A Consellería de Cultura, Educación e Ordenación Universitaria publica a convocatoria de subvencións para a edición en lingua galega de recursos didácticos curriculares para niveis non universitarios. As axudas están dirixidas ás empresas mercantís do sector editorial e o prazo para a presentación de solicitudes é dun mes, contado a partir do día seguinte ao da publicación desta convocatoria.
15/05/2015. AXUDAS E PREMIOS
13/05/2015. DINAMIZACIóN
Co gallo da celebración do vindeiro Día das Letras Galegas, Afundación presenta a campaña Empápate co Galego, no marco da cal se desenvolverá un programa de actividades culturais, se difundirá na rede un vídeo promocional e se distribuirán tarxetas e chapas reivindicativas nas sedes físicas que Afundación ten nas cidades galegas. O programa de actividades inclúe un concerto musical, promovido polo Consello da Cultura Galega, e diferentes actividades educativas sobre a figura de Xosé Filgueira Valverde.
13/05/2015. DINAMIZACIóN
A Coordinadora Galega de Equipos de Normalización e Dinamización Lingüística (CGENDL) proponlle á comunidade educativa, e en xeral a toda a cidadanía galega, que presuman de galego todo o ano, difundindo entre as súas amizades unha mensaxe positiva de orgullo lingüístico que transcenda a efeméride puntual do 17 de maio. Con este obxectivo, a CGENDL presenta o vídeo “Presume de galego”, para que cada persoa o comparta con outras 17 o vindeiro 17 de maio, ata facelo viral nas redes sociais.
13/05/2015. DINAMIZACIóN
No marco das súas actividades de responsabilidade social empresarial, as empresas alimentarias Vegalsa-Eroski e Gadisa súmanse un ano máis á celebración do Día das Letras Galegas, homenaxeando a figura de Xosé Filgueira Valverde. Vegalsa-Eroski, en colaboración coa Secretaría Xeral de Política Lingüística, elaborou unha edición especial de máis dun millón de bolsas da compra que levan impresos textos do Adral e mais un retrato do autor homenaxeado feito por Antón Pulido. Pola súa parte, Supermercados Gadis celebrará as Letras Galegas distribuíndo entre a súa clientela 20.000 exemplares do recompilatorio inédito "Cantos de berce" e dous millóns de bolsas da compra con información sobre a figura e a obra de Filgueira Valverde.
13/05/2015. DINAMIZACIóN
A Deputación da Coruña, coa colaboración do Concello da Coruña, organiza unha nova edición da Festa das Letras Galegas, dirixida ao público familiar. O programa inclúe a actividade “Os xogos do paporrubio” e o espectáculo musical de Mama Cabra “15 primaveras”. As actividades terán lugar o 17 de maio nos xardíns de Méndez Núñez (ou no Centro Ágora, no caso de chuvia).
12/05/2015. DINAMIZACIóN
A Real Academia Galega anuncia que o acto central do Día das Letras Galegas 2015 terá lugar o domingo, 17 de maio, ás 18:30 h, no Museo de Pontevedra. Nesta sesión extraordinaria, que a RAG organiza en homenaxe a Xosé Filgueira Valverde, intervirán os académicos Víctor Fernández Freixanes, Francisco Díaz-Fierros Viqueira e Xosé Ramón Barreiro Fernández. O encargado de pechar o acto será o presidente, Xesús Alonso Montero. Ao remate, celebrarase un breve concerto da Coral Polifónica de Pontevedra, acompañada pola Orquestra Filharmónica Cidade de Pontevedra.
12/05/2015. OUTRAS
Os responsables dos departamentos universitarios de Galego-Portugués, Francés e Lingüística (Universidade da Coruña), Filoloxía Galega (Universidade de Santiago de Compostela) e Filoloxía Galega e Latina (Universidade de Vigo) publican unha declaración conxunta na que amosan a súa preocupación pola situación sociolingüística actual e polo futuro da lingua e da cultura galegas. Entre as causas desta situación, sinalan a non aplicación do Plan Xeral de Normalización da Lingua Galega e a aprobación en 2010 do “Decreto do Plurilingüismo”. Por todo isto, instan aos poderes públicos a apostar decididamente pola normalización lingüística, preservando un idioma que nos permite acceder a 276 millóns de falantes en 27 países e á quinta parte de Internet.
12/05/2015. DINAMIZACIóN
O Equipo de Dinamización da Lingua Galega do IES Castro Alobre, en colaboración co Concello de Vilagarcía e a Asociación de Hostaleiros de Vilagarcía, está a desenvolver unha campaña de fomento do uso do galego no sector hostaleiro local. Aproveitando a conmemoración das Letras Galegas, os restaurantes, bares e cafeterías da cidade lucirán nas súas mesas salvamanteis con deseños e lemas reivindicativos do uso do galego. En total, repartiranse 6.000 salvamanteis que reproducen os deseños gañadores no concurso de carteis que previamente organizou o IES Castro Alobre entre o seu alumnado.
11/05/2015. DINAMIZACIóN
Os servizos de normalización lingüística de doce concellos galegos presentan Apego, un proxecto de transmisión interxeracional do galego deseñado para fornecer recursos e crear espazos de uso que permitan a socialización en galego desde a primeira infancia. No web da iniciativa xa están accesibles diferentes recursos, consellos e información de interese para as familias. A maiores, as persoas que estean a agardar un bebé poden achegarse a calquera dos SNL dos concellos participantes e recibirán de agasallo unha caixa de recursos útiles para o tempo de espera.
11/05/2015. AXUDAS E PREMIOS
A Asociación de Escritoras e Escritores en Lingua Galega fixo públicos os/as galardoados/as dos Premios AELG 2015, co ánimo de recoñecer as mellores obras editadas en galego en 2014. As obras gañadoras son: Caderno da crítica, de Ramón Nicolás, na categoría de Blog Literiario; Galiza, um povo sentimental? Género, política e cultura no imaginário nacional galego, de Helena Miguélez-Carballeira, na categoría de Ensaio; Penúltimas tendencias, de Carlos Negro, na categoría de Literatura Infanto-xuvenil; Montse Dopico, na categoría de Xornalismo Cultural; A viaxe de Gagarin, de Agustín Fernández Paz, na categoría de Narrativa; A distancia do tambor, de Eva Veiga, na categoría de Poesía; Obras Completas. Volume IV, de Roberto Vidal Bolaño, na categoría de Teatro; e A Divina Comedia, de Dante Alighieri, traducida por Darío Xohán Cabana, na categoría de Tradución. Para ampliar esta nova, preme aquí.
11/05/2015. DINAMIZACIóN
As secretarías xerais de Política Lingüística e de Cultura convocan a II Carreira Camiño das Letras, que se celebrará o sábado 16 de maio, ás 17:30 h, en Santiago de Compostela co obxectivo de festexar as Letras Galegas e difundir o Camiño de Santiago a través da práctica deportiva. A carreira constará dunha proba absoluta dende A Lavacolla ata o Monte do Gozo, e dun circuíto para as categorías de menores no Monte do Gozo. Todos os participantes que rematen a proba recibirán un libro e un diploma. A maiores, a organización outorgará diferentes premios aos/ás gañadores/as. O prazo de inscrición remata o 13 de maio. Para ampliar esta nova, preme aquí.
07/05/2015. DINAMIZACIóN
O Consello da Cultura Galega organiza unha nova edición do Concerto das Letras Galegas, co obxectivo de render unha homenaxe musical a Xosé Filgueira Valverde, autor ao que se lle dedica este ano o Día das Letras Galegas. No acto participarán a Real Filharmonía de Galicia, a soprano Carmen Durán e o barítono Gabriel Alonso Díaz, baixo a dirección de Maximino Zumalave, interprentado obras de Joly Braga Santos, Xosé Castro "Chané", Antonio Iglesias Vilarelle e Xavier de Paz. As partituras foron compostas sobre textos de Rosalía de Castro, Manuel Curros Enríquez e Xosé Filgueira Valverde. O concerto terá lugar o 16 de maio de 2015, ás 21:00 h, na sede Afundación de Pontevedra. As entradas poden retirarse a partir do 8 de maio nas sedes de Afundación na Coruña, Ferrol, Lugo, Ourense, Pontevedra, Santiago de Compostela e Vigo.
07/05/2015. INVESTIGACIóN
O Servizo de Normalización Lingüística do Concello de Carballo organiza un faladoiro co científico Jorge Mira, que leva por título "Desde o corazón do futuro da lingua". O convidado fará unha análise da situación sociolingüística actual, a partir da cal determinará cal vai ser o futuro do idioma galego nos vindeiros anos. O acto, de entrada libre e de balde, terá lugar hoxe, 7 de maio, ás 19:00 h, na Biblioteca Rego da Balsa de Carballo. Para ampliar esta nova, preme aquí.
06/05/2015. AXUDAS E PREMIOS
A Deputación de Lugo convoca subvencións, dirixidas a agrupacións de concellos desta provincia, para a creación ou mantemento de servizos de normalización lingüística (SNL) durante a anualidade 2015–2016. Poderán solicitar estas axudas aquelas agrupacións de concellos (dous ou máis) que sumen, como mínimo, 7.000 habitantes. O prazo de presentación de solicitudes será de trinta días naturais, contados a partir do seguinte ao da publicación desta convocatoria.
06/05/2015. DINAMIZACIóN
O Servizo de Normalización Lingüística do Concello de Pontevedra presenta unha nova edición do seu programa de actividades Maio, Mes da Lingua, sumándose así aos actos conmemorativos do Día das Letras Galegas que ao longo deste mes terán lugar por todo o país. O programa, organizado en colaboración con diferentes centros de ensino e entidades asociativas do concello, desenvolverase entre os días 1 de maio e 16 de xuño de 2015. Inclúe, entre outras actividades, actuacións musicais, roteiros literarios, exposicións, conferencias ou obradoiros sobre materiais didácticos en galego.
06/05/2015. EMPREGO
O Concello de Vimianzo anuncia a convocatoria para a contratación temporal dun técnico/a de normalización lingüística que terá como principal obxectivo planificar e desenvolver as tarefas de asesoramento e dinamización lingüística que organice o concello. Os aspirantes deben posuír a licenciatura en Filoloxía Galego-Portuguesa, Filoloxía Galega ou Filoloxía Hispánica (sección galego-portugués), grao en Lingua e Literatura Galegas, ou outras titulacións grao/licenciatura sempre que estean en posesión do Celga 5.
O sistema de selección é o de concurso-oposición. O prazo de presentación de solicitudes é de 8 días naturais, contados a partir do seguinte ao da publicación do anuncio no BOP. Para consultar as bases completas da convocatoria, preme aquí.
O sistema de selección é o de concurso-oposición. O prazo de presentación de solicitudes é de 8 días naturais, contados a partir do seguinte ao da publicación do anuncio no BOP. Para consultar as bases completas da convocatoria, preme aquí.
05/05/2015. AXUDAS E PREMIOS
O xurado da décimo primeira edición do Premio a Artigos Xornalísticos Normalizadores acordou outorgar o premio, dotado de 1.000 euros, ao traballo “Etiquetaxe”, autoría da filóloga e profesora Luz Cures Vázquez. O artigo premiado publicarase nos medios de comunicación colaboradores o domingo 17 de maio, no caso dos medios diarios, e no número inmediatamente posterior a esa data no caso dos medios non diarios. Para ampliar esta nova, preme aquí.
05/05/2015. AXUDAS E PREMIOS
O Consello Asesor de RTVE en Galicia e da CRTVG entregou os XXII Premios de Publicidade en Galego, que teñen como obxectivo recoñecer o traballo realizado a prol da normalización lingüística por parte de empresas e entidades que se publicitan nos medios de comunicación.
Nesta edición os traballos premiados foron “Galeguesa, a diferenza" (creado por Arraianos Multimedia para Casa Galeguesa), na modalidade de Internet; "Hai cousas que canto menos cambien, mellor" (desenvolvido por BAP&Conde para Larsa), na modalidade de radio; e "O noso é o noso" (dirixido pola axencia Imaxe para Estrella Galicia), na modalidade de televisión.
Nesta edición os traballos premiados foron “Galeguesa, a diferenza" (creado por Arraianos Multimedia para Casa Galeguesa), na modalidade de Internet; "Hai cousas que canto menos cambien, mellor" (desenvolvido por BAP&Conde para Larsa), na modalidade de radio; e "O noso é o noso" (dirixido pola axencia Imaxe para Estrella Galicia), na modalidade de televisión.
04/05/2015. DINAMIZACIóN
O Servizo de Normalización Lingüística da Universidade de Santiago presenta a campaña “Ensinas máis do que cres”, dirixida ao persoal docente desta universidade. A iniciativa ten como obxectivo sensibilizar este colectivo sobre a súa relevancia como axente normalizador, lembrándolle o papel que desenvolve tanto na difusión do coñecemento como na transmisión de actitudes lingüísticas. Para isto, creouse unha páxina web na que o SNL achega datos sobre o uso do galego na docencia e ofrece o seu apoio técnico para aumentar e mellorar este uso.
30/04/2015. DINAMIZACIóN
O Servizo de Normalización Lingüística do Concello de Vigo e a Asociación de Escritoras e Escritores en Lingua Galega presentan a actividade “Paseos polo Vigo literario”, que consistirá no desenvolvemento de tres roteiros guiados polos escritores/as Pedro Feijoo (9 de maio), María Reimóndez (16 de maio) e Francisco Castro (23 de maio). As persoas interesadas poden inscribirse enviando os seus datos (nome, apelidos e teléfono) ao correo electrónico: actividades.snl@vigo.org. Podes obter máis información premendo aquí.
30/04/2015. DINAMIZACIóN
A asociación Queremos Galego Marín organiza o I Concurso de vídeo con móbil pola lingua. Os vídeos presentados deben ter unha extensión máxima de 3 minutos e a temática ten que xirar arredor da importancia do uso do galego. Outorgaranse tres premios, de 100 euros, 75 euros e 50 euros respectivamente, ademais dun lote de libros para cada un. Os participantes teñen de prazo para presentar as gravacións ata o 15 de xuño.
30/04/2015. CURSOS E CONGRESOS
A Deputación de Pontevedra convoca cursos de formación para o seu persoal e mais para o dos concellos da provincia adheridos ao Plan agrupado de formación. Entre os cursos ofertados está o de “Lingua galega en documentos administrativos”. O prazo de presentación de solicitudes remata o 20 de maio de 2015. Para consultar o texto completo da convocatoria, preme aquí.
29/04/2015. DINAMIZACIóN
O alumnado de 3º da ESO do IES de Salvaterra e do CPI de Mondariz reúnense hoxe, 29 de abril, en Salvaterra para participar nun encontro sociolingüístico que terá como actividade principal a elaboración dun traballo sociolingüístico sobre o uso do galego no sector servizos. O programa inclúe tamén un obradoiro de hip hop con García MC. Esta iniciativa, que lle dá continuidade ao traballo desenvolvido por ambos centros o ano anterior, está promovida polos respectivos equipos de dinamización lingüística, en colaboración coas bibliotecas e os departamentos de Lingua Galega e Matemáticas. Para ampliar esta información, preme aquí.
29/04/2015. DINAMIZACIóN
A Biblioteca Ánxel Casal de Santiago de Compostela acolleu onte, 28 de abril de 2015 , a inauguración da exposición “Xosé Filgueira Valverde (1906-1996). Un faro na construción de Galicia”, que percorrerá 13 concellos galegos ata final de ano para conmemorar o autor homenaxeado no Día das Letras Galegas 2015. Ademais, elaborouse unha versión ampliada desta exposición, que pode visitarse de xeito permanente ata o 24 de maio na sede do Museo de Pontevedra. Podes ampliar esta nova premendo aquí.
28/04/2015. AXUDAS E PREMIOS
A Secretaría Xeral de Política Lingüística convoca subvencións destinadas á creación, mantemento ou reforzamento de servizos de normalización lingüística nas entidades locais, así como ao desenvolvemento de proxectos de dinamización lingüística. Poderán acollerse a estas axudas os concellos ou agrupacións de concellos con poboación igual ou superior aos 3.000 habitantes. O prazo de presentación de solicitudes é dun mes, contado a partir do día seguinte ao da publicación desta convocatoria.
28/04/2015. DINAMIZACIóN
A empresa Feiraco súmase un ano máis á conmemoración do Día das Letras Galegas, dedicado nesta edición a Filgueira Valverde, coa edición especial dun millón de envases conmemorativos, ilustrados cunha caricatura do autor homenaxeado. Os cartóns incluirán tamén un código QR que permitirá descargar o artigo “O galego verdadeiro” (II Adral). No marco desta mesma campaña, Feiraco convoca, coa colaboración da Secretaría Xeral de Política Lingüística, a cuarta edición do seu Certame de Microrrelatos, convidando aos usuarios/as da rede social Facebook a participar cun texto orixinal e inédito en lingua galega dun máximo de 500 caracteres.
27/04/2015. DINAMIZACIóN
O Servizo de Normalización Lingüística do Concello de Pontevedra e A Mesa pola Normalización Lingüística presentan a obra
“O abecedario”, a primeira dunha colección didáctica de 20 títulos deseñados para apoiar a transmisión interxeracional da lingua galega. Con este primeiro volume, que vén acompañado dunha lámina e un vídeo con música, os máis pequenos poderán aprender o abecedario galego apoiándose en ilustracións. Para ampliar a nova, preme aquí.
“O abecedario”, a primeira dunha colección didáctica de 20 títulos deseñados para apoiar a transmisión interxeracional da lingua galega. Con este primeiro volume, que vén acompañado dunha lámina e un vídeo con música, os máis pequenos poderán aprender o abecedario galego apoiándose en ilustracións. Para ampliar a nova, preme aquí.
24/04/2015. INVESTIGACIóN
O Rede Europea sobre os Neofalantes, grupo de investigación sobre o multilingüismo en Europa financiado pola Unión Europea, está a celebrar en Vigo o encontro “Os neofalantes nunha Europa multilingüe: oportunidades e desafíos”. O acto, que está a ter lugar estes días 23 e 24 de abril, reúne a máis de 50 estudosos/as que están a analizar o concepto de “neofalante” desde tres ópticas diferentes: as minorías étnicas, as migracións e a mobilidade laboral transnacional. Podes ampliar esta nova premendo aquí.
24/04/2015. DINAMIZACIóN
A Mesa pola Normalización Lingüística e a CIG presentan a campaña “Queremos atención en galego. Queremos traballo aquí”, coa que convidan á cidadanía a demandar atención en galego cando empreguen os servizos telefónicos de administracións e empresas. Os promotores da iniciativa reivindican o uso do galego como lingua preferente nos servizos de atención á cidadanía, un feito que consideran que melloraría a imaxe pública das propias empresas e, ao mesmo tempo, favorecería a creación de postos de traballo no país. Para obter máis información, preme aquí.
23/04/2015. CURSOS E CONGRESOS
O Servizo de Normalización Lingüística da Universidade da Coruña (UDC), coa colaboración da Secretaría Xeral de Política Lingüística, organiza o VIII Curso de Verán de Lingua e Cultura Galegas para Persoas Estranxeiras. O curso conta con dous niveis, elemental (A1-A2) e intermedio (B1-B2), e as sesións desenvolveranse entre os días 1 e 24 de xullo de 2015 na Facultade de Filoloxía da UDC. O prazo de inscrición remata o 12 de maio.