A Real Academia Galega organiza o Simposio Manuel María, para profundar na vida e obra do autor ao que se lle dedicou este ano o Día das Letras Galegas. As sesións, nas que participarán máis dunha vintena de persoas expertas na obra de Manuel María, terán lugar os días 22, 23 e 24 de novembro de 2016 na sede da Real Academia Galega. Podes ampliar información premendo aquí.
08/11/2016. CURSOS E CONGRESOS
08/11/2016. DINAMIZACIóN
O Clube da Lingua do IES Marco do Camballón de Vila de Cruces convoca a terceira edición do concurso de fotografías de tattoos "Galiza, à flor da pel", co obxectivo de darlles visibilidade ao idioma e identidade galega dentro da cultura da tatuaxe. O certame ten dúas categorías, unha para fotografías de tatuaxes con palabras en galego e outra, para fotografías de tatuaxes con iconografía ou simboloxía de temática galega. O prazo para enviar as fotografías remata o 1 de maio de 2017.
07/11/2016. CURSOS E CONGRESOS
A Asociación Socio-Pedagóxica Galega organiza as XVII Xornadas de expresión oral “Tíralle da Lingua”, dirixidas ao profesorado co obxectivo de transmitirlles a importancia do factor oral na recuperación da lingua e proporcionarlles técnicas para traballar a oralidade na aula. As sesións desenvolveranse o 26 de novembro de 2016 no IES As Fontiñas (Santiago de Compostela). O prazo de matrícula (que debe realizarse a través do web da AS-PG) remata o vindeiro 24 de novembro. O proxecto “Tíralle da Lingua” consta tamén dun concurso de relato oral, dirixido ao alumnado, cunha fase final que se celebrará a finais de abril de 2017 en Santiago de Compostela.
04/11/2016. DINAMIZACIóN
O Servizo Municipal de Educación do Concello da Coruña organiza o V Certame de Monólogos Cómicos en Lingua Galega 2016, dirixido ao alumnado de educación secundaria, bacharelato e ciclos formativos de FP do concello. A finalidade da iniciativa é potenciar a competencia oral en galego, así como a creatividade e a naturalidade no seu uso. O prazo de inscrición para o alumnado remata o 30 de novembro de 2016. O acto público de interpretación dos monólogos terá lugar o 15 de decembro de 2016 no teatro Rosalía de Castro. O alumnado participante que o desexe tamén poderá asistir, o 19 de novembro, ao obradoiro de interpretación Conecta!, impartido polo actor e docente Ramiro Neira.
04/11/2016. OUTRAS
A Comisión de Normalización Lingüística da Facultade de Filoloxía e Tradución da Universidade de Vigo, coa colaboración da Área de Normalización Lingüística, organiza o relatorio “Lingua e xénero”, que será impartido por Goretti Sanmartín Rei. O acto terá lugar o vindeiro mércores, 9 de novembro, ás 13:00 h, no Salón de Graos da Facultade de Filoloxía e Tradución.
04/11/2016. DINAMIZACIóN
A Institución Galega de Ciencia (Igaciencia) conmemora hoxe, 4 de novembro, o VII Día da Ciencia en Galego, que nesta edición estará dedicado á Bioloxía. Este ano os científicos homenaxeados son Gregor Mendel, descubridor das leis que rexen a herdanza xenética, e Cruz Galléstegui Unamuno, introdutor da xenética en España. A Xunta de Galicia tamén celebrará esta data cun acto de homenaxe a Cruz Galléstigui, que terá lugar hoxe, 4 de novembro, ás 12:30 h, no Parlamento de Galicia.
02/11/2016. DINAMIZACIóN
O Concello de Santiago e a Cámara de Comercio de Santiago de Compostela convocan o XVII Premio Manuel Beiras, que ten como finalidade recoñecer publicamente o compromiso coa normalización lingüística no sector empresarial. O galardón contempla dúas categorías, unha para as empresas que veñen realizando un uso continuado da lingua galega e outra para as que se incorporaron recentemente ao uso do galego. A maiores, o xurado tamén pode outorgar unha distinción especial a persoas ou entidades que destaquen polo seu labor a prol da normalización do galego na empresa. O premio, que ten carácter de distinción pública, materialízase nun elemento simbólico de carácter artístico. Para obter máis información, preme aquí.
02/11/2016. OUTRAS
O Consello da Cultura Galega (CCG) ingresou onte, 1 de novembro de 2016, na Comunidade dos Países de Língua Portuguesa (CPLP) en calidade de observador consultivo. O CCG xa iniciara os trámites para incorporarse á CPLP en 2010, co ánimo de servir de ligazón permanente entre a CPLP e a cultura e lingua galegas. A CPLP é un foro multilateral de cooperación no que participan os estados que teñen o portugués como lingua oficial, así como outras institucións vinculadas á lusofonía que comparten intereses económicos, sociais e culturais. Podes ampliar a nova premendo aquí.
31/10/2016. INVESTIGACIóN
Neste segundo semestre de 2016, a Universidade Federal do Paraná (UFPR), a máis antiga de Brasil, incluíu na súa oferta educativa a materia optativa de Introdução à Língua e à Cultura Galegas, que está sendo impartida polo profesor de Letras Francisco Calvo del Olmo. A oferta tivo unha boa acollida e as vinte prazas ofertadas este ano foron xa ocupadas por alumnado de deferentes graos. Con esta nova incorporación da UFPR á rede de Estudos Galegos no Brasil, xa son cinco as universidades brasileiras que inclúen o estudo da lingua galega na súa oferta académica. No blog Quilombo Noroeste podes obter información detallada sobre a introdución dos estudos galegos na UFPR.
31/10/2016. DINAMIZACIóN
O Secretaría Xeral de Política Lingüística presenta o programa “O galego é un mundo”, que desenvolverá en colaboración cos equipos de dinamización lingüística de 12 centros de ensino secundario. O proxecto consistirá nunha serie de relatorios interactivos, impartidos polo sociolingüista bengalí Anik Nandi, nos que se fará unha análise contrastiva entre a realidade sociolingüística de Galicia e a da India. O obxectivo é que o alumnado tome consciencia da diversidade lingüística do planeta, axudando así a erradicar os prexuízos existentes na actualidade cara ao galego. Para ampliar esta información, preme aquí.
28/10/2016. DINAMIZACIóN
A Consellería de Cultura, Educación e Ordenación Universitaria presentou o manifesto e as actividades do programa Novembro, mes da ciencia en galego nas bibliotecas – 2016, co obxectivo de difundir a divulgación científica en galego en todas as bibliotecas públicas galegas. O programa inclúe obradoiros científicos, exposicións, mostras bibliográficas e charlas divulgativas, entre outras actividades. No marco deste programa, a Asesoría de Bibliotecas Escolares da Consellería pon ao dispor da comunidade educativa un repositorio dixital de materiais didácticos para traballar contidos científicos en galego. Para ampliar información, preme aquí.
27/10/2016. DINAMIZACIóN
A Asociación de Funcionarios para a Normalización Lingüística convida, un ano máis, a todos os concellos galegos a festexar o vindeiro 29 de outubro o Día da Restauración da Memoria Lingüística de Galicia, galeguizando as rotulacións dos cemiterios e colocando unha placa que diga: "Na memoria de todos os que xacen aquí, porque grazas a eles Galicia segue a ter cultura e lingua de seu". Os asistentes a estes actos conmemorativos terán a ocasión de asinar as Actas de Vontades, onde poden facer constar o seu desexo a que todo o relativo ao seu pasamento se realice en galego. No libro “En galego, agora e sempre”, editado en 2008 pola Asociación de Funcionarios para a Normalización Lingüística, podes ler unha selección de mandas testamentarias nas que diferentes persoas manifestan as súas últimas vontades con respecto á lingua. Podes ampliar a información premendo aquí.
25/10/2016. DINAMIZACIóN
Xa está en marcha unha nova edición do Club de Debate, un proxecto colaborativo, promovido polos servizos de normalización lingüística de diferentes concellos galegos, que ten como obxectivo a dinamización lingüística e cultural no ámbito educativo, fomentando a fluidez comunicativa en galego, o pensamento crítico e o respecto pola diversidade de opinións. Poden participar equipos mixtos de entre 4 e 10 mozos/as de 3º e 4º de ESO, 1º de Bacharelato e ciclos formativos. Haberá diferentes premios nas fases de zona e o equipo que gañe a fase final será premiado cunha viaxe en grupo. O prazo de inscrición remata o 30 de novembro de 2016.
25/10/2016. OUTRAS
O Consello Directivo en funcións da Coordinadora Galega de ENDL anuncia que na asemblea extraordinaria do pasado 23 de setembro de 2016 decidiuse non continuar coa actividade da Coordinadora, ao non presentarse candidaturas dispostas a asumir a dirección. A Coordinadora Galega de ENDL naceu en abril de 2009 co obxectivo de coordinar as actividades e experiencias dos equipos de toda Galicia, así como dar voz pública aos ENDL que traballan nos centros de ensino. Nestes sete anos de intensa actividade, a CGENL converteuse nun dos referentes en Galicia da normalización do galego no ensino, chegando a ser galardoada con diferentes premios (Premio Mestre Mateo 2010, Premio Roberto Vidal Bolaño 2011, Premio Xoán Manuel Pintos 2011 e Premio da Cultura Galega 2015). O seu sitio web tamén é un referente para os profesionais da educación, grazas ao repositorio de recursos didácticos que ofrece e que estará accesible ata decembro de 2017.
25/10/2016. OUTRAS
A Real Academia Galega organiza, no marco do ciclo de mesas de debate No tempo das Irmandades: fala, escrita e prelos, o encontro Lingua e ideas lingüísticas, que terá lugar mañá, 26 de outubro, no Centro Cultural Marcos Valcárcel de Ourense. O acto estará moderado polo presidente da RAG, Xesús Alonso Montero, e nel intervirán os académicos Henrique Monteagudo, Rosario Álvarez e Antón Santamarina. Para ampliar información, preme aquí.
24/10/2016. DINAMIZACIóN
A Coordinadora de Traballadores/as de Normalización da Lingua organiza a segunda edición do evento LGx15, un proxecto no que, a través de charlas breves e amenas, diferentes participantes transmiten argumentos e experiencias para influír no futuro do galego. O acto, que será presentado polos regueifeiros Josiho da Teixeira e Luis o Caruncho, contará tamén coa actuación musical de Poetarras. O evento terá lugar o vindeiro 24 de novembro de 2016, na Sala Capitol de Santiago de Compostela, ás 18:00 horas. A entrada custa 6 euros en venda anticipada e 10 euros o mesmo día na billeteira.
24/10/2016. AXUDAS E PREMIOS
A Secretaría Xeral de Política Lingüística convoca unha nova edición do Concurso-Exposición Letras Galegas, dirixido aos centros de ensino público non universitario para a elaboración dunha exposición relacionada coa obra, época e lingua do autor homenaxeado no Día das Letras Galegas 2017, Carlos Casares Mouriño. O concurso consta de dúas categorías, unha para os centros de educación infantil e primaria e outra para os restantes. Outorgarase un premio en metálico de 2000 euros para cada categoría. O prazo de presentación dos traballos remata o 22 de xaneiro de 2017. Para obter máis información, preme aquí.
20/10/2016. OUTRAS
O Consello da Cultura Galega presenta o informe “O libro e a edición en Galicia (2016)”, no que se analiza a situación editorial en Galicia nos últimos anos, partindo dos datos achegados polo Ministerio de Educación, Cultura e Deporte, na súa “Estadística de la edición española de libros con ISBN" e na "Panorámica de la edición española de libros”. No que respecta á edición en galego, os datos reflicten un descenso do 43,8% de libros publicados en galego no período 2008-2015, cunha perda de máis de 1000 títulos. A porcentaxe de edición en galego respecto do total de edición en Galicia sitúase entre o 52% e o 67% nos últimos anos. No informe podes consultar máis información, segundo a materia, prezo, formato ou carácter xurídico da entidade editora, así como datos comparativos con outras comunidades autónomas do Estado.
20/10/2016. DINAMIZACIóN
O Servizo de Normalización Lingüística do Concello de Ames organiza unha nova edición do Concurso Radiofónico de Teatro Lido Desata a Lingua!!, co obxectivo de dinamizar o uso oral e escrito do galego entre a mocidade de xeito lúdico e creativo. O certame está dirixido ao alumnado de 2º ciclo da ESO e do Bacharelato dos centros de ensino do Concello de Ames. O prazo de inscrición remata o 28 de outubro de 2016. Todo o alumnado inscrito participará nunha xornada de formación na que se achegarán claves de guionización, locución e interpretación. Outorgaranse tres premios dotados con 200 euros cada un. Para consultar as bases completas, preme aquí.
18/10/2016. DINAMIZACIóN
A empresa E-Monte Solucións Forestais está a desenvolver a campaña #TeñoMonte, galardoada polo Concello de Santiago cun dos premios do IV Concurso de Publicidade Comercial en Galego. Os obxectivos son dar a coñecer a plataforma de compra/venda de madeira eMonte.es, así como axudar a recuperar a microtoponimia do monte galego. Ademais dos diferentes photocall que están a ter lugar en diferentes espazos de Santiago, onde os propietarios/as dos terreos se retratan xunto aos nomes tradicionais dos seus montes, tamén está aberto o concurso en liña #TeñoMonte. Os propietarios/as que contesten, antes do 25 de outubro, un formulario sobre o topónimo e ubicación do seu monte poderán gañar unha noite para dúas persoas nunha cabana en Serra de Outes. Para ampliar información, preme aquí.
18/10/2016. DINAMIZACIóN
A Irmandade Xurídica Galega e o Concello de Cangas organizan o acto Unha lingua de lei, no que se conmemorarán as primeiras sentenzas en lingua galega ditadas nos Xulgados de Cangas polos maxistrados Dalila Dopazo Blanco e Alejandro Couselo Barrio. O acto terá lugar o vindeiro día 26 de outubro, ás 18:00 h, fronte ao edificio dos Xulgados. Ao remate, terá lugar na Casa da Xuventude a sinatura pública, por parte de avogados e procuradores do partidos xudicial, da Declaración a prol da normalización lingüística.
18/10/2016. DINAMIZACIóN
O Servizo de Normalización Lingüística do Concello de Zas presenta o concurso PanxoliñaZAS, co obxectivo de promover o uso do galego nos espazos lúdicos e festivos propios do Nadal. A iniciativa está dirixida a toda a veciñanza de Zas e consiste nun concurso de vídeos de panxoliñas e cantos de Aninovo e Reis. O prazo para presentar os vídeos remata o 16 de decembro de 2016. O xurado outorgará premios á mellor presentación, ao vídeo que conte con máis fidelidade á tradición da zona e ao mellor vídeo infantil. Tamén se premiará o vídeo máis popular en Facebook. Para ampliar a nova, preme aquí.
07/10/2016. DINAMIZACIóN
Edicións Moito Conto presenta O Papagaio, un novo xornal en galego dirixido a nenas e nenos de primaria e secundaria, con seccións sobre ciencia, ecoloxía, arte, historia, banda deseñada e actualidade. Ademais das seccións fixas, tamén se ofrece a posibilidade de que participen os propios centros de ensino. O xornal, que se publica en papel, terá unha periodicidade mensual. O primeiro número está accesible de balde en Internet. Se queres subscribirte, atoparás toda a información que precisas no web da editorial Moito Conto.
07/10/2016. INVESTIGACIóN
Nova Escola Galega presentou publicamente onte, 6 de outubro de 2016, na sede da Real Academia Galega o número 65 da Revista Galega de Educación, dedicado na súa totalidade a reflexionar sobre a lingua galega na educación infantil. O monográfico inclúe textos de estudosos/as no campo da sociolingüística, así como achegas de técnicos/as e educadores/as que contan a súa experiencia nos eidos da docencia ou a dinamización lingüística dirixida á poboación infantil. Se o desexas, podes consultar o monográfico completo nos fondos do CDSG. Para acceder a un resumo, preme aquí.
06/10/2016. DINAMIZACIóN
Co gallo do Día da Ciencia en Galego 2016, o Campus Terra e o Servizo de Normalización Lingüística da Universidade de Santiago de Compostela presentan DivulgaTerra, un evento de divulgación científica deseñado para darlle visibilidade ao traballo desenvolvido polos novos investigadores/as e promover a utilización do galego como ferramenta para a comunicación científica. A iniciativa consistirá nunha sesión de presentacións divulgativas de 10 minutos de duración, que terá lugar o 9 de novembro de 2016, a partir das 16 horas, na Escola Politécnica Superior do Campus Terra. Poden participar todos os novos investigadores e investigadoras do Campus Terra que queiran expoñer publicamente en galego o seu traballo de investigación. Tamén se pode participar a través de pósters. Previamente, o Servizo de Normalización Lingüística impartirá o luns 24 de outubro unha sesión formativa gratuíta.
06/10/2016. CURSOS E CONGRESOS
O Instituto da Lingua Galega da Universidade de Santiago de Compostela organiza, coa colaboración do Consello da Cultura Galega, o Simposio ILG 2016: Antroponimia e lexicografía, que xirará arredor de dous eixes temáticos principais: o tratamento lexicográfico común da antroponimia, sobre o que reflexionarán diferentes autores de dicionarios europeos de nomes ou apelidos; e a situación específica dos nomes e apelidos galegos. As sesións terán lugar os días 24, 25 e 26 de outubro de 2016 na Facultade de Filoloxía da USC. Para obter máis información sobre o programa e os trámites de inscrición, preme aquí.
06/10/2016. CURSOS E CONGRESOS
A Gentalha do Pichel organiza as xornadas Plurilingüismo espanhol: um pesadelo de estado, que terá lugar os vindeiros días 14 e 15 de outubro de 2016 no local social da Gentalha do Pichel, en Santiago de Compostela. Trátase da quinta edición destas xornadas de análise para o ensino popular, que nesta ocasión terá como eixe temático o plurilingüismo no Estado español. Ao longo das xornadas trataranse temas coma os mecanismos ideolóxicos da substitución lingüística, o marco normativo no ámbito da educación en sociedades plurilingües, o multilingüismo nunha futura Cataluña independente ou a situación de linguas minorizadas coma o aragonés e o árabe de Ceuta.
03/10/2016. CURSOS E CONGRESOS
A Coordinadora de Traballadores/as de Normalización da Lingua convoca a segunda edición do Obradoiro de pensamento creativo baseado no método CPS (Creative Problem Solving). Os obxectivos deste curso son proporcionar formación avanzada en materia de creatividade, adquirir dinámicas que incrementen a motivación e a capacidade de mobilización do equipo e aprender a implementar accións que activen a creatividade de terceiras persoas, dirixíndoa a proxectos de promoción do galego. O obradoiro está dirixido a técnicos/as de normalización lingüística, a membros dos equipos de normalización e dinamización lingüística dos centros de ensino e a persoas interesadas en xeral. As sesións desenvolveranse os días 9 e 10 de novembro de 2016 na Nave de Vidán (Santiago de Compostela). Podes realizar a túa inscrición desde o 5 ao 25 de outubro de 2016.
30/09/2016. DINAMIZACIóN
Os once concellos galegos que se adheriron ao proxecto Apego a pasada primavera (sumándose aos doce que botaron a andar a iniciativa en 2015) comezan agora a desenvolver as diferentes actividades que se organizan no marco deste programa, deseñado para fornecer recursos e crear espazos de uso que permitan a socialización en galego desde a primeira infancia. Como novidade, nesta segunda fase están a elaborarse tamén diferentes materiais audiovisuais para a difusión nas redes, como por exemplo os dous vídeos que se distribúen estes días a través de youtube, “Apego, pola vida e pola lingua” e “Únete ao Apego, pola lingua”. Podes ampliar esta información premendo aquí.
29/09/2016. CURSOS E CONGRESOS
O Servizo de Normalización Lingüística do Concello da Coruña organiza a charla-obradoiro “Os/as nenos/as e a lingua, unha oportunidade”, dirixida tanto ás familias como a outras persoas interesadas (formadoras/es, monitoras/es etc.). Na charla intervirá Manuel Núñez Singala, director do Servizo de Normalización Lingüística da USC, que falará da oportunidade da transmisión lingüística. A inscrición é de balde. O acto terá lugar o 15 de outubro de 2016, ás 12:00 h, no Centro Ágora. Para obter máis información, preme aquí.