A Universidade de Málaga, coa colaboración da Asociación da Prensa de Valladolid, da Fundación Alonso Quijano e da Fundación da Prensa de Almería, está a desenvolver desde 2008 o proxecto Lingua e prensa, dedicado a compilar novas xornalísticas sobre as linguas de España e as súas variedades. Actualmente, a versión 3.0 do proxecto permite acceder a unha hemeroteca lingüística virtual con máis de 22.000 novas etiquetadas procedentes de diferentes medios de comunicación, polo que se trata dunha interesante ferramenta sociolingüística para estudosos da política lingüística e do plurilingüismo no Estado español.
05/10/2020. INVESTIGACIóN
05/10/2020. CURSOS E CONGRESOS
A Coordinadora de Traballadores/as de Normalización da Lingua, en colaboración coa Universidade de Vigo e a Secretaría Xeral de Política Lingüística da Xunta de Galicia, organiza un curso en liña sobre estratexias comunicativas dirixido especialmente a técnicos/as de servizos de normalización lingüística (SNL) e traballadores/as de empresas, asociacións ou outras entidades relacionadas coa normalización do galego. O curso, que será impartido por Emma Torres Romay, profesora titular de Estratexia Publicitaria da UVigo, desenvolverase a través do Campus Remoto da Uvigo os días 22, 23, 29 e 30 de outubro e 5 e 6 de novembro, en horario de 9:00 a 11:00 h. O prazo de inscrición será entre o 5 e o 16 de outubro de 2020. Podes ampliar información sobre os contidos e mais os trámites de inscrición premendo aquí.
01/10/2020. AXUDAS E PREMIOS
A Asociación Galega de Profesionais da Tradución e da Interpretación (AGPTI) fixo pública a resolución do xurado da terceira edición do Premio Xela Arias, que este ano 2020 acordou outorgar o galardón á cooperativa NUMAX, pola súa aposta polo galego como lingua de uso no eido audiovisual, tanto na programación habitual do seu cinema como no seu proxecto didáctico “NUMAX na escola”. A AGPTI convoca anualmente este premio co obxectivo de homenaxear a figura de Xela Arias e reivindicar o idioma galego como lingua de traballo no ámbito da tradución. Para ampliar información, preme aquí.
28/09/2020. DINAMIZACIóN
Mañá, 29 de setembro de 2020, comeza no Forum Metropolitano da Coruña o festival de narración oral “Falando a boca chea”, que se celebrará en diferentes sesións ata o vindeiro 3 de outubro. Trátase dunha iniciativa, organizada desde 2017 pola empresa de xestión cultural Artestudio, coa colaboración do Concello da Coruña, que pretende achegar a todos os públicos a arte da narración oral en lingua galega. Para consultar o programa completo ou obter información sobre as canles de venda de entradas, preme aquí.
25/09/2020. OUTRAS
O Consello de Europa festexa un ano máis, desde que se instaurou esta celebración en 2001, o Día Europeo das Linguas, co obxectivo de promover a diversidade lingüística de Europa e fomentar o plurilingüismo entre a cidadanía. No sitio web que o Consello de Europa desenvolveu con motivo desta celebración atoparás máis información sobre a riqueza cultural que supón o multilingüismo europeo. Pola súa parte, o Consello da Cultura Galega tamén se adheriu a esta conmemoración participando na mesa redonda “Comunidade e diversidade. O futuro do multilingüismo en Europa”, que tivo lugar o xoves 24 de setembro na sede do Instituto Cervantes en Berlín.
25/09/2020. CURSOS E CONGRESOS
A Real Academia Galega retoma a celebración das Letras Galegas que fora adiada o pasado mes de maio, coa celebración o vindeiro mes de outubro do Simposio Ricardo Carbalho Calero 2020. O evento desenvolverase en catro sesións, que terán lugar os días 8, 15, 22 e 29 de outubro na sede da institución, na rúa Tabernas da Coruña. Poderase asistir presencialmente, previa inscrición. Con todo, todas as sesións serán tamén difundidas en directo a través da páxina web da RAG. Para ampliar información, preme aquí.
25/09/2020. DINAMIZACIóN
O Concello de Melide e a Asociación de Empresarios Terra de Melide (Asetem), en colaboración co Foro Enrique Peinador e a Xunta de Galicia, presentaron publicamente a campaña “Os nosos prudutos, en galego”, co obxectivo de asociar o uso do galego na etiquetaxe comercial coa marca de calidade e autenticidade do produto. No marco desta campaña distribuiranse entre os establecementos comerciais e empresas da comarca Terra de Melide carteis e dípticos informativos sobre as vantaxes da etiquetaxe en galego por parte das empresas, e sobre a importancia do consumo de produtos de proximidade por parte da cidadanía.
24/09/2020. CURSOS E CONGRESOS
O Departamento de Lingua Galega do Concello de Santiago de Compostela organiza un obradoiro de acollemento lingüístico, dirixido a persoas adultas procedentes doutras comunidades lingüísticas que queiran realizar un primeiro achegamento ao galego e á nosa realidade cultural e social. O obradoiro estrutúrase en 18 sesións, que se desenvolverán entre o 13 de outubro e o 15 de decembro de 2020. Para ampliar información sobre esta actividade, así como sobre os trámites de inscrición, preme aquí.
24/09/2020. CURSOS E CONGRESOS
O Servizo de Normalización Lingüística do Concello de Vigo organiza o obradoiro “Recursos informáticos para traballar en galego”, dirixido a todas aquelas persoas que desexen ampliar os seus coñecementos sobre este tema. As sesións terán lugar os días 13, 15, 20, 22, 27 e 29 de outubro de 2020 no Auditorio do Mar de Vigo. A inscrición debe tramitarse a través deste formulario web, indicando no título da actividade “recursos informáticos”. Podes ampliar información sobre o programa desta actividade premendo aquí.
23/09/2020. DINAMIZACIóN
A Área de Normalización Lingüística da Universidade de Vigo e mais o Servizo de Normalización Lingüística do Concello de Pontevedra promoven un programa de dinamización lingüística deseñado para crear novos espazos de uso para o galego no campus de Pontevedra. Se estudas neste campus e estás interesado/a en coñecer xente e realizar actividades divertidas en galego, xa podes adherirte ao programa Falamos, e a partir do vindeiro 5 de outubro terás oportunidade de inscribirte nas diferentes actividades que se desenvolverán no marco desta iniciativa: club de lectura, curso de cociña, visionamento de películas ou voluntariado lingüístico, entre outras. Podes ampliar esta nova premendo aquí.
22/09/2020. OUTRAS
No marco do acordo institucional asinado o pasado mes de maio, o Instituto Cervantes, o Institut Ramón Llull, o Etxepare Euskal Institutua e o Consello da Cultura Galega organizan a mesa redonda “Comunidade e diversidade. O futuro do multilingüismo en Europa”, que terá lugar o vindeiro xoves, 24 de setembro, a partir das 19:00 h na sede do Instituto Cervantes de Berlín, e que tamén poderás seguir a través de Youtube. No acto, deseñado para festexar o Día Europeo das Linguas, participarán Ramón Villares, Juan José Alvarez, Luis García Montero, María José Gálvez, Dieter Ingenschay e Jordi Amat.
18/09/2020. DINAMIZACIóN
Tras o éxito da campaña para demandar a creación dunha canle “Xabarín Club” que emita as 24 horas contidos en galego na TVG, A Mesa pola Normalización Lingüística anuncia que promoverá unha proposición non de lei de iniciativa popular, co obxectivo de que o Parlamento de Galicia inste ao goberno galego a incrementar a programación infantil e xuvenil en lingua galega na TVG a través da creación dunha canle “Xabarín”. Así mesmo, demandarase a creación dunha aplicación informática con programas e xogos, que se garanta a opción dobrada e subtitulada ao galego nas plataformas dixitais e mais na programación infantil e xuvenil de TVE, así como a adopción das medidas necesarias que permitan a recepción mutua RTP – TVG en Galicia e Portugal. Podes ampliar esta nova premendo aquí
16/09/2020. EMPREGO
A Universidade de Santiago de Compostela anuncia a convocatoria pública de contratación de persoal para colaborar en diferentes proxectos de investigación. Entre as prazas ofertadas anúnciase unha con perfil lingüístico para colaborar no proxecto “Anotación e revisión dos textos do Corpus de textos galegos escritos por estudantes no ámbito académico (CORTEGAL)”, que se está a desenvolver no Instituto da Lingua Galega. A forma de provisión é o concurso de méritos. A duración do contrato será de seis meses. O prazo de presentación de solicitudes remata o 18 de setembro de 2020. Para consultar as bases completas da convocatoria, preme aquí.
A Universidade de Santiago de Compostela anuncia a convocatoria pública de contratación de persoal para colaborar en diferentes proxectos de investigación. Entre as prazas ofertadas anúnciase unha con perfil lingüístico para colaborar no proxecto “Anotación e revisión dos textos do Corpus de textos galegos escritos por estudantes no ámbito académico (CORTEGAL)”, que se está a desenvolver no Instituto da Lingua Galega. A forma de provisión é o concurso de méritos. A duración do contrato será de seis meses. O prazo de presentación de solicitudes remata o 18 de setembro de 2020. Para consultar as bases completas da convocatoria, preme aquí.
11/09/2020. OUTRAS
O sitio web Heavens-Above, no que se difunde información sobre astronomía e permite observar e rastrexar satélites orbitando a Terra, ofrece agora tamén a posibilidade de consultar o mapa celeste cos nomes das constelacións en lingua galega. Este traballo de tradución, desenvolto polo físico da USC Salva Bará e o divulgador científico Martin Pawley, supón un novo pulo para a normalización do noso idioma no ámbito da ciencia.
11/09/2020. OUTRAS
O Núcleo de Estudos Galegos da Universidade Federal Fluminense (UFF) , en colaboración con diferentes grupos de investigación lingüística desta universidade, organiza a mesa redonda en liña "Galego-Portugês-Brasileiro. Relações históricas", que terá lugar o vindeiro martes, 15 de setembro de 2020. Nela participarán os lingüistas Henrique Monteagudo (Universidade de Santiago de Compostela); Fernando Venâncio (Universidade de Amsterdam) e Marcos Bagno (Universidade de Brasília). Podes seguila en directo a partir das 21 h desde a canle de Youtube do Núcleo de Estudos Galegos da UFF.
09/09/2020. OUTRAS
A Secretaría Xeral de Política Lingüística publicou o pasado de mes de marzo de 2020 a convocatoria de probas para a obtención dos certificados de lingua galega (niveis Celga 1, 2, 3 e 4), que posteriormente foron adiadas ata o mes de setembro e/ou outubro de 2020 por mor da crise sanitaria ocasionada pola Covid-19. As datas concretas de realización destas probas publícanse hoxe, 9 de setembro, no Diario Oficial de Galicia e podes consultalas premendo aquí.
04/09/2020. DINAMIZACIóN
O Festiletras, o programa cultural co que anualmente a Fundación Eduardo Pondal conmemora en maio as Letras Galegas e que tivo que adiarse este ano por mor da Covid-19, estase a celebrar estes días nun formato adaptado ás actuais circunstancias sanitarias pero sen perder un chisco da súa esencia. O Esencia Festiletras encherá a aldea do Couto (Ponteceso) de música, obradoiros didácticos, divulgación científica e diversas actividades lúdicas e culturais entre o 31 de agosto e o 6 de setembro de 2020. Podes consultar o programa completo premendo aquí.
25/08/2020. EMPREGO
O Concello de Noia publica as bases da convocatoria para a selección, mediante o sistema de concurso-oposición, dun funcionario/a interino/a para prover temporalmente o posto de técnica/o de normalización lingüística. Así mesmo, crearase unha bolsa de traballo coas persoas candidatas que superaron as probas do proceso selectivo. O nomeamento do funcionario/a realizarase a xornada parcial (50% da xornada ordinaria), ata o 31 de decembro de 2020. O prazo para a presentación de solicitudes remata o vindeiro 3 de setembro. Podes consultar o texto completo da convocatoria premendo aquí.
25/08/2020. CURSOS E CONGRESOS
A Consellería de Educación, Universidade e Formación Profesional convoca cursos de linguaxe administrativa galega e mais cursos preparatorios para a obtención dos certificados de lingua galega (Celga), que se impartirán nas escolas oficiais de idiomas de Galicia no curso 2020/2021. Os cursos de linguaxe administrativa están dirixidos ao persoal das administracións autonómica e local galegas, así como ao da Administración periférica do Estado en Galicia, exceptuando o persoal docente e sanitario. Aos cursos preparatorios dos Celga poderán asistir todas as persoas maiores de dezaseis anos interesadas. O prazo para presentar as solicitudes abranguerá desde o 2 ata o 11 de setembro de 2020, para os cursos do primeiro cuadrimestre, e desde o 5 ata o 15 de xaneiro de 2021, para os cursos do segundo cuadrimestre. Para consultar o texto completo da convocatoria, preme aquí. [Corrección de erros do texto da convocatoria]
25/08/2020. EMPREGO
A Consellería de Cultura e Turismo publica o concurso público de dez bolsas de formación no Centro Ramón Piñeiro para a Investigación en Humanidades. Os/as beneficiarios/as colaborarán nos seguintes proxectos: Dicionario galego-italiano (Galita), Bibliografía da literatura galega, Fraseoloxía Galega, Corpus de referencia do galego actual (Corga), Cantigas de Santa María, Prosa literaria medieval, Terminoloxía científico-técnica, Recursos para o desenvolvemento das tecnoloxías da fala, Base de datos do ALIR e Dicionarios de literatura. O prazo de presentación de solicitudes é dun mes, contado a partir do día seguinte ao da publicación desta convocatoria.
25/08/2020. AXUDAS E PREMIOS
O Concello de Ponteareas convoca a segunda edición do Premio “Ponteareas, lingua e empresa”, co obxectivo de promover o uso do galego no ámbito empresarial e, ao mesmo tempo, recoñecer publicamente o compromiso coa normalización lingüística das empresas e profesionais deste sector. Concederase un premio por cada unha das seguintes categorías: “uso continuado da lingua galega”, “incorporación recente ao uso da lingua galega” e “traxectoria do uso da lingua galega ao longo de décadas”. O prazo de presentación de candidaturas remata o vindeiro 3 de setembro. Podes consultar as bases do premio premendo aquí.
24/08/2020. EMPREGO
O Concello de Sada convoca un proceso selectivo para a elaboración dunha bolsa de emprego para a contratación dun/dunha técnico/a de normalización lingüística. O sistema de selección será o de oposición. Os/as aspirantes deben estar en posesión do título de licenciatura en Filoloxía Galega-Portuguesa, Filoloxía Galega ou Filoloxía Hispánica (subsección Galego-Portugués), grao en Lingua Galega, ou calquera outra licenciatura/grao sempre que acrediten o Celga 5. O prazo para a presentación de solicitudes remata o 24 de agosto. Podes consultar as bases completas da convocatoria premendo aquí.
24/07/2020. DINAMIZACIóN
Neste último xoves de xullo convídamoste a misturar letras e ciencias con dous novos taboleiros de Pinterest: Enredad@s coa literatura e Enredad@s coa ciencia e a tecnoloxía. No primeiro, atoparás diferentes recursos literarios en formato dixital para público infantil e xuvenil. No segundo, ofrécemosche unha selección de contidos en galego sobre ciencia e tecnoloxía. Con eles pechamos a serie de seis taboleiros temáticos que integran o produto documental Galego 2.0, onde tes ao teu dispor unha selección de 150 recursos en liña deseñados para fomentar o uso da lingua galega entre a infancia e a mocidade.
23/07/2020. DINAMIZACIóN
Despois de tres semanas enredad@s co lecer (a música, o adiovisual e os xogos), nesta cuarta entrega de Galego 2.0 centrámonos no ensino, un ámbito de especial relevancia para a normalización do noso idioma. No taboleiro Enredad@s co ensino atoparás unha selección de repositorios e recursos didácticos en liña deseñados para servir de apoio á docencia en galego nas diferentes etapas educativas. O vindeiro xoves, último deste mes de xullo, pecharemos a serie cun par de taboleiros dedicados ás letras e ás ciencias.
23/07/2020. DINAMIZACIóN
O Servizo de Normalización Lingüística da Mancomunidade de Ordes está a desenvolver, como vén sendo habitual os últimos veráns, a súa xincana lingüística, unha iniciativa deseñada para crear espazos de uso para o galego no tempo de lecer dos máis pequenos. As actividades, dirixidas a nenos e nenas dos primeiros cursos do ensino primario, desenvolveranse durantes os meses de xullo e agosto, e os/as participantes, ademais de divertirse nun clima favorable ao uso do galego, terán a oportunidade de aprender léxico deportivo e descubrir información sobre deportistas galegos/as. Para obter máis información preme aquí.
20/07/2020. DINAMIZACIóN
Co gallo do 25 aniversario do primeiro procedemento xudicial instruído integramente en lingua galega, a Irmandade Xurídica Galega, a Asociación de Funcionarios para a Normalización Lingüística e a Secretaría Xeral de Política Lingüística da Xunta de Galicia promoveron a “Declaración de Celanova”, nun acto que tivo lugar o pasado 16 de xullo de 2020 no Xulgado de 1ª Instancia e Instrución desta vila ourensá. Trinta e oito alcaldes e alcaldesas da provincia de Ourense asistiron ao acto e, en representación dos seus respectivos concellos, asinaron esta declaración comprometéndose publicamente a usar o idioma galego nas súas relacións coas notarías e xulgados, e a solicitarlles así mesmo aos órganos xurisdicionais que tamén empreguen a lingua galega nas resolucións que diten.
20/07/2020. DINAMIZACIóN
O Servizo de Normalización Lingüística do Concello de Pontevedra e a Área de Normalización Lingüística da Universidade de Vigo presentan o programa “Falamos”, deseñado en colaboración por ambas as dúas entidades co obxectivo de conseguir neofalantes en galego no Campus de Pontevedra. O programa, que está dirixido especialmente ao alumnado de primeiro curso, botará a andar a partir do vindeiro setembro e incluirá diversas actividades de carácter lúdico (como obradoiros, clubes de lectura ou cursos de cociña) pensadas para fomentar a creación de novos espazos de uso para o noso idioma. Se desexas ampliar información, preme aquí.
16/07/2020. DINAMIZACIóN
Xa podes consultar en liña o taboleiro temático Enredad@s cos xogos, a terceira entrega do produto documental Galego 2.0, elaborado polo Centro de Documentación Sociolingüística do Consello da Cultura Galega co obxectivo de difundir e darlles visibilidade a recursos dixitais deseñados para promover o galego entre a infancia e a mocidade. Despois dos taboleiros sobre música e audiovisual que presentamos en semanas anteriores, continuamos co ámbito do lecer e ofrecémosche nesta ocasión unha selección de xogos interactivos en liña, videoxogos, pasatempos (encrucillados, sopas de letras, enforcados, xeroglíficos…), exemplos de actividades para o tempo libre e mesmo unha guía de recursos sobre o patrimonio lúdico galego. Nos vindeiros xoves de xullo completaremos a serie con máis iniciativas relacionadas co ensino, a literatura, a ciencia e a tecnoloxía.
16/07/2020. AXUDAS E PREMIOS
A Deputación de Pontevedra publica as bases das subvencións dirixidas a concellos e outras entidades locais para a creación, mantemento ou reforzo dos servizos de normalización lingüística (SNL) municipais durante o ano 2020. Poden optar ás axudas para a creación de SNL os concellos de máis de 5.000 habitantes e de ata un máximo de 50.000 habitantes (así como as agrupacións de concellos, mancomunidades ou as entidades locais menores que cheguen a esa cifra mínima). No caso das axudas para mantemento e reforzo, poderán solicitalas os concellos da provincia de Pontevedra que no momento da publicación desta convocatoria teñan creado e en funcionamento un SNL. O prazo de presentación de solicitudes é dun mes, contado a partir do día seguinte ao da publicación desta convocatoria.
16/07/2020. AXUDAS E PREMIOS
A Deputación da Coruña publica a resolución definitiva da convocatoria de subvencións a concellos e outras entidades locais da provincia da Coruña para a creación, mantemento e reforzo dos servizos de normalización lingüística (SNL) durante o ano 2020. Para consultar o texto completo da resolución, preme aquí.