentemente ao uso do galego. As empresas interesadas teñen de prazo para presentar as súas candidaturas ata o 1 de decembro de 2008.


14/11/2008. DINAMIZACIóN

Xustamente, en galego

O Servizo de Asesoramento Lingüístico do Consello de Avogados de Santiago presenta, baixo o título Xustamente, en galego, unha nova campaña de dinamización lingüística no ámbito da xustiza.

Amais dos carteis divulgativos que se distribuirán polos xulgados, facultades de dereito, colexios de avogados, etc., no web do colexio habilitouse tamén unha sección para que as persoas interesadas poidan argumentar os motivos polos que consideran que debe fomentarse o uso do galego no eido xurídico.
14/11/2008. INVESTIGACIóN

Homenaxe a Antón Santamarina polo seu labor no ámbito da estandarización do idioma galego

Antón Santamarina, membro da Real Academia Galega e catedrático de Románicas na Universidade de Santiago de Compostela, recibiu onte nun acto de homenaxe celebrado na Facultade de Filoloxía da USC o recoñecemento aos seus 30 anos de catedrático e 41 anos de docencia, así como ao seu intenso labor investigador no ámbito da estandarización e codificación do idioma galego.

No acto presentouse tamén o libro Cada palabra pesaba, cada palabra medía. Homenaxe a Antón Santamarina, no que participaron arredor de cincuenta colaboradores da Facultade de Filoloxía e do Departamento de Filoloxía Galega da USC con traballos relacionados coas liñas de investigación que o propio homenaxeado cultivou.
19/04/2010. CURSOS E CONGRESOS

Seminarios de linguaxe non sexista

O Consello da Xuventude de Galicia organiza seminarios de linguaxe non sexista dirixidos a mozas e mozos pertencentes a asociacións xuvenís, así como á poboación moza de toda a Comunidade Autónoma de Galicia.

O principal obxectivo destes seminarios, dos que se celebrarán tres edicións, é achegarlles ás persoas participantes recursos e criterios para eliminar o sexismo lingüístico, así como facelos reflexionar sobre a necesidade de democratizar a linguaxe formal e coloquial.

Se desexa máis información sobre as datas de celebración ou os trámites de inscrición, prema aquí.

12/11/2008. AXUDAS E PREMIOS

Concurso de carteis de Nadal no Concello de Muros

O Servizo de Normalización Lingüística do Concello de Muros e mais a Asociación Cultural Ponte Vella organizan o Concurso de carteis de Nadal 2008. O certame está dirixido a nenos e nenas de infantil e primaria deste municipio, que deben empregar nos seus traballos a lingua galega.

O premio consistirá en 200 € en agasallos para o neno/a gañador/a e outros 200 € en material escolar para a súa aula.

Se desexa consultar o texto completo da convocatoria, prema aquí.
12/11/2008. DINAMIZACIóN

Bota a andar en Ames a campaña “Tes dereito a unha atención en galego”

A Mesa pola Normalización Lingüística e mais o Servizo de Normalización Lingüística do Concello de Ames presentan a campaña Tes dereito a unha atención en galego, que ten como obxectivo informar á cidadanía do seu dereito a ser atendida oralmente en galego en calquera administración ou empresa pública, tanto presencialmente como por teléfono.

A Mesa pola Normalización Lingüística estenderá esta iniciativa a outras administracións nas vindeiras semanas, tentando informar á cidadanía dos seus dereitos lingüísticos e concienciar ao funcionariado do seu deber de garantir estes dereitos.
11/11/2008. AXUDAS E PREMIOS

Axudas para a creación e mantemento de servizos de normalización lingüística na provincia da Coruña [corrección]

A Deputación da Coruña publica, no BOP do 11 de novembro de 2008, a corrección das bases reguladoras do programa de cooperación cos concellos da provincia da Coruña para a creación ou mantemento dos servizos de normalización lingüística durante o período 2009-2011.

O prazo de presentación de solicitudes é de un mes, contado a partir do día seguinte ao da publicación desta convocatoria.
04/11/2008. DINAMIZACIóN

En liña un novo número do Cartafol Dixital

Xa pode consultar na rede o número 44 do Cartafol Dixital, voceiro da Universidade de Santiago de Compostela en materia de normalización lingüística.

Entre os contidos deste número salientamos a presentación da terceira edición do Programa de Acompañamento de Estudantes, a nova sobre a resolución dos IV Premios á calidade lingüística ou a recensión sobre o Vocabulario multilingüe de economía.

03/11/2008. EMPREGO

Contrato de traballo para desenvolver tarefas de dinamización lingüística

O Servizo de Normalización Lingüística da UDC, en colaboración coa Deputación da Coruña, convoca un contrato de traballo por obra ou servizo para colaborar nunha campaña de dinamización lingüística.

Os/as candidatos/as deberán posuír unha licenciatura ou titulación superior equivalente, acreditar coñecementos sociolingüísticos e experiencia no ámbito da planificación lingüística e posuír coñecementos informáticos.

O prazo de presentación de solicitudes remata o vindeiro 7 de novembro, ás 14:00 h. Se desexa máis información, prema aquí.
30/10/2008. CURSOS E CONGRESOS

Curso de introdución ao traballo en servizos de normalización lingüística

A Coordinadora de Traballadores/as de Normalización da Lingua convoca un novo curso de formación dirixido a persoas que comezaron a traballar recentemente nun servizo de normalización lingüística, así como aos estudantes interesados neste ámbito laboral, co obxectivo de os introducir no traballo dos SNL e formar novos/as técnicos/as de normalización.

O curso terá unha edición en cada unha das tres universidades galegas. As datas de celebración serán os días 12-14 de novembro (na USC), 19-21 de novembro (na UVigo) e 26-28 de novembro (na UDC).

Se desexa máis información, prema aquí.