Novas da lingua

Rexistros331 a 360 de 5280
  1. Inicio
  2. CDSG-CCG
  3. Novas da lingua
03/02/2025. OUTRAS

Declaración de NEG sobre a actual situación de emerxencia lingüística

Nova Escola Galega acaba de facer pública a declaración “A emerxencia lingüística: do estado da cuestión á acción", coa que quere contribuír ao debate público sobre o presente o futuro do idioma galego, unha vez coñecidos os datos demolingüísticos presentados recentemente polo IGE.

Podes ler o texto completo da declaración premendo aquí.
29/01/2025. AXUDAS E PREMIOS

Axudas para a creación audiovisual en lingua galega

A Axencia Galega das Industrias Culturais (Agadic) convoca subvencións para o ano 2025 destinadas a impulsar a creación de obras audiovisuais en lingua galega, concretamente, a través do apoio á realización e posprodución de curtametraxes e á produción de longametraxes.

O prazo para a presentación de solicitudes é dun mes, contado a partir do día seguinte ao da publicación da convocatoria no DOG.
27/01/2025. DINAMIZACIóN

A RAG e PuntoGal convocan o VIII Concurso de Microrrelatos

A Real Academia Galega e a Asociación PuntoGal convocan a oitava edición do seu Concurso de Microrrelatos, co obxectivo de reforzar a presenza do idioma galego e da identidade propias no mundo dixital. Os relatos, de temática libre, deberán estar escritos en galego, ser orixinais, inéditos e ter unha extensión máxima de 200 palabras (título incluído). Establécense tres categorías, segundo a idade dos participantes, e entregaranse tres premios en cada unha das categorías. A maiores, os relatos gañadores serán publicados nas páxinas das dúas entidades organizadoras e na revista Luzes. O prazo para enviar os textos estará aberto desde o 1 ao 28 de febreiro de 2025.

A organización deste certame faise coincidir cunha campaña de promoción que permite rexistrar un dominio .gal para dous anos a un prezo de 15 euros máis IVE.

Podes ampliar información premendo aquí.
27/01/2025. EMPREGO

Convocatoria para a creación de listaxes de emprego temporal de técnico/a de normalización lingüística na Deputación de Lugo

A Deputación de Lugo publica a convocatoria e mais as bases específicas do procedemento selectivo para a creación da listaxe de emprego temporal de técnico/a de normalización lingüística, grupo A – subgrupo A1, para xestionar de xeito áxil as necesidades deste tipo de persoal e poder efectuar nomeamentos ou contratacións de persoal interino/a.

Os/as aspirantes deben estar en posesión da licenciatura en Filoloxía galega; licenciatura en Filoloxía hispánica (con habilitación de galego); licenciatura en Filosofía e Letras (sección Filoloxía hispánica, subsección galego- portugués); grao en Ciencias da Linguaxe e Estudos Literarios (galego e español); grao de Estudos de Galego e Español; grao en Galego e Portugués: estudos Lingüísticos e Literarios; ou grao en Lingua e Literatura Galegas.

Tal e como se recolle nas bases xerais, o sistema de selección será o concurso-oposición e o prazo de presentación de solicitudes é de 10 días naturais, contados a partir do seguinte ao da publicación da convocatoria no BOP.

Podes consultar o texto completo da convocatoria e mais as bases específicas premendo aquí.
23/01/2025. OUTRAS

Actualizamos información sobre as publicacións periódicas recibidas no CDSG en 2024

O Centro de Documentación Sociolingüística de Galicia publica en liña o Boletín de Sumarios 2024, un produto documental que inclúe os sumarios dos números das revistas que se incorporaron á hemeroteca do centro ao longo do ano pasado.

Tamén podes consultar a nosa colección completa actualizada a través do Catálogo de publicacións periódicas do CDSG.

Estas revistas pódense consultar en sala ou levar en préstamo naqueles casos en que dispoñamos de máis dun exemplar. No caso das dixitais, desde o boletín e o catálogo pode accederse directamente a elas.
22/01/2025. INVESTIGACIóN

En Internet o Dicionario do galego no Bierzo e a segunda edición do Dicionario galego-ruso

Xa se poden consultar en Internet dous novos recursos lexicográficos relacionados co idioma galego. Trátase do Dicionario do galego do Bierzo, elaborado por Sara Rodríguez e editado en 2023 pola Universidade de Vigo, que agora pode consultarse de balde en formato PDF; e da 2ª edición corrixida e aumentada do Dicionario galego-ruso, obra do investigador Aleksandr Dziuba editada pola Xunta de Galicia.
21/01/2025. INVESTIGACIóN

Accesible na Rede o volume Estudos de Onomástica Galega IX. Os outros nomes

A Real Academia Galega difunde no seu sitio web o volume Estudos de Onomástica Galega IX. Os outros nomes, que reúne os traballos presentados na IX Xornada de Onomástica Galega (que tivo lugar o 19 de outubro de 2024 no Museo de Pontevedra), nos que se trata a onomástica de ámbitos tan diversos como a astronomía, a zooloxía ou a intelixencia artificial, entre outros.
20/01/2025. DINAMIZACIóN

En liña as intervencións da décima edición do LGx15

O pasado 26 de outubro de 2024 tivo lugar en Santiago de Compostela a décima edición do LGx15, unha iniciativa organizada pola Coordinadora de Traballadores/as de Normalización da Lingua na que diferentes participantes transmiten argumentos e experiencias para influír no futuro do galego a través de charlas breves e amenas. Nesta edición os/as participantes foron Sole Felloza, Rodri Míguez, José Manuel Menéndez, Bernardo Penabade e Illa Bufarda (Adriana P. Villanueva, Pilar Adabes e Sabela Iglesias).

Podes ver todas as intervencións na canle de Youtube da CTNL.
20/01/2025. AXUDAS E PREMIOS

Resolución provisional das axudas da Deputación da Coruña aos SNL municipais

A Deputación da Coruña publica a resolución provisional das subvencións a concellos e entidades locais da provincia da Coruña para financiar gasto do persoal técnico dos servizos de normalización lingüística durante o ano 2025.

Os solicitantes teñen un un prazo de 10 días hábiles, contados a partir do día seguinte ao da publicación da resolución provisional no Boletín Oficial da Provincia, para comunicar, se é o caso, a desistencia da solicitude, presentar solicitude de reformulación, alegacións ou emenda de erros. Transcorrido o prazo de 10 días sen que por parte dos solicitantes se desista expresamente, a subvención considerarase aceptada tacitamente.

Podes consultar o texto completo da resolución premendo aquí.
17/01/2025. DINAMIZACIóN

Bota a andar a terceira edición do programa “Modo galego, actívao!”

A Real Academia Galega e o Concello de Ames presentaron a terceira edición do programa Modo galego, actívao!, un proxecto de investigación e acción deseñado para intervir nas actitudes e usos lingüísticos da comunidade educativa deste concello (alumnado, profesorado, familias e persoal dos servizos complementarios). Nesta ocasión, ademais dos centros de educación infantil e primaria que xa participaran en edicións anteriores, súmase o alumnado de 1º e 2º da ESO dos institutos do Milladoiro e Bertamiráns.

O programa desenvolverase ao longo dun mes, no que o alumnado realizará diferentes actividades lúdicas e didácticas e asumirá unha serie de compromisos lingüísticos, ao tempo que recibirá tamén diferentes recompensas acordes co seu nivel de implicación coa activación do idioma galego.

Para ampliar información, preme aquí.
17/01/2025. DINAMIZACIóN

Gala dos Premios Youtubeiras+ 2024 e fiadeiro dixital

O vindeiro 1 de febreiro de 2025, ás 19:00 h, terá lugar no Pazo da Cultura de Narón a gala de entrega dos Premios Youtubeiras+, unha iniciativa promovida por 10 concellos galegos, a Deputación da Coruña e as universidades da Coruña, Santiago de Compostela e Vigo co obxectivo de promover a creación de contidos en galego no YouTube e en TikTok, así como visibilizar os perfís das persoas creadoras. A gala estará presentada por Javi Sánchez Castro (Meiga-i) e contará coa actuación musical de De Ninghures.

Con antelación ao comezo da gala, de 17 h a 17:50 h, Nuria Espasandín e Sergio Casal, de Toxío, impartirán un obradoiro de creación de contidos dixitais en Internet. A actividade é de balde e está aberta ao público, pero require inscrición previa.
15/01/2025. OUTRAS

O Consello da Cultura Galega pon en marcha o “Foro participativo: un país coa súa lingua”

Hoxe, 15 de xaneiro de 2025, tivo lugar na sede do Consello da Cultura Galega, en Santiago de Compostela, a presentación pública do “Foro participativo: un país coa súa lingua”, unha iniciativa de carácter propositivo na que se lle dará voz a persoas expertas no ámbito da planificación lingüística, a profesionais de diferentes ámbitos e a axentes sociais de referencia para o futuro do idioma, que reflexionarán sobre a situación sociolingüística actual e proporán as accións que se consideren prioritarias para a normalización e revitalización do galego.

O foro desenvolverase entre os meses de febreiro e xullo de 2025 e estruturarase en seis mesas temáticas: Educación e socialización; Administración, xustiza e servizos públicos; Sanidade, ciencia e servizos sociais; Comunicación, cultura e acción exterior; Economía, turismo e deporte; Sociedade, crenzas e participación comunitaria. Os resultados recolleranse nun documento que se fará público en novembro de 2025.

Na páxina web do CCG tes máis información sobre esta iniciativa.
15/01/2025. INVESTIGACIóN

O CCG presenta un estudo comparativo sobre a situación das linguas cooficiais en España

O Consello da Cultura Galega publica o informe Competencia e usos das linguas cooficiais en España. O galego en perspectiva comparada, un estudo que presenta os principais datos sociolingüísticos do idioma galego en clave comparativa coas outras cinco comunidades autónomas con lingua cooficial, nomeadamente, Cataluña, Comunidade Foral de Navarra, Comunidade Valenciana, Illas Baleares e País Vasco.

Desde esta perspectiva, a poboación galega (analizada no seu conxunto) é a que ofrece os mellores datos de competencia e uso da súa lingua propia, pero ao contrario do que acontece no resto de territorios analizados, en Galicia obsérvase unha clara tendencia de perda interxeracional, sendo a poboación que aínda está en idade escolar a que presenta os peores datos de competencia lingüística e frecuencia de uso do galego. Esta especificidade da realidade galega parece constatar unha “aparente menor efectividade das políticas educativas en comparación con outras comunidades” e pon de relevo a complexidade da nosa realidade sociolingüística e o gran desafío que temos por diante para poder reverter estas dinámicas.

Na páxina web do Consello da Cultura Galega tes accesible de balde a publicación en formato dixital.
15/01/2025. CURSOS E CONGRESOS

Curso de escrita creativa en Vigo

O Concello de Vigo organiza un curso de escrita creativa de nivel 1, de 30 horas de duración, para aquelas persoas que desexen iniciarse na escrita creativa en lingua galega. As sesións terán lugar durante os meses de febreiro e marzo de 2025 no Auditorio Mar de Vigo.

Podes consultar os contidos e obter máis información sobre os trámites de inscrición premendo aquí.
15/01/2025. AXUDAS E PREMIOS

Axudas ás entidades locais para a compra de novidades editoriais en galego

A Consellería de Cultura, Lingua e Xuventude publica unha convocatoria de subvencións dirixidas ás entidades locais de Galicia para a compra de novidades editoriais en galego en formato físico e para mellorar as coleccións bibliográficas das bibliotecas e/ou axencias de lectura públicas de titularidade municipal, integradas na Rede de Bibliotecas Públicas de Galicia. O prazo de presentación de solicitudes será desde o día 22 de xaneiro de 2025 ata o día 21 de febreiro de 2025, ambos incluídos.

Podes consultar o texto completo da convocatoria premendo aquí.
14/01/2025. OUTRAS

Convócanse as probas de avaliación en competencia clave

A Consellería de Emprego, Comercio e Emigración convoca probas de avaliación en competencias clave, que dan acceso ás accións formativas dos certificados profesionais dos niveis 2 e 3 de cualificación. Entre as competencias clave requiridas para acceder a estes certificados está a “comunicación en lingua galega”.

O prazo de presentación de solicitudes para participar nas probas é dun mes, contado a partir do día seguinte ao da publicación da convocatoria no DOG.
14/01/2025. OUTRAS

O Misal Romano xa conta cunha versión actualizada en lingua galega

A finais de decembro do pasado 2024 tivo lugar no Museo das Peregrinacións, en Santiago de Compostela, a presentación pública da nova edición revisada e actualizada do Misal Romano en lingua galega. Esta nova edición está coordinada polo monseñor Leonardo Lemos Montanet, bispo de Ourense, e foi elaborada a través dun convenio de colaboración entre o Arcebispado de Santiago de Compostela e a Xunta de Galicia. No marco deste acordo, a Conferencia Episcopal Española editou 1.500 exemplares deste misal, que serán distribuídos a través das dioceses galegas. No Portal da Lingua Galega tamén está accesible en formato dixital.

Para ampliar información sobre esta iniciativa, preme aquí.
14/01/2025. OUTRAS

A Xunta de Galicia presenta o equipo encargado da renovación do Plan xeral de normalización da lingua galega

A Xunta de Galicia presentou o equipo de expertos que dirixirán as diferentes comisións encargadas de actualizar o Plan xeral de normalización da lingua galega (documento aprobado por unanimidade no Parlamento de Galicia o 21 de setembro de 2004), co obxectivo de adaptalo á realidade social, demográfica e lingüística actual. As persoas responsables das diferentes comisións de traballo son Diana Santiago, doutora de Dereito Administrativo na Universidade de Santiago de Compostela; Edita de Lorenzo, profesora do Departamento de Teoría do Sinal e Comunicacións da Universidade de Vigo; Manuel Núñez Singala, director do SNL da USC e experto en formación de adultos; Xoaquín Monteagudo, avogado e presidente da Asociación de Funcionarios pola Normalización Lingüística; Armando Requeixo, catedrático de Lingua e Literatura Galega e profesor da USC; Concha Losada, profesora da Facultade de Medicina da USC e presidenta do Museo do Pobo Galego; Patricia Hermida, produtora musical e avogada experta en dereitos de autor; Xosé González, dinamizador lingüístico e presidente do Foro Enrique Peinador; Rosalía Morlán, escritora e enfermeira; Celia Pereira, avogada e presidenta da Fundación Vicente Risco; e Xosé Lago, subdirector da AECT da Eurorrexión Galicia-Norte de Portugal. Todas as comisións traballarán baixo a coordinación do membro da RAG e catedrático de Filoloxía Románica Manuel González Gonzaléz.

A renovación do PXNLG é unha das medidas recollidas no documento Pacto pola lingua, presentado polo goberno autonómico galego ás forzas políticas con representación parlamentaria e mais ás principais institucións galegas a finais do 2024.

Na páxina web da Xunta de Galicia podes obter máis información sobre o proxecto de actualización do PXNLG.

O documento Pacto pola lingua podes consultalo no xornal Praza Pública.
13/01/2025. DINAMIZACIóN

Cantareiras, a palabra que define o ano 2024 e anticipa o 2025

O Portal das Palabras, proxecto promovido pola Real Academia Galega e a Fundación Barrié, fixo público que “cantareira” foi o termo escollido por votación popular como Palabra do Ano 2024.

Con esta escolla constátase a expectación e ilusión con que foi acollida pola sociedade galega a decisión da RAG, tomada o pasado xullo de 2024, de dedicar o Día das Letras Galegas 2025 á poesía popular oral e ás cantareiras galegas. En representación de todas elas, homenaxearanse as figuras de Adolfina e Rosa Casás Rama (Cerceda); Eva Castiñeira (Muxía); e Prudencia e Asunción Garrido Ameijende e mais Manuela Lema Villar, as tres Pandeireteiras de Mens (Malpica de Bergantiños). No sitio web da RAG xa podes consultar o espazo dedicado a esta conmemoración.



13/01/2025. DINAMIZACIóN

O IES Basanta Silva e o proxecto Regueifesta organizan o I Campus de Regueifa

Durante os días 17, 18 e 19 de xaneiro de 2025 terá lugar en Vilalba o I Campus de Regueifa, unha iniciativa didáctica organizada polo IES Basanta Silva e mais o proxecto Regueifesta que reunirá a mozos/as regueifeiros/as de entre 12 e 16 anos de Vilalba, Vila de Cruces, O Courel, Porto do Son, Compostela, Monforte, Vigo e Carballo, co ánimo de fortalecer e poñer en valor o traballo realizado pola rede de centros educativos que empregan a improvisación oral en verso como ferramenta de normalización lingüística.

Na páxina de Facebook do proxecto Regueifesta podes consultar toda a información sobre esta iniciativa.
13/01/2025. CURSOS E CONGRESOS

As IV Xornadas de Normalización Lingüística analizan a emerxencia lingüística do galego

A Mesa pola Normalización Lingüística, a AS-PG, CIG-Ensino e o Concello de Santiago organizan a cuarta edición das Xornadas de Normalización Lingüística, que terán lugar o 25 de xaneiro de 2025 no IES As Fontiñas (Santiago de Compostela). Na sesión da mañá as intervencións centraranse na análise da situación de emerxencia lingüística constatada polos recentes datos demolingüísticos ofrecidos polo IGE, e pola tarde presentaranse dúas experiencias de intervención sociolingüística (unha de elaboración dun telexornal con alumando de educación infantil e outra de recuperación do uso do éuscaro) e mais o libro Liberdade para o galego. Política, uso e disposición da lingua, autoría de Elsa Quintas e Marcos Maceira.

A matrícula é de balde e podes tramitala a través deste formulario.
13/01/2025. OUTRAS

En liña o calendario científico escolar 2025

O CSIC publica un ano máis o Calendario científico escolar 2025, unha iniciativa didáctica pensada para achegar a cultura científica á xente nova e crear referentes inspiradores, que nesta sexta edición fai un esforzo por darlle visibilidade á ciencia africana, unha eiva detectada nas anteriores entregas.

Tanto o calendario coma os recursos didácticos que o completan están dispoñibles en 11 idiomas (entre os que se atopa o galego) e mais en braille. A Unidade de Divulgación Científica e Cultural e o Servizo de Normalización Lingüística da Universidade da Coruña colaboran co CSIC na preparación da edición en galego.

Todos estes materiais están dispoñibles para a súa descarga de balde na páxina web do proxecto.
13/01/2025. AXUDAS E PREMIOS

Subvencións para a edición de publicacións periódicas en galego

A Secretaría Xeral de Medios da Xunta de Galicia publica a convocatoria de subvencións para o ano 2025 dirixidas a empresas que realicen publicacións periódicas escritas integramente en galego.

O prazo para presentar as solicitudes é dun mes, contado a partir do día seguinte ao da publicación da convocatoria.
13/01/2025. AXUDAS E PREMIOS

Axudas para o fomento do galego no ensino

A Consellería de Cultura, Lingua e Xuventude publica dúas convocatorias de axudas para a presentación de proxectos de fomento do galego no ámbito do ensino non universitario durante o curso 2024/2025; unha dirixida a centros de titularidade pública e outra a centros de titularidade privada.

En ambos os casos, o prazo de presentación de solicitudes remata o 3 de febreiro de 2025.
20/12/2024. DINAMIZACIóN

O IES As Telleiras e o Concello de Narón presentan a campaña “Coida a túa lingua”

O Servizo de Normalización Lingüística (SNL) do Concello de Narón e o IES As Telleiras presentan a campaña Coida a túa lingua, baseada nun proxecto de normalización lingüística desenvolvido polo alumnado de 1º de ESO durante o curso académico 2023-2024.

O alumnado deseñou un xogo de cartas con léxico galego do ámbito sanitario para que as nenas e nenos que asistan ao servizo de pediatría aprendan dunha forma divertida o nome dalgunhas especialidades médicas e doenzas. O propio alumnado foi o encargado tamén de entregar exemplares deste xogo ao persoal de pediatría do Centro de Saúde de Narón para que os repartan entre as familias. Tamén podes descargalo e imprimilo no web do SNL.

Para ampliar información sobre esta iniciativa, preme aquí.
20/12/2024. EMPREGO

Contratos para o desenvolvemento de modelos de lingua no Proxecto Nós

O Instituto da Lingua Galega e o Centro Singular de Investigación en Tecnoloxías Intelixentes (CiTIUS) da Universidade de Santiago de Compostela ofertan 4 prazas de investigador/a colaborador/a para perfís de enxeñaría (informática, telecomunicacións...) e outras áreas STEM, que traballarán no desenvolvemento de modelos de lingua de voz e texto no marco do Proxecto Nós. A duración prevista dos contratos é de 1 ano, cun salario bruto anual de 24.093,30 €.

As persoas interesadas deben enviar o seu currículo ao enderezo maria.baqueiro.vidal@usc.gal, indicando o perfil ou perfís aos que opta e poñendo no asunto da mensaxe "Contratos para desenvolvemento de modelos de lingua".

Para obter máis información, preme aquí.
19/12/2024. DINAMIZACIóN

A cativada compostelá despedirá o ano cunha Festa do Apego

O Departamento de Lingua Galega do Concello de Santiago de Compostela organiza unha Festa do Apego dirixida ao público infantil e ás súas familias, que terá lugar o 21 de decembro de 2024 no Auditorio de Galicia.

O evento está deseñado para crear espazos de uso para o noso idioma no ámbito do lecer infantil. O programa inclúe xogos, contos, espectáculos musicais e teatrais, obradoiros de baile e música tradicional, malabares e unha visita guiada á exposición “Humor líquido”, do humorista gráfico Xaquín Marín. A entrada é aberta e de balde ata completar a capacidade en cada actividade.

Para consultar o programa completo, preme aquí.
17/12/2024. DINAMIZACIóN

Luis Davila ilustra nun calendario da UVigo como se fala “galego de tranquis”

A Área de Normalización Lingüística (ANL) da Universidade de Vigo presenta o seu tradicional calendario, que nesta edición do ano 2025 contén 13 láminas, autoría do ilustrador e humorista gráfico Luis Davila, que recollen o ideario da campaña Galego de Tranquis, promovida pola ANL para animar o alumnado que non é galegofalante a falar e escribir en galego, sen afogos nin presión. Unha tiraxe de 2.000 exemplares en formato físico deste almanaque estará dispoñible nas conserxerías das facultades, escolas e centros dos tres campus da UVigo. A maiores, o calendario tamén está accesible en formato PDF na páxina web da ANL.

No Diario da Universidade de Vigo podes obter máis información sobre esta iniciativa.
17/12/2024. AXUDAS E PREMIOS

En liña os vídeos gañadores e finalistas de #traduceTED 2024

O xurado do IX Concurso de subtitulación ao galego de vídeos TED de divulgación científica (#traduceTED 2024) fixo pública a resolución na que dá a coñecer os finalistas e gañadores desta edición. O certame está organizado polo Servizo de Normalización Lingüística da Universidade de Santiago de Compostela co obxectivo de estimular a presenza do galego na comunicación e a divulgación científica e de fomentar a existencia de recursos divulgativos audiovisuais neste idioma.

Na páxina web do SNL da USC podes ver todos os traballos finalistas e gañadores nas diferentes edicións.
17/12/2024. CURSOS E CONGRESOS

A UNED de Pontevedra organiza un curso de iniciación á lingua galega

A UNED de Pontevedra, en colaboración co Concello de Ribadumia, organiza un curso de iniciación á lingua galega, dirixido a público xeral sen coñecementos previos de galego que desexe aprender o noso idioma ou mellorar as súas competencias lingüística básicas. As sesións serán presenciais e terán lugar entre o 14 de xaneiro e o 13 de maio de 2025, todos os martes de 19:30 h a 21:30 h, na Casa de Cultura de Ribadumia.

Para consultar o programa completa e obter información sobre os trámites de inscrición, preme aquí.