“A evidencia científica non deixa lugar a dúbidas: a principal causa do quecemento global é a actividade humana, concretamente, a queima de combustibles fósiles e a emisión de gases de efecto invernadoiro”, comeza o especial, que sinala o continuo aumento das temperaturas ou os fenómenos meteorolóxicos extremos como dous dos principais perigos do cambio climático. O reto consiste en “reverter o erro e converter as ameazas en oportunidades” a través da busca de alternativas sostibles e respectuosas co medio ambiente como, por exemplo, a química verde.
Para esta entrega de Proxector escolmáronse diferentes vídeos en que se explica que é o efecto invernadoiro, o quecemento global e a contaminación atmosférica ou como estes fenómenos afectan ao planeta e ás vidas dos seus habitantes. As consecuencias que o cambio climático ten para Galicia son o tema do documental Cambio climático: o reto do século XXI, mentres que a situación da contaminación atmosférica na nosa comunidade centra a peza divulgativa “Conversas co ecoloxismo: Ramón Varela Díaz”. Nela, o doutor en Ciencias Biolóxicas e presidente de ADEGA (1981 e 1996) reflexiona sobre a crise das industrias electrointensivas, o peche do ciclo das térmicas galegas, a transición ecolóxica, a emerxencia climática, a política forestal do país ou os incendios nos bosques. Pola súa banda, o enxeñeiro químico Luís Díaz Allegue achega o desafío que supón o cambio climático para a seguridade alimentaria mundial no vídeo “Cambio climático e sistema alimentario”, no que alerta de que as mudas nas condicións de temperatura e humidade e nos padróns de precipitacións, así como os fenómenos meteorolóxicos extremos, afectan ás prácticas agrícolas e á calidade nutricional dos cultivos. O especial compleméntase con tres pezas audiovisuais que profundan na filosofía da química verde e en como a reciclaxe do dióxido de carbono para a obtención de combustibles, o uso das enerxías renovables para a produción de hidróxeno verde ou o emprego deste elemento químico como fonte de alimentación dos vehículos modernos poden axudar a combater o quecemento global.
O proxecto
Proxector: audiovisuais en galego para a docencia é un espazo web dedicado a recompilar, clasificar e difundir recursos audiovisuais que sirvan de apoio á docencia en lingua galega de diversas materias de bacharelato e de ensino universitario.
O proxecto orixinal foi deseñado polo Servizo de Normalización Lingüística da Universidade de Santiago de Compostela e botou a andar no ano 2015 no portal educativo Didactalia. En 2018 o CCG, a través do Centro de Documentación Sociolingüística de Galicia (CDSG), sumouse á iniciativa e comezou a participar de xeito activo tanto na súa coordinación como na edición de contidos. Cumprindo coas competencias que lle son propias no eido da preservación e difusión do idioma galego, o CCG acordou asumir tamén a custodia dos datos recompilados ao longo destes anos e que, a partir de agora, estarán ao dispor da cidadanía no sitio web institucional.
Os vídeos están clasificados segundo a súa temática, o idioma no que foron gravados ou subtitulados e o nivel de ensino no que se considera que poden ser empregados. A maiores, ofrécese unha ficha descritiva coa información básica de cada recurso. Pódese acceder aos contidos a través da busca libre ou dos diferentes despregables, que permiten filtrar os resultados segundo os criterios de clasificación antes citados.