O Centro de Documentación Sociolingüística de Galicia presenta o novo produto documental De ducia en ducia pola lingua, unha visita polos seus fondos a través de Pinterest.
22/12/2016. DINAMIZACIóN
21/12/2016. DINAMIZACIóN
O Equipo de Normalización e Dinamización Lingüística da Escola Oficial de Idiomas da Coruña organiza un obradoiro de iniciación á curtamentraxe en galego, no marco do proxecto anual de promoción do Festival CinEOI Coruña 2017, que terá lugar en abril do vindeiro ano. Este obradoiro, de 30 horas de duración, está dirixido a estudantes da EOI da Coruña, ESO, bacharelato e FP dos centros públicos e concertados da cidade da Coruña e será impartido Omar Rabuñal Varela (realizador, guionista e actor). O prazo de inscrición remata o 30 de decembro de 2016. Para ampliar información, preme aquí.
20/12/2016. LEXISLACIóN
O Parlamento de Galicia, a Xunta de Galicia, a Universidade de Santiago de Compostela e a Axencia para a Modernización Tecnolóxica de Galicia presentan Lex.gal, unha base de datos en liña coa versión consolidada, actualizada e en galego de toda a lexislación galega. O portal inclúe un buscador a través do que se pode acceder a todas as normas con rango de lei (leis e decretos lexislativos) aprobadas polo Parlamento de Galicia no período 1981-2016, así como aos decretos con contido normativo e ás ordes vixentes de maior relevancia aprobadas polas consellerías.
20/12/2016. DINAMIZACIóN
A rede de empresas Abertos ao Galego, iniciativa promovida pola Mesa pola Normalización Lingüística, difunde unha nova edición do seu catálogo de Nadal, que compila unha selección de servizos e produtos que se ofertan en galego. O obxectivo é achegarlles aos potenciais consumidores ideas de agasallos para esas datas festivas e, ao mesmo tempo, fomentar un consumo responsable que aposte pola calidade, a proximidade e o idioma.
19/12/2016. OUTRAS
O pasado sábado, 17 de decembro de 2016, tivo lugar en Donostia a presentación pública do Protocolo para a garantía dos dereitos lingüísticos (ou Protocolo Donostia). O proxecto, impulsado de forma conxunta por Kontseilua e a Fundación Donostia 2016, foi elaborado por diferentes axentes sociais de toda Europa implicados na defensa das linguas minorizadas, das minorías e dos dereitos humanos. O documento contén as condicións mínimas necesarias que deben cumprirse para garantir os dereitos lingüísticos da cidadanía, recollidos na Declaración universal de dereitos lingüísticos (Barcelona, 1996). Podes ampliar esta información premendo aquí.
19/12/2016. OUTRAS
A Asociación Cultural Alexandre Bóveda organiza, coa colaboración do Concello da Coruña, o ciclo de palestras “A lingua galega na Coruña”, que terán lugar os días 19, 20 e 21 de decembro de 2016 na propia sede da asociación. O ciclo inclúe os seguintes relatorios: “O galego na Coruña actual”, impartido por Xosé Ramón Freixeiro Mato; “Aproximación ao galego popular da comarca da Coruña a través do cancioneiro tradicional”, impartido por Ricardo Seixo Fernández; e “Reivindicación identitaria e lingüística na Coruña das Irmandades da Fala”, impartido por Uxío-Breogán Diéguez Cequiel.
16/12/2016. DINAMIZACIóN
A Secretaría Xeral de Política Lingüística presenta unha nova edición do programa Nadal en Rede, que percorrerá cincuenta concellos adscritos á Rede de Dinamización Lingüística entre o 17 de decembro de 2016 e o 7 de xaneiro de 2017, co obxectivo de crear espazos de uso para o galego nestas datas festivas. O programa inclúe as seguintes actividades: Os Bolechas, Nadal en familia, actividades lúdicas amenizadas polos membros da familia Os Bolechas; O castiñeiro do Apalpador, peza de monicreques da compañía Fantoches Baj; Obradoiro de xogos e xoguetes en galego, que desenvolverá a empresa xogueteira Brazolinda; Nadal de vila en vila, obradoiro musical con Uxía e Santi Cribeiro; e Cantarolas para xente miúda, concerto didáctico da man de Senén Vaamonde e de dous músicos do grupo A Roda.
15/12/2016. DINAMIZACIóN
O Centro Veciñal e Cultural de Valadares e a Asociación ORAL de Galicia organizan o XIX Certame Internacional de Improvisación Oral en Verso, que terá lugar os domingos 18 e 25 de decembro de 2016, ás 18:30 h, no CVC de Valadares (Vigo). Ao longo destas dúas sesións haberá diferentes actuacións de desafío, improvisación e enxeño, con participantes de Galicia, Cantabria e Portugal. O 25 de decembro terá lugar tamén a presentación da obra Repente galego, unha monografía sobre a improvisación oral galega, autoría de Ramon Pinheiro Almuinha.
15/12/2016. AXUDAS E PREMIOS
A Cámara de Comercio e o Concello de Santiago de Compostela fixeron público os galardoados da décimo sétima edición dos Premios Manuel Beiras. Os premiados deste ano foron o estudo de interiorismo Nanube, na categoría de empresas que veñen realizando un uso continuado do idioma galego; a empresa Miranda Priestly, editora da revista Coralia, na categoría de nova incorporación ao uso do galego; e a editorial Alvarellos, que recibiu unha mención especial pola súa contribución á cultura galega durante case catro décadas. Para ampliar esta información, preme aquí.
15/12/2016. DINAMIZACIóN
O Servizo de Normalización Lingüística do Concello de Vigo presenta unha nova edición do programa “No Nadal… un conto”, que se desenvolverá entre o 17 de decembro de 2016 e o 4 de xaneiro de 2017 en diferentes lugares do concello. A iniciativa, que ten como obxectivo crear espazos de lecer en galego para o público familiar e infantil, inclúe contadas, monicreques, cancións, xogos e espectáculos variados. Como novidade, neste edición organizáronse tamén actividades para bebés e as súas familias.
13/12/2016. EMPREGO
O Concello de Abegondo convoca o proceso selectivo para a contratación laboral temporal dun técnico/a de normalización lingüística. Os/as aspirantes deben estar en posesión, como mínimo, da licenciatura en Filoloxía Galega. O proceso selectivo será mediante o sistema de concurso e o prazo para presentar as solicitudes é de 8 días naturais a partir da publicación do anuncio no BOP. Podes consultar as bases da convocatoria premendo aquí.
12/12/2016. EMPREGO
O Concello de Rianxo convoca o proceso selectivo para a contratación laboral temporal dun técnico/a de normalización lingüística. Os/as aspirantes deben estar en posesión da licenciatura en Filoloxía Galega, Galego-Portuguesa ou Hispánica (subsección galego-portugués); do grao en Lingua Galega ou de calquera outra licenciatura, sempre que dispoña do Celga 5. O proceso selectivo será o de concurso-oposición e o prazo para presentar as solicitudes remata o 16 de decembro de 2016. Podes consultar toda a información relacionada con esta convocatoria, premendo aquí.
09/12/2016. DINAMIZACIóN
A Casa-Museo Manuel María organiza o concerto A música amorosa das palabras, co que quere poñerlle o ramo a este ano de homenaxe á figura de Manuel María, autor homenaxeado pola Real Academia Galega no Día das Letras Galegas 2016. O acto terá lugar o xoves 15 de decembro de 2016, ás 20 horas, no Teatro Colón da Coruña, onde Uxía, Xabier Díaz e Guillerme Fernández serán os encargados de poñer o acompañamento musical aos versos de Manuel María. A entrada é de balde até completar o aforo.
09/12/2016. DINAMIZACIóN
Os servizos de normalización lingüística dos concellos de Ames, Santiago e Teo presentan, de forma conxunta por segundo ano consecutivo, a iniciativa Conto, canto o Nadal, para convidar os/as nenos/as a que empreguen o galego nas cartas que envíen aos magos e inclúan nelas contos, cantos, xogos, receitas ou tradicións relacionadas co Nadal que lles transmitan os maiores da súa contorna. Todos os/as nenos/as que participen recibirán unha carta resposta cun pequeno agasallo. A maiores, as seis cartas máis interesantes e creativas recibirán un premio. O prazo para enviar as cartas remata o 3 de xaneiro de 2017. Para ampliar a nova, preme aquí.
09/12/2016. DINAMIZACIóN
Erguer - Estudantes da Galiza organiza unhas xornadas de lingua que terán lugar os vindeiros días 13, 14 e 15 de decembro de 2016 na Facultade de Filoloxía da Universidade de Santiago de Compostela. Ao longo destes tres días analizaranse, entre outros temas, as consecuencias para o idioma galego da aplicación da LOMCE, o papel das institucións na normalización lingüística ou as alternativas existentes á norma oficial, principalmente no eido da edición. As xornadas clausuraranse cunha festa (recital, Galeoke e petiscos) no Centro Social A Gentalha do Pichel. Podes consultar o programa completo premendo aquí.
07/12/2016. INVESTIGACIóN
O Departamento de Filoloxía Galega e Latina da Universidade de Vigo presenta o primeiro número da revista Cumieira. Cadernos de investigación da Nova Filoloxía Galega, que nace co obxectivo de dar a coñecer os traballos científicos do alumnado, tanto de grao como de mestrado, no ámbito dos estudos lingüísticos e literarios en galego. O primeiro volume, editado polo profesor Xosé A. Fernández Salgado, recolle os traballos de sete investigadoras novas sobre diferentes temas lingüísticos e literarios. Desde o departamento animan o alumnado a participar nos vindeiros números enviando as súas investigacións, que deben ter forma de artigo académico, non exceder as 10.000 palabras e estar centradas nos estudos lingüísticos e literarios galegos, ou doutras linguas sempre que teña relevancia para o estudo do galego. Para ampliar a nova, preme aquí.
02/12/2016. DINAMIZACIóN
O Concello de Cerdedo-Cotobade, en colaboración coa Secretaría Xeral de Política Lingüística, presenta “Follas ao aire”, un proxecto de dinamización lingüística para fomentar a lectura en galego. A iniciativa consiste na creación de dez puntos de lectura ao aire libre en diferentes localizacións do municipio. Nestes puntos de lectura, que contan co seu respectivo banco e unha urna selada para gardar os libros, pódense consultar 20 obras en lingua galega (10 destinadas ao público adulto e outras 10 de temática infantil) de diferentes autores/as galegos/as. Para ampliar a información, preme aquí.
02/12/2016. DINAMIZACIóN
A Concellaría de Normalización Lingüística do Concello de Silleda, en colaboración cos centros educativos e mais o sector do comercio deste municipio, están a desenvolver unha nova edición do programa Silledagasalla, que por terceiro ano consecutivo quere fomentar o uso do galego no ámbito do comercio. No marco desta iniciativa, o alumnado elaborou os lemas en galego que posteriormente os comercios do municipio poderán repartir entre a súa clientela convertidos en adhesivos para acompañar os agasallos de Nadal.
01/12/2016. DINAMIZACIóN
O Portal das Palabras organiza unha nova edición da iniciativa Palabra do ano, co obxectivo de que a sociedade tome conciencia de que o idioma nos representa como pobo e a través das súas palabras podemos definir colectiva e simbolicamente o ano que remata. Todas as persoas interesadas poden enviar as súas propostas durante as dúas primeiras semanas de decembro. Tras seleccionar os termos máis populares e de maior carga semántica, abrirase unha votación para seleccionar a palabra favorita, que se converterá na Palabra do ano 2016.
29/11/2016. DINAMIZACIóN
Os servizos de normalización lingüística de once concellos galegos, xunto coas universidades da Coruña, Santiago de Compostela e Vigo, presentan o proxecto Youtubeir@s, un concurso de creación de vídeos que nace co obxectivo de incrementar o uso do galego na canle Youtube. O concurso, dirixido a persoas maiores de 14 anos, ten dúas categorías: “Vídeo-Facermos”, para vídeo-titoriais en galego nos que se amosen saberes e procesos de elaboración, e “Vídeo-Opinarmos”, para vídeos en galego nos que se expoñan opinións ou valoracións sobre un tema. O prazo de inscrición remata o 28 de abril de 2017. Outorgarase un premio de 1.000 euros por cada categoría, ademais de catro mencións honoríficas, que recibirán 500 euros cada unha. Podes consultar as bases completas do concurso premendo aquí.
28/11/2016. DINAMIZACIóN
O Servizo de Normalización Lingüística do Concello de Vigo organiza unha nova edición da iniciativa “Un trasno no barrio”, unha xincana lingüística que nesta ocasión se desenvolverá entre o 1 e o 28 de decembro de 2016 polos comercios do barrio vigués das Travesas. O xogo, dirixido a nenas e nenos de entre 6 e 12 anos, consistirá en resolver os enigmas seguindo as pistas que se atopan nos establecementos participantes, ata completar todas as respostas. As papeletas coas respostas deben entregarse na sede da Asociación de Comerciantes e Empresarios das Travesas. Entre as papeletas entregadas sortearase unha tableta.
23/11/2016. DINAMIZACIóN
A Comisión de Normalización Lingüística da Facultade de Ciencias da Comunicación entregou, o pasado 9 de novembro, os premios do II Concurso de radiodramas en galego e mais dos V Premios de pezas audiovisuais curtas de comedia, dous certames dirixidos á comunidade universitaria para fomentar a creatividade en galego. Xa podes consultar en Internet todos os traballos premiados. Os radiodramas gañadores foron “Co mozo do corazón”, de Antonio Mosquera; e “Peido”, de Margarita Rodríguez. No caso das curtas, foron galardoadas “Nada peor”, de Sara Fernández; “1000 maneiras de espichala”, de Antía Otero; e “Non é país para mocosos”, de Juan Manuel Sánchez.
23/11/2016. CURSOS E CONGRESOS
O Servizo de Asesoramento Lingüístico do Colexio de Avogados de Santiago de Compostela organiza, en colaboración coa Secretaría Xeral de Política Lingüística, a décima edición da Xornada “Xustiza e Lingua, reflexións para a normalización”, que ten como obxectivo promover a reflexión sobre o proceso de normalización lingüística no ámbito da xustiza. A xornada terá lugar o vindeiro 29 de novembro de 2016, ás 19:00 h, no salón de actos do Colexio de Avogados compostelán. A matrícula é de balde.
21/11/2016. CURSOS E CONGRESOS
Unesco Etxea e a Fundación Donostia/San Sebastián 2016 organizan o Foro Europeo da Diversidade Lingüística, un encontro que terá lugar en Donostia-San Sebastián os días 15 e 16 de decembro de 2016. No foro participarán axentes e entidades da sociedade civil, a investigación e a cultura a nivel europeo, así como organismos gubernamentais, co obxectivo de reflexionar sobre o desenvolvemento das linguas minorizadas de Europa. Ao día seguinte, o 17 de decembro, presentarase oficialmente, tamén en Donostia, o Protocolo para a Garantía dos Dereitos Lingüísticos.
18/11/2016. DINAMIZACIóN
O Servizo de Normalización Lingüística do Concello de Vigo organiza dous obradoiros didácticos destinados a difundir a toponimia e mais os nomes da flora e fauna da contorna. No obradoiro Topo que?, os/as rapaces/zas de entre 10 e 13 anos poderán familiarizarse, de xeito lúdico, co concepto de toponimia e coñecer o significado dos topónimos máis frecuentes da súa contorna. Para os/as nenos/as de 5 a 10 anos deseñouse o obradoiro de creación plástica Ríos e bosques que falan, onde terán oportunidade de descubrir os nomes das plantas e animais máis comúns nos ríos e bosques galegos. As prazas estarán dispoñibles ata completar o aforamento do lugar da actividade.
18/11/2016. AXUDAS E PREMIOS
A Asociación Cultural O Brado, da Estrada, fixo públicos os galardoados dos XXVI Premios San Martiño de Normalización Lingüística, convocados anualmente para premiar a persoas e colectivos que destacan polo seu labor de promoción do idioma galego. Os premiados nesta edición son o párroco Jesús Mayo Brenlla, na categoría “A Estrada e Comarca de Tabeirós-Terra de Montes”; a Compañía Viravolta Títeres, na categoría “Galicia enteira”; e o escritor Salvador García-Bodaño, na categoría “Toda unha vida”. Os galardóns serán entregados nun acto público que terá lugar o 1 de decembro no Teatro Principal da Estrada.
15/11/2016. DINAMIZACIóN
A Concellaría de Normalización Lingüística do Concello de Bueu presenta “O galego. A lingua do padal”, un proxecto que desenvolve en colaboración coa Deputación de Pontevedra e mais a Irmandade Galega de Agroalimentarios e Adegueiros. A iniciativa consistirá no desenvolvemento dunha mesa redonda sobre a etiquetaxe en galego, na que catro empresas (Embutidos Lalinense, Vermú Petroni, Queixos Hoxe e Adega Sameirás) falarán sobre a importancia do idioma como marca de calidade para a comercialización dos seus produtos. O evento inclúe unha mostra de degustación e terá lugar o vindeiro sábado, 19 de novembro de 2016, ás 12:00 h, na carpa da Praza Massó. Para ampliar esta nova, preme aquí.
14/11/2016. DINAMIZACIóN
O Equipo de Dinamización da Lingua Galega do CEIP López Ferreiro (Santiago de Compostela) convoca o XIII Concurso de Redacción Histórica "Falemos da Nosa Historia", dirixido aos escolares da Comunidade Autónoma de Galicia que ao longo do curso escolar 2016- 2017 cursen estudos de 5º e 6º curso de Educación Primaria ou 1º ciclo da ESO. O obxectivo é reflexionar sobre a nosa historia a partir de ditos, refráns, modismos ou lendas. O tema desta edición é “María Soliña”. O prazo de presentación dos traballos é do 1 ao 28 de febreiro de 2017. Para consultar as bases completas do concurso preme aquí.
14/11/2016. AXUDAS E PREMIOS
O xurado do XIII Premio Luísa Villalta a Iniciativas Normalizadoras decidiu, por unanimidade, conceder este premio na modalidade de “Premio a unha idea para a promoción do galego” ao traballo presentado baixo o lema Que o verso baixe á rúa. O traballo é da autoría de Patricia Carballal Miñán, Estefanía Castro, María Montserrat Muriano Rodríguez, Iria Sobrino e Roberto Suárez Brandariz, da Facultade de Ciencias da Educación da Universidade da Coruña. Os/as gañadores/as recibirán 800 euros. Así mesmo, o xurado decidiu deixar deserto o premio na modalidade “Deseño dunha campaña normalizadora”.
09/11/2016. CURSOS E CONGRESOS
A Comisión de Normalización Lingüística da Facultade de Ciencias da Educación da USC organiza a IX Xornada "Recursos educativos en galego”, que terá lugar os días 16 e 17 de novembro de 2016 no Salón de Actos da Facultade de Ciencias da Educación (Campus Vida). A xornada, que nesta edición se centrará na educación de adultos, está destinada aos membros da comunidade educativa (alumnado, profesorado e PAS) das universidades galegas interesados en coñecer novas estratexias e recursos didácticos en galego. O prazo de inscrición remata o 13 de novembro.