Novas da lingua

Rexistros4561 a 4590 de 5280
  1. Inicio
  2. CDSG-CCG
  3. Novas da lingua
17/03/2008. CURSOS E CONGRESOS

Curso de verán 2008 de lingua e cultura galegas para estranxeiros

A Área de Normalización Lingüística da Universidade de Vigo convoca por segundo ano este curso de verán que se desenvolverá entre os días 1 e 24 de xullo de 2008 en Vigo e Allariz e que nesta edición contará con dous niveis, elemental e intermedio.

O prezo da matrícula é de 90 € e haberá 25 bolsas de 450 € para os mellores expedientes entre os inscritos.

O prazo de preinscrición remata o 11 de abril de 2008. Se desexa obter máis información sobre os trámites da matrícula ou coñecer os contidos do curso, prema aquí.


13/03/2008. DINAMIZACIóN

O Arcebispado de Santiago de Compostela propón que se fomente o uso do galego nas celebracións litúrxicas

A través dunha nota publicada no seu boletín oficial, o Arcebispado de Santiago de Compostela recoméndalles aos sacerdotes que fomenten o uso do galego nas celebracións culturais e litúrxicas naquelas comunidades de fieis nas que o galego é a lingua habitual. O Arcebispado proponlles que “non só acollan ben as peticións que poidan presentar os fieis, senón que, adiantándose, sexan eles os que ofrezan a posibilidade de ter as celebracións en lingua galega”.

Para obter máis información sobre esta nova, prema aquí.
13/03/2008. DINAMIZACIóN

Mil festas máis para a lingua galega

A Secretaría Xeral de Política Lingüística, a Concellería de Cultura do Concello de Redondela e mais a Televisión de Galicia están a desenvolver a campaña Mil festas máis para a lingua galega, que ten como principal obxectivo fomentar o uso do galego nas festas populares.

Os impulsores da iniciativa convidan a todos os concellos galegos a adherirse á campaña e con este fin o vindeiro 4 de abril terá lugar unha xuntanza para asinar unha declaración conxunta.
19/04/2010. AXUDAS E PREMIOS

V Certame Literario Concello de Ames

O Servizo de Normalización Lingüística do Concello de Ames convoca a quinta edición deste certame literario que ten como principal obxectivo promover os novos valores da literatura en lingua galega.

O certame conta con dúas modalidades (narrativa e poesía) e en cada unha delas estableceranse tres categorías, segundo a idade dos participantes. Os textos, de tema libre, deben ser inéditos e estar escritos en lingua galega. O prazo de presentación de orixinais remata o 12 de abril de 2008. Se desexa consultar o texto completo da convocatoria, prema aquí.
11/03/2008. INVESTIGACIóN

Preséntase no CCG a publicación “A emerxencia do galego como lingua escrita na Idade Media”

Hoxe martes, día 11 de marzo, presentarase no Salón de Actos do Consello da Cultura Galega a obra Na nosa lyngoage galega. A emerxencia do galego como lingua escrita na Idade Media, que recolle as actas do simposio organizado en novembro de 2005 polo Instituto da Lingua Galega, en colaboración co CCG.

Na presentación, que terá lugar ás 11:00 h, intervirán Ramón Villares, presidente do CCG; Henrique Monteagudo, secretario do CCG; Rosario Álvarez, directora do ILG, e Ana Boullón, editora da publicación.

10/03/2008. LEXISLACIóN

O 60% dos centros de secundaria do Salnés cumpren a lexislación lingüística

A Coordinadora de ENDL dos Centros de Secundaria do Salnés fixo público o seu informe anual, no que se sinala que “no 60% destes centros cúmprese a legalidade vixente no referido ao uso do galego nas aulas”, datos que melloran considerablemente con respecto ao informe do ano pasado, onde se constataba que só o 20% dos centros cumpría a lei.

A Coordinadora sinala tamén a predisposición favorable do alumnado ao uso do galego como lingua vehicular no currículo educativo e aproveita a ocasión para demandar máis formación e recursos sociolingüísticos para a comunidade educativa.

07/03/2008. CURSOS E CONGRESOS

Curso de comunicación e mercadotecnia para accións de normalización lingüística

A Coordinadora de Traballadores/as de Normalización da Lingua organiza a segunda edición deste curso de formación que ten como principal obxectivo facilitar procedementos, ferramentas e estratexias comunicativas que faciliten a promoción e difusión de actividades de normalización lingüística.

O curso desenvolverase na Facultade de Filoloxía da USC os días 28 de marzo e 4 e 11 de abril de 2008. O prazo de preinscrición remata o 17 de marzo. Se desexa máis información, prema aquí.
07/03/2008. DINAMIZACIóN

En liña o número 40 do Cartafol Dixital

Xa pode consultar o novo número do Cartafol Dixital, boletín mensual editado polo Servizo de Normalización Lingüística da Universidade de Santiago de Compostela.

Entre os contidos deste número salientamos a convocatoria da terceira edición do concurso de publicidade Comunicándomos, os datos sobre a evolución das axudas da USC para o uso do galego nos traballos de investigación ou a información sobre a programación de actos lingüístico-culturais que organizará o Centro de Linguas Modernas da USC, sumándose así á conmemoración do 2008 Ano Internacional das Linguas.
03/03/2008. CURSOS E CONGRESOS

Curso de galego para bibliotecarios/as

A Escola Galega de Administración Pública, en colaboración coa Consellería de Cultura e Deporte, convoca un curso de galego dirixido ao persoal da rede de bibliotecas de Galicia. O curso, de 25 h de duración, desenvolverase entre os días 5 e 9 de maio, das 9:00 ás 14:00 horas.

O prazo de presentación de solicitudes remata o 15 de marzo de 2008. Se desexa consultar o texto completo da convocatoria, prema aquí.

03/03/2008. EMPREGO

Resólvese a convocatoria de bolsas no Consello da Cultura Galega

O Consello da Cultura Galega publica as propostas das comisións de valoración cos titulares e suplentes das dezaseis bolsas de colaboración nos diferentes proxectos que se están a desenvolver nesta institución.

Para acceder ao documento prema aquí.
28/02/2008. EMPREGO

Bolsas de estadías no Centro Ramón Piñeiro

A Secretaría Xeral de Política Lingüística publica, no DOG do 28 de febreiro de 2008, a convocatoria pública de 10 bolsas de estadías destinadas a investigadores de fóra de Galicia para colaborar en proxectos de investigación do Centro Ramón Piñeiro para a Investigación en Humanidades.

O período da estadía será de entre dous e sete meses e non pode superar a data tope do 31 de decembro de 2008. O prazo de presentación das solicitudes é de 40 días naturais, contados a partir do seguinte ao da publicación no DOG desta convocatoria.
26/02/2008. CURSOS E CONGRESOS

As universidades galegas impartirán un Máster en Política Lingüística e Planificación da Lingua Galega

O Consello Galego de Universidades aprobou onte, 25 de febreiro de 2008, a posta en funcionamento para o curso 2008/09 de 34 novos títulos enmarcados nos Programas Oficiais de Posgrao, entre os que destaca o Máster en Política Lingüística e Planificación da Lingua Galega. Os estudos de posgrao teñen como finalidade a especialización do estudante na súa formación académica, profesional ou investigadora e as universidades galegas impartirán o vindeiro curso un total de 105 títulos de posgrao adaptados ás liñas xerais emanadas do Espazo Europeo de Educación Superior.
26/02/2008. AXUDAS E PREMIOS

Contratación para a organización dunha exposición sobre a lingua galega

A Secretaría Xeral de Política Lingüística anuncia, no DOG do 22 de febreiro de 2008, a contratación dun servizo para o deseño, produción, execución, promoción e itinerancia dunha exposición sobre a lingua galega na diversidade lingüística.

O prazo para a presentación de ofertas remata o vindeiro 24 de marzo de 2008. Se desexa máis información, prema aquí.
21/02/2008. DINAMIZACIóN

O Concello de Ferrol constitúe o Consello Municipal da Lingua

Este organismo, formado por representantes políticos, veciñais, sindicais e de entidades culturais e académicas, constitúese como o órgano de participación cidadá para a consulta, seguimento, información e proposta na xestión municipal na área de normalización lingüística.

Entre as principais funcións desta entidade están as de presentar iniciativas, propostas e suxestións para a súa discusión nas comisións informativas correspondentes, colaborar na elaboración de programas e proxectos e facer un seguimento da actuación municipal no que se refire á normalización lingüística. A tarefa inmediata que teñen previsto acometer será a de poñer en marcha o Plan de Normalización Lingüística municipal.

Se desexa máis información, prema aquí.
20/02/2008. DINAMIZACIóN

A Terra de Melide organízase para traballar conxuntamente a prol do galego

Os responsables de normalización lingüística do IES de Melide, dos colexios núm. 1 e Mestre Pastor Barral de Melide, do Colexio de Arcediago de Visantoña e dos concellos de Melide, Santiso e Toques acaban de constituír o colectivo SNL Terra de Melide.

Está dirixido pola coordinadora territorial dos ENDL da provincia da Coruña e ten como principal obxectivo traballar de xeito conxunto e coordinado a prol da normalización lingüística nestes tres concellos, unindo os esforzos e recursos da Administración educativa e da Administración local.

A primeira iniciativa que teñen previsto desenvolver será unha diagnose das actitudes e usos lingüísticos na comarca, para posteriormente poder implementar medidas normalizadoras nos diferentes ámbitos sociais, como a hostalaría, a sanidade ou o comercio.
20/02/2008. DINAMIZACIóN

O Concello de Teo edita o calendario “Doce con lingua”

O calendario recolle doce lemas que inciden na defensa do idioma e do seu uso. Os lemas van acompañados de reflexións sobre o uso do galego realizadas polos alumnos dos centros de ensino do municipio e de fotografías antigas de persoas do concello de Teo recollidas grazas á participación veciñal.

A iniciativa elaborouse a partir do concurso escolar Un lema para o galego, organizado polo Departamento de Normalización Lingüística en colaboración cos centros de ensino do concello.
20/02/2008. CURSOS E CONGRESOS

Obradoiro para a integración lingüística en Ames

O Servizo de Normalización Lingüística do Concello de Ames organiza un obradoiro de lingua e cultura co obxectivo de facilitar a integración lingüística e cultural das persoas de fóra de Galicia que se instalan no municipio.

As sesións desenvolveranse entre o 12 de marzo e o 23 de abril de 2008 e o prazo de inscrición remata o vindeiro 7 de marzo. Se desexa máis información, prema aquí.
20/02/2008. CURSOS E CONGRESOS

Seminario de actualización e reciclaxe da lingua galega

O Servizo de Asesoramento Lingüístico do Colexio de Avogados de Santiago organiza o seminario Actualización e reciclaxe da lingua galega: principais cambios introducidos no texto das normas no ano 2003, dirixido a profesionais do Dereito.

As sesións desenvolveranse entre os días 10 e 13 de marzo de 2008 e a matrícula é gratuíta. Se desexa máis información sobre o programa ou os trámites de inscrición, prema aquí.
19/02/2008. CURSOS E CONGRESOS

Cursos de lingua galega para adultos e colectivos de Galicia

A Secretaría Xeral de Política Lingüística publica, no DOG do 19 de febreiro de 2008, a convocatoria de cursos de lingua galega, niveis Celga 1, Celga 2, Celga 3 e Celga 4, destinados a adultos e colectivos de Galicia.

O prazo para presentar as solicitudes é de un mes, contado a partir do día seguinte ao da publicación desta convocatoria.

19/02/2008. OUTRAS

Probas para obtención dos certificados de lingua galega (Celga)

A Secretaría Xeral de Política Lingüística convoca as probas do Celga 1, Celga 2, Celga 3 e Celga 4 para o ano 2008. Neste ano realizaranse dúas convocatorias, unha en maio/xuño e outra en novembro/decembro. Todas as persoas interesadas teñen de prazo para presentar as súas solicitudes ata o 25 de marzo (convocatoria maio/xuño) ou ata o 19 de setembro (convocatoria de novembro/decembro).
Se desexa máis información, prema aquí.
15/02/2008. DINAMIZACIóN

Na Universidade de Vigo tamén se celebrará o Día Internacional da Lingua Materna

Co gallo da conmemoración o vindeiro día 21 de febreiro do Día Internacional da Lingua Materna, A Oficina de Voluntariado e Integración do Campus de Ourense organiza, en colaboración coa Oficina de Relacións Internacionais (ORI), dous actos de intercambio cultural e lingüístico entre os estudantes galegos e estranxeiros da Universidade de Vigo.
As actividades que se desenvolverán o día 28 de febreiro na Facultade de Humanidades (campus de Ourense) serán as seguintes:


1. Redacción de mensaxes en cada unha das linguas maternas dos estudantes da Universidade de Vigo, coa súa posterior difusión.

2. Encontro dos estudantes estranxeiros (regulares e bolseiros) e estudantes voluntarios nun xantar con sabor internacional, onde terán oportunidade para intercambiar os seus respectivos coñecementos lingüísticos e culturais.


Pode obter máis información no seguinte teléfono: 988 387 171

14/02/2008. AXUDAS E PREMIOS

Neville Alexander, Premio Linguapax 2008

O vindeiro 21 de febreiro, Día Internacional da Lingua Materna, o Instituto Linguapax dará a coñecer publicamente o fallo do xurado do Premio Linguapax 2008, que este ano decidiu outorgarlle o seu galardón ao Dr. Neville Alexander, lingüista surafricano experto en temas de planificación lingüística e promoción de linguas minorizadas.

Os Premios Linguapax outórganse anualmente a lingüistas, investigadores, docentes ou membros da sociedade civil que teñan destacado na promoción da diversidade lingüística e/ou a educación multilingüe.
14/02/2008. DINAMIZACIóN

Namórate da lingua, namórate en galego

A Concellaría de Política Lingüística do Concello de Santiago presenta a campaña Namórate da lingua, namórate en galego, para promover o uso da lingua galega no ámbito das relacións afectivas e persoais.

Os materiais da campaña serán distribuídos o 14 de febreiro entre todo o alumnado dos institutos composteláns e mais nos comercios de agasallos de Área Central.
14/02/2008. CURSOS E CONGRESOS

A Universidade da Coruña analiza o futuro do galego nunha Europa multilingüe

O Servizo de Normalización Lingüística da Universidade da Coruña organiza unha xornada de análise sobre o futuro do galego nunha Europa multilingüe, que se desenvolverá o vindeiro 21 de febreiro, Día Internacional da Lingua Materna, no Paraninfo da UDC (rúa da Mestranza, 9).

O acto, que comezará ás 19:00 h, consistirá nunha mesa redonda na que participarán Andrés Barreiro Pardo (intérprete da Comisión Europea), Jairo Dorado Cadilla (profesor en Serbia, intérprete e tradutor) e Celia Armas García (delegada galega na Axencia Europea para as Linguas Menos Estendidas). Ao remate, proxectarase o documental Linguas cruzadas.
14/02/2008. AXUDAS E PREMIOS

Ferve a rede no “mes dos namorados”

Vieiros, coa colaboración da Secretaría Xeral de Política Lingüística, convoca o concurso de microrrelatos eróticos en lingua galega Ferve a Rede.
O prazo para enviar os textos, que deben ter unha extensión máxima de 550 caracteres, remata o 10 de marzo. O gañador/a, que se dará a coñecer o 17 de marzo, terá como premio unha viaxe de catro días a Venecia para dúas persoas.
11/02/2008. CURSOS E CONGRESOS

A debate a Lei de normalización lingüística no seu XXV aniversario

Coincidindo co XXV aniversario da aprobación da Lei de normalización lingüística, o club de opinión Foro Cívico da Coruña organiza os vindeiros días 14 e 15 de febreiro dúas mesas redondas para facer un balance do seu contido e aplicación.

A primeira delas (14 de febreiro) xirará arredor do contido da citada lei e dos decretos, normas e plans de normalización posteriores que a desenvolven. Nela participarán Xosé Ramón Freixeiro, Alba Nogueira e Mercedes Queixas. Na segunda sesión (15 de febreiro) tomarán a palabra Xaquín Monteagudo, Xabier Seoane, Xesús Pablo González Moreiras e Ermitas Valencia para debater sobre o estado actual do proceso de normalización lingüística e sobre a aplicación da lexislación vixente.
Se desexa coñecer o programa completo destes actos, prema aquí.

11/02/2008. CURSOS E CONGRESOS

Obradoiros de novas tecnoloxías e lingua no Concello da Coruña

A Concellaría de Mocidade, Solidariedade e Normalización Lingüística do Concello da Coruña organiza cinco obradoiros sobre novas tecnoloxías e lingua, que se desenvolverán en diferentes asociacións da cidade. Nestes obradoiros incidirase na identificación do software libre en lingua galega co acceso ao coñecemento, coa utilidade e coas melloras do desenvolvemento social, ao tempo que se presentarán os recursos compilados no web recursosparaogalego.com.
Se desexa máis información sobre as datas e os horarios desta actividade, prema aquí.
11/02/2008. CURSOS E CONGRESOS

Cursos de lingua galega para preparar os CELGA

A Consellería de Educación e Ordenación Universitaria, en colaboración coa Secretaría Xeral de Política Lingüística, convoca cursos de lingua galega preparatorios para a obtención dos Celga (niveis 1 e 4).

Os cursos desenvolveranse nas diferentes escolas oficiais de idiomas de Galicia e impartiranse en dúas quendas, unha que comezará en febreiro e outra en outubro de 2008. O prazo de presentación de solicitudes varía segundo a quenda elixida. Se desexa máis información, prema aquí.
08/02/2008. OUTRAS

Preséntase hoxe a Declaración de París pola pluralidade lingüística

Os responsables de política lingüística do Goberno Vasco, da Generalitat de Catalunya e da Xunta de Galicia presentarán hoxe na Expolingua de París a Declaración de París pola pluralidade lingüística. Esta iniciativa enmárcase no Protocolo de colaboración entre o Goberno Vasco, a Generalitat de Catalunya e a Xunta de Galicia en materia de política lingüística, que os tres gobernos asinaron en marzo de 2007 para a defensa e o impulso das respectivas linguas no marco estatal e no ámbito da Unión Europea.

Ademais desta intervención, entre os actos que a Secretaría Xeral de Política Lingüística da Xunta de Galicia tamén está a organizar estes días en París cabe subliñar as aulas de galego e o sorteo dunha estadía en Galicia para aprender o idioma.
07/02/2008. CURSOS E CONGRESOS

Cursos de linguaxe administrativa galega

A Consellería de Educación e Ordenación Universitaria e a Secretaría Xeral de Política Lingüística convocan cursos de linguaxe administrativa galega, de nivel medio e superior, dirixidos preferentemente ao persoal que realiza funcións administrativas nas diferentes administracións públicas de Galicia.

Os cursos desenvolveranse nas diferentes escolas oficiais de idiomas de Galicia e impartiranse en dúas quendas, unha que comezará en febreiro/marzo de 2008 e outra en outubro de 2008. O prazo de presentación de solicitudes varía segundo a quenda elixida. Se desexa máis información, prema aquí.