O Servizo de Normalización Lingüística do Concello de Vigo presenta un programa de actividades para celebrar en familia o Samaín. O programa inclúe espectáculos infantís, obradoiros lúdicos e didácticos, actuacións musicais, teatro e contacontos. As actividades desenvolveranse entre o 30 de outubro e o 1 de novembro de 2021 (na Doblada e en Navia), e entre o 12 e o 14 de novembro (en Coia e en Bouzas). Podes consultar o programa completo con todos os horarios premendo aquí.
25/10/2021. DINAMIZACIóN
22/10/2021. CURSOS E CONGRESOS
Desde o CDSG presentámosche o programa dos XXIII Encontros para a Normalización Lingüística, que nesta edición terán un formato mixto (telemático e presencial) e xirarán arredor da transmisión interxeracional da lingua galega. Os vindeiros 25 e 26 de outubro difundiremos en "consellodacultura.gal" unha serie de vídeos nos que adiantamos aqueles contidos de carácter máis teórico ou expositivo. Posteriormente, o 4 de novembro, terá lugar na sede do Consello da Cultura Galega (Santiago de Compostela) a xornada presencial, que tamén será retransmitida en directo a través da nosa canle de Youtube, onde celebraremos catro coloquios con especialistas académicos, profesionais e representantes de colectivos que traballan co sector da infancia. Por suposto, tamén incorporaremos as reflexións do público asistente, tanto desde a propia sala como desde Internet. A matrícula é de balde e as prazas cubriranse por rigorosa orde de inscrición.
22/10/2021. EMPREGO
A Universidade de Santiago de Compostela anuncia a convocatoria pública de contratación de persoal para colaborar en diferentes proxectos de investigación. Entre as prazas ofertadas anúnciase unha con perfil lingüístico para colaborar no proxecto “A lingua das novas xeracións: competencia, cambio lingüístico, actitudes, mantemento e transmisión da lingua”, que se está a desenvolver no Instituto da Lingua Galega. A forma de provisión é o concurso de méritos. A duración do contrato será de cinco meses. O prazo de presentación de solicitudes remata o 26 de outubro de 2021. Para consultar as bases completas da convocatoria, preme aquí.
20/10/2021. DINAMIZACIóN
O Concello de Rianxo, como entidade integrante do Proxecto Apego, publica o álbum “As miñas 25 primeiras palabras”, onde as familias poden deixar reflectidos os primeiros termos que pronuncian os bebés que se crían con apego ao galego. A publicación está promovida de xeito colaborativo polas concellerías de “Educación e Normalización Lingüística” e “Benestar, Igualdade e Diversidade” e diríxese especialmente ás 150 familias de Rianxo que participan na Comunidade do Apego, mais pode descargarse de balde na páxina web do SNL municipal.
20/10/2021. CURSOS E CONGRESOS
A Comisión de Normalización Lingüística da Facultade de Ciencias da Educación da Universidade de Santiago organiza a XIV Xornada "Os recursos educativos en galego”, que nesta edición se centrará nos materiais elaborados no contexto da Covid-19. A xornada, dirixida a alumnado, PDI e PAS das universidades galegas, desenvolverase o 18 de novembro de 2021 mediante videoconferencia a través de Lifesize. O prazo de matrícula remata o 14 de novembro de 2021. Para coñecer o programa ou ampliar información sobre os trámites de inscrición, preme aquí.
19/10/2021. DINAMIZACIóN
O Servizo de Normalización Lingüística do Concello de Redondela, coa colaboración da Asociación de Empresarios de Redondela e a Real Academia Galega, organizan a campaña "Nós Galego 365", deseñada para promover o uso do noso idioma nas panadarías e nos establecementos de venda de pan, así como para fomentar a etiquetaxe en galego como marca de calidade. Ao abeiro desta iniciativa distribuiranse 25.000 sobres de pan e 2.000 bolsas comerciais entre os establecementos colaboradores, convidando a reflexionar sobre o valor do idioma como elemento identificador de produtos de proximidade e calidade. Se queres ampliar información sobre a campaña, preme aquí.
19/10/2021. AXUDAS E PREMIOS
O Servizo de Normalización Lingüística e o Departamento de Promoción Económica do Concello de Ames promoven a cuarta edición do Premio Lingua e Empresa, que ten como obxectivo fomentar o uso do galego na actividade económica municipal e recoñecer publicamente o compromiso das empresas que apostan decididamente polo noso idioma. Poden optar a este premio as empresas que teñan a súa sede social ou un centro de actividade no Concello de Ames. O certame inclúe dúas categorías: unha para aquelas entidades que veñen realizando un uso continuado da lingua galega desde hai máis de dous anos, e outra para as que incorporaron o galego nos últimos dous anos. Outorgarase un premio de 1.500 euros en cada unha das categorías. O prazo de presentación de candidaturas remata o 16 de novembro de 2021. Podes ampliar información premendo aquí.
18/10/2021. DINAMIZACIóN
O Correlingua 2021, iniciativa lúdico-didáctica deseñada para que o alumnado de todos os ciclos educativos reivindique o uso do galego, comezará o vindeiro 20 de outubro baixo o lema “Inmunízate co galego!”. O programa desta edición inclúe oito concertos dirixidos a máis de 1.500 escolares, que se celebrarán polo sistema de "aula burbulla" e tamén serán retransmitidos a través de Youtube. Podes consultar o calendario destas festas concerto, así como ampliar información sobre a iniciativa, premendo aquí.
15/10/2021. DINAMIZACIóN
A Comisión de Normalización Lingüística da Facultade de Medicina e Odontoloxía da USC promove a campaña de normalización lingüística "A boa medicina", deseñada para axudar a desbotar os posibles prexuízos sobre a lingua e cultura galegas, promover o mantemento lingüístico do alumnado galegofalante e sensibilizar sobre a importancia do factor comunicativo no exercicio profesional da medicina. Ademais da campaña de sensibilización que se está a difundir a través da Rede, ao abeiro desta iniciativa desenvolveranse outras accións, como un obradoiro de xestión das linguas nas aulas, un curso de galego para non galegofalantes, un programa de voluntariado lingüístico ou a difusión dunha guía de recursos en liña para estudar medicina en galego. Para ampliar información, preme aquí.
14/10/2021. DINAMIZACIóN
A Asociación Socio-Pedagóxica Galega convoca a undécima edición do seu Certame de curtas, deseñado para promover a creación audiovisual como canle de difusión da lingua e literatura galegas. O certame inclúe dúas categorías, unha xeral e outra destinada especificamente aos centros de ensino. A temática das pezas debe xirar arredor da literatura galega de calquera época. Poden presentarse curtas inéditas ou que fosen estreadas entre o 1 de setembro de 2018 e o 13 de novembro de 2021. O prazo de presentación remata o vindeiro 12 de novembro, ás 14 h. Podes consultar as bases completas do certame premendo aquí.
11/10/2021. CURSOS E CONGRESOS
O Instituto da Lingua Galega da Universidade de Santiago de Compostela, en colaboración co Consello da Cultura Galega e a Consellería de Cultura, Educación e Universidade da Xunta de Galicia, organiza a vixésimo primeira edición do Simposio ILG, que coincide cos 50 anos da fundación da entidade. Por este motivo, nesta ocasión o simposio ten carácter conmemorativo e o programa está deseñado en homenaxe a tres dos seus principais investigadores: Rosario Álvarez Blanco, Francisco Fernández Rei e Manuel González González. As sesións terán lugar entre os días 18 e 21 de outubro de 2021 no Salón de Graos da Facultade de Filoloxía da USC. O prazo de inscrición remata o 18 de outubro ás 12 h.
08/10/2021. DINAMIZACIóN
No marco do programa de actividades en homenaxe a Xela Arias, protagonista das Letras Galegas 2021, o Consello da Cultura Galega presenta en formato sonoro os Contos ao teléfono de Gianni Rodari, preservando a tradución orixinal ao galego de Xela e Valentín Arias. Na páxina web Xela e Gianni atoporás os doce contos de Rodari, dirixidos a público infantil, na voz da narradora oral Charo Pita. A maiores, tamén podes consultar a introdución da profesora da USC Montse Pena Presas, que contextualiza e explica o valor normalizador e pedagóxico que no seu día tivo a tradución ao noso idioma destes contos. O proxecto, realizado coa colaboración dos herdeiros de Gianni Rodari, estará accesible ao público durante un ano. Para ampliar información, preme aquí.
07/10/2021. INVESTIGACIóN
A Real Academia Galega facilita o acceso en liña á publicación Mapa sociolingüístico escolar de Ames, desenvolvida no seo do Seminario de Sociolingüística da RAG en colaboración co Concello de Ames. O obxectivo da investigación era obter unha visión completa do panorama sociolingüístico dos 21 centros educativos, tanto públicos como privados, deste municipio e identificar os factores concretos que están a favorecer a diminución do uso do galego entre os escolares (poboación de 0 a 16 anos). En termos xerais, os datos obtidos constatan unha perda de galegofalantes iniciais (ata un 10%) xa no primiero contacto co ámbito educativo na etapa infantil, e este proceso de substitución lingüística cara ao castelán vai medrando ao longo das diferentes etapas escolares. A radiografía actual amosa datos especialmente preocupantes entre o alumnado de Secundaria, onde o 77% afirma usar "só castelán" ou "máis castelán" como lingua habitual. Para ampliar información, preme aquí.
06/10/2021. CURSOS E CONGRESOS
O Servizo de Normalización Lingüística do Concello de Vigo organiza unha nova edición do Curso de auga doce, deseñado para ampliar o coñecemento da lingua galega (léxico, fraseoloxía, toponimia, lendas...) empregando como fío condutor a auga doce, en concreto, a relación de Vigo cos seus ríos, muíños e bosques de ribeira. O curso, de 20 h de duración, desenvolverase durante os meses de outubro e novembro de 2021 no edificio Mar de Vigo. Para obter máis información sobre os horarios, os contidos e os trámites de inscrición, preme aquí.
04/10/2021. DINAMIZACIóN
O sábado 16 de outubro, ás 18:00 h, terá lugar no Centro Sociocultural de Santa Marta (Santiago de Compostela) unha nova edición do LGx15, iniciativa organizada pola Coordinadora de Traballadores/as de Normalización da Lingua, na que diferentes participantes transmiten argumentos e experiencias para influír no futuro do galego a través de charlas breves e amenas. Nesta ocasión os/as protagonistas serán Alice Piccardi (xornalista), Ana Moreiras (docente e coordinadora de Olloboi), María Vázquez (actriz), Paco Cerdeira Pakolas (músico), Xosé Luís Reza (especialista en márketing) e Agos Reigosa (impulsor de Twich en Galego). O acto será presentado polo escritor e humorista Carlos Meixide. As intervencións serán gravadas e difundiranse, posteriormente, en Internet. As entradas, de carácter gratuíto, poderán reservarse a partir do vindeiro 7 de outubro.
04/10/2021. INVESTIGACIóN
O Concello de Ames e a Real Academia Galega anuncian a presentación da publicación Mapa sociolingüístico escolar de Ames, un estudo de investigación, desenvolvido no seo do Seminario de Sociolingüística da RAG, sobre a realidade sociolingüística (tanto no ámbito escolar como familiar) da poboación de 0 a 18 anos do Concello de Ames. O acto de presentación terá lugar o vindeiro mércores, 6 de outubro, ás 19:00 h, na Casa da Cultura de Bertamiráns. Participarán Blas García (alcalde de Ames), Víctor F. Freixanes (presidente da RAG), Escarlata Pampín (concelleira de Normalización Lingüística de Ames), Henrique Monteagudo (coordinador do Seminario de Sociolingüística da RAG) e Alonso Barreiro (director do CEIP de Barouta). O acceso é libre, mais cómpre confirmar asistencia no correo normalizacion@concellodeames.gal (indicando nome, apelidos e teléfono) antes do 5 de outubro.
29/09/2021. DINAMIZACIóN
A Real Academia Galega e a Secretaría Xeral de Política Lingüística presentan a cuarta edición do programa Toponimízate, que ten como obxectivo preservar e divulgar o patrimonio toponímico galego. No marco desta iniciativa, entre outubro e decembro de 2021 desenvolveranse unha serie de charlas divulgativas en nove concellos galegos (Ortigueira, Triacastela, Carnota, Outeiro de Rei, Meaño, O Barco de Valdeorras, Ribeira, Marín e O Irixo). Os asistentes a estas sesións, que serán impartidas por Vicente Feijoo (técnico do Seminario de Onomástica da RAG) terán ocasión de coñecer a orixe e significado dos nomes de lugar da súa contorna, así como familiarizarse co funcionamento da aplicación colaborativa Galicia Nomeada. Para ampliar información, preme aquí.
28/09/2021. EMPREGO
O Boletín Oficial do Estado publicou hoxe, 28 de setembro de 2021, o anuncio da convocatoria da praza de técnico/a de normalización lingüística no Concello de Carballo. Polo tanto, desde mañá e ata o vindeiro 18 de outubro estará aberto o prazo para presentar as solicitudes de participación neste proceso selectivo. As bases completas da convocatoria, publicadas no BOP da Coruña do 27 de agosto de 2021, podes consultalas premendo aquí.
28/09/2021. CURSOS E CONGRESOS
O Servizo de Normalización Lingüística do Concello de Vigo anuncia diferentes ofertas formativas relacionadas coa oralidade que se desenvolverán no Centro de Interpretación da Oralidade de Vigo durante o primeiro trimestre do curso 2021-2022. Trátase, en concreto, do Curso de improvisación oral en verso, que será impartido por Kike Estévez, e de tres obradoiros sobre narración oral: "Introdución á técnica vocal", "A tradición oral, a narración e a literatura popular como ferramenta de normalización lingüística" e "Os signos contan. Lingua de Signos aplicada á Narración oral".
27/09/2021. DINAMIZACIóN
A Mesa pola Normalización Lingüística presenta a campaña "Iniciativa Xabarín 2.0", para demandar que a nova Lei xeral do audiovisual inclúa unha cota mínima de contido dobrado e subtitulado en galego nas plataformas dixitais (como Netflix, HBO, Prime Vídeo ou Movistar). Trátase da continuación do traballo comezado coa coñecida "Iniciativa Xabarín", que o pasado mes de maio chegou ao Parlamento de Galicia en forma de proposición non de lei e conseguiu o apoio de todos os partidos con representación parlamentaria. Podes obter máis información sobre esta iniciativa, ou apoiala coa túa sinatura, premendo aquí.
27/09/2021. DINAMIZACIóN
O Servizo de Normalización Lingüística da Mancomunidade de Concellos da Comarca de Ferrol (servizo compartido polos concellos de Ares, Cabanas, Mugardos, Neda e Valdoviño), en colaboración cos SNL dos concellos de Fene, Ferrol, Cedeira e Narón, promoven o Día do Orgullo Neofalante, que se celebrará o vindeiro 1 de outubro, coincidindo coa data de nacemento de Andrés do Barro. Ao abeiro desta iniciativa, que ten como principal obxectivo gañar falantes e espazos de uso para o galego, presentarase o documental Barullo, que trata sobre a diversidade musical en lingua galega. O acto de presentación terá lugar na Casa de Cultura de Neda, o 30 de setembro, ás 19:00 h, e nel intervirán Xosé Bocixa e Pepe Cunha. Podes ampliar información premendo aquí.
24/09/2021. OUTRAS
O vindeiro domingo, 26 de setembro, o Consello de Europa celebra o Día Europeo das Linguas, unha conmemoración instaurada en 2001 co obxectivo de promover a diversidade lingüística de Europa e fomentar o plurilingüismo entre a cidadanía. No sitio web conmemorativo atoparás máis información sobre a riqueza cultural que supón o multilingüismo europeo, así como sobre as actividades que está previsto desenvolver nesta data. Pola súa parte, o Consello da Cultura Galega tamén participará en diferentes actos oficiais conmemorativos. Rosario Álvarez, presidenta da institución, asiste este venres en Nápoles aos actos convocados polo Instituto Cervantes, e o vindeiro domingo (26 de setembro) participará tamén no acto institucional que terá lugar na Praza das Praterías de Santiago de Compostela. Para ampliar información, preme aquí.
24/09/2021. CURSOS E CONGRESOS
O Servizo de Normalización Lingüística do Concello de Vigo organiza dous cursos de iniciación á lingua galega, un de nivel cero e outro de nivel 1, que se desenvolverán durante os meses de outubro e novembro de 2021. O curso de nivel cero está deseñado para persoas sen apenas coñecementos de galego. O curso de nivel 1 está dirixido a alumnado que poida acreditar unha formación básica do idioma. As sesións terán carácter presencial e desenvolveranse no auditorio Mar de Vigo, na planta 5ª (aula número 8). No web do SNL do Concello de Vigo atoparás máis información sobre as programacións didácticas e os trámites de inscrición.
24/09/2021. DINAMIZACIóN
A Comisión de Normalización Lingüística da Facultade de Medicina da USC, co apoio do Servizo de Normalización Lingüística, organizan as palestras "O galego ten saúde!", nas que se tratarán contidos de psiquiatría, psicoloxía, medicina familiar e comunitaria, farmacia ou toxicoloxía. Os obxectivos da iniciativa son fomentar as actitudes lingüísticas positivas do alumnado e do profesorado desta facultade sobre o exercicio docente e profesional en galego, así como darlles visibilidade a profesionais que xa son referentes no uso do noso idioma. As sesións terán lugar os días 6, 13 e 21 de outubro, ás 20:00 h, no Salón de Actos da Facultade de Medicina. Tamén poderán seguirse a través de Teams. O prazo de inscrición remata o 4 de outubro. Para coñecer o programa completo das palestras ou obter máis información sobre os trámites de inscrición, preme aquí.
23/09/2021. DINAMIZACIóN
O Equipo de Dinamización da Lingua Galega do IES de Arzúa presenta o documental "2021, 40 anos despois", en referencia ás catro décadas transcorridas desde a aprobación do Estatuto de Autonomía de Galicia, que recoñece o galego como lingua propia e cooficial da comunidade. Nesta peza audiovisual, o alumnado do curso 2020-2021 (na súa maioría, galegofalante) reflexiona sobre a situación sociolingüística actual, sobre os usos lingüísticos da mocidade, sobre as vantaxes que nos ofrece a lusofonía ou sobre as perspectivas de futuro para o noso idioma.
21/09/2021. DINAMIZACIóN
Se desexas aprender galego, ou se xa es galegofalante pero queres axudar a outras persoas na súa aprendizaxe, o Departamento de Lingua do Concello de Santiago convídate a inscribirte no programa Elos. Trátase dunha iniciativa de voluntariado lingüístico onde os membros da parella se comprometen a conversar xuntos, como mínimo, unha hora á semana, tendo en conta que a colaboración pode ser recíproca, xa que quen aprende galego pode ensinarlle tamén outro idioma que domine ao compañeiro/a. Podes ampliar información sobre a iniciativa, así como sobre os trámites de inscrición, premendo aquí
21/09/2021. DINAMIZACIóN
O Servizo de Normalización Lingüística do Concello de Ames, en colaboración coa Aula da Natureza, promoven a I Ruta do Apego, un itinerario que transcorre polos lugares de Lens e Oca, deseñado para fomentar entre os nenos e nenas o coñecemento e o apego polo seu patrimonio natural, cultural e lingüístico. No camiño as familias atoparán espazos para o xogo e o descanso, así como un mapa sensorial e paneis informativos accesibles para os máis pequenos/as. Para ampliar información sobre esta iniciativa, preme aquí.
20/09/2021. AXUDAS E PREMIOS
Os departamentos de Comercio e Lingua Galega do Concello de Santiago promoven unha nova edición do programa Coidar para mellorar, ao abeiro do cal se adxudicarán 36 cheques de consultoría para o comercio local, nas modalidades de comunicación, escaparatismo e mercadotecnia visual, e transformación dixital. Entre os obxectivos do programa está a promoción da normalización do noso idioma no ámbito do comercio, polo que os negocios composteláns que o desexen poderán optar a algún dos 12 cheques de consultoría que se adxudicarán para contratar servizos de asesoramento e formación para mellorar a comunicación do seu negocio. O prazo de presentación de solicitudes é de 20 días hábiles, contados a partir do día seguinte ao da publicación da convocatoria no Boletín Oficial da Provincia da Coruña.
20/09/2021. AXUDAS E PREMIOS
Ata o vindeiro 22 de outubro de 2021 estará aberto o prazo de inscrición para participar na quinta edición dos Premios Youtubeiras, dirixidos a persoas maiores de 14 anos con canles de Youtube en galego autoproducidas. A iniciativa está promovida polos servizos de normalización lingüística de dez concellos galegos, da Deputación da Coruña e das universidades da Coruña, Santiago de Compostela e Vigo, e ten como obxectivos fomentar a produción de contidos audiovisuais no noso idioma e darlle visibilidade a referentes na difusión de contidos en galego na plataforma Youtube. Podes consultar as bases completas do certame premendo aquí.
17/09/2021. DINAMIZACIóN
O Servizo de Normalización Lingüística (SNL) do Concello de Outes está a desenvolver a campaña "en Outes, en galego!", co dobre obxectivo de promover a lingua galega como marca de calidade e darlle visibilidade ao tecido comercial e hostaleiro do municipio. No marco desta iniciativa distribuiranse entre os comerciantes e a súa clientela diferentes materiais, como folletos explicativos, bolsas de tea e adhesivos co lema da campaña. Así mesmo, o SNL municipal ofrecerá un servizo de asesoramento gratuíto a todos os negocios que o demanden. Para ampliar esta información, preme aquí.