A Unión de Consumidores de Galicia (UCGAL) presenta o estudo “Servizos de atención ao consumidor dos grupos de distribución”, no que avalía a calidade da atención ao consumidor a través dos servizos telemáticos dos nove grupos de distribución que están asentados en Galicia. O informe dedica un capítulo a aspectos lingüísticos, no que avalía en que grao se respecta o dereito dos consumidores/as a comunicarse en galego cos operadores/as (amparado pola Lei 2/2012, do 28 de marzo, galega de protección xeral das persoas consumidoras e usuarias). A UCGAL conclúe que este dereito concúlcase sistematicamente. En xeral, dos nove grupos de distribución, só dous (Froiz e Gadis) obterían neste punto unha nota superior ao aprobado. Podes ampliar información premendo aquí.
20/11/2015. INVESTIGACIóN
19/11/2015. CURSOS E CONGRESOS
O Servizo de Normalización Lingüística do Concello de Pontevedra e a Asociación Duos Pontes organiza un Obradoiro de regueifas, dirixido a persoas maiores de 12 anos, no que se ensinará a regueifar con exercicios de improvisación e enxeño. A actividade terá lugar o sábado 28 de novembro de 2015, de 16.30 h a 20.30 h, no Pazo da Cultura de Pontevedra. As prazas son limitadas. As persoas interesadas deben enviar a súa solicitude ao enderezo electrónico snl@pontevedra.eu.
19/11/2015. AXUDAS E PREMIOS
O Concello de Santiago e a Cámara de Comercio de Santiago de Compostela convocan o XVI Premio Manuel Beiras, que ten como finalidade recoñecer publicamente o compromiso coa normalización lingüística no sector empresarial. O galardón contempla dúas categorías, unha para as empresas que veñen realizando un uso continuado da lingua galega e outra para as que se incorporaron recentemente ao uso do galego. A maiores, o xurado tamén pode outorgar unha distinción especial a persoas ou entidades que destaquen polo labor a prol da normalización do galego na empresa. O prazo para presentar as candidaturas remata o 9 de decembro de 2015. Para ampliar información, preme aquí.
19/11/2015. DINAMIZACIóN
O Servizo de Normalización Lingüística do Concello de Ribeira, en colaboración coa área de Servizos Sociais e os centros educativos do municipio, organizan un programa de dinamización lingüística que se desenvolverá ao longo destes meses de outono. O programa inclúe actividades para o público adulto, como o “Curso de lingua galega para persoas de fóra de Galicia” ou o obradoiro de memoria e literatura oral “As nosas historias 2015. Obradoiro de lingua galega”. Para a comunidade escolar está programada unha visita á biblioteca municipal e mais a proxección da película “Maimiño”.
18/11/2015. DINAMIZACIóN
Xa está en marcha unha nova edición do Club de Debate, un proxecto colaborativo promovido polos servizos de normalización lingüística de diferentes concellos galegos que ten como obxectivo a dinamización lingüística e cultural no ámbito educativo, fomentando a fluidez comunicativa en galego, o pensamento crítico e o respecto pola diversidade de opinións. Poden participar equipos mixtos de entre 4 e 10 mozos/as de 3º e 4º de ESO, 1º de Bacharelato e ciclos formativos. O equipo que gañe a fase final recibirá de premio unha viaxe multiaventura en grupo. O prazo de inscrición remata o 30 de novembro de 2015. Podes manterte ao día do desenvolvemento desta iniciativa, a través da súa páxina de Facebook.
18/11/2015. AXUDAS E PREMIOS
A Deputación da Coruña publica a convocatoria de subvencións a concellos e outras entidades locais da provincia da Coruña para a creación, mantemento e reforzo de servizos de normalización lingüística durante o ano 2016. Poderán participar na convocatoria todos os concellos da provincia da Coruña de 7.000 ou máis habitantes ou agrupacións de concellos limítrofes que, entre eles, cheguen a esa cifra mínima de habitantes. O prazo de presentación de solicitudes remata ás 14:00 h do 18 de decembro de 2015.
18/11/2015. CURSOS E CONGRESOS
O Servizo de Asesoramento Lingüístico do Colexio de Avogados de Santiago de Compostela organiza, en colaboración coa Secretaría Xeral de Política Lingüística, a novena edición da Xornada “Xustiza e Lingua, reflexións para a normalización”, que ten como obxectivo promover a reflexión sobre o proceso de normalización lingüística no ámbito da xustiza. A xornada terá lugar o vindeiro 30 de novembro de 2015, ás 19:00 h, no salón de actos do Colexio de Avogados compostelán. A matrícula é de balde. Para obter máis información sobre os trámites de inscrición, preme aquí.
18/11/2015. OUTRAS
A Asemblea da Facultade de Comunicación da Universidade de Santiago de Compostela organiza a charla “O galego nos medios de comunicación”, que terá lugar o xoves 19 de novembro de 2015, ás 18:30 h, na Facultade de Xornalismo da USC (Aula 1). O acto contará coa participación de xornalistas de Praza Pública, Sermos Galiza e Diario Liberdade.
13/11/2015. DINAMIZACIóN
As entidades organizadoras do Correlingua (Asociación Socio-Pedagóxica Galega; CIG-Ensino; A Mesa pola Normalización Lingüística e os concellos de Lugo, Pontevedra, Vigo e Ourense) presentaron a décimo sexta edición desta iniciativa lúdico-didáctica deseñada para que o alumnado de todos os ciclos educativos reivindique publicamente o uso do galego. A carreira, que nesta edición leva por lema “O galego está en nós” (en homenaxe ao poeta Manuel María) percorrerá doce localidades galegas entre os días 2 e 16 de maio de 2016.
11/11/2015. DINAMIZACIóN
A Coordinadora de Traballadores/as de Normalización da Lingua organiza o evento LGx15, un proxecto no que oito conferenciantes exporán en quince minutos as súas ideas e reflexións sobre o futuro do idioma. O acto, que estará conducido por María Lado e Lucía Aldao, contará tamén coas actuacións musicais da cantante Alba María e do rapeiro Xenderal. O evento terá lugar o vindeiro 25 de novembro na Sala Capitol de Santiago de Compostela, ás 18.30 horas. A entrada custa 6 euros en venda anticipada e 10 euros o mesmo día en billeteira.
11/11/2015. DINAMIZACIóN
A Consellería de Cultura, Educación e Ordenación Universitaria organiza por segundo ano consecutivo o programa Mes da Ciencia en Galego nas Bibliotecas, que inclúe diferentes actividades (obradoiros científicos, exposicións, charlas divulgativas, etc.) desenvolvidas polas bibliotecas públicas nodais (dependentes da administración autonómica) e mais pola rede de Bibliotecas Escolares de Galicia. No marco deste programa, a Asesoría de Bibliotecas Escolares da Consellería pon ao dispor da comunidade educativa un repositorio dixital de materiais didácticos para traballar contidos científicos en galego. Para ampliar información, preme aquí.
11/11/2015. CURSOS E CONGRESOS
O Equipo de normalización e dinamización lingüística da Escola Oficial de Idiomas da Coruña organiza un obradoiro de iniciación á curtamentraxe en galego, no marco do proxecto anual de promoción do Festival CinEOI Coruña Curtas, que terá lugar en abril do vindeiro ano. Este obradoiro, de 30 horas de duración, está dirixido a estudantes da EOI da Coruña, ESO, bacharelato e FP dos centros públicos e concertados da cidade da Coruña e será impartido por Omar Rabuñal Varela (actor, guionista e director). O prazo de inscrición remata o 12 de novembro de 2015.
11/11/2015. DINAMIZACIóN
A Secretaría Xeral de Política Lingüística convoca unha nova edición do Concurso Exposición Letras Galegas, dirixido aos centros de ensino público non universitario para a elaboración dunha exposición relacionada coa obra, época e lingua do autor homenaxeado no Día das Letras Galegas 2016, Manuel María Fernández Teixeiro. O concurso consta de dúas categorías, unha para os centros de educación infantil e primaria e outra para os restantes. A exposición gañadora en cada unha destas categorías será distribuída en máis de 1600 puntos de Galicia e do exterior e os equipos de traballo que elaboren estas exposicións recibirán cadanseu premio en metálico de 2000 euros. O prazo de presentación dos traballos remata o 22 de xaneiro de 2016.
09/11/2015. CURSOS E CONGRESOS
A Coordinadora de Traballadores/as de Normalización da Lingua (CTNL) e o Concello de Santiago organizan o Encontro de política lingüística municipal, co ánimo de actualizar o entusiasmo, activar a implicación dos concellos no fomento do galego e acordar pautas comúns en materia de normalización do idioma. O encontro terá lugar o 16 de novembro de 2015 na Sala Mozart do Auditorio de Galicia, en Santiago de Compostela. Están convidadas/os a participar neste encontro alcaldesas e alcaldes, concelleiras/os, representantes políticas/os de deputacións ou outras entidades, técnicas/os de normalización lingüística, representantes de entidades implicadas no proceso de normalización da lingua, etc. Para ampliar información, preme aquí.
09/11/2015. AXUDAS E PREMIOS
A Asociación Cultural O Brado, da Estrada, fixo públicos os galardoados dos XXV Premios San Martiño de Normalización Lingüística, convocados anualmente para premiar a persoas e colectivos que destacan polo seu labor de promoción do idioma galego. Os premiados nesta edición son o clube estradense de fútbol gaélico Irmandinhos, na categoría “A Estrada e Comarca de Tabeirós-Terra de Montes”; a cooperativa Feiraco, na categoría “Galicia enteira”; e o catedrático de Dereito Mercantil da USC José Antonio Gómez Segade, na categoría “Toda unha vida”. Os galardóns serán entregados nun acto público que terá lugar o vindeiro 24 de novembro no Teatro Principal da Estrada.
09/11/2015. DINAMIZACIóN
O Servizo de Normalización Lingüística da Universidade de Santiago organiza un Seminario de dinamización lingüística dirixido ao alumnado desta universidade, que se desenvolverá tanto no Campus de Santiago (13 de novembro de 2015) como no de Lugo (27 de novembro de 2015). Os obxectivos da xornada son reflexionar sobre a situación lingüística da USC; fornecer coñecementos básicos para a dinamización lingüística; favorecer a creación e o funcionamento de comisións de normalización lingüística nos centros; e promover o traballo en rede das organizacións estudantís a prol do galego. Para ampliar información, preme aquí.
05/11/2015. DINAMIZACIóN
O Concello de Moaña difunde no seu web o manual “En galego para sempre”, elaborado polo Servizo de Normalización Lingüística municipal e presentado publicamente o pasado 22 de outubro no marco dunha campaña de normalización lingüística deseñada para promover o galego nos actos funerarios. Trátase dun manual de recursos en lingua galega, tanto para actos católicos como laicos, dirixido principalmente a florarías, marmorarías e empresas funerarias. O manual inclúe modelos de necrolóxicas, recordatorios e lápidas; lemas para fitas de flores e propostas para celebrar a cerimonia funeraria.
04/11/2015. AXUDAS E PREMIOS
A Mesa pola Normalización Lingüística convoca a cuarta edición do Premio Abertos ao Galego, co ánimo de recoñecer publicamente o labor de empresas que fan un uso normal do noso idioma. Nesta edición outorgaranse cinco premios, catro deles segundo o tamaño da empresa e outro para unha empresa creada no 2014 ou 2015. O prazo para a presentación de candidaturas remata o 30 de novembro. Para obter máis información, preme aquí.
03/11/2015. DINAMIZACIóN
O Servizo de Normalización Lingüística do Concello de Pontevedra presenta o programa de actividades que desenvolverá, no marco do programa Apego, durante os meses de outono de 2015. O programa inclúe xornadas de formación sobre materiais didácticos en galego para profesionais da educación infantil, obradoiros para familias con nenos/as de 0 a 6 anos (ou que están agardando un bebé) e presentacións de proxectos dirixidos ao público infantil. Para ampliar información sobre o programa ou os trámites de inscrición, preme aquí.
29/10/2015. DINAMIZACIóN
O Servizo de Normalización Lingüística do Concello da Coruña organiza o Obradoiro de nanas “Arrolos de Salitre”, dirixido a familias con bebés menores de 3 anos e futuras nais e pais. O obradoiro, impartido por Xabier Díaz, coa colaboración de Guillerme Fernández, desenvolverase os días 20 e 21 de novembro de 2015 no Centro Ágora. A inscrición é de balde. Podes reservar a túa praza a partir do vindeiro 3 de novembro na conserxaría do Ágora ou chamando ao 981 189 888.
28/10/2015. DINAMIZACIóN
O Clube da Lingua do IES Marco do Camballón (Vila de Cruces) organiza o Concurso de Fotografía Boina de Ouro, dirixido a profesionais ou afeccionados/as á fotografía. Entre os obxectivos da iniciativa están os de promover a boina como accesorio de moda, vincular o idioma ás últimas tendencias e promover o uso do galego na comunicación social en rede. Establécense dúas categorías: “Premio Boina de Ouro”, onde se valorará especialmente a calidade artística da foto, e “Premio Boina de Simpatía”, que premiará a foto que mellor promova (con humor e simpatía) a imaxe da boina nas redes sociais. Para consultar as bases completas do concurso, preme aquí.
27/10/2015. DINAMIZACIóN
O Servizo de Normalización Lingüística do Concello de Carballo organiza a actividade Cantacontos con Pablo Díaz, unha sesión de contos con música na que Pablo Díaz misturará contos con algunhas cancións dos seus discos Tic Tac, Toc Toc e Xente miúda, moita fartura. O espectáculo, dirixido a nenas e nenos de 0 a 3 anos, terá lugar o xoves 5 de novembro de 2015, a partir das 17:30 h, no Pazo da Cultura de Carballo. Para ampliar esta nova, preme aquí.
27/10/2015. DINAMIZACIóN
A asociación de veciños Eduardo Pondal, de Pontevedra, organiza a iniciativa Falamos galego!, co obxectivo de crear espazos onde a veciñanza poida practicar o idioma nun contexto amigable e coa axuda dun mestre que resolverá as dúbidas lingüísticas. Os faladoiros celebraranse cada semana (os mércores de 19:00 h a 20:00 h) e nalgunhas sesións acudirán persoeiros destacados para falar de cinema, música, literatura… As persoas interesadas poden inscribirse no centro social do Gorgullón.
22/10/2015. CURSOS E CONGRESOS
A Asociación Socio-Pedagóxica Galega organiza as XVI Xornadas de expresión oral “Tíralle da lingua”, dirixidas ao profesorado co obxectivo de transmitirlles a importancia do factor oral na recuperación da lingua e proporcionarlles técnicas para traballar a oralidade na aula. As sesións desenvolveranse o 21 de novembro de 2015 no IES As Fontiñas (Santiago de Compostela). O prazo de matrícula (que debe realizarse a través do web da AS-PG) remata o 20 de novembro.
Ademais destas xornadas, dirixidas ao profesorado, o proxecto “Tíralle da Lingua” consta tamén dun concurso de relato oral, dirixido ao alumnado, cunha fase final que se celebra no mes de abril en Santiago de Compostela.
Ademais destas xornadas, dirixidas ao profesorado, o proxecto “Tíralle da Lingua” consta tamén dun concurso de relato oral, dirixido ao alumnado, cunha fase final que se celebra no mes de abril en Santiago de Compostela.
22/10/2015. DINAMIZACIóN
A Universidade de Santiago de Compostela, a través do proxecto Proxéctate en Galego, quere conmemorar o vindeiro Día da Ciencia en Galego organizando a actividade “A historia que contan as pedras que pisas”. Trátase dunha ruta xeolóxica polas rúas de Lugo que terá lugar o vindeiro 4 de novembro de 2015, desde as 16:30 h ata as 19:00 h. A ruta comenzará no miradoiro do Parque Rosalía de Castro e a asistencia é libre. Para ampliar esta información, preme aquí.
21/10/2015. CURSOS E CONGRESOS
Despois de que a Modern Language Association (asociación norteamericana de referencia para investigadores de lingua e literatura) crease en 2014 o “Galician Language, Literature and Culture Forum”, o idioma galego volve dar un importante paso na súa proxección internacional ao incorporarse, con catro sesións, ao programa do Congreso Anual da Modern Language Association, que terá lugar entre os días 7 e 10 de xaneiro de 2016 en Austin (Texas). A primeira sesión centrarase nas relacións transfronteirizas entre as culturas galega e portuguesa; unha segunda, na tradución, bilingüismo e glocalización nos estudos galegos; a terceira, na produción literaria en castelán no Rexurdimento; e a cuarta, na literatura galega.
21/10/2015. DINAMIZACIóN
O Servizo de Normalización Lingüística do Concello da Coruña organiza o espectáculo musical Brinca Vai!, baseado no libro homónimo de Paco Nogueiras. A iniciativa, dirixida a familias con nenas e nenos de 4 a 10 anos, terá lugar o 7 de novembro de 2015, ás 18:30 h, no Centro Ágora da Coruña. A entrada é de balde e as invitacións poderán recollerse a partir do vindeiro luns 26 de outubro. Para ampliar información, preme aquí.
20/10/2015. DINAMIZACIóN
A Comisión de Normalización Lingüística da Facultade de Ciencias da Educación da USC organiza a VIII Xornada "Recursos educativos en galego”, que terán lugar o 5 de novembro de 2015 na Facultade de Ciencias da Educación (Campus Norte). A xornada, que nesta edición se centrará na educación artística, está destinada aos membros da comunidade educativa (alumnado, profesorado e PAS) desta facultade interesados en coñecer novas estratexias e recursos didácticos en galego. Para obter máis información sobre o programa e os trámites de inscrición, preme aquí.
20/10/2015. DINAMIZACIóN
A Asociación de Funcionarios para a Normalización Lingüística presentou, o pasado 15 de outubro no Paraninfo do Instituto Otero Pedrayo de Ourense, o volume “Agora e sempre”, no que se recollen as mandas testamentarias dun cento de ourensáns. No transcurso dese mesmo acto, tivo lugar a sinatura da acta de derradeiras vontades, baixo o lema “Procúralle futuro á lingua”. Así mesmo, reivindicouse O Día da Restauración da Memoria Lingüística, que se celebrará o vindeiro 25 de outubro en máis de cincuenta concellos. Todas esta accións enmárcanse na campaña “En galego, agora e sempre!”, que esta asociación promove desde hai máis dunha década co ánimo de fomentar o galego no eido das últimas vontades e dos ritos fúnebres.
19/10/2015. DINAMIZACIóN
Con motivo do VI Día da Ciencia en Galego, a Coordinadora Galega de Equipos de Normalización e Dinamización Lingüística (CGENDL) organiza un videoconferencia dirixida ao alumnado de 2º ciclo da ESO e Bacharelato de centros de ensino non universitario. A actividade terá lugar o mércores 4 de novembro de 2015, entre as 12:30 h e as 13:30 h. Nesta edición o relator será Xurxo Mariño, especialista en neurofisioloxía da UdC, que presentará o relatorio "A máquina que constrúe a mente e a realidade". Para ampliar información, preme aquí.