Novas da lingua

Rexistros3901 a 3930 de 5280
  1. Inicio
  2. CDSG-CCG
  3. Novas da lingua
18/02/2010. DINAMIZACIóN

Cartafol, o semanario do ensino galego

Neste mes de febreiro botou a andar Cartafol, un semanario do ensino galego que reflexionará sobre os principais temas educativos de actualidade, prestándolle especial atención aos relacionados coa normalización lingüística.

Neste primeiro número trátanse, entre outros temas, a Lei de convivencia, o funcionamento do espazo Abalar ou o novo plan de I+D+i.

Aínda que este número promocional se está a difundir de balde, no futuro a revista distribuirase só previa subscrición.
15/02/2011. AXUDAS E PREMIOS

Axudas para a edición de publicacións periódicas en galego

A Secretaría Xeral de Medios da Xunta de Galicia anuncia, no DOG do 15 de febreiro de 2011, a convocatoria de subvencións para empresas que editen publicacións periódicas escritas integramente en galego.

O prazo de presentación de solicitudes é dun mes, contado a partir do día seguinte ao da publicación da convocatoria.
15/02/2011. DINAMIZACIóN

O Concello de Narón difunde as palabras do galego

O Servizo de Normalización Lingüística do Concello de Narón presenta a iniciativa “As palabras do galego”, coa que convida a todas as persoas que o desexen a enviar ao correo electrónico a.pita@naron.es a palabra da lingua galega (dialectal ou normativa) que máis lles guste.

As palabras máis recorrentes difundiranse no web do concello e os usuarios/as poderán comentalas.

11/02/2011. CURSOS E CONGRESOS

Cursos de linguaxe administrativa galega

A Escola Galega de Administración Pública, en colaboración coa Secretaría Xeral de Política Lingüística, convoca cursos de linguaxe administrativa galega, de nivel medio e superior, para o persoal da Administración pública de Galicia.

A matrícula deberá tramitarse a través do web da EGAP.

O prazo de presentación de solicitudes remata o 22 de febreiro de 2011.

Para consultar o texto completo da convocatoria, prema aquí.
10/02/2011. OUTRAS

Probas para obtención dos certificados de lingua galega

A Secretaría Xeral de Política Lingüística convoca as probas para a obtención dos Celga 1, 2, 3 e 4 que se desenvolverán neste ano 2011. Realizaranse dúas convocatorias, unha para Galicia, resto do Estado español e Europa (xuño de 2011) e outra para América (outubro de 2011).

Os prazos para a presentación de solicitudes rematan o 29 de abril (convocatoria de xuño) e o 30 de xuño (convocatoria de outubro).

Se desexa máis información, prema aquí.
09/02/2011. EMPREGO

Prazas de técnico de grao medio en normalización lingüística na Universidade da Coruña

A Universidade da Coruña convoca dúas prazas de técnico de grao medio en normalización lingüística (grupo II). Haberá dúas quendas de acceso, unha de promoción interna e outra de acceso libre. As persoas seleccionadas na quenda de promoción interna terán prioridade para a elección de vacantes.

O procedemento de selección será o de concurso-oposición.

O prazo de presentación de solicitudes é de 20 días naturais, contados a partir do día seguinte ao da publicación desta convocatoria.

09/02/2011. DINAMIZACIóN

Ferrol con Carvalho Calero

O Departamento de Normalización Lingüística do Concello de Ferrol, en colaboración coa Coordenadora de Equipas de Normalización Ferrolterra, presenta o sito web Ferrol con Carbalho Calero, que quere converterse nun espazo vivo de información e reflexión sobre a vida e a obra do intelectual ferrolán.

Entre os contidos do web, especialmente orientados á comunidade educativa, iranse incluíndo todas as actividades que se desenvolvan nos centros de ensino para difundir e promover o legado de Carbalho Calero.

09/02/2011. OUTRAS

Bota a andar a primeira revista de crítica cinematográfica en lingua galega

O pasado venres, 4 de febreiro de 2011, presentouse na Coruña A Cuarta Parede, a primeira revista dixital en galego de crítica cinematográfica.

A publicación, dirixida por Eloy Domínguez e Víctor Paz, conta con seis seccións, nas que se irán clasificando
as diferentes novas e achegas sobre cinema non comercial, outorgándolle unha especial atención ao cinema portugués.
09/02/2011. AXUDAS E PREMIOS

En galego, sen filtro

O Departamento de Normalización Lingüística do Concello de Ferrol e mais a Coordenadora de Equipas de Normalización Ferrolterra organizan o XI Certame de creación artística, poesía e imaxe “En galego, sen filtro”, que ten como obxectivo fomentar a creatividade do alumnado e conciencialo sobre a realidade plurilingüe galega e mundial.

As persoas participantes deberán presentar unha composición plástica orixinal inspirada nun dos 15 textos poéticos facilitados pola organización.

Coas obras seleccionadas o Concello de Ferrol organizará unha exposición pública en maio de 2011.

O prazo para entregar os orixinais remata o 23 de marzo.
09/02/2011. DINAMIZACIóN

Bicada polo galego en Compostela

Coincidindo co celebración o vindeiro 14 de febreiro do Día dos Namorados, A Mesa pola Normalización Lingüística está a organizar, baixo o lema “Goza coa túa lingua”, un acto lúdico-reinvicativo que consistirá nunha bicada colectiva en defensa do idioma galego.

A iniciativa está a ser difundida principalmente a través do Facebook da entidade.

O acto terá lugar o vindeiro luns, 14 de febreiro, ás 17 horas na Praza do Toural, en Santiago de Compostela.
03/02/2011. EMPREGO

A CRTVG convoca tres prazas de asesor lingüista

A Compañía de Radio-Televisión de Galicia (CRTVG) publica a convocatoria pública do proceso selectivo para a provisión de diferentes prazas de persoal laboral (3 de asesor lingüista) para traballar na CRTVG e nas súas sociedades, Televisión de Galicia S.A. e Radiotelevisión Galicia, S.A.

Para optar ás prazas de asesor lingüista, os interesados/as deben ser licenciados/as en Filoloxía Hispánica (subsección galego-portugués) ou Filoloxía Galega.

O sistema de selección é o de concurso-oposición e o prazo de presentación de solicitudes é de 30 días naturais, contados a partir do día seguinte ao da publicación da convocatoria.
03/02/2011. DINAMIZACIóN

Novo número do Cartafol Dixital

Xa está accesible na rede un novo número do Cartafol Dixital, voceiro da USC en materia de normalización lingüística.

Neste número podemos consultar, entre outros contidos, a entrevista a Alba Nogueira, profesora de Dereito Administrativo na USC; a presentación dos datos sobre o uso dos idiomas na docencia da USC no curso 2010-2011 ou a nova sobre o programa de intercambio lingüístico galego-catalán “Parellaes”.

03/02/2011. DINAMIZACIóN

Galeguizargalicia.tv, nova canle de televisión en internet

Bota a andar a nova canle de televisión en internet Galeguizargalicia.tv, co ánimo de difundir as iniciativas desenvolvidas polas entidades agrupadas no colectivo Galeguizar Galicia.

A partir de agora, esta canle retransmitirá en directo tanto os seus actos públicos, como as mesas redondas, reportaxes e mensaxes publicitarias do colectivo.

Neste momento pode consultar xa os vídeos dalgunhas das actividades organizadas nos últimos anos.
03/02/2011. DINAMIZACIóN

En galego sabe mellor

O Servizo de Normalización Lingüística do Concello de Oroso convoca o concurso de receitas de Entroido “En galego sabe mellor”.
As receitas deben ser típicas do Entroido e estar redactadas en lingua galega.
O prazo de entrega remata o 11 de marzo de 2011. Con posterioridade, no día sinalado pola organización, os participantes deberán presentar tamén o prato cociñado.

Os premios consistirán nunha cea para dúas persoas (para o/a gañador/a) e un libro de cociña (para o/a finalista).
28/01/2011. INVESTIGACIóN

Preséntase un estudo sobre a situación do galego na última etapa do Franquismo

A Deputación Provincial de Pontevedra presenta a obra de
Mª Dolores Villanueva “A lingua galega entre 1963 e 1975. Situación social e discursos dende o galeguismo”, premiada por esta institución en 2008 na categoría de “Novos investigadores”.

O acto de presentación terá lugar hoxe, 28 de xaneiro de 2011, ás 20:00 h, no Arquivo da Deputación de Pontevedra.
28/01/2011. DINAMIZACIóN

Bota a andar o Correlingua 2011

Xa se poden consultar na rede todas as novidades que incorpora o Correlingua 2011, iniciativa lúdico-didáctica que este ano levará por lema “Somos galego”.

O Correlingua comezará o vindeiro 2 de maio en Santiago de Compostela e percorrerá durante dúas semanas diferentes comarcas do país, ata rematar en Ourense o día 13.

Mentres tanto, os centros educativos poderán participar en diferentes concursos (de vídeo, de música, de banda deseñada e de elaboración do manifesto).
28/01/2011. INVESTIGACIóN

O galego contará cun dicionario de apelidos e cunha gramática académica

A Real Academia Galega (RAG) e mais a Universidade de Santiago de Compostela (USC) asinaron o pasado 24 de xaneiro dous convenios de colaboración a través dos cales a USC, a través do seu Instituto da Lingua Galega, elaborará un dicionario dos apelidos galegos e mais unha gramática académica que contribúa a definir e difundir o estándar.

O proxecto de elaboración do dicionario estará coordinado pola investigadora do ILG Ana Isabel Boullón, mentres que a elaboración da gramática estará dirixida por Rosario Álvarez, académica da RAG e directora do ILG.

19/01/2011. CURSOS E CONGRESOS

Cursos de lingua galega para adultos e colectivos de Galicia

A Secretaría Xeral de Política Lingüística publica a convocatoria de cursos de lingua galega preparatorios para as probas dos niveis Celga 1, Celga 2, Celga 3 e Celga 4, destinados a adultos e colectivos de Galicia.

O prazo de presentación de solicitudes remata o 28 de febreiro de 2011.
Se desexa consultar o texto completo da convocatoria, prema aquí.
18/01/2011. DINAMIZACIóN

Viaxe virtual en galego ás Covas do Folón

As concellarías de Xuventude e Normalización Lingüística do Concello de Vigo están a desenvolver o videoxogo Viaxe ás Covas do Folón, unha aventura virtual en galego a través da historia de Vigo e o seu patrimonio cultural e lingüístico.

Co ánimo de involucrar aos máis novos neste proceso de creación, o concello convida ao estudantado de 2º e 3º ciclo de primaria dos centros de ensino municipais a participar no concurso de debuxo dos protagonistas do videoxogo.

O prazo para entregar as láminas remata o 20 de febreiro de 2011.
18/01/2011. CURSOS E CONGRESOS

Cursos de lingua galega nas escolas oficiais de idiomas

A Consellería de Educación e Ordenación Universitaria convoca cursos de linguaxe administrativa galega (niveis medio e superior) e mais cursos de preparación dos CELGA (niveis 1, 2, 3 e 4), que se impartirán ao longo do 2011 nas escolas oficiais de idiomas de Galicia.

Os cursos de linguaxe administrativa están dirixidos ao persoal que realiza funcións administrativas nas diferentes administracións públicas de Galicia. Aos cursos preparatorios dos CELGA poderán asistir todas as persoas maiores de 16 anos interesadas en certificar os seus coñecementos lingüísticos.

Os prazos de presentación de solicitudes varían segundo a quenda elixida.

Se desexa máis información, prema aquí.
18/01/2011. AXUDAS E PREMIOS

Axudas para a presentación de proxectos fomento do galego nos centros privados

A Consellería de Educación e Ordenación Universitaria convoca axudas para desenvolver, durante o curso escolar 2010-2011, proxectos de fomento do uso do galego nos centros privados de ensino non universitario de Galicia.

O prazo de presentación de solicitudes é dun mes, contado a partir da publicación da convocatoria.
04/01/2011. AXUDAS E PREMIOS

Axudas á promoción, produción e edición do libro galego

A Consellería de Cultura e Turismo publica as axudas para a promoción, produción e edición do libro galego, tanto no que se refire á tradución para outras linguas de obras publicadas orixinariamente en galego como á tradución para galego de obras publicadas noutras linguas.

O prazo de presentación de solicitudes é dun mes, contado a partir do día seguinte ao da publicación da convocatoria.


03/01/2011. AXUDAS E PREMIOS

Concurso “Exposición Letras Galegas 2011”

A Secretaría Xeral de Política Lingüística convoca un concurso destinado aos centros de ensino non universitario para a elaboración dunha exposición relacionada coa obra, época e lingua do autor homenaxeado no Día das Letras Galegas 2011, Lois Pereiro.

O concurso contempla dúas categorías, unha para os centros de educación infantil e primaria e outra para os restantes. A exposición gañadora en cada unha destas categorías será distribuída en máis de 2000 puntos de Galicia e do exterior e os equipos de traballo que elaboren estas exposicións recibirán cadanseu premio en metálico de 4000 euros.

O prazo de presentación dos traballos remata o 14 de febreiro de 2011.

23/12/2010. AXUDAS E PREMIOS

Resólvese o Premio Manuel Beiras 2010

A Cámara de Comercio e o Concello de Santiago fixéronlles entrega dos seus respectivos premios aos galardoados da décimo primeira edición do Premio Manuel Beiras.

Os premiados deste ano foron o gabinete xurídico Novi Lus Avogados, na categoría de nova incorporación ao uso do galego, e a Casa de Xantar Dezaseis, na categoría de empresas que veñen realizando un uso continuado do idioma galego.

Atlántica de Información e Comunicación de Galicia recibiu tamén unha distinción especial pola decidida aposta polo noso idioma en todas as súas publicacións periódicas, como a coñecida revista Tempos Novos.

Se desexa máis información, prema aquí.
16/12/2010. CURSOS E CONGRESOS

Congreso “Xoán Manuel Pintos Pintos. Actualidade e compromiso”

A Concellaría de Normalización Lingüística do Concello de Pontevedra organiza o Congreso “Xoán Manuel Pintos Pintos. Actualidade e compromiso”, co gallo da conmemoración dos 200 anos do seu nacemento en Pontevedra.

As sesións terán lugar entre os días 6 e 9 de abril de 2011 no Pazo da Cultura de Pontevedra.

Ademais dos relatores/as oficiais (ver programa provisional), a organización convida a todas as persoas interesadas a participar con comunicacións propias.
O prazo para presentar os resumos das comunicacións remata o 15 de febreiro de 2011.

Se desexa máis información, prema aquí.
16/12/2010. DINAMIZACIóN

Nadal ecolóxico e en galego

A Concellaría de Normalización Lingüística do Concello de Santiago organiza o obradoiro Nadal en galego, que ten como obxectivos incentivar o consumo responsable e ecolóxico, así como fomentar a creatividade e o uso do idioma galego nas actividades propias destas datas.

O obradoiro, dirixido a rapaces e rapazas de entre 6 e 12 anos, desenvolverase os días 22, 23, 27, 28, 29, 30 de decembro de 2010 e o 3 de xaneiro de 2011 na Casa das Asociacións de Cornes (rúa Manuel Beiras, 3).

O prazo de inscrición remata o 20 de decembro.
16/12/2010. CURSOS E CONGRESOS

VII Xornada científica da REALITER

A Oficina Quebequesa da Lingua Francesa está a organizar a
VII Xornada científica da REALITER (Rede Panlatina de Terminoloxía), que terá lugar no Quebec o 1 de xuño de 2011, baixo o título “Multilingüismo e prácticas terminolóxicas” .

Todas as persoas interesadas teñen de prazo para enviar as súas propostas de comunicación ata o 1 de febreiro de 2011.

Se desexa máis información sobre o programa ou os trámites de inscrición, prema aquí.
16/12/2010. DINAMIZACIóN

Rois prepárase para recibir as súas maxestades reais

O Servizo de Normalización Lingüística do Concello de Rois elaborou dous modelos de carta aos Reis Magos (un para o alumnado de infantil e outro para o de primaria) e mais unha unidade didáctica para que os centros de ensino poidan traballar didacticamente a chegada das súas maxestades reais ao municipio.

Entre as actividades que se propoñen está a elaboración dunha panxoliña en galego coa que os nenos/as deben recibir os paxes reais cando estes vaian recoller as súas cartas.

Pola súa parte, os Reis Magos encargaranse de responder persoalmente todas as cartas recibidas.
16/12/2010. DINAMIZACIóN

Xantar Compostela en galego

A Secretaría Xeral de Política Lingüística e a Asociación Hostelería Compostela presentaron a nova compaña de dinamización lingüística Xantar Compostela, deseñada para promover a presenza da lingua galega no ámbito da hostalaría compostelá.

A través desta iniciativa distribuiranse entre os establecementos hostaleiros de Santiago catro modelos diferentes de manteis (dous para nenos, un para adultos e outro para estranxeiros) con xogos de palabras para se entreter nos tempos de espera.

Se desexa máis información, prema aquí.
16/12/2010. AXUDAS E PREMIOS

IV Concurso de cartas aos Reis Magos en Ames

O Servizo de Normalización Lingüística do Concello de Ames organiza o IV Concurso de cartas aos Reis Magos.

Todos os/as nenos/as de Ames que queiran participar neste concurso deben depositar as súas cartas, escritas en galego, nas caixas de correo real distribuídas por diferentes lugares do concello antes do vindeiro 29 de decembro.

Os Reis Magos contestarán, coa axuda do Apalpador, todas as cartas recibidas e o 5 de xaneiro, durante a cabalgata real, eles mesmos farán a entrega dos premios.