O equipo de tradución ao galego de Ubuntu informa que xa está ao dispor dos/as usuarios/as a versión 16.04 do sistema operativo Ubuntu, con asistencia durante 5 anos e tradución completa ao galego. Podes descargar esta versión, distribuída baixo o nome Xenial Xerus, premendo aquí. No web do Proxecto Trasno podes acceder a información especializada sobre esta nova, así como sobre outros proxectos de localización de software libre ao galego.
02/05/2016. OUTRAS
29/04/2016. DINAMIZACIóN
A iniciativa Twitter en galego convoca a segunda edición do concurso Premio á Conta 2016, co obxectivo de premiar o uso do galego por parte das usuarias e usuarios desta rede social. Os usuarios/as teñen de prazo ata o 7 de maio para propoñer aquela conta que consideran merecedora do premio. A conta gañadora, que será elixida por un xurado de entre as tres contas máis mencionadas polos usuarios/as, darase a coñecer o 17 de maio, coincidindo co Día das Letras Galegas. O premio, de carácter meritorio, consistirá na entrega dunha figura conmemorativa e mais dun exemplar da revista Infumable. Así mesmo, a conta premiada gozará durante un ano dun espazo destacado no propio web da iniciativa.
28/04/2016. DINAMIZACIóN
A Comisión de Normalización Lingüística da Facultade de Ciencias da Comunicación e o Servizo de Normalización Lingüística da USC convocan o V Premio de pezas audiovisuais curtas de comedia "Somos a curta!", que ten como obxectivo promover o uso da lingua galega nos novos valores do audiovisual galego. O certame está destinado ao alumnado das universidades galegas, das titulacións impartidas nas escolas oficiais de Imaxe e Son ou da titulación de bacharelato artístico de calquera dos institutos de educación secundaria de Galicia. O xurado outorgará dous premios, de 500 e 250 euros respectivamente, e diploma honorífico. Haberá tamén un premio do público, dotado dun diploma honorífico. O prazo para presentar as propostas remata o 12 de outubro de 2016.
28/04/2016. INVESTIGACIóN
A Chave é un proxecto colectivo deseñado para prestixiar a lingua galega, concienciado a cidadanía da súa riqueza léxica e expresiva. O seu obxectivo é empregar o galego para vehicular a comunicación en calquera nivel, en todas as áreas do coñecemento e da cultura, e coa máxima calidade lingüística. As principais liñas de traballo céntranse no ámbito lexicográfico. Neste momento está accesible en liña a colección de léxicos de elaboración propia cos nomes galegos das algas, os cogomelos, as bolboretas, os anfibios, os réptiles, as aves e os cetáceos. No futuro tamén teñen previsto traballar na elaboración de dicionarios. Ademais, A Chave ofrece un directorio coas ligazóns a sitios web de referencia do ámbito da lingua, a cultura e a sociedade.
26/04/2016. DINAMIZACIóN
O Servizo de Normalización Lingüística do Concello de Pontevedra organiza unha nova edición do Galegote Rock, un programa de concertos que ten como obxectivos promover os grupos musicais que cantan en galego e crear espazos de uso para o noso idioma no ámbito do lecer. O Galegote Rock celebrarase os días 12, 13 e 14 de maio de 2016 na cidade de Pontevedra. Nesta edición actuarán Familia Caamagno, Camarada Nimoy, Santos Morcegos, Roger de Flor, Querido Extraño, Poetarras, Davide Salvado, Champurrada, Tatan Chapeu, Tanto Nos Ten, Alley Stompers, Escola de Baile Lindy Hop, O Cadelo Lunático, Mike Grelo e Curmán, Sokram e O Xabarín de Bora. Para ampliar a nova, preme aquí.
25/04/2016. DINAMIZACIóN
A Fundación Eduardo Pondal presenta o Festiletras 2016, un amplo programa de actividades culturais que se desenvolverá entre os días 15 e 22 de maio na aldea do Couto, en Ponteceso, para conmemorar o vindeiro Día das Letras Galegas. O programa inclúe actuacións musicais, exposicións de pintura e escultura, degustacións gastronómicas, recitais poéticos, teatro ou mostras literarias, entre outras actividades. Podes ampliar esta información na páxina de Facebook do Festiletras.
25/04/2016. AXUDAS E PREMIOS
A Consellería de Cultura, Educación e Ordenación Universitaria convoca axudas destinadas aos concellos de Galicia para a dotación de novidades editoriais en galego en formato físico, con destino a bibliotecas e/ou axencias de lectura públicas de titularidade municipal, integradas na Rede de bibliotecas de Galicia. Os concellos teñen un mes de prazo para presentar as súas solicitudes, contado a partir do día seguinte ao da publicación do extracto desta convocatoria.
22/04/2016. DINAMIZACIóN
A Coordinadora de Traballadores/as de Normalización da Lingua presenta a segunda edición da campaña Que se vexa! O galego, coa que solicitan que se utilice a celebración das Letras Galegas para dar máis visibilidade ao noso idioma en todas as situacións sociais. Con este obxectivo, a CTNL enviará a todos os concellos, institucións, centros de ensino e entidades unha proposta convidándoos a ofrecer, nos actos que organicen arredor do Día das Letras Galegas, unha imaxe do galego como lingua moderna e útil para todos os ámbitos.
22/04/2016. DINAMIZACIóN
O Servizo de Normalización Lingüística e a Biblioteca municipal do Concello de Moaña organizan diferentes actividades de dinamización lingüística e fomento da lectura dirixidas ao público familiar, que se desenvolverán ao longo dos meses de abril, maio e xuño. O programa (que inclúe contacontos, maxia e música) inaugúrase hoxe, 22 de abril, ás 18:00 h, na Axencia Municipal de Lectura de Domaio co espectáculo "As historias de Kamishibai", unha actividade de narración oral con papel e teatro.
21/04/2016. DINAMIZACIóN
O Consello da Cultura Galega presentou, no marco das actividades previstas para celebrar o Día das Letras Galegas, a reedición facsimilar dunha das obras máis destacadas de Manuel María, Advento. Esta edición conta cun limiar de Ramón Villares e un estudo crítico de Miguel Anxo Fernán Vello. En homenaxe a Manuel María, o CCG organizará tamén o vindeiro 17 de maio o seu tradicional Concerto das Letras, que nesta edición terá lugar no Teatro Rosalía de Castro da Coruña e contará coa actuación do grupo Milladoiro. Para ampliar esta nova, preme aquí.
21/04/2016. INVESTIGACIóN
Onte, 20 de abril de 2016, tivo lugar a inauguración do II Simposio Norteamericano de Estudos Galegos, que reunirá na Universidade de Michigan-Ann Arbor ata o vindeiro 23 de abril a preto de 200 investigadores e profesores que traballan no campo dos Estudos Galegos desde diferentes aproximacións disciplinares ou multidisciplinares. Coa organización deste evento, a Universidade de Michigan dálle continuidade á primeira edición deste congreso, organizado polo Galician Studies Research Group da Universidade de Wisconsin-Milwaukee en maio de 2014; ambos os dous de importante transcendencia para a internacionalización dos estudos sobre a lingua e cultura galegas.
21/04/2016. DINAMIZACIóN
O Concello de Ourense, en colaboración coa Secretaría Xeral de Política Lingüística da Xunta de Galicia, convoca o VII Certame de Cinema OUFF Escola, no marco do Festival de Cine Internacional de Ourense que se celebrará en 2016. O obxectivo deste certame escolar é impulsar o uso do idioma galego entre a mocidade, fomentar a creatividade audiovisual e promover o traballo en equipo. Pode participar no certame o alumnado matriculado durante o curso 2015-2016 en centros públicos e privados de ensino non universitario de Galicia, así como aqueles de fóra de Galicia que teñan no seu currículo materias de e en lingua galega. O prazo de inscrición remata o 1 de xullo de 2016.
19/04/2016. AXUDAS E PREMIOS
A Secretaría Xeral de Política Lingüística convoca subvencións destinadas á creación, mantemento ou reforzamento de servizos de normalización lingüística nas entidades locais, así como ao desenvolvemento de proxectos de dinamización lingüística. Poderán acollerse a estas axudas os concellos ou agrupacións de concellos con poboación igual ou superior aos 3.000 habitantes. O prazo de presentación de solicitudes é dun mes, contado a partir do día seguinte ao da publicación desta convocatoria (corrección de erros).
19/04/2016. INVESTIGACIóN
A Área de Normalización Lingüística da Universidade de Vigo presenta a obra Os xentilicios de Galicia e dos outros territorios de lingua galega, autoría de Xosé-Henrique Costas González. O manual, editado pola Universidade de Vigo, establece unhas normas para a formación de xentilicios e ofrece a relación de xentilicios das provincias, concellos e comarcas do territorio lingüístico galego. A presentación terá lugar hoxe, 19 de abril, ás 13:00 h, no Salón de graos da Facultade de Filoloxía e Tradución da Universidade de Vigo.
19/04/2016. DINAMIZACIóN
O Departamento de Lingua Galega do Concello de Santiago de Compostela presenta o programa infantil de actividades que se desenvolverán, no marco do programa Apego, durante os meses de abril, maio e xuño de 2016 en Compostela. O programa inclúe obradoiros, contacontos, teatro e música para os/as máis pequenos/as da casa. Podes consultar a programación trimestral premendo aquí.
18/04/2016. CURSOS E CONGRESOS
A Escola Galega de Administración Pública convoca, en colaboración coa Secretaría Xeral de Política Lingüística, cinco cursos de nivel medio de linguaxe administrativa galega dirixidos ao persoal ao servizo das distintas administracións da Comunidade Autónoma de Galicia. Os cursos (catro na modalidade de teleformación e un na modalidade presencial) desenvolveranse ao longo dos meses de maio, xuño e xullo de 2016. O prazo de presentación de solicitudes é de dez días naturais, contados a partir do seguinte ao da publicación da convocatoria.
13/04/2016. DINAMIZACIóN
O Servizo de Normalización Lingüística do Concello de Pontevedra presenta o programa de actividades que se van desenvolver, no marco do proxecto Apego, esta primavera en Pontevedra. O programa, destinado a familias con nenos/as de entre 0 a 6 anos, inclúe obradoiros de contos e cantos de berce; encontros pedagóxicos para as familias e unha charla sobre as vantaxes de medrar en galego. As prazas son limitadas. As solicitudes de inscrición deben remitirse ao SNL do Concello de Pontevedra (snl@pontevedra.eu).
13/04/2016. AXUDAS E PREMIOS
A Comisión de Normalización Lingüística da Facultade de Ciencias da Comunicación da USC convoca a segunda edición do Premio de Radiodramas en galego, que premiará o mellor guión radiofónico dramático en lingua galega. O certame está dirixido ao alumnado da USC, ao alumnado das titulacións de Comunicación Audiovisual de calquera das universidades galegas e aos estudantes das titulacións das escolas oficiais de Imaxe e Son. O prazo para presentar os traballos remata o 12 de outubro de 2016. Podes consultar as bases completas do certame, así como coñecer os radiogramas gañadores da primeira edición, premendo aquí.
12/04/2016. DINAMIZACIóN
A Real Academia Galega presenta o sitio web Primavera das letras, que compila materiais didácticos sobre Manuel María dirixidos á comunidade educativa, ademais de información biográfica e bibliográfica sobre o autor homenaxeado este ano no Día das Letras Galegas. A iniciativa bota a andar con materiais dirixidos principalmente ao alumnado de Infantil e Primaria, aínda que se irá completando con outros recursos útiles para o alumnado de Secundaria. Con este proxecto a RAG responde a unha demanda do sector educativo, que solicita recursos dixitais para traballar na aula os contidos relacionados cos autores/as homenaxeados/as nas Letras Galegas.
06/04/2016. INVESTIGACIóN
A Deputación da Coruña convoca dúas bolsas de investigación na área de planificación sociolingüística da lingua galega, destinadas a persoas con titulación universitaria, residentes na provincia da Coruña, que pretendan facer un traballo de investigación no período 2016-2017. A dotación económica destas bolsas é de 8.000 euros cada unha. O prazo de presentación de solicitudes remata o 8 de abril de 2016, ás 14:00 h. Para consultar o texto completo da convocatoria, preme aquí.
06/04/2016. DINAMIZACIóN
Xurdir, coa colaboración da Consellería de Cultura, Educación e Ordenación Universitaria, a través das secretarías xerais de Cultura e de Política Lingüística, organiza a III Carreira Camiño das Letras, que vai ter lugar o domingo 15 de maio de 2016 en Santiago de Compostela. O obxectivo da iniciativa é festexar as Letras Galegas e difundir o Camiño de Santiago a través da práctica deportiva. A carreira contará cunha proba absoluta desde A Lavacolla ata o Estadio de San Lázaro e cun circuíto para as categorías de menores, polos arredores do Estadio. O prazo de inscrición remata o 11 de maio, ás 23.59 horas.
06/04/2016. DINAMIZACIóN
O Servizo de Normalización Lingüística do Concello da Coruña presenta o Brinca Vai 2.0, un espectáculo musical e audiovisual con Paco Nogueiras e o Sr. Sagüillo, que terá lugar o sábado 23 de abril no Auditorio do Fórum Metropolitano (A Coruña). A actividade, dirixida ao público infantil e xuvenil, está baseada no libro homónimo de Paco Nogueiras, editado por Kalandraka. As entradas teñen un custo de 5 euros (3 entradas, 12 euros con abono familiar) e podes adquirilas en Ticketea. Para ampliar información, preme aquí.
04/04/2016. CURSOS E CONGRESOS
Os departamentos de “Filoloxía Galega” e “Didáctica da Lingua e a Literatura e das Ciencias Sociais”, da Universidade de Santiago de Compostela, organizan as III Xornadas de Lingua e Literatura Galegas no ensino, que terán lugar os días 29 e 30 de abril de 2016 na Facultade de Filoloxía da USC. As xornadas, que están dirixidas principalmente a profesorado de Ensino Secundario da especialidade Lingua galega e Literatura, centraranse nesta edición na didáctica da sociolingüística e mais na análise das actitudes lingüísticas da mocidade, con especial atención no tema da relación entre a variedade estándar e as variedades faladas vernáculas. O prazo de matrícula remata o 22 de abril.
01/04/2016. CURSOS E CONGRESOS
O Centro Interdisciplinar de Documentación Lingüística e Social está a organizar o I Simposio Internacional Linguas e variedades lingüísticas amezadas na Península Ibérica: documentación e revitalización, que vai ter lugar os días 1 e 2 de xullo de 2016 en Alcanena (Portugal). Os eixos temáticos sobre os que xirarán as intervencións son a documentación e a revitalización lingüísticas. A maiores, tentarase establecer as bases para un traballo interdisciplinar entre as artes performativas e a lingüística. O comité organizador convida a investidores/as que traballen no ámbito da diversidade lingüística na Península Ibérica a enviar a súa proposta de comunicación antes do vindeiro 10 de abril. O prazo de inscrición remata o 31 de maio de 2016.
01/04/2016. CURSOS E CONGRESOS
O Instituto da Lingua Galega e o Grupo de investigación Filoloxía e Lingüística Galega (USC) organizan o curso Estatística con R para lingüistas, dirixido a investigadores/as e a alumnado do ámbito dos estudos lingüísticos que estean a realizar traballos de fin de grao, traballos de fin de máster ou a tese e teñan interese en realizar análises estatísticas dos seus datos. O curso desenvolverase en tres sesións, entre o 18 de abril e o 6 de maio de 2016. O prazo de inscrición remata o 8 de abril.
01/04/2016. CURSOS E CONGRESOS
O Sindicato de Traballadoras e Traballadores do Ensino de Galicia (STEG) organiza as Primeiras xornadas de innovación educativa: palavrar a lingua, que terán lugar o sábado 16 de abril de 2016 no Museo do Pobo Galego (Santiago de Compostela). Os obxectivos da actividade son, entre outros, dar a coñecer experiencias innovadoras no ámbito da normalización lingüística, afondar no papel da escola como suxeito transformador e analizar as posibilidades lingüísticas e pedagóxicas da lusofonía para o traballo docente. A xornada está dirixida ao profesorado dos diferentes niveis educativos (Infantil, Primaria e Secundaria). As prazas cubriranse por orde de solicitude, tendo preferencia as persoas afiliadas ao STEG.
30/03/2016. INVESTIGACIóN
A Área de Normalización Lingüística da Universidade de Vigo presenta o manual Na universidade. En galego con seguridade, no que se revisan contidos morfosintácticos e léxico-semánticos da comunicación administrativa. A obra estrutúrase en tres apartados principais: marco lexislativo da lingua galega no ensino superior, interferencias e cuestións lingüísticas fixadas erroneamente na lingua, e proposta de xentilicios en galego. Este novo traballo completa e amplía En galego sen dúbida, elaborado hai dous anos tamén pola Área de Normalización Lingüística e centrado en cuestións ortotipográficas. Ambas as dúas publicacións teñen como obxectivo axudar á comunidade universitaria a desenvolver a súa actividade profesional e académica en galego con fluidez e corrección, tanto na lingua oral como escrita.
30/03/2016. DINAMIZACIóN
A fundación Donostia / San Sebastián 2016 e a asociación Soziolinguistika Klusterra presentan o proxecto HITZARGIAK. Linguas que se iluminan mutuamente. Trátase dun sitio web deseñado para consolidar a rede de contactos das comunidades lingüísticas de Europa e difundir boas prácticas para revitalizar idiomas minorizados. Ata o momento, o comité científico do proxecto Hitzargiak escolleu oito prácticas galegas que consideran que poden ser inspiradoras para outras comunidades lingüísticas. As iniciativas galegas seleccionadas son: Agasallo, Apego, Cantalingua, Club de debate, Como cho digo;-), Gústame o galego, Modelo Burela e Tíralle da lingua.
30/03/2016. DINAMIZACIóN
A Coordinadora Galega de ENDL pon á disposición da comunidade educativa o Especial Letras Galegas 2016, dedicado a Manuel María. O monográfico compila recursos didácticos de diversa tipoloxía pensados tanto para traballar en liña como na aula. Tamén se ofrece información bibliográfica, ligazóns a outros sitios web e unha videoteca con recursos audiovisuais sobre este autor. Trátase dun espazo colaborativo en continua actualización, polo que os centros poden enviar os seus recursos e propostas ao enderezo correo@coordinadoraendl.org.
22/03/2016. DINAMIZACIóN
A Consellería de Cultura, Educación e Ordenación Universitaria da Xunta de Galicia, a Deputación da Coruña, o Consello da Cultura Galega, a Real Academia Galega e o Museo do Pobo Galego, coa colaboración de concellos e doutras entidades públicas e privadas, presentan unha programación conxunta para a celebración ao longo do 2016 do Ano das Irmandades da Fala. O programa inclúe exposicións, simposios, publicacións e difusión de recursos dixitais, entre outras actividades. Neste mes de marzo están a presentarse as primeiras iniciativas na rede. A Real Academia Galega inaugurou onte, 21 de marzo, unha sección web con materiais dixitalizados relacionados coas Irmandades procedentes dos fondos da Academia. Pola súa parte, o Consello da Cultura Galega presenta hoxe o Álbum das Irmandades da Fala, un espazo web que recollerá as biografías dos seus protagonistas.