A Secretaría Xeral de Medios da Xunta de Galicia publica a resolución das axudas concedidas a empresas que realicen publicacións periódicas escritas integramente en galego. Para consultar a listaxe de beneficiarios/as, preme aquí.
24/10/2018. AXUDAS E PREMIOS
22/10/2018. DINAMIZACIóN
Co gallo da celebración o vindeiro 2 de novembro do Día de Defuntos, a Asociación de Funcionarios para a Normalización Lingüística (AFNL) convida, un ano máis, a todos os concellos galegos a festexar o Día da Restauración da Memoria Lingüística de Galicia, galeguizando as rotulacións dos cemiterios e colocando placas conmemorativas. Os promotores da iniciativa tamén están a difundir nas redes o vídeo “Deixa en herdanza a túa lingua”, para animar a recuperar a antiga tradición das mandas testamentarias. Podes ver algúns exemplos destas mandas no libro “En galego, agora e sempre”, editado pola AFNL en 2008, no que diferentes persoas manifestan as súas últimas vontades con respecto á lingua.
19/10/2018. CURSOS E CONGRESOS
A Comisión de Normalización Lingüística da Facultade de Ciencias da Educación da Universidade de Santiago organiza a XI Xornada "Os recursos educativos en galego”, que nesta edición estará centrada na educación musical. O obxectivo é dar a coñecer os recursos educativos existentes en lingua galega no ámbito da educación musical e promover a creación doutros novos adaptados ás necesidades contextuais e lingüísticas de Galicia. As sesións desenvolveranse o mércores 21 de novembro de 2018 no Salón de Actos da Facultade de Ciencias da Educación. Para ampliar información sobre o programa e os trámites de inscrición, preme aquí.
19/10/2018. DINAMIZACIóN
A Real Academia Galega e a Secretaría Xeral de Política Lingüística presentan a segunda edición do programa Toponimízate. Falámosche dos nomes da túa terra, que ten como obxectivo preservar e divulgar o patrimonio toponímico galego. No marco desta iniciativa, entre outubro e decembro de 2018 desenvolveranse unha serie de charlas divulgativas en 15 concellos adscritos á Rede de Dinamización Lingüística da Xunta de Galicia. Nestas charlas, o técnico do Seminario de Onomástica da RAG, Vicente Feijoo, ofrecerá información sobre a orixe e o significado dos topónimos de cada concello. Os asistentes tamén poderán familiarizarse con ferramentas coma o Buscador de topónimos, que permite localizar a microtoponimia recollida ata o momento, ou coa futura aplicación colaborativa “Galicia nomeada”, coa que calquera cidadán poderá xeolocalizar aqueles microtopónimos que aínda non están recollidos. Para obter máis información, preme aquí.
19/10/2018. CURSOS E CONGRESOS
Onte, 18 de outubro de 2018, inaugurouse en Denver (Colorado) o III Simposio Norteamericano de Estudos Galegos, coorganizado pola Regis University, a Metropolitan State University of Denver e o Colorado College. Este simposio, que leva por título “Os estudos galegos rumbo ao oeste. A lingua e a cultura galegas na encrucillada”, reunirá ata o vindeiro día 20 de outubro estudosos norteamericanos, galegos e internacionais para establecer un diálogo interdisciplinar arredor da lingua, literatura, cultura e identidade galegas.
18/10/2018. INVESTIGACIóN
A Comisión de Normalización Lingüística (CNL) da Facultade de Dereito e o Servizo de Normalización Lingüística (SNL) da USC presentan a obra Termos esenciais de dereito laboral e da seguridade social, un glosario trilingüe (galego-español-inglés) no que se compilan máis de 1.000 conceptos do ámbito do dereito do traballo e da seguridade social. Con esta obra péchase a colección de vocabularios básicos do dereito da que tamén forman parte outros títulos relacionados co
dereito constitucional, penal, internacional, civil, administrativo e mercantil.
dereito constitucional, penal, internacional, civil, administrativo e mercantil.
17/10/2018. OUTRAS
A Secretaría Xeral de Política Lingüística anuncia as datas de realización das probas para a obtención dos certificados de lingua galega, niveis Celga 2 e 4, que foron convocadas ao abeiro da resolución publicada no DOG do pasado 14 de setembro. Estas probas realizaranse o 17 de novembro de 2018 (Celga 4) e o 24 de novembro de 2018 (Celga 2).
15/10/2018. DINAMIZACIóN
O vindeiro 15 de novembro, ás 18:00 h, terá lugar na Sala Capitol de Santiago de Compostela unha nova edición do LGx15, un evento organizado pola Coordinadora de Traballadores/as de Normalización da Lingua, no que a través de charlas breves, diferentes participantes transmiten argumentos e experiencias para influír na conciencia e nas actitudes lingüísticas dos falantes. Nesta edición, as intervencións correrán a cargo de Ruth Caramés, Xema Varela, Mercé Barrientos, Manolo Maseda, Javier Balea, Inma Gil Rosendo, Eira Losada e Aquel-e. Das presentacións ocuparanse as regueifeiras Alba María e Lupe Blanco. O acto contará tamén coa actuación musical de Brais Morán. As entradas poden adquirirse no web da Sala Capitol ou na Tenda A Reixa.
11/10/2018. CURSOS E CONGRESOS
Dirixidas principalmente ás persoas que traballan no ámbito da normalización lingüística e das políticas públicas, as xornadas Malas Linguas centraranse en deseñar estratexias para activar os/as falantes do século XXI. O programa estrutúrase en catro sesións, que se celebrarán entre outubro de 2018 e abril de 2019. A primeira sesión terá lugar o vindeiro 23 de outubro no Pazo de Mariñán (Bergondo) e xirará arredor da lingua, o discurso e as políticas públicas. Nas seguintes, os fíos condutores serán a transmisión familiar do idioma (29 de novembro de 2018), a transmisión en contextos externos ao ámbito familiar (1 de marzo de 2019), e a lingua e os xéneros (19 de abril de 2019).
03/10/2018. CURSOS E CONGRESOS
A Real Academia Galega organiza, coa colaboración da Deputación Provincial de Pontevedra e o Museo de Pontevedra, a terceira edición da Xornada de Onomástica Galega, que nesta ocasión se centrará nos alcumes. A xornada terá lugar o 20 de outubro de 2018 no Museo de Pontevedra. A entrada é libre ata completar aforo. Para ampliar información, preme aquí.
03/10/2018. AXUDAS E PREMIOS
A Universidade de Santiago de Compostela convoca o II Premio Luís Porteiro Garea, co obxectivo de recoñecer publicamente o traballo de persoas, entidades ou colectivos que traballan a prol do uso do galego na universidade, e ao mesmo tempo, homenaxear a figura deste profesor de Dereito Civil que pronunciou en 1915 a primeira lección en galego no ámbito universitario. O premio ten carácter de distinción pública e consistirá nun elemento simbólico de tipo artístico. O prazo para presentar as candidaturas remata o 15 de novembro de 2018.
03/10/2018. CURSOS E CONGRESOS
O Instituto da Lingua Galega da Universidade de Santiago de Compostela organiza, coa colaboración do Consello da Cultura Galega, o simposio “Variedades lingüísticas en contacto na Península Ibérica”, onde se abordarán desde diferentes perspectivas (social, lingüística, etnográfica, histórica, etc.) as situacións de contacto entre as diferentes linguas que conviven na península. As sesións desenvolveranse os días 12, 13 e 14 de novembro de 2018 no Salón de Graos da Facultade de Filoloxía da USC. O prazo de inscrición remata o 10 de novembro ás 12:00 horas.
O Instituto da Lingua Galega da Universidade de Santiago de Compostela organiza, coa colaboración do Consello da Cultura Galega, o simposio “Variedades lingüísticas en contacto na Península Ibérica”, onde se abordarán desde diferentes perspectivas (social, lingüística, etnográfica, histórica, etc.) as situacións de contacto entre as diferentes linguas que conviven na península. As sesións desenvolveranse os días 12, 13 e 14 de novembro de 2018 no Salón de Graos da Facultade de Filoloxía da USC. O prazo de inscrición remata o 10 de novembro ás 12:00 horas.
02/10/2018. OUTRAS
O Ministerio de Cultura e Deporte presenta os datos da Panorámica da edición española de libros do ano 2017. No que respecta aos libros publicados en galego, os datos constatan un aumento do 6,4% (1.288 títulos en 2017 fronte aos 1.211 títulos en 2016), reverténdose así o descenso continuado que se viña producindo desde 2014. No que respecta aos títulos traducidos ao galego, os números non son tan favorables (42 títulos en 2017 fronte aos 54 títulos en 2016), constatándose un descenso dun 22,2%, máis acentuado incluso ca en anos anteriores. No referido á edición no conxunto do Estado, os libros editados en galego supoñen un 1,5% do total. Se o desexas, no web do Ministerio podes acceder aos cadros evolutivos do período 2013-2017. Tamén podes consultar o resumo dos datos facilitado polo Ministerio.
02/10/2018. AXUDAS E PREMIOS
Co gallo do Día Internacional da Tradución, que se celebra cada 30 de setembro, a Asociación Galega de Profesionais da Tradución e a Interpretación (AGPTI) convoca o Premio Xela Arias, para homenaxear a figura de Xela Arias e reivindicar o idioma galego como lingua de traballo no ámbito da tradución. O premio está dirixido a unha empresa, entidade ou persoa que destaque pola promoción da tradución ou interpretación cara ou desde o galego. As candidaturas poden enviarse ao correo electrónico info@agpti.org ata o día 18 de outubro.
01/10/2018. AXUDAS E PREMIOS
A Deputación de Pontevedra publica a listaxe de entidades beneficiarias da liña de axudas a entidades culturais sen fin de lucro da provincia de Pontevedra, para desenvolver actividades de promoción do galego durante o ano 2018. Segundo as bases da convocatoria, as accións subvencionables eran: certames literarios e xornalísticos; creación audiovisual e literaria; feiras/eventos de promoción da creación en galego; estudos de sociolingüística; xornadas e publicacións sobre recuperación da toponimia; iniciativas de dinamización comercial en galego; iniciativas de conmemoración do Día das Letras Galegas, ou recoñecementos a persoas e colectivos que aposten polo galego. Para ampliar información, preme aquí.
01/10/2018. INVESTIGACIóN
O Servizo de Normalización Lingüística do Concello de Vigo e a Área de Normalización Lingüística da Universidade de Vigo presentan un novo volume da colección Toponimia do Val do Fragoso, nesta ocasión dedicado á parroquia de Comesaña. A presentación terá lugar o vindeiro venres día 5 de outubro, ás 20:00 h, no local da SVCD Nautilius. No acto intervirá o autor do libro, Anxo Rodríguez Lemos, xunto con representantes da Comunidade de Montes de Comesaña, da SVCD Nautilius, da Universidade de Vigo e do Concello de Vigo. Podes consultar en liña os outros estudos desta colección (sobre a toponimia de Lavadores, Beade, Coia, Freixeiro e Sárdoma), no web do SNL do Concello de Vigo.
27/09/2018. CURSOS E CONGRESOS
A Sección de Lingua, Literatura e Comunicación do Consello da Cultura Galega organiza a xornada As tecnoloxías da lingua, unha oportunidade para a sociedade galega, que terá lugar o vindeiro 16 de outubro de 2018 en Santiago de Compostela. As xornadas centraranse no papel que poden xogar as tecnoloxías lingüísticas como ferramentas facilitadoras para a comunicación entre persoas, con especial interese en dous campos concretos: o da transcrición automática de voz a texto e o da tecnoloxía do procesado de linguaxe natural. A inscrición é gratuíta e as prazas cubriranse por rigorosa orde de inscrición.
27/09/2018. INVESTIGACIóN
O CEIP Agro do Muíño, a Real Academia Galega e o Concello de Ames presentaron o estudo A lingua no CEIP Agro do Muíño, unha análise sociolingüística de toda a comunidade educativa (familias, alumnado e profesorado) deste centro amesán que servirá como punto de partida para a elaboración do seu plan de normalización lingüística. Os datos obtidos neste centro educativo constatan o desprazamento do galego polo castelán que, en termos xerais, está a acontecer en todo o territorio periurbano galego. De feito, neste CEIP en concreto detéctase un maior grao de substitución ca no resto da Comarca de Santiago, incluída a propia cidade de Santiago de Compostela. O estudo, un dos máis exhaustivos realizados nun centro escolar, remata cunha listaxe de propostas de actuación para reverter esta situación, que se desenvolverán con máis detalle no futuro plan de normalización.
26/09/2018. DINAMIZACIóN
Un ano máis, desde que se instaurou esta celebración en 2001, os 47 estados que compoñen o Consello de Europa animan a cidadanía europea a festexar o 26 de setembro como Día Europeo das Linguas, co obxectivo de promover a diversidade lingüística de Europa e fomentar o plurilingüismo entre os seus cidadáns. Convidámoste a que visites o sitio web que desenvolveu co motivo desta data o Consello de Europa, onde atoparás máis información sobre esta celebración e sobre a riqueza cultural que supón o multilingüismo europeo.
25/09/2018. AXUDAS E PREMIOS
O xurado dos Premios da Cultura Galega fixo públicos os/as oito galardoados/as que son recoñecidos/as este ano 2018 polo seu labor no ámbito da creación, conservación e difusión cultural. Na categoría de Lingua, nesta edición outorgóuselle o premio a Antón Santamarina, lingüista, catedrático de Filoloxía Románica pola Universidade de Santiago de Compostela e membro da Real Academia Galega. Nas restantes categorías, os galardoados/as son Xosé María Álvarez Cáccamo (Letras), Luz Darriba (Artes Plásticas), Festival Internacional Outono de Teatro-FIOT (Artes Escénicas), A Roda (Música), Festival de Cans (Audiovisual), O Sorriso de Daniel (Patrimonio Cultural) e Ramón Villares (Proxección Exterior). Para ampliar esta información, preme aquí.
14/09/2018. OUTRAS
A Secretaría Xeral de Política Lingüística da Xunta de Galicia convoca unha segunda convocatoria de probas para a obtención dos certificados de lingua galega (niveis Celga 2 e 4) para este ano 2018. As probas realizaranse entre a segunda quincena de novembro e a primeira fin de semana de decembro de 2018 en Santiago de Compostela e Ponferrada (a data concreta publicarase no DOG). O prazo de presentación de solicitudes será de 20 día naturais, contados a partir do día seguinte ao da publicación desta convocatoria.
14/09/2018. CURSOS E CONGRESOS
O Servizo de Normalización Lingüística do Concello de Vigo convoca unha nova edición do curso Achégate ao galego, nivel básico, dirixido a todas aquelas persoas, de dentro e fóra de Galicia, sen apenas coñecementos do idioma. O curso desenvolverase durante os meses de outubro, novembro e decembro de 2018. As persoas interesadas en asistir deben enviar os seus datos (nome completo e teléfono) ao correo actividades.snl@vigo.org, indicando no asunto da mensaxe “curso galego nivel básico”. Para ampliar información sobre as datas de realización e mais o programa do curso, preme aquí.
13/09/2018. DINAMIZACIóN
O xornalista pontevedrés Carlos Pereiro é o promotor da Revista Morcego, un proxecto xornalístico en galego especializado no mundo dos videoxogos. A revista, accesible en liña, ofrece análises, reportaxes, artigos de opinión e novas de actualidade relacionadas co tema dos videoxogos, un produto cultural moi demandado entre a mocidade, polo que é de especial relevancia que este tipo de contidos estean tamén accesibles na nosa lingua.
07/09/2018. CURSOS E CONGRESOS
O Servizo de Normalización Lingüística do Concello de Ames organiza unha nova edición dos Obradoiros de Lingua e Cultura “En galego, co teu acento!”. Os obradoiros están dirixidos principalmente a persoas procedentes de fóra de Galicia que vivan en Ames e, en xeral, a calquera persoa interesada en achegarse á lingua e á cultura galegas. As sesións desenvolveranse nas localidades de Bertamiráns e do Milladoiro durante os meses de outubro e novembro. O prazo de inscrición estará aberto ata o 26 de setembro de 2018. Podes ampliar información premendo aquí.
30/08/2018. DINAMIZACIóN
A Mesa pola Normalización Lingüística presenta a Guía turística alternativa de Santiago de Compostela, editada en galego e inglés, en colaboración coa asociación cultural Cidade Vella e o Festival Feito á man. Ademais de ofrecer información sobre lugares e monumentos de especial interese turístico da cidade, os promotores da iniciativa queren que os visitantes coñezan os datos máis salientables da súa historia e da súa lingua propia. A guía inclúe tamén un pequeno glosario de conversa básica galego-inglés.
27/08/2018. CURSOS E CONGRESOS
A Consellería de Cultura, Educación e Ordenación Universitaria convoca cursos de linguaxe administrativa galega (niveis medio e superior) e mais cursos preparatorios para a obtención dos certificados de lingua galega (Celga), que se impartirán nas escolas oficiais de idiomas de Galicia no curso 2018/2019. Os cursos de linguaxe administrativa están dirixidos ao persoal das administracións autonómica e local galegas, así como ao da Administración periférica do Estado en Galicia (excepto o persoal docente e sanitario). Aos cursos preparatorios dos Celga poderán asistir todas as persoas maiores de dezaseis anos interesadas. O prazo para presentar as solicitudes abranguerá desde o 3 ata o 12 de setembro de 2018, para os cursos do primeiro cuadrimestre, e desde o 2 ata o 11 de xaneiro de 2019, para os cursos do segundo cuadrimestre. Para consultar o texto da convocatoria, preme aquí.
27/08/2018. EMPREGO
O Concello de Nigrán publica as bases para a contratación temporal dun técnico/a de normalización lingüística. O sistema de selección será o concurso-oposición. Os/as aspirantes deben estar en posesión do título de licenciatura en Filoloxía Galega-Portuguesa, Filoloxía Galega ou Filoloxía Hispánica (sección Galego-Portugués), do grao en Lingua e Literatura Galegas ou do grao en Estudos de Galego e Español (módulos “lingua e literatura galegas” ou “lingua galega e española”). A duración do contrato será de 12 meses. O prazo para a presentación de solicitudes remata o vindeiro 4 de setembro. Podes consultar o texto completo da convocatoria premendo aquí.
02/08/2018. AXUDAS E PREMIOS
A Secretaría Xeral de Política Lingüística, o Parlamento de Galicia e o Foro Enrique Peinador convocan conxuntamente a XXV edición dos Premios de Publicidade en Galego.
Como nas edicións anteriores, establécense catro categorías segundo o medio de difusión: radio, televisión, internet ou prensa escrita. A maiores, como novidade, créase un premio extraordinario para proxectos elaborados polo alumnado de centros educativos. O prazo de inscrición está aberto ata o 11 de outubro de 2018. Accede ás bases premendo aquí.
Como nas edicións anteriores, establécense catro categorías segundo o medio de difusión: radio, televisión, internet ou prensa escrita. A maiores, como novidade, créase un premio extraordinario para proxectos elaborados polo alumnado de centros educativos. O prazo de inscrición está aberto ata o 11 de outubro de 2018. Accede ás bases premendo aquí.
26/07/2018. DINAMIZACIóN
A Mesa pola Normalización Lingüística presentou o manifesto “O cinema heroico galego”, que se enmarca nunha campaña de promoción do cinema rodado no noso idioma. A iniciativa parte co apoio inicial de 150 profesionais do sector audiovisual e quere concienciar a cidadanía da importancia do cinema galego como sector estratéxico para a normalización lingüística, para o reforzamento dos nosos alicerces culturais e para o desenvolvemento económico de Galicia. Os promotores do manifesto buscan tamén un compromiso firme a prol do cinema rodado en galego tanto por parte dos profesionais do sector (directoras/directores, guionistas, empresas de produción, salas de exhibición, distribuidoras...) como das institucións e poderes públicos. Podes ampliar a nova premendo aquí.
19/07/2018. DINAMIZACIóN
O Departamento de Lingua Galega do Concello de Santiago de Compostela presenta un programa de actividades lúdicas para que nenas e nenos poidan gozar en galego do seu tempo de lecer este verán. O programa, desenvolvido no marco do proxecto Apego, inclúe obradoiros didácticos, contacontos, espectáculos circenses, maxia, danza e mesmo espazos para o xogo libre. Podes informarte dos lugares e datas exactas de cada actividade premendo aquí.