Novas da lingua

Rexistros4591 a 4620 de 5280
  1. Inicio
  2. CDSG-CCG
  3. Novas da lingua
07/02/2008. CURSOS E CONGRESOS

Curso de planificación lingüística e novas ferramentas de formación

A Escola Galega de Administración Pública (EGAP) organiza un curso de planificación lingüística e novas ferramentas de formación destinado ao persoal da Administración autonómica (persoal da Secretaría Xeral de Política Lingüística e resto de persoal das administracións públicas). O curso, de 30 horas de duración, desenvolverase en Santiago de Compostela ao longo do mes de xuño, en horario de tarde (de 16:30 h a 19:00 h).

O prazo de presentación de solicitudes remata o 15 de febreiro e todas as persoas interesadas deben tramitar a súa matrícula a través do seguinte formulario en liña.
04/02/2008. CURSOS E CONGRESOS

Curso de formación de profesorado de galego

A Secretaría Xeral de Política Lingüística e Cursos Internacionais da USC organizan un curso de formación de profesorado de galego que se desenvolverá entre os días 18 e 27 de febreiro de 2008 no Campus Sur da Universidade de Santiago.

O custo do curso é de 50 euros e o prazo de matrícula remata o vindeiro 14 de febreiro.
01/02/2008. EMPREGO

O Concello de Carral precisa técnico/a de normalización lingüística

O Concello de Carral está a tramitar a través do Servizo Galego de Colocación a cobertura dun posto de tradutor/a con amplos coñecementos de galego para desenvolver labores de normalización lingüística neste concello.

Se desexa adscribirse a esta oferta de emprego, prema aquí.

01/02/2008. CURSOS E CONGRESOS

Curso de iniciación á lingua vasca na Universidade de Vigo

A Área de Normalización Lingüística e o Departamento de Filoloxía Galega e Latina da Universidade de Vigo organizan un curso de iniciación á lingua vasca, que se desenvolverá na Facultade de Filoloxía e Tradución entre os días 3 de marzo e 14 de maio (luns e mércores, de 15:00 h a 17:00 h).

A matrícula é gratuita e o prazo de presentación de solicitudes remata o vindeiro 25 de febreiro de 2008.

01/02/2008. DINAMIZACIóN

En liña un novo número do Cartafol Dixital

Xa pode consultar en liña o número 39 do Cartafol Dixital, voceiro da Universidade de Santiago de Compostela en materia de normalización lingüística.

Entre os contidos deste número salientamos os datos sobre a docencia en galego na USC no curso 2007-2008, o artigo sobre a proclamación por parte da Asemblea Xeral da ONU do ano 2008 como Ano Internacional das Linguas ou a información sobre novos cursos de formación lingüística para a comunidade universitaria.
01/02/2008. DINAMIZACIóN

A Universidade da Coruña anima a traspasar fronteiras

O Servizo de Normalización Lingüística da Universidade da Coruña presenta unha nova campaña de dinamización lingüística que, baixo o lema Este tamén é territorio galego: nas aulas fala o teu idioma, ten como principal obxectivo fomentar o uso do galego nas aulas.

A iniciativa, que se desenvolverá nos campus da Coruña e de Ferrol, conta na parte gráfica con adhesivos e carteis nos que se representa un aramado de espiñas acompañado do lema Traspasa esta fronteira. Nas aulas tamén en galego.

29/01/2008. DINAMIZACIóN

Constitúese o Consello das Linguas Oficiais da Administración Xeral do Estado

Onte, luns 28 de xaneiro de 2008, constituíuse na sede do Ministerio de Administracións Públicas o Consello das Linguas Oficiais da Administración Xeral do Estado, que estará presidido polo secretario de Estado de Cooperación Territorial, Fernando Puig de la Bellacasa. Esta entidade constitúese como un órgano colexiado de análise, impulso e coordinación técnica entre os diferentes ministerios en relación co uso das linguas oficiais.

Así mesmo, nesta liña de potenciación dos dereitos lingüísticos dos cidadáns, crearase tamén a Oficina das Linguas, que apoiará administrativamente ao Consello.
Se desexa consultar o Real decreto de creación destes dous organismos, prema aquí.
28/01/2008. DINAMIZACIóN

Sabor a galego na cidade da Coruña

A Concellaría de Mocidade, Solidariedade e Normalización Lingüística do Concello da Coruña e mais a Asociación de Hostaleiros presentan a campaña Sabor a galego!, destinada a fomentar e prestixiar o uso da lingua galega no ámbito hostaleiro da cidade.

A campaña xirará arredor de dúas liñas básicas de actuación, crear unha imaxe que identifique a cidade co idioma, a identidade e os produtos galegos e mais ofrecer un servizo de tradución para as cartas e os menús dos establecementos.
24/01/2008. EMPREGO

Praza de técnico/a de normalización lingüística do Concello de Oroso

O Concello de Oroso anuncia a contratación temporal dun técnico/a de normalización lingüística.

O proceso selectivo consistirá nun concurso de méritos e o prazo para presentar solicitudes é de 10 días hábiles, contados a partir do seguinte ao da publicación da convocatoria.

24/01/2008. DINAMIZACIóN

Novos Encontros dos Axóuxeres

A Secretaría Xeral de Política Lingüística organiza cinco novos Encontros dos axóuxeres destinados a fomentar a transmisión familiar do idioma galego. Estas novas citas musicais terán lugar en Ribeira, Monforte, Ponte Caldelas, Betanzos e Ribadavia.

Se desexa descargar algunha das propostas musicais que pais e nenos/as poderán cantar nestes encontros, prema aquí.
24/01/2008. AXUDAS E PREMIOS

Axudas aos equipos de normalización e dinamización lingüística dos centros privados

A Secretaría Xeral de Política Lingüística publica, no DOG do 23 de xaneiro de 2008, a convocatoria de axudas para financiar proxectos de fomento do uso do galego desenvolvidos polos equipos de normalización e dinamización lingüística dos centros de ensino privados.

O prazo de presentación de solicitudes é de un mes, que se contará a partir do día seguinte ao da publicación desta convocatoria.
22/01/2008. DINAMIZACIóN

Conversas arredor do voluntariado lingüístico

A Dirección Xeral de Xuventude e Solidariedade da Xunta de Galicia organiza, dentro do ciclo de conferencias Conversas con, unha mesa redonda dedicada á lingua onde se tratará o tema do voluntariado lingüístico e se analizará a súa aplicación no eido da normalización da lingua e a cultura galegas.
O debate terá lugar o día 30 de xaneiro, ás 12:00 h, na Universidade de Santiago de Compostela e o 31 de xaneiro, ás 12:30 h, na Universidade da Coruña e nel participarán os coordinadores/as das diferentes iniciativas de voluntariado lingüístico existentes no Estado español. Se desexa máis información, prema aquí.

22/01/2007. AXUDAS E PREMIOS

Concurso Letras Galegas 2008

A Secretaría Xeral de Política Lingüística convoca un concurso destinado aos centros de ensino non universitario para a elaboración dunha exposición relacionada coa obra e época do autor homenaxeado no Día das Letras Galegas 2008, Xosé María Álvarez Blázquez.

O concurso contempla dúas categorías, unha para os centros de educación infantil e primaria e outra para os restantes. As exposicións gañadoras en cada unha destas categorías serán distribuídas entre os centros de ensino de toda Galicia, ademais de recibir un premio en metálico de 3 000 euros.

O prazo de presentación dos traballos remata o vindeiro 22 de febreiro. Se desexa máis información, prema aquí.
21/01/2008. EMPREGO

Contratación temporal dun técnico/a de normalización lingüística no Concello de Aranga

O Concello de Aranga anuncia a contratación temporal dun técnico/a de normalización lingüística.

O proceso selectivo consistirá nun concurso de méritos e o prazo para presentar solicitudes é de 7 días naturais, contados a partir do seguinte ao da publicación da convocatoria.

16/01/2008. EMPREGO

Praza de técnico/a de normalización lingüística no Concello de Mazaricos

O Concello de Mazaricos anuncia a convocatoria para a contratación temporal dun técnico/a de normalización lingüística que terá como principal obxectivo planificar, xestionar e executar accións destinadas a fomentar o uso e o prestixio da lingua galega en todos os sectores do ámbito municipal.

O sistema de selección será o de concurso-oposición e o prazo de presentación de solicitudes é de 20 días naturais, contados a partir do seguinte ao da publicación desta convocatoria.[corrección de erros]

11/01/2007. EMPREGO

Contratación temporal dun técnico/a de normalización lingüística no Concello de Irixoa

O Concello de Irixoa anuncia a contratación temporal, a media xornada, dun técnico/a de normalización lingüística.

O proceso selectivo consistirá na valoración de méritos e nunha proba escrita que terá lugar o 23 de xaneiro. O prazo para presentar solicitudes remata o luns 21 de xaneiro de 2008.

Se desexa consultar o texto completo da convocatoria, prema aquí.
10/01/2008. CURSOS E CONGRESOS

Normalizando a fe

A Comisión de Normalización Lingüística de Escolas Católicas organiza a terceira edición das súas Xornadas de Normalización e Dinamización Lingüística, que terán lugar o vindeiro venres 11 de xaneiro no Hotel Os Abetos (Santiago de Compostela). O obxectivo principal desta iniciativa é promover foros de debate e intercambio de experiencias que contribúan a fomentar o uso do galego nos centros de ensino de titularidade católica.
04/01/2008. AXUDAS E PREMIOS

Subvencións a entidades privadas sen fin de lucro

A Secretaría Xeral de Política Lingüística da Xunta de Galicia publica, no DOG do 4 de xaneiro de 2008, a convocatoria pública de axudas a entidades privadas sen fin de lucro para incrementar os usos da lingua galega nos ámbitos da familia, da infancia, da mocidade e do tempo de lecer.

O prazo de presentación de solicitudes é de un mes, contado desde o día seguinte ao da publicación da convocatoria.

03/01/2008. AXUDAS E PREMIOS

Resólvense as axudas aos centros privados concertados

A Consellería de Educación e Ordenación Universitaria publica, no DOG do 3 de xaneiro de 2008, a resolución da convocatoria de axudas para implantar accións que potencien o ensino en lingua galega no segundo ciclo de educación infantil en centros privados concertados de Galicia.

Para consultar o texto completo da resolución, prema aquí.
02/01/2008. AXUDAS E PREMIOS

Subvencións para a edición de publicacións periódicas en lingua galega

A Secretaría Xeral de Comunicación da Xunta de Galicia anuncia, no DOG do 27 de decembro de 2007, a convocatoria de subvencións para empresas que editen publicacións periódicas escritas integramente en galego.

O prazo de presentación de solicitudes é de un mes, contado a partir do día seguinte ao da publicación da resolución.
02/01/2008. EMPREGO

Listaxe de candidatos para postos de técnico/a de normalización lingüística na Deputación da Coruña

A Deputación da Coruña publica a convocatoria pública para a elaboración dunha listaxe de aspirantes para o posible nomeamento de técnicos/as de normalización lingüística como funcionarios/as interinos/as e/ou laborais temporais.

As probas selectivas consistirán na elaboración de dous exercicios eliminatorios, un primeiro que consistirá na contestación por escrito de 6 preguntas sobre o temario e un segundo no que deberá desenvolverse un suposto práctico relacionado coas funcións do posto e cos temas do programa.

O prazo de presentación de solicitudes é de 20 días naturais, contados a partir do seguinte ao da publicación desta convocatoria.
21/12/2007. DINAMIZACIóN

Os Reis Magos animan aos/ás nenos/as de Ames a escribirlles en galego

O Servizo de Normalización Lingüística do Concello de Ames organiza o I Concurso de Cartas aos Reis Magos. Todos os/as nenos/as de Ames que queiran participar neste concurso deben depositar as súas cartas entre o 20 de decembro de 2007 e o 2 de xaneiro de 2008 nas caixas de correo distribuídas por diferentes lugares do concello.

Os Reis Magos contestarán as cartas de todos os participantes e o 5 de xaneiro, durante a cabalgata real, eles mesmos farán a entrega dos premios.

21/12/2007. EMPREGO

Praza de técnico/a de normalización lingüística no Concello de Oleiros

O Concello de Oleiros anuncia a convocatoria para a contratación temporal dun técnico/a de normalización lingüística que terá como principal obxectivo planificar, xestionar e executar accións destinadas a fomentar o uso e o prestixio da lingua galega en todos os sectores do ámbito municipal.

O sistema de selección será o de concurso-oposición e o prazo de presentación de solicitudes é de 10 días naturais, contados a partir do seguinte ao da publicación desta convocatoria.
21/12/2007. AXUDAS E PREMIOS

Resólvese o Premio Manuel Beiras 2007

A Cámara de Comercio, Industria e Navegación e o Concello de Santiago fixeron entrega, o pasado 19 de decembro, dos seus respectivos premios aos galardoados da oitava edición do Premio Manuel Beiras.

Os premiados deste ano foron a empresa Cenlitrosmetrocadrado, na categoría de nova incorporación ao uso do galego, e o Dado Dadá, na categoría de empresas que veñen realizando un uso continuado do idioma galego.

A Federación de Libreiros de Galicia recibiu tamén unha distinción especial polo seu compromiso co idioma.
20/12/2007. EMPREGO

Bolsas do Consello da Cultura Galega

O Consello da Cultura Galega publica, no DOG do 20 de decembro de 2007, a convocatoria de 16 bolsas de colaboración en proxectos de investigación que se están a desenvolver nesta institución.

Trátase en concreto dos seguintes proxectos: Centro de Documentación Sociolingüística de Galicia (2 bolsas), Arquivo da Emigración Galega (2 bolsas), Arquivo de Comunicación (2 bolsas), Arquivo Sonoro de Galicia (2 bolsas), Área de Documentación (1 bolsa), Área de Publicacións (1 bolsa), Área de Xestión Cultural (2 bolsas), web corporativo do CCG (2 bolsas), Área de Informes (1 bolsa), Proxecto Sarmiento (1 bolsa).

A concesión das bolsas será ata o 31 de decembro de 2008. O prazo de presentación de solicitudes é de un mes, contado a partir do día seguinte ao da publicación desta convocatoria (ver corrección de erros).
20/12/2007. AXUDAS E PREMIOS

Premios da Edición 2007

A Asociación Galega de Editores deu a coñecer os galardoados da terceira edición destes premios que teñen como obxectivo recoñecer o traballo editorial en lingua galega realizado polos seus membros ao longo do ano.

Made in Galicia, de Sechu Sende, editado pola Editorial Galaxia; O único que queda é o amor, de Agustín Fernández Paz, editado por Edicións Xerais de Galicia; A Odisea, traducido Xavier Senín e editado pola Editorial Rodeira; Guía de mamíferos de Galicia, ilustrado por Carlos Silvar e editado por Baía Edicións; o Salón do Libro Infantil e Xuvenil de Pontevedra; Anxos Sumai; A Nosa Terra, La Voz de Galicia e Alvarellos Editora foron as obras, autores e editores galardoados nas diferentes categorías.

Se desexa máis información, prema aquí.
20/12/2007. DINAMIZACIóN

Promoción do galego no ámbito xurídico e asociativo no Concello de Ribadeo

O IES Porta da Auga de Ribadeo desenvolverá un proxecto de normalización lingüística que ten como principal obxectivo a elaboración en galego de modelos documentais de uso frecuente no ámbito xurídico e asociativo. O proxecto, coordinador polo profesor Anxo Martínez, inclúe a distribución dixital destes documentos entre os colectivos xurídicos e asociativos de Ribadeo e a súa comarca, así como calquera outro apoio lingüístico que estes demanden.

O IES Porta da Auga xa desenvolveu con éxito o pasado curso 2006-2007 o proxecto de innovación lingüística “Normalización do galego na hostalaría ribadense”.
20/12/2007. CURSOS E CONGRESOS

Curso de Dereito para as probas de habilitación para a tradución e interpretación xurada

A Asociación Galega de Profesionais da Tradución e da Interpretación (AGPTI) organiza un curso de Dereito destinado especialmente a todas as persoas interesadas en presentarse ás probas de habilitación profesional para tradutores e intérpretes xurados.

O curso, de 20 h de duración, terá lugar os venres 11, 18 e 25 de xaneiro e 1 e 8 de febreiro, en horario de 16:00 a 20:00 h, na Facultade de Filoloxía e Tradución da Universidade de Vigo. O prazo de preinscrición remata o vindeiro 22 de decembro de 2007.

As persoas interesadas en asistir ao curso deberán enviar un correo cos seus datos persoais a info@agpti.org, onde lle facilitarán máis información sobre esta actividade.

17/12/2007. AXUDAS E PREMIOS

Premios Xarmenta 2007

A Asociación Berciana da Lingua “Xarmenta” deu a coñecer os galardoados da terceira edición destes premios que teñen como finalidade recoñecer o labor daquelas institucións e personalidades que máis teñan contribuído á promoción do galego no Bierzo.

Os gañadores deste ano son a Xunta de Galicia, a Junta de Castilla y León e o escritor Manuel Rivas. O acto de entrega dos premios terá lugar o 16 de xaneiro de 2008, no Teatro Bérgidum de Ponferrada.

A Asociación Xarmenta aproveitou a ocasión para presentar o segundo número da revista que leva o seu mesmo nome e coa que queren seguir contribuíndo á difusión da lingua galega no Bierzo.
17/12/2007. EMPREGO

Bolsas de colaboración no Centro Ramón Piñeiro

A Secretaría Xeral de Política Lingüística publica, no DOG do 17 de decembro de 2007, a convocatoria de doce bolsas de colaboración en diferentes proxectos de investigación que se están a desenvolver no Centro Ramón Piñeiro para a Investigación en Humanidades.

Trátase en concreto dos seguintes proxectos: dicionarios de literatura (2 bolsas), cadernos de fraseoloxía galega (1 bolsa), corpus de referencia do galego actual (1 bolsa), catalogación dos fondos bibliográficos do Centro Ramón Piñeiro (1 bolsa), recuperación de textos poéticos e xornalísticos galegos (2 bolsas), avaliación e aprendizaxe do galego (1 bolsa), prosa literaria galega medieval (1 bolsa), lírica medieval (2 bolsas) e síntese de voz en galego (1 bolsa).

O prazo de presentación de solicitudes é de 31 días naturais, contados a partir do día seguinte ao da publicación da convocatoria.