Novas da lingua

Rexistros4771 a 4800 de 5153
  1. Inicio
  2. CDSG-CCG
  3. Novas da lingua
02/07/2007. DINAMIZACIóN

Xosé María Álvarez Blázquez, autor homenaxeado no Día das Letras Galegas 2008

O Plenario da Real Academia Galega (RAG) acordou, na sesión ordinaria do pasado día 30 de xuño, dedicar o Día das Letras Galegas 2008 a Xosé María Álvarez Blázquez, escritor tudense que destacou tamén polo seu importante labor como editor. No web culturagalega.org obterá máis información sobre a biografía deste autor.

Na mesma sesión plenaria nomeouse Académico de Honra da Real Academia Galega a John Rutherford, profesor titular da Facultade de Español do Queen's College e director do Centre for Galician Studies de Oxford.

29/06/2007. CURSOS E CONGRESOS

Curso de formación de profesorado de galego

A Secretaría Xeral de Política Lingüística organiza, en colaboración coa Universidade de Santiago de Compostela, un curso de formación de profesorado de galego, que se desenvolverá os días 16-24 de xullo de 2007 no Campus Sur da Universidade de Santiago.

O custo do curso é de 40 euros e o prazo de matrícula remata o vindeiro 6 de xullo.
29/06/2007. LEXISLACIóN

A Xunta de Galicia aproba o novo decreto para regular o uso do galego no ensino

A Consellería de Educación e Ordenación Universitaria publica no DOG do 29 de xuño de 2007 o Decreto 124/2007, do 28 de xuño, polo que se regula o uso e a promoción do galego no sistema educativo.

Un dos aspectos máis salientables desta nova normativa é que tanto no ensino primario como secundario deberá impartirse como mínimo o 50% da docencia en galego. No ensino infantil (0-6 anos) o profesorado usará na aula a lingua materna predominante entre o alumnado e no caso dos contextos castelán falantes o uso do galego deberá ser como mínimo igual ao do castelán. No ensino de adultos, nos niveis I e II impartirase en galego, como mínimo, o 50% das materias e a partir da ESO a docencia será integramente en galego, agás as materias doutras linguas.
28/06/2007. CURSOS E CONGRESOS

VII Escola de Verán “A Normalización Lingüística”

Nova Escola Galega organiza unha nova edición da súa Escola de Verán, que nesta ocasión terá como tema central a normalización lingüística.
As xornadas, destinadas ao profesorado de ensino non universitario, desenvolveranse entre os días 5 e 8 de setembro de 2007 na Casa da Cultura do Concello de Fene.

Se desexa máis información sobre o programa ou os trámites de inscrición, prema aquí.
18/06/2007. DINAMIZACIóN

A Universidade de Santiago adhírese ao Voluntariado de Activación Lingüística

A partir do vindeiro curso académico, os estudantes foráneos dos diferentes programas de intercambio nos que participa a USC (Erasmus, Séneca e intercambios bilaterais) poderán formar parte do Programa de Acompañamento de Estudantes (PAE). A través do PAE estes estudantes recibirán a axuda de estudantes voluntarios/as que lles facilitarán o seu achegamento á lingua e cultura galegas.

A iniciativa inscríbese no programa de Voluntariado de Activación Lingüística (VAL) que están a desenvolver a Mesa pola Normalización Lingüística e a Dirección Xeral de Xuventude e Solidariedade. Para obter máis información, prema aquí.
18/06/2007. AXUDAS E PREMIOS

Resólvense as axudas aos equipos de normalización lingüística dos centros públicos

A Secretaría Xeral de Política Lingüística publica, no DOG do 18 de xuño de 2007, a resolución das subvencións a proxectos de fomento do uso do galego desenvolvidos polos equipos de normalización lingüística dos centros de ensino públicos.

Para consultar o texto completo da resolución, prema aquí.
18/06/2007. DINAMIZACIóN

O SNL do Concello do Barco de Valdeorras xa está na rede

Xa está accesible na rede o sitio web oficial do Concello do Barco de Valdeorras, que inclúe unha páxina dedicada ao Servizo de Normalización Lingüística municipal. Nela ofrécese información sobre os servizos que oferta o SNL e en breve engadirase tamén o nomenclátor oficial do concello, así como datos de coñecemento e uso do galego neste municipio.
15/06/2007. AXUDAS E PREMIOS

Resólvense as subvencións a entidades privadas sen fin de lucro

A Secretaría Xeral de Política Lingüística da Xunta de Galicia publica, no DOG do 7 de xuño de 2007, a resolución das subvencións a entidades privadas sen fin de lucro para fomentar o uso social da lingua galega nos ámbitos da familia, da infancia e da mocidade.

Se desexa consultar o texto completo da resolución, prema aquí.
13/06/2007. DINAMIZACIóN

O idioma galego terá presenza por primeira vez no Eisteddfod

Este ano o Centro de Estudos Galegos en Gales participará no festival anual de cultura galesa Eisteddfod, que terá lugar en Mold (Flintshire) desde o 4 ao 11 de agosto.

No marco deste evento, o día 6 de agosto, ás 14:00 h, o escritor e tradutor Xurxo Borrazás participará cunha conferencia sobre lingua e literatura galegas. A intervención realizarase en galego, cun servizo de tradución simultánea ao galés.
13/06/2007. AXUDAS E PREMIOS

Axudas para a produción editorial galega

A Consellería de Cultura e Deporte publica, no DOG do 13 de xuño de 2007, a convocatoria de axudas á produción editorial para apoiar a tradución para outras linguas de obras publicadas orixinariamente en galego e a tradución para o galego de obras publicadas orixinariamente noutras linguas.

O prazo de presentación de solicitudes é de 40 días hábiles, contados a partir do seguinte ao da publicación desta convocatoria.
13/06/2007. CURSOS E CONGRESOS

Máster oficial en lingua e usos profesionais

A Universidade da Coruña organiza o Máster oficial en lingua e usos profesionais, con tres especialidades: galego, español e inglés. Trátase do primeiro mestrado destas características que se imparte no Sistema Universitario Galego e como título oficial ten validez en toda a Unión Europea.

A súa duración é de un ano académico e combina contidos lingüísticos, tecnolóxicos e das ciencias sociais, incluíndo tamén prácticas en empresas e institucións.

O prazo de preinscrición estará aberto de 20 de xuño a 20 de xullo de 2007. A matrícula formalizarase en setembro.
11/06/2007. CURSOS E CONGRESOS

III Curso de verán “Traballando en lingua”

O Servizo de Normalización Lingüística da Universidade da Coruña organiza a terceira edición do curso de verán Traballando en Lingua, que terá lugar na Facultade Ciencias da Educación desta universidade os días 17, 18 e 19 de xullo de 2007.

Os obxectivos do curso son, entre outros, reflexionar sobre os factores que interveñen na dinamización lingüística, así como analizar e avaliar experiencias e metodoloxías desenvolvidas neste ámbito.

O prazo para realizar a preinscrición remata o vindeiro 28 de xuño.

05/06/2007. AXUDAS E PREMIOS

Premios a proxectos de innovación lingüística no ámbito educativo

A Dirección Xeral de Ordenación e Innovación Educativa e a Secretaría Xeral de Política Lingüística convocan 10 premios a proxectos de innovación en normalización lingüística destinados aos centros de ensino públicos.

O prazo de presentación de solicitudes é de dous meses, contados a partir do día seguinte ao da publicación da convocatoria.


05/06/2007. AXUDAS E PREMIOS

IV Premio Luísa Villalta a iniciativas normalizadoras

Os servizos de normalización lingüística das tres universidades galegas, en colaboración coa Secretaría Xeral de Política Lingüística, organizan a cuarta edición do Premio Luísa Villalta a iniciativas normalizadoras, que ten como principal obxectivo promover a reflexión e dinamización lingüísticas entre a comunidade universitaria.

O premio está dirixido a todo o alumnado de 1º, 2º e 3º ciclo das facultades e escolas universitarias galegas e contará con dúas modalidades: “artigo xornalístico” e “deseño dunha campaña de promoción da lingua galega”.

O prazo de presentación de solicitudes remata o 15 de outubro de 2007.
05/06/2007. EMPREGO

Praza de tradutor/a en lingua galega

A Deputación Provincial de Ourense publica, no BOP de Ourense do 30 de maio de 2007, a convocatoria para cubrir, como persoal laboral temporal, unha praza de tradutor/a en lingua galega. O procedemento de selección será o de concurso cunha proba práctica e o prazo de presentación de solicitudes é de 7 días naturais, contados a partir do seguinte ao da publicación da convocatoria.
04/06/2007. CURSOS E CONGRESOS

Cursos de linguaxe administrativa galega

A Consellería de Presidencia, Administracións Públicas e Xustiza convoca cursos de linguaxe administrativa galega (nivel medio e superior) para o persoal da Administración local de Galicia.

O prazo de presentación de solicitudes é de un mes, contado a partir do día seguinte ao da publicación desta convocatoria.

30/05/2007. AXUDAS E PREMIOS

Normalizando a Xeración E Logo!

No marco da campaña xeral de promoción lingüística En galego tes todo por dicir. E Logo!, a Secretaría Xeral de Política Lingüística presenta a iniciativa Xeración E Logo!, destinada a fomentar a transmisión lingüística entre pais e fillos.

A través desta actuación, o Servizo Galego de Saúde entregaralles a todas as mulleres en estado de xestación en Galicia unha carpeta-maletín con información e consellos de puericultura, un caderno do embarazo, recitativos para o bebé e un disco con cantos de berce.

29/05/2007. OUTRAS

Xa está dispoñible o Mini MAGASI v2.0

Manuel González, docente do Ciclo Formativo de Grao Superior de Administración de Sistemas Informáticos no IES Xulián Magariños (Negreira), acaba de presentar a segunda versión do proxecto MAGASI, compilación de software educativo de libre distribución en lingua galega.

Esta segunda versión en formato CD leva por nome Mini MAGASI v2.0 e en breve contará cunha edición ampliada en formato DVD. Ademais de descargalo no seu PC, desde o pasado mes de outubro de 2006, o MAGASI tamén pode consultarse en liña.

28/05/2007. DINAMIZACIóN

Campaña de transmisión lingüística interxeracional no Concello de Santiago

A Concellaría de Política Lingüística do Concello de Santiago, en colaboración coa Deputación da Coruña, botou a andar unha nova campaña deseñada para sensibilizar as familias compostelás sobre a importancia de transmitirlles aos seus fillos de forma temperá a lingua galega.

A campaña organízase arredor de tres momentos: o embarazo, o parto e o rexistro, e para o seu desenvolvemento contouse coa colaboración das diferentes entidades que teñen relación co nacemento do neno/a, como son os centros de saúde, as tendas especializadas en puericultura ou o Rexistro Civil.
(Máis información)



25/05/2007. AXUDAS E PREMIOS

Axudas para a normalización da lingua galega na Administración local

A Consellería de Presidencia, Administracións Públicas e Xustiza publica, no DOG do 25 de maio de 2007, a convocatoria pública de subvencións destinadas ás entidades locais para desenvolver actividades de promoción e difusión do idioma galego neste ámbito.

O prazo de presentación de solicitudes é de un mes, contado a partir do día seguinte ao da publicación desta convocatoria.

24/05/2007. AXUDAS E PREMIOS

Búscase imaxe para o galego

O xornal electrónico Vieiros convoca a segunda edición do certame Unha imaxe para o galego, que nesta ocasión tamén inclúe a modalidade de vídeo. Trátase de elixir a imaxe ou vídeo que describa de xeito máis orixinal o que significa para os participantes o idioma galego.

O prazo para enviar as propostas remata o vindeiro 11 de xuño.
23/05/2007. AXUDAS E PREMIOS

I Premio de artigos xornalísticos normalizadores “Concello de Vilagarcía”

O Concello de Vilagarcía de Arousa convoca a primeira edición deste premio que ten como obxectivo principal fomentar espazos de reflexión sociolingüística nos medios de comunicación.

O certame conta cun primeiro premio de 600 euros e un segundo de 300, ademais da publicación dos artigos galardoados nos diferentes medios colaboradores. O prazo de presentación dos artigos remata o vindeiro 2 de xuño de 2007.

Se desexa consultar o texto completo da convocatoria, prema aquí.
23/05/2007. DINAMIZACIóN

A CIG anima a “revirarse” á mocidade traballadora

Baixo o lema “Revírate, en galego sempre”, a CIG presenta unha nova campaña de normalización lingüística dirixida á mocidade traballadora, co ánimo de que superen os prexuízos existentes e reclamen o seu dereito a empregar o galego en todos os ámbitos sociais, incluído o laboral.

A campaña, que botou a andar o día 1 de maio, Día do Internacionalismo Proletario, e terá continuidade ata o outono, conta con materiais publicitarios e formativos que se farán chegar aos delegados/as da CIG, así como a diferentes asociacións, bibliotecas e institucións públicas. Se desexa máis información, prema aquí.
23/05/2007. AXUDAS E PREMIOS

Máis axudas para o audiovisual en lingua galega

A Consellería de Cultura e Deporte da Xunta de Galicia fixo públicas as convocatorias de subvencións para o desenvolvemento de proxectos audiovisuais en lingua galega, así como para a produción ou coprodución destes proxectos.

O prazo de presentación de solicitudes remata o 15 de xuño, no caso das producións e coproducións, e o 16 de xuño se se trata de proxectos audiovisuais.
16/05/2007. OUTRAS

Acceso libre ao bUSCatermos

A Universidade de Santiago de Compostela decidiu conmemorar o Día das Letras Galegas e o Día de Internet liberando ata o 30 de maio o acceso á maior base de termos científicos que existe en lingua galega.
Actualmente, o bUSCatermos conta con 134 000 fichas de
200 000 termos de linguaxes de especialidade que están sendo traducidos ao portugués, castelán, inglés e catalán.

15/05/2007. LEXISLACIóN

O Parlamento de Galicia insta á normalización do galego na Administración local

O pasado 9 de maio aprobouse por unanimidade no Parlamento de Galicia unha proposición non de lei para a adopción de medidas que permitan cumprir cos obxectivos marcados polo Plan Xeral de Normalización da Lingua Galega na Administración local.

Esta iniciativa atende a aspectos como a toponimia; o uso oral e escrito nas relacións coa cidadanía; os actos e relacións xurídicas dos concellos e deputacións; o acceso á función pública ou a coordinación dos servizos lingüísticos.
Se desexa coñecer o texto completo, prema aquí.
14/05/2007. CURSOS E CONGRESOS

Curso de verán de Lingua e Cultura Galegas para estranxeiros

A Universidade da Coruña, en colaboración coa Secretaría Xeral de Política Lingüística da Xunta de Galicia, organiza este curso que terá lugar entre o 2 e o 27 de xullo, cunha duración de 80 horas lectivas, na Facultade de Filoloxía da Coruña.

Na súa primeira edición ofertará o nivel elemental de lingua galega e terá un custo de 200 euros, prezo en que están incluídos o material didáctico, os gastos das actividades complementarias de carácter cultural e mais o diploma. Ao mesmo tempo, a UDC ofertará varias bolsas de estadía, por un importe de 400 euros e exención de matrícula.

Se desexa obter máis información sobre os trámites da matrícula ou coñecer os contidos do curso, prema aquí.
14/05/2007. AXUDAS E PREMIOS

O III Premio a artigos xornalísticos normalizadores xa ten gañador

Trátase de Miguel Mosquera Fociños, autor de Obreiras, tolos, escolares, poetas. A Lingua galega nas cidades. Xunto con el foron galardonados Sechu Sende, que recibiu o 2º premio polo artigo Guía sexual da sociolingüística; e Xabier Cid, recoñecido cun accésit.

Ademais do correspondente premio en metálico, os artigos gañadores sairán publicados nos diferentes medios colaboradores os vindeiros días 19 de maio (2º premio) e 20 de maio (1º premio). No caso dos medios non diarios, publicaranse ambos artigos no número inmediatamente posterior a estas datas.

A entrega dos galardóns terá lugar o vindeiro 17 de maio, ás 19:00 h, na praza do Concello de Carballo, no transcurso dos actos de celebración do Día das Letras Galegas.
11/05/2007. DINAMIZACIóN

O Concello de Ames súmase ao Programa de Voluntariado de Activación Lingüística

O Voluntariado de Activación Lingüística é unha iniciativa coordinada pola Mesa pola Normalización Lingüística en colaboración coa Dirección Xeral de Xuventude e Solidariedade da Xunta de Galicia. O Concello de Ames é o segundo concello, despois do de Santiago de Compostela, que se une a este proxecto co ánimo de fomentar os lazos de contacto entre persoas falantes de galego e outras que desexan aprendelo ou perfeccionalo.

Os lugares de inscrición son a Casa da Cultura do Milladoiro, as bibliotecas municipais e o Servizo de Normalización Lingüística.

Para obter máis información, prema aquí.
11/05/2007. AXUDAS E PREMIOS

Axudas para o audiovisual en lingua galega

A Consellería de Cultura e Deporte publica, no DOG do 10 de maio de 2007, a convocatoria pública de subvencións para a produción de curtametraxes en versión orixinal en lingua galega, así como de contidos interactivos e proxectos de creación net-art.

O prazo de presentación de solicitudes é de un mes, contado a partir do día seguinte ao da publicación desta convocatoria.