Novas da lingua

Rexistros841 a 870 de 5153
  1. Inicio
  2. CDSG-CCG
  3. Novas da lingua
29/11/2023. AXUDAS E PREMIOS

XXIV Premios Manuel Beiras

O Concello de Santiago e a Cámara de Comercio de Santiago de Compostela convocan a vixésimo cuarta edición dos Premios Manuel Beiras, que este ano levan por lema “En galego, naturalmente”. Estes galardóns teñen como finalidade recoñecer o compromiso coa normalización lingüística no sector empresarial compostelán, premiando o uso do galego na comunicación comercial nas seguintes categorías: "empresa cun uso continuado da lingua galega", "empresa de nova incorporación ao uso da lingua galega" e "empresa innovadora no uso do galego". Poden concorrer a este premio as empresas radicadas do concello de Santiago de Compostela, entendendo aquelas que teñen a súa sede social no municipio ou que realizan unha importante actividade nel. As empresas poderán presentar directamente a súa candidatura ou seren propostas por calquera outra persoa ou entidade. O prazo para presentar as candidaturas remata o 11 de decembro de 2023. O acto oficial de entrega de premios terá lugar o 18 de decembro de 2022 no Teatro Principal, ás 20 h.

No sitio web da iniciativa atoparás as bases completas da convocatoria, así como información sobre edicións anteriores.
29/11/2023. DINAMIZACIóN

Nadal en Rede comeza a súa actividade agasallando música para acompañar as festas

A XI edición de Nadal en Rede está preparada para levar teatro, música, monicreques e contadas a 41 concellos e entidades pertencentes á Rede de Dinamización Lingüística. Son propostas orientadas a público familiar e adulto que animan a desfrutar de actividades en lingua galega durante estas festas. O programa vaise desenvolver entre o 1 e o 30 de decembro de 2023.

Nesta ocasión, a Secretaría Xeral de Política Lingüística completa a proposta co lanzamento dun disco de cancións de Nadal do grupo folk Ailá, oito temas tradicionais cos que ambientar estas festas en galego nas casas e no comercio. Goza xa de Ailá de Nadal.
28/11/2023. OUTRAS

Palabra do Ano 2023: o público xa pode facer as súas propostas

A Real Academia Galega e a Fundación Barrié abren a campaña para a elección popular da Palabra do Ano 2023. Accede ao Portal das Palabras e vota nesta ligazón ata o 10 de decembro.

De entre as suxestións recibidas, publicarase a lista de termos máis repetidos ou significativos, entre os que poderás escoller na votación final, entre o 12 e o 25 de decembro. A palabra con maior apoio ocupará o podio que antes correspondeu a "comadre", "tanxugueiras", "nós", "sentidiño", "deseucaliptización", "afouteza" "irmandade", "refuxiado" e "corrupción".
27/11/2023. INVESTIGACIóN

Charla sobre as potencialidades da intelixencia artificial para a lingua galega

Hoxe, 27 de novembro de 2023, ás 19.30 h, terá lugar na sede da Agrupación Cultural Alexandre Bóveda (A Coruña) a charla “Intelixencia artificial e novas tecnoloxías lingüísticas: oportunidades para a lingua galega”, impartida por Rubén Cela, director da Oficina Técnica do Proxecto Nós. A conferencia está aberta a todo tipo de público non especializado que queira facer unha aproximación ás tecnoloxías da linguaxe e ás súas potencialidades para as linguas minorizadas. Só precisas enviar previamente os teus datos de contacto a través do formulario que aparece na páxina web da AC Alexandre Bóveda.
27/11/2023. AXUDAS E PREMIOS

Convocadas as axudas a teses de doutoramento en galego na USC

Co obxectivo de que a lingua galega sexa de uso normal na redacción e defensa das teses de doutoramento, a Universidade de Santiago de Compostela convoca axudas para a súa realización, co apoio do Servizo de Normalización Lingüística.

O importe das axudas será de 3000 € para o curso académico 2023/2024, que se repartirán cun importe máximo de 400 € por solicitude aceptada. O prazo de presentación remata o 30 de setembro de 2024 e require que se efectúe con posterioridade á lectura e defensa da tese. Consulta a convocatoria para acceder á información completa.
22/11/2023. OUTRAS

Xoán González-Millán protagoniza a última biografía publicada no Álbum de Galicia

Dolores Vilavedra e Alejandro Alonso asinan a biografía de Xoán González-Millán (O Grove, 1951 - Nova York, 2002) que hoxe se incorpora ao Álbum de Galicia. Únense aquí o coñecemento do intelectual e o recoñecemento ao estudoso, crítico literario e principal difusor da cultura galega nos ámbitos académicos internacionais.

Xunto co texto biográfico, atoparás outros recursos documentais de valía para coñecer esta figura grovense referente da diáspora contemporánea: galería fotográfica, obra activa e pasiva, vídeos ou recursos en liña.
22/11/2023. DINAMIZACIóN

A Deputación da Coruña divulga nas súas redes as palabras da ciencia

Ao longo deste mes de novembro, coincidindo coa conmemoración do Mes da Ciencia en Galego, a Área de Normalización Lingüística da Deputación da Coruña está a desenvolver a terceira edición da campaña #AsPalabrasDaCiencia, coa que quere poñer de relevo a idoneidade do galego como lingua vehicular da ciencia. A acción principal da iniciativa consisten en difundir nas redes sociais da deputación (Facebook, Twitter e Instagram) contidos que nos axudan a coñecer mellor as persoas e centros de referencia na investigación e divulgación científica, así como a rememorar fitos históricos da nosa ciencia. Entre os internautas que divulguen estes contidos sortearanse diferentes lotes de libros en galego de temática científica.

Se precisas máis información, preme aquí.
21/11/2023. DINAMIZACIóN

Petiscos de divulgación científica no Campus de Lugo da USC

A Asociación de Investigadores AgroMar organiza este ano 2023 a nova edición de “DivulgaT. Petiscos de divulgación científica”, unha iniciativa deseñada para promover a utilización do galego como ferramenta para a comunicación científica e para darlle visibilidade ao traballo desenvolvido polos investigadores/as do Campus de Lugo, a través de charlas divulgativas de 10 minutos de duración.

As sesións terán lugar os días 23 e 30 de novembro de 2023, a partir das 19:30 h, no Vello Cárcere de Lugo. A asistencia é libre e de balde, mais cómpre facer a reserva da butaca a través das seguintes ligazóns:

-Reservas para a sesión do 23 de novembro
-Reservas para a sesión do 30 de novembro

Para ampliar información, preme aquí.
20/11/2023. AXUDAS E PREMIOS

"Habelas hainas" 2023. Xornada divulgativa de investigación matemática

A Comisión de Normalización Lingüística da Facultade de Matemáticas e o Seminario de Iniciación á Investigación da USC cítannos, un ano máis, na xornada "Habelas hainas". No programa, investigadores e investigadoras da facultade achéganse a temas de interese para o alumnado de grao e mestrado, dun xeito ameno e divulgativo.

"Habelas hainas" 2023 terá lugar o vindeiro 23 de novembro, ás 16:00 h, na Aula Magna da Facultade de Matemáticas da USC, e rematará cun magosto ás 20 h. Podes inscribirte a través desta ligazón.
15/11/2023. AXUDAS E PREMIOS

Entregado o I Premio de Podcast Ramón Otero Pedrayo

O I Premio de oratoria en formato podcast Ramón Otero Pedrayo, convocado pola Asociación de Amigos Otero Pedrayo, xa ten gañadores. Trátase de Raquel González Calvo, primeiro premio polo podcast ‘O mundo en feminino de Otero Pedrayo’; Miguel Blanco, segundo por ‘As sete vacas da Tebra’ e Naihara Darriba, terceiro por ‘Aturuxo’.

O obxectivo deste certame, dirixido a alumnado galego de entre 15 e 25 anos, é incentivar o cultivo da expresión oral e da oratoria entre a mocidade ao tempo que se homenaxea a Otero Pedrayo, mestre nesta disciplina.

Fóra de concurso, o xurado fixo unha valoración moi positiva de ‘Aprendendo sobre Otero Pedrayo’, podcast colectivo elaborado polo alumnado do IES Milladoiro.




15/11/2023. AXUDAS E PREMIOS

Convocatoria dos premios a curtas de animación en galego Nós tamén creamos!

A Secretaría Xeral de Política Lingüística e a Dirección Xeral de Ordenación e Innovación Educativa da Consellería de Cultura, Educación, Formación Profesional e Universidades convocan os premios a curtas de animación en galego elaboradas no marco do programa Nós tamén creamos! para o curso académico 2023/2024.

Esta proposta, está dirixida a alumnado de Educación Infantil e Primaria e organizada en catro categorías con cadanseu premio. Os centros públicos admitidos no programa Nós tamén creamos! quedarán inscritos de oficio no certame. Para os demais centros de titularidade pública, o prazo de presentación das solicitudes remata o día 1 de febreiro de 2024. A data límite de envío das curtametraxes será o 30 de maio de 2024. Consulta toda a información aquí.
14/11/2023. INVESTIGACIóN

A Real Academia Galega estuda a relación entre lingua e xénero

A Real Academia Galega ofrece na súa páxina web o volume Lingua e xénero en Galicia: estado da cuestión, que asina a académica María López Sández e mais os técnicos do Seminario de Sociolingüística da RAG, Xaquín Loredo Gutiérrez e Gabino S. Vázquez Grandío.

A obra trata de explorar a relación entre os usos lingüísticos en Galicia e a variable sociocultural de xénero. Para isto, os seus autores fan unha revisión das investigacións precedentes nesta materia e, a seguir, ofrecen unha análise detallada de datos obtidos nos principais bancos, censos e enquisas sociolingüísticas.

Para ampliar información preme aquí.
14/11/2023. AXUDAS E PREMIOS

O Concello de Ames entrega o VI Premio Lingua e Empresa

O pasado xoves 9 de novembro tivo lugar o acto público de entrega do VI Premio Lingua e Empresa, promovido anualmente polo Servizo de Normalización Lingüística do Concello de Ames para fomentar o uso do galego na actividade económica local. Nesta edición as empresas galardoadas foron Nós Televisión, do Milladoiro, na categoría de uso consolidado da lingua galega; e o negocio de hostalaría O Transistor, de Bertamiráns, na categoría de empresas que que incorporaron o galego nos dous últimos anos.
14/11/2023. CURSOS E CONGRESOS

Escolas Católicas Galicia organiza a XIX Xornada de Normalización Lingüística

Escolas Católicas Galicia organiza, coa colaboración da Secretaría Xeral de Política Lingüística, a décimo novena edición da súa Xornada de Normalización Lingüística, co obxectivo de intercambiar información, experiencias e recursos didácticos en galego entre o profesorado e os membros dos equipos de dinamización da lingua galega dos centros educativos de Galicia. As sesións terán lugar o 24 novembro de 2023, en horario de 9:30 h a 14:00 h, na sede do Consello da Cultura Galega (Santiago de Compostela).

Igual ca en edicións anteriores, no marco destas xornadas entregaranse os Premios Irmán Reboiras ás mellores iniciativas de fomento do galego, organizados tamén por Escolas Católicas Galicia, en colaboración coa Secretaría Xeral de Política Lingüística e co patrocinio da editorial Rodeira-Edebé.

Para obter máis información sobre o programa das xornadas e mais os trámites de inscrición, preme aquí.
13/11/2023. AXUDAS E PREMIOS

Convócase o VI Certame de podcasts en galego e portugués Xosé Mosquera Pérez

Un ano máis, o IES Rosalía de Castro de Santiago de Compostela e Arraianos Producións, en colaboración con Ponte... nas ondas!, organizan os Premios de podcast en galego e portugués Xosé Mosquera Pérez "O vello dos contos".

A este certame pode presentarse alumnado de primaria e secundaria de centros que impartan ensinanzas de galego de réxime xeral tanto dentro coma fóra de Galicia. Os participantes deberán elaborar un podcast inédito e orixinal, cunha duración de entre 3 e 5 minutos, relacionado coa escritora Luisa Villalta ou aspectos do patrimonio cultural de Galicia e norte de Portugal.

A solicitude de participación para os centros está aberta ata o 21 de decembro de 2023. Os traballos poden entregarse ata o 1 de maio de 2024. Consulta as bases da convocatoria.
13/11/2023. CURSOS E CONGRESOS

O Simposio do ILG 2023 céntrase nas identidades e ideoloxías lingüísticas

Entre o 28 e o 30 de novembro de 2023, o Instituto da Lingua Galega desenvolve unha nova edición do seu Simposio Anual. Nesta ocasión, a vixésimo terceira, o programa ofrece tres seccións: variación, contacto e cambio lingüísticos en situacións de minorización lingüística; identidades e ideoloxías lingüísticas; e diversidade lingüística.

A inscrición debe realizarse antes do 23 de novembro a través deste formulario.
10/11/2023. INVESTIGACIóN

Fernando Ramallo explica no seu novo libro que está a pasar co galego

O sociolingüista Fernando Ramallo formula no seu novo libro, que leva por título Que pasa co galego?, 32 preguntas coas que trata de explicar, de xeito sinxelo e didáctico, cal é a situación da lingua galega neste século XXI, ofrecendo unha reflexión crítica sobre diferentes aspectos de carácter sociolingüístico: os usos lingüísticos da mocidade, o papel dos neofalantes, os prexuízos lingüísticos, o papel do sistema educativo no proceso de normalización lingüística etc.

A obra está editada por Xerais e na súa páxina web podes consultar os principais datos bibliográficos, así coma un breve perfil do seu autor.
10/11/2023. INVESTIGACIóN

Nova guía didáctica sobre a figura de frei Martín Sarmiento

O Instituto de Estudos Galegos Padre Sarmiento (IEGPS) presenta a guía didáctica Frei Martín Sarmiento, elaborada no marco dos actos conmemorativos dos 250 anos do falecemento do sabio beneditino (1695-1772), que tiveron lugar o pasado ano 2022.

A guía, editada pola Editorial CSIC co apoio da Secretaría Xeral de Política Lingüística da Xunta de Galicia, estrutúrase en 15 bloques teóricos (coas súas respectivas actividades) e ten como obxectivo que o alumnado máis novo coñeza a obra e a figura do padre Sarmiento, así como a súa relevancia histórica nos ámbitos científico e lingüístico.

A obra conta cunha versión impresa e outra dixital. Esta última pode descargarse de xeito gratuíto na páxina web da Editorial CSIC.

Se precisas máis información, preme aquí.
10/11/2023. AXUDAS E PREMIOS

Entréganse en Castro Caldelas os I Premios Foro do Bo Burgo

Mañá, 11 de novembro de 2023, ás 18:30 h, terá lugar na igrexa do Burgo (Castro Caldelas) o acto público de entrega dos I Premios Foro do Bo Burgo, promovidos polo Concello de Castro Caldelas e mais a Unidade Parroquial do Burgo para recoñecer a persoas físicas e xurídicas que destacan pola promoción do idioma galego e, ao tempo, conmemorar o 795 aniversario do Foro do bo burgo de Castro Caldelas (documento dado por Afonso IX en 1228 e redactado en galego).

Os/as galardoados/as nesta primeira edición son o doutor Eduardo López Collazo, a Fundación Vicente Risco, a escritora Helena Villar Janeiro, o arcebispo da diocese de Santiago monseñor Francisco José Prieto Fernández e a directora xeral de Patrimonio da Xunta de Galicia Maria del Carmen Martínez Ínsua.

O acto contará tamén coa intervención do historiador Manuel Carrete, que explicará a importancia histórica do Foro, e coa actuación musical de Marcelo Dobode.

No Facebook do Concello de Castro Caldelas podes atopar máis información sobre esta iniciativa.
10/11/2023. OUTRAS

A Mesa pola Normalización Lingüística promove unha carta aberta aos membros da UE

O vindeiro 15 de novembro de 2023 terá lugar no Consello de Asuntos Xerais da Unión Europea o debate no que se tratará o recoñecemento do galego, o catalán e o éuscaro como linguas oficiais da UE. Con este motivo, a Mesa pola Normalización Lingüística promove unha carta aberta, dirixida aos estados membros da UE, na que lles piden que voten afirmativamente para que o galego sexa considerado tamén idioma oficial das institucións da Unión Europea.

A carta, que se publica coa sinatura de máis de 30 representantes de entidades públicas e sociais galegas, pode ser asinada a título particular por toda a cidadanía.

Na páxina web da Mesa podes ler o texto íntegro da carta.
10/11/2023. AXUDAS E PREMIOS

A Asociación Galega de Editoras, galardoada co VI Premio Xela Arias

O xurado do VI Premio Xela Arias acordou por unanimidade galardoar nesta sexta edición á Asociación Galega de Editoras, polo “labor e dedicación da AGE na promoción do libro galego e a visibilidade ao labor da tradución, cun diálogo aberto e directo entre profesionais e empresas”.

O Premio Xela Arias é unha iniciativa que promove anualmente a Asociación Galega de Profesionais da Tradución e da Interpretación (AGPTI) para recoñecer o labor de empresas, entidades ou persoas que contribúan á promoción do uso do galego no mercado da tradución e da interpretación.

Na páxina web da AGPTI podes ampliar información.
09/11/2023. OUTRAS

A RAG exhorta aos deputados/as galegos/as a usar o galego no Parlamento español

O plenario da Real Academia Galega acordou por unanimidade facer pública unha declaración institucional en relación ao uso do galego no Parlamento español. A RAG manifesta a súa satisfacción polo feito de que o Parlamento español, a través da reforma do seu regulamento, recoñeza oficialmente o dereito ao uso do galego, o éuscaro e o catalán nas súas sesións e no conxunto da actividade parlamentaria e “exhorta a todos os deputados e deputadas galegos nas Cortes españolas a que fagan uso do seu dereito a empregar o galego na súa actividade parlamentaria”.

Así mesmo, a RAG remata o comunicado manifestando a súa esperanza en que tamén cheguen a bo porto as xestións do goberno español para acadar a plena oficialidade do galego nas institucións da Unión Europea.

Para ler o texto completo da declaración, preme aquí.
08/11/2023. DINAMIZACIóN

Alingua presenta unha cartografía sensorial é un catálogo de referentes para a mocidade

Alingua, Asociación de Entidades Locais pola Lingua Galega, presenta dúas novas iniciativas no marco da súa campaña de promoción do galego É túa. Pásaa!.

A primeira delas está dirixida ao alumnado de educación secundaria. Trátase dun Catálogo de referentes (en continua actualización), que recolle figuras destacadas de diferentes ámbitos sociais e culturais que empregan o galego na súa vida cotiá e profesional. O catálogo complétase cunha guía didáctica para traballar na aula diferentes contidos transversais relacionados co uso do idioma.

A segunda das accións, neste caso dirixida á poboación xeral, é unha Cartografía sensorial, un espazo virtual que compila paisaxes sonoras e visuais dos concellos que conforman Alingua. O obxectivo é amosar a diversidade paisaxística e lingüística de Galicia e, ao mesmo tempo, ofrecerlle á cidadanía un repositorio dixital para elaborar postais sonoras con mensaxes personalizadas en galego.

Para ampliar información, preme aquí.
07/11/2023. OUTRAS

A RAG estrea a serie documental Irmás na Fala

A Real Academia Galega estrea hoxe, 7 de novembro de 2023, ás 21:00 horas, na súa canle de Youtube a serie documental Irmás na Fala, coa que quere render homenaxe e divulgar a memoria das mulleres que formaron parte das Irmandades da Fala. A serie componse de catro episodios nos que se irá debullando a historia invisibilizada destas 200 irmandiñas, poñendo o foco nas biografías de Micaela Chao Maciñeira, María Miramontes, Elvira Bao, Amparo López Jeán e Emilia Docet.

Irmás na Fala está producida pola Real Academia Galega e realizada por Nós Televisión, co apoio do Concello da Coruña.
06/11/2023. AXUDAS E PREMIOS

Resoltos os Premios á Calidade Lingüística da USC

A Universidade de Santiago de Compostela publica a listaxe de estudantes recoñecidos pola calidade lingüística dos seus traballos de curso de grao, fin de grao e fin de mestrado, ao abeiro do premio organizado polo Servizo de Normalización Lingüística da Universidade e que cumpre xa a súa decimonovena edición.

Aos Premios presentáronse un total de 101 propostas. Podes consultar toda a información na acta do xurado.
03/11/2023. AXUDAS E PREMIOS

Premio Ramón Piñeiro Facer País para a cantautora Sés

A Asociación Val de Láncara outorgou a María Xosé Silvar, Sés, o XXI Premio Ramón Piñeiro Facer País, recoñecendo así o labor a prol da lingua e da cultura galega que realiza a través da súa música.

En palabras da secretaria da asociación: "É unha muller que pisa forte sobre os escenarios, moi fiel ás súas ideas que, sen se cinguir a un estilo concreto, mestura ritmos pero sempre en galego e a atender á identidade do pobo". Podes comprobalo navegando pola súa discografía.

03/11/2023. AXUDAS E PREMIOS

Resolución das axudas a publicacións periódicas en galego

A Secretaría Xeral de Medios da Xunta de Galicia publica a resolución da convocatoria de subvencións para o ano 2023 destinadas a empresas que realizan publicacións periódicas escritas integramente en galego.

Podes consultar a listaxe de empresas beneficiarias premendo aquí.
02/11/2023. DINAMIZACIóN

Novembro volve ser o mes da ciencia en galego nas bibliotecas públicas

Xa podes consultar o amplo programa de actividades didácticas e divulgativas que van ter lugar no marco da iniciativa “Novembro, mes da ciencia en galego nas bibliotecas públicas – 2023”, que promove a Consellería de Cultura, Educación, Formación Profesional e Universidades, en colaboración coa Secretaría Xeral de Política Lingüística.

Igual ca en edicións anteriores, o programa de actividades está acompañado dun manifesto, que nesta ocasión asina Elena Vázquez Cendón, doutora en matemáticas, decana da Facultade de Matemáticas da USC, membro do Consello da Cultura Galega, presidenta do Estalmat-Galicia e Premio María Josefa Wonenburger no 2022.

A maiores, tamén atoparás en Internet unha compilación de recursos dixitais en lingua galega de temática científica: materiais didácticos e divulgativos; selección bibliográfica en Pinterest e maletas viaxeiras.

Na páxina web de Bibliotecas Escolares de Galicia atoparás toda a información sobre esta iniciativa.
02/11/2023. DINAMIZACIóN

Inauguración da exposición XII Proxecto Didáctico Antonio Fraguas

O vindeiro sábado, 4 de novembro de 2023, ás 12:00 h, terá lugar no auditorio do Museo do Pobo Galego a inauguración da exposición XII Proxecto Didáctico Antonio Fraguas, que promove a Fundación Antonio Fraguas Fraguas. Tras o acto inaugural, quedarán expostos no claustro alto do Museo os dous proxectos que resultaron gañadores na duodécima edición do certame:

- Ecoparloteo, froitos da terra, do CEIP Plurilingüe da Ramallosa (Teo), no que se traballan de xeito multidisciplinar contidos relacionados coa nosa lingua, música, historia, tradición, ecoloxía ou natureza autóctona.

-Ao son da oralidade. O noso patrimonio. Da pedra á palabra. Da prehistoria ao século XXI, presentado conxuntamente polo IES do Milladoiro (Ames) e o IES Marco do Camballón (Vila de Cruces), que ten como obxectivo achegar o alumnado ao patrimonio material e inmaterial da súa contorna (improvisación oral, toponimia, petróglifos...).
31/10/2023. EMPREGO

A Valedora do Pobo convoca unha bolsa para realizar tarefas lingüísticas

A Valedora do Pobo convoca unha bolsa destinada á formación en prácticas para colaborar na comunicación escrita, edición e asesoramento, corrección lingüística e tradución das diversas publicacións da institución. As persoas aspirantes deben estar en posesión do grao en Tradución e Interpretación, en que a lingua de orixe principal da súa combinación lingüística (1ª lingua ou lingua A1) sexa a lingua galega; grao en Lingua e Literatura Galegas; grao en Estudos de Galego e Español con itinerario en lingua galega e española; ou equivalentes. A bolsa terá unha duración dun ano e a persoa beneficiaria recibirá unha asignación de 1.300 euros mensuais, suxeitos á retención que legalmente proceda.

O prazo de presentación de solicitudes é de 15 días hábiles, contados a partir do día seguinte ao da publicación da convocatoria no Diario Oficial de Galicia.