Novas da lingua

Rexistros3691 a 3720 de 5145
  1. Inicio
  2. CDSG-CCG
  3. Novas da lingua
28/03/2012. CURSOS E CONGRESOS

Cursos de verán de lingua e cultura galegas para estranxeiros en Santiago de Compostela

A Real Academia Galega, o Instituto da Lingua Galega (USC) e mais a Secretaría Xeral de Política Lingüística da Xunta de Galicia organizan unha nova edición destes cursos estivais que se desenvolverán entre os días 2 e 27 de xullo de 2012.

Os cursos, que se organizan en diferentes niveis (elemental, medio e curso superior de Filoloxía Galega) teñen como principal finalidade ofrecerlle ao alumnado de fóra de Galicia a posibilidade de se familiarizar coa lingua e a realidade sociocultural galegas.

As persoas interesadas en asistir deben presentar a súa documentación na Secretaría dos Cursos antes do 1 de maio de 2012. Se desexa máis información, prema aquí.




28/03/2012. DINAMIZACIóN

Galegote Rock en Pontevedra

A Concellaría de Normalización Lingüística e Xuventude do Concello de Pontevedra organiza, en colaboración coa sala Karma, o programa de dinamización lingüística Galegote Rock, deseñado para introducir a lingua galega nas actividades de lecer da xuventude.

Galegote Rock é un programa de concertos que se celebrará nos meses de abril, maio e xuño na sala Karma (Pontevedra) e que inclúe as actuacións das bandas galegas Roger de Flor e o marqués das Vinhas, Ruxe Ruxe, Zënzar, Nao e Terbutalina.

Para obter máis información sobre as datas e os horarios dos concertos, prema aquí.

27/03/2012. CURSOS E CONGRESOS

A debate no CCG a proxección internacional das linguas e culturas peninsulares

O Consello da Cultura Galega organiza, en colaboración co Movimento Festlatino, o seminario “As linguas e culturas peninsulares e a súa proxección internacional”, que terá lugar o vindeiro 3 de abril de 2012 na sede do CCG (Pazo de Raxoi. Santiago de Compostela).

No encontro participarán representantes de diferentes institucións galegas e peninsulares, como o Institut Ramon Llull, o Instituto Camões, o Instituto Cervantes e o propio movimento Festlatino.

As persoas interesadas en asistir deben enviar a súa solicitude ao correo difusion@consellodacultura.org.
27/03/2012. CURSOS E CONGRESOS

Cursos de linguaxe xurídica galega

A Escola Galega de Administración Pública convoca cursos de linguaxe xurídica galega (niveis medio e superior), tanto na modalidade de teleformación como presencial. Os cursos están destinados ao persoal ao servizo da Administración de xustiza e mais aos colectivos relacionados co ámbito xurídico que presten servizos en Galicia.

O prazo de presentación de solicitudes remata o 11 de abril de 2012, ás 14:00 h.

Se desexa consultar o texto completo da convocatoria, prema aquí.
27/03/2012. CURSOS E CONGRESOS

IV Fiadeiro de localización de software libre

A Comisión de Normalización Lingüística da Escola Técnica Superior de Enxeñaría e mais o Servizo de Normalización Lingüística da USC organizan a cuarta edición do Fiadeiro de localización de software libre, que ten como obxectivo promover o uso do software libre en lingua galega na USC.

As sesións, destinadas a toda a comunidade universitaria, desenvolveranse os días 19, 26 e 28 de abril de 2012. O prazo de inscrición remata o 15 de abril.
27/03/2012. OUTRAS

Exposición itinerante sobre a vida e obra de Celso Emilio Ferreiro

A Consellería de Cultura, Educación e Ordenación Universitaria organiza unha exposición multimedia sobre a vida e obra do escritor Celso Emilio Ferreiro, co gallo da celebración este 2012 do centenario do seu nacemento.

A mostra inaugurouse onte, 26 de marzo, na biblioteca pública Ánxel Casal de Santiago de Compostela e nos vindeiros meses percorrerá diferentes bibliotecas nodais galegas e centros escolares.

Se desexa máis información, prema aquí.
23/03/2012. CURSOS E CONGRESOS

Curso de dinamización lingüística para monitores de tempo libre

A Secretaría Xeral de Política Lingüística e a Dirección Xeral de Xuventude organizan o curso O galego campa: ferramentas e propostas para a dinamización da lingua galega na mocidade, iniciativa que se enmarca no programa de dinamización lingüística O galego campa!, dirixido a galeguizar o tempo de lecer nos campamentos xuvenís de verán.

O curso está dirixido ao monitorado que traballa nos campamentos e terá lugar os días 31 de marzo e 1 de abril de 2012 no albergue xuvenil de Gandarío (Bergondo).

Para obter máis información sobre o programa e os trámites de inscrición, prema aquí.

22/03/2012. AXUDAS E PREMIOS

V Curso de Verán de Lingua e Cultura Galega para Estranxeiros na UDC

O Servizo de Normalización Lingüística da Universidade da Coruña, coa colaboración da Secretaría Xeral de Política Lingüística, organiza o V Curso de Verán de Lingua e Cultura Galegas para Persoas Estranxeiras.

O curso conta con dous niveis, elemental e intermedio, e as sesións desenvolveranse entre os días 2 e 27 de xullo de 2012 na Facultade de Filoloxía da UDC.

O prazo de inscrición remata o 4 de maio de 2012.


21/03/2012. CURSOS E CONGRESOS

Accesibles na rede os audios dos XIV Encontros para a Normalización Lingüística

Xa están accesibles na mediateca do Consello da Cultura Galega as gravacións de todas as intervencións dos
XIV Encontros para a Normalización Lingüística, que tiveron lugar os pasados días 8 e 9 de marzo de 2012 en Santiago de Compostela.

Neste mesmo sitio web pode consultar tamén o programa completo dos Encontros, os currículos dos interventores, os resumos das intervencións e unha selección de fotografías das xornadas.
20/03/2012. DINAMIZACIóN

Mil festas máis para a lingua galega

A Asociación de Funcionarios para a Normalización Lingüística, en colaboración coa Secretaría Xeral de Política Lingüística, presenta unha nova edición da campaña “Mil festas máis para lingua galega”, deseñada para fomentar o uso do galego no ámbito das festas populares en Galicia.

Con este motivo, as entidades promotoras da iniciativa propóñenlles a todos os concellos e comisións de festas un decálogo de medidas para conseguir unhas festas innovadoras, participativas e galeguizadas.

A campaña presentarase publicamente o vindeiro 22 de marzo, ás 18:00 h, na Cidade da Cultura de Galicia.

Se desexa máis información, prema aquí.

20/03/2012. AXUDAS E PREMIOS

IX Certame Literario Concello de Ames

O Servizo de Normalización Lingüística do Concello de Ames convoca a novena edición deste certame literario que ten como principal obxectivo promover os novos valores da literatura en lingua galega.

O certame conta con dúas modalidades (narrativa e poesía) e en cada unha delas establécense tres categorías, segundo a idade dos participantes. Os textos, de tema libre, deben ser inéditos e estar escritos en galego.

O prazo de presentación de orixinais remata o 12 de abril de 2012.

Se desexa consultar o texto completo da convocatoria, prema aquí.
20/03/2012. AXUDAS E PREMIOS

VIII Proxecto Didáctico Antonio Fraguas

A Fundación Antonio Fraguas Fraguas convoca a oitava edición deste proxecto didáctico, que ten como obxectivo o desenvolvemento dun programa de investigación sobre o patrimonio etnográfico, antropolóxico, lingüístico, xeográfico, histórico e artístico do contorno inmediato dos centros escolares de Galicia.

Os proxectos gañadores deberán realizarse no curso académico 2012-2013 en colaboración co Museo do Pobo Galego, onde serán expostos posteriormente.

Establécense dúas modalidades, ensino primario e secundario, e outorgaranse dous premios de 7 000 euros para cada proxecto gañador (un por modalidade).

O prazo para enviar as candidaturas remata o 25 de maio de 2012.

Para consultar as bases completas da convocatoria, prema aquí.
16/03/2012. DINAMIZACIóN

FalaRedes, programa de dinamización lingüística para a Administración local

A Secretaría Xeral de Política Lingüística presenta FalaRedes, un programa de dinamización lingüística dirixido ás máis de 90 entidades locais que están adscritas á Rede de Dinamización Lingüística.

O programa integra tres proxectos: Galego de cine, dirixido a nenos/as de 6 a 12 anos, achegaralle ao público infantil as mellores curtas de animación en galego; Títerehop, dirixido a mozos/as de 13 a 17 anos, estimulará as dotes artísticas dos adolescentes a través de obradoiros de títeres e hip-hop; e
O señor das dunas, dirixido a todos os públicos, ofrecerá unha selección de contos tradicionais ilustrados sobre a area.

As actividades desenvolveranse entre marzo e decembro de 2012. No web da SXPL pode consultar as datas e lugares concretos onde terán lugar.
16/03/2012. AXUDAS E PREMIOS

III Premio “Rosalía de Castro” de Lingua e Cultura 2012

A Unidade Técnica de Normalización Lingüística da Deputación Provincial da Coruña convoca o III Premio “Rosalía de Castro” de Lingua e Cultura, que ten como principais obxectivos manter viva a figura de Rosalía de Castro e recoñecer a aquelas persoas ou entidades que traballan a prol da promoción social e dignificación do idioma galego.

O prazo para a presentación de candidaturas remata o 20 de abril.


16/03/2012. AXUDAS E PREMIOS

Axudas para a edición de publicacións periódicas en galego

A Secretaría Xeral de Medios da Xunta de Galicia anuncia, no DOG do 16 de marzo de 2012, a convocatoria de subvencións para empresas que editen publicacións periódicas escritas integramente en galego.

O prazo de presentación de solicitudes é dun mes, contado a partir do día seguinte ao da publicación da convocatoria.

15/03/2012. AXUDAS E PREMIOS

III Concurso de monólogos en lingua galega “Que me dis!!”

O Servizo de Normalización Lingüística do Concello de Narón organiza a terceira edición deste concurso de monólogos que ten como obxectivo promover o uso do galego no ámbito das novas tecnoloxías.

As persoas participantes deben gravar o seu monólogo en vídeo ou audio e envialo como arquivo adxunto a través do formulario accesible no propio web do concello, onde se poderán consultar e apoiar.

O prazo para enviar as gravacións remata o 4 de maio de 2012 (ás 14:30 h).

Os tres monólogos gañadores serán galardoados cunha tablet (1º premio), cun netbook (2º premio) e cun smartphone (3º premio).

13/03/2012. OUTRAS

Terras de Santiago presenta a súa nova cabeceira

O semanario compostelán Terras de Santiago galeguiza a súa cabeceira e comprométese a incrementar o uso do galego nos seus contidos, medidas que se desenvolverán no marco dun convenio de colaboración asinado entre a Secretaría Xeral de Política Lingüística e a Editorial Compostela.

Terras de Santiago (antes Tierras de Santiago) naceu en setembro de 2006, da man da Editorial Compostela, e conta cunha tiraxe semanal de 30 000 exemplares, que se distribúen de balde en 25 municipios da área de Compostela.

Se desexa máis información, prema aquí.
13/03/2012. INVESTIGACIóN

Consultorio de apelidos na Gentalha do Pichel

A Gentalha do Pichel organiza a actividade “Por que temos os apelidos que temos?”, un consultorio de apelidos galegos dirixido por Gonzalo Navaza.

O acto terá lugar este sábado, 17 de marzo de 2012, ás 20:00 h, na sede da asociación (Santa Clara, 21. Santiago de Compostela).
12/03/2012. AXUDAS E PREMIOS

Premios á edición en lingua galega 2011

A Asociación Galega de Editores deu a coñecer os galardoados/as da sétima edición destes premios que teñen como obxectivo recoñecer o traballo editorial en lingua galega realizado polos seus membros ao longo do ano.

Non hai noite tan longa, de Agustín Fernández Paz (Xerais); Obra Gráfica de Conde Corbal (Nova Galicia Edicións); Poesía completa de Lois Pereiro (Xerais); Xa me tardan eses magos, de Mamá Cabra (Galaxia); Shakespeare, traducido por Ramón G. Izquierdo (Xerais); Contos por teléfono, ilustrado por Pablo Otero (Kalandraka); As mulleres en Galicia no século XX, de Jesús de Juana e outros (Ir Indo); as transformacións de álbums ilustrados en series de animación audiovisual: Os contos do camiño e Caracois (OQO); o XXV aniversario de Andavira Editora; Xesús Couceiro e Xavier Queipo foron os autores, obras e iniciativas galardoadas nas diferentes categorías.

Se desexa máis información, prema aquí.
12/03/2012. CURSOS E CONGRESOS

Seminario “Lingua e Emprego”

A Comisión de Normalización Lingüística da Facultade de Filoloxía da UDC, en colaboración co Servizo de Normalización Lingüística, organiza o seminario Lingua e Emprego, que terá lugar os días 20, 21 e 22 de marzo de 2012 na Coruña.

No transcurso das sesións reflexionarase sobre formación e emprego, así como sobre as ferramentas de traballo para os campos editorial e da tradución.

As persoas interesadas poden inscribirse a través do Facebook da CNL, ou ben enviando un correo electrónico a cnlfilo.udc@gmail.com.

Para ampliar esta información, prema aquí.
06/03/2012. DINAMIZACIóN

Novo número do Cartafol Dixital

Xa pode consultar en liña o Cartafol Dixital do mes de febreiro, voceiro da Universidade de Santiago de Compostela en materia de normalización lingüística.

Entre outros contidos, neste número achéganse os datos sobre usos lingüísticos das teses, traballos de fin de grao e traballos de fin de máster presentados na USC en 2011. Así mesmo, ofrécese información sobre os incentivos (programas de axudas e premios) cos que conta a comunidade universitaria para elaborar os seus traballos de investigación en galego.

08/03/2012. CURSOS E CONGRESOS

Consulte en liña os resumos das intervencións dos
XIV Encontros

Xa pode consultar na rede os currículos dos participantes e mais os resumos das intervencións dos XIV Encontros para a Normalización Lingüística.

Os XIV Encontros terán lugar os vindeiros días 8 e 9 de marzo de 2012 no Auditorio da Biblioteca de Galicia (Cidade da Cultura de Galicia) e nesta edición prestarán especial atención á relación entre lingua e mocidade.
02/03/2012. CURSOS E CONGRESOS

Cursos de Celga 1 en liña

A Secretaría Xeral de Política Lingüística convoca unha nova edición de cursos en liña do nivel Celga 1, que se desenvolverán desde o 26 de marzo ao 1 de xuño de 2012.

O prazo de inscrición remata o 14 de marzo de 2012. As persoas que desexen matricularse deben enviar unha mensaxe electrónica ao enderezo sxpl.formacion@xunta.es na fagan constar o seu nome e apelidos, o DNI, o enderezo electrónico, o teléfono de contacto, o lugar de residencia e mais o nivel de estudos.

Se desexa máis información, prema aquí.

28/02/2012. DINAMIZACIóN

Preséntase o sitio web oficial de Valentín Paz Andrade

A Consellería de Cultura e Educación, o Consello da Cultura Galega, a Real Academia Galega e mais Alfonso Paz-Andrade, fillo de Valentín Paz Andrade, presentaron publicamente o sitio web oficial do autor homenaxeado este ano no Día das Letras Galegas.

O web, desenvolvido por Industrias Pesqueras (revista fundada en 1927 por Valentín Paz Andrade) achega información cumprida sobre a biografía, bibliografía e axenda de actos programados para homenaxear o autor, así como unha selección de fotografías e textos inéditos dixitalizados polo Consello da Cultura Galega.

Se desexa máis información, prema aquí.

28/02/2012. OUTRAS

Dioivo, un novo proxecto de xornalismo dixital en galego

Mañá, 29 de febreiro de 2012, bota a andar Dioivo, unha revista dixital en lingua galega que nace coa finalidade de “contar e contrariar”.

A iniciativa está impulsada pola Asociación Cultural Dioivo, que servirá de sustento económico do proxecto.

A modo de presentación, distribuirase tamén un primeiro número en papel, de tiraxe limitada, con ilustracións de Gonzalo Vilas, Suso Sanmartín e Roi Fernández. Ademais, están previstas diferentes presentacións públicas, unha delas o 9 de marzo no marco dos XIV Encontros para a Normalización Lingüística.
28/02/2012. DINAMIZACIóN

XIII certame musical “A mocidade coa lingua”

O IES Manuel Murguía de Arteixo organiza o XIII certame musical “A mocidade coa lingua”, unha iniciativa dirixida aos centros de ensino que ten como obxectivo promover o uso do galego no ámbito do lecer.

O certame consta de dúas fases, unha primeira fase interna de clasificación, que organizará cada centro participante, e unha segunda fase final intercentros, que terá lugar o 16 de maio de 2012 no Centro Cívico de Arteixo.

Os tres primeiros clasificados recibirán un premio de 300, 200 e 150 euros respectivamente.
27/02/2012. INVESTIGACIóN

Facer país co idioma. Sentido da normalización lingüística

O pasado sábado, 25 de febreiro de 2012, tivo lugar no Paraninfo da Universidade de Santiago de Compostela o acto de ingreso do profesor Henrique Monteagudo como académico numerario da Real Academia Galega.


O discurso que o profesor Monteagudo elaborou para o seu acto de incorporación á RAG leva por título “Facer país co idioma. Sentido da normalización lingüística”, no que argumentou con rigor que a normalización lingüística do galego non só non é incompatible coa liberdade lingüística dos falantes, senón que é condición imprescindible para o pleno exercicio desta. En xeral, a idea que estivo latente ao longo de todo o discurso foi a de que a actual crise do proceso (e tamén do concepto) de normalización lingüística está directamente relacionada coa crise do autogoberno, que é realmente o que hoxe está en cuestión.

Ademais da versión resumida lida no acto, texto que lle achegamos nesta nova,
poden consultar a versión íntegra do discurso nos fondos do CDSG, a través do servizo de préstamo.
27/02/2012. AXUDAS E PREMIOS

Premio Abertos ao Galego

A Mesa pola Normalización Lingüística convoca o Premio Abertos ao Galego, un galardón con periodicidade anual que se outorgará a empresas que destaquen polo uso normal do idioma galego.

Calquera empresa ou particular pode facerlle chegar á Mesa a súa proposta, incluíndo o nome e datos de contacto da empresa candidata, xunto cunha argumentación que incida nos seus usos lingüísticos. As persoas que remitan candidaturas a título particular entrarán no sorteo dun lote de produtos das empresas que forman parte do proxecto Abertos ao Galego.

O prazo de presentación de candidaturas remata o 2 de maio de 2012.
24/02/2012. OUTRAS

Hoxe, 24 de febreiro, celébrase o Día de Rosalía

Diferentes concellos, centros de ensino e institucións culturais do país celebraran hoxe, por iniciativa da Asociación de Escritores en Lingua Galega (AELG), o Día de Rosalía, escritora determinante na historia do noso idioma que restaurou, coa súa obra Cantares gallegos (1863), o uso escrito do galego despois de séculos de ocultación.

Ao abeiro desta iniciativa, moitos centros de ensino están a organizar actividades didácticas relacionadas coa escritora e diferentes concellos declararon oficialmente o 24 de febreiro como Día de Rosalía de Castro, incluíndo esta celebración nas súas programacións culturais.

A AELG anima á cidadanía en xeral a agasallar un libro en galego e un flor para festexar o 175 aniversario do nacemento da autora.

No web da AELG pode consultar as actividades e actos programados.

22/02/2012. INVESTIGACIóN

Henrique Monteagudo incorpórase á RAG reflexionando sobre o sentido da normalización lingüística

O vindeiro sábado, 25 de febreiro de 2012, ás 12:00 h, a Real Academia Galega celebrará unha sesión extraordinaria pública con motivo da recepción como académico de número de Henrique Monteagudo Romero.

Henrique Monteagudo, profesor de sociolingüística na Universidade de Santiago de Compostela e director do CDSG, lerá o discurso “Facer país co idioma. Sentido da normalización lingüística”.

O acto terá lugar no Paraninfo da USC (Facultade de Xeografía e Historia, praza da Universidade, 1).