A Coordinadora Galega de Equipos de Normalización e Dinamización Lingüística (CGENDL) fixo público o nome da gañadora do Premio Leixaprén, que ten como obxectivo recoñecer o labor de persoas e entidades que traballan a prol do idioma galego. O Premio Leixaprén 2014 foille outorgado á música e cantautora María Xosé Silvar Sés, polo uso cotián e a promoción que fai da lingua galega. O acto de entrega do galardón terá lugar este venres 20 de xuño de 2014, ás 13:00 h, no IES Félix Muriel de Rianxo.
20/06/2014. AXUDAS E PREMIOS
18/06/2014. INVESTIGACIóN
A Mesa pola Normalización Lingüística presentou publicamente os datos do estudo que esta entidade elabora periodicamente sobre os usos lingüísticos nos centros de educación infantil das sete cidades galegas. Segundo os datos recollidos no estudo, só un 2,42% dos centros consultados declarou impartir a docencia maioritariamente en galego neste curso 2013/2014 e só un 6,57% declarou impartir “algo en galego”. O estudo tamén destaca que só 11 dos 289 centros de infantil consultados dispoñen de material didáctico en galego.
Diante destes datos, a Mesa pola Normalización Lingüística alerta da aceleración do proceso de desgaleguización que está a sufrir o ensino infantil en Galicia.
Diante destes datos, a Mesa pola Normalización Lingüística alerta da aceleración do proceso de desgaleguización que está a sufrir o ensino infantil en Galicia.
18/06/2014. INVESTIGACIóN
Xa están accesibles, no web do Servizo de Normalización Lingüística da Universidade da Coruña, as actas das X Xornadas de Lingua e Usos. Lingua e Teatro, que tiveron lugar na Coruña en novembro de 2013. Neste mesmo sitio web pode acceder tamén aos audios e actas das edicións anteriores destas xornadas, que o SNL da UDC organiza anualmente para reflexionar sobre a situación do idioma galego nos diferentes ámbitos sociais.
12/06/2014. DINAMIZACIóN
O Concello de Fene organiza unha nova edición do seu “Verán Máis Alá!”, un espazo lúdico-educativo que ten como obxectivo facilitar unha alternativa de lecer educativo en galego e, ao mesmo tempo, promover a conciliación da vida familiar e laboral. Nas actividades, que se desenvolverán no CEIP de Centieiras (Perlío) entre o 1 e o 31 de xullo de 2014, poderá participar o alumnado de educación infantil e primaria nado entre os anos 2002 e 2010. Os prazos de matrícula son os días 16 e 17 de xuño, para a veciñanza de Fene, e os días 18 e 19 de xuño, para a veciñanza doutros concellos.
11/06/2014. DINAMIZACIóN
Os equipos de dinamización da lingua galega do IES Félix Muriel, do CEP Xosé María Brea Segade e do CRA de Rianxo presentan a publicación “Creadores de Rianxo”, unha obra que recompila textos, obras plásticas e partituras musicais de 31 creadores vinculados á vila de Rianxo. A obra enmárcase no proxecto plurianual de innovación lingüística Rianxo Fala, deseñado co obxectivo de mellorar os usos e actitudes de toda a comunidade educativa.
10/06/2014. DINAMIZACIóN
A Secretaría Xeral de Política Lingüística está a desenvolver, no marco do programa FalaRedes 2014, a actividade Os Bolechas e o Sabichón, unha iniciativa lúdica e didáctica para promover o uso do galego entre os máis pequenos/as. A iniciativa, deseñada para nenas e nenos de 3 a 9 anos, consiste nun concurso cun miniteatro que abre e pecha cada sesión. Os Bolechas percorrerán diferentes municipios adscritos á Rede de Dinamización Lingüística durante os meses de xuño e xullo.
05/06/2014. AXUDAS E PREMIOS
A Comisión de Normalización Lingüística da Facultade de Dereito e mais o Servizo de Normalización Lingüística da UDC convocan a quinta edición do Premio Lois Tobío de Investigación Xurídica en Lingua Galega, dirixido ao estudantado da Facultade de Dereito da UDC durante o curso 2013-2014, así como en xeral aos licenciados/as ou gradudados/as en Dereito en calquera universidade galega. Os traballos deberán ser inéditos, estar redactados en lingua galega e versar sobre calquera obxecto susceptible de ser analizado baixo metodoloxía xurídica. O prazo de presentación remata o 17 de outubro de 2014.
04/06/2014. DINAMIZACIóN
Os Diplomáticos de Monte Alto presentan o vídeo “Deitado frente ao mar”, elaborado para celebrar o XX aniversario do bravú, un movemento musical que naceu en Galicia hai vinte anos cun claro compromiso co galego en clave de creatividade. No vídeo, os Diplomáticos de Monte Alto póñenlle música aos coñecidos versos de Celso Emilio Ferreiro, amosando A Coruña e Vigo como unha única cidade unida polo idioma.
04/06/2014. AXUDAS E PREMIOS
A Fundación Lois Peña Novo deu a coñecer os gañadores da XX edición dos Premios Lois Peña Novo, pensados para animar o proceso de normalización lingüística no eido das administracións públicas, na vida institucional de Galicia e na sociedade en xeral. Os galardóns desta edición recaeron no catedrático e divulgador científico, Jorge Mira, no Colexio Oficial de Traballadores e Traballadoras Sociais de Galicia, e na maxistrada no Xulgado do Social número 3 de Lugo, Dalila Dopazo Blanco. A entrega dos premios celebrarase o 26 de xuño, ás 20:00 h, no Castelo de Soutomaior. Para obter máis información, preme aquí.
03/06/2014. AXUDAS E PREMIOS
A Secretaría Xeral de Política Lingüística publica, no DOG do 3 de xuño de 2014, a resolución pola que se conceden as axudas aos proxectos de fomento do uso do galego dos centros de ensino público non universitario de Galicia para o curso escolar 2013/2014. Para consultar a listaxe de centros aos que se lle concedeu esta axuda, preme aquí.
02/06/2014. DINAMIZACIóN
O Servizo de Normalización Lingüística do Concello de Moaña e o IES As Barxas están a desenvolver a campaña “En galego, con toda a frescura”, deseñada para fomentar o uso do galego no ámbito socioeconómico. No marco desta iniciativa, o alumnado da ESO do IES As Barxas compilou, clasificou e traballou lingüisticamente o léxico dos produtos frescos que ofertan as tendas e supermercados do concello. Posteriormente, o Servizo de Normalización editou listas da compra con este léxico, que se distribuirán entre os establecementos que colaboran na iniciativa. Para obter máis información, preme aquí.
30/05/2014. OUTRAS
A Rede Europea para a Igualdade das Linguas (ELEN) aprobou a Declaración de València, no marco do encontro que o pasado 24 de maio de 2014 mantiveron en Valencia as organizacións que integran esta Rede, entre as que se atopa a Mesa pola Normalización Lingüística. Na declaración apélase á construción dunha Unión Europea respectuosa co multilingüismo onde os diferentes pobos poidan exercer o dereito de vivir nos seus idiomas e culturas propios. ELEN, rede que representa 42 comunidades lingüísticas de 23 estados europeos, traballa na protección das linguas e comunidades lingüísticas minorizadas de Europa e ten carácter de organismo consultivo do Parlamento Europeo, do Consello de Europa, das Nacións Unidas e da UNESCO. Para ampliar esta nova, preme aquí.
30/05/2014. DINAMIZACIóN
O Servizo de Normalización Lingüística do Concello de Vigo presenta unha nova edición do programa “No verán… un conto”, que se desenvolverá entre o 21 de xuño e o 13 de setembro de 2014 co obxectivo de difundir o patrimonio oral da comunidade a través de actividades lúdicas. O programa, organizado en colaboración co Parque Nacional das Illas Atlánticas, inclúe, entre outras activades, contadas, monicreques, música, charlas sobre talasonimia e toponimia, camiñadas e xogos nas Illas Cies. Para ampliar esta información, preme aquí.
28/05/2014. DINAMIZACIóN
O Concello de Salceda de Caselas e a Asociación de Funcionarios para a Normalización Lingüística organizan a iniciativa “En galego, agora e sempre”, que terá lugar o próximo sábado 31 de maio, ás 12:30 h, no adro da igrexa de Sta. María de Salceda de Caselas. Os asistentes que o desexen poderán asinar unha acta de derradeiras vontades na que expresan o seu desexo de que os actos fúnebres relacionados co seu pasamento se realicen en galego. No transcurso do acto colocarase unha placa á entrada do cemiterio coa lenda “Na memoria de todos os que aquí xacen, porque grazas a eles Galicia segue a ter lingua e cultura de seu”. Para ampliar esta información, preme aquí.
28/05/2014. DINAMIZACIóN
As comisións de normalización lingüística da Escola Politécnica Superior e da Escola Universitaria Politécnica da Universidade da Coruña, en colaboración co Servizo de Normalización Lingüística, convocan o
I Concurso de Vídeos en Lingua Galega, deseñado para promover o uso do galego no ámbito científico-técnico. Pode participar o alumnado matriculado no curso 2013/14 nas titulacións oficiais que se imparten en ambos os centros. Os vídeos deben gravarse en lingua galega, nun DVD en formato MP4, cunha duración de entre 6 e 10 minutos, e estar relacionados tematicamente cos estudos de enxeñaría (vida universitaria, expectativas de traballo, etc.).
O prazo de presentación dos traballos remata o 21 de outubro de 2014.
I Concurso de Vídeos en Lingua Galega, deseñado para promover o uso do galego no ámbito científico-técnico. Pode participar o alumnado matriculado no curso 2013/14 nas titulacións oficiais que se imparten en ambos os centros. Os vídeos deben gravarse en lingua galega, nun DVD en formato MP4, cunha duración de entre 6 e 10 minutos, e estar relacionados tematicamente cos estudos de enxeñaría (vida universitaria, expectativas de traballo, etc.).
O prazo de presentación dos traballos remata o 21 de outubro de 2014.
23/05/2014. CURSOS E CONGRESOS
O Servizo de Normalización Lingüística da Universidade da Coruña, en colaboración co Concello de Carballo, a Coordinadora de Traballadores/as de Normalización da Lingua e a Secretaría Xeral de Política Lingüística, organiza o X Curso de Verán sobre Dinamización Lingüística "Traballando en Lingua", que nesta edición xirará arredor da transmisión interxeracional do galego.
As sesións desenvolveranse os días 9, 10 e 11 de xullo de 2014 no Fórum Carballo. O prazo de matrícula remata o vindeiro 4 de xullo.
As sesións desenvolveranse os días 9, 10 e 11 de xullo de 2014 no Fórum Carballo. O prazo de matrícula remata o vindeiro 4 de xullo.
23/05/2014. EMPREGO
A Deputación de Pontevedra anuncia unha convocatoria pública de selección de persoal que integrará a bolsa de emprego para contratacións laborais temporais. Entre os postos de traballo ofertados está o de técnico en Tradución e Interpretación (grupo A1). O proceso selectivo será o de concurso-oposición. O prazo para presentar as solicitudes é de 10 días hábiles, contados a partir do seguinte ao da publicación da convocatoria.
22/05/2014. DINAMIZACIóN
A Irmandade Xurídica Galega convoca a súa sétima asemblea, que se celebrará no Paraninfo do Instituto Otero Pedrayo de Ourense o vindeiro sábado, 24 de maio, ás 12:00 horas. Trátase dun acto público no que ingresarán na Irmandade Xurídica 25 novos profesionais, sumándose así á nómina de máis de 200 funcionarios/as xudiciais e avogados/as comprometidos coa normalización do galego no ámbito xurídico. No transcurso do acto renderase homenaxe ao avogado Amadeo Varela Rodríguez, que desenvolveu a súa actividade profesional en Ourense.
22/05/2014. EMPREGO
A Consellería de Cultura, Educación e Ordenación Universitaria convoca seis bolsas e catro prazas de formación nos lectorados de lingua, literatura e cultura galegas de varias universidades españolas e do estranxeiro. En concreto, convócanse 6 bolsas en universidades de Barcelona, Madrid, Granada, Algarve, Padua e Roma e 4 prazas en universidades de Estremadura, Deusto, Cork e Braga. O prazo de presentación de solicitudes é dun mes, contado a partir do día seguinte ao da publicación das respectivas ordes (convocatoria de 6 bolsas e convocatoria de 4 prazas) no Diario Oficial de Galicia.
22/05/2014. DINAMIZACIóN
A Associaçom Galega da Língua (AGAL) promove a campaña “O mundial fala galego”, que ten como obxectivo prestixiar o idioma galego incidindo no seu carácter internacional. Trátase de difundir entre a sociedade que a nosa lingua propia serve para desenvolverse nas actividades cotiás mais tamén para organizar un evento deportivo de repercusión internacional como é a copa do mundo. O sitio web da iniciativa irase completando con opinións de persoeiros, vídeos e ligazóns a blogs con información de interese sobre este evento deportivo.
20/05/2014. DINAMIZACIóN
O Consello da Cultura Galega e a Consellería de Cultura, Educación e Ordenación Universitaria da Xunta de Galicia, coa colaboración do Concello de Celanova e Vegalsa-Eroski, organizan a segunda edición do certame musical No bico un cantar, co obxectivo de trasladar a paixón pola música culta e a poesía galega a escolares de toda Galicia. Nesta edición as nenas e nenos cantarán os poemas de Manuel Curros Enríquez: “A Rosalía”, “Nouturnio”, “Os teus ollos” e “Unha noite na eira do trigo”. O acto terá lugar o vindeiro 6 de xuño, ás 17:30 h, en Celanova.
15/05/2014. AXUDAS E PREMIOS
O Consello Asesor de RTVE en Galicia e da CRTVG entregou os XXI Premios de Publicidade en Galego 2013, que teñen como obxectivo recoñecer o traballo realizado a prol da normalización lingüística por parte de empresas e entidades que se publicitan nos medios de comunicación.
Nesta edición os traballos premiados foron “Faite amigo da Catedral” (presentado por Arraianos para a Fundación Catedral de Santiago de Compostela), na modalidade de internet; “O son da nosa fala” (desenvolvido por Radio Lugo), na modalidade de radio; e “Maxia Verde” (desenvolvido por Imaxe para Aceites Abril), na modalidade de televisión.
Nesta edición os traballos premiados foron “Faite amigo da Catedral” (presentado por Arraianos para a Fundación Catedral de Santiago de Compostela), na modalidade de internet; “O son da nosa fala” (desenvolvido por Radio Lugo), na modalidade de radio; e “Maxia Verde” (desenvolvido por Imaxe para Aceites Abril), na modalidade de televisión.
14/05/2014. OUTRAS
Os coordinadores do proxecto CampUSCulturae, adscrito á Universidade de Santiago, presentan a Biblioteca Internacional CampUSCulturae, un espazo bibliográfico e documental especializado na diversidade cultural e lingüística que conta con preto de 5.000 volumes de literatura de creación e científica, relacionados con 60 contextos culturais e linguas do mundo. A sede física sitúase nas instalacións da Biblioteca Xeral da USC no colexio de Fonseca. Os/as usuarios/as poden realizar as buscas bibliográficas e hemerográficas no sitio web do proxecto.
14/05/2014. INVESTIGACIóN
A Comisión de Normalización Lingüística (CNL) da Facultade de Dereito e o Servizo de Normalización Lingüística (SNL) da USC presentan o glosario Termos esenciais de dereito administrativo, no que se compilan 1.081 termos en galego, xunto coas súas correspondencias en castelán. A obra súmase á serie de glosarios sobre o vacabulario básico do dereito elaborados ata o momento no seo desta Comisión (dereito constitucional, penal, internacional e civil). No futuro, a serie completarase cos glosarios de dereito fiscal, mercantil e laboral.
13/05/2014. DINAMIZACIóN
Mañá, 14 de maio, ás 12:00 h, a Real Academia Galega acollerá no seu salón de actos a presentación do libro Xosé María Díaz Castro. Nimbos de luz, editado por Galaxia e a Xunta de Galicia e coordinado por Alfonso Blanco Torrado, Luís G. Tosar e Armando Requeixo. O acto central do Día das Letras Galegas 2014 terá lugar o vindeiro sábado 17 de maio, ás 12:45 h, nunha sesión plenaria extraordinaria da Academia que terá lugar na Casa Habanera de Guitiriz. No transcurso do acto intervirán o presidente, Xesús Alonso Montero, e os membros numerarios Xosé Luís Regueira Fernández, Darío Xohán Cabana Yanes e Xosé Luís Franco Grande.
13/05/2014. CURSOS E CONGRESOS
O Servizo de Normalización Lingüística do Concello de Pontevedra organiza un Obradoiro de ferramentas en galego para o lecer e o tempo libre, destinado a profesionais do sector que preferentemente traballen no concello de Pontevedra. O obxectivo é fomentar o emprego de ferramentas en galego nas actividades musicais, lúdicas e formativas que planifican os profesionais do lecer e o tempo libre. O obradoiro desenvolverase o sábado 24 de maio, no Pazo da Cultura de Pontevedra (seminario 8). O prazo de inscrición remata o 19 de maio de 2014.
12/05/2014. AXUDAS E PREMIOS
Os exemplos, autoría do xornalista José Casás García, foi o artigo gañador da décima edición do Premio a artigos xornalísticos normalizadores que convoca anualmente o Concello de Carballo. O autor recibirá un premio en metálico de 1.000 euros e, ademais, o artigo será publicado nos nove medios de comunicación que colaboran coa iniciativa. A entrega de premios terá lugar o venres 16 de maio, ás 21.00 h, no Pazo da Cultura de Carballo coa actuación de Os Tres Trebóns e García Mc. A entrada é de balde. Para obter máis información, preme aquí.
12/05/2014. DINAMIZACIóN
Os equipos de dinamización lingüística de sete centros educativos de secundaria están a desenvolver, baixo a coordinación da Secretaría Xeral de Política Lingüística, o Proxecto Dragal, unha iniciativa multimedia e multidisciplinar que ten como obxectivo promover a lectura, a creación e a investigación en galego. No marco deste proxecto, baseado na triloxía homónima de Elena Gallego Abad, o alumnado desenvolveu diferentes actividades relacionadas coa lectura, a recreación literaria e a investigación histórica. Neste terceiro trimestre traballará sobre a toponimia lendaria do seu contorno máis próximo, motivo polo que ao longo deste mes de maio se organizarán conferencias sobre toponimia maior e lendaria en cada un dos centros educativos participantes. Para ampliar información, preme aquí.
09/05/2014. CURSOS E CONGRESOS
O Servizo de Normalización Lingüística do Concello de Narón organiza o Curso básico de curtametraxes e blogs, dirixido a maiores de 18 anos, co obxectivo de achegar formación sobre creación audiovisual, dándolle valor á riqueza do imaxinario popular como fonte de creatividade. Con este obxectivo, durante o curso, o alumnado empregará para a creación das curtametraxes o material previamente recollido no proxecto “O nobelo do tempo”, unha iniciativa de recolla de tradición oral organizada o ano pasado polo SNL municipal.
O curso desenvolverase entre os días 28 de maio e 27 de xuño de 2014. As persoas interesadas poden formalizar a matrícula a partir do 12 de maio. Para ampliar esta información, preme aquí.
O curso desenvolverase entre os días 28 de maio e 27 de xuño de 2014. As persoas interesadas poden formalizar a matrícula a partir do 12 de maio. Para ampliar esta información, preme aquí.
08/05/2014. AXUDAS E PREMIOS
O Concello de Silleda, en colaboración co IES Pintor Colmeiro, a asociación Empresarios e Comerciantes de Silleda (ECOS) e a Secretaría Xeral de Política Lingüística, presenta a primeira edición do Premio Concello de Silleda á normalización lingüística nas empresas e comercios, co obxectivo de estimular o uso do galego no sector comercial e recoñecer o labor tanto das empresas cunha tradición recoñecida na normalización, como daquelas que se incorporaron recentemente ás prácticas normalizadoras. O prazo para presentar as candidaturas remata o próximo 17 de maio.