Novas da lingua. AXUDAS E PREMIOS

Rexistros1 a 30 de 1085
  1. Inicio
  2. CDSG-CCG
  3. Novas da lingua
  4. AXUDAS E PREMIOS
29/10/2026. AXUDAS E PREMIOS

Resólvense os XXXVI Premios San Martiño de Normalización Lingüística

O Padroado dos Premios San Martiño de Normalización Lingüística outorga os galardóns da edición de 2026 á Asociación Cultural Coto Manguelo (categoría "Tabeirós-Terra de Montes"), ao grupo de música tradicional Leilía (categoría "Galicia enteira") e á empresa Eferro (categoría "Toda unha vida").

O acto de entrega realizarase o vindeiro 12 de novembro, ás 20.30 horas, no Teatro Principal da Estrada, concello promotor deste premio.

Amplía a información aquí.
26/10/2026. AXUDAS E PREMIOS

“Vitamina G” para a promoción da lingua gana o 1º premio da XVII edición de EducaCompostela

O Departamento de Educación do Concello de Santiago e Nova Escola Galega fan pública a decisión do xurado da XVII edición dos premios EducaCompostela de materiais didácticos en prol da innovación, da calidade educativa e da renovación pedagóxica.

O primeiro premio levouno o proxecto titulado Vitamina G, de Mariña Lema Blanco. Trátase dunha actividade de dinamización da lingua para estender o seu uso entre alumnado, familias e comunidade escolar a través de recursos audiovisuais nos que os estudantes son os propios protagonistas.

Máis información na web de Nova Escola Galega.
22/10/2026. AXUDAS E PREMIOS

As escolas Semente son premiadas no Carballiño pola Asociación Avantar

A innovación pedagóxica e o labor de inmersión lingüística en galego valéronlle ás Escolas de Ensino Galego Semente o galardón correspondente ao III Premio Ernesto Atanasio "O Corcheiro".

O acto de entrega do premio será o sábado 24 de outubro de 2026, ás 19.30 horas, no salón de actos do Casino do Carballiño. A Asociación Cultural Avantar, fundada en 1974, recoñece deste xeito o labor de persoas ou colectivos destacados pola súa contribución á cultura e á lingua galegas.
21/10/2026. AXUDAS E PREMIOS

IX Premios Lingua e Empresa do Concello de Ames

A Concellaría de Normalización Lingüística e a de Promoción Económica do Concello de Ames convocan a novena edición dos Premios Lingua e Empresa, orientados a recoñecer o uso e fomento da lingua galega na actividade empresarial.

Poderán presentar a súa candidatura as empresas con sede social ou centro de actividade no concello de Ames. As empresas interesadas deben descargar este formulario e entregalo a través das canles indicadas antes do 20 de novembro de 2026.

Toda a información sobre a convocatoria podes consultala aquí.
16/10/2026. AXUDAS E PREMIOS

Subvencións da Deputación da Coruña para gastos de persoal dos SNL das entidades locais

A Deputación da Coruña publica as bases reguladoras da convocatoria de subvencións dirixidas aos concellos, agrupacións de concellos, mancomunidades e outras entidades locais da provincia da Coruña, para contribuír ao financiamento do persoal técnico de normalización lingüística durante o ano 2027.

Poderán participar todos os concellos da provincia da Coruña de 5000 ou máis habitantes, ou agrupacións de concellos e mancomunidades que, entre eles, cheguen a esa cifra mínima. No caso dos concellos sometidos ao réxime de organización de municipios de gran poboación, só poderán ser beneficiarios os que teñan máis dunha persoa técnica de normalización lingüística cun posto de traballo recollido na relación de postos de traballo ou instrumento de ordenación de persoal que corresponda.

A forma e prazo da solicitude regúlanse na Ordenanza xeral de subvencións e transferencias da Deputación da Coruña.
08/10/2026. AXUDAS E PREMIOS

IV Premios Folgueira para Francisco Fernández Rei e Pablo Quintana por dignificar o galego-asturiano

Axuntar, Asociación prá normalización del galego de Asturias, fixo públicos os nomes das persoas galardonadas cos IV Premios Folgueira, que distinguen a persoas e institucións destacadas no seu labor pola dignificación do galego-asturiano.

Trátase de Pablo Quintana López, investigador e divulgador do patrimonio cultural das terras do Eo-Navia e responsable da Editorial Canela; e Francisco Fernández Rei, catedrático de Filoloxía Románica da USC e coordinador das primeiras Normas ortográficas del galego de Asturias.


A entrega dos galardóns terá lugar o 10 de outubro de 2026 ás 16:30 horas na Biblioteca de Vilanova de Ozcos.
28/09/2026. AXUDAS E PREMIOS

Chega a final de CeibaRimas, rap improvisado en galego

A praza Castelao de Rianxo vai acoller o 3 de outubro, ás 18 h., a fase final de CeibaRimas 2026.

As persoas interesadas en participar poden facelo desde agora mesmo ata 1 hora antes do inicio do evento. Se algunha persoa quere inscribirse despois do peche do formulario, poderá facelo in situ, antes do comezo dos sorteos da clasificatoria.

Os participantes optarán a máis de 1.000 euros en premios. Ademais da competición, haberá actuacións e actividades arredor do mundo do rap improvisado, a cultura urbana, a música e a lingua.

Esta é a ligazón ao formulario de inscrición.
28/09/2026. AXUDAS E PREMIOS

XXXI Edición do Premio xornalístico Reimóndez Portela

O Premio Reimóndez Portela, dotado con 1000 €, ten como obxectivo "promover e recoñecer o labor xornalístico e dos medios de comunicación así como os artigos escritos en lingua galega".

Poderán presentarse a el un traballo ou serie de traballos (ata un máximo de cinco) publicados en lingua galega, tanto en xornais impresos coma dixitais, entre o 1 de outubro de 2025 e o 30 de setembro de 2026.

Accede ás bases e ao formulario para presentarse aquí.
23/09/2026. AXUDAS E PREMIOS

O Concello das Pontes convoca as axudas para entidades culturais de 2026

O propósito destas axudas, para as que se destinan 170 660 euros ao financiamento de actividades culturais e 16 000 euros a infraestruturas e equipamento, consiste en «apoiar aos colectivos, favorecer a participación da cidadanía na vida cultural e contribuír ao desenvolvemento dos seus proxectos, incorporando tamén entre os obxectivos o fomento da igualdade de xénero e a promoción do uso da lingua galega».

Segundo a convocatoria, as entidades interesadas dispoñen ata o 13 de outubro para presentar as súas solicitudes. A tramitación deberá realizarse exclusivamente por vía telemática, a través da Sede Electrónica do Concello das Pontes, mediante o modelo oficial.
23/09/2026. AXUDAS E PREMIOS

Patricia Buxán distinguida co Premio de tradución Plácido Castro

Nesta última edición, o xurado do premio Plácido Castro seleccionou a tradución ao galego da obra de Virginia Wolf Un cuarto propio “pola súa excelencia” ao “recrear as peculiaridades da escrita da autora, a riqueza lingüística empregada e o ritmo conseguido”.

A súa autora, Patricia Buxán, é tradutora e revisora profesional de alemán e inglés ao galego e ao castelán, así como docente da Universidade de Vigo. Na súa web tedes máis información.
18/09/2026. AXUDAS E PREMIOS

A nova edición de Youtubeiras+ conmemora os seus dez anos en rede

Baixo o lema Dez anos en rede, acaba de presentarse a décima edición dos Premios Youtubeiras+, unha iniciativa promovida por 10 concellos galegos, a Deputación da Coruña e as universidades da Coruña, Santiago de Compostela e Vigo co obxectivo de promover a creación de contidos en galego en todas as redes sociais, así como visibilizar os perfís das persoas creadoras.

Poden optar a estes premios as persoas maiores de 16 anos que teñan canles autoproducidas nas redes sociais en activo e accesibles durante o certame.
As canles deben ter a maioría dos seus vídeos en galego e un mínimo de tres publicacións subidas a partir do 16 de novembro de 2025, sen restricións de privacidade. Os títulos, as descricións e os subtítulos permanentes (de habelos) deben estar en galego. O xurado outorgará sete premios con dotación económica (que no seu conxunto suman un total de 7500 euros) e un oitavo honorífico á traxectoria (sen dotación económica).

O prazo de inscrición remata o 15 de novembro de 2026.

Na páxina web do proxecto tes toda a información.
17/09/2026. AXUDAS E PREMIOS

Resólvense as axudas para a edición de publicacións periódicas en galego

A Secretaría Xeral de Medios da Xunta de Galicia publica a resolución da convocatoria do ano 2026 de subvencións destinadas a empresas que realicen publicacións periódicas escritas integramente en galego.

Podes consultar a listaxe de entidades beneficiarias, xunto co importe concedido, premendo aquí.
14/09/2026. AXUDAS E PREMIOS

Axudas para a investigación en galego na Universidade de Vigo

A Universidade de Vigo convoca axudas ao alumnado que presentase e defendese en galego a tese de doutoramento (TD), o traballo de fin de grao (TFG) ou o traballo de fin de mestrado oficial (TFM) na UVigo entre o 16 de setembro de 2025 e o 15 de setembro de 2026. Quedan excluídos os TFG do grao en Ciencias da Linguaxe e Estudos literarios (módulo de lingua galega), do grao en Tradución e Interpretación (Galego-Inglés) e do grao en Tradución e Interpretación (Galego-Francés).

O prazo de presentación das solicitudes para optar a estas axudas estará aberto ata o 15 de setembro de 2026.

Para consultar o texto completo da convocatoria, preme aquí.
04/09/2026. AXUDAS E PREMIOS

Granxa Arqueixal e Viñedos Lareu, Premios Bacelos de Prata 2026

O xurado da décimo oitava edición dos Premios Bacelos de Prata, deseñados para recoñecer o labor de empresas que apostan polo galego como marca de calidade na etiquetaxe dos seus produtos, acordou por unanimidade que as entidades galardoadas na edición de 2026 son Granxa Arqueixal, proxecto ecolóxico de produción de queixos, iogur natural e leite fresco con sede en Palas de Rei; e Viñedos Lareu, adega da Ribeira Sacra (Chantada) cunha longa traxectoria vitivinícola.

Na páxina web de Galeguizar Galicia podes ampliar información.
22/07/2026. AXUDAS E PREMIOS

A Xunta de Galicia resolve a convocatoria de axudas a entidades locais para o fomento do galego

A Consellería de Cultura, Lingua e Xuventude da Xunta de Galicia publica a resolución da convocatoria de subvencións ás entidades locais para a promoción do galego durante o ano 2026. As axudas están destinadas á creación, mantemento ou reforzamento de servizos de normalización lingüística; así como ao desenvolvemento de programas de dinamización da lingua galega.

Podes consultar a listaxe de entidades beneficiarias premendo aquí.
13/07/2026. AXUDAS E PREMIOS

Antón Santamarina, Premio Luís Porteiro Garea 2026

O xurado da novena edición do Premio Luís Porteiro Garea acordou por unanimidade outorgar este galardón ao catedrático emérito de Filoloxía Románica da USC Antón Santamarina. O xurado pon de relevo na súa resolución que se trata “dunha das figuras máis destacadas da lingüística galega contemporánea que xogou un papel esencial no coñecemento do estado da lingua galega e das súas variantes, e tamén no establecemento da súa forma culta actual”.

O premio Luís Porteiro Garea, que leva o nome do profesor de dereito civil e membro das Irmandades da Fala que en 1915 pronunciou a primeira lección en galego na USC, ten como finalidade recoñecer o traballo de persoas, entidades ou colectivos que traballan, ou traballaron, a prol do galego na universidade.

No Xornal da USC atoparás máis información.
13/07/2026. AXUDAS E PREMIOS

Convocatoria de axudas para a elaboración de novos títulos de Esenciais USC

O Servizo de Normalización Lingüística da Universidade de Santiago de Compostela presenta unha nova convocatoria de axudas para financiar a elaboración e a edición dixital de doce novos títulos que se sumarán á colección Esenciais USC. Esta colección está integrada por materiais didácticos de referencia (guías-resumo) que compilan en poucas páxinas os contidos esenciais dunha materia, ou dunha parte significativa dela.

O persoal docente e investigador da USC ten de prazo para presentar as súa propostas ata o 30 de setembro de 2026.

Para ampliar información preme aquí.
30/06/2026. AXUDAS E PREMIOS

Premio para a mellor peza de oratoria en galego, en homenaxe a Otero Pedrayo

No marco do programa de actividades conmemorativas do Ano Oteriano, a Fundación Otero Pedrayo e a Asociación de Amigos de Ramón Otero Pedrayo convocan o Premio de Oratoria "Orador do Ano Oteriano 2026 Ramón Otero Pedrayo" . As pezas presentadas deben ser gravadas en lingua galega, preferentemente en formato vídeo (MP4, P4 MOV, AVI), aínda que tamén se admitirán pezas en audio (MP3, WAV), ter unha duración de entre 10 e 30 minutos e estar tematicamente relacionadas co pensamento, a obra, a figura ou o legado cultural de Ramón Otero Pedrayo.

O/a autor/a da peza seleccionada polo xurado recibirá un lote de produtos culturais, tecnolóxicos e de alimentación cun valor estimado de 6.000 euros.

O prazo de presentación das pezas rematará o 15 de novembro de 2026.

Para consultar as bases completas do certame, preme aquí.
29/06/2026. AXUDAS E PREMIOS

A RAG outorga o "II Premio Na lingua que eu falo" á iniciativa “Aquí tamén se fala”

A comunidade educativa do IES Rafael Dieste (A Coruña) recibirá a comezos do vindeiro curso, coincidindo co Día Europeo das Linguas, un novo recoñecemento ao traballo desenvolvido no marco do proxecto Aquí tamén se fala. Trátase do “II Premio Na lingua que eu falo”, unha distinción coa que a Real Academia Galega quere recoñecer publicamente esta iniciativa de normalización lingüística poñendo o foco no seu potencial como “ferramenta de integración e intercambio cultural nun instituto urbano onde sete de cada dez alumnos son de orixe migrante”. O recoñecemento faise tamén extensivo ao conxunto dos 300 centros educativos galegos adheridos á campaña.

Na páxina web da RAG podes ampliar información.
25/06/2026. AXUDAS E PREMIOS

Resolución das axudas para fomento do galego en centros de ensino privados

A Consellería de Cultura, Lingua e Xuventude da Xunta de Galicia publica a resolución definitiva das axudas aos proxectos de fomento do uso do galego nos centros de ensino de titularidade privada que imparten ensinanzas regradas de niveis non universitarios.

No DOG do 25 de xuño de 2026 podes consultar a listaxe de centros beneficiarios.
15/06/2026. AXUDAS E PREMIOS

Resolución das axudas para fomento do galego en centros de ensino públicos

A Consellería de Cultura, Lingua e Xuventude da Xunta de Galicia publica a resolución definitiva das axudas aos proxectos de fomento do uso do galego nos centros de ensino de titularidade pública que imparten ensinanzas regradas de niveis non universitarios.

No DOG do 15 de xuño de 2026 podes consultar a listaxe de centros beneficiarios.
12/06/2026. AXUDAS E PREMIOS

Premio á Lingua e á Cultura “Tamén en galego” para a hostalaría de Becerreá

O Equipo de Dinamización da Lingua Galega do IES de Becerreá púxolle o ramo ao proxecto “Tamén en galego” coa entrega do Premio á Lingua e á Cultura “Tamén en galego” 2026, que recibiu o sector hostaleiro de Becerreá “pola súa implicación na promoción e visibilización do galego no ámbito profesional, comercial e social da comarca”.

O proxecto “Tamén en galego”, promovido polo EDLG do IES de Becerreá ao longo do curso 2025-2026, ten como obxectivo fomentar a presenza da lingua galega nos espazos formais e escritos dos diferentes sectores sociais do municipio (empresas, servizos, establecementos e institucións). O alumnado foi o encargado de realizar as análises sociolingüísticas previas para coñecer o punto de partida e de propoñer posteriormente as medidas concretas de intervención. No peche do curso a comunidade educativa outorgou un recoñecemento público ao sector hostaleiro en concreto, para poñer de relevo o seu compromiso coa promoción do idioma galego.

Podes ampliar información sobre esta iniciativa premendo aquí.
10/06/2026. AXUDAS E PREMIOS

Acto de entrega dos VII Premios Mil Primaveras

O vindeiro sábado, 13 de xuño de 2026, ás 11:30 h, terá lugar no Salón de Actos do Pazo de Cultura de Pontevedra, o acto de entrega dos VII Premios Mil Primaveras, que será conducido pola narradora oral e cantautora Iseo a Moura.

Os Premios Mil Primaveras, convocados anualmente pola Coordinadora de Traballadores/as de Normalización da Lingua, teñen como obxectivo a difusión e posta en valor de proxectos de fomento do galego que, polo súa calidade, poidan servir de modelo e inspiración.

Podes obter máis información sobre os premios, así como sobre os proxectos galardoados nesta sétima edición, premendo aquí.
10/06/2026. AXUDAS E PREMIOS

Convócanse os Premios da Cultura Galega 2026

A Consellería de Cultura, Lingua e Xuventude da Xunta de Galicia convoca os Premios da Cultura Galega para o ano 2026, nas seguintes modalidades: Letras, Artes Visuais, Artes Escénicas, Música, Audiovisual, Lingua, Patrimonio Cultural e Proxección Exterior. O premio da modalidade de Lingua está dirixido a persoas, colectivos ou entidades de ampla traxectoria no ámbito da promoción da lingua galega. As candidaturas só poderán ser presentadas por institucións e entidades culturais ou profesionais, públicas ou privadas, relacionadas co obxecto de cada premio, sen que os candidatos se poidan postular a si mesmos.

O prazo de presentación de candidaturas será de dous meses, contados desde o día seguinte ao da publicación da convocatoria no Diario Oficial de Galicia.
02/06/2026. AXUDAS E PREMIOS

Axudas para a investigación en lingua galega na Universidade da Coruña

O Servizo de Normalización Lingüística (SNL) da Universidade da Coruña convoca axudas, tanto económicas como de asesoramento lingüístico, dirixidas ao alumnado de titulacións oficiais da UDC que redacte e defenda en galego a tese de doutoramento, o traballo de fin de mestrado ou o traballo de fin de grao. Queda excluído desta convocatoria o alumnado do grao en Galego e Portugués: Estudos Lingüísticos e Literarios; do dobre grao en Español: Estudos Lingüísticos e Literarios, e Galego e Portugués: Estudos Lingüísticos e Literarios; e mais do dobre grao en Inglés: Estudos Lingüísticos e Literarios, e Galego e Portugués: Estudos Lingüísticos e Literarios, así como o alumnado daqueles estudos de cuxa natureza e/ou de cuxo contido se derive o uso da lingua galega nos mencionados traballo de investigación.

O prazo de solicitudes para as axudas económicas estará aberto ata o 30 de outubro de 2026.

Para consultar o texto completo da convocatoria preme aquí.
01/06/2026. AXUDAS E PREMIOS

O SNL da USC convoca o IX Premio Luís Porteiro Garea

O Servizo de Normalización Lingüística da Universidade de Santiago de Compostela convoca a novena edición do Premio Luís Porteiro Garea, un galardón que ten como obxectivos recoñecer as traxectorias ou iniciativas de persoas que contribuíron á normalización da lingua galega na propia USC e, ao mesmo tempo, homenaxear a figura de Luís Porteiro Garea (profesor da cátedra de dereito civil e membro das Irmandades da Fala que impartiu en 1915 a primeira lección en galego nesta Universidade).

O prazo para presentar candidaturas remata o 20 de xuño de 2026. Podes consultar as bases completas da convocatoria premendo aquí.
01/06/2026. AXUDAS E PREMIOS

A USC premia a calidade lingüística en galego

O Servizo de Normalización Lingüística da Universidade de Santiago de Compostela convoca os “XXII Premios á calidade lingüística en galego dos traballos académicos, traballos de fin de grao e traballos de fin de máster”, unha iniciativa que busca fomentar a cultura da calidade no uso do galego entre o alumnado universitario. Nas bases establécense quince premios que se distribúen en tres categorías: traballo académico de curso de grao, traballo de fin de grao (TFG) e traballo de fin de mestrado (TFM). A convocatoria está aberta ao alumnado da USC matriculado en titulacións oficiais de grao ou mestrado no curso 2025-2026.

O prazo de presentación de traballos académicos de curso de grao remata o 31 de xullo de 2026. O prazo de presentación de traballos de fin de grao e de fin de mestrado remata o 30 de setembro de 2026.

Na páxina web do SNL da USC tes toda a información.
29/05/2026. AXUDAS E PREMIOS

Resólvense o XVII Premio Rosalía de Castro de Lingua

A Deputación da Coruña fixo públicos os/as gañadores/as do XVII Premio Rosalía de Castro da Lingua, un galardón que ten como obxectivo recoñecer o labor de persoas, colectivos e entidades que destacan polo seu compromiso coa promoción e dignificación do idioma galego.

Nesta edición de 2026 as persoas e proxectos galardoados, elixidos entre as 31 candidaturas presentadas, son: na categoría de persoas, o lingüista, docente e activista cultural Carlos Callón; na categoría de entidades, a Coordinadora de Traballadores/as de Normalización da Lingua; e na categoría de proxectos, ex aequo, Gramola Gominola (banda musical composta por Paco Cerdeira, Paula Romero, Anxelo de Xermar e Rodrigo Muñoz) e Vitamina G (promovido pola mestra Mariña Lema).

Podes ampliar información premendo aquí.
27/05/2026. AXUDAS E PREMIOS

A UVigo concédelle o «Gal Ego» 2026 á Escola de Enxeñaría de Minas
e Enerxía

A Universidade de Vigo concedeulle á Escola de Enxeñaría de Minas e Enerxía o distintivo de galeguización «Gal Ego» 2026, deseñado para recoñecer anualmente a facultade ou escola universitaria que máis promova o emprego do galego. O distintivo ten unha vixencia de catro anos e, ademais dunha insignia para a exposición pública, os centros seleccionados reciben tamén unha contía de 3.000 euros, que poderán destinar a actividades de promoción lingüística.

Se desexas obter máis información sobre este distintivo, preme aquí.
21/05/2026. AXUDAS E PREMIOS

Os XXX Premios Lois Peña Novo xa teñen gañadores/as

O xurado dos Premios Lois Peña Novo dá a coñecer os/as gañadores/as da trixésima edición destes galardóns, deseñados para animar o proceso de normalización lingüística no eido das administracións públicas, na vida institucional de Galicia e na sociedade en xeral. Nesta edición de 2026 os/as premiados/as son o servizo de comunicación do Celta, polo seu “traballo sostido desde o ano 2013 na incorporación da lingua galega nun ámbito de enorme repercusión social como é o fútbol profesional”; a profesora e investigadora Aurora Marco López, “polo compromiso constante coa lingua galega como ferramenta de investigación, divulgación e pensamento crítico”; e o político e economista Xosé Manuel Beiras, “pola súa longa, coherente e exemplar traxectoria a prol da dignificación da Galiza ao longo de máis de seis décadas”.

En Nós Diario podes ampliar a información.

A acta do xurado podes consultala no xornal Badal Novas.