O Plenario da Real Academia Galega (RAG) acordou, na sesión ordinaria do pasado sábado, 9 de xullo de 2016, que o autor homenaxeado no Día das Letras Galegas 2017 será Carlos Casares (Ourense, 1941-Vigo, 2002), narrador, ensaísta, articulista de prensa, editor e dinamizador cultural. Como escritor abrangueu diferentes xéneros: narrativa, ensaio, teatro e xornalismo. Como intelectual comprometido coa normalización da cultura e lingua galegas, participou na elaboración da Lei de Normalización Lingüística (1983), foi director da editorial Galaxia (1986-2002) e da revista Grial (1988-2002) e tamén presidente do Consello da Cultura Galega (1996-2002). Para ampliar esta nova, preme aquí.
11/07/2016. OUTRAS
08/07/2016. AXUDAS E PREMIOS
O Concello de Ferrol publica as bases da vixésimo primeira edición deste certame de carácter bianual que ten como obxectivo promover a creación literaria e a investigación lingüística. O certame ten dúas modalidades: o “Premio de investigación lingüística ou ensaio” e o “Premio de creación literaria (narración curta)”. O xurado outorgará un premio de 3.700 euros para o/a gañador/a de cada unha das modalidades. O prazo para entregar os orixinais remata o 15 de setembro de 2016.
08/07/2016. AXUDAS E PREMIOS
A Consellería de Cultura, Educación e Ordenación Universitaria publica, no DOG do 8 de xullo de 2016, a resolución da convocatoria de axudas para o libro galego, tanto no que se refire á tradución para outras linguas de obras publicadas orixinariamente en galego como á tradución para o galego de obras publicadas orixinariamente noutras linguas. Para coñecer a listaxe de beneficiarios, preme aquí.
07/07/2016. DINAMIZACIóN
A Mesa pola Normalización Lingüística presentou a aplicación móbil A Liña do Galego, co ánimo de proporcionarlle á cidadanía unha nova canle de comunicación a través da que poidan transmitir tanto parabéns, cando queiran recoñecer o labor de quen usa o galego con normalidade, como queixas, cando sintan que os seus dereitos lingüísticos están sendo agredidos. A aplicación, que pode descargarse de balde, está accesible tanto para IOS como para Android. Podes ampliar esta información premendo aquí.
07/07/2016. INVESTIGACIóN
A Asociación de Amigos do Mosteiro de Ferreira de Pallares organiza a décima edición deste certame que ten por obxecto fomentar a investigación en lingua galega sobre o antigo territorio que conformaba o Condado de Pallares (concellos de Guntín, Portomarín, Taboada, Chantada e Carballedo). Os traballos debe ser orixinais e inéditos, estar redactados en galego e ter unha extensión mínima de 100 folios. A temática debe cinguirse aos ámbitos lingüístico, histórico, artístico, arqueolóxico, antropolóxico, etnográfico e folclórico. O gañador/a recibirá un premio de 3.000 euros. O prazo de presentación remata o 2 de novembro de 2016. Para consultar as bases preme aquí.
06/07/2016. DINAMIZACIóN
O Departamento de Turismo e Normalización Lingüística do Concello de Arteixo presenta a cuarta edición da iniciativa “Xantar Arteixo”, que consiste na distribución entre os establecementos hostaleiros do municipio de 15.000 manteis individuais elaborados en colaboración co alumnado do IES Manuel Murguía. Os manteis levan impreso un mapa do concello con microtoponimia do litoral, así como unha listaxe de entrantes, peixe e marisco, carnes, verduras e sobremesa nos idiomas galego, castelán e inglés. Noutras edicións anteriores da campaña, tamén se distribuíron estes mesmos carteis, pousavasos con microtoponimia local e gardacubertos con relatos literarios impresos.
01/07/2016. OUTRAS
A Real Sociedad Española de Química facilita no seu sitio web a versión en galego da “Guía breve para a Nomenclatura en Química Inorgánica”, traducida e adaptada por Ana M. González Noya e Manuel R. Bermejo, profesores do Departamento de Química Inorgánica da Facultade de Química da USC. Trátase da versión galega das normas oficiais da IUPAC (International Union of Pure and Applied Chemistry), un documento que proporciona un esquema das regras de nomenclatura esenciais para elaborar nomes e fórmulas de compostos inorgánicos, de compostos de coordinación e de compostos organometálicos.
30/06/2016. OUTRAS
O Ministerio de Educación, Cultura e Deporte presenta os datos referidos ao ano 2015 da Estatística da Edición Española de Libros con ISBN. No que respecta aos libros editados en galego, os datos constatan un descenso do 3% en número de títulos (1.394 libros editados en 2015 fronte aos 1.439 editados en 2014). No referido ao conxunto do Estado, os libros editados en galego supoñen un 1,8% do total. Se o desexas, tamén podes consultar a nota co resumo dos datos facilitada polo Ministerio.
22/06/2016. DINAMIZACIóN
Xa están dispoñibles en Internet os 31 vídeos subtitulados ao galego que se presentaron ao concurso #TEDSaúde, que convocou o pasado mes de marzo a Comisión de Normalización Lingüística da Facultade de Enfermaría da USC. O vídeos gañadores foron “Videoxogos e cerebro”, tradución de Socorro Rodríguez, na modalidade A (membros da comunidade universitaria da USC); e “A linguaxe corporal determina quen somos”, tradución de Ana Rozados, na modalidade B (público xeral). Podes ver todos os vídeos presentados no web do Servizo de Normalización Lingüística da USC.
22/06/2016. EMPREGO
A Consellería de Cultura, Educación e Ordenación Universitaria publica a convocatoria de nove bolsas de formación en diferentes proxectos de investigación que se están a desenvolver no Centro Ramón Piñeiro para a Investigación en Humanidades. Trátase en concreto dos seguintes proxectos: Bibliografía da literatura galega (1 bolsa), Fraseoloxía galega (1 bolsa), Corpus de referencia do galego actual (1 bolsa), Cantigas de Santa María (1 bolsa), Prosa literaria medieval (1 bolsa), Terminoloxía científico-técnica (1 bolsa), Recursos para o desenvolvemento das tecnoloxías da fala (1 bolsa), Dicionarios de literatura (1 bolsa) e Base de datos do ALIR (1 bolsa). O prazo de presentación de solicitudes é dun mes, contado a partir do día seguinte ao da publicación desta convocatoria.
21/06/2016. AXUDAS E PREMIOS
A Consellería de Cultura, Educación e Ordenación Universitaria publica a resolución das axudas para os proxectos de fomento do uso do galego dos equipos de dinamización lingüística dos centros de ensino privados, para o curso escolar 2015/2016. No DOG do 21 de xuño de 2016 podes consultar a listaxe de centros beneficiarios (centros da Coruña, centros de Lugo, centros de Ourense, centros de Pontevedra).
16/06/2016. CURSOS E CONGRESOS
A Secretaría Xeral de Política Lingüística publica a convocatoria de cursos de lingua galega preparatorios para obter os certificados de lingua galega Celga 2, Celga 3 e Celga 4. Estes cursos poden ser solicitados por todas as persoas maiores de dezaseis anos, ou por aquelas que os fagan no ano natural da convocatoria. O prazo para a presentación das solicitudes será de 30 días naturais, contados a partir do día seguinte ao da publicación da convocatoria.
13/06/2016. CURSOS E CONGRESOS
O Servizo de Normalización Lingüística da Universidade da Coruña, en colaboración co Concello de Carballo, a Coordinadora de Traballadores/as de Normalización da Lingua e a Secretaría Xeral de Política Lingüística, organiza o XII Curso de verán sobre dinamización lingüística "Traballando en lingua", que nesta edición se centrará na análise do uso e prestixio do galego no sector empresarial. As sesións desenvolveranse os días 6 e 7 de xullo de 2016 no Fórum Carballo. O prazo de matrícula remata o 30 de xuño.
09/06/2016. DINAMIZACIóN
O Servizo de Normalización Lingüística (SNL) e o Centro de Información á Muller (CIM) da Mancomunidade de Ordes, en colaboración co Gabinete de Prensa, organizan a iniciativa “Con A de comarca”, coa que queren recoñecer o labor das mulleres da comarca no ámbito das letras. No marco da iniciativa, varias escritoras da comarca serán entrevistadas por profesionais de recoñecida traxectoria no eido do xornalismo para reflexionar sobre a súa creación artística. As conversas difundiranse na páxina de Facebook da iniciativa. Podes ampliar a información premendo aquí.
08/06/2016. EMPREGO
O Concello de Muros convoca un proceso selectivo para a provisión, mediante contratación laboral temporal, dun contrato de interinidade dun/ha normalizador/a lingüístico/a para o Servizo de Normalización Lingüística do concello. O sistema de selección será o concurso-oposición. Os/as aspirantes deben estar en posesión do título de licenciado/a en Filoloxía Galega ou equivalente. O prazo de presentación de instancias remata o 17 de xuño de 2016. Podes consultar as bases completas da convocatoria premendo aquí.
07/06/2016. DINAMIZACIóN
O Servizo de Normalización Lingüística do Concello de Redondela, en colaboración coa Radio Municipal de Redondela, organiza o I Concurso de teatro radiofónico escolar destinado a alumnado de 3º ciclo de primaria e ESO. As pezas radiofónicas, que foron gravadas durante estes dous últimos cursos, serán emitidas en Radio Redondela entre o 2 e o 17 de xuño no programa “A Estación”. O prazo de votacións será entre o 18 e o 27 de xuño a través do teléfono 986 400106 (de 8:00 a 15:00 h) ou do correo electrónico "radioredondela@hotmail.com". Outorgaranse dous premios, un á mellor dramatización radiofónica e outro á calidade lingüística. Os gañadores gozarán dunha visita guiada ao Museo Meirande e dunha viaxe en barco á Illa de San Simón. Para ampliar información, preme aquí.
06/06/2016. CURSOS E CONGRESOS
A Coordinadora de Traballadores/as de Normalización da Lingua convoca un obradoiro de pensamento creativo baseado no método CPS (Creative Problem Solving). Os obxectivos deste curso son proporcionar formación avanzada en materia de creatividade, adquirir dinámicas que incrementen a motivación e a capacidade de mobilización do equipo e aprender a implementar accións que activen a creatividade de terceiras persoas, dirixíndoa a proxectos de promoción do galego. O obradoiro está dirixido a técnicos/as de normalización lingüística, a membros dos equipos de normalización e dinamización lingüística dos centros de ensino e a persoas interesadas en xeral. As sesións desenvolveranse os días 30 de xuño e 1 de xullo na Nave de Vidán (Santiago de Compostela). O prazo de inscrición remata o 20 de xuño de 2016.
06/06/2016. DINAMIZACIóN
O Equipo de Dinamización da Lingua Galega da EASD Mestre Mateo e o Clube da Lingua do IES Marco do Camballón promoven a campaña “A lingua, a arte da túa terra. Boinas en Compostela”, coa que pretenden transmitir unha imaxe moderna e creativa do idioma galego, vinculado a valores como a igualdade de xénero ou a xustiza social. A iniciativa consiste na difusión polas rúas de Compostela de retratos de personaxes da escena cultural e social galega ataviados con boina, con complementos deseñados e realizados polo alumnado de Xoiaría da EASD. Así mesmo, os retratos foron realizados polo alumnado de 2º do Ciclo Superior de Fotografía da mesma escola. Podes ver os deseños na páxina de Facebook do Departamento de Lingua do Concello de Santiago, que colabora na difusión da iniciativa.
06/06/2016. EMPREGO
A Universidade de Salamanca convoca o concurso público para a provisión dunha praza de profesor/a lector/a de lingua, literatura e cultura galegas. A duración do contrato será para o curso académico 2016/2017. Os aspirantes deben estar en posesión do título de Licenciatura en Filoloxía Galega ou en Filoloxía Románica (sempre que a primeira ou segunda lingua románica elixida fose o galego), Grao en Lingua e Literatura Galegas, Grao en Estudos de Galego e Español ou Grao en Galego e Portugués: Estudos Lingüísticos e Literarios. A idade máxima dos aspirantes non debe superar os 35 anos na data de remate do prazo de presentación de solicitudes, que remata o 16 de xuño de 2016. Para obter máis información, preme aquí.
06/06/2016. AXUDAS E PREMIOS
A Secretaría Xeral de Política Lingüística publica a resolución das axudas para os proxectos de fomento do uso do galego nos centros de ensino non universitario de titularidade pública, para o curso escolar 2015/2016. Podes consultar a listaxe de centros beneficiarios premendo aquí.
06/06/2016. AXUDAS E PREMIOS
A Consellería de Cultura, Educación e Ordenación Universitaria convoca os Premios da Cultura Galega para o ano 2016 nas seguintes modalidades: Letras, Artes Plásticas, Artes Escénicas, Música, Audiovisual, Patrimonio Cultural, Promoción Exterior e Lingua. Poderán ser candidatas as persoas, colectivos ou entidades que se distingan pola súa traxectoria vinculada co obxecto da modalidade correspondente. As candidaturas só poderán ser presentadas por institucións e entidades culturais ou profesionais, públicas ou privadas, relacionadas co obxecto de cada premio. O prazo de presentación é de dous meses, contados desde o día seguinte ao da publicación da convocatoria.
01/06/2016. CURSOS E CONGRESOS
A Escola Galega de Administración Pública convoca, en colaboración coa Secretaría Xeral de Política Lingüística, cinco cursos de nivel superior de linguaxe administrativa galega dirixidos ao persoal ao servizo das distintas administracións da Comunidade Autónoma de Galicia. Os cursos (catro na modalidade de teleformación e un na modalidade presencial) desenvolveranse ao longo dos meses de setembro, outubro e novembro de 2016. O prazo de presentación de solicitudes é de dez días naturais, contados a partir do seguinte ao da publicación da convocatoria.
01/06/2016. AXUDAS E PREMIOS
O xurado dos Premios Lois Peña Novo deu a coñecer os gañadores da vixésimo segunda edición destes galardóns, deseñados para animar o proceso de normalización lingüística no eido das administracións públicas, na vida institucional de Galicia e na sociedade en xeral. Nesta edición os/as premiados/as son Francisco Díaz-Fierros Viqueira, doutor en Farmacia e catedrático en Edafoloxía e Química da USC; Xosé Manuel Cid Fernández, doutor en Pedagoxía e profesor na Facultade de Ciencias da Educación da Universidade de Vigo; e o Concello de Brión, pola utilización ininterrompida desde 1979 do galego como lingua de uso normal no concello. O acto de entrega será o 30 de xuño de 2016, ás 19:30 h, no castelo de Soutomaior.
31/05/2016. DINAMIZACIóN
O Concello de Santiago convoca o IV Concurso de proxectos de publicidade comercial en galego, cos obxectivos de fomentar o uso do galego na comunicación comercial, asociar o noso idioma a proxectos de modernización e promover eficiencia comunicativa no tecido empresarial compostelán. Para participar cómpre presentar un proxecto orixinal dirixido a publicitar un establecemento comercial, hostaleiro ou empresarial, ou un grupo formal ou informal de establecementos composteláns. O prazo de inscrición remata o 30 de xuño de 2016. Outorgaranse dous premios, cunha dotación cada un deles de 5.000 euros.
26/05/2016. DINAMIZACIóN
Ora Galega e a Deputación da Coruña promoven o proxecto iFala, unha exposición itinerante deseñada para homenaxear o legado das Irmandades da Fala cunha linguaxe e uns medios novos. O autobús iFala, que percorrerá diferentes cidades e vilas galegas, contén unha exposición sobre os cen anos das Irmandades, así como outros recursos tecnolóxicos (aplicación móbil, páxina web e vídeo musical) cos que se quere reivindicar a actualidade e modernidade da mensaxe das Irmandades. Para ampliar a nova, preme aquí.
26/05/2016. OUTRAS
Aenor acaba de engadir ao seu catálogo a versión en galego de tres normas UNE-ISO, grazas a un convenio de colaboración co Servizo de Normalización Lingüística da Universidade de Santiago, que se ocupou da súa tradución. As tres normas traducidas, que supoñen case o 20 por cento do volume de ventas de Aenor, son a 9001:2015 “Sistemas de xestión da calidade. Requisitos”; 9004:2009 “Xestión para o éxito sostido dunha organización. Enfoque de xestión da calidade”; e 14001:2015 “Sistemas de xestión ambiental. Requisitos con orientación para o seu uso”. Estas normas pódense descargar de balde desde calquera equipo conectado á rede da USC.
24/05/2016. DINAMIZACIóN
O Consello da Cultura Galega e a Consellería de Cultura, Educación e Ordenación Universitaria da Xunta de Galicia, coa colaboración do Concello de Cangas, organizan a cuarta edición do certame musical No bico un cantar, co obxectivo de trasladar a paixón pola música culta e a poesía galega a escolares de toda Galicia. Nesta edición, o alumnado dos conservatorios profesionais de música de Galicia homenaxeará aos trobadores interpretando as cantigas “Pois nosas madres” (da autoría de Pero Viviaez), “Canción do mariñeiro” (de Lourenço), “Quanto sabedes amar-Ondas do mar de Vigo” (de Martín Códax) e “Rosa das Rosas” (de Alfonso X O Sabio). Tamén soará "Maio longo" (de Rosalía de Castro). O concerto, dirixido por Maximino Zumalave co acompañamento do quinteto de metais Hércules Brass, celebrarase en Cangas o 3 de xuño de 2016.
23/05/2016. OUTRAS
Mañá, 24 de maio de 2016, ás 17:30 h, terá lugar na Facultade de Filosofía da Universidade de Santiago de Compostela (USC) o acto de presentación en Galicia do Protocolo internacional de garantía de dereitos lingüísticos. O documento, que está a elaborarse no marco de "Donostia 2016", recollerá as condicións mínimas necesarias para garantir os dereitos lingüísticos da cidadanía. Na presentación, organizada pola USC e a Mesa pola Normalización Lingüística, intervirán Paul Bilbao (representante de Kontseilua - Donostia 2016), María do Pilar García Negro (membro do comité científico internacional), María do Carme Silva (vicerreitora da USC) e Marcos Maceira (presidente da Mesa). O acto, aberto ao público, está especialmente dirixido ás entidades sociais, para que coñezan o proxecto e poidan achegar as súas propostas. Para ampliar a nova, preme aquí.
20/05/2016. AXUDAS E PREMIOS
O xurado do XII Premio a Artigos Xornalísticos Normalizadores do Concello de Carballo acordou outorgarlle o galardón nesta duodécima edición ao artigo Non por min, por eles, de Borxa González Tenreiro, tradutor ferrolán residente en Lisboa. O premio está dotado con 1.000 euros, ademais da difusión nos nove medios colaboradores coa iniciativa, que o publican hoxe, 20 de maio. Podes lelo en Internet en Galicia Confidencial, La Voz de Galicia, Praza Pública, Que pasa na Costa, Sermos Galiza e Tempos Novos. Para ampliar a nova, preme aquí.
20/05/2016. EMPREGO
A Consellería de Cultura, Educación e Ordenación Universitaria publica a convocatoria de seis bolsas de formación nos lectorados de lingua, literatura e cultura galegas. As bolsas ofertadas son nas seguintes universidades: Universidade de Berlín, Universidade Nova de Lisboa, Universidade de Roma La Sapienza, Universidade de Zádar, Universidade do Estado de Río de Xaneiro e Universidade de San Paulo. O prazo de presentación de solicitudes é dun mes, contado a partir do día seguinte ao da publicación da convocatoria.