Novas da lingua

Rexistros151 a 180 de 5273
  1. Inicio
  2. CDSG-CCG
  3. Novas da lingua
06/10/2025. OUTRAS

A Universidade de Vigo promove unha mostra sobre os videoxogos en galego

Durante os vindeiros meses poderase visitar en diferentes institutos de educación secundaria da provincia de Pontevedra a exposición “O videoxogo en galego”, un proxecto promovido pola Universidade de Vigo para darlle visibilidade aos videoxogos desenvolvidos orixinalmente ou traducidos ao galego, así como para reivindicar a importancia desta industria cultural para a normalización do noso idioma.

A mostra inclúe pezas expositivas en formato físico e dixital, materiais informativos e un catálogo divulgativo. De xeito complementario, desenvolveranse tamén obradoiros e charlas co alumnado.

No Diario da Universidade de Vigo podes ampliar información sobre esta iniciativa.
06/10/2025. CURSOS E CONGRESOS

Obradoiro de deseño e presentación de proxectos de normalización lingüística

A Coordinadora de Traballadores/as de Normalización da Lingua organiza o Obradoiro de deseño e presentación de proxectos de normalización lingüística “Da idea á forma”, unha nova actividade formativa na que poderás adquirir as competencias necesarias para deseñar accións concretas e executables, dirixidas a incidir no futuro do uso e do prestixio da lingua galega.

O obradoiro será impartido por Nel Vidal Barral, docente e impulsor de diferentes proxectos de normalización lingüística, e as sesións presenciais terán lugar os días 7 e 13 de novembro de 2025, de 16:30 h a 20:30 h, na Facultade de Filoloxía da USC.
A inscrición estará aberta ata o 26 de outubro.

Na páxina web da CTNL tes toda a información sobre os contidos e mais os trámites de inscrición.
06/10/2025. DINAMIZACIóN

Chega unha nova edición do LGx15

A Coordinadora de Traballadores/as de Normalización da Lingua presenta a nova edición do LGx15, un proxecto pensado para difundir, a través de charlas breves e amenas, argumentos e experiencias inspiradoras para o futuro do galego.

Nesta edición de 2025 os participantes serán Carlos Callón, María Maroño, Miguel López del Pueyo, Mariña Lema, Artur Trillo e Fátima Pego. Da condución do acto, a música e a poesía ocuparase Cintaadhesiva.

O acto terá lugar o sábado 25 de outubro de 2025, ás 18:30 h, no Teatro Principal de Santiago de Compostela. Podes conseguir xa a túa entrada, a través da venda anticipada, premendo aquí.
03/10/2025. CURSOS E CONGRESOS

O Simposio ILG 2025 analiza as oportunidades e riscos da IA para o futuro do galego

O Instituto da Lingua Galega da Universidade de Santiago de Compostela organiza o Simposio ILG 2025, que nesta edición leva por título “A intelixencia artificial e a lingua galega”. No transcurso das sesións analizarase o salto tecnolóxico producido nos últimos anos pola intelixencia artificial (IA), así como os riscos e as oportunidades que a IA representa para o futuro do galego.

As sesións desenvolveranse os días 18, 19 e 20 de novembro de 2025 no salón de graos da Facultade de Filoloxía da USC.

O prazo de inscrición remata o vindeiro 13 de novembro de 2025.
03/10/2025. DINAMIZACIóN

O Concello de Ames organiza o VI Certame Galetiktokers

O Servizo de Normalización Lingüística e o Departamento de Mocidade do Concello de Ames convocan a sexta edición do Certame Galetiktokers, co obxectivo de estimular a creatividade, fomentar a creación de vídeos en galego con novos formatos e darlle visibilidade á comunidade galega de tiktokers.

Poderán participar todas as persoas a partir dos 13 anos de idade, que presenten vídeos de creación propia, de temática libre, difundidos a través da aplicación TikTok ou dos reels de Instagram, cunha duración de entre 15 e 60 segundos. Os vídeos deben estar en lingua galega (con presenza oral, escrita ou musical).

Outorgaranse seis premios de 300 euros. O prazo de inscrición remata o 30 de outubro de 2025.

Como actividade complementaria organizaranse xornadas de formación nos centros de ensino secundario do concello de Ames.

Podes ampliar información premendo aquí.
03/10/2025. CURSOS E CONGRESOS

Cursos de introdución á lingua e á cultura galegas na Coruña

O Servizo de Normalización Lingüística do Concello da Coruña e a Secretaría Xeral da Lingua da Xunta de Galicia organizan dous cursos de introdución á lingua e cultura galegas, dirixidos a persoas maiores de 16 anos que se achegan por primeira vez ao noso idioma.

O primeiro curso impartirase no Centro Cívico Sagrada Familia do 13 ao 24 de outubro de 2025, de luns a venres en horario de mañá (das 10:00 ás 12:00 horas).

O segundo curso terá lugar no Centro Sociocultural Ágora, do 3 ao 14 de novembro de 2025, de luns a venres en horario de tarde (das 17:00 ás 19:00 horas).

Na páxina web do SNL do Concello da Coruña podes ampliar información sobre os trámites de inscrición.
03/10/2025. OUTRAS

Charla de Xosé-Enrique Costas sobre as falas de orixe galega do Val do Ellas

O Instituto de Estudos Miñoráns organiza o faladoiro “Orixe e actualidade das Falas Galegas do Val do Rio Ellas”, no que o profesor Xosé-Enrique Costas falará das falas de orixe galega usadas nos concellos de Valverde, As Ellas e San Martiño de Trebello, no noroeste de Cáceres.

A charla terá lugar hoxe, 3 de outubro de 2025, ás 20:00 h, en Gondomar (Aula Ponte de Rosas. Avenida da Feira, 10).
03/10/2025. DINAMIZACIóN

Concurso escolar para elaborar a exposición das Letras Galegas

A Secretaría Xeral da Lingua da Xunta de Galicia convoca un concurso para elaborar a exposición sobre Begoña Caamaño, a autora homenaxeada o Día das Letras Galegas 2026, dirixido aos centros de ensino público non universitario. Os/as participantes deben elaborar unha exposición relacionada coa obra e o percorrido biográfico da autora, así como sobre a situación sociolingüística do momento en que viviu. O concurso consta de dúas categorías, unha para os centros de educación infantil e primaria e outra para os restantes (educación secundaria obrigatoria, bacharelato, formación profesional e ensinanzas de réxime especial). Outorgarase un premio en metálico de 2.000 euros para cada categoría.

O prazo de presentación dos traballos remata o 23 de xaneiro de 2026.

Para consultar o texto completo da convocatoria, preme aquí.
03/10/2025. DINAMIZACIóN

CIG-Ensino promove a campaña “Eu ensino en galego”

O sindicato CIG-Ensino promove a campaña “Eu ensino en galego”, unha iniciativa coa que pretenden fomentar o compromiso do colectivo docente para que se converta en axente activo da normalización lingüística no ámbito educativo e, ao mesmo tempo, poñer o foco nos efectos nocivos do Decreto do Plurilingüístico durante os últimos 15 anos.

No marco desta campaña estanse a distribuír nos centros escolares chapas, adhesivos, calendarios de mesa e de peto, carteis e unha Guía para a posta ao día do Proxecto Lingüístico de Centro (PLC), en formato físico e dixital. Podes acceder a todos estes materiais premendo aquí.

Na páxina web da CIG-Ensino atoparás toda a información sobre a campaña.
30/09/2025. CURSOS E CONGRESOS

Xa podes inscribirte nos XXVII Encontros para a Normalización Lingüística

O vindeiro 21 de outubro van ter lugar os XXVII Encontros para a Normalización Lingüística, a nosa cita anual para o encontro, o debate e a reflexión sociolingüística, que nesta ocasión porá o foco en dous axentes fundamentais no proceso de normalización do noso idioma: os servizos de normalización lingüística (SNL) da Administración pública e mais os equipos de dinamización da lingua galega (EDLG) dos centros de ensino. O seu labor estratéxico e a súa longa traxectoria demandan unha análise profunda que permita coñecer a súa situación actual e facer novas propostas para enfrontar os retos do futuro.

A xornada rematará coa actuación especial de Regueifa Tour, na que un grupo de adolescentes festeiras nos amosarán o poder transformador da improvisación oral.

A inscrición é gratuíta e as prazas (limitadas a 100) cubriranse por orde de chegada das solicitudes.

Na páxina web do CCG podes consultar o programa completo e mais acceder ao formulario de inscrición.

30/09/2025. CURSOS E CONGRESOS

Obradoiro de creación de contidos dixitais en galego

No marco do proxecto Youtuberas+, o Servizo de Normalización Lingüística do Concello de Narón organiza un obradoiro de creación de contidos dixitais en galego dirixido a persoas maiores de 16 anos que queiran comezar a crear contido de calidade en galego nas redes sociais.

O obradoiro será impartido por Nuria Espasandín (Toxío) e por Laura Veiga (Pingando), e desenvolverase no centro cívico social do Alto, o 9 de outubro, de 18:00 a 19:40 h.

Para ampliar información sobre o programa e os trámites de inscrición, preme aquí.
30/09/2025. DINAMIZACIóN

Lamatumbá protagonizará o AgoraSón do outono de 2025

O Servizo de Normalización Lingüística e as Bibliotecas Municipais do Concello da Coruña conmemorarán o Día das Bibliotecas organizando unha nova edición do programa AgoraSón, unha iniciativa que ten como principais obxectivos fomentar a lectura en lingua galega e promover o préstamo bibliotecario de materiais no noso idioma (libro, película, CD...). A principal acción do programa é a celebración dun concerto e nesta edición do outono 2025 o protagonista é o grupo musical Lamatumbá, que actuará o vindeiro 17 de outubro, ás 21:00 h, no Centro Sociocultural Ágora.

A entrada é de balde, mais cómpre ter invitación. A partir do venres 10 de outubro entregaranse un máximo de dous convites por carné de socia/o das Bibliotecas Municipais da Coruña ao solicitar un préstamo de material en galego.

Na páxina web do SNL do Concello da Coruña tes máis información.
30/09/2025. OUTRAS

O Consello das Linguas Oficiais coordinará o uso dos idiomas oficiais na Administración Xeral do Estado

O Ministerio de Política Territorial e Memoria Democrática creou, a través do Real Decreto 798/2025, do 9 de setembro, o Consello das Linguas Oficiais, un órgano colexiado dedicado á análise, o impulso e a coordinación técnica da Administración Xeral do Estado en relación co uso das linguas oficiais.

Así mesmo, este mesmo Real Decreto recolle tamén a creación da Oficina para as Linguas Oficiais, concibida como unha “unidade permanente de asistencia e apoio ao Consello”, que se dedicará ao estudo, promoción, asesoramento, planificación e constatación do uso dos idiomas oficiais na Administración Xeral do Estado.

Podes ampliar información premendo aquí.
30/09/2025. DINAMIZACIóN

O Foro Enrique Peinador organiza un acto de galeguidade empresarial

O vindeiro 18 de outubro de 2025, ás 12:30 h, na sede da Adega Terras de Asorei (San Martiño de Meis) terá lugar o acto Medrando co galego. Economía e compromiso coa identidade, no que se porá de manifesto a importancia da galeguidade empresarial como ferramenta de compromiso social, cultural e económico.

O evento, que contará tamén coa actuación musical de María do Ceo, está organizado polo Foro Enrique Peinador, coa colaboración da Deputación de Pontevedra, a Xunta de Galicia e a Adega Terras de Asorei.
29/09/2025. DINAMIZACIóN

Conversa coa mocidade para “mover os marcos” no tema da lingua

Entre o 1 e o 3 de outubro de 2025 desenvolverase no Auditorio de Xornalismo da USC o proxecto Mover os Marcos 2025, un encontro deseñado para que a mocidade reflexione sobre os temas que condicionan o seu futuro: a vivenda, o medio, as identidades ou os dereitos civís e lingüísticos. Sobre esta última cuestión, o 1 de outubro, ás 18:30 h, terá lugar a conversa Proxectos para vivir en galego, na que participarán Carlos Callón (autor de "O libro negro da lingua galega"), Alberto Pombo (un dos promotores da iniciativa “Aquí tamén se fala”) e Noemí García (autora do web “As chaves da lingua”).

O proxecto Mover os Marcos está organizado pola Deputación da Coruña, en colaboración co Concello de Santiago e a Universidade de Santiago de Compostela. Podes consultar o programa completo premendo aquí.
26/09/2025. OUTRAS

26 de setembro: Día Europeo das Linguas

Hoxe, 26 de setembro, o Consello de Europa celebra o Día Europeo das Linguas, unha conmemoración instaurada en 2001 co obxectivo de promover a diversidade lingüística de Europa e fomentar o plurilingüismo entre a cidadanía.

Para conmemoralo, a Secretaría Xeral da Lingua da Xunta de Galicia organiza un acto institucional que terá lugar ás 18:00 horas nos soportais do Museo das Peregrinacións, na praza de Praterías de Santiago de Compostela. No transcurso deste acto, alumnado de ESO e de bacharelato recitará poemas en diferentes idiomas.

O Congreso dos Deputados, pola súa parte, tamén organiza hoxe, a partir das 12:00 horas, unha mesa redonda na que participan Cristian Llorens, Lucía García Batanero e María Rua Rodríguez (Prado Rua), como creadores de contido en linguas cooficiais. O debate está moderado polo xornalista Josep Capella e podes velo en directo premendo aquí.
26/09/2025. AXUDAS E PREMIOS

VI Premio Morales para a promoción da lingua galega no Bierzo e na Seabra

A Xunta de Galicia e Edicións Positivas convocan a sexta edición do Premio Morales para a promoción da lingua galega no Bierzo e na Seabra, un certame dirixido ao alumnado adscrito ao “Programa para a promoción do idioma galego no Bierzo e na Seabra (Lubián)”. O certame conta con dúas categorías: “Debuxando a poesía”, na que pode participar o alumnado de educación infantil e primaria; e “Poetizando ou narrando a poesía”, para alumnado de educación secundaria e bacharelato. En ambos casos deberán interpretar un fragmento do poema “Vilafranca e a vendima”, de Antonio Fernández Morales.

O xurado seleccionará 12 traballos en cada categoría, que terán como premio a publicación das súas creacións nun “Calendario 2026”, que se distribuirá no Bierzo e na Seabra.

O prazo de participación remata o 5 de decembro de 2025.

Podes consultar as bases completas premendo aquí.
24/09/2025. DINAMIZACIóN

En Coruña e Pontevedra tamén recibirán o outono con Apego

As familias da Coruña con nenos e nenas de 0 a 6 anos poderán gozar dun amplo programa de actividades de fomento do galego, de carácter lúdico e didáctico (música, teatro, contos, obradoiros...), promovido polo Servizo de Normalización Lingüística municipal. As actividades terán lugar no auditorio do Centro Ágora durante os meses de setembro, outubro de novembro de 2025.

Pola súa parte, o Servizo de Normalización Lingüística do Concello de Pontevedra deseñou tamén, no marco do proxecto Apego, un completo programa de actividades lúdicas e didácticas que se desenvolverán ao longo deste outono e que teñen como obxectivo crear espazos de lecer e socialización en galego. De xeito complementario, o programa inclúe unha nova edición do ciclo Un pobo con historia de seu, deseñado para divulgar a nosa historia e cultura propias entre o público infantil e familiar.
24/09/2025. DINAMIZACIóN

A RAG galardoa o CEIP Milladoiro (Malpica) co Premio “Na lingua que eu falo”

Coincidindo coa vindeira celebración do Día Europeo das Linguas (26 de setembro), a Real Academia Galega fixo pública a resolución do I Premio “Na lingua que eu falo”, un galardón creado ao abeiro do proxecto educativo Primavera das Letras “co propósito de recoñecer persoas, proxectos, iniciativas ou experiencias que, ben no ámbito escolar ben noutros espazos, destaquen polo seu traballo a prol da normalización lingüística na infancia”.

Nesta primeira edición o galardoado é o CEIP Milladoiro de Malpica de Bergantiños, en recoñecemento ao labor do profesorado e do conxunto da comunidade educativa en materia de normalización e promoción do galego.

Na páxina da RAG podes ampliar información.
23/09/2025. DINAMIZACIóN

XVI Certame de Cinema Internacional Escolar Ouff Escola

O Concello de Ourense, en colaboración coa Secretaría Xeral da Lingua da Xunta de Galica, convoca unha nova edición do Certame Ouff Escola, que ten como obxectivos impulsar o uso do idioma galego entre a mocidade, fomentar a creatividade audiovisual e promover o traballo en equipo. Poderán participar centros educativos públicos e privados de ensino non universitario de Galicia, así como aqueles de fóra de Galicia que teñan materias en lingua galega. Outorgaranse diferentes premios en metálico en cada unha das dúas categorías: infantil e primaria; e secundaria (agás escolas de Imaxe e Son).

Os/as participantes deben elaborar obras audiovisuais en lingua galega, de temática libre, de ata 20 minutos de duración. O prazo de inscrición remata o 1 de outubro de 2025.

Para consultar as bases completas, preme aquí.
22/09/2025. DINAMIZACIóN

Os centros educativos do Grove participan no programa “Lingua e cinema”

O Concello do Grove organiza, co apoio económico da Deputación de Pontevedra, o programa “Lingua e cinema”, un espectáculo-obradoiro de carácter lúdico e didáctico que se desenvolverá en todos os centros educativos da vila para achegarlle ao alumnado as técnicas de dobraxe en galego e, ao mesmo tempo, promover a creación de espazos de uso para o noso idioma vinculados á creatividade e ao lecer.

O obradoiro será impartido por Manuel Pombal Pérez e adaptarase ás diferentes etapas educativas e grupos.

Para ampliar a nova preme aquí.
18/09/2025. AXUDAS E PREMIOS

Resólvense as axudas para a tradución do libro galego

A Consellería de Cultura, Lingua e Xuventude da Xunta de Galicia publica a resolución de dúas liñas de axudas para o libro galego, unha delas dirixida á tradución para o galego de obras publicadas orixinariamente noutras linguas, e outra dirixida á tradución a outras linguas de obras publicadas orixinariamente en galego.

Podes consultar a listaxe de entidades beneficiarias nas seguintes ligazóns:
-Axudas á tradución para o galego de obras publicadas orixinariamente noutras linguas.
-Axudas á tradución a outras linguas de obras publicadas orixinariamente en galego.
17/09/2025. DINAMIZACIóN

Inscríbete en Youtubeiras+ e alborota o algoritmo

A novena edición de Youtubeiras+ xa está en marcha e, baixo o lema “Albotota o algoritmo”, repartirá un total de 7.500€ en varios premios clasificados en sete categorías.

O certame está organizado por dez concellos galegos, a Deputación da Coruña e as universidades da Coruña, Santiago de Compostela e Vigo, co obxectivo de fomentar a produción de contidos en galego nas redes sociais, así como de visibilizar os diferentes perfís de persoas creadoras na rede.

Poden optar a estes premios as persoas maiores de 16 anos que teñan canles autoproducidas nas redes sociais en activo e accesibles durante o certame, coa maioría das publicacións en galego. As persoas menores de idade poderán inscribirse coa autorización dunha persoa titora legal.

O prazo de inscrición estará aberto ata o 16 de novembro de 2025.

Podes consultar as bases completas premendo aquí.
17/09/2025. DINAMIZACIóN

Máis rechouchíos en galego para o público infantil de Moaña

Chega unha nova edición do programa Rechouchíos, cunha oferta diversa de actividades de teatro, monicreques, narración oral e música en directo para o público infantil e familiar de Moaña. As actividades desenvolveranse entre o 19 de setembro e o 24 de outubro de 2025 en diferentes locais socioculturais.

Rechouchíos é o un programa organizado polo Servizo de Normalización Lingüística, o Servizo de Benestar Social, Muller e Igualdade e a Biblioteca Pública Municipal do Concello de Moaña, co obxectivo de fomentar a lectura en galego e crear espazos de uso para o noso idioma no tempo de lecer dos máis pequenos.
17/09/2025. CURSOS E CONGRESOS

Cursos de formación lingüística para a comunidade universitaria da UVigo

A Universidade de Vigo publica a convocatoria de cursos de formación en lingua galega do primeiro cuadrimestre do curso académico 2025/2026, dirixidos á súa comunidade universitaria e organizados pola Área de Normalización Lingüística. Os cursos ofertados son os seguintes: Curso de iniciación á lingua galega (40 h); Os erros máis frecuentes na lingua galega (30 h); A calidade lingüística na universidade (30 h); Obradoiro de lingua oral (15 h); Galego hoxe (40 h); Cuestións de sociolingüística e de léxico (30 h).

As sesións desenvolveranse durante os meses de outubro, novembro e decembro de 2025, na modalidade en liña. O prazo de inscrición remata o vindeiro26 de setembro, e os trámites deben facerse a través da plataforma virtual https://bubela.uvigo.es.
16/09/2025. OUTRAS

Péchase o foro “Un país coa súa lingua” cunha mesa de conclusións

O vindeiro 2 de outubro de 2025, a partir das 16:30 h, terá lugar na sede do Consello da Cultura Galega (Pazo de Raxoi, Santiago de Compostela) a última sesión do foro Un país coa súa lingua. Trátase dunha mesa de conclusións coa que se pecha o proceso participativo iniciado en xaneiro deste mesmo ano, na que se exporán as principais reflexións, suxestións e propostas obtidas nas sete mesas temáticas anteriores.

Esta última sesión está aberta a todas as persoas que participaron nas diferentes mesas sectoriais e, en xeral, á cidadanía no seu conxunto. Podes inscribirte para asistir presencialmente cubrindo o formulario que atoparás nesta ligazón.

O foro Un país coa súa lingua é unha iniciativa do Consello da Cultura Galega que ten como obxectivo fomentar un diálogo aberto e plural sobre o futuro do galego. O proxecto, de carácter propositivo, estruturouse arredor de sete mesas de traballo nas que se debateu sobre o futuro da lingua e se propuxeron accións normalizadoras en ámbitos como a educación, a administración, a economía, os medios, a cultura e a sociedade.
16/09/2025. DINAMIZACIóN

Aberto o prazo de inscrición no DivúlgaT 2025

A Asociación de Investigadores AgroMar organiza o DivúlgaT 2025, unha iniciativa deseñada para promover a utilización do galego como ferramenta para a comunicación científica e para darlle visibilidade ao traballo desenvolvido polos investigadores/as do Campus de Lugo, a través de charlas divulgativas de 10 minutos de duración.

As sesións terán lugar os días 22 e 30 de outubro de 2025, a partir das 19:30 h, no Vello Cárcere. Se es investigador/a do Campus Terra da USC e estás interesado/a en participar, podes inscribirte ata o vindeiro 1 de outubro cubrindo este formulario.

No Xornal da USC tes máis información.
16/09/2025. OUTRAS

Novos materiais accesibles en cREAgal, o repositorio de recursos educativos abertos

A Consellería de Educación, Ciencia, Universidades e Formación Profesional da Xunta de Galicia anunciou a incorporación de novos contidos ao proxecto cREAgal, un repositorio de recursos educativos abertos elaborados por profesorado galego, empregando a ferramenta eXeLearning. Os materiais poden empregarse e modificarse libremente, coa única condición de respectar a licenza aberta (CC BY-NC-SA).

Neste momento o repositorio dá acceso a 124 recursos educativos (76 deles en galego) deseñados para o alumnado de educación primaria e ESO, coas correspondentes guías didácticas para o profesorado.
16/09/2025. OUTRAS

Nova edición dos espazos de conversa en galego “Faladoiros Vigo”

A Asociación Faladoiros Vigo presenta a sexta tempada dos seus Faladoiros, espazos de conversa en galego gratuítos nos que se xuntan persoas que falan habitualmente en galego (voluntarios/as da asociación) con outras que desexan practicar e mellorar a súa fluidez e competencia comunicativa no noso idioma.

A edición 2025-2026 comezará o vindeiro 1 de outubro de 2025 con catro quendas semanais; tres delas presenciais (luns ás 19:00 h ou venres ás 11:30 h na cafetería da EOI de Vigo; e mércores ás 20:00 h no café de Catro a Catro) e unha cuarta que se organiza en liña (xoves ás 20:00 h).

Podes inscribirte no formulario que atoparás na páxina web da asociación.
12/09/2025. DINAMIZACIóN

Os concellos de Alingua exploran o potencial do proxecto “Modo Galego, actívao!”

A Real Academia Galega e a Asociación de Entidades Locais pola Lingua Galega-Alingua organizaron onte, 11 de setembro de 2025, unha xornada en Rois na que os representantes dos concellos de Alingua tiveron ocasión de coñecer polo miúdo o potencial dinamizador da iniciativa Modo galego, actívao!, un proxecto de investigación e acción que a RAG e o SNL do Concello de Ames levan catro anos desenvolvendo para intervir nas actitudes e usos lingüísticos da comunidade educativa (alumnado, profesorado, familias e persoal dos servizos complementarios).

A intención deste encontro é promover a cooperación entre institucións e replicar esta experiencia normalizadora noutros municipios, unha vez que xa foi probada a súa eficacia coa comunidade educativa amesá.

Nas páxinas web da RAG e mais de Alingua podes ampliar información.