Novas da lingua

Rexistros4711 a 4740 de 5153
  1. Inicio
  2. CDSG-CCG
  3. Novas da lingua
19/11/2007. AXUDAS E PREMIOS

Premios á publicidade en lingua galega

O Consello Asesor de RTVE-G e CRTVG deu a coñecer os galardoados da XIV edición dos Premios de Publicidade en Galego, que teñen como obxectivo recoñecer o traballo realizado a prol da normalización lingüística por parte de empresas e entidades que se publicitan nos medios de comunicación.

Nesta ocasión, o gañador na categoría de radio foi o anuncio “Agasalla Cultura 2006”, elaborado por Ovo Publicidade. Na categoría de televisión o galardoado foi o anuncio “Augas de Cabreiroá”, presentado por Continental Producciones e elaborado pola Axencia Imaxe Intermedia. Na modalidade de internet recibiu unha mención especial o web da Axencia Audiovisual Galega, creado pola empresa Interacción.

O premio especial do concurso “Campaña de autopromoción dos Premios de Publicidade en Galego e da páxina web do Consello” recibiuno o grupo A-VESPAS.
16/11/2007. EMPREGO

Prazas de técnico/a de normalización lingüística nos concellos de Betanzos e Vilasantar

Os concellos de Betanzos e de Vilasantar convocan cadansúa praza de técnico/a de normalización lingüística, que terá como principal obxectivo planificar, xestionar e executar accións destinadas a fomentar o uso e prestixio da lingua galega en todos os sectores do ámbito municipal. O sistema de selección será en ambos os casos o de concurso-oposición.

Para obter máis información sobre as probas de acceso ou os prazos de presentación de solicitudes consulte os textos completos das respectivas convocatorias: convocatoria do Concello de Betanzos / convocatoria do Concello de Vilasantar.
14/11/2007. AXUDAS E PREMIOS

Premio Linguapax 2008

O Institut Linguapax convoca unha nova edición deste galardón, que quere contribuír ao recoñecemento de lingüistas, investigadores, docentes ou membros da sociedade civil que teñan destacado na promoción da diversidade lingüística e/ou a educación multilingüe.

As candidaturas deben enviarse á secretaría do Instituto Linguapax (info@linguapax.org) antes do 15 de decembro de 2007. O gañador do premio darase a coñecer o vindeiro 21 de febreiro, Día Internacional da Lingua Materna.

Se desexa máis información, prema aquí.
14/11/2007. AXUDAS E PREMIOS

Resólvese o Premio Xeira de narracións curtas

Marisa López Diz, co seu relato A fiya do xastre, foi a gañadora dos XVII Premio “Xeira” de narracióis curtias.

Este certame, que convoca a Asociación Xeira desde 1991, ten como obxectivo fomentar o uso literario do galego de Asturias, colaborando así na súa dignificación e normalización social.
13/11/2007. EMPREGO

Convocatoria de prazas para mestres interinos de galego

A Dirección Provincial de Educación da Xunta de Castela e León convoca o proceso para a elaboración de listaxes de aspirantes a ocupar, en réxime de interinidade, postos vacantes e substitucións no corpo de mestres de galego.

O prazo de presentación de solicitudes remata o 17 de novembro de 2007. Se desexa consultar o texto completo da convocatoria, prema aquí.
13/11/2007. CURSOS E CONGRESOS

VIII Xornadas de Expresión Oral “Tíralle da lingua”

A Asociación Socio-Pedagóxica Galega organiza a oitava edición destas xornadas, dirixidas ao alumnado e ao profesorado de Galicia, que teñen como obxectivo fomentar o uso do galego no ámbito educativo así como proporcionar técnicas para traballar a oralidade na aula.

As sesións desenvolveranse os días 16 e 17 de novembro e a matrícula é gratuíta, aínda que cómpre realizar a reserva de praza.

Coa mesma finalidade de fomentar o uso oral do galego entre a comunidade educativa, esta asociación convoca tamén o VIII Concurso de Relato Oral Tíralle da Lingua, que se celebrará en abril de 2008 en Santiago de Compostela.
13/11/2007. DINAMIZACIóN

Consulte en liña o novo número do Cartafol Dixital

Xa pode consultar en liña o número 37 do Cartafol Dixital, voceiro da Universidade de Santiago de Compostela en materia de normalización lingüística.

Entre os contidos deste número salientamos a nova sobre os traballos gañadores dos III Premios á calidade lingüística nos traballos académicos, a presentación da programación de cursos de galego para o último trimestre do ano ou a información sobre a Guia de Conversa Universitària. Aranés Castellano Euskara Galego Català, editada pola Universitat de Barcelona.
12/11/2007. EMPREGO

Praza de técnico/a de normalización lingüística no Concello de Arzúa

O Concello de Arzúa anuncia a convocatoria para a contratación temporal dun técnico/a de normalización lingüística que terá como principal obxectivo planificar, xestionar e executar accións destinadas a fomentar o uso e prestixio da lingua galega en todos os sectores do ámbito municipal.

O sistema de selección será o de concurso-oposición e o prazo de presentación de solicitudes remata o martes 22 de novembro. Se desexa consultar o texto completo da convocatoria, prema aquí.
12/11/2007. DINAMIZACIóN

A avogacía compostelá avoga polo galego

O Servizo de Asesoramento Lingüístico do Colexio de Avogados de Santiago de Compostela organiza a campaña “Avogamos polo galego”, co ánimo de contribuír á normalización do idioma no ámbito da avogacía.

Entre as accións que se desenvolverán no marco desta iniciativa destaca a difusión dun tríptico informativo que contén unha declaración positiva cara ao galego e unha compilación de dereitos lingüísticos no ámbito da xustiza.

07/11/2007. DINAMIZACIóN

Encontro dos axóuxeres para bebés e familia

Co ánimo de dar continuidade á actividade lúdica Festa dos Axóuxeres, organizada o pasado mes de setembro na Coruña, Santiago e Vigo, a Secretaría Xeral de Política Lingüística organiza agora en dez vilas de Galicia o Encontros dos axóuxeres para bebés e familias, que ten como principal obxectivo promover a transmisión familiar da lingua galega.

Os encontros celebraranse durante as fins de semana do mes de novembro e serán as artistas Gaudi Galego, Mercedes Peón e Uxía as encargadas de establecer un diálogo de música e voz cos máis pequenos.
05/11/2007. OUTRAS

Probas para a obtención dos certificados de Celga 1 e Celga 4

A Secretaría Xeral de Política Lingüística convoca as primeiras probas para a obtención dos certificados de coñecemento de lingua galega Celga 1 e Celga 4.

Todas as persoas interesadas teñen de prazo para inscribirse nestas probas ata o 16 de novembro (para Celga 1) e ata o 28 de novembro (para Celga 4).

Se desexa consultar o texto completo da convocatoria, prema aquí.
31/10/2007. CURSOS E CONGRESOS

Xornadas de formación de avaliadores do Celga

A Secretaría Xeral de Política Lingüística e Cursos Internacionais da USC organizan as Xornadas de formación de avaliadores do Celga, que terán lugar os días 19 e 20 de novembro en Santiago de Compostela.

Para poder participar cómpre estar inscrito nas listas de profesorado colaborador para impartir os cursos de galego promovidos pola SXPL e ter realizado o Curso de formación de profesorado de galego que organizan conxuntamente a SXPL e Cursos Internacionais da USC.

O número máximo de prazas é de 30, que se cubrirán por orde de inscrición.
31/10/2007. CURSOS E CONGRESOS

I Xornadas sobre a normalización da lingua e a cultura no ámbito da educación

A Comisión de Normalización Lingüística da Facultade de Ciencias da Educación da UdC organiza estas xornadas que teñen como principal obxectivo promover a reflexión e o debate sobre as posibilidades e as limitacións que ten na actualidade o proceso de normalización lingüística no ámbito educativo.

As sesións terán lugar os días 14 e 15 de novembro na Facultade de Ciencias da Educación da UdC. O prazo de inscrición remata o vindeiro 9 de novembro. Se desexa máis información, prema aquí.
02/11/2007. CURSOS E CONGRESOS

Curso de comunicación e mercadotecnia para accións de normalización lingüística

A Coordinadora de Traballadores/as de Normalización da Lingua organiza un novo curso de formación que ten como principal obxectivo facilitar procedementos, ferramentas e estratexias comunicativas que faciliten a promoción e difusión de actividades de normalización lingüística.

O curso desenvolverase na Facultade de Filoloxía da USC os días 23 e 30 de novembro e 14 de decembro de 2007. O prazo de preinscrición remata o 15 de novembro. Se desexa máis información, prema aquí.

31/10/2007. INVESTIGACIóN

Enquisa en liña sobre a política lingüística da Unión Europea

A Unidade de Multilingüismo da Comisión Europea convida a todas as persoas e
entidades especializadas nas diferentes linguas de Europa a participar coa súa opinión e propostas no deseño da política lingüística europea.

Con este propósito, a Comisión pon ao dispor de todos/as os/as interesados/as un cuestionario en liña que estará accesible ata o vindeiro 15 de novembro. Os resultados da enquisa daranse a coñecer no primeiro semestre de 2008.

31/10/2007. LEXISLACIóN

A través de Europa, tamén en galego

A través de Europa é o nome da sección do web da Comisión Europea onde os diferentes estados membros publican as súas noticias relacionadas con Europa. A partir de agora aquelas novas relacionadas con Galicia e Europa poderán ser redactadas de xeito bilingüe, en galego e castelán.

O galego estréase nesta sección coa nova sobre o proxecto europeo de cooperación en Tanzania.

Esta iniciativa enmárcase no acordo do Consello de ministros de Asuntos Xerais e Relacións Exteriores da UE, do 13 de xuño de 2005, que aprobaba o uso das linguas cooficiais españolas (galego, catalán e éuscaro) nas institucións europeas, malia non posuír estas o rango de oficialidade.
31/10/2007. EMPREGO

Praza de técnico/a de normalización lingüística no Concello de Boimorto

O Concello de Boimorto anuncia a convocatoria para a contratación dun técnico/a de normalización lingüística que terá como principal obxectivo planificar, xestionar e executar accións destinadas a fomentar o uso e prestixio da lingua galega en todos os sectores do ámbito municipal.

O sistema de selección será o de concurso-oposición e o prazo de presentación de solicitudes é de 20 días naturais, contados a partir do seguinte ao da publicación desta convocatoria.
31/10/2007. AXUDAS E PREMIOS

XVI Certame literario lingüístico Ricardo Carvalho Calero

O Concello de Ferrol convoca unha nova edición deste certame literario lingüístico que consta dun premio de creación literaria (narración curta) e outro de investigación literaria ou lingüística. No premio de investigación lingüística os traballos presentados deberán ter unha extensión mínima de 50 folios e estar escritos en lingua galega, con liberdade normativa.

O prazo de presentación de orixinais, que deberán entregarse xunto con cinco copias, remata o 30 de novembro. Se desexa consultar o texto completo da convocatoria, prema aquí.
30/10/2007. OUTRAS

Habilitación profesional para tradutores e intérpretes xurados

A Consellería de Presidencia, Administracións Públicas e Xustiza publica, no DOG do 30 de outubro de 2007, a convocatoria pública de probas de habilitación profesional para a tradución e a interpretación xurada do galego para outras linguas, e viceversa.

O prazo de presentación de solicitudes remata o vindeiro 9 de novembro. Se desexa consultar o texto completo da convocatoria, prema aquí.
29/10/2007. CURSOS E CONGRESOS

I Encontro de política lingüística desde as administracións locais da Coruña

A Unidade Técnica de Normalización Lingüística da Deputación da Coruña organiza, coa colaboración da Coordinadora de Traballadores/as de Normalización da Lingua, este I Encontro de política lingüística que quere poñer en contacto os diferentes responsables políticos e técnicos das administracións locais para compartir experiencias e propostas en materia de normalización lingüística.

As sesións terán lugar o mércores 28 de novembro de 2007 no Pazo de Mariñán (Lugar de Mariñán, s/n, Bergondo).
26/10/2007. AXUDAS E PREMIOS

Resólvese o Premio Xoán Manuel Pintos

O Concello de Pontevedra e a Rede de Entidades Amigas da Lingua (REAL) outorgáronlle o Premio Xoán Manuel Pintos 2007 ao ilustrador Kiko da Silva e á Asociación Puntogal.

O obxectivo deste premio é recoñecer o labor daquelas persoas ou entidades que axudan a impulsar a presenza da lingua na sociedade e ao mesmo tempo manter viva a figura do xurista e escritor Xoán Manuel Pintos.

A entrega dos galardóns terá lugar o 16 de novembro no Pazo de Cultura de Pontevedra.
23/10/2007. CURSOS E CONGRESOS

Xustiza e lingua, reflexións para a normalización

O Servizo de Asesoramento Lingüístico do Colexio de Avogados de Santiago de Compostela organiza, en colaboración coa Secretaría Xeral de Política Lingüística, a xornada Xustiza e lingua, reflexións para a normalización, que ten como principal obxectivo reflexionar sobre o proceso de normalización lingüística no ámbito da xustiza.

As sesións, que están especialmente dirixidas á avogacía compostelá, terán lugar o vindeiro 8 de novembro na sede do Colexio de Avogados de Santiago e no transcurso da xornada presentarase a campaña “Avogamos polo galego”.
23/10/2007. CURSOS E CONGRESOS

O futuro da política europea cara ao multilingüismo e a aprendizaxe das linguas

O Centro Europeo Mercator de Investigación sobre o Multilingüismo organiza un congreso internacional que reflexionará sobre a política europea que se desenvolve no ámbito da diversidade lingüística e da aprendizaxe de linguas.

As sesións desenvolveranse entre os días 21 e 23 de novembro de 2007 en Ljouwert/Leeuwarden (Frisia, Países Baixos). Se desexa máis información, prema aquí.
23/10/2007. LEXISLACIóN

Normalízanse os usos lingüísticos nos rexistros civís

Tras a aprobación da Lei 12/2005, do 22 de xuño, pola que se modifica o artigo 23 da Lei do 8 de xuño de 1957, do Rexistro Civil, nas comunidades con lingua oficial propia distinta do castelán, as follas dos libros do Rexistro Civil, os impresos, os selos e os sistemas informáticos deben distribuírse nas dúas linguas oficiais.

Agora o Rexistro Civil da Coruña comeza a facer cumprimento deste imperativo legal e, grazas á aplicación informática Inforeg 4, os nacementos, matrimonios e demais trámites relacionados co estado civil das persoas poderán inscribirse en galego. Tras este primeiro paso, estase xa a traballar na informatización progresiva dos outros rexistros civís de Vigo, Pontevedra, Lugo, Ourense, Santiago e Ferrol.
18/10/2007. DINAMIZACIóN

Normalizando as relacións persoais en internet

A Asociación Fillos de Galicia presenta eTIqueTAL?, unha nova iniciativa para normalizar o uso do idioma galego no ámbito dos contactos persoais en internet.
Empregando un sistema de comunicación semántica, eTIqueTAL ten como obxectivo promover os contactos persoais entre mozos e mozas galegas que compartan afeccións, intereses, proxectos, gustos etc. O rexistro e emprego desta ferramenta é gratuito e a única esixencia é o emprego do galego.
18/10/2007. OUTRAS

Web provisional da CTNL

A Coordinadora de Traballadores/as de Normalización da Lingua comunica que xa está accesible na rede o web provisional da asociación.
Este sitio, que contén a información básica da CTNL amais de novas de interese sobre a normalización do idioma galego, manterase activo durante uns meses ata poder contar co novo espazo web definitivo, que achegará máis información de utilidade e fomentará a participación e comunicación entre todos os/as socios/as.
16/10/2007. CURSOS E CONGRESOS

IV Xornadas sobre Lingua e Usos

O Servizo de Normalización Lingüística da Universidade da Coruña organiza, en colaboración coa Real Academia Galega, a cuarta edición destas xornadas, que nesta ocasión xirarán arredor do tema “Lingua e comunicación”.

As sesións desenvolveranse os días 7, 8 e 9 de novembro no Paraninfo da Reitoría da UdC (A Coruña).

O prazo de inscrición remata o vindeiro 2 de novembro. Se desexa consultar o programa ou obter máis información sobre os trámites da inscrición, prema aquí.
15/10/2007. AXUDAS E PREMIOS

Axudas para o ensino en galego nos centros privados concertados

A Consellería de Educación e Ordenación Universitaria publica, no DOG do 11 de outubro de 2007, axudas para implantar accións que potencien o ensino en lingua galega no segundo ciclo de educación infantil en centros privados concertados de Galicia.

O prazo de presentación de solicitudes é de un mes a partir do día seguinte ao da publicación desta convocatoria.
10/11/2007. EMPREGO

Bolsas de cooperación no Instituto da Lingua Galega

O Instituto da Lingua Galega convoca dúas bolsas de colaboración para o proxecto Corpus romance da Galicia medieval.

Os/as solicitantes deberán estar en posesión da licenciatura de Filoloxía Galega ou Filoloxía Románica, non levar licenciados/as máis de 5 anos e ter unha nota media igual ou superior a 1,5 puntos no expediente académico.

O prazo de presentación de solicitudes é de 15 días naturais contados a partir do seguinte ao da publicación desta convocatoria.
08/10/2007. EMPREGO

Praza de técnico/a de normalización lingüística no Concello de Sada

O Concello de Sada anuncia a contratación laboral temporal dun técnico/a de normalización lingüística que terá como principal obxectivo planificar, xestionar e executar accións destinadas a fomentar o uso e prestixio da lingua galega en todos os sectores do ámbito municipal.

O sistema de selección será o de oposición e o prazo de presentación de solicitudes remata o 8 de outubro de 2007.

Se desexa consultar as bases completas desta convocatoria, prema aquí.