Novas da lingua

Rexistros3931 a 3960 de 5145
  1. Inicio
  2. CDSG-CCG
  3. Novas da lingua
14/03/2011. AXUDAS E PREMIOS

Premios á edición en lingua galega 2010

A Asociación Galega de Editores deu a coñecer os galardoados/as da sexta edición destes premios que teñen como obxectivo recoñecer o traballo editorial en lingua galega realizado polos seus membros ao longo do ano.

Todo é silencio, de Manuel Rivas (Xerais); Construtores, de Xulio Gutiérrez e Nicolás Fernández (Kalandraka); Estremas, de Ana Romaní (Galaxia); Contos para nenos que dormen deseguida, de Pinto & Chinto (Kalandraka); 30 gramos, traducido por Ramón Nicolás (Alvarellos); a colección Rodribico, ilustrada por Xosé Tomás (Baía); Gramática práctica da lingua galega, de Xoán López e outros (Baía); Xosé Neira Vilas e a asociación Culturgal foron as obras, autores e entidades galardoadas nas diferentes categorías.
Se desexa máis información, prema
aquí.
11/03/2011. AXUDAS E PREMIOS

Axudas para a promoción do uso do galego na Administración local

A Secretaría Xeral de Política Lingüística convoca subvencións destinadas a fomentar a creación ou mantemento de servizos de normalización lingüística nas entidades locais, así como o desenvolvemento de proxectos de dinamización lingüística naqueles concellos que carezan de servizo.

O prazo de presentación de solicitudes é dun mes, contado a partir do día seguinte ao da publicación desta convocatoria. (corrección de erros)
11/03/2011. DINAMIZACIóN

Pek, a pulga viaxeira

O IES San Clemente (Santiago de Compostela) participou xunto con outros centros de Nájera, Grecia, Francia, Turquía e Romanía na elaboración dun proxecto didáctico deseñado para fomentar o uso das TIC e difundir o coñecemento da realidade plurilingüe de Europa.

O traballo, elaborado dentro da rede eTwinning, consistiu na creación conxunta do cómic Pek, a pulga viaxeira, redactado en sete idiomas diferentes, entre eles o galego.

Actualmente están a preparar unha segunda edición, na que se incorporarán centros de Portugal, Italia, Polonia, Bélxica e, experimentalmente, tamén Nicaragua.
14/03/2011. CURSOS E CONGRESOS

Seminario sobre recursos web para o ensino-aprendizaxe do galego

A Comisión de Normalización Lingüística da Facultade de Filoloxía da Universidade da Coruña organiza o seminario “Recursos web para o ensino-aprendizaxe do galego”, que será impartido por Luz Castro e terá lugar na Facultade de Filoloxía (Campus da Zapateira) o 23 de marzo, ás 12.30 h.

No mes de abril, esta mesma comisión ten previsto organizar outros dous seminarios didácticos, un sobre técnicas de expresión oral para a docencia (13 de abril) e outro sobre a elaboración de material didáctico para as aulas de lingua e literatura (27 de abril).

Pode obter máis información sobre o programa de actividades da comisión no seu perfil de Facebook.
11/03/2011. CURSOS E CONGRESOS

I Xornadas de Normalización Lingüística Xoán Manuel Pintos

A Concellaría de Normalización Lingüística do Concello de Pontevedra, en colaboración cos equipos de dinamización lingüística dos centros de ensino do concello, presentan as
I Xornadas de Normalización Lingüística Xoán Manuel Pintos, que terán lugar entre os días 14 e 18 de marzo de 2011.

A iniciativa, que se enmarca no programa Ano Xoán Manuel Pintos 2011, ten como principais obxectivos promover a reflexión sobre a normalización do galego e difundir entre a sociedade o labor que están a desenvolver os EDL no ámbito educativo.


11/03/2011. AXUDAS E PREMIOS

VIII Certame Literario Concello de Ames

O Servizo de Normalización Lingüística do Concello de Ames convoca a oitava edición deste certame literario que ten como principal obxectivo promover os novos valores da literatura en lingua galega.

O certame conta con dúas modalidades (narrativa e poesía) e en cada unha delas estableceranse tres categorías, segundo a idade dos participantes. Os textos, de tema libre, deben ser inéditos e estar escritos en galego.

O prazo de presentación de orixinais remata o 14 de abril de 2011.

Se desexa consultar o texto completo da convocatoria, prema aquí.
09/03/2010. CURSOS E CONGRESOS

XIII Encontros para a Normalización Lingüística

Xa pode consultar en liña o programa dos
XIII Encontros para a Normalización Lingüística, que terán lugar os vindeiros días 28 e 29 de abril de 2011 na Facultade de Ciencias da Comunicación (USC).

Nesta edición os Encontros van prestar unha especial atención ao tema da lingua como elemento de cohesión social e á análise da acción política no ámbito municipal, sen esquecer a liña habitual de seguimento de iniciativas e de revisión de accións xa realizadas.

A inscrición realizarase exclusivamente a través dun formulario habilitado no web do CCG. O prazo de preinscrición remata o 28 de marzo.
07/03/2011. CURSOS E CONGRESOS

Cursos de verán de lingua e cultura galegas para estranxeiros

A Secretaría Xeral de Política Lingüística da Xunta de Galicia, a Real Academia Galega e o Instituto da Lingua Galega da Universidade de Santiago organizan unha nova edición destes cursos estivais que terán lugar entre os días 4 e 29 de xullo de 2011.

Os cursos, que se organizan en diferentes niveis (elemental, medio e curso superior de Filoloxía Galega) teñen como principal finalidade ofrecerlle ao alumnado de fóra de Galicia a posibilidade de se familiarizar coa lingua e a realidade sociocultural galegas.

Todas as persoas interesadas teñen de prazo para formalizar a súa inscrición ata o vindeiro 1 de maio. Se desexa máis información, prema aquí.
07/03/2011. OUTRAS

Caderno de orientación sobre linguaxe administrativa neutra

Co ánimo de sensibilizar ao persoal da Administración pública sobre o uso dunha linguaxe non sexista, a Deputación da Coruña elaborou o Caderno de orientación sobre linguaxe administrativa neutra, dirixido ao persoal desta deputación e mais dos concellos da provincia.

No documento achéganse diferentes recomendacións para mellorar as comunicacións orais e escritas que se xeran na Administración pública, eliminando expresións sexistas e contribuíndo deste xeito a acadar a igualdade de xénero en todos os ámbitos da sociedade.

07/03/2011. AXUDAS E PREMIOS

Axudas para a edición en lingua galega de materiais didácticos

A Consellería de Educación e Ordenación Universitaria publica a convocatoria de subvencións para a edición en lingua galega de recursos didácticos curriculares para niveis non universitarios.

O prazo para a presentación de solicitudes é dun mes, contado a partir do día seguinte ao da publicación da convocatoria.
04/03/2011. AXUDAS E PREMIOS

II Premio “Rosalía de Castro” de lingua

A Unidade Técnica de Normalización Lingüística da Deputación Provincial da Coruña convoca o II Premio “Rosalía de Castro” de lingua, que ten como principais obxectivos manter viva a figura de Rosalía de Castro e recoñecer a aquelas persoas ou entidades que traballan a prol da promoción social e dignificación do idioma galego.

O premio entregarase o vindeiro 7 de maio de 2011, no transcurso da IV Festa da Lingua, que organiza a Deputación da Coruña.

O prazo para a presentación de propostas remata o 31 de marzo.

04/03/2011. DINAMIZACIóN

Novas iniciativas para promover o galego no deporte

O pasado mércores, 2 de marzo de 2011, presentouse en Lugo a tradución ao galego
das regras oficiais FIFA de fútbol sala vixentes para a tempada 2010/2011, unha iniciativa do club Azkar Lugo FS e da Fundación Azkar que contou coa colaboración da Xunta de Galicia e mais da Real Academia Galega.

Na propio acto de presentación deste documento anunciouse tamén a futura creación dun observatorio da lingua galega no ámbito do deporte, entidade que, baixo a coordinación do Goberno galego, se encargará de difundir a situación da lingua e de promover o seu uso no ámbito deportivo.

Máis información no web da SXPL.
04/03/2011. DINAMIZACIóN

Atopando Compostela

O Departamento de Lingua Galega do Concello de Santiago presenta o proxecto de toponimia lúcida “Atopando Compostela”, xogo educativo sobre toponimia municipal dirixido ao alumnado de secundaria.

O xogo foi creado pola empresa Etnoga Patrimonio Cultural, coa colaboración da Asociación Galega de Onomástica.

En datas vindeiras, o Concello de Santiago organizará diferentes coloquios para presentarlles a iniciativa aos principais colectivos destinatarios (profesorado e membros de EDL de secundaria, animadores socioculturais, técnicos de normalización lingüística, etc.).

Se desexa máis información, prema aquí.
03/03/2011. CURSOS E CONGRESOS

VI Seminario de Dinamización Lingüística no Ensino

A Secretaría Xeral de Política Lingüística da Xunta de Galicia organiza este seminario de formación dirixido aos membros e coordinadores/as dos equipos de dinamización lingüística, que se celebrará entre o 28 de marzo e o 8 de abril nas sete cidades galegas.

O prazo de inscrición remata o 14 de marzo de 2011.

Para obter máis información, prema aquí.
03/03/2011. DINAMIZACIóN

En liña un novo número do Cartafol Dixital

Xa pode consultar o novo número do Cartafol Dixital, boletín mensual editado polo Servizo de Normalización Lingüística da Universidade de Santiago de Compostela.

Entre os contidos deste número salientamos a entrevista a Anik Nandi, estudante de doutoramento procedente da India; a presentación dos Premios á calidade e á excelencia lingüística 2010-2011 ou a información sobre a terceira edición do Fiadeiro de localización de software libre.
03/03/2011. CURSOS E CONGRESOS

Curso de Celga 1 en liña

A Secretaría Xeral de Política Lingüística convoca un curso en liña destinado a preparar a proba de Celga 1. O curso está dirixido a persoas maiores de 16 anos con coñecementos informáticos a nivel usuario.

As sesións desenvolveranse entre o 4 de abril e o 15 de xuño e o prazo de matrícula remata o 20 de marzo.

Se desexa máis información, prema aquí.
01/03/2011. AXUDAS E PREMIOS

VII Premio a artigos xornalísticos normalizadores

O Servizo de Normalización Lingüística do Concello de Carballo convoca a sétima edición deste premio que ten como obxectivo principal promover a reflexión sobre a situación social da lingua galega e crear espazos nos xornais para analizar este tema.

Outorgarase un único premio de 1000 euros, ademais da publicación do artigo gañador en todos os medios de comunicación que colaboran coa iniciativa.

O prazo de presentación dos artigos remata o 8 de abril de 2011.

Se desexa consultar as bases, prema aquí.
01/03/2011. EMPREGO

Oferta de traballo para docentes de galego

O Grupo Clave Consultores, con sede na cidade da Coruña, fai pública unha oferta laboral dirixida a docentes de galego para impartir cursos de consolidación e perfeccionamento de galego.

Os/as solicitantes deberán ser licenciados/as e ter unha experiencia mínima de 3 anos como docentes en cursos similares.

Se desexa máis información, prema aquí.

22/02/2011. AXUDAS E PREMIOS

Ames desata a lingua

Os departamentos de Normalización Lingüística, Mocidade e Comunicación do Concello de Ames, en colaboración co Equipo de Dinamización Lingüística do IES de Ames, organizan o concurso de teatro radiofónico lido Desata a lingua!!.

O certame, dirixido ao alumnado do IES de Ames que estea a cursar o 2º ciclo da ESO ou Bacharelato, ten como obxectivo fomentar o gusto polo teatro e promover o uso do galego entre a mocidade.

Os textos presentados, que deben estar escritos en galego e tratar sobre a situación social do idioma, serán gravados e emitidos na Radio Municipal de Ames.

Establécense dous premios (un outorgado polo público e outro por un xurado) de 300 euros cada un.

O prazo de inscrición dos grupos remata o 4 de marzo de 2011.
22/02/2011. DINAMIZACIóN

Vive en galego a tecnoloxía

A Secretaría Xeral de Política Lingüística e a empresa Microsoft presentarán o vindeiro xoves, 24 de febreiro, a campaña Vive en galego, a través da cal a cidadanía poderá acceder de balde ás versións en galego das últimas aplicacións de Microsoft (Windows7, Office 2010, Dynamics CRM e Sharepoint).

O acto de presentación terá lugar ás 19:00 horas no auditorio
do Centro Galego de Arte Contemporánea (CGAC) e nel intervirán o actor Rubén Riós e a gaiteira Susana Seivane.
22/02/2011. DINAMIZACIóN

Recursos para traballar o Entroido nas aulas

A Coordinadora Galega de ENDL pon á disposición de toda a comunidade educativa unha compilación de recursos didácticos deseñados para traballar o Entroido nas aulas.

Neste monográfico poderá atopar, entre outros recursos, unidades didácticas, xogos, manualidades, información bibliográfica ou literatura relacionada con esta celebración tradicional.
21/02/2011. CURSOS E CONGRESOS

A dinamización lingüística no ámbito da sanidade

O Servizo de Normalización Lingüística da UDC organiza a xornada “A dinamización lingüística no ámbito da sanidade”, onde se presentarán diferentes proxectos que se están a desenvolver no ámbito da sanidade para promover a presenza do idioma galego.

O acto terá lugar o 22 de febreiro, ás 16:30 horas, no Salón de Actos do Edificio Universitario do Campus de Oza (UDC).

Para obter máis información, prema aquí.

21/02/2011. OUTRAS

21 de febreiro: Día Internacional da Lingua Materna

En novembro de 1999 a UNESCO declarou o 21 de febreiro
Día Internacional da Lingua Materna. Dende entón, cada ano conmemórase neste día a riqueza que supón a diversidade lingüística do planeta, con programas e actividades destinados a preservar esta diversidade e a promover o plurilingüismo.

Co gallo desta celebración, a Secretaría Xeral de Política Lingüística difunde a presentación “Convida o galego”, autoría de Manuel Bermúdez Blanco, accesible en liña en diferentes formatos.
18/02/2011. CURSOS E CONGRESOS

Encontro de equipos e de docentes pola normalización

A Coordinadora Galega de ENDL convoca aos coordinadores/as e membros de equipos de dinamización da lingua galega, e demais docentes interesados/as na normalización lingüística, a participar no Encontro de equipos e de docentes pola normalización.

As sesións terán lugar o vindeiro 12 de marzo de 2011 no
IES As Fontiñas (Santiago de Compostela).

As persoas interesadas en asistir deben remitir a súa solicitude a correo@coordinadoraendl.org.
18/02/2011. DINAMIZACIóN

II Club de Debate do Concello de Pontevedra

A Concellaría de Normalización Lingüística do Concello de Pontevedra organiza, en colaboración cos EDL dos centros de ensino secundario do concello, o II Club de Debate, actividade dirixida ao alumnado de 4º da ESO e 1º de Bacharelato que ten como obxectivo promover o uso oral do galego entre a mocidade.

O debate constará de dúas fases (unha fase preliminar o sábado 19 de febreiro e unha final o sábado 26 de febreiro).

Os premios son unha viaxe dunha fin de semana e un vale de 300 € para o equipo gañador e un vale de 300 € para o equipo finalista.

A entrada aos debates está aberta ao público.

18/02/2010. DINAMIZACIóN

Cartafol, o semanario do ensino galego

Neste mes de febreiro botou a andar Cartafol, un semanario do ensino galego que reflexionará sobre os principais temas educativos de actualidade, prestándolle especial atención aos relacionados coa normalización lingüística.

Neste primeiro número trátanse, entre outros temas, a Lei de convivencia, o funcionamento do espazo Abalar ou o novo plan de I+D+i.

Aínda que este número promocional se está a difundir de balde, no futuro a revista distribuirase só previa subscrición.
15/02/2011. AXUDAS E PREMIOS

Axudas para a edición de publicacións periódicas en galego

A Secretaría Xeral de Medios da Xunta de Galicia anuncia, no DOG do 15 de febreiro de 2011, a convocatoria de subvencións para empresas que editen publicacións periódicas escritas integramente en galego.

O prazo de presentación de solicitudes é dun mes, contado a partir do día seguinte ao da publicación da convocatoria.
15/02/2011. DINAMIZACIóN

O Concello de Narón difunde as palabras do galego

O Servizo de Normalización Lingüística do Concello de Narón presenta a iniciativa “As palabras do galego”, coa que convida a todas as persoas que o desexen a enviar ao correo electrónico a.pita@naron.es a palabra da lingua galega (dialectal ou normativa) que máis lles guste.

As palabras máis recorrentes difundiranse no web do concello e os usuarios/as poderán comentalas.

11/02/2011. CURSOS E CONGRESOS

Cursos de linguaxe administrativa galega

A Escola Galega de Administración Pública, en colaboración coa Secretaría Xeral de Política Lingüística, convoca cursos de linguaxe administrativa galega, de nivel medio e superior, para o persoal da Administración pública de Galicia.

A matrícula deberá tramitarse a través do web da EGAP.

O prazo de presentación de solicitudes remata o 22 de febreiro de 2011.

Para consultar o texto completo da convocatoria, prema aquí.
10/02/2011. OUTRAS

Probas para obtención dos certificados de lingua galega

A Secretaría Xeral de Política Lingüística convoca as probas para a obtención dos Celga 1, 2, 3 e 4 que se desenvolverán neste ano 2011. Realizaranse dúas convocatorias, unha para Galicia, resto do Estado español e Europa (xuño de 2011) e outra para América (outubro de 2011).

Os prazos para a presentación de solicitudes rematan o 29 de abril (convocatoria de xuño) e o 30 de xuño (convocatoria de outubro).

Se desexa máis información, prema aquí.