A Secretaría Xeral de Política Lingüística da Xunta de Galicia fai pública a resolución da convocatoria de subvencións ás entidades locais de Galicia para a promoción do uso do galego. No texto da resolución podes consultar a listaxe de concellos que, ben de xeito individual ou agrupado, recibirán axuda económica para a creación ou mantemento dun servizo de normalización lingüística, así como para o desenvolvemento de programas de dinamización da lingua.
12/07/2019. AXUDAS E PREMIOS
11/07/2019. CURSOS E CONGRESOS
O Centro de Interpretación da Oralidade de Vigo (CIOV) presenta o programa de cursos de improvisación oral en verso e de narración oral que ofertará entre outubro de 2019 e xuño de 2020. Estes cursos son gratuítos e as aulas terán lugar en horario de tarde na sede do CIOV (Instituto Municipal de Educación, camiño do Chouzo, 2). As solicitudes de inscrición deben tramitarse a través do formulario web que facilita o SNL do Concello de Vigo. Podes ampliar información sobre os obxectivos, metodoloxía e contidos dos cursos premendo aquí.
11/07/2019. DINAMIZACIóN
O Servizo de Normalización Lingüística da Mancomunidade de Ordes organiza, un ano máis, a súa xincana lingüística, dirixida ás nenas e nenos de 6 a 12 anos que participan nas actividades de conciliación do verán. O obxectivo é crear espazos de uso para o galego no ámbito do lecer, promovendo a comunicación oral e difundindo, de forma lúdica, vocabulario relacionado coas actividades deportivas. Os obradoiros desenvolveranse nos meses de xullo e agostos de 2019 nos diferentes concellos que conforman a mancomunidade.
10/07/2019. AXUDAS E PREMIOS
As concellerías de Cultura, Lingua e Promoción Económica do Concello de Ponteareas convocan o I Premio “Ponteareas, lingua e empresa”, para recoñecer publicamente o compromiso co uso do galego por parte de empresas, autónomos e profesionais que teñan a súa sede social ou un centro de actividade neste concello. Nesta primeira edición establécense tres categorías: “uso continuado da lingua galega”, “incorporación recente ao uso da lingua galega” e “traxectoria do uso da lingua galega ao longo de décadas”. As candidaturas (que poden ser presentadas polos propios responsables da empresa ou por outras persoas ou entidades), deben enviarse ao enderezo electrónico premioslinguaempresa@ponteareas.gal. Para ampliar a nova, preme aquí.
04/07/2019. EMPREGO
A Universidade de Santiago de Compostela anuncia a convocatoria pública de contratación de persoal para colaborar en actividades de investigación mediante contrato de obra ou servizo determinado. Entre as prazas ofertadas anúnciase unha para o proxecto “GEOARPAD-IV. Patrimonio cultural de la Eurorregión Galicia-Norte de Portugal: Valoración e Innovación”, que se está a desenvolver no Instituto da Lingua Galega. A forma de provisión é o concurso de méritos. A duración do contrato será de dous meses e medio, cunha xornada laboral a tempo parcial (25 horas semanais). O prazo de presentación de solicitudes remata o 10 de xullo de 2019. Para consultar as bases completas da convocatoria, preme aquí.
04/07/2019. DINAMIZACIóN
O secretario xeral de Política Lingüística, Valentín García, presentou no Parlamento de Galicia o Plan de dinamización da lingua galega na mocidade 2019-2022, un documento que recolle 39 medidas, clasificadas en 9 áreas de intervención, para promover o uso do galego entre a poboación cunha idade comprendida entre os 14 e os 30 anos. O Goberno galego ten previsto implementar este plan nos vindeiros catro anos, coa colaboración de todos os sectores sociais (Administración local, medios de comunicación, partidos políticos, tecido asociativo e colectivos xuvenís) que teñen incidencia nos usos e actitudes da mocidade. Para ampliar esta información, preme aquí.
02/07/2019. OUTRAS
Xa podes consultar en liña a segunda edición do vocabulario “Terminoloxía de xestión da calidade”, elaborado no marco de Realiter (Rede Panlatina de Terminoloxía), que recolle 140 termos procedentes da Norma ISO 9000:2015, Quality management systems. Fundamentals and vocabulary. Trátase da actualización dunha primeira edición do ano 2010, que recolle as denominacións equivalentes en inglés e en sete linguas románicas (catalán, castelán, francés, galego, italiano, portugués e romanés), cos seus indicadores de categoría gramatical correspondentes.
02/07/2019. DINAMIZACIóN
O Servizo de Normalización Lingüística do Concello de Vigo presenta unha nova edición do programa “No verán… un conto”, co obxectivo de fomentar o uso do galego no ámbito do lecer. O programa (dirixido ao público infantil, familiar e adulto), inclúe contos, monicreques, regueifa, obradoiros, xogos tradicionais, música, etc. As actividades comezan o 1 de xullo e rematan o 6 de agosto. No web do SNL do Concello de Vigo podes consultar o programa completo de actividades (coas datas e lugares de realización).
27/06/2019. AXUDAS E PREMIOS
O xurado dos Premios Mil Primaveras deu a coñecer os seis proxectos gañadores da súa primeira edición, seleccionados entre as 47 candidaturas presentadas a concurso. Estes premios están promovidos pola Coordinadora de Traballadores/as de Normalización da Lingua co obxectivo de recoñecer e difundir iniciativas, campañas ou proxectos destinados ao fomento do galego e ao incremento do seu uso e prestixio. Os gañadores desta edición son: Modelo Burela, na categoría de “mellor proxecto estabilizado”; Falemos de ti e min, na categoría de “mellor proxecto novo”; Desafío 48 h, na categoría de “mellor comunicación e impacto”; Youtubeir@s, na categoría de “proxecto máis innovador”; Eu presumo de galego, na categoría de “mellor proxecto de fomento de galego na infancia e/ou mocidade"; e Gciencia, na categoría de “mellor proxecto de fomento do galego nun ámbito sectorial”. En breve estará disponible no sitio web do certame toda a documentación técnica das iniciativas premiadas.
27/06/2019. AXUDAS E PREMIOS
A Consellería de Cultura e Turismo publica as resolucións das axudas para os proxectos de fomento do galego dos equipos de dinamización da lingua galega dos centros de ensino non universitario, para o curso escolar 2018/2019. Podes consultar as listaxes de centros beneficiarios aquí: centros galegos de titularidade pública; centro privados da Coruña; centros privados de Lugo, centros privados de Ourense, centros privados de Pontevedra.
24/06/2019. OUTRAS
O Plenario da Real Academia Galega acordou, na sesión ordinaria do 22 de xuño de 2019, que o autor homenaxeado no Día das Letras Galegas 2020 será Ricardo Carballo Calero (Ferrol, 1910 – Santiago de Compostela, 1990), intelectual e académico que destacou tanto no ámbito da creación literaria como na crítica e na investigación filolóxica. Na súa mocidade foi membro do Seminario de Estudos Galegos e participou na redacción do Estatuto de Autonomía de 1936. En 1958 ingresou na Real Academia Galega e uns anos despois, en 1965, incorporouse como profesor interino á Universidade de Santiago de Compostela, onde foi o primeiro docente das materias de Lingua e Literatura Galegas e, desde 1972, o primeiro catedrático de Lingua e Literatura Galegas. A partir de mediados da década dos 70, pasou a defender a adopción dunha ortografía próxima á portuguesa, converténdose nun intelectual de referencia para o reintegracionismo académico. Para ampliar esta información, preme aquí.
21/06/2019. AXUDAS E PREMIOS
O xurado do X Premio Rosalía de Castro de Lingua, que promove a Deputación da Coruña co obxectivo de recoñecer o labor de dignificación do noso patrimonio lingüístico, deu a coñecer os galardoados da súa décima edición. Nesta ocasión os premiados foron o xornal Gciencia, na categoría de colectivo, entidade ou asociación que destaca na promoción da lingua galega; e o proxecto 21 Días co Galego, como recoñecemento ao seu traballo coa mocidade.
19/06/2019. AXUDAS E PREMIOS
A Secretaría Xeral de Política Lingüística publica a resolución da convocatoria para a realización dos proxectos de innovación en dinamización lingüística nos centros públicos de ensino durante o curso académico 2018/2019. Os cinco proxectos seleccionados pola súa excelencia son: “O Prado fala galego” (IES Carlos Casares e IES Santa Irene, Vigo); “A cidade sen barreiras” (CEE Nosa Señora do Rosario, A Coruña); “Ao son delas” (IES Maximino Romero de Lema, Zas); “Cóxegas: caixas de investigación e creación como experiencia estética e emocional de acompañamento lingüístico” (CEIP Heroínas de Sálvora, Ribeira) e “Miserábeis (IES Illa de Ons, Bueu). Cada un destes proxectos recibirá 2.000 euros para a súa execución.
18/06/2019. EMPREGO
A Consellería de Cultura e Turismo publica o concurso público de nove bolsas de formación no Centro Ramón Piñeiro para a Investigación en Humanidades. Os/as beneficiarios/as colaborarán nos seguintes proxectos: Legado científico de Jürgen Untermann (1 bolsa), Corpus de referencia do galego actual (1 bolsa), Corpus ducumentale latinum Gallaeciae (1 bolsa), Bibliografía informatizada da lingua galega (1 bolsa), Terminoloxía científico-técnica (1 bolsa), Informes de literatura (1 bolsa), Recuperación de textos literarios e xornalísticos galegos (1 bolsa), Lírica profana galego-portuguesa (1 bolsa), Dimensións da indentidade colectiva de Galicia (1 bolsa). O prazo de presentación de solicitudes é dun mes, contado a partir do día seguinte ao da publicación desta convocatoria.
17/06/2019. EMPREGO
O Parlamento de Galicia anuncia a convocatoria de dúas bolsas de formación, de doce meses de duración, vinculadas ao seu Servizo de Publicacións. Poden optar a estas bolsas as persoas que posúan o grao/licenciatura en Tradución e Interpretación, sempre que a lingua de orixe principal da súa combinación lingüística (1ª lingua ou lingua A1) sexa a lingua galega, ou a licenciatura en Filoloxía Galega. O prazo de presentación de solicitudes é de quince días naturais a partir do día seguinte ao da publicación desta convocatoria no DOG. As bases completas da convocatoria podes consultalas premendo aquí.
13/06/2019. OUTRAS
A Mesa pola Normalización Lingüística acaba de presentar publicamente a Guía para o uso do galego na Administración local (2019-2023), que vai distribuír entre os máis de 3.700 concelleiros e concelleiras que este sábado tomarán posesión nos 313 concellos do país. O obxectivo da guía é promover a normalización lingüística na Administración local propoñendo unha serie de orientacións e medidas de fomento do galego que poidan implementarse desde as diferentes áreas de goberno municipal. O grao de cumprimento destas medidas será avaliado no futuro a través dun formulario que A Mesa enviará a todas as entidades locais. Podes ampliar esta nova premendo aquí.
13/06/2019. DINAMIZACIóN
A Concellería de Mocidade e o Departamento de Lingua Galega do Concello de Santiago de Compostela presentan a edición estival do programa #SenCancelas, un proxecto de intervención socioeducativa dirixido a toda a mocidade entre 14 e 17 anos, que ten como obxectivo crear espazos de socialización en galego nos que a rapazada poida desenvolver a súa creatividade e habilidades persoais. O programa desenvolverase os mércores de 11:00 a 13:00 horas no Centro Xove da Almáciga. O prazo de inscrición remata o 1 de xullo.
10/06/2019. OUTRAS
O Seminario de Lingüística Informática da Universidade de Vigo presenta a aplicación móbil do Dicionario Galnet, deseñada para dispositivos con sistema operativo Android. Trátase dun dicionario plurilingüe con traducións e sinónimos para dez linguas (galego, portugués, catalán, éuscaro, español, inglés, alemán, latín, italiano e chinés), que contén 725.000 palabras, das que 70.000 son formas léxicas en galego. O proxecto Galnet forma parte do Multilingual Central Repository e do Open Multilingual Wordnet. A maiores da aplicación móbil, o dicionario tamén está accesible desde unha plataforma web e o seu contido pode descargarse en formato RDF o LMF con licencia libre. Para ampliar información, preme aquí.
10/06/2019. EMPREGO
A Deputación Provincial de Ourense publica as bases do proceso selectivo para a contratación, como persoal funcionario interino (subgrupo A1), dun/unha tradutor/a de galego. O proceso de selección será o concurso-oposición. Os/as aspirantes deben estar en posesión da licenciatura en Filoloxía Galega, Filoloxía Hispánica (subsección de Galego-Portugués) ou Filosofía e Letras (sección Filoloxía Hispánica, subsección Galego-Portugués); dalgún dos seguintes graos: Ciencias da Linguaxe e Estudos Literarios (galego e español), Estudos de Galego e Español, Galego e Portugués: Estudos Lingüísticos e Literarios, Lingua e Literatura Galegas; licenciatura/grao en Tradución e Interpretación, ou equivalentes. O prazo para a presentación de solicitudes é de 7 días naturais, contados a partir do seguinte ao da publicación da convocatoria.
06/06/2019. CURSOS E CONGRESOS
Onte, 5 de xuño de 2019, tivo lugar en Niterói (Brasil) a inauguración do I Seminário Internacional de Estudos Linguísticos. Galego e português: o passado presente, organizado pola Universidade Federal Fluminense (UFF), a Universidade de Santiago de Compostela, o Grupo de Pesquisa Galego e Português, o Núcleo de Estudos Galegos da UFF, o Programa de Estudos Galegos da Universidade do Estado do Rio de Janeiro, o Conselho Nacional de Desenvolvimento Científico e Tecnológico e a Xunta de Galicia. Ao longo de 3 días, ata o vindeiro 7 de xuño, terán lugar diferentes minicursos e simposios onde expertos en lingua galega e portuguesa reflexionarán sobre aspectos sociais, históricos, discursivos, pragmáticos e cognitivos destes dous idiomas.
04/06/2019. CURSOS E CONGRESOS
O Servizo de Normalización Lingüística da Universidade da Coruña, en colaboración co Concello de Carballo e a Secretaría Xeral de Política Lingüística, organiza o XV Curso de verán sobre dinamización lingüística "Traballando en lingua", que nesta edición se centrará en analizar a situación do idioma galego no sector turístico e en deseñar estratexias para incrementar o seu uso. As sesións desenvolveranse os días 17 e 18 de xullo de 2019 no Fórum Carballo. O prazo de matrícula remata o 10 de xullo.
31/05/2019. DINAMIZACIóN
O Concello de Ourense, en colaboración coa Secretaría Xeral de Política Lingüística, convoca o X Certame de Cinema OUFF Escola, que se desenvolverá no marco da vixésimo cuarta edición do Festival de Cine Internacional de Ourense (OUFF). O obxectivo deste certame escolar é impulsar o uso do idioma galego entre a mocidade, fomentar a creatividade audiovisual e promover o traballo en equipo. Poderá participar o alumnado matriculado en centros públicos e privados de ensino non universitario de Galicia durante o curso 2018-2019, así como aqueles de fóra de Galicia que teñan no seu currículo materias en lingua galega. Os/as participantes deben elaborar obras audiovisuais en lingua galega de ata 20 minutos de duración. O prazo de inscrición remata o 2 de xullo de 2019. Para consultar as bases completas, preme aquí.
27/05/2019. AXUDAS E PREMIOS
O xurado dos Premios Lois Peña Novo deu a coñecer os/as gañadores/as da vixésimo quinta edición destes galardóns, deseñados para animar o proceso de normalización lingüística no eido das administracións públicas, na vida institucional de Galicia e na sociedade en xeral. Nesta edición os/as premiados/as son o profesor emérito da USC Manuel Bermejo Patiño, pola coherencia na utilización da lingua galega durante toda a súa vida académica; a maxistrada Paz Filgueira Paz, por desenvolver a súa actividade profesional en galego desde hai máis de 20 anos; e Carlos Salgado López, profesor do Departamento de Física de Partículas da USC, polo seu compromiso coa lingua galega na súa actividade docente e investigadora.
27/05/2019. OUTRAS
O que arde, de Oliver Laxe, foi galardoado co premio do xurado na sección “Un certain regard” da 72ª edición do Festival de Cannes, que se celebrou entre os días 14 e 25 de maio de 2019. O filme, rodado en versión orixinal en lingua galega e proxectado tamén neste idioma durante o festival, xa conseguira facer historia ao converterse na primeira película en galego seleccionada para competir neste prestixioso certame. Con este galardón Oliver Laxe demostra que a lingua galega non é en absoluto unha pexa para que unha obra audiovisual poida acadar o recoñecemento internacional. A película, rodada integramente en Galicia e ambientada nos Ancares, trata sobre os incendios forestais. A estrea nas salas está prevista para finais de 2019, con distribución de Numax.
27/05/2019. EMPREGO
A Consellería de Cultura e Turismo da Xunta de Galicia publica as convocatorias públicas para cubrir cinco prazas nos lectorados de lingua, literatura e cultura galegas nas universidades de Bangor, Heidelberg, Kiel, Leipzig e Varsovia e mais outras cinco bolsas de formación nos lectorados de lingua, literatura e cultura galegas nas universidades de Algarve, Berlín, Río de Xaneiro, Roma e Zadar. En ambas as dúas convocatorias, o prazo de presentación de solicitudes é dun mes, contado a partir do día seguinte ao da súa publicación.
23/05/2019. DINAMIZACIóN
O pasado 16 de maio, nun acto organizado polo colectivo Xuliva, o Equipo de Normalización Lingüística do IES A Sangriña presentou publicamente o documental “As linguas na Guarda. (RE)construíndo a autoestima”. A obra, coordinada por Denis Vicente e Menchu Costa, foi elaborada co alumnado de 3º da ESO durante o curso 2017/2018. O obxectivo da iniciativa é que o alumnado e a poboación en xeral reflexionen sobre a perda de falantes de galego no Concello da Guarda e tentar reverter esta situación reforzando a súa autoestima.
21/05/2019. INVESTIGACIóN
A Deputación da Coruña presenta a publicación Malas linguas, deseñada como unha guía práctica onde atopar información e recursos relacionados coas xornadas homónimas que tiveron lugar entre outubro do 2018 e novembro de 2019. Estas xornadas, organizadas en catro sesións, estiveron dirixidas principalmente aos profesionais que traballan no ámbito da normalización lingüística e das políticas públicas, co ánimo de reflexionar e deseñar estratexias para activar os/as falantes do século XXI.
20/05/2019. AXUDAS E PREMIOS
A Consellería de Cultura e Turismo publica a convocatoria de subvencións para a edición en lingua galega de recursos didácticos curriculares para niveis non universitarios. As axudas están dirixidas ás empresas mercantís do sector editorial e o prazo para a presentación de solicitudes é dun mes, contado a partir do día seguinte ao da publicación desta convocatoria.
16/05/2019. INVESTIGACIóN
Os pasados días 4 e 5 de abril tiveron lugar os XXI Encontros para a Normalización Lingüística, que neste ano 2019 estiveron dedicados á divulgación científica en lingua galega. Recollendo as reflexións, debates e suxestións que foron aflorando ao longo destas dúas xornadas, o Consello da Cultura Galega publica o documento de conclusións que pon ao dispor do conxunto da cidadanía a través da súa páxina web.
16/05/2019. DINAMIZACIóN
Mañá, 17 de maio, a Real Academia Galega celebrará o Día das Letras Galegas cunha sesión extraordinaria e pública dedicada a Antonio Fraguas Fraguas, que terá lugar ás 11:30 h na carballeira de Famelga, no concello de Cerdedo-Cotobade. No acto intervirán os/as académicos/as Clodio González Pérez, Fina Casalderrey e Francisco Díaz-Fierros Viqueira, así coma o presidente da institución, Víctor F. Freixanes, que será o encargado de pechar a sesión. Para coñecer máis sobre o autor homenaxeado, preme aquí.