O Concello de Bueu convoca o certame "Mergullándonos no TikTok", co obxectivo de fomentar o uso do galego entre a mocidade nos espazos de lecer e tempo libre, nomeadamente, nas redes sociais. Pode participar toda a poboación moza (ou que se sinta moza), de máis de 18 anos. Para facelo cómpre subir un vídeo de TikTok en galego de temática libre co cancelo #SeVouATikTok, mencionando a @concellodebueu. Tes de prazo para participar ata o vindeiro venres, 7 de outubro. O xurado seleccionará tres gañadores/as que recibirán diferentes premios de carácter tecnolóxico nunha gala que terá lugar o 9 de outubro en Bueu. Para consultar as bases completas do certame, preme aquí.
04/10/2022. DINAMIZACIóN
03/10/2022. CURSOS E CONGRESOS
O vindeiro 20 de outubro de 2022 terá lugar no Consello da Cultura Galega a vixésimo cuarta edición dos Encontros para a Normalización Lingüística, a nosa cita anual para o debate e a reflexión arredor da normalización do idioma galego. Nesta ocasión o fío condutor será “a arte e a lingua como ferramentas de construción masiva”, polo que terás ocasión de escoitar a diferentes creadoras e creadores do país ofrecendo o seu punto de vista sobre como tecer redes no sector artístico para potenciar a lingua de xeito cooperativo. Con antelación á xornada presencial, difundiremos catro vídeos (os dous primeiros, hoxe mesmo) nos que os/as convidados/as conversan con Nee Barros Neeumatiko e mais con Fran da Lobeira A Lobeira Today para ofrecernos un adianto dos temas que tratarán o 20 de outubro nas respectivas mesas de debate. A matrícula é de balde e as prazas cubriranse por rigorosa orde de inscrición. Podes ampliar información premendo aquí.
03/10/2022. OUTRAS
A Cooperativa Xarda presenta Na Terra Fonda, unha serie audiovisual de 50 minutos, estruturada en cinco capítulos breves, sobre o noso patrimonio toponímico, poñendo o foco nos milleiros de microtopónimos que dan nome aos illotes, pedras ou recunchos que atopamos nos 1.720 km que conforman a costa a galega. Neste momento xa están dispoñibles os dous primeiros capítulos (capítulo 1; capítulo 2), e os restantes iranse publicando na mesma canle de Youtube cunha periodicidade semanal.
03/10/2022. DINAMIZACIóN
A Real Academia Galega presenta A orixe da nosa lingua guapa, unha curtametraxe de ficción, con trazos de realidade, sobre a orixe do idioma galego, dirixida a alumnado de infantil e primaria. O filme, dirixido por Damián Varela e baseado nunha idea orixinal da académica Fina Casalderrey, está protagonizado polo alumnado do CPI Santa Lucía de Moraña. Con esta peza audiovisual a RAG inaugura, no marco do proxecto Primavera das Letras, a sección web "Lingua Guapa", onde se irán compilando diferentes recursos didácticos e lingüísticos dirixidos á rapazada. Podes ampliar información premendo aquí.
30/09/2022. AXUDAS E PREMIOS
Sopa Verde, do CEIP Albeiros de Lugo; O Camiño, do CEE Miño de Ourense; e Un conto cheo de lobos, do CEIP Manuel Villar Paramá da Estrada foron os traballos galardoados na décima edición dos Premios a curtas de animación en galego “Nós tamén creamos!”. Trátase dunha iniciativa promovida pola Secretaría Xeral de Política Lingüística e a Dirección Xeral de Ordenación e Innovación Educativa, en colaboración coa Corporación Radio e Televisión de Galicia e OQO editora, co obxectivo de fomentar a creatividade en galego e o uso das TIC entre o alumnado de educación infantil e primaria. Para ampliar información, preme aquí.
30/09/2022. DINAMIZACIóN
O Campus Terra e o Servizo de Normalización Lingüística da Universidade de Santiago de Compostela presentan a quinta edición de “DivulgaT. Petiscos de divulgación científica”, unha iniciativa deseñada para promover a utilización do galego como ferramenta para a comunicación científica e para darlle visibilidade ao traballo desenvolvido polos investigadores/as do Campus de Lugo, a través de charlas divulgativas de 10 minutos de duración. As sesións terán lugar os días 22 e 29 de novembro de 2022, a partir das 19:30 h, na Casa do Saber (Praza Pío XII, Lugo). A asistencia é de balde. O prazo de inscrición para os participantes remata o vindeiro 23 de outubro.
29/09/2022. DINAMIZACIóN
O Servizo de Normalización Lingüística da Mancomunidade de Ferrolterra organiza varias actividades arredor do Día do Orgullo Neofalante, celebración para a que se escolleu o 1 de outubro por ser a data de nacemento de Andrés do Barro.
A programación céntrase na creación musical en galego e xa comezou a xirar polos distintos concellos que o integran: Cabanas, Valdoviño, Ares, Mugardos e Neda.
A programación céntrase na creación musical en galego e xa comezou a xirar polos distintos concellos que o integran: Cabanas, Valdoviño, Ares, Mugardos e Neda.
29/09/2022. OUTRAS
Hoxe, 29 de setembro de 2022, vai ter lugar a segunda edición da G-Night, evento que se desenvolverá simultaneamente en preto de 400 cidades de Europa por iniciativa da Unión Europea.
As tres universidades galegas, xunto con outros sete organismos de investigación, mobilizarán de novo milleiros de persoas ás 70 actividades que se van distribuír por trinta espazos localizados en Vigo, Ourense, Pontevedra, Santiago, A Coruña, Ferrol e Lugo. Entre elas, algunhas centradas nas linguas e as tecnoloxías.
As tres universidades galegas, xunto con outros sete organismos de investigación, mobilizarán de novo milleiros de persoas ás 70 actividades que se van distribuír por trinta espazos localizados en Vigo, Ourense, Pontevedra, Santiago, A Coruña, Ferrol e Lugo. Entre elas, algunhas centradas nas linguas e as tecnoloxías.
29/09/2022. OUTRAS
O Bosque da Lingua foi o escenario escollido para a presentación do libro O Herbario de Rosalía, un estudo sobre as plantas recollidas na obra de Rosalía de Castro ao que contribuíron a filóloga María López Sández, a bióloga Mabel Fraga e o fotógrafo Miguel Fraga.
Ademais, na honra da escritora galega universal, plantouse unha camelia, arbusto favorito de Rosalía.
Ademais, na honra da escritora galega universal, plantouse unha camelia, arbusto favorito de Rosalía.
27/09/2022. CURSOS E CONGRESOS
Os servizos de normalización lingüística dos concellos de Ames, Carballo, Santiago, Pontevedra e Teo organizan, no marco do proxecto Enreguéifate, un curso de formación para docentes que queiran comezar ou continuar coa regueifa como ferramenta educativa. As sesións terán lugar no Espazo Apego de Santiago de Compostela o 14 de outubro de 2022. O prazo de inscrición remata o vindeiro 6 de outubro. Podes obter máis información sobre o programa do curso e os trámites de inscrición premendo aquí.
27/09/2022. DINAMIZACIóN
O Servizo de Normalización Lingüística e o Departamento de Mocidade do Concello de Ames convocan a terceira edición do Certame Galetiktokers, dirixido a mozas e mozos a partir de 13 anos, co obxectivo de estimular a creatividade e fomentar a creación de vídeos en galego entre a mocidade, nomeadamente entre a comunidade da rede social TikTok. Os vídeos deben ser de creación propia, ser difundidos a través da aplicación TikTok ou da sección Reels de Instagram, ter unha duración de entre 15 e 60 segundos, e estar en lingua galega (con presenza oral, escrita ou musical). Outorgaranse seis premios de 300 euros . O prazo de inscrición remata o 21 de outubro de 2022. Para ampliar información, preme aquí.
26/09/2022. AXUDAS E PREMIOS
O 5 de outubro, no Pazo da Cultura de Pontevedra, os Premios Martín Códax da Música van recoñecer a Fuxan os Ventos co seu galardón honorífico por seren para a cultura e a lingua galegas un proxecto pioneiro e histórico.
Cando se cumpren 50 anos da súa creación, este premio únese ás moitas homenaxes recibidas durante 2022 polo éxito e a dimensión social das súas creacións, vinculadas á canción protesta e tamén á Galicia rural.
Cando se cumpren 50 anos da súa creación, este premio únese ás moitas homenaxes recibidas durante 2022 polo éxito e a dimensión social das súas creacións, vinculadas á canción protesta e tamén á Galicia rural.
23/09/2022. DINAMIZACIóN
A Compañía de Radio Televisión de Galicia convoca a segunda edición do Concurso #DígochoEu, dirixido a centros escolares de Galicia (educación primaria e secundaria), ou de fóra de Galicia que impartan a materia de lingua galega. O profesorado interesado en participar debe enviar un bosquexo de guión para un capítulo do #DígochoEu dunha duración inferior a 1 minuto, usando a lingua galega e contando coa participación activa do alumnado. Tras seleccionar as 14 propostas máis orixinais e creativas, o equipo do #DígochoEu elaborará o guión definitivo e acudirá ao centro para gravar o programa. Unha vez emitidos todos os episodios (previsiblemente en maio de 2023), un xurado profesional independente outorgará tres premios (de 500, 300 e 200 euros) en cada unha das categorías (primaria e secundaria). O prazo de presentación de propostas remata o 28 de outubro de 2022. Podes consultar as bases completas e obter máis información sobre os trámites de inscrición, premendo aquí.
22/09/2022. CURSOS E CONGRESOS
Con motivo da celebración do Día Europeo das Linguas, o Consello de Cultura Galega, o Instituto Etzxepare, o Institut Ramon Llull e o Instituto Cervantes organizan a xornada Todas as voces a voz. Poesía en español, catalán, eúscaro, galego e alemán, que se realizará na sede do Instituto Cervantes de Frankfurt o próximo día 26 de setembro de 2022.
21/09/2022. DINAMIZACIóN
O Centro de Desenvolvemento Rural O Viso retoma este curso Educación Infantil Familiar, unha contribución á parentalidade positiva que ofrece servizos socieducativos e unha rede de apoio familiar, na liña do exitoso proxecto xa desaparecido Preescolar na Casa. Entre os seus obxectivos mantén, por exemplo, o de contribuír ao reforzamento da lingua galega dentro do espazo familiar.
O programa, que se desenvolverá ao longo do curso en diferentes concellos da Comarca da Limia, oriéntase a familias con nenos e nenas de entre cero e seis anos. Se precisas máis información, podes solicitala presencialmente, na rúa Ladeira 21 de Xinzo de Limia; por teléfono, no número 988461571, ou a través do correo electrónico eifoviso@gmail.com.
O programa, que se desenvolverá ao longo do curso en diferentes concellos da Comarca da Limia, oriéntase a familias con nenos e nenas de entre cero e seis anos. Se precisas máis información, podes solicitala presencialmente, na rúa Ladeira 21 de Xinzo de Limia; por teléfono, no número 988461571, ou a través do correo electrónico eifoviso@gmail.com.
21/09/2022. AXUDAS E PREMIOS
A Coordinadora de Traballadores/as de Normalización da Lingua (CTNL) convoca a cuarta edición dos Premios Mil Primaveras a proxectos de posta en valor e fomento do galego, co obxectivo de recoñecer e difundir exemplos de boas prácticas no ámbito da normalización lingüística. Poderán presentarse accións, campañas, programas e proxectos destinados ao incremento do prestixio do galego e á promoción do seu uso, desenvolvidas total ou parcialmente en 2019, 2020, 2021 ou 2022. Como novidade con respecto ás edicións anteriores, o xurado outorgará un máximo de catro premios, sen establecer ningún tipo de categoría nin xerarquía entre eles. O prazo para a inscrición dos proxectos, que debe ser realizada pola propia entidade ou persoa organizadora da iniciativa, remata o 31 de xaneiro de 2023. Podes consultar o texto completo da convocatoria premendo aquí.
20/09/2022. AXUDAS E PREMIOS
A Asociación Álvaro das Casas fixo públicos os galardoados da décimo cuarta edición dos Premios Bacelos de Prata, pensados para recoñecer o labor de empresas que apostan polo galego como marca de calidade na etiquetaxe dos seus produtos. As entidades galardoadas nesta edición son a Adega Terras Bendaña, da denominación de orixe Ribeira Sacra; e a Adega Celme, da denominación de orixe Ribeiro. Os premios entregaranse o 15 de outubro de 2022, no Pazo Ulloa de Esposende (Ribadavia).
19/09/2022. CURSOS E CONGRESOS
O Consello da Cultura Galega organiza a xornada "Realidade e perspectivas de futuro dos medios de comunicación en galego en soporte papel", durante a que se abordarán a súa situación actual, a súa resistencia e a súa adaptación nun contexto fortemente marcado pola dixitalización e pola crise económica. Tamén haberá espazo para presentar diversos modelos xornalísticos e outros tipos de publicacións en papel promovidas polas novas xeracións.
Para esta actividade, que vai ter lugar o 10 de outubro, a inscrición é gratuíta e as prazas limitadas.
Para esta actividade, que vai ter lugar o 10 de outubro, a inscrición é gratuíta e as prazas limitadas.
19/09/2022. CURSOS E CONGRESOS
A Área de Normalización Lingüística da Universidade de Vigo convoca, para o primeiro cuadrimestre do curso 2022-2023, seis cursos de temáticas diversas: iniciación á lingua galega para o alumnado estranxeiro, outro de nivel avanzado para perfeccionar o dominio da lingua, outro para mellorar a calidade lingüística nos TFG ou TFM, un sobre corrección da escrita coas TIC, outro de linguaxe administrativa e xurídica e un sexto que xirará arredor dos erros máis frecuentes na lingua galega.
Estes cursos están abertos tanto ao persoal docente e investigador, como ao persoal de administración e servizos e o estudantado. O prazo de matrícula remata o 23 de setembro. Máis información aquí.
Estes cursos están abertos tanto ao persoal docente e investigador, como ao persoal de administración e servizos e o estudantado. O prazo de matrícula remata o 23 de setembro. Máis información aquí.
19/09/2022. CURSOS E CONGRESOS
O Servizo de Normalización Lingüística da USC abre a matrícula da 1ª convocatoria do seu Curso de Habilidades Comunicativas para o período lectivo 2022-2023. O curso diríxese a alumnado que prepara o seu TFG, TFM ou tese e pode cursarse íntegro ou por módulos: A redacción científica, Falar en público e Presentacións eficientes.
Máis información sobre o contido e a inscrición na súa páxina web.
Máis información sobre o contido e a inscrición na súa páxina web.
16/09/2022. DINAMIZACIóN
O Servizo de Normalización Lingüística do Concello de Redondela está a desenvolver o proxecto “A memoria da estirpe”, unha iniciativa dirixida aos centros de día do municipio que ten como obxectivo, a través de entrevistas individualizadas, recuperar e poñer en valor o patrimonio oral que atesouran as persoas maiores. O proxecto divídese en cinco áreas de traballo: antropoloxía, toponimia, memoria fotográfica, léxico e música. Toda esta información contribuirá a recuperar a historia e o patrimonio cultural de Redondela e a maiores, o SNL colaborará coa Universidade de Santiago de Compostela e mais coa Real Academia Galega cedendo os datos obtidos sobre léxico dialectal e microtoponimia. Podes ampliar información premendo aquí.
16/09/2022. DINAMIZACIóN
A Secretaría Xeral de Política Lingüística da Xunta de Galicia presenta “Novas músicas en galego”, un ciclo de concertos que terán lugar no Monte do Gozo, os días 24 e 25 de setembro, no marco do festival Go!Go!Zo! Xacobeo 21-22. Con esta iniciativa trátase de poñer en valor o talento das novas xeracións de mozos e mozas que fan música en galego. No ciclo participarán 18 bandas emerxentes procedentes das escolas Rock School da Coruña e A Casa do Rock de Santiago de Compostela. Podes ampliar información no Portal da Lingua Galega.
16/09/2022. DINAMIZACIóN
A Comisión de Normalización Lingüística da Facultade de Veterinaria da USC, co apoio do Servizo de Normalización Lingüística, convoca o Trivigal 2022, unha partida de trivial en galego que se desenvolverá o vindeiro 28 de setembro, a partir das 19 h na Cafetaría da Facultade de Veterinaria. O equipo gañador recibirá como premio un lote de produtos galegos e mais un exemplar do xogo de mesa “Ti non es de aquí?”. A inscrición estará aberta ata o 27 de setembro ás 14 h. Para consultar o texto completo da convocatoria preme aquí.
15/09/2022. DINAMIZACIóN
Co gallo da conmemoración, o vindeiro 26 de setembro, do Día Europeo das Linguas, a Secretaría Xeral de Política Lingüística da Xunta de Galicia presenta o proxecto audiovisual “De aquí para alá”, realizado por Lydia Botana. Trátase dun repertorio musical de 21 cancións, dirixido ao público infantil, ás súas familias e á comunidade educativa, que lles permitirá aos máis pequenos da casa achegarse á diversidade cultural e lingüística do planeta a través da música. Os 14 capítulos que compoñen a serie iranse publicando cunha periodicidade semanal, polo que cada mércores teremos accesible en liña unha nova entrega. Para ampliar información, preme aquí.
15/09/2022. OUTRAS
Apple acaba de lanzar IOS 16, o novo software que permite que o teu iPhone poida ler texto nos diferentes idiomas oficiais de España, entre eles o galego. Trátase concretamente dunha función de accesibilidade, polo que todas aquelas persoas que o precisen, a partir de agora terán dispoñible a voz “Carmela” para lerlles contido en galego. Podes atopar esta función en Axustes>Accesibilidade>Contido lido>Voces. Este primeiro paso abre as portas a que nunha futura versión se engada a función de comprensión ante ordes de voz, para que Siri sexa quen, por fin, de falarnos e entendernos en galego.
14/09/2022. OUTRAS
Xa podes consultar en liña a Biblioteca Fantástica Dixital, unha iniciativa da cooperativa Sacaúntos desenvolvida ao abeiro do Fondo de Proxectos Culturais Xacobeo 2021-2022. Dentro do seu proxecto de dixitalización dos clásicos da literatura fantástica editados por Urco, agora poñen de balde ao dispor da cidadanía unha primeira entrega de catorce obras de Robert E. Howard e de Jack London, en formato ePub, traducidas ao galego. Xunto con cada volume, atoparás tamén materiais complementarios orientados á docencia.
14/09/2022. CURSOS E CONGRESOS
A Facultade de Educación e Traballo Social do campus de Ourense continúa coa proposta Aula Aberta de Educación, un programa posto en marcha o curso pasado co dobre obxectivo de fomentar o uso do galego e a reflexión crítica sobre temas de interese social.
Por unha parte, este espazo contribúe a desenvolver o plan de normalización do uso da lingua galega que ten a Facultade de Educación e Traballo Social nos seus graos de Educación Infantil e de Educación Primaria. Pola outra, pon o foco en aspectos moitas veces invisibilizados na sociedade que, como futuros educadores e educadoras, o alumnado da facultade vai atopar nas aulas.
Podes consultar o programa e as datas das sesións premendo aquí.
Por unha parte, este espazo contribúe a desenvolver o plan de normalización do uso da lingua galega que ten a Facultade de Educación e Traballo Social nos seus graos de Educación Infantil e de Educación Primaria. Pola outra, pon o foco en aspectos moitas veces invisibilizados na sociedade que, como futuros educadores e educadoras, o alumnado da facultade vai atopar nas aulas.
Podes consultar o programa e as datas das sesións premendo aquí.
13/09/2022. DINAMIZACIóN
As comisións de normalización lingüística das facultades de Ciencias, Enfermaría, Farmacia, Medicina, Óptica, Psicoloxía e Veterinaria da Universidade de Santiago de Compostela, co apoio do Servizo de Normalización Lingüística, convocan o VII Concurso de subtitulación de vídeos TED de ciencias da saúde ao galego. O obxectivo do certame é contribuír á creación de recursos divulgativos en galego en novos soportes na área de ciencias da saúde. Existen dúas modalidades de participación, unha dirixida a membros da comunidade universitaria da USC que non pertenzan á comunidade TED (modalidade A) e outra destinada a membros da comunidade TED (modalidade B). Os participantes da modalidade A terán a posibilidade de inscribirse nun obradoiro formativo. Outorgaranse varios premios cunha dotación económica que vai desde os 150 aos 300 euros, ademais dun diploma honorífico. Para consultar as bases completas do certame, preme aquí.
12/09/2022. CURSOS E CONGRESOS
A Coordinadora de Traballadores/as de Normalización da Lingua organiza o curso "Fundamentos de márketing e comunicación. O idioma como elemento diferenciador", dirixido especialmente a técnicos/as de SNL; docentes ou responsables de EDNLG; traballadores/as de empresas, asociacións e outras entidades relacionadas coa normalización da lingua; e, en xeral, persoas interesadas en traballar na normalización do galego. O curso, impartido por Xosé Luís Reza, terá lugar en Santiago de Compostela os días 29 de setembro e 6 de outubro de 2022. O prazo de inscrición remata o vindeiro 25 de setembro. Podes ampliar información sobre os contidos e mais os trámites de inscrición premendo aquí.
09/09/2022. DINAMIZACIóN
Aulas Galegas acaba de poñer ao dispor de toda a comunidade educativa a súa axenda escolar para o curso 2022-2023, que ademais de axudarche a organizar as tarefas deste novo curso que comeza, tamén che ofrece a posibilidade de achegarte a unha selección de música de actualidade en lingua galega, elaborada polo profesor Fernando Fernádez Rego. A axenda podes descargala, totalmente de balde e baixo licenza CC, en formato dixital ou para imprimir en papel. Como complemento, tamén tes ao teu dispor os calendarios escolares, en formato anual, trimestral e mensual. Para ampliar información sobre esta iniciativa, preme aquí.