Novas da lingua

Rexistros4921 a 4950 de 5153
  1. Inicio
  2. CDSG-CCG
  3. Novas da lingua
19/06/2006. DINAMIZACIóN

Tui rememorará os primeiros xogos florais en lingua galega

No marco dos actos de celebración do seu centenario, a Real Academia Galega conmemorará a celebración dos primeiros xogos florais en galego, celebrados en Tui en 1891.

O acto terá lugar o vindeiro sábado, 24 de xuño, en Tui e nel rememoraranse aqueles primeiros xogos florais con diferentes actuacións musicais, intervencións de reivindicación lingüística a cargo dos académicos da RAG e a lectura dos xa históricos discursos de Manuel Murguía, Salvador Cabeza de León e Alfredo Brañas.
15/06/2006. EMPREGO

Bolsas de colaboración no Centro Ramón Piñeiro

A Consellería de Presidencia, Administracións Públicas e Xustiza publica, no DOG do 15 de xuño de 2006, a convocatoria de bolsas de colaboración en diferentes proxectos de investigación que neste momento se están a desenvolver no Centro Ramón Piñeiro para a Investigación en Humanidades.
(Máis información)
12/06/2006. DINAMIZACIóN

O galego, o mellor dos ingredientes

Os concellos de Ames, Brión e Rois presentan a campaña de galeguización da hostalería “O galego, o mellor dos ingredientes”. O acto, no que intervirán representantes dos tres concellos organizadores e do sector da hostalaría, contará tamén coa actuación do grupo Mofa e Befa, co espectáculo “Cociña cacofónica”.

A presentación terá lugar o vindeiro xoves, l5 de xuño, ás 18:00 h no Pazo da Peregrina (Bertamiráns – Ames).
08/06/2006. AXUDAS E PREMIOS

IV edición do Premio Ramón Piñeiro de ensaio breve

A Secretaría Xeral de Política Lingüística da Xunta de Galicia convoca a cuarta edición deste premio que ten como obxectivos principais homenaxear a figura do ilustre galeguista Ramón Piñeiro e contribuír á difusión do ensaio breve en lingua galega.
O prazo para a presentación de orixinais remata o 4 de setembro de 2006. O traballo gañador será publicado na colección Cadernos Ramón Piñeiro e o seu autor/a recibirá
3 000 euros.

Se desexa consultar o texto completo desta convocatoria, prema aquí.
08/06/2006. DINAMIZACIóN

Consulte en liña o nº 29 do Cartafol Dixital

Xa pode consultar en liña o novo número do Cartafol Dixital, voceiro da Universidade de Santiago de Compostela en materia de normalización lingüística.

Entre os contidos deste número salientamos a presentación do I Concurso de publicidade en galego, a nova sobre os diferentes premios orientados á dinamización lingüística que convoca a USC ou o artigo sobre os recursos informáticos en galego que difunde o portal mancomún.org.
08/06/2006. DINAMIZACIóN

A arte de contar no Concello de Betanzos

O Servizo de Normalización Lingüística do Concello de Betanzos organiza o obradoiro “A arte de contar”, con actividades de expresión corporal e contacontos. As actividades, destinadas a cativos/as de entre 7 e 14 anos, desenvolveranse ao longo do mes de xullo (sábados pola mañá) e as prazas cubriranse por rigorosa orde de inscrición.
Se desexa máis información, pode poñerse en contacto co servizo: 981 771300 / 670016403.
06/05/2006. EMPREGO

Praza de Técnico de Normalización Lingüística no Concello de Vigo

O Concello de Vigo publica, no BOP do día 2 de xuño de 2006, a cobertura con carácter interino dunha paraza de Técnico Superior de Normalización Lingüística. O sistema de selección será o de oposición libre e o prazo para a presentación de instancias é de 10 días hábiles, contados a partir do seguinte ao da publicación desta convocatoria.

06/05/2006. AXUDAS E PREMIOS

Resólvense os XII Premios Peña Novo

A Fundación Lois Peña Novo fixo públicos os gañadores da XII edición dos Premios Peña Novo, pensados para animar o proceso de normalización lingüística nas administracións públicas de Galicia.

Nesta edición os galardoados foron os xulgados 1 e 2 de primeira instancia e instrución de Lalín; o xefe superior de Policía de Galicia, Luís García Mañá; e a empresa de telecomunicacións R.
02/06/2006. CURSOS E CONGRESOS

Diálogos sobre linguas e sociedades 2006

A Fundación Carlos Casares organiza a segunda edición destes Diálogos, que naceron co obxectivo de converterse en foro estable de debate sobre as cuestións derivadas da complexa relación entre as linguas e os grupos humanos e que xirarán nesta ocasión arredor das ideoloxías e a diversidade lingüística.

O acto terá lugar o vindeiro 21 de xuño na Universidade de Vigo (Edificio Miralles – sala 1) e a asistencia será libre ata completar a capacidade da sala. Se desexa obter máis información sobre o programa, prema aquí.
02/06/2006. DINAMIZACIóN

Presentación pública do Foro Enrique Peinador

O pasado mércores, día 31 de maio, presentouse publicamente en Ourense o Foro Enrique Peinador, que aglutina entidades empresariais e institucionais influentes no ámbito socioeconómico galego e que nace co obxectivo de conciliar a actividade económica coa defensa dos valores culturais e lingüísticos do país.

Entre as iniciativas máis inmediatas do Foro están a organización dunha xornada dedicada á empresa galega, a elaboración dun dicionario de termos económicos ou a proposta de institucionalización do Día da Empresa Galega.
31/05/2006. INVESTIGACIóN

Contratación de persoal docente no Departamento de Filoloxía Galega e Latina da Universidade de Vigo

O reitorado da Universidade de Vigo convoca un concurso público para a contratación de persoal docente.

Catro das prazas ofertadas están adscritas ao Departamento de Filoloxía Galega e Latina (dúas con categoría de asociado e dúas con categoría de axudante) e os titulares impartirán a docencia nas facultades de Filoloxía e Tradución (Vigo), Ciencias Empresariais e Turismo (Ourense), Ciencias da Educación e do Deporte (Pontevedra) e Ciencias Sociais e da Comunicación (Pontevedra).

O prazo de presentación de solicitudes remata o vindeiro 5 de xuño. Se desexa máis información sobre as características destas prazas, prema aquí.
31/05/2006. OUTRAS

O Instituto Cervantes colaborará na difusión exterior da lingua galega

A Secretaría Xeral de Política Lingüística da Xunta de Galicia e o Instituto Cervantes asinaron un convenio de colaboración para incluír dentro da programación académica do Instituto Cervantes cursos de galego oral, de iniciación e de perfeccionamento da lingua galega.

Con este mesmo obxectivo de fomentar a difusión exterior da lingua, a Xunta de Galicia formalizou tamén o seu ingreso na Casa das Linguas, institución promovida polo Instituto Cervantes e pola Universidade de Alcalá, onde se ofertarán a partir do vindeiro mes de setembro cursos de galego, catalán, vasco e portugués.

26/05/2006. INVESTIGACIóN

O Concello de Betanzos homenaxea a M. Lugrís cunha escolma dos seus textos

O Servizo de Normalización Lingüística do Concello de Betanzos presentará hoxe, día 26 de maio, unha escolma de textos de M. Lugrís Freire co ánimo de homenaxear ao autor ao que este ano se lle dedicou o Día das Letras Galegas.
A escolma componse dos textos máis significativos da súa produción como narrador, dramaturgo, poeta e xornalista e inclúe tamén o texto íntegro do primeiro mitin en lingua galega, que Lugrís pronunciou en Betanzos en 1907.

O acto terá lugar ás 20:30 h no Salón Azul do Edificio Liceo (Betanzos) e nel participarán Concepción Valladares, concelleira de Xuventude e Normalización Lingüística, Xesús Torres, historiador, e Mónica Baleirón, responsable da edición.

24/05/2006. AXUDAS E PREMIOS

Axudas á produción audiovisual en lingua galega

A Consellería de Cultura e Deporte publica, no DOG do 23 de maio de 2006, a convocatoria pública de subvencións para producións ou coproducións audiovisuais e interactivas en lingua galega.

O prazo de presentación de solicitudes é de 30 días naturais, contados a partir do día seguinte ao da publicación da convocatoria. Se desexa máis información, prema aquí.
24/05/2006. CURSOS E CONGRESOS

Asesores lingüísticos na Galicia actual

A Sección de Lingua do Consello da Cultura Galega e a Coordinadora de Traballadores/as de Normalización da Lingua están a organizar o seminario Asesores lingüísticos na Galicia actual, co obxectivo de afondar na situación e as demandas específicas dos profesionais que traballan nos eidos da tradución, corrección, asesoramento ou xestión lingüística.

As sesións, de acceso libre, terán lugar os vindeiros días 1 e 2 de xuño no salón de actos do Consello da Cultura Galega.

23/05/2006. OUTRAS

OpenOffice en galego

A Consellería de Innovación e Industria presenta a versión en galego do paquete ofimático OpenOffice 2.0, que se pode descargar de balde no portal Mancomun.org.

Neste mesmo sitio tamén atopará un corrector ortográfico para OpenOffice adaptado á normativa oficial vixente.

23/05/2006. OUTRAS

A edición dixital de La Voz de Galicia, agora tamén en lingua galega

Co gallo da festividade do Día das Letras Galegas, desde o pasado 17 de maio o xornal La Voz de Galicia ofrece a posibilidade de consultar en galego a súa edición dixital. Este novo servizo ofrécese grazas a un programa de tradución automática que ten a súa orixe no proxecto de I+D OpenTrad, no que colaboraron, entre outras entidades, o Seminario de Lingüística Informática da Universidade de Vigo e a empresa Imaxin Software.
16/05/2006. OUTRAS

Galescola: rede galega de escolas infantís públicas

Vicepresidencia da Xunta de Galicia creará unha nova rede de ensino infantil, constituída por 99 centros para nenos de 0 a 3 anos, que terá como principal obxectivo educar en galego e para os galegos.
Na Galescola respectarase o recollido no Plan de Normalización Lingüística, aprobado por unanimidade no Parlamento de Galicia en 2004, polo que a lingua galega será o idioma vehicular naquelas áreas onde sexa maioritaria e no resto das zonas, onde o castelán sexa o idioma máis falado, garantirase o uso do galego na aula durante un terzo do tempo.
12/05/2006. CURSOS E CONGRESOS

Xornadas sobre o status da lingua no novo Estatuto

Entre os días 12 e 23 de maio terán lugar na Facultade de Dereito da USC unhas xornadas sobre lexislación lingüística promovidas polo Observatorio de Dereitos Lingüísticos.

Ao longo das sesións reflexionarase sobre a evolución do galego en diferentes ámbitos, como a Administración pública, o ensino ou a xustiza, aínda que a maior parte das intervencións xirarán arredor da vindeira reforma estatutaria e o status que ao idioma galego se lle debe recoñecer no novo Estatuto.

Se desexa máis información, prema aquí.

12/05/2006. INVESTIGACIóN

O Consello da Cultura Galega presenta a edición facsímile da Gramática do idioma galego, de Manuel Lugrís

Hoxe venres, día 12 de maio, ás 13:00 h, presentarase no Salón de Actos do Consello da Cultura Galega a edición facsímile da Gramática que Manuel Lugrís, autor homenaxeado no Día das Letras Galegas, publicou en 1922.

No acto participarán Ramón Villares, presidente do CCG, Henrique Monteagudo, secretario do CCG e coordinador da súa Sección de Lingua, e Manuel Lugrís Rodríguez, neto do homenaxeado.
12/05/2006. AXUDAS E PREMIOS

Resólvese o Premio a artigos xornalísticos normalizadores

Sinfonía en galego maior, de Ana Rodríguez Barreiro, e Un idioma na cetaria, de Ramón Vilar Landeira obtiveron o primeiro e segundo premios, respectivamente, da segunda edición deste concurso que convoca o Concello de Carballo.

Ademais do correspondente premio en metálico, os artigos gañadores sairán publicados nos diferentes medios colaboradores os vindeiros días 21 de maio (1º premio) e 20 de maio (2º premio). No caso dos medios non diarios, publicaranse ambos artigos no número inmediatamente posterior a estas datas.

A entrega dos galardóns terá lugar o vindeiro 18 de maio, ás 20:30 h no Pazo da Cultura de Carballo, no transcurso da mesa redonda Os medios de comunicación escrita en galego, na que participarán diferentes representantes da Asociación de Medios Escritos en Galego (AME).
10/05/2006. DINAMIZACIóN

Comeza o Correlingua 2006

Hoxe, 10 de maio, comeza na Praza da Quintana de Santiago de Compostela unha nova edición do Correlingua, proposta lúdico-educativa que pretende convidar os centros de ensino e a mocidade galega en xeral a reivindicar publicamente a normalización do idioma galego.

Baixo o lema Xogas? En galego gañamos o Correlingua percorrerá ao longo deste mes de maio diferentes comarcas do país ata rematar na Coruña o vindeiro día 24. Se desexa máis información, prema aquí.
10/05/2006. DINAMIZACIóN

O Bierzo celebra o Día das Letras Galegas

A Asociación Berciana da Lingua “Xarmenta” presenta as actividades que desenvolverá ao longo deste mes de maio nas vilas de Ponferrada e Cacabelos para conmemorar o Día das Letras Galegas, que este ano se dedica a Manuel Lugrís Freire. Entre os actos que se celebrarán destaca a exposición O compromiso coa terra, na que se fai un percorrido pola obra e vida do escritor homenaxeado, así como a conferencia didáctica a cargo do profesor Xabier Campos Villar sobre a historia do Días das Letras Galegas e mais a figura de Manuel Lugrís.

Se desexa coñecer o programa completo de actividades, prema aquí.
10/05/2006. AXUDAS E PREMIOS

Comunicándomos: I Concurso de publicidade en galego

A Comisión de Normalización Lingüística da Facultade de Administración e Dirección de Empresas da USC organiza o
I Concurso de publicidade en galego, que pretende incentivar a creación artística nos membros da comunidade universitaria e ao mesmo tempo promover o uso do galego no ámbito da publicidade.

O prazo de presentación dos traballos remata o 30 de setembro de 2006.

Se o desexa, pode obter máis información no número 28 do Cartafol Dixital.
10/05/2006. DINAMIZACIóN

Maio Cultural en Ribeira

Co ánimo de contribuír á conmemoración do Día das Letras Galegas, A Concellería de Cultura e Festexos do Concello de Ribeira organiza, coa colaboración do Servizo de Normalización Lingüística municipal, o Maio Cultural 2006.

No que respecta á promoción da lingua, o grosso das actividades xirará arredor da animación á lectura e da creación literaria, polo que se organizarán recitais poéticos, conferencias sobre a literatura ou os blogs en galego, un concurso literario para os máis novos e unha exposición sobre Manuel Lugrís.
10/05/2006. AXUDAS E PREMIOS

Actividades de formación para os membros dos Equipos de Normalización Lingüística

A Consellería de Presidencia, Administracións Públicas e Xustiza anuncia a convocatoria de encontros, seminarios, xornadas e actividades de formación e de intercambio de experiencias para os responsables e os compoñentes dos Equipos de Normalización Lingüística dos centros educativos.

O prazo de presentación de solicitudes para participar nas diferentes actividades será de 20 días hábiles, contados a partir do anuncio que desde a Secretaría Xeral de Política Lingüística se fará de cada actividade. Para obter máis información, prema aquí.
05/05/2006. DINAMIZACIóN

Un Día das Letras Galegas para reivindicar as novas tecnoloxías en galego

Con motivo da celebración simultánea o vindeiro día 17 de maio do Día das Letras Galegas, o Día de Internet e o Día Mundial das Telecomunicacións e da Sociedade de Información, A Consellería de Innovación e Industria presenta o web + Internet + Galego + Futuro.

O sitio nace para acubillar unha serie de iniciativas que buscan conectar a promoción do idioma coa das novas tecnoloxías, entendendo que o futuro da lingua galega nun mundo globalizado pasa necesariamente por normalizar os seus usos no ámbito das tecnoloxía dixitais.
28/04/2005. LEXISLACIóN

O Parlamento Europeo atranca o uso do galego na Unión

Despois de que o Consello de ministros de Asuntos Xerais e Relacións Exteriores da UE acordara o pasado 13 de xuño de 2005 o uso das linguas cooficiais españolas nas institucións europeas, a Mesa da Eurocámara decidiu finalmente non adherirse ao acordo e rexeitar o uso do galego, catalán e éuscaro nesta institución.

Así pois, os cidadáns non poderán dirixirse en galego ao Parlamento Europeo nin acceder nesta lingua aos principais textos emitidos pola Cámara, en contradición coa decisión doutros organismos europeos, como o Comité das Rexións ou o Consello, onde si se admite o uso destes idiomas cooficiais.
28/04/2006. LEXISLACIóN

Plan experimental para a introdución do galego na educación infantil

A Administración educativa implantará o vindeiro curso 2006-2007 un novo plan experimental destinado a
introducir o ensino en lingua galega na educación infantil.

Para levar a cabo esta iniciativa seleccionaranse, nunha primeira fase, dez centros educativos que ofertarán ensino integramente en galego nesta etapa educativa e que
deberán ter como mínimo outra unidade de educación infantil para garantir que os pais que o desexen poidan seguir escolarizando os seus fillos segundo a lexislación lingüística vixente.

No futuro a Consellería de Educación estudará a posibilidade de aumentar tanto o número de centros adscritos a este programa como as etapas educativas nas que se desenvolva. Se desexa máis información, prema aquí.
26/04/2006. OUTRAS

Presentación pública da Fundación Vía Galego

Onte, 25 de abril, presentouse en Santiago de Compostela a Fundación Vía Galego, promovida pola Mesa pola Normalización Lingüística e que terá entre os seus obxectivos principais promover a relación de Galicia cos outros países e territorios pertencentes ao sistema lingüístico galego-portugués.

Así, ademais de propiciar as relacións lingüístico-culturais coa lusofonía, a Fundación desenvolverá tamén diferentes liñas de acción destinadas a propiciar o intercambio cultural coas comunidades do galego estremeiro ou exterior (en Asturias, Castela e León e Estremadura).

Se desexa máis información, prema aquí.