A Delegación xeral para a lingua francesa e as linguas de Francia, en colaboración coa Rede panlatina de terminoloxía (Realiter), presenta o Vocabulario panlatino do dixital: ataques e devasas, unha obra terminográfica na que se ofrecen solucións para 100 conceptos claves relacionados cos erros e problemas detectados no eido da informática, a telefonía e Internet. Xunto co termo e a definición en francés, preséntanse as correspondencias nas seguintes linguas: catalán, español, galego, italiano, portugués, romanés e inglés. De elaborar as correspondencias para o galego ocupáronse Manuel Núñez Singala e Xusto Rodríguez Río, do Servizo de Normalización Lingüística da Universidade de Santiago de Compostela.
17/10/2022. OUTRAS
17/10/2022.
O alumnado de bacharelato de catro centros de ensino medio da comarca de Ferrolterra (IES Carvalho Calero, IES Concepción Arenal, IES Sofia Casanova e IES Punta Candieira) está a participar estes días no proxecto "Laboratorio de Apoderamento Lingüístico", un proxecto piloto de dinamización do uso do galego e de xestión do conflito lingüístico na mocidade, desenvolvido pola cooperativa Rexenerando ao abeiro do Fondo de Proxectos Culturais Xacobeo 21-22. Os principais obxectivos do programa son a creación de espazos seguros para o uso do galego, a análise dos prexuízos existentes arredor do idioma propio e o deseño de prototipos de intervencións dinamizadoras para a creación dunha comunidade de activistas a prol do galego formada polos propios mozos e mozas participantes. Entre os días 13 e 27 de outubro o alumnado terá ocasión de traballar en grupo cos compañeiros/as de aula e posteriormente, o 11 de novembro, terá lugar un encontro intercentros para expor as propostas e recursos compilados. O programa rematará cun acto de peche, o 29 de novembro, onde se proxectará un vídeo resumo e se presentarán os resultados á comunidade educativa e ao conxunto da sociedade. Podes manterte ao tanto do desenvolvemento desta iniciativa a través da conta de instagram @laboratorio_lingua.
14/10/2022. DINAMIZACIóN
Docentes de Português na Galiza e AGAL organizan Perdidos e achados'22. Trátase dun concurso dirixido a alumnado de 3º da ESO a 2º de bacharelato, que consiste en localizar palabras galegas en desuso coincidentes co código internacional da lingua portuguesa. O obxectivo, recuperarmos e reaprendermos palabras perdidas a través da mocidade, dun xeito divertido e atractivo, así como aumentar a presenza da nosa lingua nas redes sociais.
O prazo para participar remata o 30 de novembro. Consulta as bases completas.
O prazo para participar remata o 30 de novembro. Consulta as bases completas.
13/10/2022. CURSOS E CONGRESOS
O Instituto da Lingua Galega da Universidade de Santiago de Compostela e o Centro de Línguas, Literaturas e Culturas da Universidade de Aveiro organizan, o 14 de novembro de 2022, a I Xornada sobre Variación e Cambio Lingüístico, un encontro que reunirá investigadores e investigadoras para promover e difundir os estudos sobre a variación e o cambio lingüístico nas linguas románicas.
A data límite de inscrición é o 10 de novembro. Podes consultar o programa e información adicional na páxina do ILG.
A data límite de inscrición é o 10 de novembro. Podes consultar o programa e información adicional na páxina do ILG.
13/10/2022. DINAMIZACIóN
A Área de Normalización Lingüística da Deputación da Coruña botou a andar Un outono cheo de letras, campaña destinada á promoción do libro e a lectura en galego.
Esta iniciativa vai lanzando diariamente nas redes microentrevistas con diferentes actores sociais, vídeos divulgativos e entradas que mostran a importancia de termos unha lingua que nos permite construír unha visión propia do mundo. Ademais, ten en marcha un concurso: aquelas persoas que compartan post da campaña entrarán no sorteo de 10 bonos-libros a canxear en calquera libraría da provincia da Coruña.
A actividade remata o 24 de outubro de 2022, Día das Bibliotecas. Para obter máis información, preme aquí.
Esta iniciativa vai lanzando diariamente nas redes microentrevistas con diferentes actores sociais, vídeos divulgativos e entradas que mostran a importancia de termos unha lingua que nos permite construír unha visión propia do mundo. Ademais, ten en marcha un concurso: aquelas persoas que compartan post da campaña entrarán no sorteo de 10 bonos-libros a canxear en calquera libraría da provincia da Coruña.
A actividade remata o 24 de outubro de 2022, Día das Bibliotecas. Para obter máis información, preme aquí.
11/10/2022. OUTRAS
A asociación Axuntar presentou o pasado sábado, 8 de outubro de 2022, no concello de Boal (Asturias) o Informe lingüístico del Eo-Navia. Sen fronteiras: galego de Asturias. Trátase dun documento divulgativo que achega datos históricos sobre a realidade lingüística do Eo-Navia e sobre a situación sociolingüística actual desta comarca. O informe tamén trata o tema dos prexuízos lingüísticos e a percepción que os propios falantes de galego teñen da súa lingua, e valora as políticas deseñadas polas autoridades gobernamentais e lingüísticas asturianas en relación ao "galego de Asturias". Na canle de Youtube de Axuntar tes ao teu dispor catro vídeos coas intervencións dos participantes no acto de presentación deste informe.
11/10/2022. CURSOS E CONGRESOS
A Comisión de Normalización Lingüística da Facultade de Ciencias da Educación da Universidade de Santiago organiza a XV Xornada "Os recursos educativos en galego”, que terá lugar o 3 de novembro de 2022 na Facultade de Ciencias da Educación da USC. Nesta edición o fío condutor das diferentes intervencións serán os recursos didácticos vinculados tematicamente co Camiño de Santiago. A xornada está dirixida a alumnado, PDI e PAS das universidades galegas, que ten de prazo para inscribirse ata o 31 de outubro de 2022.
10/10/2022. DINAMIZACIóN
A Coordinadora de Traballadores/as de Normalización da Lingua organiza unha nova edición do LGx15, un proxecto pensado para difundir, a través de charlas breves e amenas, argumentos e experiencias inspiradoras para o futuro do galego. Nesta ocasión os participantes serán Olaia Maneiro (Tanxugueiras), Pedro González Boquete, Fátima Barros, Beatriz Busto Miramontes, Padrorua e Fabiana Ambroa Ibarruri, Isaac González, Elsa Quintas Alborés e Guido Álvarez Parga. Da presentación e da música encargarase Lois Pérez. O acto terá lugar o 27 de outubro de 2022, ás 18 h, na Sala Capitol (Santiago de Compostela). Podes conseguir xa a túa entrada, a través da venda anticipada, premendo aquí.
10/10/2022. DINAMIZACIóN
Os servizos de normalización lingüística dos concellos de Ames, Carballo, Pontevedra, Santiago de Compostela e Teo presentaron a sexta edición do certame Enreguéifate, unha iniciativa deseñada para difundir a regueifa como forma de improvisación oral e para promover o uso do idioma galego. O certame inclúe dúas categorías, unha xeral (na que pode participar calquera persoa) e outra escolar (dirixida ao alumnado do ensino non universitario). Para participar cómpre enviar un vídeo, dunha duración máxima de 3 minutos, no que aparezan, cando menos, dúas persoas regueifando en galego. O xurado outorgará diferentes premios, de carácter simbólico, que incluirán o recoñecemento e difusión do traballo. O prazo para enviar os vídeos comeza o 10 de novembro de 2022 e remata o 10 de marzo de 2023.
10/10/2022. DINAMIZACIóN
A Asociación Socio-Pedagóxica Galega organiza unha nova edición deste certame, dirixido á comunidade educativa, co obxectivo de normalizar o uso oral do galego e contribuír a que este idioma se converta en instrumento normal de comunicación e creación de historias no ámbito educativo. Os participantes poderán contar historias en galego, de base popular, de base literaria ou de creación propia, durante un tempo máximo de cinco minutos. Na fase final o xurado outorgará un primeiro premio de 250 euros e, se o considerase oportuno, un segundo de 150 euros. Os centros de ensino dos participantes premiados tamén recibirán un premio do mesmo importe. O prazo para realizar a inscrición remata o vindeiro 14 de novembro de 2022.
Para acceder ás bases completas do concurso e mais á ficha de inscrición, preme aquí.
Para acceder ás bases completas do concurso e mais á ficha de inscrición, preme aquí.
10/10/2022. DINAMIZACIóN
A Mesa pola Normalización Lingüística, a través da súa delegación de Monforte de Lemos, está a desenvolver unha campaña de promoción do uso do galego no ámbito da pediatría. A principal acción desta iniciativa consiste na difusión de adhesivos con fraseoloxía galega adaptada á poboación infantil que acode á consulta de pediatría. As láminas cos deseños, elaborados por doce ilustradores/as lugueses, repartiranse nos servizos de pediatría dos ambulatorios do sur de Lugo, para que os máis pequenos/as poidan gozar destas mensaxes de apoio en lingua galega. No Xornal de Lemos podes ampliar información sobre esta campaña.
07/10/2022. AXUDAS E PREMIOS
Galiza Nova convoca o seu primeiro certame de TikTok, co obxecto de visibilizar a comunidade galegofalante nesta plataforma e promover o diálogo arredor dos motivos, as experiencias ou as reflexións que levan ás persoas usuarias a decidir usar a lingua galega nas redes sociais.
Para quen teña interese en presentarse, non hai restriccións de idade e o prazo para subir os vídeos remata o domingo 16 de outubro de 2022 ás 23:59 h. Máis información aquí.
Para quen teña interese en presentarse, non hai restriccións de idade e o prazo para subir os vídeos remata o domingo 16 de outubro de 2022 ás 23:59 h. Máis información aquí.
07/10/2022. AXUDAS E PREMIOS
A Consellería de Cultura, Educación, Formación Profesional e Universidades publica, no DOG do 4 de outubro de 2022, a listaxe de obras subvencionadas con axudas á tradución para outras linguas de obras publicadas orixinariamente en galego e á tradución para o galego de obras publicadas orixinariamente noutras linguas. Podes consultar o texto completo da resolución premendo aquí.
06/10/2022. CURSOS E CONGRESOS
Mañá venres, 7 de outubro de 2022, darán comezo as xornadas “Bueu e a fala: o galego 3.0”, que se estenderán ata o domingo 9 de outubro, co obxectivo de presentar iniciativas exitosas que usan o galego como lingua vehicular nos ámbitos do audiovisual, da industria do videoxogo e mais das redes sociais. Ao remate terá lugar a galega de premios do certame “Mergullándonos no TikTok”. Podes ampliar información premendo aquí.
06/10/2022. CURSOS E CONGRESOS
O Servizo de Normalización Lingüística do Concello de Vigo organiza un obradoiro de escrita creativa en galego, dirixo a todas as persoas que senten pracer pola literatura e queren coñecer ferramentas para poder iniciar a creación dun texto literario. O curso, impartido por María Lado Lariño, desenvolverase ao longo de varios sesións, durante os meses de outubro e novembro de 2022, no edificio Mar de Vigo. Para obter máis información sobre esta iniciativa, así como sobre os trámites de inscrición, preme aquí.
05/10/2022. CURSOS E CONGRESOS
O vindeiro 20 de outubro de 2022 terá lugar no Consello da Cultura Galega a vixésimo cuarta edición dos Encontros para a Normalización Lingüística, a nosa cita anual para o debate e a reflexión arredor da normalización do idioma galego. Nesta ocasión o fío condutor será “a arte e a lingua como ferramentas de construción masiva”, polo que terás ocasión de escoitar a diferentes creadoras e creadores do país ofrecendo o seu punto de vista sobre como tecer redes no sector artístico para potenciar a lingua de xeito cooperativo.
Con antelación á xornada presencial, Nee Barros Neeumatiko e mais Fran da Lobeira A Lobeira Today conversaron cos convidados/as desta edición, que nos ofrecen un pequeno adianto dos temas que tratarán o 20 de outubro nas respectivas mesas de debate.
Con antelación á xornada presencial, Nee Barros Neeumatiko e mais Fran da Lobeira A Lobeira Today conversaron cos convidados/as desta edición, que nos ofrecen un pequeno adianto dos temas que tratarán o 20 de outubro nas respectivas mesas de debate.
05/10/2022. CURSOS E CONGRESOS
O Departamento de Lingua Galega do Concello de Santiago de Compostela organiza un obradoiro de carácter práctico, de tres horas de duración, dirixido a nais e pais que desexen coñecer e probar materiais educativos útiles para a crianza en galego. As sesións terán lugar os días 10 e 24 de outubro de 2022, de 17:30 a 19 h, no Espazo Apego, en Santiago. Para obter máis información sobre a iniciativa, así como sobre os trámites de inscrición, preme aquí.
05/10/2022. AXUDAS E PREMIOS
O xurado dos Premios da Cultura Galega fixo públicas as persoas, colectivos ou iniciativas que son recoñecidas este ano 2022 polo seu labor no ámbito da creación, conservación e difusión cultural. Na categoría de Lingua o galardoado foi o catedrático de Filoloxía Románica da Universidade de Santiago de Compostela e membro da Real Academia Galega Manuel González González, pola súa dedicación ao estudo, defensa e promoción do idioma galego. Nas restantes categorías, os/as premiados/as son Marica Campo (Letras), María Victoria Carballo-Calero (Artes Plásticas), Melania Cruz (Artes Escénicas), os Cursos Universitarios Internacionais "Música en Compostela" (música), Xosé Ramón Gayoso (Audiovisual), a Asociación Cultural Xacarandaina (Patrimonio Cultural) e o programa de divulgación científica ConCiencia (Proxección Exterior). Para ampliar esta información, preme aquí.
04/10/2022. EMPREGO
O Concello de Ames, a través do programa de formación da Fundación Empresa-Universidade Galega (FEUGA), convoca unha bolsa para realizar prácticas no seu Servizo de Normalización Lingüística. Poden presentarse todas aquelas persoas que teñan o título de grao en Lingua e Literatura Galegas, posúan coñecementos sobre o manexo de procesadores de texto e teñan o carné de conducir. A duración da bolsa será de doce meses. O prazo para presentar as solicitudes remata o 21 de outubro, ás 14:00 horas. Para ampliar información, preme aquí.
04/10/2022. AXUDAS E PREMIOS
O Parlamento de Galicia, a Secretaría Xeral de Política Lingüística e o Foro Enrique Peinador entregaron onte, 3 de outubro de 2022, na sede do Parlamento galego os XXVIII Premios Publicidade en Galego. Nesta edición, na categoría de televisión resultou galardoado o anuncio "Vai escampar", elaborado pola axencia Quattro IDCP para R Cable e Telecable Telecomunicacións. Na categoría de radio, recibiu o premio o proxecto "Abre na rede", tamén da axencia Quattro IDCP, neste caso para a Asociación PuntoGal. Na categoría de Internet, premiouse o anuncio "Treixadura-Modo Ribeiro", da axencia Nasas para o Consello Regulador Denominación de Orixe Ribeiro. A campaña "A auga en Vigo é de alta calidade", elaborada pola axencia Ecovigo Publicidade para Aqualia, recibiu o galardón na categoría de prensa escrita. Pola súa parte, o CIFP Leixa de Ferrol foi galardoado na categoría de centro educativo polo seu proxecto "Cambio climático". A maiores, o xurado acordou por unanimidade outorgarlle unha mención de honra á empresa Sistemas de Seguridade A1, polo seu uso continuado do galego na comunicación publicitaria. Podes obter máis información premendo aquí.
04/10/2022. DINAMIZACIóN
O Concello de Bueu convoca o certame "Mergullándonos no TikTok", co obxectivo de fomentar o uso do galego entre a mocidade nos espazos de lecer e tempo libre, nomeadamente, nas redes sociais. Pode participar toda a poboación moza (ou que se sinta moza), de máis de 18 anos. Para facelo cómpre subir un vídeo de TikTok en galego de temática libre co cancelo #SeVouATikTok, mencionando a @concellodebueu. Tes de prazo para participar ata o vindeiro venres, 7 de outubro. O xurado seleccionará tres gañadores/as que recibirán diferentes premios de carácter tecnolóxico nunha gala que terá lugar o 9 de outubro en Bueu. Para consultar as bases completas do certame, preme aquí.
03/10/2022. CURSOS E CONGRESOS
O vindeiro 20 de outubro de 2022 terá lugar no Consello da Cultura Galega a vixésimo cuarta edición dos Encontros para a Normalización Lingüística, a nosa cita anual para o debate e a reflexión arredor da normalización do idioma galego. Nesta ocasión o fío condutor será “a arte e a lingua como ferramentas de construción masiva”, polo que terás ocasión de escoitar a diferentes creadoras e creadores do país ofrecendo o seu punto de vista sobre como tecer redes no sector artístico para potenciar a lingua de xeito cooperativo. Con antelación á xornada presencial, difundiremos catro vídeos (os dous primeiros, hoxe mesmo) nos que os/as convidados/as conversan con Nee Barros Neeumatiko e mais con Fran da Lobeira A Lobeira Today para ofrecernos un adianto dos temas que tratarán o 20 de outubro nas respectivas mesas de debate. A matrícula é de balde e as prazas cubriranse por rigorosa orde de inscrición. Podes ampliar información premendo aquí.
03/10/2022. OUTRAS
A Cooperativa Xarda presenta Na Terra Fonda, unha serie audiovisual de 50 minutos, estruturada en cinco capítulos breves, sobre o noso patrimonio toponímico, poñendo o foco nos milleiros de microtopónimos que dan nome aos illotes, pedras ou recunchos que atopamos nos 1.720 km que conforman a costa a galega. Neste momento xa están dispoñibles os dous primeiros capítulos (capítulo 1; capítulo 2), e os restantes iranse publicando na mesma canle de Youtube cunha periodicidade semanal.
03/10/2022. DINAMIZACIóN
A Real Academia Galega presenta A orixe da nosa lingua guapa, unha curtametraxe de ficción, con trazos de realidade, sobre a orixe do idioma galego, dirixida a alumnado de infantil e primaria. O filme, dirixido por Damián Varela e baseado nunha idea orixinal da académica Fina Casalderrey, está protagonizado polo alumnado do CPI Santa Lucía de Moraña. Con esta peza audiovisual a RAG inaugura, no marco do proxecto Primavera das Letras, a sección web "Lingua Guapa", onde se irán compilando diferentes recursos didácticos e lingüísticos dirixidos á rapazada. Podes ampliar información premendo aquí.
30/09/2022. AXUDAS E PREMIOS
Sopa Verde, do CEIP Albeiros de Lugo; O Camiño, do CEE Miño de Ourense; e Un conto cheo de lobos, do CEIP Manuel Villar Paramá da Estrada foron os traballos galardoados na décima edición dos Premios a curtas de animación en galego “Nós tamén creamos!”. Trátase dunha iniciativa promovida pola Secretaría Xeral de Política Lingüística e a Dirección Xeral de Ordenación e Innovación Educativa, en colaboración coa Corporación Radio e Televisión de Galicia e OQO editora, co obxectivo de fomentar a creatividade en galego e o uso das TIC entre o alumnado de educación infantil e primaria. Para ampliar información, preme aquí.
30/09/2022. DINAMIZACIóN
O Campus Terra e o Servizo de Normalización Lingüística da Universidade de Santiago de Compostela presentan a quinta edición de “DivulgaT. Petiscos de divulgación científica”, unha iniciativa deseñada para promover a utilización do galego como ferramenta para a comunicación científica e para darlle visibilidade ao traballo desenvolvido polos investigadores/as do Campus de Lugo, a través de charlas divulgativas de 10 minutos de duración. As sesións terán lugar os días 22 e 29 de novembro de 2022, a partir das 19:30 h, na Casa do Saber (Praza Pío XII, Lugo). A asistencia é de balde. O prazo de inscrición para os participantes remata o vindeiro 23 de outubro.
29/09/2022. DINAMIZACIóN
O Servizo de Normalización Lingüística da Mancomunidade de Ferrolterra organiza varias actividades arredor do Día do Orgullo Neofalante, celebración para a que se escolleu o 1 de outubro por ser a data de nacemento de Andrés do Barro.
A programación céntrase na creación musical en galego e xa comezou a xirar polos distintos concellos que o integran: Cabanas, Valdoviño, Ares, Mugardos e Neda.
A programación céntrase na creación musical en galego e xa comezou a xirar polos distintos concellos que o integran: Cabanas, Valdoviño, Ares, Mugardos e Neda.
29/09/2022. OUTRAS
Hoxe, 29 de setembro de 2022, vai ter lugar a segunda edición da G-Night, evento que se desenvolverá simultaneamente en preto de 400 cidades de Europa por iniciativa da Unión Europea.
As tres universidades galegas, xunto con outros sete organismos de investigación, mobilizarán de novo milleiros de persoas ás 70 actividades que se van distribuír por trinta espazos localizados en Vigo, Ourense, Pontevedra, Santiago, A Coruña, Ferrol e Lugo. Entre elas, algunhas centradas nas linguas e as tecnoloxías.
As tres universidades galegas, xunto con outros sete organismos de investigación, mobilizarán de novo milleiros de persoas ás 70 actividades que se van distribuír por trinta espazos localizados en Vigo, Ourense, Pontevedra, Santiago, A Coruña, Ferrol e Lugo. Entre elas, algunhas centradas nas linguas e as tecnoloxías.
29/09/2022. OUTRAS
O Bosque da Lingua foi o escenario escollido para a presentación do libro O Herbario de Rosalía, un estudo sobre as plantas recollidas na obra de Rosalía de Castro ao que contribuíron a filóloga María López Sández, a bióloga Mabel Fraga e o fotógrafo Miguel Fraga.
Ademais, na honra da escritora galega universal, plantouse unha camelia, arbusto favorito de Rosalía.
Ademais, na honra da escritora galega universal, plantouse unha camelia, arbusto favorito de Rosalía.
27/09/2022. CURSOS E CONGRESOS
Os servizos de normalización lingüística dos concellos de Ames, Carballo, Santiago, Pontevedra e Teo organizan, no marco do proxecto Enreguéifate, un curso de formación para docentes que queiran comezar ou continuar coa regueifa como ferramenta educativa. As sesións terán lugar no Espazo Apego de Santiago de Compostela o 14 de outubro de 2022. O prazo de inscrición remata o vindeiro 6 de outubro. Podes obter máis información sobre o programa do curso e os trámites de inscrición premendo aquí.