Novas da lingua

Rexistros91 a 120 de 5145
  1. Inicio
  2. CDSG-CCG
  3. Novas da lingua
27/11/2025. CURSOS E CONGRESOS

Aberto o prazo de envío de propostas para o CIDS2026

Todas as persoas interesadas en participar no VIII Congreso Internacional de Dialectoloxía e Socioligüística (CIDS 2026) teñen de prazo para enviar as súas propostas ata o 15 de decembro de 2025.

O congreso, que organiza o Instituto da Lingua Galega da Universidade de Santiago de Compostela (USC) en colaboración co Projeto Atlas Linguístico do Brasil, desenvolverase entre os días 13 e 16 de xullo de 2026 na Facultade de Filoloxía da USC, baixo o título “Cartografías da lingua: variación, contacto e planificación”.
25/11/2025. DINAMIZACIóN

Na Baña, a creatividade en galego terá premio este Nadal

O Concello da Baña organiza o IV Concurso de postais de Nadal en galego, co obxectivo de promover a creatividade e o uso do galego no tempo de Nadal entre a comunidade escolar. O certame está dirixido especificamente a todas as persoas de ata 16 anos matriculadas no CPI San Vicenzo, ou empadroadas na Baña.

Outorgaranse diferentes premios segundo a categoría e as persoas gañadoras recibirán unha caixa con agasallos relacionados co material escolar. O prazo para presentar os traballos remata o 10 de decembro de 2025.

Para consultar as bases completas do certame, preme aquí.
24/11/2025. OUTRAS

Medra o uso do galego na USC por segundo ano consecutivo

O Servizo de Normalización Lingüística da Universidade de Santiago presenta o informe sobre o uso do galego, do castelán e doutras linguas na actividade docente no curso 2025-26, elaborado a partir da información que declara o profesorado na súa programación docente.

En termos xerais, detéctase un incremento por segundo ano consecutivo no uso do galego na actividade docente da USC, que na actualidade se achega ao 30%. Concretamente, impártese en castelán o 66,6% das horas docentes, en galego o 29,2%, en inglés o 2,2% e noutros idiomas estranxeiros o 2%. Con todo, malia que 10 dos 29 centros da USC imparten máis da metade da súa docencia en galego, a realidade é moi diversa se analizamos os datos atendendo a variables como o tipo de estudos, as áreas de coñecemento ou o campus no que se imparte a docencia.

Podes consultar o estudo completo premendo aquí.
24/11/2025. DINAMIZACIóN

Accesible en liña o documental “Promover o galego dende o local. Ames”

O Concello de Ames e Nós Televisión presentan o documental “Promover o galego dende o local. Ames”, unha peza audiovisual de 37 minutos de duración que ten como obxectivo darlle visibilidade ao traballo que se realiza desde as administracións locais para normalizar o uso da lingua galega.

O documental céntrase concretamente en catro proxectos desenvolvidos polas concellarías de Normalización Lingüística, Mocidade, Educación e Promoción Económica do Concello de Ames, baixo a dirección e coordinación do Servizo de Normalización Lingüística municipal. Os proxectos analizados son: Galetiktokers; os Premios Lingua e Empresa; o Certame Literario de Ames; e o programa Modo galego, actívao! (este último organizado en colaboración coa Real Academia Galega).

O documental está accesible na canle de Youtube de Nós Televisión, na canle número 9 de R en toda Galicia e na plataforma Movistar Plus+ en todo o Estado español.

Se precisas máis información, preme aquí.
24/11/2025. OUTRAS

Gemini, a IA de Google, incorpora o galego

Gemini 3 Pro, o novo modelo de intelixencia artificial presentado a semana pasada pola empresa multinacional Google, integra por primeira vez o galego, o catalán e o éuscaro, o que supón un importante avance na normalización destes idiomas minorizados no ámbito tecnolóxico. Gemini 3 xa está dispoñible a través Google AI Pro e Ultra no Modo IA da Busca, así como na aplicación de Gemini.

No xornal dixital Código Cero tes información detallada sobre este tema.
21/11/2025. CURSOS E CONGRESOS

Curso “Biografías lingüísticas e transmisión do galego: unha mirada crítica”

O Instituto da Lingua Galega e o Grupo de investigación MetalingüísTICa da USC organizan o curso Biografías lingüísticas e transmisión do galego: unha mirada crítica, dirixido a profesorado de ensino primario e secundario (especialidades de Lingua galega e literatura e de Lingua castelá e literatura). Nas sesións, que terán lugar o 29 de novembro de 2025 na Facultade de Filoloxía da USC, reflexionarase sobre a conciencia lingüística crítica como metodoloxía para reflexionar sobre a transmisión interxeracional da lingua galega e a súa incorporación ás biografías lingüísticas do alumnado.

O profesorado dos centros públicos e concertados pode inscribirse ata o 21 de novembro, a través da ligazón www.edu.xunta.gal/fprofe (código do curso G2502039). O resto de asistentes teñen de praza ata o 27 de novembro de 2025 para formalizar a inscrición.

Podes ampliar información premendo aquí.
21/11/2025. INVESTIGACIóN

Preséntase no CCG o Cancioneiro sociolingüístico das Terras do Bolo

O vindeiro luns, 24 de novembro de 2025, ás 12:00 horas terá lugar na sede do Consello da Cultura Galega a presentación pública do libro Cancioneiro sociolingüístico das Terras do Bolo, autoría de Xosé Lois Foxo.

A publicación contén a transcrición melódica e fonética de 416 composicións propias da literatura popular de transmisión oral (cantares, romances, cantos de arada e recitados, rondas e parrafeos, reis e aninovo, aguinaldos etc.) recollidas entre 1962 e 2025 nas Terras do Bolo, xunto con 424 fotografías. O material preséntase acompañado por un estudo musicolóxico e outro sociolingüístico.

No acto intervirán Rosario Álvarez, presidenta do Consello da Cultura Galega; Valentín García, secretario xeral de Lingua da Xunta de Galicia; Rosendo Luís Fernández, deputado provincial da Deputación de Ourense; Xosé Lois Foxo, autor do libro, e informantes do Cancioneiro.
20/11/2025. AXUDAS E PREMIOS

Resolución das axudas para dinamización lingüística concedidas pola Deputación de Pontevedra

A Deputación de Pontevedra publica a resolución das axudas concedidas a entidades culturais para o desenvolvemento de iniciativas de dinamización da lingua galega durante o ano 2025.

Podes consultar a listaxe de entidades beneficiarias premendo aquí.
17/11/2025. CURSOS E CONGRESOS

A Universidade de Vigo organiza o simposio “A educación tamén en galego”

A Área de Normalización Lingüística e a Facultade de Ciencias da Educación e do Deporte da Universidade de Vigo organizan o simposio A educación tamén en galego, no que se porá en valor o idioma galego como ferramenta para o estudo nos graos en Educación Infantil e Educación Primaria, así como para a formación de profesionais do ámbito do ensino.

A xornada, dirixida tanto a estudantado e profesorado do centro como a todas as persoas interesadas en xeral, terá lugar o 19 de novembro de 2025 na Facultade de Ciencias da Educación e do Deporte da UVigo.

A inscrición pode tramitarse a través da propia páxina web do simposio ou enviando un correo electrónico ao enderezo: simposio.galego.educacion@gmail.com.
14/11/2025. DINAMIZACIóN

Máis rechouchíos en galego para despedir o ano en Moaña

O Concello de Moaña presenta a nova oferta de dinamización lingüística para o público infantil e familiar, organizada ao abeiro do programa Rechouchíos. As actividades (teatro, narración oral, circo, malabares, música en directo...) desenvolveranse durante os meses de novembro e decembro de 2025, e concretamente os contacontos do 14 de novembro e do 26 de decembro terán intérpretes en lingua de signos de XOGA (Organización de Diversidade Sensorial de Galicia).

Rechouchíos é o un programa organizado polo Servizo de Normalización Lingüística, o Servizo de Benestar Social, Muller e Igualdade e a Biblioteca Pública Municipal do Concello de Moaña, co obxectivo de fomentar a lectura en galego e crear espazos de uso para o noso idioma no tempo de lecer dos máis pequenos.

Para ampliar información, preme aquí.
13/11/2025. AXUDAS E PREMIOS

Entréganse os XXXV Premios San Martiño de Normalización Lingüística

O pasado martes, 11 de novembro de 2025, tivo lugar no Teatro Principal da Estrada o acto de entrega dos XXXV Premios San Martiño de Normalización Lingüística, uns galardóns cos que o Concello da Estrada quere recoñecer publicamente o labor de persoas e entidades comprometidas coa normalización do idioma galego.

Nesta edición os galardoados foron “O Recuncho da Lingua” (asociación e programa radiofónico impulsado por Pilar Bernárdez), na categoría "Comarca Tabeirós-Terra de Montes"; o músico Abraham Cupeiro, na categoría “Galicia enteira”; e o médico Ramiro Varela Cives, na categoría “Unha vida enteira”.
12/11/2025. DINAMIZACIóN

Nova edición do Club de Debate Alingua

A Asociación de Entidades Locais pola Lingua Galega-Alingua presenta a nova edición do Club de Debate Alingua, unha iniciativa colaborativa promovida polos servizos de normalización lingüística de varios concellos galegos que ten como como obxectivo a dinamización lingüística e cultural no ámbito educativo, fomentando a fluidez comunicativa en galego, o pensamento crítico e o respecto pola diversidade de opinións. Poden participar equipos mixtos de entre 4 e 10 estudantes de 3º e 4º de ESO, 1º de Bacharelato e ciclos formativos. Haberá diferentes premios económicos nas fases previas e o equipo que gañe a fase final poderá gozar dunha viaxe multiaventura.

Os equipos interesados en participar poden inscribirse a través do SNL do seu concello. Nesta edición participan os concellos de Ames, Betanzos, Carballo, Dodro, Ferrol, Narón, Pontedeume, Pontevedra, Ribeira, Rois, Santa Comba, Santiago, Teo, Val do Dubra e Vilagarcía de Arousa.

O prazo de inscrición estará aberto ata o 27 de novembro de 2025.
12/11/2025. AXUDAS E PREMIOS

Convócanse os Premios Manuel Beiras 2025

O Departamento de Lingua do Concello de Santiago e a Cámara de Comercio de Santiago de Compostela convocan a vixésimo sexta edición dos Premios Manuel Beiras, que este ano levan por lema “O galego é o punto”. Estes galardóns teñen como finalidade recoñecer o compromiso coa normalización lingüística no sector empresarial compostelán, premiando o uso do galego na comunicación comercial nas seguintes categorías: "empresa cun uso continuado da lingua galega", "empresa de nova incorporación ao uso da lingua galega" e "empresa innovadora no uso do galego".

Poden concorrer a este premio as empresas radicadas no concello de Santiago de Compostela, entendendo aquelas que teñen a súa sede social no municipio ou que realizan unha importante actividade nel. As empresas poderán presentar directamente a súa candidatura ou seren propostas por calquera outra persoa ou entidade. O prazo para presentar as candidaturas remata o 21 de novembro de 2025.

No sitio web da iniciativa atoparás as bases completas da convocatoria, así como información sobre edicións anteriores.
12/11/2025. DINAMIZACIóN

Comeza a campaña para elixir a Palabra do Ano 2025

A Real Academia Galega e a Fundación Barrié, a través do seu proxecto Portal das Palabras, convida a cidadanía a participar na escolla da Palabra do Ano 2025, partindo da premisa de que o idioma forma parte da nosa identidade como pobo e a través das súas palabras podemos definir colectiva e simbolicamente as nosas experiencias.

Todas as persoas interesadas poden enviar as súas propostas ata o 1 de decembro de 2025, ás 23:59 h. Tras seleccionar os termos máis populares e de maior carga semántica, abrirase un novo período de votación entre o 3 e o 21 de decembro para elixir definitivamente a palabra que mellor describe este ano que está a piques de rematar.
11/11/2025. CURSOS E CONGRESOS

Curso de lingua galega na Pontenova

O Concello da Pontenova organiza un curso de lingua galega dirixido a todas as persoas interesadas en mellorar a súa competencia lingüística, con independencia do seu nivel previo de coñecemento. O curso, de 40 horas de duración, será impartido por Xosé Lastra Muruais e as sesións desenvolveranse a partir do 12 de novembro de 2025 (todos os mércores, de 19:00 a 20:00 horas).

A inscrición é gratuíta e pode tramitarse chamando ao teléfono 982 34 22 77.

Podes ampliar información premendo aquí.
11/11/2025. CURSOS E CONGRESOS

Escolas Católicas organiza a XXI Xornada de Normalización Lingüística

Escolas Católicas Galicia organiza, coa colaboración da Secretaría Xeral da Lingua, a vixésimo primeira edición da súa Xornada de Normalización Lingüística, co obxectivo de intercambiar información, experiencias e recursos didácticos en galego entre o profesorado e os membros dos equipos de dinamización da lingua galega dos centros educativos de Galicia. Nesta edición o eixo temático do programa será Begoña Caamaño, escritora á que se lle dedica o Día das Letras Galegas 2026.

Igual ca en edicións anteriores, entregaranse tamén os Premios Irmán Reboiras ás mellores iniciativas de fomento do galego e no remate haberá unha homenaxe á Asociación Oral de Galicia.

As sesións terán lugar o 21 novembro de 2025, en horario de 9:30 h a 15:00 h, na sede do Consello da Cultura Galega (Santiago de Compostela).
11/11/2025. AXUDAS E PREMIOS

Resólvense as axudas para a edición de publicacións periódicas en galego

A Secretaría Xeral de Medios da Xunta de Galicia publica a resolución da convocatoria do ano 2025 de subvencións destinadas a empresas que realicen publicacións periódicas escritas integramente en galego. Podes consultar a listaxe de entidades beneficiarias, xunto co importe concedido, premendo aquí.
10/11/2025. DINAMIZACIóN

Wikimaratón para crear contidos de física de partículas en galego

O vindeiro 13 de novembro de 2025, a partir das 15:30 h, o Instituto Galego de Física de Altas Enerxías (IGFAE) acollerá na súa sede o primeiro Wikimaratón de física de partículas, co obxectivo de crear contido en galego na Wikipedia relacionado coa física de altas enerxías, física de astropartículas, física nuclear e áreas relacionadas.

O evento está especialmente dirixido ao persoal do IGFAE, pero tamén está aberto a estudantes do grao de Física da USC, titulacións afíns ou, en xeral, calquera persoa con interese pola física de partículas.
Podes ampliar información premendo aquí.
10/11/2025. CURSOS E CONGRESOS

O Colexio da Avogacía de Santiago organiza un curso de repaso gramatical e ortográfico da lingua galega

O Servizo de Asesoramento Lingüístico do Colexio da Avogacía de Santiago organiza o seminario “Repaso gramatical e ortográfico da lingua galega”, co obxectivo de potenciar a calidade da redacción xurídica en galego dos escritos da avogacía.

O curso ten 10 horas de duración e as sesións terán lugar os días 25 e 27 de novembro, e 2 e 9 de decembro de 2025, entre as 18:30 h e as 21:00 h, na aula 1 da Escola de Práctica Xurídica (Facultade de Dereito da USC).

A matrícula é gratuíta para colexiados/as do ICA de Santiago. O prazo de inscrición remata o 24 de novembro ás 14:00 h, e as solicitudes deben remitirse ao enderezo electrónico: linguista@icasantiago.org
10/11/2025. CURSOS E CONGRESOS

Xornadas Enreguéifate para docentes

Os servizos de normalización lingüística dos concellos de Ames, Arzúa, Carballo, Pontevedra, Santiago e Teo organizan, no marco do proxecto Enreguéifate, unhas xornadas formativas dirixidas a docentes que desexen achegarse ao mundo da improvisación oral en verso e coñecer a súa potencialidade como ferramenta educativa.

O obradoiro, impartido por Lupe Blanco, Josinho da Teixeira, Manolo Maseda e Séchu Sende, terá lugar o 14 de novembro de 2025 no Pazo da Peregrina en Ames, desde as 16:30 h ás 20:30 h. O prazo de inscrición está aberto ata o 12 de novembro.

Podes obter máis información sobre o programa e os trámites de inscrición premendo aquí.

07/11/2025. CURSOS E CONGRESOS

A RAG organiza o “Simposio Día das Letras Galegas 2025”

O sábado 22 de novembro de 2025 terá lugar no Parador de Muxía o “Simposio Día das Letras Galegas 2025. As cantareiras e a poesía popular oral”, organizado pola Real Academia Galega no marco do seu programa de actos das Letras Galegas 2025. Nas sesións falarase das cantareiras e do cancioneiro popular galego desde a perspectiva etnomusicolóxica, literaria e sociolóxica. O evento pecharase coa actuación musical da A. C. Abaladeiras de Muxía.

As sesións poderán seguirse de xeito presencial (a entrada é libre ata completar a capacidade da sala) ou en directo a través da páxina web da RAG.
07/11/2025.

“Aquí tamén se fala”, Premio da Cultura Galega 2025 na categoría de Lingua

O xurado dos Premios da Cultura Galega fixo públicos os/as oito galardoados/as que son recoñecidos/as este ano 2025 polo seu labor no ámbito da creación, conservación e difusión cultural. Na categoría de Lingua, nesta edición outorgóuselle o premio á campaña “Aquí tamén se fala”, deseñada e promovida polo IES Rafael Dieste (A Coruña) e replicada en 200 centros educativos do país.

Nas restantes categorías, os/as galardoados/as son a Editorial Galaxia (Letras), a Bienal de Arte de Pontevedra (Artes Visuais), a Mostra Internacional de Teatro Cómico e Festivo de Cangas (Artes Escénicas), Bodegas Martín Códax (Música), Baños Films (Audiovisual), Antón Corral (Patrimonio Cultural) e o Programa de radio ‘Sempre en Galicia’ (Proxección Exterior).

Para ampliar esta información, preme aquí.
06/11/2025. CURSOS E CONGRESOS

Xornada “Metodoloxías de documentación lingüística para o estudo da variación”

O Instituto da Lingua Galega da Universidade de Santiago de Compostela e o Centro de Línguas, Literaturas e Culturas da Universidade de Aveiro organizan a xornada de formación “Metodoloxías de documentación lingüística para o estudo da variación”, impartida polo investigador Víctor Bargiela, da UNED, e polo profesor Luís Jesus, da Universidade de Aveiro. Nas sesións ofrecerase unha introdución práctica e teórica ao traballo de campo, á recollida e tratamento de datos lingüísticos, e ás cuestións éticas vinculadas con este tipo de investigación.

A xornada terá lugar o 28 de novembro de 2025 na sala de divulgación do Instituto da Lingua Galega. O prazo de inscrición remata o 24 de novembro.
06/11/2025. INVESTIGACIóN

Dicionario da fala valdeorresa

A comisión de lingua da Fundación Florencio Delgado Gurriarán convídate a participar no Dicionario da fala valdeorresa, un proxecto colobarativo que está a desenvolver co apoio da Xunta de Galicia para a recuperación e estudo do léxico galego propio da comarca de Valdeorras.

Na elaboración do dicionario estase a implementar un proceso participativo e de mediación cultural (obradoiros en centros educativos, grupos de veciñanza, traballo de campo…), que permite que a propia cidadanía colabore facendo as súas propias achegas léxicas, que serán supervisadas pola comisión de lingua da Fundación.
05/11/2025. DINAMIZACIóN

O Concello de Redondela inclúe información toponímica nas placas das rúas

O Concello de Redondela, que xa foi no seu día pioneiro ao incluír a toponimia como ben patrimonial no seu Plan Xeral de Ordenación Municipal, engade agora tamén información toponímica nas placas das rúas. A partir de agora, as persoas que transiten polas rúas redondelás poderán acceder, a través de códigos QR que están impresos nas placas de sinalización, á páxina web “Toponimia de Redondela” e consultar a orixe e o significado do topónimo concreto que lle dá nome a esa rúa ou lugar.

Na páxina web do Servizo de Normalización Lingüística municipal tes máis información sobre esta iniciativa.
04/11/2025. DINAMIZACIóN

O programa Elos chega a Carballo

O Servizo de Normalización Lingüística do Concello de Carballo está a implementar o programa Elos, unha iniciativa de voluntariado lingüístico deseñada orixinalmente polo Departamento de Lingua Galega do Concello de Santiago no ano 2021.

O programa ten como obxectivo facilitar o contacto entre persoas que desexan aprender e practicar o galego e persoas que queiran colaborar con elas ensinándollo. O funcionamento posterior é autónomo, partindo do compromiso dos participantes de conversar en galego, cando menos, unha hora á semana. Os encontros poden ser virtuais ou presenciais.

Se che interesa participar, na páxina web do SNL tes toda a información.
04/11/2025. DINAMIZACIóN

Café e conversa en galego na Universidade da Coruña

O Servizo de Normalización Lingüística da Universidade da Coruña promove a iniciativa Eu tamén falar, co obxectivo de construír espazos seguros de conversa oral en galego dentro da comunidade universitaria. Trátase de encontros mensuais que lle permitirán ao estudantado aprender galego ou mellorar a súa competencia lingüística, participando en pequenos grupos nun contexto informal.

Os encontros terán lugar na Casa do Estudantado (campus de Elviña), das 16:00 ás 17:00 horas, o segundo martes de cada mes, a partir do vindeiro 11 de novembro.

Para obter máis información sobre a iniciativa e os trámites de inscrición, preme aquí.
04/11/2025. INVESTIGACIóN

En liña o volume "Identidades e ideoloxías perante a diversidade lingüística"

O Consello da Cultura Galega publica o volume Identidades e ideoloxías perante a diversidade lingüística, editado por de Elisa Fernández Rei, Estela Fidalgo-Garra e Miguel Guisantes-Alonso.

A obra contén dez achegas nas que se reflexiona sobre os procesos de construción e negociación das identidades lingüísticas e das ideoloxías que as sustentan, tanto no contexto galego como noutros escenarios multilingües. Estes dez capítulos agrúpanse en dous bloques temáticos complementarios: un primeiro, que leva por título “Identidades e ideoloxías lingüísticas”, nos que se inclúen cinco traballos que analizan os modos en que se configuran as identidades lingüísticas desde diferentes posicións ideolóxicas; e un segundo, titulado “Multilingüismo e contacto de linguas”, que contén cinco achegas que poñen o foco nos espazos de contacto lingüístico, con especial atención aos contextos educativos, migratorios e familiares.

O volume está accesible na páxina web do CCG para a súa consulta ou descarga libre.
04/11/2025. DINAMIZACIóN

Novembro, mes da ciencia en galego nas bibliotecas

A Consellería de Cultura, Lingua e Xuventude presenta as actividades didácticas e divulgativas que se desenvolverán durante este mes de novembro ao abeiro do programa “Novembro, mes da ciencia en galego nas bibliotecas”, que organiza en colaboración coa , en colaboración coa Consellería de Educación, Ciencia, Formación Profesional e Universidades, e no que participan as bibliotecas públicas, as bibliotecas escolares e os equipos de dinamización da lingua galega dos centros de ensino.

Igual ca en edicións anteriores, o programa preséntase acompañado dun manifesto, que nesta ocasión asina Concepción Paz Penín, enxeñeira industrial, catedrática e doutora pola Universidade de Vigo.

Podes ampliar información sobre esta iniciativa premendo aquí.

04/11/2025. CURSOS E CONGRESOS

II Xornadas da lingua e cultura galega de Asturias

A asociación Axuntar, coa colaboración da Universidade de Oviedo, organiza as II Xornadas da lingua e cultura galega de Asturias, que se desenvolverán o 12 de decembro de 2025 no salón de actos do Departamento de Filoloxía Española da Universidade de Oviedo, baixo a coordinación de Natalia Jardón Pérez.

As xornadas queren ser unha homenaxe ao lingüista Dámaso Alonso (1898-1990), autor de diferentes traballos de investigación sobre o galego que se fala en Asturias, e nelas diferentes expertos falarán da situación sociolingüística do Eo-Navia desde a perspectiva lingüística, xurídica ou histórica.

Para coñecer o programa completo e ampliar información, preme aquí.