Novas da lingua

Rexistros4591 a 4620 de 5153
  1. Inicio
  2. CDSG-CCG
  3. Novas da lingua
08/05/2008. DINAMIZACIóN

Mes da lingua en Pontevedra

O Concello de Pontevedra e a Rede de Entidades Amigas da Lingua (REAL) tamén se suman aos actos conmemorativos do Día das Letras Galegas que ao longo deste mes terán lugar por todo o país.

O Mes da lingua en Pontevedra inclúe, entre outras actividades, conferencias, obradoiros, encontros literarios e presentación de libros, que se alternarán con actos máis lúdico-festivos como a xornada dos xogos tradicionais, a carreira escolar pola lingua ou a festa dos maios.

07/05/2008. DINAMIZACIóN

Para divertirse coa lingua na Coruña

Baixo o lema Divírtete coa túa lingua, o Servizo de Normalización Lingüística do Concello da Coruña presenta un amplo abano de actividades para conmemorar o Día das Letras Galegas.

Ao longo do mes de maio organizaranse, entre outros actos, presentacións de documentais con contidos sociolingüísticos, ciclos de conferencias sobre o autor homenaxeado no Día das Letras, espectáculos poético-musicais, unha festa da lingua e mesmo un xantar popular.

Se desexa coñecer a programación completa de actividades, prema aquí.

08/05/2008. CURSOS E CONGRESOS

Noia celebra o Ano Internacional das Linguas

Co gallo da conmemoración do ano 2008 como Ano Internacional das Linguas, o Concello de Noia e o equipo editorial da revista Casa da Gramática, editada polo IES Virxe do Mar, organizan unhas xornadas divulgativas que se desenvolverán entre os días 19 e 23 de maio de 2008 na Casa da Cultura Antón Avilés de Taramancos (Noia).

Durante as sesións analizarase a situación sociolingüística do idioma galego, así como o seu patrimonio léxico, ao tempo que se reflexionará sobre o status doutras linguas europeas coma o bretón (lingua minorizada) ou o inglés (lingua franca global).

Se desexa coñecer o programa completo das xornadas, prema aquí.
07/05/2008. DINAMIZACIóN

O Colexio de Avogados de Santiago reitera o seu compromiso co galego

Por iniciativa da Agrupación de Xoves Avogados de Compostela, a Xunta de Goberno do Colexio de Avogados de Santiago de Compostela acordou facer público un comunicado no que reitera o seu compromiso coa normalización lingüística no ámbito da xustiza e co enriquecemento e prestixio do galego xurídico, amais de solidarizarse con todos os operadores xurídicos que vexan menoscabados os seus dereitos lingüísticos, citando expresamente o caso da maxistrada Ana López-Suevos.

Este acordo enmárcase fundamentalmente nas premisas da campaña Avogamos polo galego, organizada polo Servizo de Normalización Lingüística do colexio a finais do ano 2007.
06/05/2008. DINAMIZACIóN

Maio das Letras no Concello de Santiago

Co gallo da celebración o vindeiro 17 de maio do Día das Letras Galegas, a Concellaría de Normalización Lingüística do Concello de Santiago presenta o programa de actividades de dinamización lingüística que se desenvolverá ao longo deste mes de maio co ánimo de fomentar o uso do galego entre a poboación compostelá.

O programa inclúe, entre outras actividades, representacións teatrais e de monicreques, unha xincana lingüística, unha festa das letras e a estrea dun documental sobre a historieta galega.
06/05/2008. CURSOS E CONGRESOS

Obradoiro de dobraxe e lingua

O Consorcio Audiovisual de Galicia, a Secretaría Xeral de Política Lingüística e APRADOGA convocan este obradoiro que constará de dous módulos, un dirixido a directores/as, tradutores e lingüistas con experiencia contrastada na dobraxe e outro para actores e actrices de dobraxe que teñan esta como a súa profesión principal.

As sesións terán lugar entre os días 16 e 31 de maio de 2008 na Sala Audiovisual do Centro Multimedia de Galicia. O prazo de matrícula remata o 10 de maio. Se desexa máis información, prema aquí.

05/06/2008. INVESTIGACIóN

Conferencias sobre o idioma na Universidade de Vigo

O Departamento de Filoloxía Galega e Latina da Universidade de Vigo anuncia dúas conferencias de temática sociolingüística que terán lugar os vindeiros días 6 e 7 de maio na Facultade de Filoloxía e Tradución.

O martes 6 de maio (12,30 h; aula A7 da FFT) terá lugar a Conferencia sobre a situación sociolingüística (comparada) irlandesa e galega, a cargo da profesora Bernie O´Rouke, e ao día seguinte, mércores 7 de maio (11 h; sala de graos da FFT) a profesora Ana Acuña falará sobre a figura de Xosé María Álvarez Blázquez, autor homenaxeado este ano no Día das Letras Galegas.

06/05/2008. CURSOS E CONGRESOS

Cursos de lingua galega para galegos/as residentes no exterior

A Secretaría Xeral de Emigración e a Secretaría Xeral de Política Lingüística convocan cursos preparatorios de lingua galega para os niveis Celga e mais cursos de extensión cultural, destinados a galegos/as residentes no exterior e persoas interesadas no idioma e a cultura de Galicia.

As entidades galegas teñen un mes de prazo para presentar as súas solicitudes, contado a partir do día seguinte ao da publicación desta convocatoria.





06/05/2008. DINAMIZACIóN

Musigal: a música tamén na túa lingua

O ENDL do CPI Aurelio M. Rey García, en colaboración co Concello de Cuntis, está a desenvolver o proxecto Musigal, para dar a coñecer ao alumnado a música feita en galego na actualidade e rachar os prexuízos que exclúen o galego dos estilos máis modernos e vangardistas.

O proxecto inclúe un concurso para seleccionar o mellores temas e posteriormente editalos nun CD.

06/05/2008. AXUDAS E PREMIOS

Concurso de vídeo “Mobilízate pola lingua”

No marco da campaña “Polo dereito a vivirmos en galego”, A Mesa pola Normalización Lingüística da Zona de Lugo (MNL) convoca o concurso de vídeo “Mobilízate pola lingua. Polo dereito a vivirmos en galego”, que ten como obxectivo fomentar entre a mocidade a reflexión sobre a situación social do idioma.

Os vídeos deben recoller situacións, reais ou dramatizadas, que expresen as dificultades que a cidadanía galega se pode atopar para empregar con normalidade o idioma galego nos diferentes ámbitos sociais.

O prazo de admisión dos traballos remata o vindeiro 14 de maio.
06/05/2008. DINAMIZACIóN

En liña o nº 42 do Cartafol Dixital

Xa pode consultar o novo número do Cartafol Dixital, boletín mensual editado polo Servizo de Normalización Lingüística da Universidade de Santiago de Compostela.

Entre os contidos deste número salientamos a información sobre as convocatorias de formación lingüística para o PAS (Actualización de lingua galega. Nivel 3 e Comunicación de calidade a través do correo electrónico), a nova sobre a presentación actual dos servizos web do SNL ou a análise da campaña Europa é plurilingüe. Quen sabe galego sabe máis.
30/04/2008. DINAMIZACIóN

O IES de Pontecaldelas comprométese coa lingua

O Equipo de Normalización e Dinamización Lingüística do IES de Pontecaldelas está a organizar unha campaña que, baixo o lema Compromiso coa lingua de Galiza, quere fomentar a consciencia lingüística da comunidade educativa e promover o compromiso do alumnado co uso do galego.

Durante a Semana das Letras (do 11 ao 16 de maio) os alumnos/as integrantes do ENDL recollerán sinaturas entre os seus compañeiros/as e repartiranlles a todos os asinantes un carné acreditativo do seu compromiso.
25/04/2008. DINAMIZACIóN

Mes das Letras no Concello de Teo

Co gallo da conmemoración do Día das Letras Galegas, o Concello de Teo prepara un amplo abano de actividades lúdico-educativas que se desenvolverán ao longo do mes de maio.

O programa de actos inclúe varios concursos (un de debuxo, un de recollida e creación de contos e outro de fotografía comentada), xornadas en internet, actuacións musicais e recitais poéticos.
24/04/2008. INVESTIGACIóN

Novo dicionario de galego en liña

Co gallo da conmemoración do Día do Libro, a editorial Ir Indo facilita a consulta en liña do seu Dicionario de galego, con máis de 65 000 entradas adaptadas á normativa ortográfica oficial vixente na actualidade. Xunto coa información de cada entrada, achéganse as equivalencias en portugués, español e inglés.

Ademais, grazas á tecnoloxía Wap, toda a información do dicionario pode consultarse tamén a través do móbil.


24/04/2008. LEXISLACIóN

Europa é plurilingüe e quen sabe galego sabe máis

A Universidade de Vigo, xunto cos concellos de Vigo, Ourense e Pontevedra, organiza a campaña Europa é plurilingüe. Quen sabe galego sabe máis, para informar sobre o novo decreto de ensino da lingua galega
(decreto 124/2007) e sobre a educación plurilingüe en Europa.

As institucións promotoras da iniciativa autorízanlle a descarga dos materiais da campaña (caderno, tríptico e cartel) e a súa distribución a calquera institución municipal, provincial ou educativa que queira facer uso deles, mesmo inserindo no espazo correspondente o logo da institución interesada neles.
24/04/2008. DINAMIZACIóN

O Concello de Burela planifica a xestión lingüística municipal

O Concello de Burela elaborou, co acordo dos tres grupos políticos con representación municipal, un proxecto de planificación lingüística que, baseándose nun modelo lingüístico aditivo, ten como obxectivo deseñar as principais liñas de actuación para normalizar os usos lingüísticos entre a poboación burelá. Deste xeito Burela convértese no terceiro municipio galego que conta cun plan destas características, despois de Santiago e Ferrol.

A iniciativa ten o seu xermolo nun proxecto de innovación lingüística elaborado polo IES Perdouro, que os tres grupos políticos valoraron moi positivamente e tomaron de punto de partida para redactar o proxecto que mañá aprobará por unanimidade o Pleno do Concello.

A versión definitiva do documento será editada e distribuída en breve entre todos os sectores sociais implicados no proceso. Se desexa coñecer un extracto, prema aquí.

23/04/2008. EMPREGO

Praza de técnico/a de normalización lingüística no Concello de Cabana de Bergantiños

O Concello de Cabana de Bergantiños anuncia a convocatoria para a contratación temporal, con xornada a tempo parcial, dun técnico/a de normalización lingüística que terá como principal obxectivo planificar, xestionar e executar accións destinadas a fomentar o uso e o prestixio da lingua galega en todos os sectores do ámbito municipal.

O sistema de selección será o de concurso e o prazo de presentación de solicitudes remata o 27 de abril. Se desexa consultar o texto completo da convocatoria, prema aquí.

23/04/2008. CURSOS E CONGRESOS

O Concello de Ribadeo avalía o uso do galego na xustiza

O IES Porta da Auga, o Concello de Ribadeo e o Consello da Avogacía Galega organizan unha xornada para avaliar o uso do galego na xustiza, que ten como principal obxectivo difundir entre os profesionais da avogacía e o notariado os recursos lingüísticos elaborados polo Servizo de Asesoramento Lingüístico do Consello da Avogacía Galega.

O acto, que terá lugar o 24 de abril ás 20:30 h no Salón de Plenos do Concello, enmárcase no proxecto de innovación lingüística que están a desenvolver arredor de 60 profesores/as e alumnos/as do IES Porta da Auga para impulsar o uso do galego no sector dos servizos xurídicos.

23/04/2008. AXUDAS E PREMIOS

Celébrase na Coruña o IX Certame musical “A mocidade coa nosa lingua”

O xoves, 24 de abril, ás 9:30 h, dará comezo no Teatro Rosalía de Castro da Coruña o IX Certame musical “A mocidade coa nosa lingua”.
O acto, no que participarán diferentes centros de ensino medio, ten como principal obxectivo reivindicar e fomentar espazos de uso para o galego entre a mocidade.
O/a artista gañador/a actuará no Correlingua e recibirá tamén un premio en metálico que poderá cambiar por material musical. Se desexa ampliar esta información, prema aquí.
23/04/2008. AXUDAS E PREMIOS

Axuda para a edición dunha revista científica na UDC

A Servizo de Normalización Lingüística da Universidade da Coruña convoca unha axuda de 4 000 euros para a publicación durante o ano 2008 dunha revista científica de calidade (en papel ou en formato electrónico), co ánimo de fomentar o uso do galego na investigación universitaria.

O prazo de presentación de solicitudes remata o 30 de maio de 2008. Se desexa máis información, prema aquí.
23/04/2008. EMPREGO

Bolsas de colaboración no Centro Ramón Piñeiro

A Secretaría Xeral de Política Lingüística publica, no DOG do 23 de abril de 2008, a convocatoria de sete bolsas de colaboración en diferentes proxectos de investigación que se están a desenvolver no Centro Ramón Piñeiro para a Investigación en Humanidades.

Trátase en concreto dos seguintes proxectos: dicionarios de literatura (2 bolsas), informes de literatura (2 bolsas), terminoloxía científico-técnica (2 bolsas) e síntese de voz en galego (1 bolsa).

O prazo de presentación de solicitudes é de 31 días naturais, contados a partir do día seguinte ao da publicación desta convocatoria.
21/04/2008. DINAMIZACIóN

Comeza o Correlingua 2008

Baixo o lema 365 días. En galego cabe todo bota a andar unha nova edición do Correlingua, proposta lúdico-educativa que pretende convidar os centros de ensino e a mocidade galega en xeral a reivindicar publicamente a normalización do idioma galego.

O Correlingua comezará o vindeiro 6 de maio na Coruña e percorrerá durante dúas semanas diferentes comarcas do país, ata rematar en Ourense o día 16.

18/04/2008. AXUDAS E PREMIOS

Concurso de recollida de tradición oral

O Gabinete de Normalización Lingüística do Concello de Vimianzo e os ENDL dos colexios San Vicenzo de Vimianzo, Baíñas, Labarta Pose de Baio e Ponte do Porto, e dos institutos Terra de Soneira e Maximino Romero Lema, convocan un concurso de recollida de tradición oral para conmemorar o Día das Letras Galegas 2008.

No certame, que conta con seis categorías e dous premios por categoría, poderán participar alumnos/as de primaria, secundaria e bacharelato destes centros. O prazo de presentación dos traballos remata o 9 de maio. Se desexa consultar as bases deste concurso, prema aquí.
16/04/2008. EMPREGO

Prazas para profesores de lingua e literatura galegas no ensino secundario

A Consellería de Educación e Ordenación Universitaria publica, no DOG do 16 de abril de 2008, a convocatoria do proceso selectivo para ocupar 64 prazas de profesores de lingua e literatura galegas no ensino secundario.

O proceso de selección será o de concurso-oposición e o prazo de presentación de solicitudes é de 20 días naturais, contados a partir do seguinte ao da publicación desta convocatoria. [Ver corrección de erros]
16/04/2008. INVESTIGACIóN

O Consello da Cultura Galega publica o Anuario de Estatísticas Culturais 2006

O Observatorio da Cultura Galega do CCG, en colaboración coa Consellería de Cultura e Deportes e co Instituto Galego de Estatística, elaborou o Anuario de Estatísticas Culturais 2006, que compila os datos estatísticos existentes sobre o sector cultural galego no ano 2006 e achega información sobre a evolución das principais variables nos últimos anos.

Entre os contidos do Anuario salientamos os referidos á lingua, á edición en galego, ao perfil sociolingüístico das audiencias de radio e ao gasto en política lingüística.
16/04/2008. CURSOS E CONGRESOS

Xornadas de formación de avaliadores dos Celga

A Secretaría Xeral de Política Lingüística e Cursos Internacionais da USC convocan unhas novas Xornadas de formación de avaliadores do Celga, que terán lugar os días 25, 28 e 29 de abril en Santiago de Compostela.

Para poder participar nestas xornadas é necesario estar inscrito nas listas de profesorado colaborador para impartir os cursos de galego promovidos pola SXPL e ter realizado o Curso de Formación de Profesores de Galego que organizan conxuntamente a SXPL e Cursos Internacionais da USC.
15/04/2008. LEXISLACIóN

O Observatorio de Dereitos Lingüísticos avalía a situación do galego no ámbito da xustiza

O Observatorio de Dereitos Lingüísticos elaborou, a instancias da Mesa pola Normalización Lingüística, o Relatorio sobre a aplicación para a lingua galega da Carta Europea das Linguas Rexionais ou Minoritarias no Ámbito da Xustiza.

Neste documento, que será remitido ao Consello de Europa, sinálase entre outras cuestións que a normativa aprobada polo Estado español é insuficiente para garantir o cumprimento da Carta no ámbito da Administración de Xustiza, ademais de non existir medidas de seguimento e control do seu cumprimento, o que provoca en última instancia que se vulnere sistematicamente o dereito dos cidadáns a un procedemento xudicial en galego.

No relatorio inclúense tamén algunhas recomendacións para dar cumprimento ao Artigo 9 da Carta.
11/04/2008. EMPREGO

Bolsas de colaboración na ANL da Universidade de Vigo

A Universidade de Vigo convoca dúas bolsas para colaborar na súa Área de Normalización Lingüística durante o ano 2008. Poderán presentarse a esta convocatoria os/as estudades de Filoloxía Galega da Universidade de Vigo.

O prazo de presentación de solicitudes remata o vindeiro 21 de abril. Se desexa máis información, prema aquí.
10/04/2008. EMPREGO

Bolsas de colaboración no SNL da Universidade da Coruña

A Universidade da Coruña convoca dúas bolsas de colaboración para desenvolver tarefas de apoio no seu Servizo de Normalización Lingüística. Poden optar a estas bolsas todas as persoas que estean cursando estudos oficiais de 2º ou de 3º ciclo na Universidade da Coruña na titulación de Filoloxía Galega e teñan aprobadas todas as materias de lingua galega de 1º e de 2º ciclo.

O prazo de presentación de solicitudes é de 10 días hábiles, contados a partir do seguinte ao da publicación da convocatoria.
10/04/2008. CURSOS E CONGRESOS

Curso de Verán de Lingua e Cultura Galegas para Estranxeiros da UDC

O Centro de Linguas da Universidade da Coruña, en colaboración co Servizo de Normalización Lingüística da UDC e a Secretaría Xeral de Política Lingüística da Xunta de Galicia, organizan o II Curso de Verán de Lingua e Cultura Galegas para Estranxeiros, que se desenvolverá entre os días 1 e 24 de xullo de 2008 na Facultade de Filoloxía da UDC.

O prezo da matrícula é de 60 € e a organización concederá varias bolsas de estadía de 450 € brutos. O prazo de inscrición remata o 15 de maio de 2008. [información en inglés]