Novas da lingua

Rexistros1171 a 1200 de 5145
  1. Inicio
  2. CDSG-CCG
  3. Novas da lingua
14/12/2022. DINAMIZACIóN

VI Concurso “Quero Cantar” de música infantil e xuvenil

A Deputación da Coruña convoca a sexta edición do Concurso “Quero Cantar”, coa intención de fomentar o uso da lingua galega, así como a creatividade poética e musical entre a poboación infantil e xuvenil. O certame está dirixido a solistas ou grupos musicais, formados por rapaces e rapazas de ata 16 anos, que interpreten unha composición en galego con letra e música orixinais e inéditas. Establécense dúas categorías, segundo a idade dos participantes. Os tres primeiros clasificados de cada categoría terán a oportunidade de gravar a súa maqueta nun estudio profesional, e recibirán material musical e/ou produtos culturais galegos por valor de 1.000 euros. A maiores, os primeiros clasificados de cada categoría gravarán un videoclip da canción gañadora e o gañador/a da categoría xuvenil participará tamén nun programa formativo. O prazo para a presentación de solicitudes remata o 15 de marzo de 2023.

Podes consultar as bases completas do certame premendo aquí. No sitio web da iniciativa tamén podes coñecer os temas participantes nas edicións anteriores.
13/12/2022. EMPREGO

Praza de filólogo/a no Concello da Coruña

O Concello da Coruña publica as bases do proceso selectivo para a cobertura dunha praza de filólogo/a (funcionario/a, subgrupo A1), dentro do proceso extraordinario de estabilización do emprego público. O sistema de selección será o concurso de méritos. Os aspirantes deben estar en posesión ou en condición de obter, antes do remate do prazo de presentación das instancias, do grao en Lingua e Literatura Galegas, Filoloxía Galega, Filoloxía Hispánica (subsección Galego-Portugués) ou equivalente. O prazo de presentación de instancias é de 20 días naturais, contados desde o seguinte ao da publicación do anuncio do extracto da convocatoria no BOE.

Podes consultar o texto completo das bases premendo aquí.
13/12/2022. EMPREGO

Praza de técnico/a de normalización lingüística no Concello de Ames

O Concello de Ames publica a convocatoria e mais as bases xerais e específicas que rexerán os procesos selectivos para cubrir as prazas de estabilización de emprego temporal incluídas na OPE de 2022. Entre as prazas ofertadas inclúese unha de técnico/a de normalización lingüística (persoal laboral, grupo A1). O sistema de selección será o concurso de méritos. Os aspirantes deben estar en posesión ou en condición de obter, antes do remate do prazo de presentación das instancias, a licenciatura en Filoloxía Galego-Portuguesa, Filoloxía Galega ou Filoloxía Hispánica (subsección Galego-Portugués), o grao en Lingua Galega, ou a titulación en calquera outra licenciatura/grao pertencentes á área de Humanidades ou de Ciencias Xurídicas, sempre que se dispoña do Celga 5, ou equivalentes. O prazo de presentación de instancias é de 20 días naturais, contados desde o seguinte ao da publicación do anuncio da convocatoria no BOE.
Podes consultar o texto completo das bases premendo aquí. [corrección de erros]
12/12/2022. EMPREGO

Praza de técnico/a de normalización lingüística no Concello de Teo

O Concello de Teo publica a convocatoria e mais as bases xerais e específicas que rexerán os procesos selectivos de estabilización de emprego temporal. Entre as prazas ofertadas inclúese unha de técnico/a de normalización lingüística (persoal laboral, grupo I). O sistema de selección será o concurso de méritos. Os aspirantes deben estar en posesión ou en condición de obter, antes do remate do prazo de presentación das instancias, a licenciatura en Filoloxía Galego-Portuguesa, Filoloxía Galega ou Filoloxía Hispánica (subsección Galego-Portugués), o grao en Lingua Galega, ou a titulación en calquera outra licenciatura/grao pertencentes á área de Humanidades ou de Ciencias Xurídicas e Sociais, sempre que se dispoña do Celga 5. O prazo de presentación de instancias é de 20 días hábiles, contado desde o seguinte ao da publicación do anuncio da convocatoria no BOE.

Podes consultar o texto completo das bases premendo aquí.
12/12/2022. EMPREGO

Praza de técnico/a de normalización lingüística no Concello de Muros

O Concello de Muros publica as bases xerais e específicas que rexerán as convocatorias dos procesos selectivos correspondentes ás prazas de estabilización de emprego temporal do ano 2022. Entre as prazas ofertadas inclúese unha de técnico/a de normalización lingüística (persoal laboral, grupo I). O sistema de selección será o concurso de méritos. O prazo de presentación de instancias é de 20 días hábiles, contado desde o seguinte ao da publicación do anuncio da convocatoria no BOE.
Podes consultar o texto completo das bases premendo aquí. [corrección de erros]
12/12/2022. EMPREGO

Praza de técnico/a de normalización lingüística no Concello de Dumbría

O Concello de Dumbría publica a convocatoria e mais as bases xerais e específicas do proceso selectivo das prazas incluídas na oferta de emprego público para 2022, para a estabilización de emprego temporal. Entre as prazas convocadas inclúese unha de técnico/a de normalización lingüística (persoal laboral, grupo II). O sistema de selección será o concurso de méritos. O prazo de presentación de instancias é de 20 días naturais, contado a partir do seguinte ao da publicación do anuncio da convocatoria no BOE.
Podes consultar o texto completo das bases premendo aquí.
12/12/2022. DINAMIZACIóN

Concurso de postais de Nadal no Porriño

O Servizo de Normalización Lingüística do Concello do Porriño convoca a segunda edición do seu Concurso Infantil de Postais de Nadal, co obxecto de dinamizar o uso do galego na infancia.

Trátase de que as/os máis pequenas/os feliciten as festas mediante a creación dunha postal decorativa, cunha mensaxe positiva e creada en lingua galega. Para gañar un dos tres premios de cada unha das tres categorías, é preciso que entreguen as súas cartas na caixa de devolución de libros da Biblioteca Municipal do Porriño entre o 10 e o 24 de decembro de 2022. Consulta as bases completas do concurso.
07/12/2022. INVESTIGACIóN

Iniciativa lexislativa popular para a restauración do texto do Himno de Galicia

Un grupo de persoas, entre as que se encontran Manuel Ferreiro, especialista na obra de Eduardo Pondal, Fernando López Acuña, investigador da partitura do himno, e representantes de Vía Galega ou Galiza Cultura, entregaron no rexistro do Parlamento unha iniciativa popular para que o texto oficial do himno galego sexa corrixido conforme o poema do que xorde, "Os pinos".

Ademais de depurar os castelanismos ou os hiperenxebrismos que Pondal xa recoñecera en vida, reclaman que recolla as catro primeiras estrofas, que se cumpra co seu uso nos actos oficiais e se faga unha edición divulgativa para o coñecemento e difusión na sociedade galega.
05/12/2022. AXUDAS E PREMIOS

Premios a curtas de animación en galego

A Secretaría Xeral de Política Lingüística e a Dirección Xeral de Ordenación e Innovación Educativa da Xunta de Galicia convocan unha nova edición dos premios a curtas de animación en galego creadas no marco do programa “Nós tamén creamos!” 2022-2023. Outorgarase un premio para cada unha das tres categorías que establece o certame: curtas realizadas con alumnado de segundo ciclo de educación infantil; curtas con alumnado de primeiro e segundo de educación primaria; curtas con alumnado de terceiro e cuarto de educación primaria. O prazo para presentar a solicitude de participación remata o 1 de febreiro de 2023. A data límite para enviar as curtametraxes é o 30 de maio de 2023.
Para obter máis información sobre esta iniciativa ou consultar as bases completas da convocatoria, preme aquí.
05/12/2022. CURSOS E CONGRESOS

Xornadas sobre o audiovisual como medio normalizador no ensino

A Asociación Socio-Pedagóxica Galega e CIG-Ensino organizan as III Xornadas de Normalización Lingüística, que nesta edición terán como fío condutor o papel do audiovisual galego como ferramenta normalizadora no ámbito educativo. As sesións, dirixidas a persoal docente, terán lugar o sábado, 21 de xaneiro de 2023 no IES As Fontiñas (Santiago de Compostela). A matrícula é de balde mais cómpre inscrición.
05/12/2022. INVESTIGACIóN

Accesible de balde a colección completa de "Esenciais USC"

A Universidade de Santiago de Compostela permite acceder de balde, tanto para a consulta en liña como para a descarga en formato PDF, dos corenta títulos que conforman a colección Esenciais USC, promovida polo seu Servizo de Normalización Lingüística. Os Esenciais USC son recursos de apoio didáctico, dirixidos tanto ao profesorado como ao alumnado, que condensan en poucas páxinas a parte máis significativa dunha materia.

Para ampliar información, preme aquí.
02/12/2022. OUTRAS

A UNESCO recoñece a Ponte... nas ondas! como modelo internacional de boas prácticas

O 17 Comité Intergobernamental da UNESCO que este ano se celebra en Rabat aprobou onte, 1 de decembro de 2022, a proposta conxunta dos gobernos de España e Portugal de inscribir a iniciativa Ponte... nas ondas! no Rexistro de Boas Prácticas co Patrimonio Cultural Inmaterial da UNESCO.
Ponte... nas ondas! é unha asociación cultural e pedagóxica creada en 1995, que traballa con centros educativos de Galicia e do Norte de Portugal para recuperar e difundir o noso patrimonio cultural inmaterial común.

Podes ampliar información premendo aquí.


02/12/2022. DINAMIZACIóN

Campaña de promoción do uso galego no Nadal do Concello de Outes

O Concello de Outes, a través do seu Servizo de Normalización Lingüística, pon en marcha novamente O noso Nadal, a campaña coa que promove o uso da lingua galega, a creatividade e a decoración das vivendas e comercios no tempo de Nadal.

Haberá dous concursos: o de postais, que pretende involucrar aos pais, nais, avós e avoas para que sexa unha actividade interxeracional; e o de decoración de Nadal, dirixido tanto á veciñanza en xeral como ao comercio.

Para presertarse ao primeiro, o prazo remata o 21 de decembro; no caso do concurso de decoración, o 20 de decembro. Consulta as bases completas.
29/11/2022. INVESTIGACIóN

O CCG conmemora o 250 cabodano de Martín Sarmiento

Co gallo da conmemoración do 250 cabodano de Martín Sarmiento (1695-1772), o Consello da Cultura Galega está a organizar diferentes iniciativas de homenaxe a este grande intelectual do século XVIII, precursor dos estudos galegos e do pensamento galeguista. Entre elas destaca a culminación da edición, en colaboración co CSIC, da súa obra maior De historia natural y todo género de erudición. Obra de 660 pliegos, que podes consultar íntegra no novo sitio web do Proxecto Sarmiento.

Outra das iniciativas, relacionada estreitamente coa anterior, é a celebración do simposio «Martín Sarmiento, De historia natural e de todo xénero de erudición», que xustamente estes días está a ter lugar na sede do CCCG e que podes seguir en directo a través da páxina web institucional ou da canle de Youtube.

29/11/2022. CURSOS E CONGRESOS

Xornada divulgativa "Matemáticas e lingua"

A Comisión de Normalización Lingüística da Facultade de Matemáticas organiza o día 30 de decembro de 2022, ás 16:30 horas, a xornada divulgativa Matemáticas e Lingua.

A sesión desenvolverase na Aula Magna da Facultade de Matemáticas e a asistencia é libre ata completar a capacidade da sala. Consulta o programa.
29/11/2022. CURSOS E CONGRESOS

Obradoiro en Vilagarcía para fomentar o uso do galego no ámbito familiar

O Concello de Vilagarcía organiza o sábado, 3 de decembro de 2022, o obradoiro O Lar das Palabras. Trátase dunha actividade de carácter lúdico, dirixida a pais, nais e fillos con idades de 3 a 8 anos, durante a que cada familia realizará o seu propio dicionario en galego co fin de reforzar o vínculo afectivo da familia co idioma.

Están programadas dúas sesións, ás 11:00 h e ás 12:30 h, que requiren anotarse na sede electrónica do Concello. O prazo de inscrición conclúe o venres 2 de decembro. Tes máis información aquí.

25/11/2022. DINAMIZACIóN

Dispoñible o Catálogo 2022 de agasallos de Nadal en galego

A Mesa pola Normalización Lingüística publica o seu xa habitual Catálogo de agasallos para o Nadal, unha extensa proposta de produtos e servizos que poñen en valor a nosa lingua e a nosa cultura, unidas á economía local.

As persoas que asistan ao Culturgal, entre o 24 e o 27 de novembro, poderán levar un exemplar en papel de balde.
25/11/2022. DINAMIZACIóN

A Deputación de Pontevedra invita o Apalpador a visitar 49 concellos da provincia

A través do seu programa "Nadal en galego", a Área de Lingua da Deputación Provincial de Pontevedra vai organizar visitas do Apalpador a 49 concellos das comarcas do Morrazo, o Salnés, Caldas, Deza-Tabeirós, Vigo, Pontevedra, Val Miñor, Condado-Paradanta e Baixo Miño. Esta cita acompáñase de música e baile, á par que promove valores como a dinamización da lingua, o respecto ao medio ambiente e os hábitos de alimentación saudable.

Todo o programa vai desenvolverse entre o 19 de decembro de 2022 e o 4 de xaneiro de 2023. Nos próximos días, poderán consultarse as datas en que o Apalpador visitará cada concello na web da Deputación.
24/11/2022. INVESTIGACIóN

Análise dos usos lingüísticos da infancia en contextos diferentes ao familiar e escolar

O Seminario de Sociolingüística da Real Academia Galega presenta o volume Prácticas lingüísticas na infancia. A xestión lingüística nos primeiros contextos de socialización, autoría de Henrique Monteagudo, Xaquín Loredo, Gabino S. Vázquez Grandío e Anik Nandi. Co ánimo de completar a panorámica debuxada por estudos sociolingüísticos anteriores, que se centraban nos ámbitos familiar e escolar á hora de analizar os usos lingüísticos da infancia, neste estudo os seus autores abren o foco para atender a outros contextos de socialización, como poden ser as actividades complementarias, de conciliación laboral e familiar, e as extraescolares. Os resultados axudan a entender como se está a producir a substitución do galego polo castelán nos nenos e nenas do ámbito urbano e periurbano galego.

Podes ampliar información premendo aquí.

24/11/2022. OUTRAS

Entra no Álbum de Galicia Xosé Neira Vilas

Xa podes consultar no Álbum de Galicia a biobibliografía de Xosé Neira Vilas (Gres, Vila de Cruces,1928 - Gres, Vila de Cruces,2015). En palabras do seu redactor, Valentín García Gómez, estamos ante un escritor e intelectual que se dedicou «sen descanso á creación literaria e ao activismo cultural, as dúas angueiras que lle serviran de motor vital desde os anos de mocidade na capital porteña.» Ese labor deu de si numerosos títulos, entre os que sempre haberá que destacar Memorias dun neno labrego, obra universal que a día de hoxe segue estando entre as máis lidas.
23/11/2022. AXUDAS E PREMIOS

Xa podes escoller a túa "Palabra do Ano 2022"

Acabando o ano, A Real Academia Galega convida a cidadanía a colaborar na escolla da palabra que mellor sintetice, para ben ou para mal, os acontecementos ou experiencias sociais vividas nos últimos 12 meses.

Podes enviar as túas suxestións ao Portal das Palabras ata o vindeiro 11 de decembro. Posteriormente, do martes 13 ao domingo 25 de decembro, comezará a segunda fase, na que se someterán a votación telemática os termos máis significativos e máis repetidos na primeira. A Palabra do Ano darase a coñecer nos últimos días do 2022.
22/11/2022. LEXISLACIóN

A USC actualiza o seu regulamento de usos lingüísticos

O Consello de Goberno da USC aprobou, na súa xuntanza do 28 de outubro de 2022, o seu novo Regulamento de usos lingüísticos da Universidade de Santiago de Compostela, que actualiza un documento anterior de 1993, atendendo ás novas necesidades que apareceron desde aquela data no eido das novas tecnoloxías, na internacionalización e na xestión de contextos académicos multilingües. Así mesmo, ademais de asegurar o status de lingua propia do galego e garantir os dereitos lingüísticos de toda a comunidade universitaria, este novo documento fai fincapé no labor de dinamización e promoción do uso do galego que a USC debe desenvolver como institución pública.

Para ampliar esta información, preme aquí.
22/11/2022. DINAMIZACIóN

"Os mapas dixitais polo seu nome". Campaña para un uso correcto da toponimia nos navegadores e xeolocalizadores

A Mesa pola Normalización Lingüística inicia unha campaña dirixida ás compañías operadoras de xeolocalización e navegación, para que na sinalización dos lugares respecten os topónimos oficiais, unicamente en lingua galega.

"Os mapas dixitais polo seu nome" chegará tamén á Administración local, o Parlamento e o Congreso dos Deputados, posto que a deturpación dos topónimos nestes produtos afecta directamente outros servizos, coma o de transportes, e destrúe un laborioso traballo de recuperación dos nomes de lugar en galego.
22/11/2022. OUTRAS

O Plan pedagóxico para a galeguización das escolas de Vicente Risco, en edición facsimilar

A Fundación Vicente Risco edita, co apoio da Secretaría Xeral de Política Lingüística da Xunta de Galicia, unha edición facsimilar do Plan pedagóxico para a galeguización das escolas, proxecto encargado polas Irmandades da Fala a Vicente Risco para fornecérense de métodos de actualización docente que incorporasen o uso do galego no ensino.

O volume recolle tanto a versión publicada en Nós coma n'A Nosa Terra e unha adaptación a cargo de Isabel Mociño máis un estudo introdutorio a cargo do especialista Xosé Fernández.
18/11/2022. OUTRAS

Hackatón de incorporación de contidos ao Galizionario

Ao longo da xornada de hoxe, 18 de novembro de 2022, estase a desenvolver na Facultade de Ciencias do Deporte da Uvigo, en Pontevedra, a inciativa “EMLex Wiktionary Hackfest. Á volta coas palabras”, un evento académico (aínda que aberto a toda a cidadanía) de traballo lexicográfico colaborativo, organizado por EMLex USC e EMLex UMinho, coa colaboración da UVigo. Despois dunha sesión formativa na que os asistentes terán oportunidade de descubrir as características esenciais dun wikcionario, comezará o hackatón de incorporación de contidos ao Galizionario.

No Diario da Universidade de Vigo podes ampliar información.
18/11/2022. DINAMIZACIóN

Campaña "Cambia a túa mirada" na Facultade de Veterinaria de Lugo

A Comisión de Normalización Lingüística da Facultade de Veterinaria do Campus de Lugo da USC pon en marcha unha nova edición da campaña Cambia a túa mirada, dirixida ao alumnado procedente de fóra de Galicia da facultade.

Co propósito de acompañar e acelerar o proceso de integración deste estudantado, promover o respecto lingüístico e favorecer o mantemento lingüístico das persoas galegofalantes, son varias as actuacións programadas no curso 2022-2023. En primeiro lugar, a difusión a través de whatsapp de vídeos con testemuños de estudantes, docentes, investigadores e profesionais en activo. A seguir, a distribución de material promocional e a habilitación dun photocall no aulario.

Na páxina web do Servizo de Normalización Lingüística da USC podes atopar máis información.
17/11/2022. CURSOS E CONGRESOS

O Simposio ILG 2022 céntrase na edición dixital de textos medievais

O Instituto da Lingua Galega da Universidade de Santiago de Compostela, en colaboración co Consello da Cultura Galega, a Universidade de Alcalá e a Xunta de Galicia, organiza o Simposio ILG 2022, que leva por título “Edición Dixital de Textos Antigos: Modelos, Proxectos e Ferramentas”, poñendo o foco na edición dixital de textos galegos do período medieval.
As sesións desenvolveranse entre o 28 de novembro e o 2 de decembro de 2022, no salón e graos da Facultade de Filoloxía da USC. O prazo de inscrición remata o 28 de novembro ás 12 h.

16/11/2022. CURSOS E CONGRESOS

Charla-coloquio sobre o nome da ría de Ribadeo

O xoves 17 de novembro de 2022, ás 20 h, a Casa do Viejo Pancho, en Ribadeo, acolle a charla-coloquio «Na defensa da nosa ría».

Este acto contará coa participación do alcalde de Ribadeo, Fernando Suárez Barcia, o presidente da Mesa pola Normalización Lingüística, Marcos Maceira, e o mariño mercante e estudoso da toponimia local Francisco Campos Dorado.

Desde o propio día 18 ata o 24 de novembro, quen o desexe tamén pode visitar unha exposición de cartas náuticas no mesmo edificio. Máis información aquí.
15/11/2022. INVESTIGACIóN

Nova edición da xornada "Matemáticas: habelas hainas!"

A Comisión de Normalización Lingüística da Facultade de Matemáticas e o Seminario de Iniciación á Investigación (SII) do centro, co apoio do Servizo de Normalización Lingüística (SNL) da Universidade de Santiago de Compostela, organizan unha nova edición da xornada divulgativa "Matemáticas: habelas hainas!", dirixida fundamentalmente a estudantes de grao e máster. Nesta edición de 2022, cinco investigadores/as explicarannos en lingua galega, en charlas breves e amenas, diferentes aspectos relacionados coa investigación matemática. A xornada terá lugar o vindeiro 23 de novembro de 2022, ás 16:00 h, na Aula Magna da Facultade de Matemáticas da USC.

Para obter máis información sobre o programa completo e mais os trámites de inscrición, preme aquí.
14/11/2022. DINAMIZACIóN

Paseo literario en Vigo para conmemorar o centenario do manifesto "Máis alá!"

O 28 de xuño de 1922 a Editorial Nós publicaba o manifesto Máis alá!, asinado polo poeta Manuel Antonio e o debuxante Álvaro Cebreiro, que segue a simbolizar, cen anos despois, un claro compromiso coa liberdade creativa e co idioma galego. Para conmemorar o centenario deste importante manifesto, o Servizo de Normalización Lingüística do Concello de Vigo organiza o paseo “100 anos do manifesto Máis alá!”, no que o público asistente terá ocasión de descubrir os lugares relacionados coa estadía de Manuel Antonio en Vigo. A actividade terá lugar o vindeiro sábado, 19 de novembro de 2022, a partir das 11:00 horas. A asistencia é libre e non se precisa inscrición previa. Para ampliar información, preme aquí.