O Consello da Cultura Galega organiza o encontro Conversas con... Klaus Bochmann arredor da “Hexemonía lingüística e os donos da linguaxe”, que terá lugar o vindeiro martes, 17 de outubro, ás 18:30 horas, no Consello da Cultura Galega. Klaus Bochmann é profesor da Universidade de Leipzig, estudoso da sociolingüística das linguas romances, con especial atención ao estudo lingüístico dos textos políticos, e especialista nos idiomas romanés e moldavo. Para obter máis información do encontro, así como dos trámites de inscrición, preme aquí.
11/10/2017. INVESTIGACIóN
11/10/2017. EMPREGO
O Concello de Outes publica as bases para a contratación temporal dun/dunha técnico/a de normalización lingüística. O contrato rematará o vindeiro 31 de decembro de 2017. O sistema de selección será o de concurso. Os/as aspirantes deben estar en posesión do título de Licenciatura en Filoloxía Galega-Portuguesa, Filoloxía Galega ou Filoloxía Hispánica (subsección Galego-Portugués), do Grao en Lingua Galega, ou calquera outra licenciatura/grao sempre que dispoña do Celga 5. O prazo de presentación de solicitudes é de oito días hábiles, contados a partir da publicación do anuncio da convocatoria. Podes consultar as bases completas da convocatoria premendo aquí.
09/10/2017. CURSOS E CONGRESOS
O Servizo de Normalización Lingüística do Concello de Vigo organiza dous cursos formativos deseñados para ampliar o coñecemento da lingua galega (léxico, fraseoloxía, toponimia...) empregando como fío condutor a auga. No Curso de auga salgada “Chegou o mar á ribeira” o alumnado achegarase ao noso patrimonio lingüístico a partir do coñecemento do medio mariño, mentres que no Curso de auga doce o fío condutor para aprender galego será a relación de Vigo cos ríos, muíños, bosques de ribeira... Os cursos desenvolveranse durante os meses de outubro e novembro de 2017 na oficina municipal de Distrito de Bouzas-Casa Patín. Para saber máis sobre os horarios ou os trámites de inscrición, preme aquí.
05/10/2017. AXUDAS E PREMIOS
O Festival Carballo Interplay, que celebrara a súa quinta edición entre os días 5 e 7 de abril de 2018 en Carballo, convoca o Premio a proxectos de webseries en galego, que ten como obxectivo o fomento da creación e a difusión de contidos audiovisuais orixinais en lingua galega en Internet. O premio, dotado de 1.500 euros, debe destinarse á produción de, como mínimo, tres vídeos do proxecto de webserie premiado. O prazo para enviar os proxectos remata o 18 de marzo de 2018.
29/09/2017. AXUDAS E PREMIOS
O xurado dos Premios da Cultura Galega 2017 fixo públicos os/as oito galardoados/as que son recoñecidos/as este ano polo seu labor no ámbito da creación, conservación e difusión cultural. Na categoría de Lingua, nesta edición outorgóuselle o premio ao proxecto Apego, un programa colectivo deseñado para promover a transmisión do galego como lingua inicial e fomentar a socialización neste idioma entre os nenos e nenas de 0 a 6 anos. Nas outras categorías, os galardoados/as son Xohana Torres (Letras), Berta Álvarez Cáccamo (Artes plásticas), Mabel Rivera (Artes escénicas), Uxía Senlle (Música), Oliver Laxe (Audiovisual), Fundación Rosalía de Castro (Patrimonio cultural) e Cristina Pato (Proxección exterior). Para ampliar esta información, preme aquí.
28/09/2017. CURSOS E CONGRESOS
O Servizo de Normalización Lingüística da Mancomunidade de Ordes organiza un curso básico de lingua galega, dirixido principalmente a persoas de fóra de Galicia interesadas en adquirir as competencias básicas no idioma galego. As sesións desenvolveranse entre o 17 de outubro e o 7 de decembro 2017, os martes e os xoves, en horario de 10:00 h a 12:30 h. As persoas interesadas teñen de prazo ata o 11 de outubro para presentar a súa solicitude. Para acceder á información completa da convocatoria, preme aquí.
26/09/2017. OUTRAS
Desde 2001, por iniciativa do Consello de Europa, cada ano o día 26 de setembro celébrase o Día Europeo das Linguas, co obxectivo de poñer en valor a diversidade lingüística do continente europeo e fomentar a aprendizaxe de linguas entre a cidadanía. En Galicia diferentes entidades organizan tamén actos co gallo desta celebración. Por citar un par de exemplos, a Secretaría Xeral de Política Lingüística da Xunta de Galicia organiza hoxe un concerto multilingüe a cargo de Rosa Cedrón e Emilio Rúa na Escola Oficial de Idiomas de Santiago de Compostela. Así mesmo, A Mesa pola Normalización Lingüística e a Deputación da Coruña conmemoran este día presentado, ás 20 h, no Teatro Colón da Coruña o documental Tosta e o libro Unha guía imperfecta.
25/09/2017. OUTRAS
O pasado venres, 22 de setembro de 2017, tivo lugar en Nova York a cerimonia oficial de entrega, en calidade de préstamo temporal, do Pergamiño Vindel por parte da Morgan Library & Museum, actual propietaria do pergamiño, á Universidade de Vigo. O Pergamiño Vindel, que recolle as sete cantigas de amor medievais (seis delas con notación musical) do trobador Martin Codax, será o protagonista da exposición Un tesouro en sete cantigas, que se inaugurará no Museo do Mar de Galicia o vindeiro 10 de outubro. En paralelo á exposición, desenvolveranse diferentes actividades de divulgación, entre as que destaca a celebración do simposio internacional E irei, madr´a Vigo, organizado polo Departamento de Filoloxía Galega e Latina da Universidade de Vigo. Para ampliar esta nova, preme aquí.
22/09/2017. DINAMIZACIóN
O Servizo de Normalización Lingüística do Concello de Rianxo presenta a campaña En Rianxo, ao noso xeito, que ten como obxectivo promover o uso do galego como lingua vehicular e maioritaria nos establecementos comerciais e hostaleiros de Rianxo. A iniciativa, que se desenvolverá en colaboración coa Asociación Rianxeira de Empresarios, inclúe diferentes accións, como a creación dun espazo web con recursos de utilidade, a organización de cursos de formación para o persoal dos establecementos adheridos, ou a difusión de panos de mesa co lema da campaña, entre outras. Podes obter máis información no web do SNL do Concello de Rianxo.
22/09/2017. CURSOS E CONGRESOS
A Coordinadora de Traballadores/as de Normalización da Lingua organiza o Obradoiro de deseño e maquetación de materiais básicos para a normalización lingüística, deseñado para que o alumnado aprenda a crear e maquetar material gráfico básico para difundir actividades e mensaxes no ámbito da normalización lingüística. O curso, de 16 horas (12 presenciais e 4 a distancia), desenvolverase na Aula de Informática de Docencia da Facultade de Filoloxía da Universidade de Santiago de Compostela. As sesións presenciais terán lugar os días 26 e 27 de outubro de 2017. O prazo de inscrición comeza o 26 de setembro e estará aberto ata o 15 de outubro. Podes ampliar información premendo aquí.
20/09/2017. CURSOS E CONGRESOS
A Biblioteca Provincial da Deputación da Coruña oferta, no marco do programa Falamos 2017, cursos de conversa en galego dirixidos a adultos con coñecementos básicos do idioma que queiran perfeccionar a súa competencia oral. Organizaranse dous niveis, segundo os coñecementos previos do alumnado. As sesións desenvolveranse desde outubro de 2017 a xaneiro de 2018. As persoas interesadas en asistir deben achegarse á Sección Infantil e Xuvenil da Biblioteca o vindeiro 29 de setembro, ás 16:30 h, para reservar a súa praza. Para obter máis información, preme aquí.
20/09/2017. DINAMIZACIóN
O Servizo de Normalización Lingüística e a Concellería de Cultura do Concello de Redondela organizan os obradoiros didácticos Coñecendo Redondela, deseñados para que os nenos e nenas de entre 6 e 12 anos se acheguen ao patrimonio arquitectónico e toponímico do concello. Os obradoiros desenvolveranse os días 25, 26 e 27 de setembro de 2017. A inscrición é de balde e o prazo para formalizala remata o 21 de setembro. Para ampliar esta nova, preme aquí.
20/09/2017. CURSOS E CONGRESOS
A Real Academia Galega organiza, coa colaboración da Deputación de Pontevedra e o Museo de Pontevedra, a II Xornada de Onomástica Galega, que se centrará nos aspectos legais, sociais e lingüísticos dos nomes e apelidos galegos. A xornada terá lugar o 30 de setembro de 2017 no Museo de Pontevedra. A entrada é libre ata completar aforo.
15/09/2017. CURSOS E CONGRESOS
O Servizo de Normalización Lingüística do Concello de Vigo convoca o curso Achégate ao galego, nivel 2, dirixido a todas aquelas persoas, de dentro ou fóra de Galicia, que posúan uns coñecementos xerais do idioma e queiran mellorar a súa competencia lingüística no uso do galego estándar. O curso desenvolverase durante os meses de outubro e novembro de 2017. As persoas interesadas en asistir deben enviar os seus datos (nome completo e teléfono) ao correo electrónico actividades.snl@vigo.org, indicando no asunto da mensaxe “curso galego nivel 2”. Podes ampliar información sobre esta nova premendo aquí.
15/09/2017. EMPREGO
O Concello da Pobra do Caramiñal convoca un proceso selectivo para a formación dunha bolsa de emprego de técnico/a de normalización lingüística, en réxime de persoal laboral temporal. O sistema de selección será o de concurso-oposición. Os/as aspirantes deben estar en posesión dalgunha das seguintes titulacións: Licenciatura en Filoloxía Galego-Portuguesa, Filoloxía Galega ou Filoloxía Hispánica (subsección Galego-Portugués), Grao en Lingua Galega ou calquera outra licenciatura, sempre que acredite o Celga 5. O prazo para a presentación de solicitudes é de dez días naturais, contados desde o seguinte ao da publicación desta convocatoria.
12/09/2017. CURSOS E CONGRESOS
O Consello da Cultura Galega (CCG) organiza a xornada “Etiqueta na túa lingua, camiña polo mundo con identidade”, onde se analizará o papel que xoga a etiquetaxe dos produtos nas estratexias de creación e posta en valor de marcas, así como a presenza do galego (ou outras linguas minoritarias) nos ámbitos do comercio e a industria. A xornada terá lugar o 26 de setembro de 2017, na sede do CCG, en Santiago de Compostela. A matrícula é gratuíta e as prazas (limitadas a 100 persoas) cubriranse por orde de inscrición.
06/09/2017. CURSOS E CONGRESOS
Os vindeiros días 20, 21 e 22 de setembro de 2017 terá lugar en Bilbao e Donostia a oitava edición do Congreso Internacional sobre Pequenas Cinematografías, que organiza anualmente a Universidade do País Vasco UPV/EHU. Nesta edición, cuxo programa leva por título "Diversidade nos cines glocais: linguaxe, cultura, identidade", encargarase de impartir o relatorio inaugural Margarita Ledo Andión, que ofrecerá unha mostra do Novo Cinema Galego e reflexionará sobre o papel das linguas minorizadas no cinema. Podes obter máis información sobre esta nova no web da RAG.
05/09/2017. DINAMIZACIóN
Comeza o novo curso escolar e a comunidade educativa xa ten ao seu dispor os modelos do calendario escolar en lingua galega para o curso 2017-2018. No web da CGENDL están accesibles para descarga, en formato PDF e Excel, as versións anual e mensuais do calendario. Tamén se ofrecen modelos para elaborar a temporalización anual nos diferentes niveis educativos.
31/08/2017. DINAMIZACIóN
Todas as familias que desexen comunicarse por escrito en galego coa escola infantil dos seus fillos e fillas teñen ao seu dispor un novo modelo de axenda infantil, que poden consultar na rede e descargar de balde grazas á iniciativa de Sonia Díaz, Antía Paz e Gerardo Uz. Cada familia poderá imprimir esta axenda (elaborada cunha licenza Creative Commons CC-BY-SA) e deseñar a súa propia capa cunha ilustración personalizada, ou se o prefire, optar por algunha das catro propostas de capa que tamén están accesibles en Internet, autoría de Gerardo Uz (un dos promotores da iniciativa) e da ilustradora Sabela González.
29/08/2017. DINAMIZACIóN
O vindeiro 9 de novembro terá lugar na Sala Capitol de Santiago de Compostela unha nova edición do LGx15. A comisión organizadora convida a todas as persoas interesadas a presentar a súa propia autocandidatura para participar no evento. Para facelo, só é preciso enviar antes do 17 de setembro ao correo info@ctnl.gal un documento cos teus datos persoais e mais unha explicación das ideas e argumentos que queres difundir para o futuro da lingua. Entre todas as candidaturas recibidas, a comisión organizadora escollerá un mínimo de dúas, que se incorporarán ao programa do LGx15 2017. Para obter máis información dos trámites de inscrición, preme aquí.
29/08/2017. EMPREGO
O Concello da Laracha publica as bases para a contratación urxente dun/dunha técnico/a de normalización lingüística. O contrato, de carácter temporal, rematará o vindeiro 15 de outubro de 2017. O sistema de selección será o de concurso. Os/as aspirantes deben estar en posesión do grao en Lingua e Literatura Galegas, grao en Estudos de Galego e Español, grao en Galego e Portugués: Estudos Lingüísticos e Literarios, as licenciaturas equivalentes aos ditos graos ou outras titulacións superiores da área de Humanidades ou de Ciencias Xurídicas e Sociais, sempre que estean en posesión do Celga 5. O prazo de presentación de solicitudes remata o 30 de agosto de 2017. Podes consultar as bases completas da convocatoria premendo aquí.
28/08/2017. CURSOS E CONGRESOS
A Consellería de Cultura, Educación e Ordenación Universitaria convoca cursos de linguaxe administrativa galega (niveis medio e superior) e mais cursos preparatorios para a obtención dos certificados de lingua galega (Celga), que se impartirán nas escolas oficiais de idiomas de Galicia no curso 2017/2018. Os cursos de linguaxe administrativa están dirixidos ao persoal das administracións autonómica e local galegas, así como ao da Administración periférica do Estado en Galicia (excepto o persoal docente e sanitario). Aos cursos preparatorios dos CELGA poderán asistir todas as persoas maiores de dezaseis anos interesadas. O prazo para presentar as solicitudes abranguerá desde o 1 ata o 10 de setembro de 2017, para os cursos do primeiro cuadrimestre e desde o 2 ata o 11 de xaneiro de 2018, para os cursos do segundo cuadrimestre. Para consultar o texto da convocatoria, preme aquí.
02/08/2017. EMPREGO
A Consellería de Cultura, Educación e Ordenación Universitaria publica a convocatoria de oito bolsas de formación vinculadas á actividade do Centro Ramón Piñeiro para a Investigación en Humanidades. Trátase en concreto dos seguintes proxectos: Etiquetador/Lematizador do galego actual (1 bolsa), Corpus documentale latinum Gallaeciae (1 bolsa), Bibliografía Informatizada da lingua galega (1 bolsa), Terminoloxía científico-técnica (1 bolsa), Informes de literatura (1 bolsa), Recuperación de textos literarios e xornalísticos galegos (1 bolsa), Lírica profana galego-portuguesa (1 bolsa) e Dimensións da identidade colectiva de Galicia (1 bolsa). O prazo de presentación de solicitudes é dun mes, contado a partir do día seguinte ao da publicación desta convocatoria.
02/08/2017. AXUDAS E PREMIOS
A Secretaría Xeral de Política Lingüística da Xunta de Galicia fai pública a resolución da convocatoria de subvencións ás entidades locais de Galicia para a promoción do uso do galego. No texto da resolución podes consultar a listaxe de concellos que, ben de xeito individual ou agrupado, recibirán axuda económica para a creación ou mantemento dun servizo de normalización lingüística, así como para o desenvolvemento de programas de dinamización da lingua.
01/08/2017. AXUDAS E PREMIOS
A Secretaría Xeral de Política Lingüística, o Parlamento de Galicia e o Foro Enrique Peinador convocan conxuntamente a XXIV edición dos Premios de Publicidade en Galego. Con eles recoñecerase o labor realizado a prol da normalización lingüística por parte de empresas e entidades que se publicitan nos medios de comunicación.
Estes galardóns, outorgados ata o momento polo Consello Asesor de RTVE en Galicia e da RTVG, organízanse en catro categorías: radio, televisión, internet e prensa escrita. O prazo de inscrición está aberto ata o 2 de outubro de 2017. Accede ás bases premendo aquí.
Estes galardóns, outorgados ata o momento polo Consello Asesor de RTVE en Galicia e da RTVG, organízanse en catro categorías: radio, televisión, internet e prensa escrita. O prazo de inscrición está aberto ata o 2 de outubro de 2017. Accede ás bases premendo aquí.
31/07/2017. AXUDAS E PREMIOS
O xurado do I Premio “Luís Porteiro Garea” recoñeceu, de modo unánime, ao catedrático de Química Inorgánica Manuel Bermejo Patiño, polo seu labor, desde os anos sesenta, de defensa e promoción do galego na docencia e na divulgación científica.
A Universidade de Santiago de Compostela crea o galardón, que ten carácter de distinción, para recoñecer publicamente o traballo de persoas ou colectivos a prol do uso do galego na universidade. Podes ampliar esta información premendo aquí.
A Universidade de Santiago de Compostela crea o galardón, que ten carácter de distinción, para recoñecer publicamente o traballo de persoas ou colectivos a prol do uso do galego na universidade. Podes ampliar esta información premendo aquí.
27/07/2017. DINAMIZACIóN
O Departamento de Lingua Galega do Concello de Santiago de Compostela presenta a segunda edición do programa “A rúa é nosa! Compostela Territorio Xogantín”, unha iniciativa deseñada para crear espazos de socialización en galego a través do xogo. O programa, dirixido a nenas e nenos de entre 6 a 10 anos, desenvolverase entre o 31 de xullo e o 1 de setembro, de 11:30 a 13:30 horas. Para participar, os/as cativos/as só teñen que achegarse ao punto de encontro situado na Praza 8 de Marzo e despois poderán gozar de diferentes actividades lúdicas acompañados por monitores da empresa Xandobela. Podes ampliar información premendo aquí.
26/07/2017. EMPREGO
A Consellería de Cultura, Educación e Ordenación Universitaria publica as bases da convocatoria pública para cubrir unha praza no lectorado de lingua, literatura e cultura galegas da Universidade de Kiel (Alemaña). O prazo de presentación de solicitudes é dun mes, contado a partir do día seguinte ao da publicación da convocatoria.
18/07/2017. INVESTIGACIóN
O Grupo de Tecnoloxías Multimedia da Universidade de Vigo, o Instituto da Lingua Galega da Universidade de Santiago de Compostela e o Centro Ramón Piñeiro para a Investigación en Humanidades presentaron publicamente a versión definitiva do sintetizador de voz CoToVía, un sistema de conversión automática texto-voz que permite converter un texto escrito en galego nunha cadea oral. Esta ferramenta está agora ao dispor de toda a comunidade como Creative Commons, cunha licenza GPL 3.0+, polo que calquera empresa ou particular poderá empregala libremente. O enderezo para a descarga é "ftp.net-snmp.org". Podes ampliar esta información premendo aquí.
17/07/2017. INVESTIGACIóN
Xosé A. Fernández Salgado, profesor da Universidade de Vigo, acaba de publicar o libro Cincuenta décimas contra don Diego Zernadas, que recolle a edición e estudo dun novo texto en galego do século XVIII do que se descoñecía a súa existencia, atopado polo propio autor nos fondos da Fundación Penzol. Trátase dun manuscrito inédito, elaborado arredor da década de 1770, que contén cincuenta décimas dirixidas contra o Cura de Fruíme, e que destaca por estar escrito integramente en galego, pola súa calidade poética e polo seu rexistro lingüístico culto, características que ata o momento non se consideraban propias dos textos galegos desa época. A publicación inclúe dúas edicións do manuscrito, unha case paleográfica e outra co texto actualizado graficamente, co obxectivo de facilitar a súa difusión entre o público non especializado. Podes obter máis datos sobre esta nova no Diario da Universidade de Vigo.