A Comisión de Normalización Lingüística da Facultade de Farmacia da USC, co apoio do Servizo de Normalización Lingüística da USC, convoca o II Concurso de subtitulación de vídeos TED de Ciencias da Saúde ao galego, coa finalidade de estimular o uso do galego na área de ciencias da saúde e fomentar a existencia de recursos divulgativos en galego en novos soportes. O certame inclúe dúas modalidades, unha dirixida a membros da comunidade universitaria da USC que non pertenzan á comunidade TED (modalidade A) e outra destinada a membros da comunidade TED (modalidade B). Os participantes deben realizar a tradución ao galego e a subtitulación dun vídeo TED da área de saúde segundo as instrucións que se lles fornecerán. O premio está dotado con 250 euros para a modalidade A e 150 euros para a modalidade B, ademais dun diploma honorífico. O prazo para presentar os vídeos remata o 30 de abril de 2017.
17/03/2017. DINAMIZACIóN
15/03/2017. INVESTIGACIóN
A editorial Xerais presenta “Básicos Ciencia”, unha nova colección que nace para contribuír á divulgación científica e, ao mesmo tempo, normalizar o uso do noso idioma neste ámbito. O proxecto inaugúrase con tres títulos: Historia do ADN, 40 anos de revolución biotecnolóxica, de Daniel Soutullo; O universo matemático. Das ideas e das técnicas, de Antón Labranha; e Terra. Ciencias, aventuras e sorpresas dunha viaxe arredor do mundo, de Xurxo Mariño. A colección irase completando no futuro con outras obras que, igual ca estas tres primeiras, terán como finalidade a divulgación da ciencia, contada por científicos/as galegos/as en idioma galego. Para ampliar a nova, preme aquí.
14/03/2017. DINAMIZACIóN
O Servizo de Dinamización Lingüística de Escolas Católicas Galicia, coa colaboración da Secretaría Xeral de Política Lingüística, organiza a conferencia “A toponimia como ferramenta normalizadora da nosa lingua nos centros de ensino. O patrimonio inmaterial vencellado ás TIC”, dirixida principalmente a docentes e, en xeral, a todas as persoas interesadas no estudo do noso idioma. A conferencia, impartida por Vicente Feijoo (responsable de Toponimia no Seminario de Onomástica da Real Academia Galega), terá lugar o vindeiro 16 de marzo en Ourense (Liceo de Ourense) e o 17 de marzo en Santiago de Compostela (Cidade da Cultura), en horario de 18:00 a 20:00 h. O acceso é libre ata completar aforo.
14/03/2017. EMPREGO
A Deputación Provincial de Pontevedra convoca 200 bolsas de prácticas laborais destinadas a persoas con titulación universitaria ou de ciclos formativos de grao superior de formación profesional, sen experiencia laboral previa no ámbito da súa titulación académica, coa finalidade de completar a súa formación. Entre estas bolsas, convócanse dúas para persoas que posúan a Licenciatura en Filoloxía Galega ou o Grao en Lingua e Literatura Galegas, que desenvolverán as súas tarefas no Departamento de Servizos Lingüísticos da Deputación de Pontevedra. As bolsas terán unha duración de 6 meses, prorrogables por outros 6. O prazo de presentación de solicitudes é de vinte días naturais, contados a partir do seguinte ao da publicación da convocatoria.
13/03/2017. AXUDAS E PREMIOS
A Deputación da Coruña publica, no BOP do 13 de marzo de 2017, a resolución provisional das subvencións a concellos e entidades locais da provincia da Coruña para a creación, mantemento e reforzo dos servizos de normalización lingüística durante o ano 2017. A partir do día seguinte á publicación desta resolución, os solicitantes teñen un prazo de 10 días hábiles para comunicar a súa renuncia, se fose o caso, a estas axudas. De non tramitar esta renuncia no citado prazo, enténdese que aceptan a axuda. Para consultar o texto completo da resolución, preme aquí.
10/03/2017. INVESTIGACIóN
A Real Academia Galega e a Asociación Galega de Onomástica presentarán hoxe a obra Toponimia de Agolada, o primeiro volume da colección “Terra nomeada”, coa que se pretende achegarlle á cidadanía, de xeito científico e divulgativo, o seu patrimonio toponímico. Neste primeiro volume explícase a orixe e evolución dos topónimos das 24 parroquias e 163 lugares do concello pontevedrés de Agolada. O acto público de presentación terá lugar hoxe, 10 de marzo, ás 19 horas, na Casa Museo dos Pendellos de Agolada. A colección irase completando con outros volumes nos que se explicarán os nomes de todas as entidades de poboación dos concellos de Galicia, así como dos seus principais montes e ríos. Para ampliar información, preme aquí.
10/03/2017. DINAMIZACIóN
A Secretaría Xeral de Política Lingüística da Xunta de Galicia botou a andar a sexta edición do programa FalaRedes, que este ano se inaugura coa actividade A galiña azul, unha adaptación teatral do libro de relatos homónimo escrito por Carlos Casares, autor ao que se lle dedica o Día das Letras Galegas 2017. O espectáculo, destinado a público de 6 a 10 anos e ás súas familias, contén cinco historias nas que se transmiten mensaxes de defensa da diversidade lingüística, a importancia das diferenzas ou a liberdade de expresión. A actividade percorrerá 21 concellos galegos durante os meses de marzo e abril. O programa FalaRedes 2017, deseñado para fomentar a oferta de lecer en galego nos concellos adscritos á Rede de Dinamización Lingüística, irase completando con outras actividades ao longo do ano, das que se dará conta no Portal da Lingua Galega.
08/03/2017. OUTRAS
A Fundación Pública Urxencias Sanitarias de Galicia-061 publica a versión en galego do manual Recomendacións para a Resucitación 2015 do Consello Europeo de Resucitación (ERC). A tradución ao galego deste manual, autorizada polo Consello Español de Resucitación Cardiopulmonar (CERCP), foi elaborada por Marcos Gabriel García López, médico residente no Complexo Hospitalario Universitario de Santiago (CHUS); e Rosalía Ferreiro García, licenciada en Filoloxía Galega e Filoloxía Románica, coa supervisión da Secretaría Xeral de Política Lingüística da Xunta de Galicia.
08/03/2017. CURSOS E CONGRESOS
A Secretaría Xeral de Política Lingüística da Xunta de Galicia anuncia a convocatoria de cursos de lingua galega preparatorios das probas para obter os certificados de lingua galega Celga 1, Celga 2, Celga 3 e Celga 4. Estes cursos poderán ser solicitados por todas as persoas maiores de dezaseis anos ou por aquelas que os fagan no ano 2017. O prazo para a presentación das solicitudes será de 20 días naturais, contados a partir do día seguinte ao da publicación da convocatoria (corrección de erros).
07/03/2017. DINAMIZACIóN
A Facultade de Matemáticas da USC, en colaboración co Servizo de Normalización Lingüística da USC, organiza unha nova edición do concurso Explícoche matemáticas 2.0, co obxectivo de promover o uso do galego como medio de transmisión do coñecemento matemático, así como a creatividade do alumnado. O certame está dirixido ao alumnado das universidades públicas do estado español, procedentes de titulacións de grao ou mestrado e a estudantes de 3º e 4º da ESO e 1º e 2º de Bacharelato e ciclos de Formación Profesional dos centros de educación secundaria de Galicia e comunidades limítrofes. Para participar cómpre realizar unha curtametraxe de dous minutos de duración nas que se explique en galego un concepto matemático. Outorgarase un premio de 300 euros por cada categoría. O prazo para enviar os proxectos remata o 22 de abril de 2017.
07/03/2017. AXUDAS E PREMIOS
O Servizo de Normalización Lingüística do Concello de Carballo convoca a décimo terceira edición deste premio deseñado para promover a reflexión sobre a situación social da lingua galega e incentivar o seu uso na prensa escrita. Outorgarase un único premio de 1250 euros, ademais da publicación do artigo gañador nos nove medios de comunicación que colaboran coa iniciativa. O prazo de presentación dos artigos, que deben ser inéditos, remata o 17 de abril de 2017. Podes consultar as bases completas do certame premendo aquí.
03/03/2017. DINAMIZACIóN
A área de Normalización Lingüística da Deputación da Coruña presenta o programa de dinamización lingüística “Coa lingua fóra”, deseñado para promover a socialización en galego, favorecer as actitudes positivas cara ao noso idioma e incentivar o pensamento crítico dos nenos/as e adolescentes, un sector da poboación clave para a normalización do galego. O programa, que se desenvolverá durante os meses de marzo e abril de 2017 en corenta concellos da provincia da Coruña, inclúe actividades de animación á lectura, un espectáculo de clown e obradoiros sobre prexuízos lingüísticos. Podes ampliar información sobre esta iniciativa, premendo aquí.
27/02/2017. INVESTIGACIóN
O Consello da Cultura Galega e o Instituto da Lingua Galega da Universidade de Santiago presentan A lingua galega no solpor medieval, unha obra editada por Ramón Mariño e Xavier Varela que compila diversos traballos sobre a situación da lingua galega nos séculos XV e XVI, especialmente sobre o abandono do seu uso escrito formal. O acto de presentación terá lugar o vindeiro xoves, 2 de marzo de 2017, ás 12 h, na sede do Consello da Cultura Galega. Podes consultar ou descargar a edición dixital desta obra no web do CCG.
24/02/2017. INVESTIGACIóN
A Mesa pola Normalización Lingüística presentou o "Informe sobre a lingua galega na educación infantil de Galiza de 3 a 6 anos. Curso 2016/17", un estudo que esta entidade viña elaborando anualmente para analizar os usos lingüísticos na educación infantil das sete cidades galegas e que nesta última edición pasa a recoller os datos do conxunto de Galicia. En termos xerais, constátase unha fenda no uso do galego entre o ámbito rural, onde o galego é lingua predominante, e o urbano, onde o noso idioma ten un uso minoritario. No caso concreto das sete cidades galegas, o 33% dos centros declara empregar o castelán en exclusiva na aula e o 39% declara empregalo de xeito maioritario, o que sumaría un 72% de centros onde o galego ou ben non ten presenza ou a ten de xeito minoritario. No resto dos centros, un 20% afirma empregar os dous idiomas (castelán e galego) equitativamente e un 9% declara que usa máis o galego.
24/02/2017. DINAMIZACIóN
Institucións, entidades culturais e centros de ensino do país conmemoran hoxe o Día de Rosalía de Castro, escritora determinante na reivindicación e prestixio do galego no século XIX, cuxa obra e mensaxe continúa vixente entre as novas xeracións e soportes de comunicación. A Asociación de Escritores en Lingua Galega, entidade promotora desta conmemoración, organizou o seu acto central de homenaxe o pasado domingo, 19 de febreiro, no Panteón de Galegos Ilustres, onde tivo lugar unha lectura pública de poemas rosalianos. Pola súa parte, a comunidade educativa está a participar hoxe difundindo nas redes sociais os seus traballos de homenaxe á autora coa etiqueta #RosalíaTe. A cidadanía no seu conxunto está tamén convocada a festexar esta data participando nos diversos actos que concellos, universidades e institucións culturais do país están a desenvolver estes días.
23/02/2017. DINAMIZACIóN
A Asociación Queremos Galego Marín organiza, dentro do programa de actividades da sección “Ser lingua non é fácil”, a proxección do documental “Por obra e gracia do idioma”, autoría de Andrea Bernárdez. O documental, que foi elaborado como traballo de fin de grao da autora, reflexiona sobre a realidade lingüística do noso país a través de entrevistas con diferentes persoeiros do ámbito político e cultural. A proxección terá lugar o 3 de marzo, ás 20:00 h, no Museo Manuel Torres de Marín. Podes ver un extracto do traballo nesta ligazón. A partir de maio estará accesible na súa totalidade en Internet.
22/02/2017. DINAMIZACIóN
A Real Academia Galega (RAG) presentou, no CEIP Carlos Casares de Nigrán, o proxecto web Primavera das Letras 2017, dedicado ao escritor Carlos Casares, que este ano será o autor homenaxeado no Día das Letras Galegas. O web compila materiais lúdicos e didácticos deseñados para o profesorado e o alumnado de infantil e primaria, ademais de información biográfica e bibliográfica sobre o autor. Podes obter máis información premendo aquí.
22/02/2017. AXUDAS E PREMIOS
O Festival de Contidos Dixitais Carballo Interplay, que celebrara a súa cuarta edición entre os días 3 e 6 de maio de 2017 en Carballo, convoca o Premio a proxecto de webserie en galego. O premio, dotado de 1.500 euros, debe destinarse á produción de, como mínimo, tres capítulos do proxecto da webserie premiada, que debe estar rodada en versión orixinal en galego. O prazo para enviar os proxectos remata o 11 de abril de 2017. Para consultar as bases do premio, preme aquí.
22/02/2017. EMPREGO
A Universidade de Vigo convoca tres bolsas de formación na súa Área de Normalización Lingüística (ANL) destinadas á formación complementaria do estudantado, que participará nas actividades de dinamización, formación e planificación lingüística que se desenvolven na ANL.
Os solicitantes deben ser estudantes de Filoloxía Galega, Grao en Estudos de Galego e Español (itinerario lingua galega e española/lingua e literatura galega) ou de Tradución e Interpretación (Lingua A: Galego) da Universidade de Vigo no curso 2015/2016, estar matriculados no curso 2016/2017, e ter cursado polo menos a metade dos créditos da titulación. O prazo de presentación de solicitudes remata o vindeiro 3 de marzo de 2017, ás 14:00 h.
Os solicitantes deben ser estudantes de Filoloxía Galega, Grao en Estudos de Galego e Español (itinerario lingua galega e española/lingua e literatura galega) ou de Tradución e Interpretación (Lingua A: Galego) da Universidade de Vigo no curso 2015/2016, estar matriculados no curso 2016/2017, e ter cursado polo menos a metade dos créditos da titulación. O prazo de presentación de solicitudes remata o vindeiro 3 de marzo de 2017, ás 14:00 h.
21/02/2017. OUTRAS
A UNESCO conmemora hoxe, 21 de febreiro, o Día Internacional da Lingua Materna. Desde 1999, celébrase neste día a riqueza que supón a diversidade lingüística do planeta, con programas e actividades destinadas a preservar este patrimonio e a promover o plurilingüismo. Como é costume, a directora xeral da UNESCO, Irina Bokova, fixo pública a mensaxe institucional con motivo desta celebración, facendo especial fincapé este ano no potencial da educación multilingüe como garantía para a construción de futuros sostibles.
20/02/2017. LEXISLACIóN
A Mesa pola Normalización Lingüística presentou publicamente o pasado sábado, 18 de febreiro de 2017, a "Proposición de Lei por Iniciativa Lexislativa Popular de medidas para a garantía dos dereitos lingüísticos no ámbito socioeconómico", coa que se pretende desenvolver legalmente o dereito da cidadanía á información e á atención en galego nas relacións comerciais. A ILP conta co apoio inicial de 120 persoas destacadas de diferentes ámbitos (empresarial, sindical, académico, xurídico e cultural), e a partir de agora A Mesa iniciará unha campaña social para xuntar entre a cidadanía as sinaturas necesarias para a súa presentación no Parlamento de Galicia. Podes ampliar información sobre esta nova no web da Mesa. No xornal Praza Pública tamén podes consultar o documento co texto exacto da ILP.
20/02/2017. CURSOS E CONGRESOS
A Escola Galega de Administración Pública convoca cursos de formación continua para o persoal da Administración pública da Comunidade Autónoma de Galicia. Entre a formación programada, ofértanse os seguintes cursos de contido lingüístico: “Linguaxe administrativa non sexista e imaxe igualitaria na práctica da xestión pública”; “Redacción de documentos técnico-xurídicos en galego”; e “Actualización gramatical e ortográfica da lingua galega”. O prazo de presentación de solicitudes será de dez días naturais, contados a partir do día seguinte ao da publicación da convocatoria.
20/02/2017. DINAMIZACIóN
A Deputación da Coruña convoca a segunda edición do concurso musical infantil “Quero Cantar”, coa intención de fomentar o uso da lingua galega, así como a creatividade poética e musical. O certame está dirixido a grupos musicais de ámbito galego, formados por rapaces e rapazas de ata 16 anos, que interpreten unha composición en galego con letra e música orixinais e inéditas. Os tres primeiros clasificados de cada categoría recibirán como premio produtos culturais e material musical. A maiores, o primeiro grupo clasificado tamén será premiado coa gravación dun videoclip da canción gañadora. O prazo para a presentación de solicitudes remata o 20 de xuño de 2017. Para ampliar esta información, preme aquí.
16/02/2017. DINAMIZACIóN
O Departamento de Lingua Galega do Concello de Santiago organiza, no marco do proxecto Apego, o obradoiro “Emocións e lingua”, dirixido a nenas e nenos de 4 a 10 anos. Trátase dun obradoiro lúdico de cinco sesións onde a través da música, os xogos e o teatro, os nenos/as aprenderán a xestionar as emocións que xorden naquelas situacións nas que a convivencia entre linguas non é pacífica. As sesións terán lugar os venres 10, 17, 24 e 31 de marzo (de 17:30 a 19:30 h) e o sábado 1 de abril (de 11 a 13 h). Podes inscribirte enviando un correo ao seguinte enderezo: dlg@santiagodecompostela.gal. Para consultar a programación completa de actividades que se están a desenvolver en Santiago no marco do proxecto Apego, preme aquí.
16/02/2017. OUTRAS
A Real Academia Galega presenta Os apelidos en galego. Orientacións para a súa normalización, unha publicación que achega a listaxe normalizada de 1.500 apelidos (os de aproximadamente o 90% da poboación galega), co obxectivo de facilitar o procedemento de restitución das formas correctas. A obra, de interese para toda a cidadanía, será de especial utilidade para os traballadores dos rexistros civís, que a partir de agora teñen ao seu dispor a listaxe oficial de formas normalizadas, polo que xa non será preciso que a cidadanía presente ningún tipo de certificación adicional. Podes obter máis información sobre esta nova premendo aquí. Tamén che pode resultar de utilidade a información que ofrece o SNL da Universidade de Santiago sobre os trámites administrativos necesarios para solicitar a galeguización de nomes e apelidos.
15/02/2017. DINAMIZACIóN
O alumnado de tres institutos de Ponteareas (IES do Barral, IES Pedra da Auga e IES Val do Tea) participa, xunto co alumnado do centro Archbishop McHale College Tuam (Galway – Irlanda), no Proxecto Erasmus + “Linguas minorizadas, diversidade cultural e integración na Unión Europea do século XXI”. No marco deste proxecto, de tres anos de duración, o alumnado galego e irlandés intercambiará coñecementos sobre a situación do galego e o gaélico con respecto ao castelán e o inglés, respectivamente. Ademais de estadías e diferentes actividades didácticas conxuntas, tamén está previsto a realización dun programa anual de televisión que será emitido pola TVG e a TG4 (canle irlandesa) no que o alumnado promocionará as súa respectivas vilas usando simultaneamente o galego e o gaélico. Podes seguir o desenvolvemento do proxecto a través do seu blog.
15/02/2017. DINAMIZACIóN
Co gallo da celebración, o vindeiro 24 de febreiro, do Día de Rosalía, o Servizo de Normalización Lingüística do Concello de Vigo organiza diferentes actos para conmemorar esta data. O programa de actividades, que se desenvolverá os días 18, 20 e 23 de febreiro de 2017, inclúe un paseo literario polo Vigo de Rosalía; unha charla sobre a influencia no Rexurdimento de Vigo, cidade onde se editou “Cantares Gallegos”; e un acto de recitado de poesía, no que participará o alumnado de diferentes centro de ensino do municipio. Para ampliar información, preme aquí.
15/02/2017. AXUDAS E PREMIOS
A Deputación Provincial de Pontevedra publica as bases de subvencións para a dinamización lingüística nos concellos e outras entidades locais da provincia de Pontevedra. O obxecto da convocatoria é a creación ou mantemento de servizos de normalización lingüística (SNL), así como o desenvolvemento de programas de dinamización do galego. Poden optar a estas axudas os concellos, as agrupacións de concellos ou as entidades locais menores da provincia, ata un máximo de 50.000 habitantes. O prazo de presentación de solicitudes remata o 31 de marzo de 2017. Para consultar o texto completo da convocatoria, preme aquí.
14/02/2017. DINAMIZACIóN
A Secretaría Xeral de Política Lingüística e a Dirección Xeral de Xuventude, Participación e Voluntariado organizan unha nova edición de Lingua de namorar, un concurso en liña de mensaxes de amor en lingua galega dirixido a mozos e mozas de 14 a 35 anos. A iniciativa está deseñada para dinamizar o uso do galego nas relacións persoais e mais no ámbito tecnolóxico. Outorgaranse tres premios tecnolóxicos por cada unha das categorías de idade establecidas. O prazo para enviar as mensaxes remata o 5 de marzo de 2017.
14/02/2017. DINAMIZACIóN
A Xunta de Galicia, a Real Academia Galega, o Consello da Cultura Galega, a Fundación Carlos Casares, a Televisión de Galicia, o Centro PEN Galicia, a editorial Galaxia, a Deputación de Ourense e os concellos de Ourense e Xinzo de Limia presentaron onte, 13 de febreiro de 2017, na Cidade da Cultura, a programación conxunta de actividades coa que homenaxearán a Carlos Casares, escritor ao que se lle dedica este ano o Día das Letras Galegas. No que respecta ao Consello da Cultura Galega, organizará o seu tradicional Concerto das Letras e mais o Simposio Carlos Casares 2017. Tamén editará diferentes publicacións e recursos multimedia destinados a divulgar a figura e obra do escritor, que foi presidente do CCG entre os anos 1996 e 2002.