A Comisión de Normalización Lingüística da Facultade de Formación do Profesorado da USC, co apoio do Servizo de Normalización Lingüística, organiza un Obradoiro de apoderamento lingüístico. Consta de dúas sesións teórico-prácticas centradas na introdución de chaves para “a comprensión do actual escenario de conflito lingüístico” e “na procura de novas iniciativas coas que reforzar o galego no e a través do ensino”. O obradoiro está dirixido, de xeito preferente, ao estudantado da materia Educación e linguas en Galicia, ao alumnado dos graos en Mestre/a en Educación Infantil e Mestre/a en Educación Primaria.Conta con 30 prazas e o prazo de inscrición remata o 24 de marzo. A matrícula pode formalizarse nesta ligazón.
14/03/2022. CURSOS E CONGRESOS
14/03/2022. AXUDAS E PREMIOS
Co obxectivo fomentar o emprego da lingua nos traballos de investigación xurídica e de promover o proceso de dinamización lingüística, a Universidade de Vigo crea este premio que levará o nome de Xosé Luís Franco Grande por votación popular da propia comunidade universitaria. Segundo as bases da convocatoria, ao certame pode presentar traballos alumnado matriculado en calquera universidade española, entre os cursos 2019-2020 e 2021-2022, ata o 20 de abril de 2022.
14/03/2022. AXUDAS E PREMIOS
O IES Arcebispo Xelmírez I e a Secretaría Xeral de Política Lingüística convocan o X Certame de Banda Deseñada AXI. O concurso conta con dúas categorías (12 a 15 anos e 16 anos en diante) e poden participar nel, de xeito individual ou colectivo, estudantes de ensinanza secundaria, bacharelato e ciclos formativos de toda Galicia. O prazo de presentación de traballos remata o 30 de xuño de 2022. Podes consultas as bases completas nesta ligazón.
10/03/2022. DINAMIZACIóN
Correlingua 2022 quenta motores abrindo o prazo para presentar propostas ao concurso Cantalingua.
No certame poden participar bandas e solistas de calquera estilo musical. As cancións, preferentemente creadas para esta actividade, deben ser orixinais e cantadas integramente en galego. O premio inclúe dotación económica e a actuación en concertos polos centros participantes.
Pódense enviar composicións ata o 3 de abril de 2022.
Se desexas consultar as bases do concurso, preme aquí.
No certame poden participar bandas e solistas de calquera estilo musical. As cancións, preferentemente creadas para esta actividade, deben ser orixinais e cantadas integramente en galego. O premio inclúe dotación económica e a actuación en concertos polos centros participantes.
Pódense enviar composicións ata o 3 de abril de 2022.
Se desexas consultar as bases do concurso, preme aquí.
10/03/2022. OUTRAS
A Sega comunica que Luísa Villalta será homenaxeada o vindeiro 15 de agosto, data en que a plataforma de crítica literaria celebra o Día das Galegas nas Letras. Esta escritora e activista social veu xa recoñecido o seu compromiso coa nosa lingua a través do premio ás iniciativas normalizadoras que leva o seu nome.
10/03/2022. OUTRAS
Do 8 e o 13 de marzo de 2022, exhíbese no Teatro Colón da Coruña o mellor audiovisual galego estreado en Galicia no último ano. Nesta terceira Semana do Cinema Galego, que organiza a Academia Galega do Audiovisual, proxéctanse as finalistas a mellor película e mellor documental dos premios Mestre Mateo. O peche vaino poñer A galiña Turuleca, premio Goya á Mellor Película de Animación. A entrada é de balde pero require retirada previa en ataquilla.com.
09/03/2022. INVESTIGACIóN
O Consello da Cultura Galega vén de presentar o informe Oferta, demanda e prácticas culturais nos menores de 16 anos. Entre as conclusións deste traballo, para o que se realizaron 900 entrevistas a familias con e sen menores de 16 anos entre os seus membros, destaca a que evidencia a valoración positiva das propostas culturais en galego, puntuadas cun 6,15. Así mesmo, tamén se comprobou que a propia oferta estimula a demanda de máis produtos, especialmente de libros e videoxogos. A nota negativa pona a comparativa cos datos xerais. No que respecta á música, o 5,2% di non consumila nunca; a cifra ascende ao 37,4 % se se trata de música en galego. No caso do cinema, nove de cada dez persoas consultadas afirman que nunca asistiron a unha sesión no noso idioma. Deste estudo coñecemos un avance o pasado mes de decembro, centrado na vontade de agasallar en lingua galega. Podes consultalo na seguinte ligazón.
09/03/2022. OUTRAS
A CIG Ensino e a AS-PG presentaron onte, 8 de marzo, o libro Axeitar a lingua: orientacións para unha comunicación inclusiva no ensino, das autoras Montse Pena e María Caamaño. Trátase dun manual pensado para contribuír á formación do profesorado e fornecelo de recursos didácticos prácticos de cara á fixación de termos inclusivos e á renovación da lingua consonte os cambios que se producen na sociedade. A publicación, que comprende todas as etapas educativas de infantil a bacharelato, pode descargarse aquí.
09/03/2022. INVESTIGACIóN
O uso da lingua galega nas relacións persoais e laborais mantén a súa dinámica de descenso, segundo apunta o barómetro trimestral de Sondaxe. No estudo, informa La Voz de Galicia, confírmanse os datos do IGE, pois o castelán é a escolla maioritaria coa familia, un 40,9% fronte ao 38,4% dos que prefiren expresarse en galego. Estes datos son aínda máis preocupantes se nos fixamos na educación ou nas relacións laborais. Por franxas de idade, más da metade da poboación de entre 18 e 29 anos di empregar o castelán de forma maioritaria ou exclusiva. A enquisa recolle tamén datos por sexo, localidade ou orientación política. Podes atopar máis información neste artigo.
04/03/2022. INVESTIGACIóN
A Fundación Antonio Fraguas Fraguas convoca a duodécima edición do Proxecto Didáctico Antonio Fraguas Fraguas, que ten como obxectivo alentar entre a comunidade escolar a investigación sobre o patrimonio etnográfico, antropolóxico, lingüístico, xeográfico, histórico e artístico de Galicia. Poden participar todos os centros docentes públicos dependentes da Consellería de Cultura, Educación e Universidade da Xunta de Galicia que impartan ensinanzas de educación primaria, ESO ou bacharelato. Outorgarase un premio de 7.000 euros para o traballo gañador en cada unha das dúas modalidades: ensino primario e ensino secundario. O prazo de presentación de candidaturas remata o 20 de maio de 2022. Podes consultar as bases completas do certame premendo aquí.
04/03/2022. DINAMIZACIóN
A Comisión de Normalización Lingüística da Facultade de Matemáticas da USC, en colaboración co Servizo de Normalización Lingüística, organiza a décima edición do concurso Explícoche matemáticas 2.0, co obxectivo de promover o uso do galego como medio de transmisión do coñecemento matemático, así como a creatividade do alumnado cos medios audiovisuais. O certame está dirixido ao alumnado das universidades públicas do Estado español, estudantes de 3º e 4º da ESO, de 1º e 2º de Bacharelato e de ciclos de formación profesional dos centros de educación secundaria de Galicia e comunidades limítrofes. Para participar cómpre realizar un vídeo, dunha duración de entre 1:30 e 2:30 minutos, onde se explique en galego un tema relacionado coas matemáticas. O xurado outorgará un premio de 200 euros en cada unha das dúas categorías do certame. O prazo para enviar os proxectos remata o 31 de marzo de 2022.
04/03/2022. CURSOS E CONGRESOS
O Servizo de Normalización Lingüística do Concello de Vigo e a A.C.F. O Fiadeiro organizan un obradoiro de recollida de patrimonio oral, centrado na música popular galega. As sesións, impartidas por Mário Pereiro, terán lugar os días 10, 17, 24 e 31 de marzo de 2022, de 17:00 h a 20:00 h, no Verbum. Podes obter máis información sobre o programa e os trámites de inscrición premendo aquí.
04/03/2022. AXUDAS E PREMIOS
A Universidade de Santiago de Compostela convoca os XVIII Premios á calidade lingüística, unha iniciativa impulsada polo Servizo de Normalización Lingüística co obxectivo de vincular calidade e uso do galego no ámbito académico. Nas bases establécense quince premios que se distribúen en tres categorías: traballos académicos, traballos de fin de grao e traballos de fin de mestrado. A este premio pode optar o alumnado da USC matriculado en titulacións oficiais de grao ou mestrado no curso 2021-2022.
04/03/2022. DINAMIZACIóN
A Mesa pola Normalización Lingüística lanza Pensatermos, a versión galega do exitoso Pauralògic. Trátase dun xogo lingüístico lixeiro, para entreter e fomentar o uso do galego nas redes sociais, no que se reta aos xogadores a contruír palabras de ata sete letras a partir de unha dada. No seu desenvolvemento, A Mesa contou coa colaboración da Real Academia Galega e o Seminario de Lingüística Informática da Universidade de Vigo.
02/03/2022. DINAMIZACIóN
A Asociación Galega de Comunicación para o Cambio Social (AGARESO) presenta catro novas pezas audiovisuais da súa colección Dicionarios de ida e volta, que se suman ás seis presentadas en 2020. O obxectivo é difundir a experiencia de persoas migrantes que viven en Galicia, poñendo o foco no poder integrador que ten a lingua galega nas súas vidas. No marco deste proxecto elaboráronse tamén cinco cuñas de radio para difundir as mensaxes que promoven os vídeos e 12 carteis coas imaxes dos protagonistas. Así mesmo, organizaranse dez obradoiros didácticos en diferentes IES de Galicia.
02/03/2022. INVESTIGACIóN
GCiencia e a Secretaría Xeral de Política Lingüística publican 15 novos capítulos do Dicionario da ciencia, un recurso audiovisual que ten como propósito achegar conceptos científicos ao público xeneralista e promover o uso correcto do galego nun ámbito en que non cabe a ambigüidade e os estranxeirismos tenden a impoñerse. A primeira edición, de 2020, achegounos dez vídeos que podes consultar nesta páxina.
28/02/2022. AXUDAS E PREMIOS
A Sección de Normalización Lingüística da Deputación da Coruña convoca a décimo terceira edición do Premio Rosalía de Castro de Lingua, que ten como obxectivo recoñecer iniciativas de normalización lingüística, ou traxectorias de persoas, colectivos e entidades que destaquen polo seu compromiso coa promoción e dignificación do idioma galego. Establécense tres categorías: unha para recoñecer o labor daquela persoa que máis destaque na promoción da lingua galega de calidade; outra para a entidade que máis destaque na promoción do galego; e unha terceira para o proxecto de dinamización lingüística que estea dirixido especificamente aos sectores de menor idade (infancia e mocidade) e que atenda espazos emerxentes do uso da lingua. A dotación económica do premio é de 5.000 euros para cada unha das categorías. O prazo de presentación de candidaturas publicarase no anuncio de publicación da convocatoria elaborado a través do Sistema Nacional de Publicación de Subvencións, e rematará ás 14:00 h do 29 de abril de 2022.
28/02/2022. AXUDAS E PREMIOS
A Área de Normalización Lingüística da Universidade de Vigo convoca o premio A lingua galega en 2050, co obxectivo de promover a reflexión prospectiva sobre a situación social da lingua galega a mediados do século XXI a partir de propostas ensaísticas, literarias ou de divulgación científica. As persoas premiadas, que deberán ser alumnas da universidade, recibirán 200 euros e verán os seus traballos publicados nun volume colectivo xunto con profesionais recoñecidos no uso ou xestión política do galego. O prazo de presentación de traballos remata o 22 de abril de 2022 ás 14 h.
25/02/2022. AXUDAS E PREMIOS
Hoxe venres, 25 de febreiro de 2022, terá lugar no Paraninfo da Universidade de Santiago de Compostela, ás 19:00 h, a entrega das Medallas de Honra do Consello da Cultura Galega, unha distinción instaurada en 2018 para recoñecer o labor de persoas que sobresaen polos servizos prestados ao CCG ou á cultura galega en xeral. Nesta edición recibirán o galardón Luís García Montero, actual director do Instituto Cervantes, e Helena González, profesora de literatura galega na Universidade de Barcelona, como recoñecemento ao seu labor de promoción da lingua e cultura galegas no exterior. O acto é de acceso libre e será tamén retransmitido en directo a través da páxina web do CCG. Podes ampliar información premendo aquí.
24/02/2022. INVESTIGACIóN
A Fundación Dr. Antoni Esteve e o TERMCAT presentan o Diccionari multilingüe de la COVID-19: Cinc-cents termes per a entendre la pandemia, unha obra lexicográfica que compila 500 termos relacionados coa COVID-19, coa definición en catalán e os equivalentes en nove linguas, entre elas o galego. De fornecer os termos equivalentes no noso idioma ocupouse o TERMIGAL. A versión impresa está accesible para descarga libre e, se o prefires, tamén podes consultar a obra na súa versión en liña.
21/02/2022. AXUDAS E PREMIOS
A Deputación de Pontevedra publica as bases das subvencións dirixidas a concellos e outras entidades locais para a creación, mantemento ou reforzo dos servizos de normalización lingüística (SNL) municipais durante o ano 2022. Poden optar ás axudas para a creación de SNL os concellos de máis de 5.000 habitantes e de ata un máximo de 50.000 habitantes (así como as agrupacións de concellos, mancomunidades ou as entidades locais menores que cheguen a esa cifra mínima). No caso das axudas para mantemento e reforzo, poderán solicitalas os concellos da provincia de Pontevedra que no momento da publicación da convocatoria teñan creado e en funcionamento un SNL. O prazo de presentación de solicitudes será dun mes, contado a partir do día seguinte ao da publicación desta convocatoria.
21/02/2022. OUTRAS
A Real Academia Galega ofrece na súa páxina web a edición dixital de dúas novas publicacións dedicadas á toponimia. Trátase de Estudos de Onomástica Galega VI. A onomástica e o Camiño de Santiago e Toponimia de Tordoia.
18/02/2022. EMPREGO
A Universidade de Santiago de Compostela anuncia a convocatoria pública de contratación de persoal para colaborar en diferentes proxectos de investigación. Entre as prazas ofertadas anúnciase unha para colaborar no Instituto da Lingua Galega, concretamente, no proxecto “Contacto, cambio lingüístico e ideoloxía en contextos de minorización lingüística”. A forma de provisión é o concurso de méritos. A duración do contrato será de seis meses, cunha xornada a tempo parcial (75%). O prazo de presentación de solicitudes está aberto ata o 22 de febreiro de 2022. Para consultar as bases completas da convocatoria, preme aquí.
18/02/2022. DINAMIZACIóN
O vindeiro 21 de febreiro conmemórase o Día Internacional da Lingua Materna, unha celebración instaurada pola UNESCO en 1999 para festexar a riqueza que supón a diversidade lingüística do planeta. Neste 2022, o eixo temático elixido para as diferentes actividades é "O uso da tecnoloxía para a aprendizaxe multilingüe: desafíos e oportunidades". Como é costume, a Xunta de Galicia organizará tamén un acto institucional conmemorativo, que nesta edición terá lugar o domingo 20 de febreiro, no Xardín do Teatro da Cidade da Cultura de Galicia (Santiago de Compostela), ás 11:30 horas. O acto contará coa actuación das Tanxugueiras e do grupo infantil Trotaventos.
18/02/2022. AXUDAS E PREMIOS
O día 16 de setembro de 1915 Luís Porteiro Garea pronunciou a primeira lección en galego na Universidade e, para homenaxear a figura deste profesor de dereito civil e membro das Irmandades da Fala, a USC convoca anualmente o Premio Luís Porteiro Garea. Con este galardón, que ten carácter de distinción pública, quérese tamén recoñecer o traballo de persoas, entidades ou colectivos que traballan a prol do uso do galego na universidade. O prazo para presentar as candidaturas desta quinta edición remata o 30 de abril de 2022.
18/02/2022. DINAMIZACIóN
Despois de que a investigadora Sagrario Abelleira acreditase documentalmente que a data real de nacemento de Rosalía de Castro é o 23 de febreiro, as institucións galegas vinculadas á organización do “Día de Rosalía de Castro” acordaron que a partir de agora se celebrará nese día a homenaxe pública. Como en edicións anteriores, a Asociación de Escritores e Escritoras en Lingua Galega (AELG) convida á cidadanía a agasallar ás súas persoas queridas cun libro en galego e unha flor. A maiores, mañá sábado, 19 de febreiro, ás 12:00 h, a AELG celebrará no Panteón de Galegos Ilustres (Santiago de Compostela) o acto central de conmemoración. Outras institucións, entidades culturais e centros de ensino do país tamén están a organizar estes días diferentes actividades. No web da AELG podes ampliar información sobre esta iniciativa.
17/02/2022. DINAMIZACIóN
A Secretaría Xeral de Política Lingüística e a Dirección Xeral de Xuventude, Participación e Voluntariado da Xunta de Galicia organizan unha nova edición de Lingua de namorar, un concurso en liña de mensaxes de amor deseñado para dinamizar o uso do galego nas relacións persoais e nas novas tecnoloxías, nomeadamente en Internet e na mensaxería instantánea. O certame está dirixido a mozos e mozas de 14 a 35 anos e os gañadores de cada categoría recibirán diferentes premios tecnolóxicos. O prazo para enviar as mensaxes remata o venres 18 de marzo.
17/02/2022. AXUDAS E PREMIOS
A Comisión de Normalización Lingüística da Escola Técnica Superior de Enxeñaría da USC, co apoio do Servizo de Normalización Lingüística, convoca o "I Concurso de vídeos sobre enxeñaría informática e química", co fin de promover o uso do galego entre o alumnado da ETSE, difundir a súa oferta académica e contribuír á divulgación desta área de coñecemento. Pode participar o alumnado actual da ETSE, presentando un vídeo en galego, dun máximo de 3 minutos, de temática xeral sobre algún aspecto ou temática emerxente dos estudos impartidos na ETSE, divulgativos ou proxectos educativos para o ensino secundario. Concederanse catro premios por valor de 325 euros cada un. O prazo de presentación dos traballos remata o 29 de abril de 2022.
17/02/2022. AXUDAS E PREMIOS
A Comisión de Normalización Lingüística da Facultade de Química da USC, co apoio do Servizo de Normalización Lingüística, convoca unha nova edición do seu "Concurso de vídeos divulgativos en galego de química sostible". Pode participar calquera membro da USC, presentando un vídeo en galego, dun máximo de 3 minutos, sobre unha achega concreta da química sostible na resolución de problemas nos ámbitos da saúde, o ambiente e a industria. O prazo de presentación dos traballos remata o 20 de abril de 2022.
16/02/2022. INVESTIGACIóN
Xa podes consultar en liña a selección documental que elaborou o Consello da Cultura Galega sobre Florencio Delgado Gurriarán, homenaxeado no Día das Letras Galegas 2022. Neste especial web atoparás a súa entrada biográfica no Álbum de Galicia, un audio sonoro coa participación do autor no programa Poetas de Galicia (RNE, 1968) e unha escolma das súas composicións poéticas publicadas en diferentes revistas ou cabeceiras do exilio.