A Secretaría Xeral de Política Lingüística da Xunta de Galicia anuncia a convocatoria de cursos de lingua galega preparatorios das probas para obter os certificados Celga 1, Celga 2, Celga 3 e Celga 4. Estes cursos poderán ser solicitados por todas as persoas maiores de dezaseis anos ou por aquelas que os fagan no ano 2018. O prazo para a presentación das solicitudes será de 20 días naturais, contados a partir do día seguinte ao da publicación da convocatoria.
06/02/2018. CURSOS E CONGRESOS
06/02/2018. CURSOS E CONGRESOS
O Servizo de Normalización Lingüística do Concello de Vigo organiza unha nova edición do Curso de auga doce, deseñados para ampliar o coñecemento da lingua galega (léxico, fraseoloxía, toponimia...) empregando como fío condutor a auga, en concreto, a relación de Vigo cos ríos, muíños e bosques de ribeira. As sesións desenvolveranse durante os meses de febreiro e marzo de 2018 na oficina municipal de Distrito de Bouzas-Casa Patín. Para obter máis información sobre os horarios e os trámites de inscrición, preme aquí.
02/02/2018. DINAMIZACIóN
O Servizo de Normalización Lingüística do Concello de Carballo presenta a campaña "qrtm8" (forma acurtada de escribir nas redes sociais “quérote moito”), coincidindo coa conmemoración do 2 de febreiro, Día da Candeloria (no que segundo a nosa tradición popular casaban os paxariños) e mais do vindeiro 14 de febreiro, Día dos Namorados. A campaña está especialmente dirixida á mocidade, para convidala a que visibilice o seu amor en galego nas redes sociais, a través dun concurso en Instagram. Os participantes terán que subir unha foto cunha frase de amor en galego orixinal e suxestiva, que inclúa as etiquetas #qrtm8 e #Carballo. O prazo para participar remata o vindeiro 14 de febreiro. Á campaña sumáronse tamén 50 comercios de Carballo, que difundirán a iniciativa nos seus establecementos a través de paneis e adhesivos. Podes ampliar esta nova premendo aquí.
02/02/2018. AXUDAS E PREMIOS
O Servizo de Normalización Lingüística do Concello de Pontevedra, coa colaboración da Rede de Entidades Amigas da Lingua (REAL), presenta unha nova edición do Premio Xoán Manuel Pintos, que ten como obxectivos recoñecer o compromiso co idioma galego de diferentes persoas, empresas ou colectivos, así como contribuír a manter viva a memoria do xurista e escritor Xoán Manuel Pintos. Este ano, como novidade, a cidadanía, as entidades ou os colectivos que o desexen, poderán enviar ata o vindeiro 14 de febreiro as súas propias candidaturas. Ademais das dúas modalidades das anteriores edicións (promoción do galego nos dous últimos anos e uso continuado durante toda a traxectoria profesional/vital), o xurado outorgará un terceiro premio entre as propostas recibidas a través da páxina web da iniciativa.
01/02/2018. DINAMIZACIóN
Co gallo da celebración, o vindeiro 7 de febreiro, do aniversario de O Tío Marcos d´A Portela, a Asociación de Medios en Galego (AMEGA) promove a celebración anual nesta data do Día dos Medios en Galego. O Tío Marcos d´A Portela, publicación promovida por Valentín Lamas Carvajal, saíu por primeira vez á rúa o 7 de febreiro de 1876, converténdose na primeira publicación de carácter xornalístico redactada integramente en lingua galega. A AMEGA quere con esta celebración visibilizar os medios de comunicación que apostan polo galego e axudar a concienciar a poboación da importancia de normalizar o uso do noso idioma no ámbito xornalístico e adiovisual. Os actos centrais desta celebración terán lugar este ano en Fene, o vindeiro sábado 3 de febreiro.
30/01/2018. DINAMIZACIóN
A Mesa pola Normalización Lingüística e a Associaçom Galega da Língua (AGAL), xunto coa Fundación Vía Galego, presentan a campaña “Nós feiramos de segunda a sexta”, deseñada para promover os nomes tradicionais dos días da semana (domingo, segunda feira, terza feira, cuarta feira, quinta feira, sexta feira e sábado). A iniciativa, dirixida especialmente ao público infantil e mais aos medios informativos dixitais, será presentada oficialmente o vindeiro 19 de febreiro, nunha rolda de prensa en Santiago de Compostela. Para a súa difusión deseñouse diferente material gráfico, como chapas, manteis de mesa infantís e mais un calendario. Tamén está accesible xa na rede o videoclip da campaña, da banda de música infantil Mamá Cabra. Para ampliar esta información, preme aquí.
26/01/2018. DINAMIZACIóN
A Coordinadora de Traballadores/as de Normalización da Lingua subiu á súa canle de Youtube os vídeos das intervencións da última edición do LGx15, un proxecto de dinamización lingüística no que, a través de charlas breves e amenas, se transmiten argumentos e experiencias para influír no futuro do galego. Se non puideches asistir ao acto que tivo lugar o pasado 9 de novembro en Santiago de Compostela, agora podes consultar en liña os vídeos dos/as participantes desta última edición: Alonso Caxade; estudantes do Club de Debate de Negreira; Cecilia Fernández; Nuria Espasandín; Patricia Buxán e Miguel Braña; Iria Veiga; José Antonio Rubal e Pedro Brandariz. Na mesma canle, podes ver tamén unha das actuacións musicais de MJ Pérez.
26/01/2018. OUTRAS
Xa está accesible en liña o noso Boletín de Sumarios 2017, produto documental que inclúe os 39 números de publicacións periódicas, correspondentes a 21 títulos diferentes, que ingresaron na hemeroteca do CDSG ao longo do ano 2017. No caso de publicacións en papel, ofrécense, mediante ligazóns, os seus sumarios. Estas revistas pódense consultar en sala ou levar en préstamo naqueles casos en que dispoñamos de máis dun exemplar. No caso das dixitais, desde este boletín pode accederse directamente aos números completos. Para consultar a nosa colección completa de seriadas, preme aquí.
25/01/2018. DINAMIZACIóN
Os concellos de Ames, Carballo, Santiago de Compostela e Teo organizan a segunda edición do proxecto Enreguéifate, deseñado para difundir a improvisación oral en verso e en galego. No marco deste proxecto desenvolveranse catro accións, o certame de regueifas en vídeo e o festival Regueifesta (que xa se desenvolveron na primeira edición que organizou o Concello de Santiago), así como unha xornada conxunta de formación para docentes e varias xornadas formativas para o alumnado dos catro concellos organizadores (que se engaden como novidade nesta segunda edición). Tanto as bases do certame, que será convocado en breve, como a información sobre as diferentes accións vinculadas ao proxecto poderás atopala no sitio web da iniciativa.
25/01/2018. OUTRAS
A Mesa pola Normalización Lingüística e a Deputación de Pontevedra presentaron, no marco da III Xornada de Normalización Lingüística que organiza a propia Deputación, as conclusións da Auditoría lingüística dos concellos de Pontevedra. Trátase dun informe elaborado pola Mesa, a pedimento da Deputación de Pontevedra, no que se examina o grao de cumprimento das garantías lingüísticas nos concellos da provincia, avaliando cuestións como os idiomas empregados en diferentes servizos á cidadanía (comunicación web, uso das redes sociais, atención telefónica, banca electrónica...), ou a existencia de servizos de normalización lingüística municipais. Malia que en termos xerais se constata un avance na normalización do galego nestes concellos, nas conclusións do informe saliéntanse carencias nos apartados de perfil do contratante, transparencia e banca electrónica, onde se continúa a empregar en exclusiva o castelán. Outro dato preocupante é que só 12 dos 61 concellos avaliados contaban en febreiro de 2017 (data da recollida de datos) cun servizo de normalización lingüística.
24/01/2018. OUTRAS
Encrucillada, a primeira revista de pensamento cristián da Transición escrita en galego, celebra os seus 40 anos editando a monografía As Letras Galegas na Encrucillada, unha publicación en dous tomos nos que se recollen os artigos publicados desde 1977 sobre destacados autores/as da nosa literatura, reservando un destes tomos para aqueles aos que se lles dedicou o Día das Letras Galegas. O acto público de presentación da monografía tivo lugar o pasado 19 de xaneiro na sede da Real Academia Galega.
24/01/2018. CURSOS E CONGRESOS
O Servizo de Normalización Lingüística do Concello de Vigo convoca o curso Achégate ao galego, nivel básico, dirixido a todas aquelas persoas, de dentro e fóra de Galicia, sen apenas coñecementos do idioma. O curso desenvolverase durante os meses de febreiro, marzo e abril de 2018. As persoas interesadas en asistir deben enviar os seus datos (nome completo e teléfono) ao correo electrónico actividades.snl@vigo.org, indicando no asunto da mensaxe “curso galego nivel básico”. Para ampliar información sobre as datas de realización e mais o programa do curso, preme aquí.
22/01/2018. EMPREGO
O Concello de Vimianzo publica as bases do proceso de selección para a formación dunha bolsa de emprego destinada á contratación dun/ha técnico/a de normalización lingüística. O sistema de selección será o de concurso-oposición. Os/as aspirantes deben estar en posesión do título de Licenciatura en Filoloxía Galega-Portuguesa, Filoloxía Galega ou Filoloxía Hispánica (subsección Galego-Portugués), do Grao en Lingua e Literatura Galegas, ou calquera outra licenciatura/grao sempre que dispoña do Celga 5. O prazo de presentación de solicitudes remata o vindeiro 29 de xaneiro de 2018. Podes consultar as bases completas da convocatoria premendo aquí.
17/01/2018. CURSOS E CONGRESOS
A Asociación Internacional de Estudos Galegos (AIEG) está a organizar a décimo segunda edición do seu congreso internacional, que levará por título “Novos horizontes para unha Galicia global: Redes, Territorio e Memoria”. Os temas lingüísticos trataranse nesta edición desde a perspectiva do “territorio”, polo que se incluirán no programa traballos e relatorios relacionados coa cartografía lingüística. Ademais destes tres eixos temáticos recollidos no propio título, tamén terán cabida novas achegas sobre os estudos galegos en xeral (perfil lingüístico, literario, histórico, económico, antropolóxico, filosófico, sociolóxico, artístico, etc.). O comité organizador convida a investigadores/as que traballen neste ámbito a enviar a súa proposta de relatorio ou panel antes do vindeiro 1 de marzo de 2018. O congreso terá lugar en Madrid entre os días 18 e 22 de setembro de 2018.
16/01/2018. DINAMIZACIóN
A Secretaría Xeral de Política Lingüística e a Dirección Xeral de Xuventude, Participación e Voluntariado da Xunta de Galicia organizan unha nova edición de Lingua de namorar, un concurso en liña de mensaxes de amor en lingua galega dirixido a mozos e mozas de 14 a 35 anos. A iniciativa está deseñada para dinamizar o uso do galego nas relacións persoais e nas novas tecnoloxías, nomeadamente en Internet e na mensaxería instantánea. Outorgaranse tres premios tecnolóxicos por cada unha das categorías de idade establecidas. O prazo para enviar as mensaxes remata o 29 de xaneiro de 2018.
10/01/2018. AXUDAS E PREMIOS
A Deputación da Coruña publica os prazos de solicitude e xustificación das axudas ás entidades locais da provincia para a creación ou mantemento dos seus servizos de normalización lingüística, segundo a remisión da Base de Datos Nacional de Subvencións. Os concellos de 5000 habitantes ou máis, así como a agrupacións de concellos e mancomunidades que, entre eles, cheguen ao mesmo número mínimo de habitantes, teñen prazo ata o 19 de xaneiro ás 14 h para tramitar as súas solicitudes.
As bases completas da convocatoria de axudas foron publicadas no BOP da Coruña o pasado 19 de decembro.
As bases completas da convocatoria de axudas foron publicadas no BOP da Coruña o pasado 19 de decembro.
08/01/2018. DINAMIZACIóN
A Área de Normalización Lingüística da Universidade de Vigo edita de novo o seu calendario para loitar contra os prexuízos lingüísticos. En 2018, será o ilustrador Kiko Da Silva quen nos faga reflexionar sobre as imaxes negativas que pesan sobre o noso idioma, desde o humor e a ilusión por derrubalas.
Podes facerte cun dos 2000 exemplares en papel nos distintos centros da universidade ou ben descargar a edición dixital aquí.
Podes facerte cun dos 2000 exemplares en papel nos distintos centros da universidade ou ben descargar a edición dixital aquí.
08/01/2018. CURSOS E CONGRESOS
A Escola Galega de Administración Pública convoca cursos de linguaxe xurídica galega, niveis medio e superior, na modalidade de teleformación. Estes cursos están destinados ao persoal da Administración de Xustiza que presta servizos fóra de Galicia. O prazo de presentación de solicitudes é de oito días naturais, contados a partir do seguinte ao da publicación da convocatoria.
08/01/2018. CURSOS E CONGRESOS
A Escola Galega de Administración Pública convoca, en colaboración coa Secretaría Xeral de Política Lingüística, cursos de linguaxe administrativa e xurídica galegas, niveis medio e superior. Os cursos van dirixidos ao persoal de administración e servizos das universidades galegas, da administración xeral da Comunidade autónoma, das institucións e entidades públicas instrumentais do sector público autonómico, das entidades locais de Galicia e da Administración de Xustiza de Galicia. As solicitudes de matrícula deben presentarse a través do formulario en liña da EGAP antes das 14 h do 10 de xaneiro.
28/12/2017. DINAMIZACIóN
As entidades promotoras do Correlingua (A Asociación Socio-Pedagóxica Galega, a CIG-Ensino, A Mesa pola Normalización Lingüística, as deputacións de Pontevedra, A Coruña e Lugo e os concellos de Santiago de Compostela, A Coruña, Ourense, Pontevedra, Vigo e Lugo) presentan o novo sitio web da inicitiva e mais o calendario da vindeira edición de 2018, que levará por lema: “A lingua non para!”. Así mesmo, xa están accesibles tamén as bases dos concursos escolares, nas modalidades de "elaboración de manifesto”, “banda deseñada", “vídeo” e “cantalingua”.
27/12/2017. DINAMIZACIóN
O Portal das Palabras, proxecto promovido pola Real Academia Galega e a Fundación Barrié, fixo público o resultado da votación popular para escoller a Palabra do Ano 2017. Afouteza foi a palabra elixida, despois de recibir o 48% dos votos, dun total de 6.228 persoas que participaron na elección. Debido a unha campaña do Celta de Vigo, afouteza foi durante varios meses deste ano a palabra máis buscada no dicionario en liña da RAG, mais a grande porcentaxe de votos recibidos transcende o ámbito futbolístico e débese probablemente ao seu poder semántico, en alusión a esa actitude colectiva, de ousadía e valor, coa que o pobo galego se enfrontou neste 2017 a algunhas circunstancias adversas, como a vaga de lumes. Para ampliar esta nova, preme aquí.
26/12/2017. AXUDAS E PREMIOS
A rede de empresas Abertos ao Galego, iniciativa promovida pola Mesa pola Normalización Lingüística, difunde unha nova edición do seu catálogo de Nadal, que compila unha selección de servizos e produtos que se ofertan en galego. O obxectivo é achegarlles aos potenciais consumidores ideas de agasallos para esas datas festivas e, ao mesmo tempo, fomentar un consumo responsable que aposte pola calidade, a proximidade e o idioma.
20/12/2017. AXUDAS E PREMIOS
A Cámara de Comercio e o Concello de Santiago de Compostela deron a coñecer os galardoados da décimo oitava edición dos Premios Manuel Beiras. Os premiados deste ano foron a produtora creativa Illa Bufarda, na categoría de empresas que veñen realizando un uso continuado do idioma galego; a empresa Brazolinda, na categoría de nova incorporación ao uso do galego; e o Ilustre Colexio de Avogados de Santiago de Compostela, que recibiu unha mención especial polo seu compromiso co idioma galego. Para ampliar esta información, preme aquí.
20/12/2017. AXUDAS E PREMIOS
A Secretaría Xeral de Política Lingüística e a Dirección Xeral de Educación, Formación Profesional e Innovación Educativa convocan os centros de ensino de titularidade pública para que participen en proxectos educativos de innovación en dinamización lingüística durante o curso académico 2017-2018. Entre os proxectos presentados seleccionaranse cinco, considerados como excelentes, que recibirán unha dotación económica de 2000 euros. As experiencias e os materiais didácticos producidos difundiranse a través do sitio web da SXPL. O prazo de presentación de solicitudes remata o 9 de febreiro de 2018. Para consultar o texto completo da convocatoria preme aquí.
20/12/2017. AXUDAS E PREMIOS
A Axencia Galega das Industrias Culturais (Agadic) convoca axudas para o ano 2018 destinadas á creación de obras audiovisuais, en versión orixinal en lingua galega, con decidida vocación artística e cultural. En concreto, subvenciónase a escrita individual de guións en galego, a realización de proxectos de curtametraxes gravadas en versión orixinal galega e a elaboración de proxectos de longametraxes cinematográficas en versión orixinal galega. O prazo para a presentación de solicitudes é dun mes, contado a partir do día seguinte ao da publicación desta convocatoria.
19/12/2017. DINAMIZACIóN
A Secretaría Xeral de Política Lingüística presenta unha nova edición do programa Nadal en Rede, que percorrerá 41 concellos adscritos á Rede de Dinamización Lingüística entre o 16 de decembro de 2017 e o 7 de xaneiro de 2018, co obxectivo de crear espazos de uso para o galego nestas datas festivas. O programa inclúe as seguintes actividades: Os Bolechas. Un conto de Nadal, actividades lúdicas amenizadas polos membros da familia Os Bolechas; O castiñeiro do Apalpador, peza de monicreques da compañía Fantoches Baj; Nadal Novoneyra. Uxía canta a Uxío, concerto de Nadal no que Uxía Senlle interpreta textos do poeta do Courel; Picariño, concerto didáctico con Senén Vaamonde e mais Alfredo e Manuel, músicos da formación A Roda; e Cancións para nenos e nenas, concerto infantil ofrecido por María do Ceo.
19/12/2017. AXUDAS E PREMIOS
A Deputación da Coruña publica no BOP da provincia as bases da convocatoria de axudas dirixida a concellos, agrupacións de concellos, mancomunidades e outras entidades locais da Coruña, destinadas á creación, mantemento ou reforzo de servizos de normalización lingüística. Estas subvencións diríxense a concellos de 5000 habitantes ou máis, así como a agrupacións de concellos e mancomunidades que, entre eles, cheguen ao mesmo número mínimo de habitantes. Tendo en conta a continua perda de galegofalantes nas grandes cidades, os concellos da Coruña, Santiago de Compostela e Ferrol só poderán solicitar a subvención
para persoal técnico de reforzo do SNL xa creado. O prazo de presentación de solicitudes determinarase a partir da publicación no BOP da convocatoria segundo a remisión da Base de Datos Nacional de Subvencións.
para persoal técnico de reforzo do SNL xa creado. O prazo de presentación de solicitudes determinarase a partir da publicación no BOP da convocatoria segundo a remisión da Base de Datos Nacional de Subvencións.
12/12/2017. DINAMIZACIóN
O Foro Enrique Peinador presenta, cola colaboración da Xunta de Galicia, a campaña “Nadal + Galego”, coa que convida a toda a cidadanía a aproveitar estas festas de Nadal para apoiar as marcas que etiquetan os seus produtos en lingua galega. A iniciativa consiste na difusión dun vídeo publicitario que foi presentado publicamente o pasado 7 de decembro no Pazo de San Roque, en Santiago de Compostela. Podes ampliar a información, premendo aquí.
11/12/2017. EMPREGO
A Consellería de Cultura, Educación e Ordenación Universitaria publica as bases da convocatoria pública para cubrir dúas bolsas de formación nos lectorados de lingua, literatura e cultura galegas nas universidades Nova de Lisboa e Federal da Bahia. O prazo de presentación de solicitudes é dun mes, contado a partir do día seguinte ao da publicación da convocatoria.
05/12/2017. DINAMIZACIóN
A Secretaría Xeral de Política Lingüística presenta a iniciativa Toponimízate, que se desenvolverá no marco da Rede de Dinamización Lingüística (RDL) e que ten como obxectivo preservar e difundir o patrimonio toponímico de Galicia. Ao longo dos vindeiros meses o filólogo Vicente Feijoo, coordinador do Proxecto Toponimia da Real Academia Galega, ofrecerá varias conferencias divulgativas en diferentes concellos adscritos á RDL para convidar á veciñanza a colaborar no labor de recollida e xeolocalización dos microtopónimos do seu contorno. Podes coñecer toda a microtoponimia recollida ata o momento no web do Proxecto Toponimia de Galicia, a través do seu buscador avanzado, e en breve poderás descargar tamén desde ese mesmo web a aplicación colaborativa “Galicia nomeada”, coa que calquera cidadán poderá recoller e xeolocalizar aqueles microtopónimos que aínda non están recollidos.