Novas da lingua

Rexistros901 a 930 de 5280
  1. Inicio
  2. CDSG-CCG
  3. Novas da lingua
22/06/2023. AXUDAS E PREMIOS

Margarita Ledo, Premio Luís Porteiro Garea 2023

O xurado do VI Premio Luís Porteiro Garea acordou por unanimidade outorgar este galardón a Margarita Ledo Andión, promotora da creación da actual Facultade de Ciencias da Comunicación da USC, da que foi a súa primeira decana no período de 1992 a 1996. O xurado pon de relevo o seu compromiso “incuestionable coa lingua galega”, que “atravesa de parte a parte a súa traxectoria vital e profesional”. A entrega pública do premio terá lugar o 29 de setembro de 2023 no Paraninfo da USC.

O premio Luís Porteiro Garea, que leva o nome do profesor de dereito civil e membro das Irmandades da Fala que en 1915 pronunciou a primeira lección en galego na USC, ten como finalidade recoñecer o traballo de persoas, entidades ou colectivos que traballan, ou traballaron, a prol do galego na universidade.

No Xornal da USC atoparás máis información sobre esta iniciativa.
22/06/2023. CURSOS E CONGRESOS

Convocatoria de cursos de galego nas escolas oficiais de idiomas

A Consellería de Educación, Universidade e Formación Profesional convoca cursos de linguaxe administrativa galega en liña (niveis medio e superior) e mais cursos preparatorios para a obtención dos certificados de lingua galega (niveis Celga 2, 3 e 4), que se impartirán nas escolas oficiais de idiomas de Galicia no curso 2023/2024. Os cursos de linguaxe administrativa están dirixidos ao persoal das administracións autonómica e local galegas, así como ao da Administración periférica do Estado en Galicia, exceptuando o persoal docente e sanitario. Aos cursos preparatorios dos Celga poderán asistir todas as persoas maiores de dezaseis anos interesadas. O prazo para a presentación das solicitudes abranguerá dende o día 3 ata o 14 de xullo de 2023, para os cursos do primeiro cuadrimestre (setembro-decembro); e dende o 13 ata o 24 de novembro de 2023, para os cursos do segundo cuadrimestre (febreiro-maio).

Para consultar o texto da convocatoria, preme aquí.
22/06/2023. AXUDAS E PREMIOS

Axudas para a tradución do libro galego

A Consellería de Cultura, Educación, Formación Profesional e Universidades da Xunta de Galicia publica a convocatoria de axudas para o libro galego, tanto no que se refire á tradución para outras linguas de obras publicadas orixinariamente en galego como á tradución para o galego de obras publicadas orixinariamente noutras linguas. O prazo de presentación de solicitudes é dun mes, contado a partir do día seguinte ao da publicación da convocatoria.

20/06/2023. AXUDAS E PREMIOS

A UVigo recoñecerá co distintivo “Gal Ego” os centros que promovan o noso idioma

A partir do vindeiro curso 2023-2024, a Universidade de Vigo recoñecerá co distintivo de galeguización “Gal Ego” a facultade ou escola universitaria que máis promova o emprego do galego. O recoñecemento outorgarase a través dunha convocatoria pública anual e os distintivos outorgados terán unha vixencia de catro anos. Ademais dunha insignia deseñada para a exposición pública, os centros que obteñan o "Gal Ego" recibirán tamén unha contía de 3.000 euros, que poderán destinar a actividades de promoción lingüística. O prazo de solicitude desta primeira convocatoria remata o 30 de setembro de 2023.

Se precisas máis información, preme aquí.
20/06/2023. DINAMIZACIóN

Festichío con música en galego para os máis pequenos de Moaña

O Servizo de Normalización Lingüística e a Biblioteca Pública Municipal do Concello de Moaña organizan o Festichío, un festival musical dirixido a público infantil e familiar que pon o ramo ao programa Rechouchíos dos meses de maio e xuño de 2023. O festival terá lugar o vindeiro xoves, 22 de xuño, a partir das 19:00 h, no arboredo da Xunqueira (Meira) e os/as máis pequenos/as e a súas familias poderán gozar das actuacións de María Faltri, Jorge Juncal, Magín Blanco, Gloria Mosquera, Paco Nogueiras, Pakolas, Uxía e Brais das Hortas. A entrada é de balde.
20/06/2023. DINAMIZACIóN

Todas as “historias co galego” nunha mesma lista de Youtube

O galego, como lingua propia de Galicia, constitúe unha parte importante da nosa historia vital, polo que Alingua (Asociación de Entidades Locais pola Lingua Galega) convidou a unha serie de persoas, que pola súa actividade profesional son referentes para a mocidade, a contarnos a súa “historia co galego”. Estas historias publícanse periodicamente nas redes sociais co cancelo #amiñahistoriacogalego e agora Alingua reúne todos os contidos nunha mesma lista de Youtube. Xa podes poder ver os seis primeiros vídeos coas experiencias lingüísticas de Tania Veiras, Rodri Míguez, Gabri Fuentes, María Vázquez, Fátima Pego e Gabi García.
19/06/2023. OUTRAS

A Igrexa evanxélica publica unha versión do Novo Testamento en galego

O libro máis lido, traducido e difundido da historia conta xa cunha nova edición en lingua galega. O Novo Testamento publicado por Wycliffe Associates xorde da iniciativa da Igrexa evanxélica, no ánimo de ofrecer unnha versión máis accesible desta obra, tanto para o culto coma para actividades evanxelizadoras.

Consulta máis detalles sobre esta iniciativa e outras asociadas aquí.
19/06/2023. OUTRAS

O catálogo de Filmin ofrece, por primeira vez, unha serie orixinal en galego

Pringadas é o título da serie, dirixida por Belén Puime e recoñecida nos premios Mestre Mateo e no Carballo Interplay, que abre a oferta de contidos audiovisuais galegos e en lingua galega da plataforma Filmin.

Desde que en 2019 Netflix estrease O sabor das margaridas, o goteo de produción propia e dobrada no conxunto das plataformas internacionais sitúa a presenza do noso idioma nun 0,92% dos catálogos xerais e un 1,1% do infantil. Das plataformas estatais, só inclúen contidos en galego RTVE Play (o 0,53% da súa oferta xeral) e Filmin (o 0,30% do seu catálogo xeral e o 0,74% do infantil). Para coñecer máis datos, podes consultar o Informe Xabarín 2023.
16/06/2023. CURSOS E CONGRESOS

Cursos de formación en lingua galega para o PDI da Universidade da Coruña

O Servizo de Normalización Lingüística (SNL) da Universidade da Coruña convoca tres cursos de formación en lingua galega para o persoal docente e investigador da UDC, que se desenvolverán en liña a través do Campus Virtual entre o 2 de outubro e o 3 de decembro de 2023. Os cursos, deseñados segundo o nivel de competencia previa do alumnado, son os seguintes: Curso Básico de Aproximación á Lingua Estándar, Curso de Actualización de Competencias Lingüísticas e Curso Superior de Competencias Lingüísticas. O prazo de presentación de solicitudes remata o 20 de setembro de 2023.

Na páxina web do SNL da UDC podes obter máis información sobre os contidos e mais os trámites de inscrición.
16/06/2023. AXUDAS E PREMIOS

X Premio Lois Tobío de Investigación Xurídica en Lingua Galega

A Comisión de Normalización Lingüística da Facultade de Dereito e mais o Servizo de Normalización Lingüística da Universidade da Coruña convocan a décima edición do Premio Lois Tobío de Investigación Xurídica en Lingua Galega. O premio inclúe dúas modalidades, unha dirixida ao alumnado matriculado no curso 2023/24 nunha titulación oficial (de grao ou mestrado) impartida en calquera das facultades de Dereito do sistema universitario galego; e outra na que poderá participar calquera persoa licenciada ou graduada en Dereito. Outorgarase un premio de 500 euros en cada unha das modalidades. A maiores, os traballos gañadores publicaranse no Anuario da Facultade de Dereito. O prazo de presentación remata o 20 de outubro de 2023.

Podes consultar as bases completas da convocatoria premendo aquí.
15/06/2023. OUTRAS

Ximnasio Léxico, a aplicación para poñer en forma a túa lingua

A Real Academia Galega e a Fundación Barrié presentan o “Ximnasio Léxico”, unha aplicación dispoñible para dispositivos móbiles de Android e iOS que che axudará a adestrar os teus coñecementos léxicos de xeito divertido. A ferramenta, dirixida a todos os públicos, componse de seis xogos baseados no vocabulario normativo recollido no Dicionario da Real Academia Galega. Os/as usuarios/as poderán optar pola opción de adestramento (que permite a libre elección do xogo que máis interese en cada momento) ou pola opción de competición.

Na páxina web da RAG atoparás información detallada sobre esta iniciativa e os diferentes xogos que a compoñen.
15/06/2023. LEXISLACIóN

O Parlamento de Galicia acolle unha mostra conmemorativa dos 40 anos da Lei de Normalización Lingüística

Onte, 14 de xuño de 2023, tivo lugar na sede do Parlamento de Galicia a inauguración da exposición “A forza da palabra. Lei de Normalización Lingüística de Galicia (1983-2023)", promovida pola Xunta de Galicia e comisariada por Henrique Monteagudo. Trátase dunha mostra conmemorativa dos 40 anos da aprobación desta norma que, en palabras do propio presidente do Parlamento de Galicia, “se enmarca no que con xustiza poderiamos denominar leis fundacionais da autonomía galega".

Para ampliar información, preme aquí.
14/06/2023. AXUDAS E PREMIOS

Convócanse os Premios da Cultura Galega 2023

A Consellería de Cultura, Educación, Formación Profesional e Universidades convoca os Premios da Cultura Galega para o ano 2003, nas seguintes modalidades: Letras, Artes Visuais, Artes Escénicas, Música, Audiovisual, Lingua, Patrimonio Cultural e Proxección Exterior. O premio da modalidade de Lingua está dirixido a persoas, colectivos ou entidades de ampla traxectoria no ámbito da promoción da lingua galega. As candidaturas só poderán ser presentadas por institucións e entidades culturais ou profesionais, públicas ou privadas, relacionadas co obxecto de cada premio, sen que os candidatos se poidan postular a si mesmos. O prazo de presentación de candidaturas será de dous meses, contados desde o día seguinte ao da publicación da convocatoria no Diario Oficial de Galicia.
14/06/2023. AXUDAS E PREMIOS

Traballos gañadores dos V Premios de podcast “O vello dos contos”

O xurado dos Premios de podcast en galego e portugués Xosé Mosquera Pérez "O vello dos contos" fixo públicos os traballos gañadores da quinta edición deste certame escolar, organizado polo IES Rosalía de Castro de Santiago de Compostela, Arraianos Producións e a asociación Ponte... nas Ondas!, coa colaboración da Secretaría Xeral de Política Lingüística.

Na categoría de educación primaria, o podcast gañador do primeiro premio foi “Un pobo lírico”, do CEIP de Atín-Cela (Mos), mentres que na categoría de educación secundaria o principal galardón recaeu no traballo “Ping Pong con Francisco Fernández del Riego”, do IES de Cotobade.

Podes consultar todos os traballos premiados, así coma os finalistas e premiados nas diferentes edicións, premendo aquí.
13/06/2023. AXUDAS E PREMIOS

Camilo Nogueira e Carlos Varela son distinguidos coa insignia de honra da Irmandade Xurídica Galega

A celebración da XIV Asemblea da Irmandade Xurídica Galega foi o escenario escollido para distinguir como insignes irmandiños ao político nacionalista Camilo Nogueira e ao xurista Carlos Varela, fiscal da Fiscalía Superior da Galiza, polo impulso da Lei de normalización lingüística e pola súa expansión no ámbito da Xustiza, respectivamente.

A data escollida non foi casual, xa que o 15 de xuño cumpriranse 40 anos da aprobación da Lei.

09/06/2023. DINAMIZACIóN

O IES Rafael Dieste ofrécenos a súa banda sonora con máis de 100 temas en galego

O alumnado de 4º da ESO do IES Rafael Dieste, que xa nos demostrara que na Coruña tamén se fala galego, agasállanos agora coa Banda sonora do curso 22/23, creada de xeito cooperativo polos propios alumnos e alumnas, e composta por máis de 100 temas en galego de todos os xéneros musicais. A maiores, na difusión da súa iniciativa contan coa colaboración da plataforma Galeguiza_t, que está a publicar de xeito periódico na súa páxina de Instagram as reaccións da rapazada ao escoitar unha selección destes temas. Todas estas impresións tamén están recollidas nun documento en formato PDF, que permite o acceso aos temas musicais propostos a través de códigos QR.
09/06/2023. AXUDAS E PREMIOS

Resolución de axudas para o fomento do galego nos centros de ensino públicos

A Consellería de Cultura, Educación, Formación Profesional e Universidades publica a resolución da convocatoria de subvencións, dirixidas a centros de ensino non universitario de titularidade pública, para proxectos de fomento do galego durante o curso escolar 2022/2023.

Podes consultar a listaxe de centros beneficiarios premendo aquí.
07/06/2023. INVESTIGACIóN

Presentación pública da obra Toponimia de Ribeira

O vindeiro venres, 9 de xuño de 2023, ás 20:00 h, terá lugar no Centro Cultural Lustres Rivas (Ribeira) a presentación pública da obra Toponimia de Ribeira, que indaga na orixe e significados das 215 formas que designan as entidades de poboación deste concello. No acto intervirán Fernando Cabeza Quiles (autor do volume), Víctor F. Freixanes (presidente da RAG), Antón Santamarina (coordinador do Seminario de Onomástica da RAG), Luz Méndez (presidenta da Asociación Galega de Onomástica), Carlos H. Fernández Coto (presidente de Apatrigal) e Manuel Ruiz Rivas (alcalde en funcións de Ribeira).

Se precisas máis información, preme aquí.
07/06/2023. DINAMIZACIóN

A Deputación da Coruña organiza un programa de actividades sobre a represión do idioma galego

A Deputación da Coruña organiza un programa de actividades de concienciación lingüística que ten como fío condutor o ensaio O libro negro da lingua galega, autoría de Carlos Callón.
En concreto, nos vindeiros días terán lugar as seguintes iniciativas ao abeiro do programa 5 séculos a silenciaren o galego. Dámoslle voz?: un debate na Libraría de Rosa, en Boiro, no que ademais do autor tamén participará Olaxonmario (9 de xuño, ás 20:20 h); un segundo debate na Casa do Taberneiro, en Santiago de Compostela, no que Carlos Callón estará acompañado por Neves Rodríguez e Héctor López de Castro (10 de xuño, ás 12 h); e un roteiro guiado pola cidade da Coruña (11 de xuño, ás 11:30 h e 18:30 h; e 3 de xullo, ás 20:30 h).
06/06/2023. OUTRAS

O Proxecto Nós dá os seus primeiros froitos

A Xunta de Galicia e a Universidade de Santiago de Compostela presentaron publicamente as tres primeiras ferramentas elaboradas ao abeiro do Proxecto Nós. Trátase dun tradutor neuronal multilingüe, dun recoñecedor de voz que entende o galego oral e o converte en texto, e dunha aplicación de síntese de voz que a partir dun texto escrito é quen de ler en galego. O tradutor está xa dispoñible no web do proxecto e as outras dúas aplicacións tamén estarán en breve accesibles ao público.

O Proxecto Nós é unha iniciativa da Xunta de Galicia e ten como obxectivo o desenvolvemento de tecnoloxías, ferramentas e aplicacións que permitan o uso do galego nos ámbitos de aplicación da Intelixencia Artificial. Do desenvolvemento do proxecto encárgase a Universidade de Santiago de Compostela, a través do Instituto da Lingua Galega (ILG) e do Centro Singular de Investigación en Tecnoloxías Intelixentes (CiTIUS).

Podes obter máis información premendo aquí.
02/06/2023. AXUDAS E PREMIOS

Os IV Premios Mil Primaveras entregaranse o 9 de xuño en Pontevedra

A Coordinadora de Traballadores/as de Normalización da Lingua convida a toda a cidadanía a asistir ao acto público de entrega dos IV Premios Mil Primaveras, que terá lugar no Salón de Actos do Pazo de Cultura de Pontevedra o 9 de xuño de 2023 ás 19:30 horas. O acto contará tamén coa actuación da contadora Marta Ortiz e a cantautora Sofía Espiñeira, creadoras do espectáculo “Matrioskas”.
Os Premios Mil Primaveras outórganse anualmente co obxectivo de difundir e poñer en valor aqueles proxectos que, polo súa calidade, poidan servir de modelo de boas prácticas no ámbito da normalización lingüística.

Para ampliar información preme aquí.
02/06/2023. INVESTIGACIóN

O alumnado do IES Manuel Murguía estuda a diversidade lingüística de Arteixo

O alumnado do IES Manuel Murguía (Arteixo) desenvolveu durante os últimos meses un estudo sobre os repertorios lingüísticos familiares e a diversidade lingüística da súa contorna. O traballo realizouse no marco dun proxecto de colaboración entre este centro educativo e a Universidade de Santiago de Compostela, polo que contaron coa colaboración das investigadoras da USC María Caamaño, Gabriela Prego e Luz Zas. Trátase dun proxecto educativo de carácter etnolingüístico que incluíu enquisas, dramatizacións, videocreacións e microrrelatos. Os resultados foron presentados no Salón de Actos da Facultade de Filoloxía (USC) o pasado 23 de maio de 2023, nun acto que pode verse na canle de Youtube da USC.
02/06/2023. INVESTIGACIóN

Atopan unha receita en galego do século XV no arquivo da Real Chancillería de Valladolid

Os investigadores Ricardo Pichel (Universidad de Alcalá e Instituto da Lingua Galega da USC) e Rodrigo Pousa Diéguez (Universidade de Vigo) publican un artigo na Revista Murguía dando conta do achado dun documento histórico de gran relevancia para a historia social da lingua galega. Trátase en concreto dunha “receuta da meliza”, un texto médico de natureza farmacéutica no que se receita unha menciña para unha persoa con doenzas gastrointestinais. Tal e como sinalan os autores do artigo, o documento, datado na segunda metade do século XV e custodiado no arquivo da Real Chancillería de Valladolid, constitúe “a primeira mostra coñecida até o momento no espazo cultural galego de literatura técnica de natureza médica non asociada ao mundo animal”.

Podes ler un extracto deste artigo premendo aquí.
01/06/2023. AXUDAS E PREMIOS

Resolución provisional das axudas da Deputación da Coruña aos SNL municipais

A Deputación da Coruña publica a resolución provisional das subvencións a concellos e entidades locais da provincia da Coruña para a creación, mantemento e reforzo dos servizos de normalización lingüística durante o ano 2023. Tal e como se indicaba nas bases reguladoras, estas axudas están condicionadas ao carácter estrutural do posto de traballo.
Podes consultar a resolución premendo aquí.
31/05/2023. OUTRAS

Eduardo Pondal, nova entrada no Álbum de Galicia

Manuel Ferreiro Fernández, recoñecido especialista na obra de Eduardo Pondal (1835-1917), asina a biobliografía dun dos grandes poetas do Rexurdimento e autor do Himno Galego.

A través dela, así como da documentación e o material audiovisual que a acompaña, trázase o retrato da persoa, o intelectual e o político que dedicou a súa vida e a súa obra á redención nacional, como antecesor das Irmandades da Fala.

29/05/2023. DINAMIZACIóN

O alumnado do IES Rafael Dieste demostra que na Coruña tamén se fala galego

O alumnado de 4º da ESO do IES Rafael Dieste (A Coruña) está a desenvolver a campaña de dinamización lingüística Aquí tamén se fala galego, baixo a coordinación do seu profesor de Lingua Galega, Alberto Pombo, e coa colaboración do Equipo de Dinamización Lingüística que coordina Arcadio González Novoa. A iniciativa ten como obxectivo promover o uso do galego no comercio local da cidade e, ao mesmo tempo, demostrar que as actitudes lingüísticas do sector socieconómico son favorables ao noso idioma. Na actualidade, adheríronse xa case 400 establecementos (ximnasios, cafetarias, perruquerías, talleres, restaurantes, tendas de alimentación, asesorías legais...), que colocaron nos seus locais un cartel co lema da campaña.

Na páxina web do IES Rafael Dieste podes obter máis información e no Instagram da súa biblioteca podes ver as fotos que envían os negocios, demostrando con orgullo que o tecido socioeconómico da Coruña non é hostil ao galego.
26/05/2023. AXUDAS E PREMIOS

Fallada a II edición dos Premios de investigación xurídica en lingua galega Xosé Luis Franco Grande

No trascurso do acto de celebración do Día das Letras Galegas, a Facultade de Ciencias Xurídicas e do Traballo da Universidade de Vigo deu a coñecer os nomes dos estudantes gañadores deste galardón.

O premio Xosé Luis Franco Grande está dirixido a fomentar o emprego da lingua na investigación xurídica entre o estudantado de grao e mestrado. A modalidade xeral recoñeceu nesta ocasión traballos que abordan o dereito na UE e o caso do afundimento do Prestige. Na modalidade B, para alumnado da Universidade de Vigo, destacaron unha investigación sobre patentes e outra sobre o concepto de terrorismo.

Todos eles foron salientados pola calidade lingüística, metodoloxía e rigor técnico. Máis información, aquí.
26/05/2023. EMPREGO

Praza de tradutor/a en lingua galega na Deputación de Pontevedra

A Deputación de Pontevedra publica as bases da convocatoria para a provisión, en réxime de interinidade, dunha praza de tradutor/a en lingua galega (funcionario/a A2), adscrita ao Servizo de Normalización e Servizos Lingüísticos. O sistema de selección será a oposición libre. Os/as aspirantes deberán posuír o título de licenciado/a ou graduado/a en Filoloxía Galega e Española, en Lingua e Literatura Galegas, en Tradución con especialidade en galego ou equivalentes. O prazo para presentar as solicitudes será de 10 días naturais, contados a partir do día seguinte ao da publicación da convocatoria no Boletín Oficial da Provincia de Pontevedra.
25/05/2023. OUTRAS

A Deputación de Pontevedra conmemora o 60 aniversario do Día das Letras Galegas coa web "O camiño andado das Letras"

O Departamento de Lingua da Deputación de Pontevedra reúne na web O camiño andado das Letras fichas didácticas de cada unha das personalidades que foi homenaxeada o 17 de maio, desde 1963.

A iniciativa botou a andar o 23 de febreiro, data de nacemento da primeira protagonista do Día das Letras Galegas, Rosalía de Castro, e rematou o 17 de maio, data de publicación de Cantares Gallegos. Para cada persoeiro, elaborouse unha ficha destinada ao público infantil e outra ao público adulto.
25/05/2023. AXUDAS E PREMIOS

Os XIV Premios Rosalía de Castro de Lingua xa teñen gañadores/as

A Deputación da Coruña fixo públicos os/as gañadores/as dos XIV Premios Rosalía de Castro de Lingua, uns galardóns que teñen como obxectivo recoñecer o labor de persoas, colectivos e entidades que destacan polo seu compromiso coa promoción e dignificación do idioma galego. Na categoría de persoas, nesta edición o xurado acordou premiar a Daniel Romero, xestor cultural e técnico de normalización lingüística do Concello de Fene, por "abrir novos camiños e innovar en diferentes ámbitos sociais e de dinamización da lingua”, así como polo seu “exemplo, coherencia e compromiso” na súa traxectoria de máis de 40 anos dedicados á normalización lingüística. Na categoría de entidades, o galardón recaeu ex aequo no Museo do Pobo Galego e en Orgullo Galego, por seren ambas propostas "divulgadoras e mantedoras de coñecemento e contido cultural". Pola súa parte, a iniciativa Pakolas. Rock infantil e familiar en galego foi premiada na categoría de proxecto de dinamización lingüística, por "utilizar unha linguaxe universal, a música, para involucrar calquera xeración no uso normalizado da nosa lingua".

Para ampliar información, preme aquí.