Novas da lingua

Rexistros4891 a 4920 de 5153
  1. Inicio
  2. CDSG-CCG
  3. Novas da lingua
06/10/2006. AXUDAS E PREMIOS

Premios a proxectos de innovación lingüística en lingua galega no ámbito educativo

A Consellería de Educación e Ordenación Universitaria da Xunta de Galicia convoca 10 premios a proxectos de innovación lingüística destinados a centros de ensino da súa titularidade.

O prazo de presentación de solicitudes é dun mes contado a partir do día seguinte ao da publicación desta convocatoria.
05/10/2006. CURSOS E CONGRESOS

Cursos de linguaxe administrativa galega para o persoal da Administración local

A Consellería de Presidencia, Administracións Públicas e Xustiza publica, no DOG do 5 de outubro de 2006, a convocatoria de cursos de nivel medio e superior de linguaxe administrativa galega para o cadro de persoal da Administración local galega.

O prazo de presentación de solicitudes é dun mes, contado a partir do seguinte ao da publicación desta convocatoria.
26/09/2006. CURSOS E CONGRESOS

Cursos de lingua e cultura galegas na Universitat de Barcelona

A Sección de Filoloxía Galega e Portuguesa da Universitat de Barcelona e mais a Secretaría Xeral de Política Lingüística da Xunta de Galicia organizan a programación de cursos de lingua e cultura galegas para o curso 2006-2007.

A oferta formativa está destinada a maiores de 17 anos, sexan ou non alumnos/as desta universidade, e contempla diferentes niveis e tipos de cursos (galego oral, iniciación á lingua galega, perfeccionamento da lingua galega e extensión cultural).

O prazo de inscrición é ata o vindeiro 11 de outubro. Se desexa máis información, prema aquí.
21/09/2006. DINAMIZACIóN

Festa da lingua no Porriño

O Concello do Porriño celebrará os vindeiros días 25 e 30 de setembro, dentro das Festas do Cristo 2006, diferentes actos lúdico-festivos de promoción e difusión da lingua galega.

Ao longo destes dous días terán lugar concertos de música, mostras de iniciativas lingüísticas, ceiba de libros e animacións na rúa.

Se desexa coñecer o programa completo de actividades, prema aquí.
19/09/2006. AXUDAS E PREMIOS

III Premio Luísa Villalta a iniciativas normalizadoras

Os servizos de normalización lingüística das tres universidades galegas, en colaboración coa Secretaría Xeral de Política Lingüística, organizan a terceira edición do Premio Luísa Villalta a iniciativas normalizadoras, que ten como principal obxectivo promover a reflexión e dinamización lingüísticas entre a comunidade universitaria.

O premio está dirixido a todo o alumnado de 1º, 2º e 3º ciclo das facultades e escolas universitarias galegas e contará con dúas modalidades: “artigo xornalístico” e “deseño dunha campaña de promoción da lingua galega”.

O prazo de presentación de solicitudes remata o 16 de outubro de 2006.

19/09/2006. CURSOS E CONGRESOS

Producir, espallar, localizar... software en galego

As Concellarías de Política Lingüística e Relacións Veciñais; Educación e Mocidade; Cultura e Promoción Económica, Emprego e Comercio do Concello de Santiago de Compostela organizan a xornada de traballo Producir, espallar, localizar... software en galego.

A iniciativa conta coa colaboración do proxecto Mancomun.org e ao longo das sesións debaterase sobre a produción e difusión de software propio en lingua galega, así como sobre as políticas gobernamentais existentes ao respecto.

Esta xornada celebraranse o vindeiro día 29 de setembro no Centro Sociocultural e Xuvenil Municipal (rúa de Frei Rosendo Salvado, 14-16) e o número de prazas é limitado, polo que cómpre comunicar a asistencia antes do 26 de setembro no seguinte enderezo electrónico: dlg@aytocompostela.es
04/09/2006. CURSOS E CONGRESOS

V Simposio Internacional Mercator sobre Linguas Minorizadas

O Centro Mercator-Legislació organiza a quinta edición do Simposio Internacional Mercator, que nesta ocasión se centrará no tema dos dereitos lingüísticos como factor de inclusión social.

As sesións desenvolveranse entre os días 19 e 21 de outubro de 2006 no Institut d´Estudis Catalans (Barcelona) e a inscrición é de balde.

Se desexa coñecer o programa provisional, prema aquí.
01/09/2006. EMPREGO

Praza de técnico/a superior para o Centro de Documentación Sociolingüística de Galicia

O Consello da Cultura Galega publica, no DOG do 22 de agosto de 2006, a convocatoria do proceso selectivo para o acceso a diferentes prazas laborais desta institución. Os licenciados en Filoloxía Galega ou Filoloxía Hispánica (subsección Galego-Portugués) poderán optar á praza de técnico/a superior do Centro de Documentación Sociolingüística de Galicia.

O prazo de presentación de solicitudes remata o vindeiro luns, 11 de setembro. Se desexa consultar o texto completo da convocatoria, prema aquí.
04/08/2006. CURSOS E CONGRESOS

X Encontros para a Normalización Lingüística

Xa pode acceder desde o noso web ao programa provisional da décima edición dos Encontros para a Normalización Lingüística, que se celebrarán os días 26 e 27 de outubro de 2006 no Auditorio de Galicia.

A partir de setembro poremos á súa disposición o programa definitivo e o formulario de inscrición en liña, así como toda a información sobre os trámites da matrícula.
04/08/2006. CURSOS E CONGRESOS

II Curso de Verán “Traballando en Lingua”

O Servizo de Normalización Lingüística da Universidade da Coruña, en colaboración coa Cooperativa Tagen Ata, Lingua e Comunicación, organiza a segunda edición do curso de verán Traballando en Lingua, que terá lugar na Facultade Ciencias da Educación desta universidade entre os días 19 e 22 de setembro de 2006.

Entre os obxectivos do curso están os de reflexionar sobre os factores que interveñen na dinamización lingüística, así como analizar e avaliar experiencias e metodoloxías desenvolvidas neste ámbito.

Se desexa obter máis información sobre o programa ou os trámites da inscrición, prema aquí.
04/08/2006. CURSOS E CONGRESOS

Curso de ferramentas informáticas aplicadas ao traballo terminolóxico

A Sociedade Galega de Terminoloxía organiza esta actividade formativa destinada especialmente aos profesionais e estudosos que traballan no ámbito da terminoloxía en Galicia. No curso facilitaranse os coñecementos adecuados para documentar termos en fontes terminográficas, así como terminoloxía en contexto e información conceptual. Tamén se traballará na relación do terminólogo/a co especialista e coa documentación especializada.

As sesións terán lugar os vindeiros días 29 e 30 de setembro e 6 e 7 de outubro de 2006.

Se desexa máis información, prema aquí.
01/08/2006. EMPREGO

Selección de persoal temporal para traballar no ámbito da toponimia

A Sociedade para o Desenvolvemento Comarcal de Galicia convoca o proceso selectivo para a provisión, con carácter temporal, de 4 prazas de técnico de gabinete de toponimia e 7 prazas de técnico auxiliar de campo de toponimia.

O prazo de presentación de solicitudes é de 10 días hábiles contados a partir do seguinte ao da publicación do anuncio.

Se desexa coñecer o texto completo da convocatoria, prema aquí.
01/08/2006. OUTRAS

Versión en galego do xestor de contidos Joomla

Lateralstudio, empresa de servizos profesionais dedicada ás novas tecnoloxías, ofrece a versión en galego do xestor de contidos Joomla, baseado na licenza GNU (software libre).

Se desexa descargar de balde este xestor, prema aquí.
28/07/2006. EMPREGO

Bolsas para o ensino de lingua, literatura e cultura galegas nas universidades do exterior

A Consellería de Presidencia, Administracións Públicas e Xustiza publica, no DOG do 28 de xullo de 2006, a convocatoria do concurso de méritos para a selección de profesores/as bolseiros/as de lingua, literatura e cultura galegas nas universidades de Madrid, Barcelona (Central), País Vasco, Padua, Trier, Sorbonne Nouvelle París III, Birmingham, Bangor, Stirling e Federal da Bahía.

O prazo para a presentación de solicitudes é de 30 días naturais, contados a partir do seguinte ao da publicación desta convocatoria.
26/07/2006. EMPREGO

Bolsa de colaboración no SNL da Universidade da Coruña

A Universidade da Coruña convoca unha bolsa para desenvolver labores de apoio ao seu Servizo de Normalización Lingüística. Poden optar a esta bolsa todas as persoas que rematasen a licenciatura en Filoloxía Galega no período dos últimos cinco anos e que ademais sexan estudantes de terceiro ciclo na UDC.

O prazo de presentación de solicitudes será o comprendido entre o día 1 e o 11 de setembro de 2006.

Se desexa consultar o texto íntegro da convocatoria, prema aquí.

26/07/2006. INVESTIGACIóN

Loia, guía aberta á lingua galega

O Centro de Documentación Sociolingüística de Galicia e a Sección de Lingua do Consello da Cultura Galega presentan o web Loia, que quere sen un manual de referencia en liña para achegar o idioma galego a todos os investigadores, estudantes e curiosos da Sociolingüística Galega que a cotío utilizan internet como principal vía de acceso á información e ao coñecemento.

Loia, que se presenta en galego, castelán e inglés, estrutúrase en catro áreas temáticas principais: un apartado de información lingüística e gramatical básica, un breve percorrido pola historia social do galego, unha área con datos sociolingüísticos actuais e unha compilación cos principais centros, colectivos e recursos en liña existentes.
26/07/2006. INVESTIGACIóN

A Real Academia Galega dobremente galardoada no ano do seu centenario

A RAG recibiu onte, en San Domigos de Bonaval, a Medalla de Ouro de Galicia, máxima distinción que outorga o Goberno galego e que lle foi concedida a esta institución en recoñecemento aos seus cen anos de defensa da lingua e a cultura galegas.

Así mesmo, o xurado do Premio Fernández Latorre tamén decidiu por unanimidade outorgarlle á Real Academia Galega a XLVIII edición deste galardón, polo seu labor de defensa do idioma e a cultura de Galicia así como pola intensa relación histórica mantida coa prensa.
24/07/2006. EMPREGO

Bolsas de colaboración no Instituto da Lingua Galega

O Instituto da Lingua Galega convoca catro bolsas de colaboración para os proxectos Corpus romance da Galicia medieval (2 bolsas), Tesouro Informatizado da Lingua Galega (1 bolsa) e Atlas Lingüístico Galego (1 bolsa).

Os/as solicitantes deberán estar en posesión da licenciatura de Filoloxía Galega ou Filoloxía Románica, non levar licenciados/as máis de 5 anos e ter unha nota media igual ou superior a 1,5 puntos no expediente académico.

O prazo de presentación de solicitudes é de 15 días naturais contados a partir do seguinte ao da publicación desta convocatoria.
19/07/2006. EMPREGO

Praza de profesor/a de lingua e literatura galegas en Londres

A Consellería de Educación e Ordenación Universitaria anuncia, no DOG do 19 de xullo de 2006, a convocatoria de concurso público para a provisión dunha praza de profesor de lingua e literatura galegas no colexio Vicente Cañada Blanch de Londres.
Poden participar no concurso os funcionarios do corpo de mestres licenciados en Filoloxía Hispánica (galego-portugués), Filoloxía Románica (galaico-portuguesa) ou Filoloxía Galega, así coma os profesores numerarios de lingua e literatura galegas de ensino secundario.

O prazo para a presentación de solicitudes é de 20 días hábiles, contados a partir da publicación desta convocatoria.
19/07/2006. CURSOS E CONGRESOS

Mar por medio 2006: estar no mundo, desde nós

O Concelle de Ribadeo, a Consellería de Cultura e Deporte e a Universidade de Santiago organizan a XIV edición das xornadas Mar por Medio, que terán lugar en Ribadeo os vindeiros días 26, 27 e 28 de xullo.

As sesións terán como fío condutor as estratexias para a proxección exterior da cultura galega e os contidos lingüísticos trataranse na xornada do xoves 27, na mesa redonda “Lingua e cultura galega no exterior: os casos irlandés, británico, francés e catalán”.

Se desexa máis información sobre os trámites de inscrición, prema aquí.

17/07/2006. AXUDAS E PREMIOS

Axudas ao sector editorial para apoiar a tradución

A Consellería de Cultura e Deporte publica, no DOG do 17 de xullo de 2006, a convocatoria de axudas á produción editorial para apoiar a tradución de obras ao galego e a tradución e edición noutras linguas de obras escritas orixinariamente en galego, así como para realizar grandes proxectos editoriais.

O prazo para presentar as solicitudes é de 40 días naturais contados a partir do seguinte ao da publicación desta convocatoria.
17/07/2006. AXUDAS E PREMIOS

Subvencións para a edición de publicacións periódicas en lingua galega

A Consellería de Presidencia, Administracións Públicas e Xustiza anuncia, no DOG do 17 de xullo de 2006, a convocatoria de subvencións para empresas que editen publicacións periódicas escritas integramente en galego.

O prazo de presentación de solicitudes é dun mes a partir do día seguinte ao da publicacións da resolución.
14/07/2006. EMPREGO

Praza de normalizador/a lingüístico/a na S. A. de Xestión do Plan Xacobeo

A Sociedade Anónima de Xestión do Plan Xacobeo anuncia, no DOG do 12 de xullo de 2006, a convocatoria do proceso selectivo para a cobertura dunha praza de normalizador/a lingüístico/a (persoal laboral fixo).

Poderán presentarse ás probas selectivas todas as persoas maiores de idade que estean en posesión da licenciatura de Filoloxía Hispánica (subsección Galego-Portugués) ou equivalente. O prazo de presentación de solicitudes remata o vindeiro día 14 de agosto.
As bases desta convocatoria están á súa disposición na sede da sociedade (Pavillón de Galicia. San Lázaro, s/n. Santiago de Compostela) ou nos fondos do CDSG.

10/07/2006. DINAMIZACIóN

María Mariño Carou será a homenaxeada no Día das Letras Galegas 2007

O Plenario da Real Academia Galega (RAG) acordou, na sesión ordinaria do pasado día 7 de xullo, dedicar o Día das Letras Galegas 2007 a María Mariño Carou, poeta de obra breve pero intensa, marcada polas circunstancias persoais e sociais que lle tocou vivir.

Se desexa máis información sobre a biografía desta autora, prema aquí.
07/07/2006. DINAMIZACIóN

Novo número do Cartafol Dixital

Xa pode consultar en liña o número 30 do Cartafol Dixital, boletín mensual editado polo Servizo de Normalización Lingüística da Universidade de Santiago de Compostela.

Entre os contidos deste número salientamos a recensión da XV Trobada de Serveis Linguístics Universitaris, a presentación do curso de elaboración e edición de unidades didácticas de calidade en galego que está a organizar a Comisión de Normalización Lingüística de Psicoloxía ou o artigo sobre o tradutor automático OpenTrad.


06/07/2006. LEXISLACIóN

O Parlamento europeo rectifica

Despois de que o pasado 18 de maio a Conferencia de Presidentes lle solicitase á Mesa do Parlamento europeo reconsiderar a súa decisión sobre o uso das linguas cooficiais españolas, a Eurocámara rectificou finalmente a súa postura.

O novo acordo permítelles aos cidadáns dirixirse por escrito ao Parlamento europeo en galego, catalán e éuscaro e recibir unha resposta na mesma lingua. Ademais, traduciranse aos correspondentes idiomas cooficiais os textos lexislativos que afecten aos territorios onde estes se falan.
30/06/2006. CURSOS E CONGRESOS

Accesibles na rede as intervencións dos II Diálogos de Lingua e Sociedade

Xa se pode acceder desde a mediateca da Uvigo-TV ás intervencións dos II Diálogos de Lingua e Sociedade 2006, organizados pola Fundación Carlos Casares e que tiveron lugar o pasado 21 de xuño na Universidade de Vigo.
28/06/2006. EMPREGO

Praza de Técnico/a de Normalización Lingüística no Concello do Val do Dubra

O Concello do Val do Dubra publica, no BOP do 21 de xuño de 2006, a convocatoria do proceso selectivo para a provisión dunha praza de Técnico/a de Normalización Lingüística.

O sistema de selección será o de concurso-oposición e os/as aspirantes deberán posuír o título de licenciatura en Filoloxía Galego-Portuguesa, Filoloxía Galega, ou de mestre co diploma de especialista en lingua galega.

O prazo de presentación de solicitudes é de 20 días naturais, contados a partir do seguinte ao da publicación da convocatoria no Boletín Oficial do Estado (BOE).

Se desexa máis información, prema aquí.
26/06/2006. AXUDAS E PREMIOS

II Concurso de mensaxes de móbil

A Área de Normalización Lingüística do Concello de Porriño, en colaboración coa Biblioteca municipal, organiza a segunda edición do Concurso de mensaxes SMS en lingua galega.

As mensaxes, que teñen ser orixinais e non superar os 150 caracteres, deben enviarse ao número 630468553 antes do vindeiro venres, 30 de xuño.
19/06/2006. AXUDAS E PREMIOS

Resólvense as subvencións a entidades privadas sen fin de lucro

A Secretaría Xeral de Política Lingüística da Xunta de Galicia publica, no DOG do 19 de xuño de 2006, a resolución das subvencións a entidades privadas sen fin de lucro para fomentar o uso social da lingua galega.

Se desexa consultar o texto completo da resolución, prema aquí.