Novas da lingua

Rexistros5041 a 5070 de 5280
  1. Inicio
  2. CDSG-CCG
  3. Novas da lingua
16/02/2005. INVESTIGACIóN

Acto de homenaxe a Fernando R. Tato Plaza

O Instituto da Lingua Galega organiza o vindeiro día 25 de febreiro, venres, ás 6 da tarde, un acto de homenaxe en memoria de Fernando R. Tato, coñecido investigador e lingüista. No acto, que terá lugar no Salón de Graos da Facultade de Filoloxía (USC), presentarase o volume (Dis)cursos da escrita. Estudos de filoloxía galega ofrecidos en memoria de Fernando R. Tato Plaza.
(Máis información)
16/02/2005. AXUDAS E PREMIOS

Subvencións a empresas editoriais

A Consellería de Educación e Ordenación Universitaria publica, no DOG do 16 de febreiro, a convocatoria de subvencións a empresas editoriais para a elaboración de materiais didácticos en lingua galega.

Se desexa máis información sobre a convocatoria, prema aquí.
16/02/2005. AXUDAS E PREMIOS

Axudas aos equipos de normalización lingüística dos centros de ensino

A Consellería de Educación e Ordenación Universitaria convoca axudas destinadas a financiar proxectos de formación ou fomento do uso do galego destinados aos equipos de normalización lingüística dos centros de ensino.

O prazo de presentación de solicitudes é de 40 días naturais, contados a partir do seguinte ao da publicación desta convocatoria.
15/02/2005. EMPREGO

Contratación dun técnico/a de normalización lingüística no Concello de Teo

O Concello de Teo fai pública a convocatoria das bases para a contratación temporal dun técnico/a de normalización lingüística. O proceso de selección consistirá nun concurso de méritos e todas as persoas que desexen participar nas probas selectivas teñen de prazo ata o vindeiro 19 de febreiro para presentar a correspondente instancia de solicitude no Rexistro do concello.

Pode obter máis información sobre as bases desta convocatoria no seguinte teléfono: 981 815700 (Concello de Teo).
10/02/2005. CURSOS E CONGRESOS

V Simposio galego de tradución

A Asociación de Tradutores Galegos (ATG) organiza a quinta edición deste foro de encontro e debate entre tradutores e autores de culturas minorizadas. O simposio terá lugar os vindeiros días 24 e 25 de febreiro na Facultade de Filoloxía e Tradución da Universidade de Vigo.

Todas as persoas interesadas en asistir deberán formalizar a súa matrícula antes do 18 de febreiro na secretaría da ATG. Se desexa consultar o programa completo ou obter máis información sobre os trámites de inscrición, prema aquí.
02/02/2005. DINAMIZACIóN

Novo número do Cartafol Dixital

Xa pode consultar en liña o número 18 do Cartafol Dixital, boletín mensual editado polo Servizo de Normalización Lingüística da Universidade de Santiago de Compostela.

Entre os contidos deste número salientamos a presentación dos datos estatísticos sobre as axudas para o uso do galego nos traballos de investigación, a presentación da enquisa sobre os usos lingüísticos na Escola de Relacións Laborais da USC e o anuncio da apertura de matrícula na segunda quenda de cursos para non galegofalantes.
01/02/2005. EMPREGO

Bolsas de colaboración na Área de Normalización Lingüística da Universidade de Vigo

A Universidade de Vigo convoca dúas bolsas para colaborar na súa Área de Normalización Lingüística. Poderán presentarse a esta convocatoria todos os/as licenciados/as en Filoloxía Galega pola Universidade de Vigo ou en Tradución e Interpretación (lingua A: galego) que estean matriculados/as nun curso de doutoramento desta universidade ou que posúan o Diploma de Estudos Avanzados.

O prazo de presentación de solicitudes remata o vindeiro 4 de febreiro. Se o desexa, pode descargar desde o noso web o texto completo da convocatoria e o formulario de solicitude.
01/02/2005. CURSOS E CONGRESOS

Cursos de iniciación e perfeccionamento da lingua e de linguaxe administrativa galega

A Consellería de Educación e Ordenación Universitaria convoca cursos lingua galega destinados aos seguintes colectivos sociais:

-Cursos de iniciación e perfeccionamento da lingua para adultos e colectivos galegos.

-Cursos de iniciación e perfeccionamento da lingua para galegos residentes no exterior.

-Cursos de iniciación e perfeccionamento da lingua para docentes.

-Cursos de linguaxe administrativa galega (nivel medio) para o persoal das administracións públicas de Galicia.
26/01/2005. OUTRAS

A Sociedade Galega de Terminoloxía convoca a súa primeira Asemblea Xeral

A Comisión Promotora da Sociedade Galega de Terminoloxía convoca a todas as persoas interesadas a participar na súa primeira Asemblea Xeral, que terá lugar mañá xoves, día 27 de xaneiro, ás 17.00 h. no Salón de Graos da Facultade de Filoloxía da USC.

Nesta xuntanza presentarase oficialmente a asociación e elixirase a súa Xunta Directiva, ao tempo que se debaterán as liñas de traballo que a entidade vai desenvolver no futuro. Se o desexa, tamén pode facerlle chegar as súas propostas a través dunha ficha de localización.

Para máis información sobre os obxectivos da asociación, consulte os seus estatutos.
26/01/2005. EMPREGO

Novas prazas de técnico de normalización lingüística

O Concello de Porto do Son convoca un concurso-oposición para cubrir 2 prazas de laboral temporal destinadas a crear o servizo municipal de normalización lingüística deste concello.

A duración dos contratos será de 6 meses e o prazo de presentación de instancias para participar no proceso de selección é de dez días naturais contados a partir do seguinte ao da publicación das bases no Boletín Oficial da Provincial da Coruña (25 de xaneiro de 2005).
24/01/2005. AXUDAS E PREMIOS

Axudas á creación audiovisual dos novos realizadores

A Consellería de Cultura, Comunicación Social e Turismo publica, no DOG do 19 de xaneiro, a convocatoria de axudas destinadas a fomentar o uso da lingua galega na creación audiovisual (desenvolvemento de guións ou proxectos de produción) dos novos realizadores.

O prazo de presentación de solicitudes é de corenta días naturais, contados a partir do seguinte á publicación desta convocatoria.
18/01/2005. INVESTIGACIóN

O Día das Letras Galegas dedicarase no 2005 a Lorenzo Varela

Tras o acordo da Real Academia Galega de dedicar o Día das Letras Galegas a Lorenzo Varela, a Consellería de Cultura, Comunicación Social e Turismo declara tamén o 2005 Ano de Lorenzo Varela.

Se desexa obter máis información sobre a figura deste importante intelectual galeguista, prema aquí.
13/01/2005. CURSOS E CONGRESOS

Curso de actualización de lingua e linguaxe administrativa para persoal da Xunta de Galicia

Con motivo da reforma das normas ortográficas e morfolóxicas do idioma galego de 2003, a Escola Galega de Administración Pública convoca un curso de actualización de lingua e linguaxe administrativa galega destinado ao persoal da Xunta de Galicia.

O prazo de presentación de solicitudes é de 15 días naturais contados a partir do seguinte ao da publicación no DOG desta convocatoria.
10/01/2005. AXUDAS E PREMIOS

Subvencións á produción audiovisual en lingua galega

A Consellería de Cultura, Comunicación Social e Turismo publica, no DOG do 31 de decembro de 2004, a convocatoria de subvencións a empresas vinculadas co sector audiovisual para fomentar a realización de proxectos en lingua galega.

O prazo de presentación de solicitudes é de corenta días naturais, contados a partir do día seguinte á publicación desta
convocatoria.
27/12/2004. AXUDAS E PREMIOS

Subvencións para asociacións e institucións privadas sen fin de lucro

A Consellería de Educación e Ordenación Universitaria publica, no DOG do 24 de decembro, a convocatoria de subvencións para fomentar o uso social da lingua galega no ámbito asociativo.

O prazo de presentación de solicitudes é de 40 días naturais contados desde o día seguinte ao da publicación desta convocatoria.
23/12/2004. LEXISLACIóN

A avogacía galega, en galego

No marco do III Congreso da Avogacía Galega, celebrado en Ourense os pasados días 16-18 de decembro, aprobouse o Código da Avogacía Galega, documento marco polo que se rexerá de agora en diante o exercicio da avogacía en Galicia.

Neste documento, o Consello da Avogacía Galega, xunto cos diferentes colexios de avogados, comprométense a impulsar a normalización do uso do galego en todas as profesións xurídicas e na Administración de Xustiza así como a prestar os servizos de asistencia xurídica gratuíta, de quenda de oficio e de orientación xurídica en lingua galega, sempre que o cliente así o demande.
22/12/2004. AXUDAS E PREMIOS

Premio para o labor de promoción da lingua

Onte, día 21 de decembro, entregáronse os Premios Manuel Beiras de promoción do galego no ámbito empresarial, convocados pola Cámara de Comercio e o Concello de Santiago. Nesta V edición os galardoados foron a empresa de telecomunicacións R, a xestoría XHO e o construtor Xosé Otero Pombo.

Así mesmo, a Universidade da Coruña resolveu tamén o
I Premio Luísa Villalta a iniciativas normalizadoras na Universidade da Coruña. O xurado outorgou neste caso tres premios na modalidade de “Deseño de campaña de promoción da lingua” e un premio na modalidade de “Artigo xornalístico”.
22/12/2004. EMPREGO

Bolsas de linguaxe administrativa galega

A Escola Galega de Administración Pública convoca dúas bolsas de colaboración para a realización de estudos e prácticas sobre linguaxe administrativa galega.

A dotación económica de cada bolsa é de 864 euros mensuais e o prazo de presentación de solicitudes é de 20 días naturais, contados a partir do seguinte ao da publicación desta convocatoria.
21/12/2004. INVESTIGACIóN

Dicionario Visual da Construción

O Colexio Oficial de Arquitectos de Galicia edita un dicionario terminolóxico galego-castelán de termos da construción. A obra contén 6 661 termos en galego e 6 886 en castelán e estrutúrase en 6 capítulos que conteñen diferentes ilustracións temáticas, así como a terminoloxía relacionada cos diferentes temas.

Se desexa consultar a versión web deste dicionario, prema aquí.
16/12/2004. DINAMIZACIóN

Apróbase o Plan de Política Lingüística da Universidade de Vigo

A Universidade de Vigo aprobou o pasado 14 de decembro, en comisión de goberno, o seu Plan de Política Lingüística, documento marco que ten como obxectivo propiciar a planificación dos usos lingüísticos da comunidade universitaria. Ofrecémoslle a introdución e o texto íntegro do plan.

Se desexa máis información sobre o seu proceso de elaboración, pode consultar o web que a Universidade de Vigo puxo o pasado mes de xullo á disposición de toda a comunidade para que puidese participar de xeito activo na xestación e elaboración deste documento.
15/12/2004. CURSOS E CONGRESOS

Declaración pola autodeterminación lingüística

Coa intención de impulsar o multilingüismo e a diversidade cultural dos pobos celebrouse entre os pasados días 15 e 20 de novembro en Rosario (Arxentina) o I Congreso das Linguas. Pilar García Negro e Rafa Villar foron os encargados de presentar, desde unha perspectiva diacrónica, a situación da lingua galega.

Como documento final do congreso presentouse a Declaración pola Autodeterminación Lingüística, onde todos os participantes esixen aos seus respectivos estados que recoñezan o dereito que todo pobo ten de xestionar e promover o mantemento das súas linguas propias. A versión galega do documento foi cedida por Rafa Villar, responsable do Departamento de Normalización Lingüística da CIG.
03/12/2004. EMPREGO

Bolsas de colaboración no Centro Ramón Piñeiro

A Consellería de Educación e Ordenación Universitaria publica, no DOG do 3 de decembro de 2004, a convocatoria de bolsas de colaboración en diferentes proxectos de investigación que neste momento se están a desenvolver no Centro Ramón Piñeiro para a Investigación en Humanidades.
(Máis información)
03/12/2004. AXUDAS E PREMIOS

Axudas ás empresas privadas para fomentar o uso do galego

A Consellería de Educación e Ordenación Universitaria publica, no DOG do 3 de decembro de 2004, a convocatoria de subvencións a empresas privadas para fomentar o uso social da lingua galega.

O prazo de presentación de solicitudes é de 40 días naturais contados a partir do seguinte ao da publicación desta convocatoria.
02/12/2004. DINAMIZACIóN

Impulso do uso do galego no Concello de Pontevedra

A Concellería de Normalización Lingüística do Concello de Pontevedra está a desenvolver, en colaboración con outras entidades do concello, unha campaña de promoción do uso do galego nos medios de comunicación. En relación con esta iniciativa, celebrarase hoxe, 2 de decembro, unha mesa redonda-coloquio onde se tratará este mesmo tema. O coloquio terá lugar na Sala Sargadelos de Pontevedra, ás 8:30 horas, e contará coa participación de Anxo Lorenzo Suárez, Xosé Manuel Vega Gómez e Luis Bará Torres.

Co mesmo obxectivo de normalizar os usos lingüísticos no concello, entrou onte en vigor a Ordenanza de impulso do uso do galego no Concello de Pontevedra.

02/12/2004. DINAMIZACIóN

O galego, sempre en conta

A Mesa pola Normalización Lingüística está a levar a cabo unha campaña destinada a fomentar o uso do galego por parte dos bancos e caixas de aforro. O seu proxecto consiste en reunir o maior número posible de persoas dispostas a mudar a súa nómina para aquela entidade que se comprometa a normalizar os seus usos lingüísticos.

A día de hoxe, esta asociación conta xa cunha carteira de clientes dispostos a dar este paso cuxas nóminas ascenden a uns 7 millóns de euros anuais. Se desexa obter máis información xeral ou acceder ao documento de adhesión á campaña, prema aquí.
30/11/2004. CURSOS E CONGRESOS

Xornadas de Expresión Oral Tíralle da Lingua

A Asociación Sócio-Pedagóxica Galega organiza a V edición destas xornadas que teñen como obxectivo principal incentivar os usos orais do galego no ámbito educativo. As sesións terán lugar o vindeiro día 11 de decembro, de 9:00 a 21:00 horas, no Museo do Pobo Galego (Santiago).

Se desexa consultar o programa ou acceder ao formulario de inscrición en liña, prema aquí.
30/11/2004. DINAMIZACIóN

Novas actividades de dinamización lingüística na Universidade de Vigo

A Área de Normalización Lingüística da Universidade de Vigo presenta os dous últimos froitos do seu labor de promoción do uso do galego no ámbito universitario.

Trátase nesta ocasión do programa Intergalcome, que ten como obxectivo facilitar a integración lingüística e cultural do alumnado foráneo, e a publicación da obra Lingua galega. Dúbidas lingüísticas, que quere contribuír á mellora da calidade lingüística dos textos producidos pola comunidade universitaria.
26/11/2004. AXUDAS E PREMIOS

Convócase a V edición do Premio Manuel Beiras

A Cámara de Comercio e o Concello de Santiago convocan unha nova edición deste premio que ten como fin outorgar un recoñecemento público ao esforzo de normalización do uso do galego no sector empresarial.

Para obter máis información, acceda ás bases do concurso e ao formulario de presentación de candidaturas.
26/11/2004. DINAMIZACIóN

Dez pasos para normalizar o galego no comercio compostelán

A Concellería de Política Lingüística e a Cámara de Comercio do Concello de Santiago presentan unha nova campaña de dinamización lingüística destinada a fomentar o uso do galego na comunicación comercial.

Todos os establecementos comerciais de Compostela e centros de información e recursos dirixidos a este sector recibirán un folleto informativo con argumentos e datos a favor do uso do galego, así como un decálogo con dez pasos a seguir para mellorar a comunicación lingüística no seu establecemento.
24/11/2004. CURSOS E CONGRESOS

V Simposio Internacional sobre Bilingüismo

A Universitat Autònoma de Barcelona organiza a quinta edición deste congreso internacional que quere constituírse nun foro estable para todos aqueles investigadores que traballan nos eidos da psicolingüística, a educación bilingüe, a adquisición da lingua ou a planificación e a política lingüística.

O simposio terá lugar os vindeiros días 20 – 23 de marzo en Barcelona. Se desexa obter máis información ou acceder ao formulario de inscrición en liña, prema aquí.