Novas da lingua

Rexistros841 a 870 de 5280
  1. Inicio
  2. CDSG-CCG
  3. Novas da lingua
27/09/2023. DINAMIZACIóN

O Concello de Ames convoca o IV Certame Galetiktokers

O Servizo de Normalización Lingüística e o Departamento de Mocidade do Concello de Ames convocan a cuarta edición do Certame Galetiktokers, dirixido a mozas e mozos a partir de 13 anos, co obxectivo de estimular a creatividade, fomentar a creación de vídeos en galego con novos formatos e darlle visibilidade á comunidade galega de tiktokers. Os vídeos deben ser de creación propia, ser difundidos a través da aplicación TikTok ou dos reels de Instagram, ter unha duración de entre 15 e 60 segundos, e estar en lingua galega (con presenza oral, escrita ou musical). Outorgaranse seis premios de 300 euros . O prazo de inscrición remata o 23 de outubro de 2023.

Podes consultar as bases completas da convocatoria premendo aquí.
Así mesmo, na páxina web do Concello de Ames tes máis información sobre esta iniciativa.
26/09/2023. CURSOS E CONGRESOS

Aberto o prazo de inscrición para as Xornadas Enreguéifate

Os servizos de normalización lingüística dos concellos de Ames, Carballo, Santiago, Pontevedra e Teo organizan, no marco do proxecto Enreguéifate, unhas xornadas formativas dirixidas a docentes que desexen achegarse ao mundo da improvisación oral en verso e coñecer a súa potencialidade como ferramenta educativa. As sesións, impartidas por Lupe Blanco, Josinho da Teixeira, Manolo Maseda e Séchu Sende, terán lugar no Espazo Apego de Santiago de Compostela o 6 de outubro de 2023. O prazo de inscrición estará aberto ata o vindeiro 2 de outubro.

Podes obter máis información sobre o programa e os trámites de inscrición premendo aquí.
26/09/2023. DINAMIZACIóN

Bota a andar unha nova edición do Club de Debate Alingua

Xa está en marcha a nova edición do Club de Debate Alingua, un proxecto colaborativo promovido polos servizos de normalización lingüística de dez concellos galegos: Ames, Carballo, Ferrol, Pontevedra, Ribeira, Rois, Santa Comba, Santiago de Compostela, Teo e Val do Dubra.
A iniciativa ten como obxectivo a dinamización lingüística e cultural no ámbito educativo, fomentando a fluidez comunicativa en galego, o pensamento crítico e o respecto pola diversidade de opinións. Poden participar equipos mixtos de entre 4 e 10 mozos/as de 3º e 4º de ESO, 1º de Bacharelato e ciclos formativos. Haberá diferentes premios nas fases de zona e o equipo que gañe a fase final será premiado cunha viaxe multiaventura.
O prazo de inscrición estará aberto entre o 2 e o 31 de outubro de 2023.
26/09/2023. INVESTIGACIóN

O Centro Ramón Piñeiro presenta un dicionario galego-italiano en liña

Co gallo do Día Europeo das Linguas, que se celebra cada 26 de setembro, o Centro Ramón Piñeiro para a Investigación en Humanidades presenta o Dicionario galego-italiano Galita, unha obra lexicográfica, dirixida pola catedrática emérita da USC Isabel González, que contén case 15.000 palabras e o dobre de equivalencias, seleccionadas segundo un criterio didáctico.
O dicionario está deseñado para o estudantado galego de filoloxía italiana, para os estudosos das filoloxías románica e galega e, en xeral, para o público galego que desexe aproximarse ao idioma italiano.

Podes ampliar información sobre esta iniciativa premendo aquí.
25/09/2023. OUTRAS

O Consello da Cultura Galega celebra o Día Europeo das Linguas honrando a Rosalía

O Día Europeo das Linguas celébrase cada 26 setembro, tras ser instaurado polo Consello de Europa en 2001 co obxectivo de promover a diversidade lingüística e fomentar o plurilingüismo entre a cidadanía.

Hoxe, 25 de setembro, na véspera desta celebración, terá lugar na sede do Instituto Cervantes en Madrid un acto institucional no que a cultura e a lingua galegas terán un especial protagonismo. A partir das 11 h, Rosario Álvarez, en nome do Consello da Cultura Galega, depositará na Caixa das Letras un legado «in memoriam» de Rosalía de Castro.

O programa conmemorativo inclúe tamén a presentación, este mesmo luns, dunha edición multilingüe do poema «Grito hacia Roma», de Federico García Lorca; e mais o espectáculo poético e musical «A palabra na música», que neste caso terá lugar mañá, 26 de setembro, ás 19:00 h.

No web institucional do Consello da Cultura Galega tes información detallada sobre esta celebración.
22/09/2023. AXUDAS E PREMIOS

Chega Youtubeiras 2023 reivindicando unha rede en galego aberta e diversa

Nove concellos galegos, a Deputación da Coruña e as universidades da Coruña, Santiago de Compostela e Vigo presentan as bases dos Premios Youtubeiras 2023, un certame deseñado para fomentar a produción de contidos en galego en Internet e darlle visibilidade á comunidade youtubeira. Poden optar a estes premios todas as persoas maiores de 14 anos con canles de YouTube autoproducidas. As canles deben ter a maioría dos seus vídeos en galego e, como mínimo, un deles subido a partir do 15 de novembro do 2022 co cancelo #youtubeiras, sen restricións de privacidade. Os títulos, as descricións e os subtítulos permanentes (de habelos) teñen que estar en galego. O xurado outorgará 8 premios: 7 deles valorados en 1000 € e un en 500 €.

O prazo de inscrición das canles remata o 17 de novembro de 2023.

Na páxina web do proxecto podes consultar as bases completas desta sétima edición, visitar os recusos formativos que hai dispoñibles en liña e coñecer as canles gañadoras da pasada edición de 2022.

22/09/2023. LEXISLACIóN

Aprobado o uso indistinto no Congreso das catro linguas oficiais. Un manifesto insta ao emprego do galego

Como xa contamos, o día 19 foi tomada en consideración a proposición de modificar o Regulamento do Congreso en canto ao tratamento das distintas linguas recoñecidas na Constitución. A maioría absoluta acadada na votación permitiu continuar co procedemento e convocar un novo pleno o día 21 de setembro, en que se aprobou definitivamente a modificación do Regulamento sobre o uso das "linguas que teñan carácter de oficial nalgunha comunidade autónoma", co engadido dunha emenda presentada por EAJ-PNV: "no prazo máis breve posible", a Mesa "tomará os acordos necesarios para que as iniciativas lexislativas, unha vez aprobadas definitivamente pola Cámara, sexan publicadas na correspondente publicación oficial do Congreso dos Deputados, con carácter de versión auténtica, nas linguas que teñan carácter oficial nalgunha comunidade autónoma, de acordo coa Constitución e o correspondente Estatuto de Autonomía".

Este dereito afecta a todos os órganos da actividade parlamentaria e xa provocou reaccións de apoio como a difusión do manifesto Queremos galego no Congreso, asinado por personalidades da vida cultural e social galegas.

Ademais de felicitarse pola chegada desta tardía decisión, instan os deputados e deputadas representantes de Galicia a que "sexan consecuentes co compromiso co seu país e empreguen a lingua galega a partir de agora en todas as intervencións que realicen, contribuíndo desta maneira non só ao seu coñecemento e divulgación, senón tamén ao seu prestixio e normalización".
22/09/2023. DINAMIZACIóN

Créase a Asociación Pro Fundación Manoel Vello, para a promoción do idioma galego

O pasado 15 de setembro de 2023 rexistrouse formalmente a Asociación Pro Fundación Manoel Vello, unha entidade que ten como principais obxectivos promover e fomentar o uso do galego en todos os ámbitos da sociedade, así como impulsar a creación dunha fundación que leve o mesmo nome, en memoria deste galeguista, falecido o pasado 17 de decembro de 2022, que destacou, entre outras moitas cousas, polo seu activismo a prol da normalización plena do idioma galego.

Na páxina web da asociación podes obter máis información sobre a iniciativa e as vías de colaboración.

No documental Manoel Vello. A grandeza das cousas pequenas, dirixido por Xosé Bocixa e emitido en Nós Televisión, podes achegarte á vida e á figura do homenaxeado.
22/09/2023. CURSOS E CONGRESOS

Cursos de formación en lingua galega na Universidade de Vigo

A Área de Normalización Lingüística da Universidade de Vigo anuncia unha nova convocatoria de sete cursos de formación en lingua galega, dirixidos á comunidade universitaria, para este primeiro cuadrimestre do curso académico 2023/2024. Os cursos ofertados son os seguintes: Curso de iniciación á lingua galega; A calidade lingüística no teu TFG ou TFM; Ciclo de lingua e calidade; Curso de linguaxe administrativa e xurídica; Os erros máis frecuentes na lingua galega; Curso de redacción e estilo; Curso de xestión de multilingüismo nas aulas.

As sesións desenvolveranse durante os meses de outubro, novembro e decembro de 2023, na modalidade en liña. O prazo de inscrición remata o 22 de setembro de 2023, e os trámites deben facerse a través da plataforma virtual https://bubela.uvigo.es.

No Diario da Universidade de Vigo tes toda a información sobre esta oferta formativa.
21/09/2023. DINAMIZACIóN

Convocatoria aberta para participar nos programas lingüísticos do Plan Proxecta

A Dirección Xeral de Ordenación e Innovación Educativa da Xunta de Galicia publica o regulamento do “Plan Proxecta+” e mais as bases para a participación dos centros educativos nos diferentes programas que se van desenvolver neste curso 2023-2024. Ao abeiro do Plan Proxecta+ organizaranse os seguintes programas relacionados directamente coa promoción do idioma galego: Nós tamén creamos!; Proxectos de innovación educativa en dinamización lingüística; Fitofaladoiro; Proxecto didáctico Antón Fraguas; Lingua, patrimonio e coñecemento tradicional; Cóntame un conto.
Os centros educativos teñen de prazo para presentar as súas solicitudes ata o 29 de setembro de 2023.

Para obter máis información, preme aquí.
20/09/2023. EMPREGO

Praza de profesor/a lector/a na Universidade de Salamanca

A Universidade de Salamanca convoca o concurso público para a provisión dunha praza de profesor/a lector/a de lingua, literatura e cultura galegas (contrato temporal en réxime laboral). Os aspirantes deben estar en posesión do título de licenciatura en Filoloxía Galega ou en Filoloxía Románica; ou dalgún dos seguintes graos: Lingua e Literatura Galegas; Estudos de Galego e Español; Ciencias da Linguaxe e Estudos Literarios; Filoloxía Aplicada Galega e Española; Galego e Portugués: Estudos Lingüísticos e Literarios. A idade máxima dos aspirantes non debe superar os 35 anos na data de remate do prazo de presentación de solicitudes, que é o 20 de setembro de 2023.

Para consultar as bases completas da convocatoria, preme aquí.
20/09/2023. DINAMIZACIóN

Aberto o prazo de inscrición no certame “Nós tamén creamos! 2023/2024”

A Secretaría Xeral de Política Lingüística da Xunta de Galicia, coa colaboración da CRTVG e Oqo Editora, convoca unha nova edición do certame Nós tamén creamos!, que promove a elaboración de curtametraxes en galego coa técnica de stop motion a partir dun álbum ilustrado. O obxectivo da iniciativa é fomentar a creatividade no noso idioma e o uso das TIC entre o alumnado de educación infantil e primaria.
O prazo de inscrición para participar no certame remata o 29 de setembro de 2023.

Podes obter máis información premendo aquí.
19/09/2023. OUTRAS

Día histórico para o galego no Congreso dos deputados

Hoxe, 19 de setembro de 2023, quedará sinalado coma un día histórico no proceso de normalización do idioma galego, sobre todo no que respecta ao seu uso no ámbito institucional. Por primeira vez o galego, o catalán e o éuscaro puideron ser empregados con total liberdade, en igualdade co castelán, no Congreso dos deputados. Aconteceu xustamente na sesión de toma en consideración da Proposición de reforma do regulamento do Congreso, que recolle, entre outras cuestións, que “os deputados e as deputadas terán o dereito de usar en todos os ámbitos da actividade parlamentaria, incluídas as intervencións orais e a presentación de escritos, calquera das linguas que teñan carácter oficial nalgunha comunidade autónoma de acordo coa Constitución e o correspondente Estatuto de Autonomía».

A citada Proposición foi tomada en consideración na sesión de hoxe por 176 votos a favor, 169 en contra e 2 abstencións. Así mesmo, acordouse, tamén coa maioría dos votos a favor, que será tramitada en lectura única no pleno do Congreso dos deputados do vindeiro xoves, 21 de setembro.

Para consultar o texto da Proposición, preme aquí.

Para consultar o resultado concreto das votacións (tanto da toma en consideración da proposición, coma do acordo de tramitación directa e en lectura única), preme aquí.

Se o precisas, na páxina web do Congreso dos deputados tes máis información sobre esta iniciativa.
19/09/2023. CURSOS E CONGRESOS

En liña o programa dos XXV Encontros para a Normalización Lingüística

Neste 2023 no que estamos a festexar o 40 aniversario do Consello da Cultura Galega, no CDSG presentamos o programa dos XXV Encontros para a Normalización Lingüística, unha iniciativia que se foi convertendo ao longo do tempo nunha das nosas marcas de identidade. Nesta vixésimo quinta edición imos poñer o foco no ámbito socioeconómico, polo que debateremos sobe o uso do idioma galego no eido empresarial como sinal de calidade, proximidade e sustentabilidade; ao tempo que falaremos dos dereitos dos usuarios/as e os consumidores/as, así como das diferentes canles que existen para facelos efectivos.

As sesións presenciais terán lugar o vindeiro 17 de outubro na sede do Consello da Cultura Galega, en Santiago de Compostela. A matrícula é gratuíta e as prazas cubriranse por rigorosa orde de inscrición.

Nos vindeiros días difundiremos unha serie de pílulas audiovisuais cunha breve presentación dos contidos, elaboradas por Café Derby 21 e A Lobeira Today.
15/09/2023. CURSOS E CONGRESOS

A Universidade de Vigo organiza unha xornada sobre os videoxogos en galego

Hoxe, 15 de setembro, terá lugar na Universidade de Vigo a xornada “Voute preservar, miñoca!”, que ten como obxectivo poñer de relevo a importancia do uso do galego nos videoxogos, un ámbito de especial importancia para intervir nos usos lingüísticos da xente moza. As sesións desenvolveranse ao longo de toda a xornada no edificio Redeiras, na praza do Berbés, e están abertas a todas as persoas interesadas.

Podes consultar o programa completo premendo aquí. No Diario da Universidade de Vigo tamén podes obter máis información sobre esta iniciativa.
13/09/2023. DINAMIZACIóN

O Concello de Mos organiza un ciclo de cine en galego

O Concello de Mos, coa colaboración da Deputación de Pontevedra, organiza un ciclo de cine en galego no que se proxectarán tres exitosos e galardoados filmes, a través do proxecto “cinenarua.com”. O vindeiro 23 de setembro proxectarase “As bestas”; o 21 de outubro “O corpo aberto” e o ciclo pecharase o 18 de novembro con “Matria”. Todas as proxeccións terán lugar no Centro Dotacional do Troncoso, ás 21:30 h.

Podes ampliar información premendo aquí.
13/09/2023. DINAMIZACIóN

Orgullo da nosa lingua: a mostra itinerante que xa está percorrendo concellos galegos

Arteixo, Ribeira, Marín e Redondela son os primeiros destinos onde poderá verse a exposición Orgullo da nosa lingua: o galego é un tesouro para compartir.

Consta de 9 paneis, con materiais complementarios aos que se accede a través de códigos QR. O propósito da Secretaría Xeral de Política Lingüística, que é a que a organiza, consiste en mostrar a riqueza do galego, alimentar o sentimento de pertenza e convidar a cidadanía a falalo.

Existen dúas modalidades de visita, con ou sen guía. Para coñecer as datas e horarios concretos en cada localidade, preme aquí.
11/09/2023. AXUDAS E PREMIOS

Resólvense os Premios Bacelos de Prata 2023

A Asociación Álvaro das Casas fixo públicos os galardoados da décimo quinta edición dos Premios Bacelos de Prata, que teñen como obxectivo recoñecer o labor de empresas que apostan polo galego como marca de calidade na etiquetaxe dos seus produtos. As entidades galardoadas nesta edición de 2023 son a Adega Tapias Mariñán, da denominación de orixe Monterrei; e a sociedade de gandeiros galegos Leite Noso, comercializadora de marcas como Deleite ou Muuu.

Podes consultar a acta do xurado premendo aquí.

O acto de entrega dos premios terá lugar o 7 de outubro de 2023, no Pazo dos Ulloa (Esposende, Ribadavia).
08/09/2023. INVESTIGACIóN

Vocabulario panlatino do rugby

Coincidindo co comezo en Francia da Copa do Mundo de Rugby, o Servizo de Normalización Lingüística (SNL) da Universidade de Santiago convídanos a consultar o Vocabulario panlatino do rugby – linguas romances e éuscaro, unha nova obra lexicográfica na que o SNL colabora ofrecendo as correspondencias léxicas en lingua galega.
O vocabulario está editado pola Delegación xeral para a lingua francesa e as linguas de Francia, en colaboración coa Rede panlatina de terminoloxía (Realiter), e nel atoparás máis de 200 termos relacionado co rugby: regras, técnicas de xogo, faltas, sancións, posicións dos xogadores, equipamento etc.
07/09/2023. OUTRAS

A Semente presenta un documental conmemorativo do centenario da creación das Escolas de Ensino Galego

Neste ano 2023 no que se cumpren cen anos da creación das "Escolas do Insiño Galego" (proxecto educativo impulsado en 1923 na Coruña por ilustres integrantes das Irmandades da Fala), a rede de escolas de ensino galego Semente presenta o documental “Aprender na língua própia. Das Escolas de Ensino Galego á Semente”, producido por Aqueladas S. Cooperativa e cofinanciado pola Deputación da Coruña. A estrea tivo lugar onte, 6 de setembro de 2023, na sede da Agrupación Cultural Alexandre Bóveda e durante o mes de setembro proxectarase tamén noutras salas. Na páxina de Facebook da Semente tes toda a información sobre os lugares, datas e horarios das proxeccións.

Podes ver un pequeno adianto do documental premendo aquí.
06/09/2023. AXUDAS E PREMIOS

Bernardo Penabade, Premio Meendinho 2023

O vindeiro sábado, 9 de setembro, terá lugar o acto público de entrega do Premio Meendinho 2023, un galardón que outorga anualmente a Fundaçom Meendinho a persoas e entidades que destacan no eido da dinamización cultural e lingüística, tendo en conta a dimensión internacional do idioma galego. O homenaxeado nesta décimo cuarta edición é Bernardo Penabade Rei, docente no IES Perdouro de Burela. Entre os moitos méritos que o fan merecente do galardón, a Fundaçom Meendinho destaca o seu traballo no eido do reintegracionismo e tamén o feito de ter sido un dos principais impulsores do Modelo Burela, un proxecto de intervención educativa e sociolingüística que botou a andar en 2003 e que recolleu xa múltiples recoñecementos e galardóns.

O acto terá lugar a partir das 12:00 h na sala “A Arca da Noe”, en Vilar de Santos.

No xornal Cronica3 A Mariña atoparás máis información sobre a iniciativa, así como un perfil biográfico do homenaxeado.
05/09/2023. OUTRAS

SeamlessM4T, o novo modelo de tradución de Meta, inclúe o galego

A empresa Meta acaba de presentar o seu no novo modelo de tradución mediante IA multilingüe e multimodal, SeamlessM4T, que permitirá que as persoas se comuniquen a través de voz e texto en diferentes idiomas, entre eles o galego. O obxectivo de Meta é empregar este sistema para mellorar a tradución e transcrición de contido en diferentes redes sociais (Facebook, Instagram, Messenger, WhatsApp e Threads).

Podes ver unha demostración do sistema SeamlessM4T premendo aquí.

Nesta nova de Código Cero tamén podes obter máis detalles sobre a iniciativa.
04/09/2023. OUTRAS

Probas para a obtención dos certificados Celga

A Secretaría Xeral de Política Lingüística da Xunta de Galicia convoca probas para a obtención dos certificados de lingua galega, dos niveis Celga 2, 3 e 4. Poderán presentarse todas as persoas maiores de dezaseis anos ou que os fagan no ano natural da convocatoria, nacionais ou estranxeiras. As probas realizaranse en Santiago de Compostela e en Ponferrada na segunda quincena de novembro e, de ser o caso, na primeira quincena de decembro de 2023. As datas concretas publicaranse no Diario Oficial de Galicia, así como na páxina web da Secretaría Xeral de Política Lingüística.

O prazo de presentación de solicitudes é de quince días hábiles, contados a partir do seguinte ao da publicación da convocatoria.
01/09/2023. OUTRAS

“O corno”, primeiro filme en galego que opta á Cuncha de Ouro no Festival de San Sebastián

A 71 edición do Festival de Cine de San Sebastián terá lugar entre os días 22 e 30 de setembro de 2023 e por primeira vez un filme en lingua galega ten presenza na súa Sección Oficial, optando á Cuncha de Ouro deste prestixioso festival internacional. Trátase da longametraxe O corno, dirixida pola cineasta Jaione Camborda, que está ambientada na Illa de Arousa en 1971 e conta a historia de María, unha muller que traballa como mariscadora pero tamén é coñecida polo seu labor de parteira.

A película poderá verse nas salas de cine no vindeiro outono.
01/09/2023. CURSOS E CONGRESOS

Obradoiros de acollemento lingüístico en Santiago de Compostela

O Departamento de Lingua Galega do Concello de Santiago de Compostela organiza dous obradoiros de acollemento lingüístico (nivel iniciación e nivel continuación), dirixidos a persoas doutras comunidades lingüísticas. O obradoiro de “iniciación” está deseñado para persoas que se achegan por primeira vez ao galego e o de “continuación” para aquelas que xa teñen uns coñecementos básicos e desexan continuar a súa formación.
A inscrición é gratuíta e o prazo para realizala remata o 15 de setembro de 2023.

Tes toda a información sobre os horarios das sesións e mais os trámites de inscrición na páxina web do Departamento de Lingua Galega do Concello de Santiago.
01/09/2023. AXUDAS E PREMIOS

V Premio Daniel Domínguez de Guión en Galego para Longametraxe

A Asociación Sindical de Guionistas Galegos (AGAG) convoca a quinta edición deste premio deseñado para potenciar a lingua galega no audiovisual e promover os autores e autoras que escriben no noso idioma. Os guións presentados deberán estar escritos en lingua galega, ser orixinais e inéditos, e estar elaborados para longametraxes de ficción. O/a autor/a do guión gañador recibirá un premio cunha dotación económica de 2.000 euros.
O prazo de presentación dos traballos remata o 1 de novembro de 2023.

Podes obter máis información premendo aquí.
01/09/2023. AXUDAS E PREMIOS

Axudas á investigación en galego na Universidade de Vigo

A Universidade de Vigo publica unha convocatoria de axudas, dirixidas ao seu alumnado, para incentivar o uso do galego nas teses de doutoramento, nos traballos de fin de grao e nos traballos de fin de mestrado universitario oficial, así como para premiar a calidade lingüística nestes traballos de investigación. As persoas interesadas en redactaren e defenderen a tese de doutoramento, TFG ou TFM oficial en lingua galega contan co apoio lingüístico e asesoramento da Área de Normalización Lingüística da UVigo.
O prazo de presentación das solicitudes para optar a estas axudas remata o 15 de setembro de 2023.

Para consultar o texto completo da convocatoria, preme aquí. Tamén podes obter máis información sobre esta iniciativa no Diario da Universidade de Vigo.
31/08/2023. AXUDAS E PREMIOS

Agadic convoca novas axudas para o audiovisual galego

A Axencia Galega das Industrias Culturais (Agadic) convoca unha liña de axudas para o desenvolvemento de proxectos audiovisuais galegos para o ano 2023, na que estarían incluídos aqueles en versión orixinal en lingua galega. En concreto, serán subvencionables: Proxectos de longametraxe cinematográfica previstos para ter unha duración mínima de 60 minutos, de ficción, animación ou documental de carácter creativo; Proxectos de series de ficción previstos para ter unha duración total mínima de 150 minutos; Proxectos de series de animación previstos para ter unha duración total mínima de 100 minutos; e Proxectos de series documentais previstos para ter unha duración total mínima de 100 minutos.
Entre os requisitos esixidos sinálase que os proxectos deben ter como versión orixinal calquera das linguas oficiais en España. No caso das coproducións con empresas estranxeiras, a longametraxe poderá ter como versión orixinal algunha das linguas oficiais da Unión Europea.

O prazo de presentación de solicitudes remata o 11 de setembro de 2023.

No DOG do 9 de agosto podes consultar o texto completo da convocatoria.
[modificación das bases no DOG do 1 de setembro]
31/08/2023. AXUDAS E PREMIOS

Resolución das axudas para a edición en galego de recursos didácticos

A Consellería de Cultura, Educación, Formación Profesional e Universidades publica a resolución da convocatoria para o ano 2023 de subvencións destinadas á edición en lingua galega de recursos didácticos curriculares e complementarios para os niveis non universitarios.

Podes consultar a listaxe de entidades beneficiarias premendo aquí.

30/08/2023. CURSOS E CONGRESOS

O SNL da Mancomunidade de Ordes oferta un curso de preparación das probas Celga

O Servizo de Normalización Lingüística da Mancomunidade de Ordes anuncia a convocatoria dun curso de galego deseñado para preparar as probas CELGA, de 40 horas de duración. As sesións terán lugar os luns e mércores, de 10:00 a 12:30 h, desde o 20 de setembro ao 15 de novembro de 2023. As persoas interesadas teñen de prazo para inscribirse ata o 15 de setembro de 2023.

A maiores, entre o 11 de xaneiro e o 14 de marzo de 2024 está prevista tamén a organización dun curso básico de lingua galega, de 20 horas de duración.

Para obter máis información debes poñerte en contacto co SNL da Mancomunidade de Ordes, a través do teléfono 981680002 (ext. 120) ou do enderezo electrónico irene.bravo@mancomunidadeordes.gal.