Novas da lingua

Rexistros4051 a 4080 de 5145
  1. Inicio
  2. CDSG-CCG
  3. Novas da lingua
07/09/2010. AXUDAS E PREMIOS

Resólvense as subvencións a entidades locais

A Secretaría Xeral de Política Lingüística fai pública a resolución da convocatoria de subvencións ás entidades locais de Galicia para a promoción do uso da lingua galega.

En total, beneficiaranse destas axudas un total de 106 concellos que, ben de xeito individual ou agrupado, acolléronse a algunha das modalidades que recolle a convocatoria (creación de SNL; mantemento ou reforzamento de SNL; e desenvolvemento de actividades de dinamización lingüística).
02/09/2010. AXUDAS E PREMIOS

Axudas para a dinamización lingüística nos centros educativos

A Secretaría Xeral de Política Lingüística convoca axudas para desenvolver proxectos de fomento do uso do galego nos centros de ensino non universitario de Galicia durante o curso escolar 2010-2011.

O prazo de presentación de solicitudes remata o vindeiro
1 de outubro de 2010. Se desexa máis información, prema aquí.
02/09/2010. CURSOS E CONGRESOS

Obradoiro de lingua e cultura galegas para inmigrantes e emigrantes retornados/as

O Servizo de Normalización Lingüística do Concello da Coruña organiza un obradoiro que ten como obxectivo facilitarlles a integración no contexto sociolingüístico galego aos colectivos de inmigrantes e emigrantes retornados/as.

O curso comezará o 2 de outubro e desenvolverase todos os sábados, de 12:00 h a 14:00 h, no Centro Social Sagrada Familia.

O prazo de inscrición remata o vindeiro 24 de setembro.

Se desexa máis información sobre o programa e mais os trámites de inscrición, prema aquí.
26/08/2010. DINAMIZACIóN

Falando en verde

O Departamento de Lingua Galega do Concello de Santiago organiza unha nova edición do obradoiro ambiental Falando en verde, destinado a nenos/as de 6 a 12 anos, que ten como obxectivo fomentar o uso do galego a través da descuberta do seu contorno natural.

O obradoiro impartirase os días 1, 2, 3, 6, 7, 8 e 9 de setembro de 2010, de 9:00 a 13:00 horas, na Casa das Asociacións de Cornes (Conxo).

O prazo de inscrición remata o 31 de agosto. Se desexa máis información, prema aquí.
26/08/2010. CURSOS E CONGRESOS

Cursos de formación lingüística para o persoal da Administración local de Pontevedra

A Deputación de Pontevedra publica, no BOP do 23 de agosto de 2010, o plan de formación para o segundo semestre de 2010, que inclúe cursos de linguaxe administrativa galega (niveis básico, medio e superior) e mais un curso sobre a normativa ortográfica vixente na actualidade.

Os cursos están destinados ao persoal da Deputación Provincial, dos organismos autónomos e mais dos concellos adheridos ao Plan Agrupado de Formación do ano 2010.

O prazo para presentar as solicitudes remata o 3 de setembro.

Se desexa consultar o texto completo da convocatoria, prema aquí.

30/07/2010. CURSOS E CONGRESOS

Cursos de linguaxe xurídica galega

A Dirección Xeral de Xustiza, en colaboración coa Secretaría Xeral de Política Lingüística, convoca cursos de linguaxe xurídica galega, dos niveis medio e superior, destinados ao persoal ao servizo da Administración de xustiza e mais aos colectivos relacionados co ámbito xurídico que presten servizos en Galicia.

O prazo de presentación de solicitudes remata o 8 de setembro de 2010.

Se desexa consultar o texto completo da convocatoria, prema aquí. [corrección de erros]
26/07/2010. INVESTIGACIóN

En liña o segundo volume de Estudos de Lingüística Galega

O Instituto da Lingua Galega presenta o segundo volume de Estudos de Lingüística Galega, revista de periodicidade anual que quere constituírse como un espazo de debate e intercambio científico arredor do idioma galego.

A publicación inclúe estudos sobre lingüística e filoloxía, artigos breves relacionados coa variedade normativa do galego e recensións críticas de traballos que analizan directa ou indirectamente o noso idioma.

Ademais da versión en papel, a revista conta cunha edición electrónica que permite o acceso íntegro a todo o seu contido.
21/07/2010. LEXISLACIóN

O Senado reforma o seu regulamento para ampliar o uso das linguas cooficiais


O Pleno do Senado aprobou hoxe definitivamente o seu regulamento para ampliar o uso das diferentes linguas cooficiais do Estado no seu seo a partir do vindeiro ano.

Ata o de agora as linguas cooficiais podían empregarse unicamente na Comisión Xeral de Comunidades Autónomas mais a partir desta nova reforma do regulamento, o galego, catalán, valenciano e éuscaro poderán usarse tamén nos plenos, aínda que só no debate das mocións. Os parlamentarios terán tamén a posibilidade de usar todas estas linguas por escrito nos textos que dirixan ao Senado.
20/07/2010. INVESTIGACIóN

Estudos xurídicos sobre o Decreto para o Plurilingüismo

O vindeiro sábado, 24 de xullo, ás 22:00 h, terá lugar no Festigal (Santiago de Compostela) a presentación da obra Estudos xurídicos sobre o Decreto para o Plurilingüismo, coordinada por Luís Villares Naveira e editada por Laiovento.

Ademais do propio coordinador, na presentación participarán tamén Alba Nogueira, Carlos Amoedo, Dalila Dopazo e Francisco Pillado.

20/07/2010. AXUDAS E PREMIOS

Premio Via Galego 2010

A Fundación Via Galego convoca a primeira edición do Premio Via Galego, galardón co que quere recoñecerse o labor daquelas persoas ou entidades que traballan para mellorar as relacións de Galicia cos outros territorios do sistema lingüístico galego-portugués.

O prazo para presentar as candidaturas remata o 1 de setembro de 2010 e o galardón, que carece de dotación económica, darase a coñecer o 18 de outubro.

Se desexa máis información, prema aquí.
19/07/2010. AXUDAS E PREMIOS

VII Premio Luísa Villalta a Iniciativas Normalizadoras

Os servizos de normalización lingüística das tres universidades galegas, en colaboración coa Secretaría Xeral de Política Lingüística, organizan a sétima edición do Premio Luísa Villalta a Iniciativas Normalizadoras, que ten como principal obxectivo promover a reflexión e dinamización lingüísticas no ámbito universitario.

O premio está dirixido a todos os membros da comunidade universitaria galega e conta con dúas modalidades: “idea para a promoción do galego” e “campaña normalizadora”.

O prazo de presentación de proxectos e/ou ideas remata o 15 de novembro de 2010.
19/07/2010. OUTRAS

Microsoft presenta a interface en galego do Windows 7

O paquete de idioma de interface de Windows 7 fornece unha versión parcialmente traducida que permite ao usuario/a navegar en galego polas áreas máis utilizadas do Windows.

Na páxina do Centro de descarga de Microsoft atopará toda a información e mais os ficheiros necesarios para a instalación.

14/07/2010. AXUDAS E PREMIOS

Axudas para a edición de publicacións periódicas en lingua galega

A Secretaría Xeral de Medios da Xunta de Galicia anuncia, no DOG do 13 de xullo de 2010, a convocatoria de subvencións para empresas que editen publicacións periódicas escritas integramente en galego.

O prazo de presentación de solicitudes é dun mes, contado a partir do día seguinte ao da publicación da convocatoria. [modificación da convocatoria]
08/07/2010. AXUDAS E PREMIOS

Axudas para a promoción do galego no Concello de Vigo

O Concello de Vigo convoca subvencións para asociacións e organizacións sen ánimo de lucro que teñen por obxecto fomentar a realización de actividades de dinamización e promoción do uso do galego.

O prazo de presentación de solicitudes é de 20 días naturais, contados a partir do seguinte ao da publicación da convocatoria.

06/07/2010. CURSOS E CONGRESOS

Simposio lingüístico: a morte das linguas, linguas ameazadas, documentación e revitalización

A Universidade de Wisconsin-Milwaukee presenta a vixésimo sexta edición do seu Simposio lingüístico, un evento internacional sobre as linguas ameazadas e os procesos de revitalización lingüística.

As sesións terán lugar os días 20, 21 e 22 de outubro de 2011 e a organización convida a todas as persoas interesadas a participar presentando relatorios que analicen a situación das linguas ameazadas, ben desde unha perspectiva académica (Lingüística, Socioloxía, Psicoloxía, Antropoloxía, Educación ou ámbitos relacionados), ou ben desde a perspectiva dos propios activistas sociais involucrados na súa recuperación.

Se desexa máis información, prema aquí.

06/07/2010. DINAMIZACIóN

Un verán de lecer no Concello de Zas

O Servizo de Normalización Lingüística do Concello de Zas presenta a guía Un verán de lecer, compilación de produtos culturais en lingua galega elaborada en colaboración cos ENDL dos centros de ensino do concello.

A publicación recolle recomendacións literarias, musicais e audiovisuais en lingua galega clasificadas por idades, co obxectivo de difundir a oferta de produtos culturais en galego entre os potenciais consumidores.

06/07/2010. CURSOS E CONGRESOS

Xornadas de formación para profesorado colaborador dos cursos de lingua galega

A Secretaría Xeral de Política Lingüística convoca cursos de formación para o profesorado colaborador dos cursos de lingua galega que organiza esta secretaría. As sesións desenvolveranse entre o 26 de xullo e o 4 de agosto de 2010 en Santiago de Compostela e o prazo de inscrición remata o vindeiro 16 de xullo.

Do 5 ao 6 de agosto de 2010 terán lugar tamén unhas xornadas de formación para os avaliadores dos Celga. O prazo de inscrición é do 13 ao 23 de xullo.

O profesorado colaborador asignado á quenda de Linguaxe Administrativa Superior de setembro poderá participar nun curso de actualización que se desenvolverá o 17 de xullo.

Para obter máis información, prema aquí.
05/07/2010. EMPREGO

Convocatoria de lectorados de lingua, literatura e cultura galegas

A Consellería de Educación e Ordenación Universitaria publica, no DOG do 25 de xuño de 2010, a convocatoria de lectorados de lingua, literatura e cultura galegas en diferentes universidades de España e do estranxeiro.

O prazo de presentación de solicitudes é dun mes, contado a partir do día seguinte ao da publicación da convocatoria.
05/07/2010. DINAMIZACIóN

AnimaLingua: granxa-escola en lingua galega

O Departamento de Lingua Galega do Concello de Santiago organiza a terceira edición da granxa-escola AnimaLingua, iniciativa didáctica de dinamización lingüística no tempo libre dirixida a nenas e nenos de entre 8 e 12 anos.

O campamento desenvolverase entre o 16 e o 28 de agosto no Centro de Desenvolvemento Rural "O Viso", en Sarreaus (Ourense).
O prazo de inscrición remata o 16 de xullo.

Para obter máis información sobre o programa de actividades e mais os trámites de inscrición, prema aquí.
05/07/2010. DINAMIZACIóN

Lois Pereiro, autor homenaxeado no Día das Letras Galegas 2011

O Plenario da Real Academia Galega (RAG) acordou, na sesión ordinaria do pasado 26 de xuño de 2010, dedicar o Día das Letras Galegas 2011 ao poeta monfortino Lois Pereiro.

Lois Pereiro foi cofundador, xunto con Antón Patiño, Xosé Manuel Pereiro e Manuel Rivas, da revista Loia, na que publicou algúns dos seus poemas, recollidos posteriormente na obra póstuma Poemas para unha loia (1996). Participou nas antoloxías colectivas De amor e desamor (1984) e De amor e desamor II (1985) e publicou en vida dous poemarios individuais: Poemas 1981/199 e Poesía última de amor e enfermidade.

Se desexa máis información, prema aquí.

24/06/2010. DINAMIZACIóN

Abertos ao galego

A Mesa pola Normalización Lingüística presenta o certificado Abertos ao galego, que se concederá, en diferentes niveis, ás empresas e entidades de calquera índole que amosen o seu compromiso coa normalización do idioma galego.

As entidades que conten con este distintivo figurarán nun catálogo web, poderán participar en actos anuais de promoción e accederán a descontos publicitarios nos medios de comunicación que colaboren co proxecto.


24/06/2010. AXUDAS E PREMIOS

Resólvense os premios Lingua de Amor 2010

O Servizo de Normalización Lingüística do Consello da Xuventude de Galicia fixo públicas as creacións gañadoras en cada unha das modalidades (“declaracións de amor en galego a través da rede” e “cancións de amor en lingua galega”) do concurso Lingua de Amor 2010.

A entrega de premios terá lugar o vindeiro sábado, 26 de xuño, ás 12:00 horas, na Biblioteca Pública Ánxel Casal (Santiago de Compostela).

Se desexa máis información, prema aquí.
24/06/2010. OUTRAS

Conversa sobre os últimos vinte anos de normalización lingüística

Baixo o lema “A batalha da língua: tantos anos!”, a Gentalha do Pichel organiza unha conversa sobre os últimos vinte anos do proceso de normalización lingüística.

O acto, no que participarán diferentes profesionais implicados no proceso, terá lugar mañá, 25 de xuño, ás 20:30 horas, no Centro Social A Gentalha do Pichel (Santiago de Compostela).


18/06/2010. CURSOS E CONGRESOS

A debate no CCG os modelos de convivencia lingüística para o futuro

O vindeiro 29 de xuño de 2010 terá lugar a cuarta sesión do
Seminario sobre lingua, sociedade e política en Galicia, na que se proporán modelos de convivencia para o futuro e se presentarán as conclusións do seminario.

Se desexa asistir a esta sesión, envíenos os seus datos a través do seguinte formulario.
Atenderemos todas as solicitudes ata completar a capacidade do salón. A súa praza só está garantida se recibe un correo de confirmación.
18/06/2010. CURSOS E CONGRESOS

XII Encontros para a Normalización Lingüística

Xa pode consultar en liña o programa provisional dos
XII Encontros para a Normalización Lingüística, que terán lugar os vindeiros días 23 e 24 de setembro de 2010.

Nesta edición os Encontros van focar a atención nas accións de reivindicación lingüística promovidas pola propia cidadanía, sen esquecer a liña habitual de seguimento de iniciativas e propostas e de revisión de accións xa realizadas.

A inscrición realizarase exclusivamente a través dun formulario habilitado no web do CCG. O prazo de matrícula remata o vindeiro 15 de setembro.
18/06/2010. EMPREGO

Bolsas de estadías no Centro Ramón Piñeiro

A Secretaría Xeral de Política Lingüística publica, no DOG do 17 de xuño de 2010, a convocatoria pública de bolsas de estadías destinadas a investigadores de fóra de Galicia para colaborar en proxectos de investigación do Centro Ramón Piñeiro para a Investigación en Humanidades.

O período da estadía será de entre dous e sete meses e non pode superar a data tope do 31 de decembro de 2010. O prazo de presentación das solicitudes é de 31 días naturais, contados a partir do seguinte ao da publicación da convocatoria.

18/06/2010. DINAMIZACIóN

Decálogo coas razóns para elixir galego no ensino

A Coordinadora Galega de Equipos de Normalización e Dinamización Lingüística (CGENDL) publicita no seu web o decálogo "Dez razóns polas que elixirmos o galego como lingua materna", co ánimo de orientar as familias que nestes días están a facer a matrícula dos seus fillos/as no Ensino Infantil.

Como complemento do decálogo, a CGENDL difunde tamén na mesma sección do web a presentación "O que vai supoñer o decreto”.

17/06/2010. AXUDAS E PREMIOS

A Universidade da Coruña premia a investigación en lingua galega

A Comisión de Normalización Lingüística da Facultade de Dereito e mais o Servizo de Normalización Lingüística da UDC convocan o I Premio Lois Tobío de Investigación Xurídica en Lingua Galega.

O premio está destinado ao estudantado da Facultade de Dereito da UDC, aos investigadores predoutorais das tres universidades galegas e mais aos doutores/as en Dereito que traballan en Galicia.

Pola súa banda, as comisións de normalización lingüística da Facultade de Ciencias Económicas e Empresariais e mais da Escola de Estudos Empresariais, tamén en colaboración co SNL, convocan os II Premios de investigación en lingua galega no ámbito económico-empresarial, destinados aos tres colectivos universitarios (estudantado, PAS e profesorado).

O prazo de presentación dos traballos, para calquera das convocatorias, remata o vindeiro 15 de outubro.
19/04/2010. AXUDAS E PREMIOS

Entréganse en Ponferrada os V Premios Xarmenta de Debuxo

A Asociación Berciana da Lingua Xarmenta entregará o vindeiro 22 xuño os V Premios Xarmenta de Debuxo, destinados ao alumnado de Galego no Bierzo.
O tema dos debuxos gañadores foi a situación do idioma galego, especialmente na Comarca do Bierzo.

O acto de entrega dos galardóns terá lugar ás 17:00 horas no Salón de Actos da Biblioteca Municipal de Ponferrada, e contará tamén coa actuación do grupo Viravolta Títeres-Seisdedos co seu espectáculo “O cego dos Monifates”.

Se desexa máis información, prema aquí.
15/06/2010. DINAMIZACIóN

A escola, unha oportunidade para aprender

O Concello de Pontevedra, a través da Concellaría de Normalización Lingüística, xunto con todos os centros de ensino público infantil e primario do concello, presentan a campaña
A escola, unha oportunidade para aprender.

Logo da aprobación do Decreto 79/2010, a campaña está especialmente dirixida
ás familias que van matricular os seus fillos/as no ensino infantil para o curso 2010-2011, co ánimo de que reflexionen sobre a necesidade de que os nenos/as poidan adquirir unha competencia plena en lingua galega.

Ademais dos folletos informativos deseñados especialmente para as familias de Pontevedra, os organizadores facilitan tamén unha versión xenérica deste texto co ánimo de que poida ser utilizado por todas as entidades que o desexen.