Novas da lingua

Rexistros5101 a 5130 de 5273
  1. Inicio
  2. CDSG-CCG
  3. Novas da lingua
22/12/2004. EMPREGO

Bolsas de linguaxe administrativa galega

A Escola Galega de Administración Pública convoca dúas bolsas de colaboración para a realización de estudos e prácticas sobre linguaxe administrativa galega.

A dotación económica de cada bolsa é de 864 euros mensuais e o prazo de presentación de solicitudes é de 20 días naturais, contados a partir do seguinte ao da publicación desta convocatoria.
21/12/2004. INVESTIGACIóN

Dicionario Visual da Construción

O Colexio Oficial de Arquitectos de Galicia edita un dicionario terminolóxico galego-castelán de termos da construción. A obra contén 6 661 termos en galego e 6 886 en castelán e estrutúrase en 6 capítulos que conteñen diferentes ilustracións temáticas, así como a terminoloxía relacionada cos diferentes temas.

Se desexa consultar a versión web deste dicionario, prema aquí.
16/12/2004. DINAMIZACIóN

Apróbase o Plan de Política Lingüística da Universidade de Vigo

A Universidade de Vigo aprobou o pasado 14 de decembro, en comisión de goberno, o seu Plan de Política Lingüística, documento marco que ten como obxectivo propiciar a planificación dos usos lingüísticos da comunidade universitaria. Ofrecémoslle a introdución e o texto íntegro do plan.

Se desexa máis información sobre o seu proceso de elaboración, pode consultar o web que a Universidade de Vigo puxo o pasado mes de xullo á disposición de toda a comunidade para que puidese participar de xeito activo na xestación e elaboración deste documento.
15/12/2004. CURSOS E CONGRESOS

Declaración pola autodeterminación lingüística

Coa intención de impulsar o multilingüismo e a diversidade cultural dos pobos celebrouse entre os pasados días 15 e 20 de novembro en Rosario (Arxentina) o I Congreso das Linguas. Pilar García Negro e Rafa Villar foron os encargados de presentar, desde unha perspectiva diacrónica, a situación da lingua galega.

Como documento final do congreso presentouse a Declaración pola Autodeterminación Lingüística, onde todos os participantes esixen aos seus respectivos estados que recoñezan o dereito que todo pobo ten de xestionar e promover o mantemento das súas linguas propias. A versión galega do documento foi cedida por Rafa Villar, responsable do Departamento de Normalización Lingüística da CIG.
03/12/2004. EMPREGO

Bolsas de colaboración no Centro Ramón Piñeiro

A Consellería de Educación e Ordenación Universitaria publica, no DOG do 3 de decembro de 2004, a convocatoria de bolsas de colaboración en diferentes proxectos de investigación que neste momento se están a desenvolver no Centro Ramón Piñeiro para a Investigación en Humanidades.
(Máis información)
03/12/2004. AXUDAS E PREMIOS

Axudas ás empresas privadas para fomentar o uso do galego

A Consellería de Educación e Ordenación Universitaria publica, no DOG do 3 de decembro de 2004, a convocatoria de subvencións a empresas privadas para fomentar o uso social da lingua galega.

O prazo de presentación de solicitudes é de 40 días naturais contados a partir do seguinte ao da publicación desta convocatoria.
02/12/2004. DINAMIZACIóN

Impulso do uso do galego no Concello de Pontevedra

A Concellería de Normalización Lingüística do Concello de Pontevedra está a desenvolver, en colaboración con outras entidades do concello, unha campaña de promoción do uso do galego nos medios de comunicación. En relación con esta iniciativa, celebrarase hoxe, 2 de decembro, unha mesa redonda-coloquio onde se tratará este mesmo tema. O coloquio terá lugar na Sala Sargadelos de Pontevedra, ás 8:30 horas, e contará coa participación de Anxo Lorenzo Suárez, Xosé Manuel Vega Gómez e Luis Bará Torres.

Co mesmo obxectivo de normalizar os usos lingüísticos no concello, entrou onte en vigor a Ordenanza de impulso do uso do galego no Concello de Pontevedra.

02/12/2004. DINAMIZACIóN

O galego, sempre en conta

A Mesa pola Normalización Lingüística está a levar a cabo unha campaña destinada a fomentar o uso do galego por parte dos bancos e caixas de aforro. O seu proxecto consiste en reunir o maior número posible de persoas dispostas a mudar a súa nómina para aquela entidade que se comprometa a normalizar os seus usos lingüísticos.

A día de hoxe, esta asociación conta xa cunha carteira de clientes dispostos a dar este paso cuxas nóminas ascenden a uns 7 millóns de euros anuais. Se desexa obter máis información xeral ou acceder ao documento de adhesión á campaña, prema aquí.
30/11/2004. CURSOS E CONGRESOS

Xornadas de Expresión Oral Tíralle da Lingua

A Asociación Sócio-Pedagóxica Galega organiza a V edición destas xornadas que teñen como obxectivo principal incentivar os usos orais do galego no ámbito educativo. As sesións terán lugar o vindeiro día 11 de decembro, de 9:00 a 21:00 horas, no Museo do Pobo Galego (Santiago).

Se desexa consultar o programa ou acceder ao formulario de inscrición en liña, prema aquí.
30/11/2004. DINAMIZACIóN

Novas actividades de dinamización lingüística na Universidade de Vigo

A Área de Normalización Lingüística da Universidade de Vigo presenta os dous últimos froitos do seu labor de promoción do uso do galego no ámbito universitario.

Trátase nesta ocasión do programa Intergalcome, que ten como obxectivo facilitar a integración lingüística e cultural do alumnado foráneo, e a publicación da obra Lingua galega. Dúbidas lingüísticas, que quere contribuír á mellora da calidade lingüística dos textos producidos pola comunidade universitaria.
26/11/2004. AXUDAS E PREMIOS

Convócase a V edición do Premio Manuel Beiras

A Cámara de Comercio e o Concello de Santiago convocan unha nova edición deste premio que ten como fin outorgar un recoñecemento público ao esforzo de normalización do uso do galego no sector empresarial.

Para obter máis información, acceda ás bases do concurso e ao formulario de presentación de candidaturas.
26/11/2004. DINAMIZACIóN

Dez pasos para normalizar o galego no comercio compostelán

A Concellería de Política Lingüística e a Cámara de Comercio do Concello de Santiago presentan unha nova campaña de dinamización lingüística destinada a fomentar o uso do galego na comunicación comercial.

Todos os establecementos comerciais de Compostela e centros de información e recursos dirixidos a este sector recibirán un folleto informativo con argumentos e datos a favor do uso do galego, así como un decálogo con dez pasos a seguir para mellorar a comunicación lingüística no seu establecemento.
24/11/2004. CURSOS E CONGRESOS

V Simposio Internacional sobre Bilingüismo

A Universitat Autònoma de Barcelona organiza a quinta edición deste congreso internacional que quere constituírse nun foro estable para todos aqueles investigadores que traballan nos eidos da psicolingüística, a educación bilingüe, a adquisición da lingua ou a planificación e a política lingüística.

O simposio terá lugar os vindeiros días 20 – 23 de marzo en Barcelona. Se desexa obter máis información ou acceder ao formulario de inscrición en liña, prema aquí.
22/11/2004. DINAMIZACIóN

Nº 17 do Cartafol Dixital

Consulte en liña o novo número do Cartafol Dixital, boletín mensual da USC con novas sobre normalización lingüística.

Entre os contidos deste número salientamos os datos estatísticos sobre a elaboración de programas académicos en lingua galega, o artigo valorativo sobre os usos lingüísticos na Universidade da Coruña ou a información sobre o concurso de monólogos organizado pola Comisión de Normalización Lingüística de Económicas.
19/11/2004. CURSOS E CONGRESOS

II Encontro Galego-Brasileiro de Investigadores

A Universidade da Coruña celebrará os vindeiros días 24, 25 e 26 de novembro un encontro entre investigadores galegos e brasileiros para debater e poñer en común os traballos que se están a desenvolver en ámbitos análogos da investigación galega e brasileira.

Se desexa consultar o programa destes encontros, prema aquí. Para calquera outra información, pode poñerse en contacto co Departamento de Galego-Portugués, Francés e Lingüística da UDC.
19/11/2004. INVESTIGACIóN

Dicionario da vestimenta tradicional galega

Consulte en liña este novo dicionario realizado por Manuel Souto Pico como traballo de fin de carreira da licenciatura de Tradución e Interpretación da Universidade de Vigo.

A obra recolle os termos fundamentais da vestimenta e o traxe tradicional galegos e concíbese como un estudo aberto en constante ampliación, buscando a complicidade do usuario á hora de achegar novos termos ou completar os xa existentes.
16/11/2004. CURSOS E CONGRESOS

Debates abertos "Lingua e linguas"

A Fundación Carlos Casares inaugura hoxe en Vigo este ciclo de debates coa presentación da obra O proceso de normalización do idioma galego (1980-2000). Volume III. Elaboración e difusión da lingua. O ciclo terá continuidade con dúas novas sesións que xirarán arredor do futuro da lingua no sector da mocidade (24 de novembro) e da pluralidade lingüística de Europa (14 de decembro).

A sesión de hoxe terá lugar no Salón de Actos da Fundación Carlos Casares ás 19:30 horas.
11/11/2004. OUTRAS

A Universidade de Santiago de Compostela informa os seus estudades da realidade lingüística de Galicia

O Oficina de Relacións Exteriores da USC difunde entre os estudantes que chegan desde fóra de Galicia información sobre a situación sociolingüística do noso país. Así, estes estudantes recibiron, a través do folleto explicativo “Galicia e o galego”, ampla información sobre o status do galego como lingua propia de Galicia, sobre a situación do idioma na USC e sobre as vantaxes que lle pode aportar o seu contacto co noso idioma á hora de aprender outras linguas románicas.

Toda esta información está tamén accesible en diferentes idiomas no web da USC.
11/11/2004. DINAMIZACIóN

Novo número do Cartafol Dixital

Xa pode consultar en liña o número 16 do Cartafol Dixital, voceiro da Universidade de Santiago de Compostela en materia de normalización lingüística.

(Máis información)

09/11/2004. INVESTIGACIóN

A situación sociolingüística e a consciencia idiomática na Galicia da Restauración

A Deputación Provincial de Pontevedra acaba de publicar A lingua galega entre 1875 e 1916, estudo onde se presenta unha exhaustiva panorámica deste período que estaba en boa parte aínda sen analizar desde a perspectiva sociolingüística.
(Máis información)
27/10/2004. CURSOS E CONGRESOS

I Xornadas “Lingua e cidade”

O Servizo de Normalización Lingüística da Universidade da Coruña e a Real Academia Galega organizan unhas xornadas sobre os usos lingüísticos no ámbito urbano que terán lugar os vindeiros días 10, 11 e 12 de novembro na Coruña e Ferrol.

Se desexa obter máis información sobre o programa e os trámites de inscrición, prema aquí.
02/11/2004. AXUDAS E PREMIOS

Resólvese a concesión de axudas aos concellos para fomentar o uso da lingua galega

A Dirección Xeral de Administración Local da Xunta de Galicia fai pública a resolución do concurso de subvencións aos concellos de Galicia para a creación e mantemento de servizos de normalización lingüística ou a realización de actividades que fomenten o uso social da lingua galega.
22/10/2004. AXUDAS E PREMIOS

Axudas aos concellos da provincia da Coruña para promover a normalización lingüística

A Deputación da Coruña convoca axudas aos concellos de ata 50 000 habitantes para o mantemento ou creación de servizos municipais de normalización lingüística e a organización de campañas de dinamización.

O prazo para a presentación de solicitudes remata o día 15 de novembro. Se desexa consultar o texto completo da convocatoria, prema aquí.
20/10/2004. CURSOS E CONGRESOS

Aprender galego a través da radio

A Radio Galega e Radio Ecca emiten diariamente (días laborábeis agás xoves) un curso de iniciación á lingua galega que se pode escoitar a partir das 22 h. (Radio Galega) e das 23 h. (Radio Ecca) a través das frecuencias habituais destas emisoras ou tamén a través da canle dixital Radio Galega Música.

Todas as leccións do curso permanecerán, durante a duración do mesmo, accesíbeis no web da Radio Galega, polo que vostede tamén terá a oportunidade de oír as clases xa emitidas.
20/10/2004. INVESTIGACIóN

Glosario de termos esenciais de botánica

A Comisión de Normalización Lingüística da Escola Politécnica Superior da USC acaba de publicar un glosario multilingüe que recolle a terminoloxía básica da área de botánica. Este glosario, que constitúe o primeiro froito dunha serie máis ampla que irá saíndo paulatinamente á luz, pretende potenciar o uso do galego nas actividades académicas e investigadoras da Escola.

Se está interesado/a en obter un exemplar, pode poñerse en contacto co Servizo de Normalización Lingüística da USC.
14/10/2004. CURSOS E CONGRESOS

Simposio Lingua e Territorio

O Instituto da Lingua Galega organiza o Simposio Lingua e Territorio, que se desenvolverá en Santiago de Compostela, en sesións descontinuas, entre os días 4 de novembro e 3 de decembro.

O simposio xirará arredor das fronteiras lingüísticas interiores, debatendo e reflexionando sobre as manifestacións lingüísticas da nosa particular distribución xeográfica. O prazo de inscrición remata o 3 de novembro e as prazas son limitadas.
14/10/2004. EMPREGO

Bolsa de colaboración co Servizo de Normalización Lingüística da Universidade da Coruña

A Universidade da Coruña convoca, coa colaboración da Deputación da Coruña, unha bolsa para desenvolver labores de apoio ao Servizo de Normalización Lingüística desta universidade. As persoas solicitantes deben ser licenciados/as en Filoloxía Galega pola Universidade da Coruña, ademais de estar matriculados nalgún curso de doutoramento da universidade ou estar en posesión do Diploma de Estudos Avanzados (DEA).

O prazo de presentación de solicitudes é do 8 ao 22 de outubro. Se desexa consultar o texto íntegro desta convocatoria, prema aquí.
13/10/2004. INVESTIGACIóN

O galego estremeiro entra na Real Academia Galega

A Real Academia Galega acordou, no plenario do pasado 9 de outubro, nomear catro novos académicos en representación das diferentes comunidades lingüísticas que conforman o que se deu en chamar “galego estremeiro” ou “galego exterior”, reforzando así o seu compromiso coa defensa e promoción do galego falado fóra das nosas fronteiras administrativas.
(Máis información)
13/10/2004. INVESTIGACIóN

Créase a Sociedade Galega de Terminoloxía

Diferentes investigadores, tradutores e especialistas en terminoloxía galega reuníronse o pasado mércores, 6 de outubro, para constituír a Sociedade Galega de Terminoloxía. Esta asociación ten como obxectivos, entre outros, facilitar o coñecemento e a cohesión entre as persoas relacionadas coa terminoloxía en Galicia, promover accións formativas e propiciar o intercambio de información e coñecementos neste eido.

Se desexa máis información ou está interesado/a en participar no proceso de creación e desenvolvemento desta asociación, pode poñerse en contacto coa Xunta Directiva provisional a través do enderezo electrónico: lingua@consellodacultura.org.
11/10/2004. EMPREGO

Praza de técnico/a en normalización lingüística no Concello de Moaña

O Concello de Moaña convoca unha praza de técnico/a de normalización lingüística, incluída na Oferta de Emprego Público de 2004. A praza cubrirase polo sistema de concurso-oposición en quenda libre e todas as persoas interesadas teñen de prazo para presentar a súa solicitude 20 días naturais a partir do seguinte ao da publicación dun extracto desta convocatoria no Boletín Oficial do Estado.

Se desexa consultar o temario e as bases específicas desta convocatoria, prema aquí.