Pablo Figueroa

Licenciado en Dereito pola Universidade de Santiago de Compostela. Pertence ao Corpo de Letrados da Administración da Seguridade Social e ao Corpo Nacional de Secretarios de Cámaras Oficiais da Propiedade Urbana. Foi xefe da Secretaría do Ministro da Presidencia (1974-1976), xefe da Asesoría Xurídica Provincial da Seguridade Social (1976-82), secretario xeral técnico da Consellería de Traballo, Seguridade Social e Emigración da Xunta de Galicia (1982-1986), secretario xeral técnico da Consellería de Agricultura (1986-1987), secretario xeral técnico da Consellería de Sanidade (1987-1990), vicesecretario xeral técnico da Consellería da Presidencia e Administración Pública (1990-1993) e secretario xeral da Consellería da Presidencia e Administración Pública. É diplomado en Asuntos Comunitarios polo Ministerio Español de Asuntos Exteriores. Desde abril de 2009 foi director da Escola Galega de Administración Pública ata xuño de 2012. A partir desa data foi nomeado Conselleiro Laboral da Embaixada de España en Brasil, cargo que ocupou ata o ano 2017. Desde este posto non só exerceu tarefas correspondentes ao seu cargo, senón que tamén traballou moi intensamente a prol da proxección da cultura galega no mundo lusófono. Un exemplo senlleiro deste labor foi a súa colaboración exercendo de eixe entre as institucións públicas galegas, españolas e brasileiras na coordinación da itinerancia por Brasil da exposición organizada polo Consello da Cultura Galega: Os adeuses. Fotografías de Alberto Martí durante os anos 2014, 2015 e 2016. A mostra percorreu as cidades de Santos, Salvador de Baía, São Paulo, Río de Xaneiro, Brasilia, Curitiba, Belo Horizonte, Manaus e Pernambuco. A coordinación de Pablo Figueroa desta itinerancia, en colaboración cos directores das distintas sedes do Instituto Cervantes en Brasil, foi moi relevante para o éxito da exposición neste país.