Xosé Ramón López Boullón

Filólogo. Profesor de Lingua Galega e Literatura de ensino secundario, en Santiago de Compostela cunha ampla formación e experiencia docente: Prácticas no IES Xelmírez II, no ano 1992, profesor de apoio no Colexio Manuel Peleteiro de Santiago de Compostela, no curso 1992-1993. Amais de exercer como profesor de cursos de lingua galega de Iniciación e Perfeccionamento, Linguaxe administrativa e xurídica, en diferentes niveis, desde o máis básico aos máis avanzados e para non galegofalantes; convocados por diferentes institucións: DXPL, EGAP, Escola de Práctica Xurídica, USC, Concello de Santiago e, nos Cursos de especialización en lingua galega para mestres, entre os anos 1992 e 2002. Asesor lingüístico, responsable do Gabinete de Normalización Lingüística da Federación de Empresarios do Barbanza, con sede social en Boiro (1994-1995), na TVG (1996-1998), na Editorial Compostela S.A. no Grupo Correo Gallego. Asesor do tribunal cualificador nas probas de habilitación de guías de turismo de Galicia (1998); supervisor lingüista, no Parlamento de Galicia (1999-2000) e lingüista no xornal Galicia Hoxe (2004-2008). Labores de tradución e corrección lingüística no xornal El Correo Gallego e O Correo Galego, o Día das Letras Galegas (1992); para a empresa FAX LINGUA (1993); para a Sociedade Anónima de Desenvolvemento Comarcal (1996) ou para a CRTVG (1997), entre outras entidades. Formador de formación continua na TVG (1999-2000). Técnico do Proxecto Toponimia de Galicia entre os anos 2000 e 2007. Entre os seus relatorios e publicacións cómpre mencionar: “O uso do Galego no eido comercial na Barbanza”, nas Xornadas Informativas “VÉNDÉR EN GALÉGO”, no Concello de Monterroso (1995); sobre “O prestixo de usar a nosa Lingua”, número 13 da revista A península do Barbanza; o uso do cómic na aprendizaxe de linguas, na revista Materiales, número 22. Consejería de Educación. Embajada de España (1996) ou sobre metodoloxía da enquisa toponímica: materiais e procedementos, ou “o monolingüismo na aldea global” e a “Conservación da toponimia”, no xornal Galicia Hoxe (2000) ou arredor da “Toponimia en Santiago de Compostela, un núcleo urbano no mundo rural”; no citado I Congreso Internacional de Onomástica Galega Frei Martín Sarmiento (2002); “A Onomástica. A ciencia dos nomes I”, “A Onomástica. A ciencia dos nomes II. O patronímico La Salle”, na revista Eidos do Colexio La Salle. Núm. 46, xaneiro- marzo (2006) e Núm 50, abril-xuño (2007), respectivamente. A elaboración do xogo didáctico aTOPando Compostela xunta Gonzalo Navaza, Luz Mendez e Xulia Marqués; editado pola Concellaría de Normalización Lingüística do Concello de Santiago (2010). E, con carácter semanal, a publicación dun artigo semanal no xornal Galicia Hoxe coa denominación “Retallos dunha época”. Entre as máis próximas no tempo citar a charla sobre a didáctica da toponimia nas Xornadas de toponimia no ensino, en 2019 e tamén Os paseos “de que falam as rúas de Compostela”, polo barrio de San Pedro ou a monografía “A Toponimia de Ames”, na Colección Terra Nomeda da RAG e “A Compostela de Scórpio. A Compostela de Ricardo Carvalho Calero” (2019). Foi membro da Asociación Cultural Brincadeira (1980-1984); secretario da Asociación Cultural Iberoamericana de Galicia (1985-1987); secretario da Asociación de Veciños Casco Antigo de Santiago (1993-1994); vogal da Coordinadora de Traballadores/as de Normalización da Lingua (CTNL) entre 1999 e 2002, e secretario entre 2002 e 2004, volvendo ser vogal, actualmente, desde o ano 2023. Membro da Asociación galega de Onomástica e socio da Asociación Cultural O Galo.