Novas da lingua

Rexistros1351 a 1380 de 5153
  1. Inicio
  2. CDSG-CCG
  3. Novas da lingua
29/06/2022. AXUDAS E PREMIOS

A USC premia o traballo de Xosé Manuel Beiras a prol do galego

O xurado do V Premio Luis Porteiro Garea acordou por unanimidade outorgar este galardón a Xosé Manuel Beiras Torrado (catedrático de Estrutura Económica da USC, actualmente xubilado), polo "seu papel activo a prol da lingua galega" tanto nas súas facetas de docente e investigador, coma na de xestor académico durante as súas etapas como director de departamento e decano da Facultade de Ciencias Económicas e Empresariais.
O premio Luis Porteiro Garea, que leva o nome do profesor de dereito civil e membro das Irmandades da Fala que en 1915 pronunciou a primeira lección en galego na USC, ten como finalidade recoñecer o traballo de persoas, entidades ou colectivos que traballan, ou traballaron, a prol do galego na universidade. No Xornal da USC atoparás máis información sobre esta iniciativa.


29/06/2022. AXUDAS E PREMIOS

Resólvense as axudas para o fomento do galego no ensino

A Consellería de Cultura, Educación, Formación Profesional e Universidades publica as resolucións das convocatorias de subvencións para proxectos de fomento do galego, correspondentes ao curso escolar 2021/2022, dos centros de ensino non universitario tanto de titularidade pública como privada.

Podes consultar as listaxes de centros beneficiarios nas seguintes ligazóns:
-Centros de ensino non universitario de titularidade pública.
-Centros de ensino non universitario de titularidade privada.
28/06/2022. EMPREGO

Convocatoria de prazas e bolsas de formación en diferentes centros de estudos galegos

A Consellería de Cultura, Educación, Formación Profesional e Universidades publica dúas convocatorias públicas para cubrir seis bolsas de formación nos lectorados de lingua, literatura e cultura galegas das universidades do Algarve, Berlín, Padua, Río de Janeiro, Roma e Zadar; así como cinco prazas nos lectorados das universidades de Heidelberg, Kiel, Miño, Varsovia e País Vasco. En ambas as dúas convocatorias, o prazo de presentación de solicitudes é dun mes, contado a partir do día seguinte ao da súa publicación.
28/06/2022. AXUDAS E PREMIOS

A Deputación de Pontevedra publica as axudas concedidas para a promoción do galego

A Deputación de Pontevedra publica, no BOP do 28 de xuño de 2022, a resolución das axudas concedidas polo departamento de Servizos Lingüísticos durante o primeiro semestre do ano. A resolución inclúe unha subvención á Universidade de Vigo para a elaboración dun proxecto sociolingüístico e mais as axudas aos concellos da provincia para a creación e mantemento de servizos de normalización lingüística, ou para o desenvolvemento de actividades de dinamización e promoción do idioma galego. Podes consultar a listaxe de entidades beneficiarias premendo aquí.
28/06/2022. OUTRAS

A Universidade de Vigo publica unha guía para mellorar o uso do galego

A Área de Normalización Lingüística (ANL) da Universidade de Vigo suma un novo título á súa colección de materiais didácticos dirixidos a mellorar a competencia lingüística da comunidade universitaria. Nesta nova obra, que se presenta baixo o título Breve guía para mellorarmos o uso do galego, compílanse os erros máis frecuentes atopados nos textos que as técnicas da ANL revisan no seu traballo diario. A guía estrutúrase en tres apartados: un dedicado a cuestións ortográficas e gramaticais, outro dedicado a erros de redacción e estilo, e un terceiro no que se ofrece unha relación de termos e expresións incorrectas, xunto coa opción correcta en galego. Podes ampliar información premendo aquí.
28/06/2022. INVESTIGACIóN

Preséntase na Coruña a obra Lingua, poder e adolescencia

O vindeiro xoves 30 de xuño, ás 20:30 h, presentarase na libraría Sisargas da Coruña a obra Lingua, poder e adolescencia, autoría de Miguel Rodríguez Carnota. A obra, que parte dunha tese doutoral previa do mesmo autor, ofrece un estudo en profundidade, a través de técnicas de análise do discurso, da biografía lingüística de dez rapazas e rapaces galegofalantes, así como das dificultades que afrontan no seu día a día no ámbito educativo para facer do galego unha lingua normal.

27/06/2022. OUTRAS

Tripadvisor premia un proxecto de promoción turística en galego

Guido Álvarez foi premiado pola plataforma Tripadvisor co Traveller's Choice, un recoñecemento que reciben anualmente o 10% dos negocios con mellores críticas dos seus usuarios e usuarias.

Este guía turístico, que desenvolve o seu traballo en Lugo, emprega como idioma profesional o galego, tanto para o turismo de proximidade coma para o exterior, uníndoo á experiencia cultural e creando espazos de comunicación en lingua galega.

Na entrevista que lle realizan na web Neofalantes podes coñecer a iniciativa un pouco mellor.
22/06/2022. LEXISLACIóN

En 2021, a Valedora do Pobo recibiu 261 queixas sobre dereitos lingüísticos

A Valedora do Pobo vén de presentar o Informe Anual 2021, no que as queixas relacionadas coa lingua galega e os dereitos lingüísticos aumentan de forma considerable e ocupan o quinto lugar entre as reclamacións presentadas pola cidadanía.

Son un total de 261, das que un 17% foron remitidas ao Defensor del Pueblo por afectar á Administración do Estado. Supoñen case o triple das presentadas en 2020 (96 queixas) e cinco veces máis ca en 2019. Podes acceder a toda a serie nesta ligazón.
22/06/2022. OUTRAS

O catálogo completo das publicacións da Real Academia Galega accesible en aberto

Incorpóranse ao catálogo en liña as edicións orixinais de discursos de ingreso, epistolarios, estudos significativos, revistas, folletos e dicionarios entre os que se inclúe o Diccionario gallego-castellano que a RAG publicou en fascículos entre 1913 e 1928.

Deste xeito, súmanse ao fondo un total de 177 volumes, 37000 páxinas, dixitalizados para a súa preservación e difusión en colaboración con Galiciana-Patrimono Dixital de Galicia. Xa podes consultalas na sección de publicacións da Real Academia Galega.
21/06/2022. OUTRAS

O Álbum de Galicia incorpora a biografía de Sabino Torres

Desde hoxe xa podes consultar no Álbum de Galicia a biobibliografía de Sabino Torres (Pontevedra, 1924 - Madrid, 2016): escritor, editor e dinamizador de proxectos culturais en lingua galega. Ademais da súa valía como narrador e poeta, Sabino Torres é recoñecido especialmente por protagonizar (xunto con Emilio Álvarez Negreira e Manuel Cuña Novás) un dos grandes fitos da edición en galego: a creación durante a ditadura franquista, na primavera de 1949, dunha colección de poesía bilingüe (en galego e castelán) chamada Benito Soto. O texto biobibliográfico está asinado por Ana Acuña e presentámolo acompañado por outros recursos documentais (galería fotográfica, documentos de interese, vídeos, recursos en liña...), que permiten achegarse desde diferentes ópticas aos traballos e os días do poeta e editor pontevedrés.
21/06/2022. DINAMIZACIóN

Recollida de herbas de san Xoán en Vigo

Ao abeiro do seu programa de celebración das festas cíclicas, o Servizo de Normalización Lingüística do Concello de Vigo organiza unha recollida de herbas de san Xoán, que terá lugar o vindeiro 23 de xuño de 2022 no torreiro de Matamá (fronte ao CEIP Josefa Alonso). A actividade comezará cunha charla didáctica e divulgativa ás 17:30 h e a continuación realizarase un percorrido dunhas dúas horas de duración, que rematará cunha exposición de herbas do cacho. Tal e como require a data, a actividade pecharase coa celebración dunha cacharela con sardiñada. Na páxina web do SNL de Vigo podes ampliar información.
20/06/2022. EMPREGO

Praza de técnico/a de normalización lingüística no Concello de Val do Dubra

O Concello de Val do Dubra publica, no BOP do 20 de xuño de 2022, as bases da convocatoria para a provisión, en réxime de interinidade, dunha praza de técnico/a de normalización lingüística e apoio á secretaría. O sistema de selección é o de oposición libre. Os/as aspirantes deben estar en posesión da licenciatura en Filoloxía Galego-Portuguesa, Filoloxía Galega ou Filoloxía Hispánica (subsección Galego-Portugués), grao en Lingua Galega, ou titulado en calquera outra licenciatura/grao pertencentes á área de Humanidades ou de Ciencias Xurídicas e Sociais, sempre que se dispoña do Celga 5. O prazo de presentación de instancias para participar no proceso selectivo é de 8 días hábiles, contados a partir do seguinte ao da publicación do anuncio da convocatoria no BOP.
17/06/2022. INVESTIGACIóN

Análise da represión lingüística en Galicia durante os séculos XVI ao XX

A editorial Xerais acaba de tirar do prelo a obra O libro negro da lingua galega, autoría de Carlos Callón. O estudo recolle a analiza os testemuños da represión lingüística en Galicia durante os últimos séculos, concretamente no período comprendido entre 1543 e 1980. Nesta reportaxe de Nós Televisión podes ver as valoracións sobre esta publicación do propio autor, Carlos Callón; do director de Xerais, Fran Alonso; e mais do presidente da Mesa pola Normalización Lingüística, Marcos Maceiras.
16/06/2022.

Seguridade A1, recoñecida no Día da Galeguidade Empresarial

O Foro Enrique Peinador conmemorou, un ano máis, o Día da Galeguidade Empresarial. En 2022, os seus membros distinguiron a empresa Seguridade A1 polo seu comprometido uso da lingua galega e a vinculación do galego ao éxito desta entidade no ámbito socioeconómico.
16/06/2022. DINAMIZACIóN

A Real Academia Galega acorda co Senado asinar un convenio de colaboración para difundir a lingua galega

Ander Gil, presidente do Senado, visitou o 13 de xuño a sede da Real Academia Galega. Neste encontro, ambas as institucións comunicaron que traballan nun convenio de colaboración similar ao que o Senado asinou coa Real Academia Vasca e en breve co Institut d'Estudis Cataláns. O obxectivo que se persegue é a "promoción da lingua e da cultura galegas como parte do patrimonio común do Estado". Tes máis información sobre este acordo na páxina web da RAG.
16/06/2022. OUTRAS

O colectivo cultural Fala Ceibe do Bierzo presenta as súas propostas lingüísticas para o galego

Durante a celebración na Coruña do encontro Medra a lingua, Fala Ceibe deu a coñecer as demandas que desde os territorios do Eonavia, O Bierzo e alta Seabra semellan urxentes para enfrontar o afastamento que padecen os falantes do galego estremeiro.

Ademais de análises e reclamacións, fanse propostas que abranguen o ámbito lexislativo, o ensino ou o turismo. Consulta o documento completo no seu blog.
15/06/2022. OUTRAS

Recursos multimedia para divulgar terminoloxía básica

A Área de Terminoloxía do Servizo de Normalización Lingüística da USC presenta unha compilación de recursos multimedia que no seu día foron difundidos de xeito individual nas redes sociais e que agora, para facilitar a súa localización, tamén podes atopar xuntos nunha mesma páxina web. Trátase dunha serie de imaxes interactivas (enriquecidas con textos, vídeos e ligazóns a outros contidos dixitais) para divulgar terminoloxía básica de diferentes áreas temáticas; así como das presentacións que o SNL elabora mensualmente para divulgar nas redes os especiais temáticos de Proxector.
15/06/2022. CURSOS E CONGRESOS

Curso de verán "Tecnoloxías da linguaxe: as linguas na sociedade e na economía dixitais"

O Centro Singular de Investigación en Tecnoloxías Intelixentes (CiTIUS) e o Instituto da Lingua Galega da Universidade de Santiago de Compostela organizan un curso de verán que ten como obxectivo divulgar as múltiples posibilidades que ofrecen as tecnoloxías da linguaxe para a creación de aplicacións e servizos de uso cotián baseados nas linguas. As sesións terán lugar entre o 12 e o 15 de xullo de 2022, na sede da Escola Técnica Superior de Enxeñaría da USC, en Santiago de Compostela. O prazo de matrícula estará aberto ata o 1 de xullo. Para coñecer o programa completo do curso ou obter máis información sobre a iniciativa, preme aquí.
15/06/2022. EMPREGO

Praza de tradutor/a de lingua galega na Deputación de Ourense

A Deputación de Ourense publica, no BOP do 13 de xuño de 2022, as bases da convocatoria para a provisión en propiedade dunha praza de tradutor/a de lingua galega (A1). O sistema de selección é o de oposición libre. Os/as aspirantes deben estar en posesión do título universitario de grao en Ciencias da Linguaxe e Estudos Literarios (galego e español), estudos de galego e español, de galego e portugués: estudos lingüísticos e literarios, lingua e literatura galegas, tradución e interpretación ou equivalentes ou calquera outro título oficial universitario nivel 3 do marco español de cualificacións para a educación superior (nivel 7 do marco europeo de cualificacións) en calquera rama do coñecemento. O prazo de inscrición é de 20 días naturais, contados a partir da publicación do anuncio no BOE.
10/06/2022. DINAMIZACIóN

III Festa do Apego no Concello de Ames

O Servizo de Normalización Lingüística do Concello de Ames organiza a terceira edición da súa Festa do Apego, unha actividade lúdica, dirixida ao público infantil e ás súas familias, que ten como obxectivo fomentar a transmisión interxeracional da lingua e crear novos espazos de uso para o galego no ámbito do lecer. O programa inclúe música, contos, mostras de recursos lúdico-educativos e xogos. O encontro terá lugar o sábado 18 de xuño no Pazo da Peregrina (Bertamiráns). O prazo de inscrición está aberto ata o 16 de xuño. Podes obter máis información sobre esta iniciativa, así como sobre os trámites de inscrición, premendo aquí.
10/06/2022. AXUDAS E PREMIOS

II Premio TikTok do Concello de Oleiros

O Servizo de Normalización Lingüística do Concello de Oleiros convoca a segunda edición do Premio TikTok, para estimular a creatividade entre a mocidade, fomentar a creación de contidos audiovisuais en galego e contribuír á creación dunha comunidade galega en TikTok. O certame está dirixido a todos os rapaces e rapazas da ESO e bacharelato escolarizados/as no Concello de Oleiros. Os vídeos deben ser de creación propia, estar realizados a través da aplicación TikTok e ter unha temática relacionada coa literatura galega, a lingua ou a situación sociolingüística. A duración de cada peza non debe superar 1 minuto de duración. Outorgaranse dous premios tecnolóxicos en cada unha das tres categorías (establecidas segundo o curso ao que pertenza o/a alumno/a). O prazo de inscrición será de 20 días naturais, contados a partir do día seguinte á publicación das bases no Boletín Oficial da Provincia da Coruña.

09/06/2022. AXUDAS E PREMIOS

Convócanse os Premios da Cultura Galega

A Consellería de Cultura, Educación, Formación Profesional e Universidades convoca os Premios da Cultura Galega para o ano 2002, nas seguintes modalidades: Letras, Artes Visuais, Artes Escénicas, Música, Lingua, Patrimonio Cultural e Proxección Exterior. Concretamente, o premio da modalidade de Lingua está dirixido a persoas, colectivos ou entidades de ampla traxectoria no ámbito da promoción da lingua galega. As candidaturas só poderán ser presentadas por institucións e entidades culturais ou profesionais, públicas ou privadas, relacionadas co obxecto de cada premio, sen que os candidatos se poidan postular a si mesmos. O prazo de presentación de candidaturas será de dous meses, contados desde o día seguinte ao da publicación da convocatoria no Diario Oficial de Galicia.
09/06/2022. LEXISLACIóN

O Concello de Valdoviño xa ten ordenanza de normalización lingüística

O Concello de Valdoviño publica, no BOP do 9 de xuño de 2022, a súa ordenanza municipal de uso social da lingua galega, que regula os usos lingüísticos polos que debe rexerse o concello, así coma as empresas adxudicatarias, concesionarias ou contratadas cando actúen en función desa adxudicación, concesión ou contrato, e tamén as de explotación mixta. No Kit para a normalización en rede podes consultar a listaxe completa de ordenanzas e regulamentos lingüísticos en vigor na Administración local galega.
09/06/2022. DINAMIZACIóN

Comeza unha nova edición da campaña Toponimízate

A Real Academia Galega e a Secretaría Xeral de Política Lingüística da Xunta de Galicia presentan a quinta edición da campaña Toponimízate. Falámosche dos nomes da túa terra, deseñada co obxectivo de preservar e divulgar o patrimonio toponímico galego. A principal acción da campaña consiste na organización de charlas divulgativas, que nesta edición terán lugar en 17 concellos galegos onde a microtoponimia está en especial risco de desaparición. Así mesmo, os/as asistentes a estas charlas terán a ocasión de familiarizarse coa plataforma colaborativa Galicia Nomeada, grazas á cal foi posible recuperar máis de 43000 microtopónimos desde o seu lanzamento público, a finais do 2019. Para ampliar información, preme aquí.
08/06/2022. DINAMIZACIóN

XIII Certame de Cine OUFF Escola

O Concello de Ourense, en colaboración coa Secretaría Xeral de Política Lingüística, convoca a décimo terceira edición do Certame Ouff Escola, que ten como obxectivos impulsar o uso do idioma galego entre a mocidade, fomentar a creatividade audiovisual e promover o traballo en equipo. Poderán participar centros educativos públicos e privados de ensino non universitario de Galicia, así como aqueles de fóra de Galicia que teñan materias en lingua galega. Os/as participantes deben elaborar obras audiovisuais en lingua galega de ata 20 minutos de duración. O prazo de inscrición remata o 8 de xullo de 2022. Para consultar as bases completas, preme aquí.
08/06/2022. DINAMIZACIóN

O Concello de Caldas de Reis presenta a campaña "Eu merco en galego"

Caldas de Reis pon en marcha a campaña de dinamización lingüística "Eu merco en galego", orientada a premiar o uso da lingua galega e a impulsar a súa presenza no sector económico municipal.

A proposta consta de dúas accións que se van desenvolver paralelamente. Por unha parte, entre o 10 e o 30 de xuño, "Falo e gaño co galego", na que se distribuirán materiais promocionais polo comercio e a pequena empresa, así como premios entre a clientela que empregue a lingua galega nas súas compras. Pola outra, "Sacamos o sombreiro ao galego", unha instalación na rúa que permanecerá todo o verán e suporá pendurar 1400 sombreiros con lemas nas vías comerciais polas que transcorre o Camiño de Santiago.
07/06/2022. AXUDAS E PREMIOS

Os III Premios Mil Primaveras entregaranse en Pontevedra

A Coordinadora de Traballadores/as de Normalización da Lingua organiza un acto público de entrega dos III Premios Mil Primaveras, que será conducido pola narradora María da Pontragha e terá lugar o vindeiro 11 de xuño de 2022 ás 11:30 horas na Igrexa do Convento de Santa Clara de Pontevedra. Estes premios teñen como obxectivo a difusión e posta en valor de proxectos que, polo súa calidade, poidan servir de modelo de boas prácticas no ámbito da normalización lingüística. Para ampliar información preme aquí.
07/06/2022. CURSOS E CONGRESOS

Cursos de linguaxe administrativa galega para o persoal da seguridade pública

A Academia Galega de Seguridade Pública convoca un curso superior e dous cursos medios de linguaxe administrativa galega, dirixidos a policías locais de Galicia e demais persoal da seguridade pública que traballa nesta Comunidade Autónoma (Garda Civil, Policía Nacional e Unidade da Policía Autonómica). O prazo de presentación de solicitudes remata o 23 de xuño de 2022. Para consultar o texto completo da convocatoria, preme aquí.
07/06/2022. AXUDAS E PREMIOS

A Fundación Lois Peña Novo premia o traballo de Rodrigo Romaní, María Luisa Castro e Nova Escola Galega

O xurado dos Premios Lois Peña Novo fixo públicos os/as galardoados/as da edición de 2022, en recoñecemento ao seu traballo de normalización do galego no eido das administracións públicas e da vida institucional de Galicia. Nesta edición os/as premiados/as son o músico Rodrigo Romaní, a doutora en bioloxía María Luisa Castro e a asociación Nova Escola Galega. O acto público de entrega dos galardóns terá lugar o vindeiro 30 de xuño en Soutomaior.
07/06/2022. INVESTIGACIóN

Ideas para un plurilingüismo dende o galego

Preséntase Ideas para un plurilingüismo dende o galego no Concello de Ames, un traballo realizado polo Seminario de Sociolingüística da Real Academia Galega, María López-Sandez e Bieito Silva, coa colaboración da Secretaría Xeral de Política Lingüística.

Este manual xorde como resposta a demandas realizadas polo profesorado dos centros educativos amesáns durante o proceso de elaboración do Mapa sociolingüístico escolar de Ames. Recolle diagnoses, información sobre o plurilingüismo no mundo e orientacións para traballar nas aulas co galego como eixe vertebrador da diversidade lingüística.