Novas da lingua

Rexistros4831 a 4860 de 5273
  1. Inicio
  2. CDSG-CCG
  3. Novas da lingua
09/01/2007. AXUDAS E PREMIOS

Subvencións a entidades privadas sen fin de lucro

A Secretaría Xeral de Política Lingüística da Xunta de Galicia publica, no DOG do 9 de xaneiro de 2007, a convocatoria pública de axudas a entidades privadas sen fin de lucro para incrementar os usos da lingua galega nos ámbitos da familia, da infancia e da mocidade.

O prazo de presentación de solicitudes é dun mes, contado desde o día seguinte ao da publicación desta convocatoria.
08/01/2007. CURSOS E CONGRESOS

Seminario sobre onomástica galega

A Concellaría de Normalización Lingüística do Concello de Pontevedra organiza o seminario Claves de onomástica galega, que será impartido polo profesor Gonzalo Navaza durante os días 22-24 e 29-31 de xaneiro no Pazo da Cultura de Pontevedra.

Todas as persoas interesadas teñen de prazo para enviar a ficha de inscrición ata o vindeiro día 18 deste mesmo mes.
03/01/2007. AXUDAS E PREMIOS

Concurso Letras Galegas 2007

A Secretaría Xeral de Política Lingüística convoca un concurso destinado aos centros de ensino non universitario para a elaboración dunha exposición relacionada coa obra e época da autora homenaxeada no Día das Letras Galegas 2007, María Mariño Carou.

O concurso contempla dúas categorías, unha para os centros de educación infantil e primaria e outra para os restantes, e as exposicións gañadoras en cada unha destas categorías serán distribuídas entre os centros de ensino de toda Galicia, ademais de recibir un premio en metálico de 3 000 euros.

O prazo de presentación dos traballos remata o vindeiro 2 de marzo. Se desexa máis información, prema aquí.
22/12/2006. DINAMIZACIóN

Novo número do Cartafol Dixital

Xa pode consultar en liña o número 32 do Cartafol Dixital, voceiro da Universidade de Santiago de Compostela en materia de normalización lingüística.

Entre os contidos deste número salientamos a recensión do ciclo de conferencias “Relacións laborais e lingua: unha oportunidade”, a información sobre as resolucións dos diferentes concursos e certames organizados na USC para promover o idioma ou a presentación do curso de elaboración de unidades didácticas, iniciativa da Comisión de Normalización Lingüística da Facultade de Psicoloxía.
19/12/2006. EMPREGO

Bolsas de colaboración no Centro Ramón Piñeiro

A Secretaría Xeral de Política Lingüística publica, no DOG do 19 de decembro de 2006, a convocatoria de dez bolsas de colaboración en diferentes proxectos de investigación que se están a desenvolver no Centro Ramón Piñeiro para a Investigación en Humanidades.

Trátase en concreto do proxecto de terminoloxía científico-técnica (1 bolsa), o proxecto de corpus de referencia do galego actual (3 bolsas), o proxecto de síntese de voz en galego (2 bolsas), o proxecto para a avaliación e aprendizaxe do galego (1 bolsa), o proxecto de bibliografía da literatura galega (1 bolsa), o proxecto de lírica medieval (1 bolsa) e o proxecto de cadernos de fraseoloxía galega (1 bolsa).

O prazo de presentación de solicitudes é dun mes, contado a partir do día seguinte ao da publicación da convocatoria.
19/12/2006. AXUDAS E PREMIOS

Premios da Edición 2006

A Asociación Galega de Editores deu a coñecer os galardoados da segunda edición destes premios que teñen como obxectivo recoñecer o traballo editorial en lingua galega realizado polos seus membros ao longo do ano.

Os libros arden mal, de Manuel Rivas, editado por Edicións Xerais de Galicia; Don Xoán (contado por si mesmo), traducido por Luís Fernández e editado por Sotelo Blanco; Smara, ilustrado por Carole Hénaff e editado por Kalandraka; A sombra descalza, de An Alfaya, editado por Edicións Xerais de Galicia; o programa “Libro aberto” da TVG; Manuel Rivas e Sabino Torres Ferrer foron as obras, autores e editores galardoados nas diferentes categorías.

Cómpre tamén subliñar que nesta edición, entre os finalistas da categoría “Premio Xosé María Álvarez Blázquez ao autor ou autora do ano” atopábase a Área de Terminoloxía do Servizo de Normalización Lingüística da USC.
Se desexa máis información, prema aquí.
18/12/2006. EMPREGO

Praza de profesor asociado na Universidade de Vigo

A Universidade de Vigo convoca o terceiro concurso público para a contratación de persoal docente para o curso académico 2006-2007.
Entre as prazas ofertadas atópase a de profesor asociado T3-P4, adscrita ao Departamento de Filoloxía Galega e Latina, para desenvolver labores de docencia nas materias de “Lingua A2: Galego” e “Lingua Galega I”, no campus de Vigo.

O prazo de entrega da documentación remata o vindeiro 26 de decembro. Pode acceder ao texto completo da convocatoria no web desta universidade (sección PDI > PDI contratado > Convocatorias 2006/7).
15/12/2006. AXUDAS E PREMIOS

Premios Xarmenta 2006

A Asociación Berciana da Lingua “Xarmenta” deu a coñecer os galardoados da segunda edición destes premios que teñen como finalidade recoñecer o labor daquelas institucións e personalidades que máis teñan contribuído á promoción do galego no Bierzo.

Os gañadores deste ano son a Real Academia Galega (RAG) e o cantautor berciano Amancio Prada. O acto de entrega dos premios terá lugar o 24 de xaneiro de 2007, no Teatro Bérgidum de Ponferrada, e na gala actuarán Uxía, Sirma, Rapabestas, o cantautor berciano Aínda e mais o grupo de teatro Vagalume.

A Asociación Xarmenta aproveitou a ocasión para presentar tamén o primeiro número dunha revista que leva o seu mesmo nome e coa que queren seguir contribuíndo á difusión da lingua galega no Bierzo.
13/12/2006. DINAMIZACIóN

O Concello do Porriño anima a ler en galego

O Departamento de Normalización Lingüística e a Concellería de Asuntos Sociais do Concello do Porriño organizan a II Semana de animación á lectura, que baixo o lema "Lerei, lerás: mamás e papás" inclúe charlas formativas para os maiores (pais, nais, docentes...) e sesións de contacontos e actividades lúdicas para os máis pequenos.

As actividades desenvolveranse ao longo da semana do 11 ao 15 de decembro en diferentes centros culturais do concello. Para obter máis información pode poñerse en contacto co Dpto. de Normalización do concello: 986 335000 ext. 255.

13/12/2006. INVESTIGACIóN

Deséñanse os niveis de competencia en lingua galega

A Secretaría Xeral de Política Lingüística da Xunta de Galicia acaba de presentar a publicación Niveis de competencia en lingua galega, obra que recolle os descritores de habilidades e contidos necesarios para obter os certificados dos diferentes niveis de coñecemento do idioma galego.

A descrición dos niveis está adaptada ao Marco común europeo de referencia, documento elaborado polo Consello de Europa que proporciona uns parámetros comúns para a elaboración de programas curriculares, exames e materiais didácticos en toda Europa.

Eses descritores de contidos, así como os exames de avaliación, foron elaborados no seo do Proxecto para a avaliación e aprendizaxe do galego, do Centro Ramón Piñeiro para a Investigación en Humanidades.
12/12/2006. AXUDAS E PREMIOS

Premios á publicidade en lingua galega

O Consello Asesor de Radio Televisión Española en Galicia deu a coñecer os galardoados na XIII edición dos Premios de Publicidade en Galego, que teñen como obxectivo recoñecer o traballo realizado a prol da normalización lingüística por parte de empresas e entidades que se publicitan nos medios de comunicación.

Nesta ocasión, o gañador na categoría de radio foi o anuncio de promoción da saída da Volvo Ocean Race. Na categoría de televisión o galardoado foi o anuncio “Onde nacen as ideas”, elaborado por Ecovigo para promover a entidade Caixanova.

Tamén recibiu unha mención especial o web Heroína, creado pola empresa Interacción.
05/12/2006. AXUDAS E PREMIOS

Resólvese o Premio Manuel Beiras 2006

A Cámara de Comercio, Industria e Navegación e o Concello de Santiago deron a coñecer os galardoados da sétima edición do Premio Manuel Beiras.

Os premiados deste ano foron a empresa Aceiro, na categoría de nova incorporación ao uso do galego, e a imprenta T44, na categoría de empresas que veñen realizando un uso continuado do idioma galego.

Xaquín Mato, da papelería Xaquín, recibiu tamén unha distinción especial polo seu compromiso co idioma.
29/11/2006. AXUDAS E PREMIOS

VII Concurso de relato oral “Tíralle da lingua”

A Asociación Socio-Pedagóxica Galega convoca a sétima edición deste concurso de relato oral que ten como principal obxectivo potenciar os usos orais do galego no ámbito educativo.

Os centros de ensino interesados en participar teñen de prazo para inscribirse ata o vindeiro 5 de abril de 2007. A fase final do concurso celebrarase no mesmo mes de abril en Santiago (Teatro Principal).
Se desexa consultar o texto íntegro da convocatoria, prema aquí.
29/11/2006. AXUDAS E PREMIOS

Premio Linguapax 2007

O Institut Linguapax convoca unha nova edición deste galardón, que quere contribuír ao recoñecemento de lingüistas, investigadores, docentes ou membros da sociedade civil que teñan destacado na promoción da diversidade lingüística e/ou a educación multilingüe.

As candidaturas deben enviarse á secretaría do Instituto Linguapax (info@linguapax.org) antes do 31 de decembro de 2006. O gañador do premio darase a coñecer o vindeiro 21 de febreiro, Día Internacional da Lingua Materna.

Se desexa máis información, prema aquí.
28/11/2006. CURSOS E CONGRESOS

I Xornadas de Lingua e Cultura Galegas en Lubián

A Asociación Xente Nova das Portelas e a Área de Normalización Lingüística da Universidade de Vigo celebrarán os vindeiros días 1 e 2 de decembro unhas xornadas de intercambio lingüístico e cultural no concello zamorano de Lubián co ánimo de promover a introdución do idioma galego no ensino da comarca.

O prazo de inscrición remata o 29 de novembro e todas as persoas interesadas en asistir deben poñerse en contacto coa Área de Normalización Lingüística da Universidade de Vigo.

O programa das xornadas pode consultalo en vieiros.org.
28/11/2006. AXUDAS E PREMIOS

Axudas para a promoción internacional da cultura e lingua galegas

A Área de Normalización Lingüística da Universidade de Vigo convoca axudas para a Cátedra “Ramiro Illa Couto”, co ánimo de promover actividades de fomento da cultura e a lingua galegas no exterior.
As axudas están destinadas ao persoal docente e investigador desta universidade e consistirán no financiamento de desprazamentos e estadías en universidades non pertencentes á Unión Europea ou que non teñan centro de estudos galegos.

O prazo de presentación de solicitudes remata o vindeiro 7 de decembro de 2006.

Se desexa máis información, prema aquí.
27/11/2006. OUTRAS

Galicia, a forza da palabra

A Real Academia Galega, no marco dos actos de conmemoración do seu centenario, organiza a exposición Galicia, a forza da palabra, percorrido pola toma de conciencia da entidade nacional dun pobo a través da súa lingua.

A mostra poderá visitarse do 17 de novembro de 2006 ao 16 de febreiro de 2007 na sede da Fundación Caixa Galicia, na Coruña.
24/11/2006. DINAMIZACIóN

Comeza o programa VAL: Voluntariado de Activación Lingüística

A Dirección Xeral de Xuventude e Solidariedade e mais A Mesa pola Normalización Lingüística presentarán o vindeiro 30 de novembro, ás 13:30 h no Hotel NH Obradoiro (Santiago de Compostela), esta nova iniciativa pioneira en Galicia.

O programa VAL coordinará unha rede de voluntarios/as que desexen prestar axuda lingüística a determinados colectivos de non galegofalantes, coma os inmigrantes ou os estudantes de fóra de Galicia, colaborando así na súa integración social e cultural.

Se desexa máis información, prema aquí.

23/11/2006. INVESTIGACIóN

Novos recursos terminográficos na rede

O Seminario de Lingüística Informática da Universidade de Vigo acaba de publicar en rede o dicionario especializado Terminoloxía da tradución, que achega as 200 nocións máis eficaces para a didáctica da tradución.

Así mesmo, a Consellería de Política Territorial, Obras Públicas e Transportes publica no seu web un Glosario de termos náuticos que compila 106 nocións relacionadas coa navegación e as instalacións portuarias.
22/11/2006. CURSOS E CONGRESOS

II Xornadas de Coordinación de Políticas Lingüísticas

A Fundación Enclave e a Área de Normalización Lingüística da Universidade de Vigo organizan a segunda edición destas xornadas, que teñen como obxectivo establecer un debate arredor das mudanzas na xestión lingüística que debe implicar o cambio de goberno na Administración autonómica.

As sesións desenvolveranse os días 22, 27, 29 de novembro e 11 de decembro de 2006 no Campus Universitario de Vigo (Edificio Miralles. Lagoas-Marcosende).

Se desexa consultar o programa, prema aquí.

21/11/2006. EMPREGO

Praza de técnico/a de normalización lingüística no Concello de Santiago

O Concello de Santiago de Compostela anuncia a convocatoria pública para a contratación, con carácter laboral de duración determinada, dun/ha técnico/a de normalización lingüística. Para participar nas probas de selección os/as aspirantes deberán estar en posesión do título de licenciado/a.
O prazo de presentación de solicitudes é de 20 días naturais contados a partir do seguinte ao da publicación do anuncio (19 de novembro).

Se desexa consultar o texto completo da convocatoria, prema aquí.

20/11/2006. AXUDAS E PREMIOS

Nova edición do Premio Manuel Beiras

A Cámara de Comercio, Industria e Navegación e o Concello de Santiago convocan a sétima edición deste premio que ten como finalidade outorgar un recoñecemento público ao esforzo de normalización lingüística no sector empresarial.

O galardón contempla dúas categorías, unha para as empresas que leven feito un uso continuado do galego e outra para os que se incorporaron recentemente. Os interesados teñen de prazo para presentar as solicitudes ata o 23 de novembro.

Se desexa máis información, prema aquí.
20/11/2006. CURSOS E CONGRESOS

Seminarios de formación para docentes do ensino non regrado da lingua

A Secretaría Xeral de Política Lingüística organiza, en colaboración coa Universidade de Santiago de Compostela, un curso de formación de profesores de galego, que se desenvolverá entre os días 11 e 20 de decembro na Escola Galega de Administración Pública (Santiago de Compostela) e no IES A Xunqueira (Pontevedra). O prazo de inscrición remata o 5 de decembro.

Así mesmo, o vindeiro 21 de decembro terá lugar no Instituto Torrente Ballester (Pontevedra) un seminario para profesores de linguaxe xurídica. Neste caso o prazo de presentación de solicitudes é do 21 de novembro ao 1 de decembro.
20/11/2006. OUTRAS

Probas libres de lingua galega

A Secretaría Xeral de Política Lingüística anuncia a convocatoria das probas libres de lingua galega para obter os certificados de competencia lingüística correspondentes aos niveis de iniciación e perfeccionamento.

As probas realizaranse os vindeiros 2 de decembro (nivel iniciación) e 16 de decembro (nivel perfeccionamento) e os prazos de presentación de solicitudes rematan o 24 de novembro (nivel iniciación) e 12 de decembro (nivel perfeccionamento).

Se desexa máis información, prema aquí.
16/11/2006. EMPREGO

Praza de técnico superior de normalización lingüística na Universidade de Santiago

A Universidade de Santiago de Compostela publica, no DOG do 15 de novembro de 2006, a convocatoria das probas selectivas para cubrir unha praza de técnico superior de normalización lingüística. O sistema de selección dos aspirantes será o de concurso-oposición e o prazo de presentación de solicitudes é de 20 días naturais, contados a partir do seguinte ao da publicación da convocatoria.
15/11/2006. AXUDAS E PREMIOS

Resólvese o Premio Xoán Manuel Pintos

O Concello de Pontevedra e a Rede de Entidades Amigas da Lingua (REAL) outorgáronlle o Premio Xoán Manuel Pintos 2006 ao maxistrado da Audiencia Provincial Xosé Xoán Barreiro Prado e á empresa de telecomunicacións R.

O xoves 16 de novembro, ás 20:30 h, na Biblioteca Pública de Pontevedra, a profesora Carme Hermida Gulías reflexionará sobre a figura de Xoán Manuel Pintos e o venres 24 de novembro, ás 22 h, terá lugar a entrega de premios, no transcurso dunha cea no Pazo da Cultura.
15/11/2006. AXUDAS E PREMIOS

Certame de recollida de tradición oral

A Asociación Cultural e Pedagóxica Ponte...nas ondas!, co patrocinio da Consellería de Cultura e Deporte, convoca un certame de recollida de tradición oral, tanto en prosa coma en verso, co ánimo de que os centros educativos continúen o labor desenvolvido co “Patrimonio Inmaterial Galego-Portugués” e o alumnado se achegue ás manifestacións culturais do seu contorno.

O prazo de inscrición remata o 22 de decembro de 2006 e a data límite para presentar os traballos é o 1 de maio de 2007. Para coñecer o texto completo da convocatoria, prema aquí.

07/11/2006. CURSOS E CONGRESOS

Seminario de formación de linguaxe administrativa

A Secretaría Xeral de Política Lingüística da Xunta de Galicia organiza este seminario de formación complementaria destinado aos/ás licenciados/as en Filoloxía Galega que están en condicións de impartir cursos de linguaxe administrativa ao funcionariado.

As sesións terán lugar os días 2 e 16 de decembro de 2006 e o prazo para presentar as solicitudes é do 6 ao 20 de novembro.

Se desexa máis información sobre o programa ou os trámites de inscrición, prema aquí.
07/11/2006. CURSOS E CONGRESOS

I Curso de formación en voluntariado lingüístico

A Universidade da Coruña organiza un curso de formación en voluntariado lingüístico, de 6 horas de duración, dirixido principalmente aos membros da comunidade universitaria. O principal obxectivo é sentar as bases teóricas e prácticas para desenvolver un programa de acollida ao estudantado de intercambio da UDC.

O prazo de inscrición remata o vindeiro 24 de novembro.
07/11/2006. INVESTIGACIóN

Créase o Centro de Estudos Galegos en Gales

A Facultade de Linguas Modernas da Universidade de Gales conta, desde o pasado 1 de novembro, cun Centro de Estudos Galegos, que se une aos outros 41 centros de estudos, cátedras ou lectorados que xa existen en diferentes universidades do exterior.

Este novo centro de estudos quere constituírse nun punto de encontro e reflexión en Gales e no Reino Unido arredor da investigación interdisciplinaria sobre a Galicia contemporánea. Ademais das tarefas de docencia da lingua galega, as principais liñas de investigación do centro serán o bilingüismo, a identidade cultural e a súa importancia nas culturas galega e galesa.