A Consellería de Educación, Universidade e Formación Profesional organiza a xornada formativa “Do galego ao plurilingüismo”, no marco do programa europeo RUSH, que ten como obxectivo fomentar as competencias plurilingües do profesorado. Ao longo da xornada intervirán as diferentes institucións e centros de ensino que colaboran no proxecto e, a maiores, tamén participarán Jorge Mira, Yolanda Castaño e Sabela Ramil, que reflexionarán sobre o uso do galego nas súas respectivas carreiras profesionais. As sesións, abertas a todo o profesorado, terán lugar o vindeiro martes 14 de maio no CIFP Politécnico de Santiago de Compostela. Para ampliar información sobre os trámites de inscrición, preme aquí.
10/05/2019. CURSOS E CONGRESOS
10/05/2019. DINAMIZACIóN
A Fundación Eduardo Pondal presenta a programación do Festiletras 2019, demostrando un ano máis que o ámbito rural tamén é foco de creación e difusión cultural. Entre os días 12 e 19 de maio de 2019, a aldea do Couto, en Ponteceso, conmemorará as Letras Galegas cun amplo programa que inclúe obradoiros e roteiros didácticos, actuacións musicais, contacontos, xogos, actividades de divulgación científica, etc. Así mesmo, entregaranse os Premios Bos e Xenerosos 2019, que nesta edición recaeron en Isabel Aguirre, Miguel de Lira, Rosario Álvarez e Carlos Blanco.
09/05/2019. DINAMIZACIóN
O Departamento de Lingua Galega do Concello de Santiago de Compostela presenta a cuarta edición do concurso #fotolingua, co obxectivo de darlles visibilidade aos establecementos comerciais da cidade comprometidos co uso do galego. Tal e como recollen as bases da convocatoria, para participar debes facerte seguidor/a da conta de Facebook ou Instagram da iniciativa e subir unha fotografía na que se amose o galego na paisaxe empresarial e comercial de Santiago de Compostela (cartelería, escaparates, elementos decorativos, letreiros, etiquetaxe, sinalética...). As fotos deben publicarse con estes tres cancelos: #establecementoengalego, #fotolingua, #ogalegovende. O prazo para subir as imaxes remata o 7 de xuño de 2019. As persoas gañadoras recibirán como premio unha tableta Huawei Mediapad.
09/05/2019. INVESTIGACIóN
A Associaçom Galega da Língua presenta o documental Pacto de irmãos, dirixido por Rafael Janeiro, cuxo título fai alusión ao documento “O Pacto dos irmãos Pais”, o máis antigo (de entre os que chegaron aos nosos días) escrito en galego-portugués. O filme trata sobre os manuscritos máis antigos coñecidos en galego-portugués, así como sobre o papel da escrita na conformación social e cultural da comunidade de falantes. No marco deste proxecto elaborouse tamén material didáctico complementario dirixido a alumnado universitario e de bacharelato.
09/05/2019. DINAMIZACIóN
O Consello da Cultura Galega organiza unha nova edición do seu tradicional Concerto das Letras Galegas, que este ano terá lugar o 16 de maio de 2019, ás 20:30 h, no Auditorio de Galicia en Santiago de Compostela. Nesta edición, a orquestra folk SonDeSeu e o grupo O Fiadeiro, dirixidos por Rodrigo Romaní, interpretarán un repertorio baseado na recreación da música popular, entre o que salienta a Suite Cotobade, creada para a ocasión como homenaxe a Antonio Fraguas. Podes retirar as entradas de balde no Teatro Principal de Santiago (dispoñibles a partir do 9 de maio) ou no Auditorio de Galicia (o propio día do evento).
06/05/2019. DINAMIZACIóN
Xurdir S.L., coa colaboración da Consellería de Cultura e Turismo, organiza a VI Carreira Camiño das Letras, que vai ter lugar o 17 de maio de 2019 en Santiago de Compostela. O obxectivo da iniciativa é homenaxear a figura de Antonio Fraguas, autor ao que se lle dedica o Día das Letras Galegas, así como difundir o Camiño de Santiago a través da práctica deportiva. A carreira contará cunha proba absoluta desde o Pico Sacro, seguindo o Camiño do Sueste - Vía da Prata, ata a Cidade da Cultura e cun circuíto para as categorías de menores, que se realizará no Gaiás e o Bosque de Galicia. O prazo de inscrición remata o 13 de maio. Para ampliar información, preme aquí.
03/05/2019. DINAMIZACIóN
A Secretaría Xeral de Política Lingüística da Xunta de Galicia presenta o proxecto didáctico Peque Peixe, dirixido a nenos e nenas de 3 a 15 anos, co obxectivo de difundir a terminoloxía en galego do ámbito mariñeiro. No marco desta iniciativa elaboráronse 6 unidades didácticas para que o alumnado dos diferentes niveis educativos, do ensino infantil ata secundaria, poidan coñecer a vida que agochan os nosos océanos e aprender o léxico galego relacionado co mundo mariñeiro e pesqueiro. Todos os materiais poden consultarse e descargarse no web pequepeixe.gal.
02/05/2019. DINAMIZACIóN
O Servizo de Normalización Lingüística do Concello de Pontevedra presenta a nova edición do programa Maio, mes da lingua, sumándose así aos actos conmemorativos do Día das Letras Galegas que ao longo deste mes terán lugar por todo o país. O programa, organizado en colaboración con diferentes centros de ensino e entidades asociativas, inclúe música, teatro, cinema, andainas, xogos, obradoiros, etc. Podes consultar o programa completo premendo aquí.
29/04/2019. DINAMIZACIóN
A Comisión de Normalización Lingüística da Facultade de Ciencias da Comunicación da USC convoca os VIII Premios “Somos a curta!”, que premian as mellores pezas audiovisuais curtas en galego do cinema do real. Esta iniciativa ten como obxectivo fomentar a análise da realidade galega e promover o uso da lingua galega nos novos valores do audiovisual. O certame está destinado ao alumnado das universidades galegas, das titulacións impartidas nas escolas oficiais de Imaxe e Son ou da titulación de bacharelato artístico de calquera dos institutos de educación secundaria de Galicia. O xurado outorgará dous premios, de 500 e 250 euros respectivamente, e diploma honorífico. Haberá tamén un premio do público, dotado dun diploma honorífico. O prazo de presentación das propostas remata o 11 de outubro de 2019.
29/04/2019. EMPREGO
A Deputación Provincial de Ourense publica as bases do proceso selectivo para a contratación, como persoal laboral temporal, dun/unha tradutor/a de galego. O contrato terá unha duración máxima de tres meses. O proceso de selección será o concurso de méritos. Os/as aspirantes deben estar en posesión da licenciatura en Filoloxía Galega, Filoloxía Hispánica (subsección de Galego-Portugués) ou Filosofía e Letras (sección Filoloxía Hispánica, subsección Galego-Portugués); algún dos seguintes graos: Ciencias da Linguaxe e Estudos Literarios (galego e español); Estudos de Galego e Español; Galego e Portugués: Estudos Lingüísticos e Literarios; Lingua e Literatura Galegas, ou licenciatura/grao en Tradución e Interpretación (formación en galego e castelán), ou equivalentes. O prazo para a presentación de solicitudes é de 5 días naturais, contados a partir do seguinte ao da publicación da convocatoria.
29/04/2019. EMPREGO
O Consello da Cultura Galega publica a convocatoria de 5 bolsas de colaboración en proxectos de investigación que se están a desenvolver nesta entidade. Trátase de proxectos adscritos ás seguintes áreas: Área de Publicacións (1 bolsa), Área de Documentación (2 bolsas) e Área de Comunicación (2 bolsas). A duración de cada unha das bolsas será de sete meses. A data estimada de comezo é o 1 de xuño de 2019 e a de remate, en calquera caso, o 31 de decembro de 2019. O prazo de presentación de solicitudes é dun mes contado a partir do día seguinte ao da publicación desta convocatoria.
26/04/2019. OUTRAS
O idioma galego chega por primeira vez ao Festival de Cannes da man do cineasta Oliver Laxe, que na edición deste ano 2019 competirá na sección “Un Certain Regard” co seu terceiro filme “O que arde”, que se proxectará na súa versión orixinal en lingua galega. A película, rodada integramente en Galicia e ambientada nos Ancares, trata sobre os incendios forestais. A 72ª edición do Festival de Cannes celebrarase entre os días 14 e 25 de maio. A estrea nas salas de O que arde está prevista para finais de 2019, con distribución de Numax.
25/04/2019. DINAMIZACIóN
O grupo vigués Bakarrá! e o seu tema NeoRural inauguran a terceira tempada das Sesións Destelo, un proxecto cultural en Internet que ten como obxectivo dar a coñecer bandas e solistas que fan música en galego. Esta terceira tempada completarase nas vindeiras semanas con outras cinco actuacións en contornas especiais, con versións diferentes ás que o público está acostumado a escoitar nas salas de concertos ou nos festivais. Podes ampliar información premendo aquí.
25/04/2019. AXUDAS E PREMIOS
A Deputación Provincial de Pontevedra publica a resolución da convocatoria de subvencións para a dinamización lingüística nos concellos e outras entidades locais da provincia. O obxecto destas axudas é a creación ou mantemento de servizos de normalización lingüística (SNL), así como o desenvolvemento de programas de dinamización do galego. Consulta a listaxe de beneficiarios aquí.
24/04/2019. CURSOS E CONGRESOS
A asociación Queremos Galego Marín organiza as Xornadas da Ciencia en Galego, que terán lugar os días 3 e 31 de maio e 7 de xuño de 2019 no Museo Manuel Torres en Marín. O obxectivo principal é combater aqueles prexuízos lingüísticos que instalan no imaxinario colectivo a idea de que o galego non é un idioma válido para a ciencia. Nas xornadas participarán Manuel Vicente, director do programa de radio Efervesciencia; David Domínguez, responsable do blog RedMeteo; e Dositeo Veiga, redactor da páxina web Ceos Galegos. Como remate celebrarase unha saída nocturna para fotografar as estrelas e a vía láctea desde a Lagoa de Castiñeiras.
22/04/2019. CURSOS E CONGRESOS
O Servizo de Normalización Lingüística do Concello de Vigo organiza as Xornadas sobre recursos educativos para traballarmos en galego, dirixidas ao profesorado de todas as etapas educativas e aos membros dos equipos de dinamización da lingua galega dos centros de ensino de Vigo. O obxectivo é dar a coñecer proxectos ou recursos didácticos que poidan contribuír a normalizar o uso da lingua galega no ensino. As sesións terán lugar os días 2, 3 e 9 de maio de 2019 no Verbum (Vigo). O prazo de inscrición comeza o vindeiro 24 de abril.
17/04/2019. DINAMIZACIóN
O pasado 15 de abril tivo lugar na biblioteca Ánxel Casal de Santiago de Compostela a inauguración da exposición “Antonio Fraguas, memoria dun soño. Viaxe a unha Galicia orgullosa de si mesma”, organizada pola Xunta de Galicia no marco da programación institucional Letras Galegas 2019. A mostra está conformada por doce paneis nos que se explican os aspectos máis relevantes da vida, obra e contexto social de Antonio Fraguas. A exposición, de carácter itinerante, poderá visitarse ao longo dos vindeiros meses noutras once localidades galegas. Podes ampliar información premendo aquí.
12/04/2019. INVESTIGACIóN
Catro investigadores do campo da Física acaban de publicar na revista Nature Communications o estudo “Urbanity and the dynamics of language shift in Galicia” no que, a través dunha serie de ecuacións matemáticas, se calcula a velocidade do cambio lingüístico en vinte áreas xeográficas galegas con diferente grao de urbanización. O estudo, asinado por Mariamo Mussa, Luís F. Seoane, Alberto P. Muñuzuri e Jorge Mira, conclúe que a velocidade de variación no uso dos dous idiomas (galego e castelán) é máis rápida nas zonas rurais ca nas urbanas, o que leva a pensar aos investigadores que o efecto globalizador dos espazos urbanos, lonxe de contribuír á homoxeneización lingüística, pode axudar a manter a diversidade. No xornal Gciencia podes ampliar información.
12/04/2019. OUTRAS
O pasado mércores, 10 de abril, presentouse simultaneamente en Pontevedra, Barcelona, Valencia e Donostia o Manifesto a prol da pluralidade lingüística: liberdade, igualdade, democracia, que promoven diferentes entidades culturais do Estado español, como son A Mesa pola Normalización Lingüística, Kontseilua, Ómnium Cultural, Ciemen, Plataforma per la Llengua, Acció Cultural del País Valencià, Nogará e Iniciativa pel Asturianu. No manifesto reivindícase o cumprimento dos acordos e tratados internacionais relacionados coa protección de linguas minorizadas, así como a igualdade de dereitos para toda cidadanía, tendo en conta que o 45% dos cidadáns do Estado español viven en territorios con lingua propia diferente do castelán. Se o desexas, podes adherirte ao manifesto nesta ligazón.
12/04/2019. CURSOS E CONGRESOS
O Servizo de Normalización Lingüística da Universidade da Coruña convoca, en colaboración coa Secretaría Xeral de Política Lingüística, o XI Curso de Verán de Lingua e Cultura Galegas para Persoas de Fóra de Galicia. O curso, de 80 horas lectivas, conta con dous niveis de formación, un nivel elemental (A1-A2) e un nivel intermedio (B1-B2). As sesións impartirase entre o 1 e 23 de xullo de 2019 na Universidade da Coruña. O prazo para formalizar a inscrición remata o 10 de maio.
11/04/2019. DINAMIZACIóN
A plataforma cidadá Queremos Galego, que agrupa a persoas e colectivos sociais de diversos ámbitos, presenta a convocatoria das manifestacións do vindeiro 17 de maio, que coincidindo coa festividade do Día das Letras Galegas reivindicarán “liberdade, igualdade e xustiza” para o galego. As manifestacións convocaranse de xeito simultáneo, o 17 de maio ás 12 horas, en diferentes cidades e vilas galegas baixo o lema “Máis que nunca, Queremos Galego”. Nesta edición faise especial énfase na importancia que teñen para a normalización do galego os servizos municipais de normalización lingüística, os usos lingüísticos das empresas concesionarias de servizos públicos ou a formación do funcionariado. Para ampliar a nova, preme aquí.
11/04/2019. AXUDAS E PREMIOS
A Deputación da Coruña publica a resolución provisional das subvencións a concellos e entidades locais da provincia da Coruña para a creación, mantemento e reforzo dos servizos de normalización lingüística durante o ano 2019. A partir do día seguinte á publicación desta resolución, os solicitantes teñen un prazo de 10 días hábiles para comunicar, se fose o caso, a desistencia da solicitude. De non tramitar a desistencia no citado prazo, enténdese que aceptan a axuda. Para consultar o texto completo da resolución, preme aquí.
10/04/2019. INVESTIGACIóN
A Real Academia Galega e a Asociación Galega de Onomástica presentan os catro novos volumes que se incorporan á colección Terra Nomeada, creada para recompilar e estudar os nomes de lugar habitados e algúns dos principais accidentes xeográficos dos concellos de Galicia. As publicacións que se suman á colección son: Toponimia da Estrada, de Fernando Cabeza Quiles, Toponimia de Ames, de Xosé Ramón López Boullón, Toponimia de Bogonte e Rábade, de Paulo Martínez Lema, e Toponimia de Trabada, de Xulia Marqués Valea. Podes ampliar información sobre esta nova premendo aquí.
09/04/2019. DINAMIZACIóN
O pasado venres, 5 de abril de 2019, tivo lugar a presentación da nova edición do Correlingua, actividade lúdico-didáctica organizada pola CIG-Ensino, A Mesa pola Normalización Lingüística e a Asociación Socio-Pedagóxica Galega (AS-PG), que este ano se desenvolverá baixo o lema “O galego é a fórmula”. A iniciativa, deseñada para que o alumnado de todos os ciclos educativos reivindique publicamente o uso do galego, inclúe a convocatoria de diferentes concursos escolares, a organización dunha carreira reivindicativa e a celebración dunha festa final con actuacións musicais e teatrais. O Correlingua 2019 comezará o vindeiro 2 de maio en Cangas e rematará, despois de percorrer diferentes cidades e vilas do país, o 16 de maio en Pontevedra.
09/04/2019. OUTRAS
Netflix, a coñecida plataforma de contidos multimedia por Internet, acaba de incorporar ao seu catálogo a serie “O sabor das margaridas”, que se ofrece na súa versión orixinal en galego e, a maiores, na versión dobrada ao español, converténdose deste xeito na primeira produción en lingua galega que oferta a plataforma. Trátase dunha serie de suspense de 6 capítulos de duración, dirixida por Miguel Conde e protagonizada por María Mera, Toni Salgado e Miquel Insua. No xornal Código Cero podes obter máis información sobre esta nova.
09/04/2019. EMPREGO
A Deputación Provincial de Ourense publica as bases do proceso selectivo para a contratación, como persoal laboral temporal, dun/unha tradutor/a de galego. O contrato terá unha duración máxima de tres meses. O proceso de selección será o concurso de méritos. Os/as aspirantes deben estar en posesión da licenciatura en Filoloxía Galega, Filoloxía Hispánica (subsección de Galego-Portugués) ou Filosofía e Letras (sección Filoloxía Hispánica, subsección Galego-Portugués); ou dalgún dos seguintes graos: Ciencias da Linguaxe e Estudos Literarios (galego e español); Estudos de Galego e Español; Galego e Portugués: Estudos Lingüísticos e Literarios; Lingua e Literatura Galegas, ou equivalentes. O prazo para a presentación de solicitudes é de 5 días naturais, contados a partir do seguinte ao da publicación da convocatoria.
04/04/2019. INVESTIGACIóN
A Área de Normalización Lingüística da Universidade de Vigo e a Deputación de Pontevedra presentan os resultados do traballo sociolingüístico que leva por título Lingua e sociedade. Guía didáctica sobre os procesos sociolingüísticos en Moaña, elaborado por Martín Vázquez e Rubén Moralejo, da Universidade de Vigo. Trátase dunha ferramenta en formato web deseñada para achegarlle á comunidade educativa contidos didácticos, de carácter teórico e práctico, relacionados co ámbito da sociolingüística, exemplificándoos con discursos e experiencias persoais dalgúns moañeses e moañesas. O obxectivo principal é fomentar no alumnado unha visión informada, realista e crítica sobre a situación social da lingua en Galicia, e máis en concreto, no concello de Moaña.
03/04/2019. DINAMIZACIóN
A Concellería de Mocidade e o Departamento de Lingua Galega do Concello de Santiago de Compostela presentan #SenCancelas, un proxecto de intervención socioeducativa dirixido á mocidade compostelá, que ten como obxectivo crear espazos de socialización en galego nos que a rapazada poida desenvolver as súas habilidades e capacidades persoais. Os participantes poderán realizar o seu propio proxecto creativo (montar un podcast, crear un videoxogo, gravar un disco de hip-hop, publicar un cómic, ter a súa canle de Youtube...) colaborando de forma autónoma con iguais. O programa #SenCancelas desenvolverase os luns de 18:00 a 20:00 horas no Centro Xove da Almáciga, desde o 22 de abril ao 15 de xullo e do 2 de setembro ao 16 de decembro. O prazo de inscrición remata o 15 de abril.
03/04/2019. OUTRAS
O Servizo de Normalización Lingüística do Concello da Coruña organiza unha homenaxe a Xabier P. Docampo (mestre, escritor e recoñecido activista na defensa da lingua e cultura galegas), finado na Coruña o 26 de xuño de 2018. A homenaxe consistirá nunha sesión conxunta de narración oral, que terá lugar o martes 9 de abril, ás 20:00 h, no Fórum Metropolitano, no marco da terceira edición do Festival de Narración Oral “Falando a boca chea”. Na sesión de homenaxe participarán Caxoto, Charo Pita e Soledad Felloza. A entrada é de balde. Podes ampliar información premendo aquí.
02/04/2019. AXUDAS E PREMIOS
A Coordinadora de Traballadores/as de Normalización da Lingua (CTNL) convoca os Premios Mil Primaveras, co obxectivo de recoñecer e difundir accións, campañas, programas e proxectos destinados ao fomento da lingua galega e ao incremento do seu uso e prestixio. Premiaranse proxectos que tivesen vixencia, total ou parcialmente, en 2017, 2018 ou 2019. O xurado outorgará un premio por cada unha destas seis categorías: “mellor proxecto estabilizado”, “mellor proxecto novo”, “mellor comunicación e impacto”, “proxecto máis innovador”, “fomento do galego na infancia e/ou mocidade” e “fomento do galego nun ámbito sectorial”. O prazo para a inscrición das iniciativas, que debe ser feita pola propia entidade organizadora, remata o 17 de maio de 2019.